9
1 ဖဲကီၢ်အံၣ်စရ့လးအပှၤဂီၢ်မုၢ်ဟးထီၣ်ကွံာ်လၢကီၢ်အဲၤကူပတူး အလီၢ်ခံ,ပူၤကွံာ်ခံနံၣ်တနံၣ်, လၢအခီၣ်ထံးကတၢၢ်တလါန့ၣ်ယွၤကတိၤတၢ်ဒီးစီၤမိၤၡ့လၢ ကစၢၢ်စံၤနါအပှၢ်မုၢ်ကနၢအပူၤန့ၣ်, ဒီးစံးဝဲဒၣ်,
2-3 “ဖဲလါအံၤထီၣ်တဆံလွံၢ်သီတသီအနံၤ, စးထီၣ်လၢမုၢ်လီၤနုာ်န့ၣ်, ကီၢ်အံၣ်စရ့လးအပှၤဂီၢ်မုၢ်ကဘၣ်မၤဘူၣ်လဲၤကပာ်ဒ်အတၢ်သိၣ် တၢ်ဘျၢအိၣ်ဝဲဒၣ်အသိးန့ၣ်လီၤ.”
4 မၤသးဒ်န့ၣ်ဒီး, စီၤမိၤၡ့တဲဘၣ်ပှၤဂီၢ်မုၢ်လၢကမၤဘူၣ်လဲၤကပာ်,
5 ဒီးလၢလါအခီၣ်ထံးကတၢၢ်တလါထီၣ်တဆံလွံၢ်သီတသီ အဟါန့ၣ်အဝဲသ့ၣ်မၤတ့ၢ်ဝဲဒ်န့ၣ်လၢကစၢၢ်စံၤနါအပှၢ်မုၢ်ကနၢ အပူၤန့ၣ်လီၤ. ပှၤဂီၢ်မုၢ်မၤတ့ၢ်တၢ်ကိးမံၤဒဲးဒ်ယွၤမၤလိာ်စီၤမိၤၡ့ အသိးန့ၣ်လီၤ.
6 ဘၣ်ဆၣ်ဒီးပှၤအိၣ်ဝဲဒၣ်တနီၤလၢတကဆှီဘၣ်ဒ်တၢ်ဘူၣ်တၢ်ဘါအလုၢ် အလၢ်အသိးမ့ၢ်လၢအဝဲသ့ၣ်ထိးဘၣ်တ့ၢ်တၢ်သံစိၣ်တခါအဃိ, ဒီးအဝဲသ့ၣ်မၤဘူၣ်လဲၤကပာ်လၢမုၢ်တနံၤန့ၣ်တသ့ဘၣ်န့ၣ်လီၤ. အဝဲသ့ၣ်လဲၤဆူစီၤမိၤၡ့ဒီးစီၤအၤဟရိၣ်အအိၣ်,
7 ဒီးစံးဝဲဒၣ်, “ပတကဆှီဘၣ်လၢပထိးဘၣ်တၢ်သံစိၣ်တခါအဃိ လီၤ. ဘၣ်ဆၣ်ဒီးဘၣ်မနုၤအဃိလၢပကဘၣ်တၢ်ထုးထီၣ်ကွံာ် ပှၤလၢတၢ်လုၢ်ထီၣ်တၢ်လုၢ်မၤဘူၣ်ဆူယွၤအအိၣ်ဃုာ်ဒီးပှၤ အံၣ်စရ့လးဖိအဂၤန့ၣ်လဲၣ်.”
8 ဒီးစီၤမိၤၡ့စံးဆၢဝဲ, “အိၣ်ခိးတုၤယဒိးန့ၢ်ဘၣ်တၢ်နဲၣ် ကျဲလၢယွၤအအိၣ်တက့ၢ်.”
