6
1-2 ယွၤမၤလိာ်စီၤမိၤၡ့လၢ, အကဟ့ၣ်လီၤတၢ်သိၣ်တၢ်သီတဖၣ်ဆူပှၤအံၣ်စရ့လးဖိ တဖၣ်အအိၣ်ဒ်လၢလာ်အံၤအသိးန့ၣ်လီၤ. ပှၤတဂၤလၢ်လၢ်မ့ၢ်ပိာ်မုၣ်မ့ၢ်ဂ့ၤ, ပိာ်ခွါမ့ၢ်ဂ့ၤ, မ့ၢ်အိၣ်ဒီး တၢ်ဆိၣ်လီၤဆီတမံၤလၢအကကဲထီၣ်ပှၤနစၤရံဖိဒီးပာ် စီဆှံအသးဆူယွၤအအိၣ်န့ၣ်,
3 ကဘၣ်ဟးဆှဲးစပံးထံဒီးသံးန့ၣ်လီၤ. အဝဲတဘၣ်အီကယဲၢ်တၢ်အီတမံၤလၢ်လၢ်လၢတၢ်မၤ အီၤလၢစပံးသၣ်မ့ၢ်ဂ့ၤ, တဘၣ်အီၣ်စပံးသၣ်မ့ၢ်ဂ့ၤ, စပံးသၣ် အဃ့မ့ၢ်ဂ့ၤနီတမံၤဘၣ်.
4 ကယဲၢ်မုၢ်နံၤတဖၣ်လၢအဝဲမ့ၢ်ဒံးပှၤနစၤရံဖိတဂၤန့ၣ်အဝဲတဘၣ် အီၣ်တၢ်ဟဲလၢစပံးအမုၢ်, စပံးသၣ်အဖံးမ့တမ့ၢ်, အချံဒၣ်လဲာ်ဘၣ်လီၤ.
5 မုၢ်နံၤတဖၣ်ဖဲအဝဲအိၣ်ဒံးလၢပှၤနစၤရံဖိတဂၤအတၢ်ဆိၣ်အပူၤ န့ၣ်အဝဲတဘၣ်တံာ်အခိၣ်သူမ့ၢ်ဂ့ၤ, လူၤအီၤမ့ၢ်ဂ့ၤဘၣ်. အဝဲဘၣ်တၢ်စၢဃာ်အီၤလၢတၢ်ဆိၣ်လီၤသးန့ၣ်လၢအဝဲပာ်စီဆှံ ထီၣ်အသးဆူယွၤလၢာ်ဆၢလၢာ်ကတီၢ်အဃိဒီးကဘၣ်ပျဲအခိၣ်သူဒီး အခၣ်ဆူၣ်ထီထီၣ်ဝဲဒၣ်န့ၣ်လီၤ.
6 အဝဲအခိၣ်သူမ့ၢ်တၢ်ပာ်စီဆှံထီၣ်သးဆူယွၤအအိၣ်အတၢ်ပနီၣ်, ဒီးလၢတၢ်န့ၣ်အဃိ, အဝဲဒၣ်တဘၣ်မၤကဆှီအသးခီဖျိတၢ်လဲၤဘူးဒီးတၢ်သံစိၣ်,
7 ဖဲတၢ်စိၣ်န့ၣ်မ့ၢ်ဒၣ်လဲာ်အဝဲအပၢ်မ့ၢ်ဂ့ၤ, အမိၢ်မ့ၢ်ဂ့ၤ, အဒီပုၢ်ဝဲၢ်ခွါမ့ၢ်ဂ့ၤ, အဒီပုၢ်ဝဲၢ်မုၣ်မ့ၢ်ဂ့ၤန့ၣ်ဘၣ်.
8 မုၢ်နံၤတဖၣ်ဖဲအဝဲမ့ၢ်ဒံးပှၤနစၤရံဖိတဂၤန့ၣ်, အဝဲဘၣ်တၢ်ပာ်စီဆှံ အီၤဆူယွၤအအိၣ်လီၤ.
9 ပှၤနစၤရံဖိတဂၤအခိၣ်သူလၢအဘၣ်တၢ်ပာ်စီဆှံအီၤ, မ့ၢ်ဘၣ်အၢလၢအဝဲအိၣ်ဘူးဘၣ်ဒီးပှၤတဂၤလၢ်လၢ်လၢအသံ သတူၢ်ကလာ်အဃိန့ၣ်, အဝဲကဘၣ်အိၣ်ခိးနွံသီဝံၤလူၤကွံာ်အခိၣ် သူဒီးအခၣ်ဆူၣ်န့ၣ်လီၤ. မၤသးဒ်န့ၣ်ဒီးကကဆှီထီၣ်က့ၤဝဲဒၣ်ဒ်တၢ်ဘူၣ်တၢ်ဘါအလုၢ်အလၢ် အိၣ်ဝဲအသိးန့ၣ်လီၤ.
