32
(သိၣ်သီ.၃:၁၂-၂၂)
1 ရူၤဘ့ၣ်အဒူၣ်ဒီးကးအဒူၣ်အိၣ်ဒီးဂီၤဘုၣ်ဂီၤဖံးအါအါကလဲာ် လီၤ. ဖဲအဝဲသ့ၣ်ထံၣ်ဘၣ်လၢကီၢ်ယၤစ့ၢ်ဒီးကီၢ်ကံးလဧးန့ၣ်ကြၢးဝဲ လၢဂီၤဘုၣ်ဂီၤဖံးအဂီၢ်ဒီး,
2 အဝဲသ့ၣ်လဲၤဆူစီၤမိၤၡ့, စီၤအလၤဧစၢ်ဒီးခိၣ်နၢ်အဂၤတဖၣ်လၢ ကမျၢၢ်တၢ်အိၣ်မူကရူၢ်ပူၤအအိၣ်ဒီးစံးဝဲ,
3 “ဝ့ၢ်တဖၣ်လၢအမ့ၢ်, ဧးတၤရိး, ဒံၤဘိၣ်, ယၤစ့ၢ်, နံးမရၤ, ဃ့ၡဘိၣ်, အ့လဧၤလ့ၤ, စဘၣ်, နဘိ, ဒီးဘဧိၣ်,
4 လီၢ်ကဝီၤအံၤလၢယွၤမၤစၢၤတ့ၢ်ပှၤအံၣ်စရ့လးဖိလၢကမၤန့ၢ် ဝဲန့ၣ်, မ့ၢ်တၢ်လီၢ်ဂ့ၤဝဲလၢဂီၤဘုၣ်ဂီၤဖံးအဂီၢ်, ဒီးပအိၣ်ဒီးဂီၤဘုၣ်ဂီၤဖံးအါအါဂီၢ်ဂီၢ်လီၤ.
5 ဝံသးစူၤဟ့ၣ်ပှၤတၢ်လီၢ်အံၤဒ်ပတၢ်စုလီၢ်ခီၣ်ခိၣ်အသိး, ဒီးတဘၣ်ဒုးလဲၤခီဂာ်ပှၤဆူထံကျိယၢ်ဒ့ၣ်အဝၢ်ဘးခီလၢပကသူၣ် လီၤဆီလီၤပသးဖဲန့ၣ်တဂ့ၤ.”
6 စီၤမိၤၡ့စံးဆၢဝဲဒၣ်, “မ့ၢ်သုအဲၣ်ဒိးအိၣ်တ့ၢ်ဖဲအံၤဖဲ သုဒီပုၢ်ဝဲၢ်ပှၤအံၣ်စရ့လးဖိကဒဲကဒဲတဖၣ်လဲၤဆူတၢ်ဒုးန့ၣ် ဧါ.
7 သုမၤသးဟးဂီၤကီၢ်အံၣ်စရ့လးအပှၤဂီၢ်မုၢ်လၢကခီဂာ်ထံကျိ ယၢ်ဒ့ၣ်ဒီးလဲၤနုာ်ဆူကီၢ်တဘ့ၣ်လၢယွၤဟ့ၣ်အဝဲသ့ၣ်အဂီၢ်န့ၣ် ဘူၣ်ဝဲဒ်လဲၣ်.
8 တၢ်အံၤမ့ၢ်တၢ်လၢသုပၢ်တဖၣ်မၤတ့ၢ်ဝဲဖဲယမၢလီၤအဝဲသ့ၣ်လၢ ကၤဒ့ၣ်ဘၢ်န့ဒ်သိးကလဲၤဃုကွၢ်ထံကီၢ်တဘ့ၣ်အခါန့ၣ်လီၤ.
9 အဝဲသ့ၣ်လဲၤတ့ၢ်ဝဲယံၤတုၤလၢအ့ၡကိၤလးအတၢ်တြီၤပူၤဒီး ထံၣ်ဘၣ်တ့ၢ်ထံကီၢ်န့ၣ်, ဘၣ်ဆၣ်ဒီး, ဖဲအဝဲသ့ၣ်ဟဲက့ၤန့ၣ်အဝဲသ့ၣ်မၤဟးဂီၤပှၤဂီၢ် မုၢ်အသးလၢကလဲၤနုာ်လီၤဆူထံကီၢ်တဘ့ၣ်လၢယွၤဟ့ၣ်လီၤတ့ၢ် အဝဲသ့ၣ်အပူၤန့ၣ်လီၤ.
