42
1 တုၤနုၤတစုစီၤယိၤဘးစံးဆၢက့ၤယွၤ,
2 ယွၤဧၢ, ယသ့ၣ်ညါလၢနသ့တၢ်လၢာ်, ဒီးတၢ်တြီနတိာ်တၢ် တသ့ဘၣ်နီတမံၤဘၣ်.
3 နစံးလၢ, ဖဲယတၢ်သ့ၣ်ညါနၢ်ပၢၢ်တအိၣ်ဘၣ်နီတစဲးန့ၣ်ယသံ ကွၢ်နတၢ်ကူၣ်ဘၣ်ကူၣ်သ့ဘူၣ်ဒ်လဲၣ်. ယကတိၤတ့ၢ်တၢ်လၢ
ယတနၢ်ပၢၢ်တဖၣ်အဂ့ၢ်, တၢ်လၢအလီၤလးကဲၣ်ဆိးလၢယဂီၢ်
ဒ်သိးယကသ့ၣ်ညါအီၤတဖၣ်အဂ့ၢ်လီၤ.
4 နစံးဘၣ်တ့ၢ်ယၤလၢဖဲနကတိၤတၢ်အခါန့ၣ်ယကဘၣ်ဒိကနၣ်နၤ, ဒီးဂုာ်ကျဲးစၢစံးဆၢနတၢ်သံကွၢ်တဖၣ်လီၤ.
5 လၢအပူၤကွံာ်န့ၣ်ယနၢ်ဟူတ့ၢ်နဂ့ၢ်ထဲဒၣ်လၢယနၢ်လီၤ. မ့မ့ၢ်ခဲကနံၣ်အံၤယထံၣ်ဘၣ်လံနၤလၢယမဲာ်ချံဒၣ်ယဲလံ.
6 မၤသးဒ်န့ၣ်, ဒီးယမဲာ်ဆှးလၢကယဲၢ်တၢ်လၢယစံးတ့ၢ်ယဲ ဒီးပီၢ်ယၢ်လီၤက့ၤယသးလၢဟီၣ်ခိၣ်ကမူၣ်ဒီးဖၣ်ဆါအကျါလီၤ.
7 တုၤယွၤကတိၤတၢ်ဒီးစီၤယိၤဘးဝံၤဒီး, စံးဘၣ်ပှၤတ့ၤမၣ်ဖိ စီၤအလံဖးစး, ယသးထီၣ်နၤဒီးနတံၤသကိးခံဂၤန့ၣ်လီၤ. အဂ့ၢ်ဒ်အံၤ, နတစံးကတိၤတၢ်လၢယဂ့ၢ်ယကျိၤလၢအတီအလိၤ
ဒ်ယခ့ယပှၤစီၤယိၤဘးစံးတ့ၢ်အသိးန့ၣ်လီၤ.
8 ဒီးခဲကနံၣ်အံၤ, ဟံးန့ၢ်ဂီၤဖံးဖါနွံဒုဒီးသိဖါနွံဒုဒီးလဲၤဆူယခ့ ယပှၤစီၤယိၤဘးအအိၣ်ဒီးလုၢ်ထီၣ်တၢ်လုၢ်မ့ၣ်အူလၢသုဂီၢ်
တက့ၢ်. စီၤယိၤဘးကဘါထုကဖၣ်တၢ်လၢသုဂီၢ်ဒီးယကစံး
ဆၢအတၢ်ထုကဖၣ်လီၤ. ဒီးယတမၤတရီတပါသုဒ်သုကြၢး
ဒိးန့ၢ်ဝဲအသိးန့ၣ်ဘၣ်. သုတစံးတၢ်လၢယဂ့ၢ်ယကျိၤလၢ
အတီအလိၤဒ်အစံးတ့ၢ်ဝဲအသိးန့ၣ်ဘၣ်.
9 ဒီးပှၤတ့ၤမၣ်ဖိစီၤအလံဖးစး, ပှၤရူၤဃးဖိစီၤဘံးလဒးဒီး ပှၤနၤမးဖိစီၤဖိဖၢ်မၤဝဲဒ်ယွၤစံးဘၣ်တ့ၢ်အီၤအသိး,
ဒီးယွၤစံးဆၢစီၤယိၤဘးအတၢ်ထုကဖၣ်န့ၣ်လီၤ.
