10
1-2 ဒီးယွၤစံးဘၣ်စီၤမိၤၡ့, “ပိာ်န့ၢ်ကွဲၤခံဖျၢၣ်လၢစ့ညၣ်လၢနကသူအီၤလၢတၢ်ကိးဖှိၣ် ပှၤဂီၢ်မုၢ်အဂီၢ်ဒီးလၢတၢ်ရူၢ်လီၤသူၣ်ဒဲအလီၢ်အဂီၢ်တက့ၢ်.
3 တၢ်အူဖးထီအသီၣ်မ့ၢ်အိၣ်ဝဲလၢကွဲၤခံဖျၢၣ်လိာ်န့ၣ်, ပှၤဂီၢ်မုၢ်ခဲလၢာ်ကဘၣ်ပာ်ဖှိၣ်ထီၣ်အသးဖဲယအိၣ်ဆိးအဒဲစီဆှံ အကျဲစၢၤန့ၣ်လီၤ.
4 မ့မ့ၢ်ဖဲကွဲၤသီၣ်ထီၣ်ထဲတဖျၢၣ်ဧိၤန့ၣ်, အန့ၣ်တစု, ထဲဒူၣ်ထၢတဖၣ်အပဒိၣ်တဖၣ်ဧိၤကဘၣ်ပာ်ဖှိၣ်ထီၣ်အသးလၢနဃၢၤန့ၣ် လီၤ.
5 ဖဲတၢ်အူသီၣ်ထီၣ်ဖုၣ်ဖုၣ်န့ၣ်, ပှၤအဒူၣ်တဖၣ်လၢအသူၣ်ဒဲလၢမုၢ် ထီၣ်တကပၤကဘၣ်ဟးထီၣ်ကွံာ်န့ၣ်လီၤ.
6 ဖဲတၢ်အူသီၣ်ထီၣ်ဖုၣ်ဖုၣ်ခံဘျီတဘျီန့ၣ်ပှၤအဒူၣ်တဖၣ်လၢအသူၣ် ဒဲလၢကလံၤထံးတကပၤကဘၣ်ဟးထီၣ်ကွံာ်ဝဲလီၤ. လၢတၢ်န့ၣ်အဃိ, တၢ်သီၣ်အဖုၣ်တဖၣ်ကဘၣ်တၢ်အူသီၣ်ထီၣ်အီၤလၢတၢ် ကသုးဒဲအလီၢ်အဂီၢ်,
7 မ့မ့ၢ်လၢတၢ်ကိးဖှိၣ်ကမျၢၢ်ခဲလၢာ်အဂီၢ်န့ၣ်တၢ်အူအသီၣ်ဖးထီ တဖၣ်ကဘၣ်တၢ်အူအီၤန့ၣ်လီၤ.
8 ကွဲၤတဖၣ်န့ၣ်ကဘၣ်တၢ်အူထီၣ်အီၤလၢစီၤအၤဟရိၣ်အဖိခွါတဖၣ်လၢ အမ့ၢ်ပှၤလုၢ်တၢ်အခိၣ်တဖၣ်န့ၣ်လီၤ. တၢ်သိၣ်တၢ်ဘျၢလၢလာ်တဖၣ်အံၤကဘၣ်တၢ်မၤထွဲအီၤအစိၤစိၤအဃၣ် ဃၣ်န့ၣ်လီၤ.
9 ဖဲသုဒုးတၢ်ယၤတၢ်လၢသုကီၢ်ပူၤ, ဒီးသုကဘၣ်ဒီဒၣ်သုသးထီ ဒါသုဒုၣ်သုဒါလၢအဟဲဒုးတၢ်ဒီးသုအခါန့ၣ်, အူထီၣ်တၢ်ဒုးသုးအတၢ်ပနီၣ်လၢကွဲၤတဖၣ်အံၤတက့ၢ်. ယၤ, ယွၤသုကစၢ်ယွၤကမၤစၢၤသုဒီးအုၣ်က့ၤခီၣ်က့ၤသုလၢသု ဒုၣ်သုဒါတဖၣ်အစုပူၤန့ၣ်လီၤ.