10 ယွၤအသးဒိၣ်ထီၣ်ဖဲမုၢ်တနံၤန့ၣ်, ဒီးမၤတၢ်အၢၣ်လီၤအီလီၤတမံၤဒ်အံၤလီၤ.
11 ယဆိၣ်တၢ်လၢမ့ၢ်လၢအဝဲသ့ၣ်အသူၣ်တတီအသးတရၤဒီးယၤအဃိ, ပှၤပိာ်ခွါလၢအသးအိၣ်ခံဆံနံၣ်ဒီးဆူအဖီခိၣ်လၢအ ဟးထီၣ်လၢကီၢ်အဲၤကူပတူးအပူၤန့ၣ်, တလဲၤနုာ်ဘၣ်ဆူကီၢ်လၢ ယအၢၣ်လီၤအီလီၤတ့ၢ်ဒီးစီၤအၤဘြၤဟၣ်, စီၤအံၤစဲး, ဒီးစီၤယၤကိာ်န့ၣ်နီတဂၤဘၣ်.
12 မ့တမ့ၢ်ဘၣ်လၢပှၤက့ၤစ့းဖိစီၤယဖူန့ၤအဖိခွါစီၤကၤလ့း ဒီးစီၤနိၣ်အဖိခွါစီၤယိၤၡူပှၤလၢအသးတီတ့ၢ်ဒီးယၤတဖၣ် ဘၣ်န့ၣ်, ပှၤအဂၤတလဲၤနုာ်ဘၣ်နီတဂၤဘၣ်.
13 ယွၤသးဒိၣ်ပှၤဂီၢ်မုၢ်ဒီးမၢအဟးဝ့ၤဝီၤလၢပှၢ်မုၢ်ကနၢအနံၣ် လွံၢ်ဆံ, တုၤလၢပှၤဒီတစိၤလၢအမၤတမုာ်အဝဲအသးန့ၣ် သံကွံာ်ဝဲခဲလၢာ်လီၤ.
14 ဒီးခဲအံၤသုဟံးန့ၢ်သုပၢ်တဖၣ်အလီၢ်, ပှၤတၢ်ဒဲးဘးဖိအသီတစိၤလၢကတဲာ်ကတီၤအသးဒ်သိးကဒုးလီၤဘၣ် ယွၤအတၢ်သးကဲၤထီၣ်ဆူၣ်လၢကီၢ်အံၣ်စရ့လးဖိအလိၤကဒီးန့ၣ်လီၤ.
15 သုဝဲပှၤဂီၢ်မုၢ်လၢရူၤဘ့ၣ်ဒီးကးအဒူၣ်မ့ၢ်ဂ့ၢ်လိာ်တၢ်လၢသု ကပိာ်အခံခဲအံၤဒီး, အဝဲကညိကွံာ်ကဒီးပှၤဂီၢ်မုၢ်အံၤတဘျီလၢပှၢ်မုၢ်ကနၢအပူၤဒီး သုကဘၣ်ဟံးန့ၢ်မူဒါလၢအဝဲသ့ၣ်အတၢ်ဟးဂူာ်ဟးဂီၤအဂီၢ်န့ၣ် လီၤ.”
16 အဝဲသ့ၣ်သုးဘူးအသးဆူစီၤမိၤၡ့အအိၣ်ဒီးစံး, “အဆိကတၢၢ်အံၤ, ပျဲပှၤဒ်သိးပကမၤထီၣ်လၢၢ်ဧိၤလ့ဧိၤအဒူၣ် တဖၣ်ဖဲအံၤလၢပသိတဖၣ်အဂီၢ်ဒီးမၤခၢၣ်သနၢၣ်ဝ့ၢ်တဖၣ်လၢပှၤလၢ အသန့ၤထီၣ်အသးဒီးပှၤတဖၣ်အဂီၢ်တက့ၢ်.