9-10 ယွၤစံးဘၣ်စီၤမိၤၡ့, တၢ်လၢကဘၣ်တဲကီၢ်အံၣ်စရ့လးအပှၤဂီၢ်မုၢ်ဒ်အံၤ, “ဖဲသုဝဲတဂၤဂၤမ့ၢ်ဂ့ၤ, သုစၢၤနသွဲၣ်တဖၣ်မ့ၢ်ဂ့ၤတကဆှီဘၣ်လၢအထိးဘၣ်တၢ်သံစိၣ် အဃိမ့တမ့ၢ်, လဲၤတၢ်ဆူတၢ်လီၢ်အယံၤအဃိဒီး, မ့ၢ်သးအိၣ်မၤဒံးဘူၣ်လဲၤကပာ်န့ၣ်,
11 သုကဒိးန့ၢ်ဘၣ်တၢ်ပျဲလၢသုကမၤအီၤလၢခံတလါ, ဖဲလါခံလါတလါ, ထီၣ်တဆံလွံၢ်သီတသီဟါခီန့ၣ်လီၤ. မၤအီၤလၢကိၣ်တအိၣ်ဘၣ်ဒီးကိၣ်မံၤဒီးတၢ်ဒိးတၢ်လၣ်အခၣ်တဖၣ် န့ၣ်တက့ၢ်.
12 ပာ်တီၢ်တၢ်အီၣ်တုၤလၢမုၢ်ဆ့ၣ်ထီၣ်တနံၤဂီၤခီအဂီၢ်မ့ၢ်ဂ့ၤ, မၤကၢ်ဆၣ်ဖိကီၢ်ဖိအဃံနီတဘိမ့ၢ်ဂ့ၤ, န့ၣ်တဂ့ၤ. မၤထွဲဘူၣ်လဲၤကပာ်ဒ်တၢ်သိၣ်တၢ်ဘျၢအိၣ်ဝဲခဲလၢာ် အသိးန့ၣ်တက့ၢ်.
13 ဘၣ်ဆၣ်ဒီးပှၤတဂၤလၢ်လၢ်လၢအကဆှီဝဲဒ်တၢ်ဘူၣ်တၢ်ဘါအလုၢ် အလၢ်အိၣ်ဝဲအသိးဒီးတအိၣ်ယံၤဘၣ်လၢတၢ်လဲၤတၢ်က့ၤ အဃိဘၣ်ဒီးမ့ၢ်ပှၤလၢတတိၢ်န့ၢ်ဘၣ်ဘူၣ်လဲၤကပာ်န့ၣ်တဘၣ် တၢ်ပာ်အီၤဒ်ပှၤတဂၤလၢယပှၤဂီၢ်မုၢ်အကျါလၢၤဘၣ်, မ့ၢ်လၢအဝဲတလုၢ်ထီၣ်ဘၣ်တၢ်လုၢ်မၤဘူၣ်ဆူယအိၣ်ဘၣ်ဖဲဆၢ ကတီၢ်လၢအဘၣ်တၢ်ပာ်လီၤအီၤဘၣ်အဃိန့ၣ်လီၤ. အဝဲကဘၣ်တူၢ်တၢ်ဒ်အကြၢးဝဲဘၣ်ဝဲဒီးအတၢ်ဒဲးဘးအသိးန့ၣ် လီၤ.
14 ပှၤတခီဘီမုၢ်ဖိတဂၤလၢအအိၣ်လၢသုကျါမ့ၢ်သးအိၣ်မၤဘူၣ်လဲၤ ကပာ်န့ၣ်, အဝဲကဘၣ်မၤအီၤဒ်တၢ်သိၣ်တၢ်သီတဖၣ်ဒီးတၢ်သိၣ်တၢ်ဘျၢ တဖၣ်အိၣ်ဝဲအသိးန့ၣ်လီၤ. ယူဒၤအတၢ်သိၣ်တၢ်သီတမံၤဃီအံၤဘၣ်ထွဲဒီးပှၤကိးဂၤဒဲးလၢ အမ့ၢ်ထံဖိကီၢ်ဖိမ့ၢ်ဂ့ၤ, ပှၤတခီဘီမုၢ်ဖိမ့ၢ်ဂ့ၤန့ၣ်လီၤ.
(ဟးထီၣ်.၄၀:၃၄-၃၈)
15 မုၢ်တနံၤဖဲယွၤအိၣ်ဝဲဆိးဝဲအဒဲစီဆှံဘၣ်တၢ်ထီထီၣ်အီၤ န့ၣ်, တၢ်အၢၣ်တလိၣ်ဟဲလီၤဒီးကျၢၢ်ဘၢဒဲစီဆှံန့ၣ်လီၤ.
