8
1-2 ယွၤစံးဘၣ်စီၤမိၤၡ့, “တဲဘၣ်စီၤအၤဟရိၣ်လၢ, ဖဲအပာ်ထီၣ်မ့ၣ်အူဒၢနွံဖျၢၣ်လၢတၢ်ပာ်မ့ၣ်အူဒၢအလီၢ်အဖီခိၣ်န့ၣ်, ကြၢးပာ်လီၤဝဲဒ်သိးတၢ်က, ကပီၤထီၣ်ဆူတၢ်မဲာ်ညါန့ၣ်လီၤ.”
3 စီၤအၤဟရိၣ်စူၢ်တၢ်န့ၣ်ဒီးပာ်ထီၣ်မ့ၣ်အူဒၢတဖၣ်အိၣ်ဒီးအမဲာ် ဃၣ်အသးဆူတၢ်ပာ်မ့ၣ်အူဒၢလီၢ်အမဲာ်ညါန့ၣ်လီၤ.
4 စးထီၣ်လၢအခိၣ်ထိးတုၤလၢအထူၣ်ခီၣ်ထံးန့ၣ်တၢ်ပာ်မ့ၣ်အူဒၢ အလီၢ်ဘၣ်တၢ်မၤအီၤလၢထူ, အိၣ်ဒီးအက့ၢ်အဂီၤဒ်ယွၤဒုးနဲၣ်စီၤမိၤၡ့အသိးန့ၣ်လီၤ.
5-6 ဒီးယွၤစံးဘၣ်စီၤမိၤၡ့, “ပာ်လီၤဆီပှၤလ့ၤဝံဖိတဖၣ်ဒီးကီၢ်အံၣ်စရ့လးအပှၤဂီၢ်မုၢ် အဂၤဒီးမၤကဆှီအဝဲသ့ၣ်, ဒ်ကျဲလၢလာ်အံၤအသိးတက့ၢ်.
7 ဖှံအီၤဒီးတၢ်မၤကဆှီထီၣ်တၢ်အထံဒီးတဲဘၣ်အဝဲသ့ၣ်လၢကလူၤ ကွံာ်အဆူၣ်ဒီဂၤညါ, ဒီးကဆှုၣ်ကွံာ်အတၢ်ကူတၢ်သိးဒၣ်ဝဲတဖၣ်တက့ၢ်. အန့ၣ်ဒီးအဝဲသ့ၣ်က, ကဆှီထီၣ်ဝဲဒ်တၢ်ဘူၣ်တၢ်ဘါအလုၢ်အလၢ်အသိး န့ၣ်လီၤ.
8 အန့ၣ်ဝံၤဒီးအဝဲသ့ၣ်ကဘၣ်ဟံးန့ၢ်ကျီၢ်ဖါအသးစၢ်တဒုဒီးကိၣ် ကမူၣ်လၢအဃါဃုာ်အသးဒီးသ့ၣ်စၤယံးအသိ ဒ်တၢ်လုၢ်မၤဘူၣ်ကိၣ်အတၢ်မၤလိာ်အိၣ်ဝဲန့ၣ်လီၤ. နကဘၣ်ဟံးန့ၢ်ကျီၢ်ဖါသးစၢ်အဂၤတဒုလၢတၢ်လုၢ်တၢ်ပျၢ်တၢ်ဒဲး ဘးအဂီၢ်န့ၣ်လီၤ.
9 အန့ၣ်ဝံၤဒီးကိးဖှိၣ်အံၣ်စရ့လးကမျၢၢ်ခဲလၢာ်ဒီးမၢပှၤလ့ၤ ဝံဖိတဖၣ်ဆၢထၢၣ်လၢယွၤအိၣ်ဝဲဆိးဝဲအဒဲစီဆှံအမဲာ်ညါ တက့ၢ်.
10 ကီၢ်အံၣ်စရ့လးအပှၤဂီၢ်မုၢ်ကဘၣ်ပာ်ထီၣ်အစုတဖၣ်လၢပှၤလ့ၤဝံ ဖိတဖၣ်အခိၣ်အဖီခိၣ်,
11 ဝံၤဒီးစီၤအၤဟရိၣ်ကဘၣ်ပာ်စီဆှံထီၣ်ပှၤလ့ၤဝံဖိတဖၣ်ဆူ ယအိၣ်ဒ်တၢ်လုၢ်မၤဘူၣ်လီၤဆီတမံၤလၢအဟဲလၢပှၤအံၣ်စရ့လးဖိ တဖၣ်အအိၣ်, ဒ်သိးအဝဲသ့ၣ်မၤယတၢ်မၤကသ့အဂီၢ်န့ၣ်လီၤ.