17 အန့ၣ်ဝံၤဒီး, ပကအိၣ်ကတဲာ်ကတီၤပသးလၢပကလဲၤဃုာ်ဒီးပဒီပုၢ် ဝဲၢ်ပှၤအံၣ်စရ့လးဖိတဖၣ်ကဒဲကဒဲဆူတၢ်ဒုးအပူၤဒီးဆှၢတၢ် လဲၤထီၣ်ဒုးတၢ်တုၤပသူၣ်လီၤဆီလီၤအဝဲသ့ၣ်လၢကီၢ်တဘ့ၣ်လၢအကမ့ၢ် အဝဲသ့ၣ်အတၢ်တစုန့ၣ်တက့ၢ်. ဖဲတၢ်မၤအသးဒ်အံၤအခါန့ၣ်, ပှၤလၢအသန့ၤအသးလၢပှၤတဖၣ်အိၣ်ဖဲအံၤလၢဝ့ၢ်တဖၣ်လၢတၢ်မၤခၢၣ် သနၢၣ်အီၤန့ၣ်သ့ဝဲ, ပူၤဖျဲးဒီးပှၤဂီၢ်မုၢ်အိၣ်လၢထံကီၢ်တဘ့ၣ်အံၤအပူူူူၤ န့ၣ်လီၤ.
18 တချုးလၢပှၤအံၣ်စရ့လးဖိအဂၤတဖၣ်မၤန့ၢ်အတၢ်န့ၢ်သါအဟီၣ်ခိၣ် ဒံးဘၣ်ဒီးပတဟဲက့ၤဆူပဟံၣ်ဘၣ်.
19 ပတဟံးစ့ၢ်ကီးတၢ်စုလီၢ်ခီၣ်ခိၣ်အတၢ်န့ၢ်သါလၢအဝဲသ့ၣ်အကျါ လၢထံကျိယၢ်ဒ့ၣ်အဘးခီတကပၤန့ၣ်နီတမံၤဘၣ်. အဂ့ၢ်ဒ်အံၤ, ပဒိးန့ၢ်တ့ၢ်လံတၢ်နီၤဖးလၢပဂီၢ်ဖဲအံၤလၢယၢ် ဒ့ၣ်အမုၢ်ထီၣ်တခီလံန့ၣ်လီၤ.”
20 စီၤမိၤၡ့စံးဆၢဝဲ, “သုမ့ၢ်စံးဒ်န့ၣ်သပှၢ်တၢၢ်ဒီးခဲအံၤ လၢယွၤအမဲာ်ညါန့ၣ်ကတဲာ်ကတီၤသုသးလၢသုကလဲၤထီၣ်ဒုးတၢ် အဂီၢ်တက့ၢ်.
21 ကယဲၢ်သုပှၤပိာ်ခွါလၢအဒုးတၢ်တဖၣ်ကဘၣ်ခီဃီၤထံကျိယၢ်ဒ့ၣ် ဒီးလၢယွၤအတၢ်ပၢအဖီလာ်န့ၣ်အဝဲသ့ၣ်ကဘၣ်လဲၤထီၣ်ဒုးတၢ်ထီ ဒါပဒုၣ်ပဒါတဖၣ်တုၤယွၤမၤနၢၤကွံာ်အဝဲသ့ၣ်,
22 ဒီးဟံးန့ၢ်ကီၢ်န့ၣ်ဒ်အတၢ်စုလီၢ်ခီၣ်ခိၣ်အသိးန့ၣ်လီၤ. အန့ၣ်ဝံၤဒီးသုဟဲက့ၤသ့ဝဲလီၤ. အဂ့ၢ်ဒ်အံၤ, သုကဘၣ်မၤလၢထီၣ်ပှဲၤထီၣ်သုမူသုဒါဆူယွၤဒီး ဆူသုဒီပုၢ်ဝဲၢ်ပှၤအံၣ်စရ့လးဖိကဒဲကဒဲတဖၣ်အအိၣ်န့ၣ်လီၤ. အန့ၣ်ဒီး, ယွၤကသ့ၣ်ညါအၢၣ်လီၤလၢထံကျိယၢ်ဒ့ၣ်အမုၢ်ထီၣ်အကီၢ် အံၤမ့ၢ်သုတၢ်န့ၣ်လီၤ.