10 လၢဃိးသီတသီန့ၣ်အဝဲကဘၣ်ဟဲစိာ်ဝဲထိၣ်ကးက့ၣ်ခံဘ့ၣ်မ့ တမ့ၢ်ထိၣ်လွံၢ်ခံဘ့ၣ်ဆူပှၤလုၢ်တၢ်အခိၣ်အအိၣ်ဖဲယွၤအိၣ်ဝဲ ဆိးဝဲအဒဲစီဆှံအကျဲစၢၤန့ၣ်လီၤ.
11 ပှၤလုၢ်တၢ်အခိၣ်ကလုၢ်ထီၣ်အီၤတဘ့ၣ်ဒ်တၢ်လုၢ်တၢ်ပျၢ်တၢ်ဒဲးဘး တမံၤဒီးအဂၤတဘ့ၣ်ဒ်တၢ်လုၢ်မ့ၣ်အူအသိးလၢကမၤတၢ်မၤကဆှီထီၣ် က့ၤအီၤဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲ အသိးလၢအတၢ်ထိးဘၣ်တၢ်အစိၣ်အဃိန့ၣ်လီၤ. ဖဲမုၢ်တနံၤဃီန့ၣ်, ပှၤတဂၤန့ၣ်ကပာ်စီဆှံက့ၤကဒီးအခိၣ်သူ
12 ဒီးကပာ်စီဆှံထီၣ်က့ၤကဒီးအတၢ်ဆၢကတီၢ်ဆူယွၤအအိၣ်ဒ်ပှၤနစၤ ရံဖိတဂၤအသိးန့ၣ်လီၤ. တၢ်ဆၢကတီၢ်လၢအပူၤကွံာ်န့ၣ်တဘၣ်တၢ်ဂံၢ်ဃုာ်အီၤဘၣ်. အဂ့ၢ်ဒ်အံၤ, အခိၣ်သူ, လၢအဘၣ်တၢ်ပာ်စီဆှံအီၤန့ၣ်ဘၣ်အၢကွံာ် လံအဃိလီၤ. လၢတၢ်လိးက့ၤအတၢ်လုၢ်တၢ်ပာ်အဂီၢ်အဝဲကဘၣ်ဟဲစိာ်သိဖိလၢ အသးအိၣ်တနံၣ်တဒုန့ၣ်လီၤ.
13 ဖဲပှၤနစၤရံဖိတဂၤမၤလၢပှဲၤအတၢ်ဆိၣ်လီၤအသးဝံၤန့ၣ်, အဝဲကဘၣ်မၤတၢ်ဘူၣ်တၢ်ဘါအလုၢ်အလၢ်အံၤလီၤ. အဝဲကဘၣ်လဲၤဆူဒဲစီဆှံအကျဲစၢၤ,
14 ဒီးဟ့ၣ်ထီၣ်ဆၣ်ဖိကီၢ်ဖိလၢအတၢ်လီၤတူာ်လီၤကာ်တအိၣ်ဘၣ်သၢဒု ဆူယွၤအအိၣ်လီိၤ. သိဖါတနံၣ်ဖိတဒုလၢတၢ်လုၢ်မ့ၣ်အူအဂီၢ်, သိမိၢ်တနံၣ်ဖိတဒုလၢတၢ်လုၢ်တၢ်ပျၢ်တၢ်ဒဲးဘးအဂီၢ်, ဒီးသိဖါတဒုလၢတၢ်လုၢ်မၤဃူမၤဖိးအဂီၢ်န့ၣ်လီၤ.
15 အဝဲကဘၣ်လုၢ်ထီၣ်စ့ၢ်ကီးကိၣ်ပှဲၤကုတဒုလၢတဘၣ်တၢ်မၤအီၤလၢ ကိၣ်မံၣ်, ကိၣ်အဖျၢၣ်ဖးဒိၣ်တဖၣ်လၢအဘၣ်တၢ်မၤအီၤလၢကိၣ်ကမူၣ်ဃါဃုာ် အသးဒီးသ့ၣ်စၤယံးအသိဒီးကိၣ်ဘ့ၣ်ဘၣ်ဘူတဖၣ်လၢ အဘၣ်တၢ်ဒွါအီၤလၢသ့ၣ်စၤယံးအသိ, ဒီးလၢန့ၣ်အမဲာ်ညါတၢ်လုၢ်ဘုဧိၤဟုဧိၤဒီးစပံးထံဒ်တၢ်မၤလိာ် အီၤအသိးန့ၣ်လီၤ.
16 ပှၤလုၢ်တၢ်အခိၣ်ကဟ့ၣ်ထီၣ်တၢ်ခဲလၢာ်အံၤဆူယွၤအအိၣ်ဒီးလုၢ် ထီၣ်တၢ်လုၢ်တၢ်ပျၢ်တၢ်ဒဲးဘးဒီးတၢ်လုၢ်မ့ၣ်အူန့ၣ်လီၤ.
17 အဝဲကဘၣ်လုၢ်ထီၣ်ပာ်ထီၣ်သိဖါတဒုန့ၣ်ဆူယွၤအအိၣ်ဒ်တၢ်လုၢ်မၤ ဃူမၤဖိးဒီးလုၢ်ထီၣ်အီၤဃုာ်ဒီးကိၣ်ပှဲၤကုတဒုန့ၣ်လီၤ. အဝဲကဘၣ်လုၢ်ထီၣ်စ့ၢ်ကီးဘုဧိၤဟုဧိၤဒီးစပံးထံအတၢ်လုၢ်တၢ် ပာ်တဖၣ်န့ၣ်လီၤ.