10 ဒ်န့ၣ်အသိးလၢတၢ်သူၣ်ခုသးခုအကတီၢ်တဖၣ်လၢအမ့ၢ်, သုလါထီၣ်သီအမူးတဖၣ်ဒီးသုတၢ်ဘူၣ်တၢ်ဘါအမူးအဂၤတဖၣ်အခါ န့ၣ်, သုကဘၣ်အူထီၣ်ကွဲၤတဖၣ်န့ၣ်ဖဲသုဟ့ၣ်ထီၣ်သုတၢ်လုၢ်မ့ၣ် အူတဖၣ်ဒီးတၢ်လုၢ်မၤဃူမၤဖိးတဖၣ်အကတီၢ်န့ၣ်လီၤ. အန့ၣ်တစု, ယကမၤစၢၤသုလီၤ. ယဲဒၣ်အံၤယမ့ၢ်ယွၤ, သုကစၢ်ယွၤလီၤ.”
11 ဖဲကီၢ်အံၣ်စရ့လးအပှၤဂီၢ်မုၢ်ဟးထီၣ်ကွံာ်လၢကီၢ်အဲၤကူပတူး ဝံၤအလီၢ်ခံ, ခံနံၣ်တနံၣ်, လါခံလါတလါထီၣ်အသီခံဆံအနံၤန့ၣ်, တၢ်အၢၣ်လၢယွၤအိၣ်ဝဲဆိးဝဲအဒဲစီဆှံအဖီခိၣ်န့ၣ်သုးထီထီၣ်အသး,
12 ဒီးပှၤအံၣ်စရ့လးဖိတဖၣ်စးထီၣ်အတၢ်လဲၤဟးထီၣ်ကွံာ်လၢကစၢၢ် နံၤနါအပှၢ်မုၢ်ကနၢပူၤန့ၣ်လီၤ. တၢ်အၢၣ်န့ၣ်ဟဲလီၤဒီးအိၣ်ကတီၢ်ဝဲဖဲပှၢ်မုၢ်ကနၢပၤရၣ်န့ၣ်လီၤ.
13 တုၤယွၤဟ့ၣ်လီၤအကလုၢ်ခီဖျိစီၤမိၤၡ့န့ၣ်, အဝဲသ့ၣ်စးထီၣ်လဲၤတၢ်,
14 ဒီးတဘျီဘၣ်တဘျီဖဲအဝဲသ့ၣ်သုးအသးန့ၣ်အဝဲသ့ၣ်အိၣ်ဝဲဒ်အဂ့ၢ် အဝီတမံၤဃီန့ၣ်လီၤ. ပှၤတဖၣ်လၢအအိၣ်လၢစီၤယူဒၤအဒူၣ်အကရူၢ်အနီၣ်တယၢ်အဖီလာ်န့ၣ် စးထီၣ်ဟးလၢညါ, တဖုဘၣ်တဖုဒီးစီၤဧမံၤနဒးအဖိခွါစီၤနၤဃၡိၣ်ပၢဆှၢအဝဲ သ့ၣ်န့ၣ်လီၤ.
15 စီၤစူဧၢ်အဖိခွါစီၤနၤသန့လးပၢဆှၢစီၤယံးစၣ်ကၢ်အဒူၣ်,
16 ဒီးစီၤဃ့လူၣ်အဖိခွါစီၤအလံအာ်ပၢဆှၢစီၤစလူလိၣ်အဒူၣ် န့ၣ်လီၤ.
17 အန့ၣ်ဝံၤဒီးဒဲစီဆှံကဘၣ်တၢ်ရူၢ်လီၤကွံာ်အီၤဒီးစီၤက့ ရၡိၣ်ဒီးစီၤမရၤရံၤအဒူၣ်ထၢတဖၣ်လၢအစိာ်ဒဲန့ၣ်ကဟးထီၣ်ဝဲ လီၤ.