23 ဘၣ်ဆၣ်ဒီးသုမ့ၢ်တတိၢ်န့ၢ်ဖံးဃာ်သုတၢ်အၢၣ်လီၤအီလီၤန့ၣ်, ယဟ့ၣ်ပလီၢ်သုသးလၢသုကမၤဘၣ်တၢ်ဒဲးဘးထီဒါကစၢ်ယွၤန့ၣ် လီၤ. ဘၣ်ဃးဒီးတၢ်အံၤန့ၣ်မၤကမၣ်တၢ်နီတမံၤတဂ့ၤ. သုကဘၣ်တၢ်စံၣ်ညီၣ်လၢသုတၢ်ဒဲးဘးအဃိလီၤ.
24 မၤသးဒ်န့ၣ်ဒီး, သူၣ်ထီၣ်သုဝ့ၢ်တဖၣ်, ဒီးကရၢၢ်တဖၣ်လၢသုသိ တဖၣ်အဂီၢ်တက့ၢ်. ဘၣ်ဆၣ်ဒီးမၤဒ်သုအၢၣ်လီၤတ့ၢ်အသိးတက့ၢ်.”
25 ပှၤပိာ်ခွါတဖၣ်လၢကးဒီးရူၤဘ့ၣ်အဒူၣ်စံးဝဲဒၣ်, “တၢ်ဒိၣ်ဧၢ, ပကမၤဒ်နမၤလိာ်ပှၤအသိးလီၤ.
26 ပဖိပမါတဖၣ်ဒီးပဂီၤဘုၣ်ဂီၤဖံးတဖၣ်ဒီးပသိတဖၣ်ကအိၣ်တ့ၢ်ဖဲ အံၤလၢကီၢ်ကံးလဧးအဝ့ၢ်တဖၣ်အပူၤလီၤ.
27 မ့မ့ၢ်ပဝဲကိးဂၤဒဲးအိၣ်ကတဲာ်ကတီၤအသးလၢကလဲၤထီၣ်ဆူတၢ် ဒုးအပူၤလၢယွၤအတၢ်ပၢဆှၢအဖီလာ်န့ၣ်လီၤ. ပကလဲၤခီဂာ်ထံကျိယၢ်ဒ့ၣ်ဒီးဒုးတၢ်ဒ်နစံးတ့ၢ်နဲအသိးန့ၣ်လီၤ.”
28 မၤသးဒ်န့ၣ်ဒီး, စီၤမိၤၡ့ဟ့ၣ်လီၤတၢ်မၤလိာ်တဖၣ်အံၤဆူ စီၤအလၤဧစၢ်, စီၤယိၤၡူ, ဒီးအံၣ်စရ့လးအခိၣ်အနၢ်အဂၤတဖၣ်အအိၣ်န့ၣ်လီၤ.
29 “ပှၤလၢကးဒီးရူၤဘ့ၣ်အဒူၣ်တဖၣ်အံၤမ့ၢ်ခီဂာ်ထံကျိယၢ် ဒ့ၣ်, ကတဲာ်ကတီၤအသးလၢတၢ်ဒုးအဂီၢ်လၢယွၤအတၢ်ပၢ ဆှၢအဖီလာ်ဒီးလၢအဝဲသ့ၣ်အတၢ်မၤစၢၤအဃိသုမၤနၢၤကီၢ်န့ၣ်မ့ၢ်သ့ ဒီး, အန့ၣ်တစုဟ့ၣ်လီၤအဝဲသ့ၣ်လၢကီၢ်ကံးလဧးဒ်အတၢ်စုလီၢ် ခီၣ်ခိၣ်အသိးတက့ၢ်.
30 ဘၣ်ဆၣ်ဒီးအဝဲသ့ၣ်မ့ၢ်တခီဂာ်ထံကျိယၢ်ဒ့ၣ်ဒီးလဲၤဒုးတၢ် ဃုာ်ဒီးသုဘၣ်န့ၣ်, အဝဲသ့ၣ်ကဘၣ်မၤန့ၢ်အတၢ်နီၤဖးလၢကီၢ်ကနၤဧၣ်အပူၤဒ်သိးဒၣ်သု ဒိးန့ၢ်ဘၣ်အီၤန့ၣ်လီၤ.”
31 ပှၤတဖၣ်လၢကးဒီးရူၤဘ့ၣ်အဒူၣ်စံးဆၢဝဲ, “တၢ်ဒိၣ်ဧၢ, ပကမၤဒ်ယွၤမၤလိာ်တ့ၢ်ပှၤအသိးန့ၣ်လီၤ.