12 ဝံၤဒီးပှၤလ့ၤဝံဖိတဖၣ်ကပာ်ထီၣ်အစုတဖၣ်လၢကျီၢ်ဖါခံဒု အခိၣ်လိၤလၢတဒုန့ၣ်, ကဘၣ်တၢ်လုၢ်ထီၣ်အီၤလၢတၢ်ပျၢ်တၢ်ဒဲးဘးအဂီၢ်ဒီးအဂၤတဒုန့ၣ် လၢတၢ်လုၢ်မ့ၣ်အူအဂီၢ်, လၢတၢ်ကမၤတၢ်ဘူၣ်တၢ်ဘါအလုၢ်အလၢ်လၢတၢ်မၤကဆှီထီၣ်ပှၤလ့ၤဝံ ဖိတဖၣ်အဂီၢ်န့ၣ်လီၤ.
13 ပာ်စီဆှံထီၣ်ပှၤလ့ၤဝံဖိတဖၣ်ဒ်တၢ်ဟ့ၣ်လီၤဆီတမံၤဆူယအိၣ် ဒီးပာ်စီၤအၤဟရိၣ်ဒီးအဖိခွါတဖၣ်လၢအဝဲသ့ၣ်အခိၣ်တက့ၢ်.
14 ပာ်လီၤဆီကွံာ်ပှၤလ့ၤဝံဖိတဖၣ်ဒီးပှၤအံၣ်စရ့လးဖိအဂၤခဲ လၢာ်လၢကျဲဒ်အံၤ, ဒ်သိးအဝဲသ့ၣ်ကဘၣ်ဃးဒီးယၤအဂီၢ်န့ၣ်တက့ၢ်.
15 ဖဲသုမၤကဆှီဒီးပာ်စီဆှံထီၣ်ပှၤလ့ၤဝံဖိတဖၣ်ဝံၤန့ၣ်အဝဲ သ့ၣ်ကကြၢးဝဲဘၣ်ဝဲဒီးတၢ်ဖံးတၢ်မၤလၢဒဲစီဆှံအပူၤန့ၣ် လီၤ.
16 ယဃ့တ့ၢ်အဝဲသ့ၣ်လၢကယဲၢ်ပှၤအံၣ်စရ့လးဖိအဖိခွါဝဲၢ်ကိ တဖၣ်အလီၢ်, ဒီးအဝဲသ့ၣ်ဘၣ်ဃးဒၣ်ထဲဆူယၤတဂၤဧိၤန့ၣ်လီၤ.
17 ဖဲယမၤသံကွံာ်ကယဲၢ်ဖိဝဲၢ်ကိလၢကီၢ်အဲၤကူပတူးအပူၤန့ၣ် ယပာ်စီဆှံတ့ၢ်ပှၤအံၣ်စရ့လးဖိအဖိခွါဝဲၢ်ကိခဲလၢာ်လၢအံၣ် စရ့လးဟံၣ်ဖိဃီဖိတဒူၣ်ဘၣ်တဒူၣ်အပူၤဒီးကယဲၢ်ဆၣ်ဖိကီၢ်ဖိ အဝဲၢ်ကိတဖၣ်န့ၣ်လီၤ.
18 ခဲအံၤယဟံးန့ၢ်ပှၤလ့ၤဝံဖိတဖၣ်လၢကယဲၢ်ပှၤအံၣ်စရ့လးဖိ အဖိခွါဝဲၢ်ကိတဖၣ်အလီၢ်
19 ဒီးယဟ့ၣ်လီၤပှၤလ့ၤဝံဖိတဖၣ်ဆူစီၤအၤဟရိၣ်ဒီးအဖိခွါတဖၣ် အအိၣ်ဒ်ပှၤအံၣ်စရ့လးဖိတဖၣ်အတၢ်ဟ့ၣ်လီၤဆီတမံၤ, ဒ်သိးအကမၤတၢ်လၢဒဲစီဆှံအပူၤလၢကီၢ်အံၣ်စရ့လးအပှၤဂီၢ် မုၢ်အဂီၢ်ဒီးလၢအကဒီဒၣ်အိၣ်ပှိၤပှၤအံၣ်စရ့လးဖိတဖၣ်လၢတၢ် တတၢးတနါလၢကလီၤဘၣ်အဝဲသ့ၣ်ဖဲအဝဲသ့ၣ်မ့ၢ်ဟဲဘူးဘၣ် ဒီးတၢ်အလီၢ်စီဆှံအခါန့ၣ်လီၤ.”