16 လၢမုၢ်နၤန့ၣ်တၢ်အၢၣ်အံၤဖျါလီၤဂာ်မးဒ်မ့ၣ်အူအသိးန့ၣ် လီၤ.
17 တဘျီလၢ်လၢ်ဖဲတၢ်အၢၣ်သုးထီထီၣ်အသးန့ၣ်, ကီၢ်အံၣ်စရ့လးအပှၤ ဂီၢ်မုၢ်ရူၢ်လီၤအသူၣ်ဒဲအလီၢ်ဒီးလဲၤသူၣ်ထီၣ်က့ၤဝဲဖဲတၢ်လီၢ် လၢတၢ်အၢၣ်ဟဲလီၤဝဲန့ၣ်လီၤ.
18 ပှၤဂီၢ်မုၢ်ရူၢ်လီၤသူၣ်ဒဲအလီၢ်ဖဲယွၤမၤလိာ်အီၤ, ဒီးဖဲအဝဲမၤလိာ်ဃီၤဝဲန့ၣ်, အဝဲသ့ၣ်သူၣ်လီၤဆီလီၤသူၣ်ဒဲအလီၢ်န့ၣ်လီၤ. ဖဲတၢ်အၢၣ်အိၣ်ဒံးဝဲလၢဒဲစီဆှံအဖီခိၣ်အကတီၢ်န့ၣ်အဝဲသ့ၣ် အိၣ်ဆိးဝဲလၢသူၣ်ဒဲအလီၢ်တတီၤဃီအပူၤန့ၣ်လီၤ.
19 ဖဲတၢ်အၢၣ်အိၣ်ဒံးလၢဒဲစီဆှံအဖီခိၣ်ဖးယံာ်န့ၣ်, အဝဲသ့ၣ်စူၢ်ယွၤအကလုၢ်ဒီးတသုးဘၣ်အသးဆူညါဘၣ်.
20 တဘျီဘျီတၢ်အၢၣ်အိၣ်လၢဒဲစီဆှံအဖီခိၣ်ထဲစှၤသီဧိၤလီၤ. တမံၤဂ့ၤတမံၤဂ့ၤန့ၣ်, အဝဲသ့ၣ်အိၣ်လၢသူၣ်ဒဲလီၢ်အပူၤမ့ၢ် ဂ့ၤ, သုးကွံာ်အသးမ့ၢ်ဂ့ၤဒ်ယွၤအတၢ်မၤလိာ်အသိးန့ၣ်လီၤ.
21 တဘျီဘျီတၢ်အၢၣ်အိၣ်ထဲစးထီၣ်လၢဟါခီဒီးတုၤလၢဂီၤခီ အကတီၢ်ဧိၤဒီးအဝဲသ့ၣ်သုးအသးတကီၢ်ခါဖဲတၢ်အၢၣ်သုးထီထီၣ် အသးန့ၣ်လီၤ. တဘျီလၢ်လၢ်ဖဲတၢ်အၢၣ်သုးထီထီၣ်အသးန့ၣ်, အဝဲသ့ၣ်လဲၤဆူညါန့ၣ်လီၤ.
22 ကမ့ၢ်ဒၣ်ဝဲခံသီ, တလါ, တနံၣ်, မ့တမ့ၢ်ယံာ်န့ၢ်အဝဲန့ၣ်မ့ၢ် ဂ့ၤ, ဖဲတၢ်အၢၣ်အိၣ်ဒံးဝဲလၢဒဲစီဆှံအဖီခိၣ်န့ၣ်အဝဲသ့ၣ်တသုး အသးဆူညါဘၣ်. မ့မ့ၢ်ဖဲတၢ်အၢၣ်သုးထီထီၣ်အသးန့ၣ်, အဝဲသ့ၣ်သုးအသးန့ၣ်လီၤ.
23 အဝဲသ့ၣ်သူၣ်ထီၣ်ဒဲဒီးရူၢ်လီၤသူၣ်ဒဲအလီၢ်န့ၣ်လၢတၢ်ဒိကနၣ် ယွၤအကလုၢ်ဒ်အကတိၤတၢ်ခီဖျိစီၤမိၤၡ့အသိးန့ၣ်လီၤ.