7
1 မုၢ်တနံၤလၢစီၤမိၤၡ့ထီထီၣ်ယွၤအိၣ်ဝဲဆိးဝဲအဒဲစီဆှံ ဝံၤဝဲန့ၣ်, အဝဲဖှူဒီးပာ်စီဆှံထီၣ်ဒဲစီဆှံန့ၣ်ဒီးကယဲၢ် အတၢ်ပီးတၢ်လီတဖၣ်, ဒီးတၢ်လုၢ်လီၢ်ဒီးအတၢ်ပီး တၢ်လီခဲလၢာ်န့ၣ်လီၤ.
2 အန့ၣ်ဝံၤဒီးဒူၣ်ထၢအပဒိၣ်တဖၣ်လၢအမ့ၢ်အံၣ်စရ့လးအဒူၣ်အခိၣ် အနၢ်တဖၣ်, ပှၤတဖုဃီလၢအကဲခိၣ်ကဲနၢ်လၢတၢ်ထၢဖှိၣ်ကွဲးနီၣ်ပှၤ အနီၣ်ဂံၢ်တဖၣ်န့ၣ်,
3 ဟဲစိာ်ဃီၤအတၢ်လုၢ်မၤဘူၣ်တဖၣ်ဆူယွၤအအိၣ်လၢအမ့ၢ်လ့ၣ်ဃုခိၣ် ဒီးကျီၢ်ဖါတဆံခံဒု, လ့ၣ်တခိၣ်န့ၣ်လၢကယဲၢ်ပှၤအခိၣ်ခံဂၤအဂီၢ်ဒီးကျီၢ်ဖါတဒုလၢ ပှၤအခိၣ်တဂၤစုာ်စုာ်အဂီၢ်န့ၣ်လီၤ. တုၤအဝဲသ့ၣ်ဟ့ၣ်ထီၣ်ဝဲဒၣ်ဝံၤန့ၣ်,
4 ယွၤစံးဘၣ်စီၤမိၤၡ့,
5 “တူၢ်လိာ်တၢ်ဟ့ၣ်တဖၣ်အံၤလၢတၢ်ကသူအီၤလၢဒဲစီဆှံ အတၢ်မၤကဘၣ်တၢ်မၤဝံၤအီၤအဂီၢ်ဒီးဟ့ၣ်လီၤအီၤဆူပှၤလ့ၤဝံ ဖိတဖၣ်အအိၣ်ဒ်တၢ်မၤလၢအဝဲသ့ၣ်ကဘၣ်မၤဝဲအသိးန့ၣ်တက့ၢ်.”
6 မၤသးဒ်န့ၣ်ဒီးစီၤမိၤၡ့ဟ့ၣ်လီၤလ့ၣ်တဖၣ်ဒီးကျီၢ်ဖါတဖၣ်ဆူ ပှၤလ့ၤဝံဖိတဖၣ်အအိၣ်န့ၣ်လီၤ.
7 အဝဲဟ့ၣ်လီၤလ့ၣ်ခံခိၣ်ဒီးကျီၢ်ဖါလွံၢ်ဒုဆူပှၤက့ရၡိၣ်ဖိ တဖၣ်အအိၣ်,
8 ဒီးလ့ၣ်လွံၢ်ခိၣ်ဒီးကျီၢ်ဖါဃိးဒုဆူပှၤမရၤရံၤဖိတဖၣ် အအိၣ်လီၤ. အဝဲသ့ၣ်အတၢ်မၤခဲလၢာ်ကဘၣ်တၢ်မၤဝံၤအီၤလၢစီၤ အၤဟရိၣ်အဖိခွါစီၤအံၤသမၢ်အတၢ်ပၢတၢ်ဆှၢအဖီလာ်န့ၣ်လီၤ.
9 ဘၣ်ဆၣ်ဒီးစီၤမိၤၡ့တဟ့ၣ်လ့ၣ်နီတခိၣ်, ကျီၢ်ဖါနီတဒုဆူ ပှၤကဃးဖိတဖၣ်အအိၣ်ဘၣ်. အဂ့ၢ်ဒ်အံၤ, တၢ်အပီးအလီစီဆှံလၢအဝဲသ့ၣ်ကဘၣ်အံးထွဲကွၢ် ထွဲဝဲတဖၣ်န့ၣ်ကဘၣ်ယိးဒၣ်ဝဲလၢအဖံဘၣ်ခိၣ်အလိၤန့ၣ်လီၤ.
10 ပှၤခိၣ်ပှၤနၢ်တဖၣ်ဟဲစိာ်စ့ၢ်ကီးတၢ်လုၢ်မၤဘူၣ်တဖၣ်လၢတၢ်ကမၤ တၢ်ပာ်စီဆှံထီၣ်တၢ်လုၢ်လီၢ်အမူးအဂီၢ်န့ၣ်လီၤ. ဖဲအဝဲသ့ၣ်အိၣ်ကတဲာ်ကတီၤလံအသးလၢကဟ့ၣ်ထီၣ်အတၢ်ဟ့ၣ်သ့ၣ် တဖၣ်ဖဲတၢ်လုၢ်လီၢ်အခါန့ၣ်,
11 ယွၤစံးဘၣ်စီၤမိၤၡ့, “တဲဘၣ်အဝဲသ့ၣ်လၢကိးမုၢ်နံၤဒဲး လၢတဆံခံသီအတီၢ်ပူၤန့ၣ်, ခိၣ်နၢ်တဖၣ်အကျါတဂၤကဘၣ်ဟ့ၣ်ထီၣ်အတၢ်ဟ့ၣ်တဖၣ် လၢတၢ်ပာ်စီဆှံတၢ်လုၢ်လီၢ်အဂီၢ်န့ၣ်တက့ၢ်.”