18 ဖဲဒဲစီဆှံအကျဲစၢၤန့ၣ်, ပှၤနစၤရံဖိတဂၤန့ၣ်ကဘၣ်လူၤကွံာ် အခိၣ်သူဒီးပာ်ထီၣ်အီၤလၢမ့ၣ်အူအဖီခိၣ်ဖဲတၢ်လုၢ်မၤဃူမၤ ဖိးကဘၣ်တၢ်ဆိၣ်ကဲၤထီၣ်အီၤအလီၢ်န့ၣ်လီၤ.
19 ဝံၤဒီးဖဲသိဖါအဖံဘၣ်ခိၣ်ဘၣ်တၢ်ချီအီၤဝံၤလံန့ၣ်, ပှၤလုၢ်တၢ်အခိၣ်ကဟံးန့ၢ်အီၤဒီးဒၢနုာ်အီၤဃုာ်ဒီးကိၣ်ဖး ဒိၣ်တလိၣ်ဒီးကိၣ်ဘ့ၣ်ဘၣ်ဘူတဘ့ၣ်လၢအအိၣ်လၢကုပူၤ, ဆူပှၤနစၤရံဖိအစုပူၤန့ၣ်လီၤ.
20 ဝံၤဒီးပှၤလုၢ်တၢ်အခိၣ်ကဟ့ၣ်ထီၣ်အီၤဒ်တၢ်ဟ့ၣ်လီၤဆီတမံၤ အသိးဆူယွၤအအိၣ်လီၤ. အဝဲသ့ၣ်တဖၣ်န့ၣ်မ့ၢ်ဝဲတၢ်လုၢ်စီဆှံတမံၤလၢပှၤလုၢ်တၢ်အခိၣ် အဂီၢ်, လၢတၢ်ပာ်ဖှိၣ်ဟ့ၣ်အီၤဃုာ်ဒီးသိဖါအသးနါပှၢ်ဒီးအခီၣ်လၢ အဘၣ်ဃးဒီးပှၤလုၢ်တၢ်အခိၣ်ဒ်ယူဒၤအတၢ်သိၣ်တၢ်သီအိၣ်ဝဲအသိး န့ၣ်လီၤ. အန့ၣ်ဝံၤဒီးပှၤနစၤရံဖိအီစပံးထံသ့ဝဲန့ၣ်လီၤ.
21 တၢ်တဖၣ်အံၤမ့ၢ်တၢ်သိၣ်တၢ်သီတဖၣ်လၢအဘၣ်ဃးဒီးပှၤနစၤရံဖိ န့ၣ်လီၤ. ဘၣ်ဆၣ်ဒီးပှၤနစၤရံဖိတဂၤမ့ၢ်အၢၣ်လီၤအါထီၣ်တၢ်လုၢ်တမံၤလၢ တၢ်မၤလိာ်ဘၣ်ဃးဒီးအဝဲအတၢ်ဆိၣ်ဃ့ဝဲလၢကဘၣ်ဟ့ၣ်ဝဲဒီး, အဝဲကဘၣ်မၤပှဲၤတၢ်လၢအအၢၣ်လီၤတ့ၢ်ဝဲသပှၢ်ကတၢၢ်န့ၣ်လီၤ.
22-23 ယွၤမၤလိာ်စီၤမိၤၡ့လၢ, အကစံးဘၣ်စီၤအၤဟရိၣ်ဒီးအဖိခွါတဖၣ်ဒ်သိးကသူတၢ်ကတိၤတဖၣ်ဒ် လၢလာ်အံၤအသိးလၢတၢ်ဆိၣ်ဂ့ၤကီၢ်အံၣ်စရ့လးအပှၤဂီၢ်မုၢ်အဂီၢ် န့ၣ်လီၤ.
24 မ်ယွၤဆိၣ်ဂ့ၤနၤဒီးအံးထွဲကွၢ်ထွဲနၤတက့ၢ်.
25 မ်ယွၤသူၣ်ကညီၤသးကညီၤနၤဒီးအဘျုးအဖှိၣ်အိၣ်လၢနဖီခိၣ်တက့ၢ်.
26 မ်ယွၤကွၢ်ဃီၤနၤလၢတၢ်ဘၣ်သူၣ်ဘၣ်သးဒီးဟ့ၣ်နၤ တၢ်ဃူတၢ်ဖိးတက့ၢ်.
27 ဒီးယွၤစံးဝဲဒၣ်, “အဝဲသ့ၣ်မ့ၢ်ကိးထီၣ်ယမံၤဒ်တၢ်ဆိၣ်ဂ့ၤ တမံၤအသိးလၢကီၢ်အံၣ်စရ့လးအပှၤဂီၢ်မုၢ်အဂီၢ်ဒီးယကဆိၣ်ဂ့ၤ အဝဲသ့ၣ်န့ၣ်လီၤ.”