10 တုၤစီၤယိၤဘးဘါထုကဖၣ်တၢ်လၢအတံၤသကိးသၢဂၤ အဂီၢ်ဝံၤအလီၢ်ခံန့ၣ်, ယွၤမၤဘီၣ်ထီၣ်ညီထီၣ်ကဒါက့ၤကဒီး
အီၤ, ဒီးဟ့ၣ်အီၤတၢ်လၢအအိၣ်တ့ၢ်ဒီးအီၤလၢညါခံစးန့ၣ်လီၤ.
11 စီၤယိၤဘးအဒီပုၢ်ဝဲၢ်ခွါဒီးဒီပုၢ်ဝဲၢ်မုၢ်ခဲလၢာ်, ဒီးအတံၤသကိးလၢထံးလၢမကိာ်ခဲလၢာ်န့ၣ်ဟဲဆူအအိၣ်ဒီးအီၣ်
တၢ်လၢအဟံၣ်ပူၤလီၤ. အဝဲသ့ၣ်ပာ်ဖျါထီၣ်အတၢ်သးတမုာ်
ဒီးမၤမုာ်အီၤလၢကယဲၢ်တၢ်ကိၢ်တၢ်ဂီၤလၢယွၤဟဲစိာ်န့ၢ်လၢ
အဖီခိၣ်န့ၣ်လီၤ. အဝဲသ့ၣ်ကိးဂၤဒဲးဟ့ၣ်အီၤလၢစ့တနီၤဒီး
ပသံးထူတဘိစုာ်စုာ်န့ၣ်လီၤ.
12 ဒီးယွၤဆိၣ်ဂ့ၤစီၤယိၤဘးအတၢ်အိၣ်မူလၢခံတပတီၢ်အါန့ၢ် ဒံးအဆိၣ်ဂ့ၤတ့ၢ်အီၤလၢအခီၣ်ထံးန့ၣ်လီၤ. စီၤယိၤဘးအိၣ်ဝဲဒီးသိတကလးလွံၢ်ကထိ, ကီၤလၤအူးဃု
ကထိ, ဂီၤဖံးအဆိတကထိဒီးကသ့ၣ်ယီၤမိၢ်တကထိလီၤ.
13 ဒီးအဝဲအိၣ်ဒီးအဖိခွါနွံဂၤဒီးအဖိမုၣ်သၢဂၤန့ၣ်လီၤ.
14 ဒီးအခီၣ်ထံးတဂၤအမံၤန့ၣ်ကိးဝဲလၢနီၢ်ယမံမၤ, ဒီးခံဂၤတဂၤအမံၤမ့ၢ်ဝဲနီၢ်ကစံဧၤ, ဒီးသၢဂၤတဂၤအမံၤမ့ၢ်
နီၢ်က့ရၣ်ဟးပူးန့ၣ်လီၤ.
15 ဒီးပိာ်မုၣ်တဖၣ်လၢအက့ၢ်အဂီၤဂ့ၤဒ်စီၤယိၤဘးအဖိမုၣ်တဖၣ် အသိးလၢကီၢ်ဒီဘ့ၣ်ညါအပူၤန့ၣ်တအိၣ်ဘၣ်. ဒီးအပၢ်ဟ့ၣ်
လီၤတၢ်န့ၢ်သါလၢအဝဲသ့ၣ်အဂီၢ်လၢအဒီပုၢ်ဝဲၢ်ပိာ်ခွါအကျါ
န့ၣ်လီၤ.
16 တၢ်န့ၣ်အလီၢ်ခံစီၤယိၤဘးမူဒံးဝဲအနံၣ်တကယၤလွံၢ်ဆံ, ဒီးထံၣ်ဘၣ်အဖိခွါတဖၣ်, ဒီးအဖိခွါတဖၣ်အဖိခွါလွံၢ်စိၤ လီၤ.
17 ဒီးစီၤယိၤဘးသံဝဲလၢအမှံၤတုာ်ပှၢ်တီၤအကတီၢ်, ပှဲၤဒီးနံၣ်အါလါအါန့ၣ်လီၤ.
-