12-83 အဝဲသ့ၣ်ဟ့ၣ်ထီၣ်အတၢ်လုၢ်မၤဘူၣ်တဖၣ်ဒ်တၢ်ရဲၣ်လီၤကျဲၤလီၤလၢ လာ်အံၤအသိးန့ၣ်လီၤ.
တၢ်လုၢ်မၤဘူၣ်တဖၣ်လၢပှၤတဂၤ ဘၣ်တဂၤဟဲစိာ်ဝဲဒ်သိးသိးလိာ်အသးန့ၣ်လီၤ. မ့ၢ်ဝဲ, သလၢစ့တဖျၢၣ်လၢအဃၢလီၤတယၢၢ်ၡက့လးနွံဆံဒီးသီတ့ၤစ့တဘ့ၣ် လၢအဃၢလီၤတယၢၢ်ၡက့လးတကယၤသၢဆံဒ်တၢ်လုၢ်လီၢ် အနီၣ်ထိၣ်အိၣ်ဝဲဒၣ်အသိးန့ၣ်လီၤ. ဒီးလၢခံမံၤလိာ်အပူၤန့ၣ်ပှဲၤဝဲဒၣ်လၢကိၣ်ကမူၣ်ဃါဃုာ် အသးလၢသိလၢတၢ်လုၢ်မၤဘူၣ်ကိၣ်တဖၣ်အဂီၢ်န့ၣ်လီၤ. လီခီထူတဘ့ၣ်လၢအဃၢလီၤတယၢၢ်ၡက့လးတဆံပှဲၤဒီးတၢ်နၢမူ, ကျီၢ်ဖါဖိတဒု, သိဖါတဒု, ဒီးသိဖိအသးအိၣ်တနံၣ်တဒု, လၢတၢ်လုၢ်မ့ၣ်အူအဂီၢ်, ဒီးမဲာ်တဲးလဲးတဒုလၢတၢ်လုၢ်တၢ်ပျၢ်တၢ်ဒဲးဘးအဂီၢ်, ဒီးကျီၢ်ဖါခံဒု, သိဖါယဲၢ်ဒု, မဲာ်တဲးလဲးယဲၢ်ဒု, သိဖိအသးအိၣ်တနံၣ်ယဲၢ်ဒုလၢတၢ်လုၢ်မၤဃူမၤဖိးအဂီၢ်န့ၣ် လီၤ.
84-88 တၢ်လုၢ်မၤဘူၣ်ခဲလၢာ်ပာ်ဖှိၣ်လၢပှၤအခိၣ်တဆံခံဂၤဟဲစိာ်တ့ၢ် ဝဲလၢတၢ်ပာ်စီဆှံထီၣ်တၢ်လုၢ်လီၢ်အဂီၢ်မ့ၢ်ဒ်အဖီလာ်အံၤအသိး န့ၣ်လီၤ.
သလၢစ့တဆံခံဖျၢၣ်ဒီးသီတ့ၤစ့တဆံခံဘ့ၣ်လၢအလီၤတယၢၢ်ဃၢ ခဲလၢာ်ၡက့လးခံကထိလွံၢ်ကယၤ
လီခီထူတဆံခံဖျၢၣ်လၢအလီၤတယၢၢ်ဃၢဝဲခဲလၢာ်ၡက့လးတကယၤ ခံဆံပှဲၤဒီးတၢ်နၢမူ,
ကျီၢ်ဖါတဆံခံဒု, သိဖါတဆံခံဒု, သိဖိအသးအိၣ်တနံၣ်တဆံ ခံဒုဃုာ်ဒီးတၢ်လုၢ်မၤဘူၣ်ကိၣ်တဖၣ်လၢကဘၣ်တၢ်လုၢ်ထီၣ်ဃုာ် အီၤလၢတၢ်လုၢ်မ့ၣ်အူတဖၣ်အဂီၢ်န့ၣ်လီၤ.
မဲာ်တဲးလဲးတဆံခံဒုလၢတၢ်လုၢ်တၢ်ပျၢ်တၢ်ဒဲးဘးအဂီၢ်
ကျီၢ်ဖါခံဆံလွံၢ်ဒု, သိဖါဃုဆံ, မဲာ်တဲးလဲးဃုဆံ, သိဖိ အသးအိၣ်တနံၣ်ဃုဆံ, လၢတၢ်လုၢ်မၤဃူမၤဖိးအဂီၢ်န့ၣ်လီၤ.
89 ဖဲစီၤမိၤၡ့လဲၤနုာ်လီၤဆူဒဲစီၤဆှံအပူၤဒ်သိးက, ကတိၤတၢ်ဒီးယွၤအကတီၢ်န့ၣ်အဝဲနၢ်ဟူယွၤကတိၤတၢ်ဒီးအီၤလၢ တလါစီဆှံအခိၣ်ကၢၢ်အဖီခိၣ်ဖဲတၢ်ဘၣ်တ့အိၣ်ဒီးအဒံးဆ့အိၣ်ဝဲခံခီ တဖၣ်အကဆူးန့ၣ်လီၤ.