32 လၢအဝဲအတၢ်မၤလိာ်အဖီလာ်န့ၣ်ပကခီဂာ်တၢ်ဆူ ကီၢ်ကနၤဧၣ်အပူၤဒီးလဲၤဒုးတၢ်ဒ်သိးပပၢၤဃးပတၢ်စုလီၢ်ခီၣ် ခိၣ်ဖဲအံၤလၢထံကျိယၢ်ဒ့ၣ်အမုၢ်ထီၣ်တကပၤအံၤကသ့ဝဲန့ၣ် လီၤ.”
33 မၤသးဒ်န့ၣ်ဒီး, စီၤမိၤၡ့ဟ့ၣ်လီၤကယဲၢ်လီၢ်ကဝီၤလၢအဘၣ်ဃး ဒီးပှၤအမိၢ်ဖိတဖၣ်အစီၤပၤစံဃိၣ်ဒီးကီၢ်ဘၤၡၣ်အစီၤပၤဧိာ် ဃုာ်ဒီးဝ့ၢ်တဖၣ်ဒီးတၢ်လီၢ်အိၣ်ခိၣ်အိၣ်ဃၢၤဆူဒူၣ်တဖၣ်လၢ အမ့ၢ်, ကး, ရူၤဘ့ၣ်ဒီးမနၤၡ့ၣ်တခီဒူၣ်အအိၣ်န့ၣ်လီၤ.
34 ကးအဒူၣ်ဘှီထီၣ်က့ၤဝ့ၢ်အိၣ်ဒီးအခိၣ်ဒူတဖၣ်လၢအမ့ၢ်ဒံၤဘိၣ်, ဧးတၤရိး, ဧရိၤဧ့ၢ်,
35-36 ဧးတရိးၡိဖၣ်, ယၤဧစ့ၢ်, ယၤကဘၤ, ဘ့ၤသနံးမရၤ, ဒီးဘ့ၤသဟၤရံၣ်န့ၣ်လီၤ.
37 ရူၤဘ့ၣ်အဒူၣ်ဘှီထီၣ်က့ၤဝ့ၢ်အိၣ်ဒီးအတိာ်ခၢၣ်သနၢၣ်တဖၣ်လၢ အမ့ၢ်ဝဲ, ဃ့ၡဘိၣ်, အ့လဧၤလ့ၤ, ကံးရယးသံၣ်,
38 နဘိၤ, ဘဧၤလးမဧိၣ် (အမံၤအံၤဘၣ်တၢ်လဲလိာ်အီၤ) ဒီးစံးဘမၤန့ၣ်လီၤ. အဝဲသ့ၣ်ဟ့ၣ်ဝ့ၢ်တဖၣ်လၢအဘှီက့ၤဝဲလၢ အမံၤအသီတဖၣ်လီၤ.
39 စီၤမနၤၡ့ၤအဖိခွါစီၤမၤကံၢ်အဒူၣ်ထၢနုာ်လီၤဒုးကီၢ်ကံးလ ဧး, မၤန့ၢ်အီၤဒီးဟီထီၣ်ကွံာ်ပှၤအမိၢ်ဖိတဖၣ်လၢအအိၣ်ဖဲန့ၣ် လီၤ.
40 မၤသးဒ်န့ၣ်ဒီး, စီၤမိၤၡ့ဟ့ၣ်လီၤကီၢ်ကံးလဧးဆူစီၤမၤကံၢ် အဒူၣ်ထၢအစုပူၤဒီးအဝဲသ့ၣ်အိၣ်ဆိးဝဲဖဲန့ၣ်လီၤ.
41 စီၤမနၤၡ့ၤအဒူၣ်ဖိစီၤယၤအံၢ်လဲၤထီၣ်ဒုးန့ၢ်သဝီတနီၤဒီး ယုၢ်န့ၢ်ဝဲအမံၤလၢ “ယၤအံၣ်အသဝီတဖၣ်န့ၣ်လီၤ.”
42 စီၤနိဘၤလဲၤထီၣ်ဒုးဒီးမၤန့ၢ်ဝ့ၢ်ကနးဒီးအသဝီတဖၣ်ဒီး ကိးထွဲက့ၤဝဲဒ်အနီၢ်ကစၢ်ဒၣ်ဝဲအမံၤအသိးလၢဝ့ၢ်နိဘၤန့ၣ်လီၤ.