20 မၤသးဒ်န့ၣ်ဒီး, စီၤမိၤၡ့, စီၤအၤဟရိၣ်ဒီးကယဲၢ်ကီၢ်အံၣ်စရ့ လးအပှၤဂီၢ်မုၢ်ပာ်စီဆှံထီၣ်ပှၤလ့ၤဝံဖိတဖၣ်ဒ်ယွၤမၤလိာ် တ့ၢ်စီၤမိၤၡ့အသိးန့ၣ်လီၤ.
21 ပှၤလ့ၤဝံဖိတဖၣ်မၤကဆှီထီၣ်အသး, ဒီးဆှုၣ်အတၢ်ကူတၢ်သိး တဖၣ်ဒီးစီၤအၤဟရိၣ်ပာ်စီဆှံထီၣ်အဝဲသ့ၣ်ဒ်တၢ်ဟ့ၣ်လီၤဆီ တမံၤဆူယွၤအအိၣ်အသိးန့ၣ်လီၤ. အဝဲမၤစ့ၢ်ကီးတၢ်ဘူၣ်တၢ်ဘါအလုၢ်အလၢ်ဘၣ်ဃးဒီးတၢ်မၤကဆှီ ထီၣ်တၢ်လၢအဝဲသ့ၣ်အဂီၢ်န့ၣ်လီၤ.
22 ပှၤဂီၢ်မုၢ်မၤတၢ်ကိးမံၤဒဲးဒ်ယွၤမၤလိာ်တ့ၢ်စီၤမိၤၡ့ အသိးလၢတၢ်ဘၣ်ဃးဒီးပှၤလ့ၤဝံဖိတဖၣ်န့ၣ်လီၤ. မၤသးဒ်န့ၣ်ဒီး, ပှၤလ့ၤဝံဖိတဖၣ်န့ၣ်ကြၢးဝဲဘၣ်ဝဲဒီးတၢ်ဖံး တၢ်မၤလၢဒဲစီဆှံအပူၤလၢစီၤအၤဟရိၣ်ဒီးအဖိခွါတဖၣ်အဖီ လာ်န့ၣ်လီၤ.
23 ဒီးယွၤစံးဘၣ်စီၤမိၤၡ့,
24 “ပှၤလ့ၤဝံဖိတဂၤစုာ်စုာ်ဖဲအသးအိၣ်ခံဆံယဲၢ်နံၣ်န့ၣ်, ကမၤအမူအဒါတဖၣ်လၢယအိၣ်ယဆိးအဒဲစီဆှံအပူၤ, လၢတၢ်ဘူၣ်ထီၣ်ဘါထီၣ်ယွၤအဒဲပူၤန့ၣ်လီၤ.
25 ဒီးဖဲအသးအိၣ်ယဲၢ်ဆံနံၣ်န့ၣ်ကဘၣ်အိၣ်ဘှံးဝဲလီၤ.
26 တၢ်န့ၣ်အလီၢ်ခံအဝဲသ့ၣ်ကဘၣ်မၤစၢၤက့ၤပှၤလ့ၤဝံဖိကဒဲကဒဲ လၢတၢ်စိာ်ထီၣ်အဝဲသ့ၣ်အမူအဒါလၢဒဲစီဆှံအပူၤ, ဘၣ်ဆၣ်, အဝဲသ့ၣ်တဘၣ်မၤတၢ်ဖံးတၢ်မၤလၢအနီၢ်ကစၢ်ဒၣ်ဝဲနီတမံၤဘၣ်. တၢ်အံၤမ့ၢ်ကျဲလၢနကသိၣ်လိနဲၣ်လီၤမူဒါတဖၣ်လၢပှၤလ့ၤဝံဖိ တဖၣ်အဂီၢ်န့ၣ်လီၤ.”