18 မၤကဒီး, ပှၤတဖၣ်လၢအအိၣ်လၢစီၤရူၤဘ့ၣ်အဒူၣ်ကရူၢ်အနီၣ် တယၢ်အဖီလာ်န့ၣ်ကဟးထီၣ်ဝဲတဖုဘၣ်တဖုဒီးစီၤၡဒံအူၢ်အဖိခွါစီၤ အလံစူၢ်ပၢဆှၢအဝဲသ့ၣ်န့ၣ်လီၤ.
19 စီၤစူၤရံၡးဒံၤအဖိခွါစီၤၡလူၤမံအ့လးပၢဆှၢစီၤစူၤမ့းအိၣ်အဒူၣ်,
20 ဒီးစီၤဒဧူၤအ့လးအဖိခွါစီၤအ့လယၤစာ်ပၢဆှၢစီၤကးအဒူၣ် န့ၣ်လီၤ.
21 အန့ၣ်ဝံၤဒီးပှၤလ့ၤဝံဖိစီၤကဃးအဒူၣ်ထၢကဟးထီၣ်စိာ်တၢ်စီ ဆှံအပီးအလီတဖၣ်န့ၣ်လီၤ. အဆၢကတီၢ်ဖဲအဝဲသ့ၣ်တုၤဃီၤဆူသူၣ်ဒဲအလီၢ်လၢခံတတီၤန့ၣ်ဒဲ စီဆှံဘၣ်တၢ်ထီထီၣ်ကဒီးအီၤန့ၣ်လီၤ.
22 မၤကဒီး, ပှၤတဖၣ်လၢအအိၣ်လၢစီၤအ့ဖရဲၣ်အဒူၣ်အကရူၢ်အနီၣ်တယၢ် အဖီလာ်န့ၣ်ကစးထီၣ်လဲၤတၢ်တဖုဘၣ်တဖုဃုာ်ဒီးစီၤဧးမံဟူး အဖိခွါစီၤအလံၡမၤဒ်ပှၤပၢဆှၢအဝဲသ့ၣ်အသိးန့ၣ်လီၤ.
23 စီၤပဒၤစူၢ်အဖိခွါစီၤကမၤလ့လးမ့ၢ်ပှၤပၢဆှၢစီၤမနၤၡ့ၤ အဒူၣ်လီၤ.
24 ဒီးစီၤကံးဒဧိနံၤအဖိခွါစီၤအဘံဒၣ်မ့ၢ်ပှၤပၢဆှၢစီၤဘံၣ် ယၤမံၣ်အဒူၣ်န့ၣ်လီၤ.
25 လၢခံကတၢၢ်န့ၣ်, ပှၤတဖၣ်လၢအအိၣ်လၢစီၤဒၣ်အဒူၣ်အကရူၢ်အနီၣ်တယၢ် အဖီလာ်လၢအမၤတၢ်ဒ်ကရူၢ်ခဲလၢာ်အပှၤပၢၤတၢ်ကစးထီၣ်လဲၤတၢ်တဖု ဘၣ်တဖု, ဃုာ်ဒီးစီၤဧးမံၡဒံၤအဖိခွါစီၤအဃံဧ့စ့ၣ်ဒ်ပှၤပၢဆှၢတၢ် အသိးန့ၣ်လီၤ.
26 စီၤဧးကရၣ်အဖိခွါစီၤပးကံၤအ့လးပၢဆှၢစီၤအၤၡ့ၢ်အဒူၣ်,
27 ဒီးစီၤဧ့နၢ်အဖိခွါစီၤအဃံရၤပၢဆှၢစီၤနးသၤလံအဒူၣ် န့ၣ်လီၤ.
28 မၤသးဒ်န့ၣ်ဒီး, တၢ်အံၤမ့ၢ်ဝဲတၢ်လဲၤထီၣ်အဂ့ၢ်အဝီ, တဖုဘၣ်တဖု, ဖဲပှၤအံၣ်စရ့လးဖိတဖၣ်ရူၢ်လီၤအသူၣ်ဒဲလီၢ်ဒီးဟးထီၣ် တဘျီလၢ်လၢ်န့ၣ်လီၤ.
29 ဒီးစီၤမိၤၡ့စံးဘၣ်အမါအဒီပုၢ်ဝဲၢ်ခွါ, ပှၤမံးဒယၣ်ဖိစီၤယံးသရိၣ်အဖိခွါစီၤဃိဘးစံးဝဲ, “ပကစးထီၣ်ပတၢ်လဲၤဆူတၢ်လီၢ်လၢယွၤစံးတ့ၢ်ဝဲလၢကဟ့ၣ်ပှၤ န့ၣ်လီၤ. အဝဲအၢၣ်လီၤအီလီၤတ့ၢ်ဝဲလၢကဒုးဘီၣ်ထီၣ်ညီထီၣ်အံၣ်စရ့လး အဃိဟဲဃုာ်ဒီးပှၤ, ဒီးပကဟ့ၣ်နီၤလီၤနၤလၢပတၢ်ဘီၣ်ထီၣ်ညီထီၣ်န့ၣ်လီၤ.”
30 စီၤဃိဘးစံးဆၢဝဲဒၣ်, “တမ့ၢ်ဘၣ်. ယကဘၣ်က့ၤကဒါဆူ ယထံယကီၢ်ဒၣ်ယဲန့ၣ်လီၤ.”
31 စီၤမိၤၡ့စံးဘၣ်အီၤ, “ပာ်တ့ၢ်ကွံာ်ပှၤတဂ့ၤ. နသ့ၣ်ညါတၢ်လီၢ်လၢပသူၣ်ဒဲကသ့ဝဲအလီၢ်လၢပှၢ်မုၢ်ကနၢပူၤအံၤ, ဒီးနမ့ၢ်ပှၤနဲၣ်ပှၤဆှၢပှၤသ့ဝဲလီၤ.
32 နမ့ၢ်ဟဲဃုာ်ဒီးပှၤန့ၣ်, ပကနီၤဟ့ၣ်နၤလၢကယဲၢ်တၢ်ဆိၣ်ဂ့ၤတဖၣ် လၢယွၤဟ့ၣ်လီၤပှၤတဖၣ်န့ၣ်လီၤ.”
33 ဖဲပှၤဂီၢ်မုၢ်ဟးထီၣ်ကွံာ်လၢစံၤနါကစၢၢ်စီဆှံန့ၣ်, အဝဲသ့ၣ်လဲၤတၢ်သၢသီလီၤ. ယွၤအတၢ်အၢၣ်လီၤအီလီၤအတလါစီဆှံလဲၤတၢ်လၢအဝဲသ့ၣ်အမဲာ်ညါ တဘိယူၢ်ဃီဒ်သိးကဃုန့ၢ်တၢ်လီၢ်တတီၤလၢအဝဲသ့ၣ်ကသူၣ်အဒဲအဂီၢ် န့ၣ်လီၤ.
34 တုၤအဝဲသ့ၣ်လဲၤဆူညါလၢတၢ်သူၣ်ဒဲအလီၢ်တတီၤဘၣ်တတီၤန့ၣ်ယွၤ အတၢ်အၢၣ်အိၣ်လၢအဝဲသ့ၣ်အဖီခိၣ်လၢမုၢ်ဆါအကတီၢ်န့ၣ်လီၤ.
35 ဖဲတၢ်အၢၣ်လီၤအီလီၤအတလါစးထီၣ်လဲၤတၢ်တဘျီလၢ်လၢ်န့ၣ်စီၤ မိၤၡ့ကစံးဝဲဒၣ်, “ယွၤဧၢ, ဂဲၤထၢၣ်, မၤလီၤမုၢ်ပြံ ပြါနဒုၣ်နဒါတဖၣ်, ဒုးတၢ်ထီဒါပှၤလၢအသးဟ့နၤတဖၣ်တက့ၢ်” န့ၣ်လီၤ.
36 ဒီးဖဲအအိၣ်ကတီၢ်တဘျီလၢ်လၢ်န့ၣ်, အဝဲကစံးဝဲဒၣ်, “ယွၤဧၢ, ဟဲက့ၤဆူအံၣ်စရ့လးအဒူၣ်ဖိထၢဖိလၢအကထိတဖၣ် အအိၣ်တက့ၢ်”န့ၣ်လီၤ.