33
1 တၢ်ကွဲးနီၣ်လၢလာ်အံၤပာ်ဖျါထီၣ်တၢ်လီၢ်တၢ်ကျဲအမံၤတဖၣ်ဖဲ ပှၤအံၣ်စရ့လးဖိတဖၣ်သူၣ်တ့ၢ်ဒဲအလီၢ်စးထီၣ်လၢအဟးထီၣ်လၢ ကီၢ်အဲၤကူပတူးဝံၤအလီၢ်ခံ, လၢအဝဲသ့ၣ်အဒူၣ်တဖၣ်အပူၤ, လၢစီၤမိၤၡ့ဒီးစီၤအၤဟရိၣ်အတၢ်ကဲခိၣ်ကဲနၢ်အဖီလာ်န့ၣ်လီၤ.
2 တုၤယွၤမၤလိာ်တၢ်ဒီးစီၤမိၤၡ့ကွဲးလီၤတၢ်လီၢ်တၢ်ကျဲအမံၤ တတီၤဘၣ်တတီၤဖဲအဝဲသ့ၣ်သူၣ်ထီၣ်ဒဲအလီၢ်န့ၣ်လီၤ.
3 ကီၢ်အံၣ်စရ့လးအပှၤဂီၢ်မုၢ်ဟးထီၣ်လၢကီၢ်အဲၤကူပတူးလၢနံၣ် တနံၣ်လၢအခီၣ်ထံးကတၢၢ်တလါထီၣ်တဆံယဲၢ်သီအနံၤ, ဖဲဘူၣ်လဲၤ ကပာ်ဝံၤလၢခံတနံၤန့ၣ်လီၤ. လၢကစၢ်ယွၤအတၢ်ဒီဒၣ်အိၣ်ပှိၤအဖီလာ်န့ၣ်အဝဲသ့ၣ်ဟးထီၣ်လၢ ဝ့ၢ်ရၤမစ့ဖဲပှၤအဲၤကူပတူးဖိတဖၣ်ထံၣ်ဘၣ်ဝဲပှဲၤမဲာ်ပှဲၤနါ
4 ပှၤတဖၣ်လၢအခူၣ်လီၤကွံာ်အဖိဝဲၢ်ကိတဖၣ်လၢယွၤမၤသံတ့ၢ်အီၤ န့ၣ်လီၤ. လၢအတၢ်မၤဒ်အံၤအဃိ, ယွၤဒုးနဲၣ်ဝဲလၢအဝဲအစိကမီၤဒိၣ်န့ၢ်ဒံးကီၢ်အဲၤကူပတူး အကစၢ်တဖၣ်တက့ၢ်န့ၣ်လီၤ.
5 ကီၢ်အံၣ်စရ့လးအပှၤဂီၢ်မုၢ်ဟးထီၣ်လၢဝ့ၢ်ရၤမစ့ဒီးသူၣ်ထီၣ် အဒဲဖဲစူးကိၤသးလီၤ.
6 အဝဲသ့ၣ်သူၣ်ဒဲလီၢ်လၢခံတတီၤန့ၣ်မ့ၢ်ဖဲအ့သၣ်, အိၣ်ဖဲပှၢ်မုၢ်ကနၢအထိးနါန့ၣ်လီၤ.
7 စးထီၣ်ဖဲန့ၣ်အဝဲသ့ၣ်တရံးက့ၤဆူပံၤဟဃံရိး, အိၣ်လၢဘဧၤလးစဖိၣ်အမုၢ်ထီၣ်ဒီးသူၣ်ထီၣ်အဒဲဖဲမံးကဒိးလး န့ၣ်လီၤ.
8 အဝဲသ့ၣ်ဟးထီၣ်လၢပံၤဟဃံရိးဒီးလဲၤခီဖျိပီၣ်လဲၣ်ဂီၤဆူ ပှၢ်မုၢ်ကနၢၡူၢ်န့ၣ်လီၤ. ဒီးသၢသီလဲၤကျဲဝံၤအလီၢ်ခံန့ၣ်အဝဲသ့ၣ်သူၣ်ဒဲဖဲမၤရၤန့ၣ်လီၤ.
9 ဒီးဖဲန့ၣ်အဝဲသ့ၣ်လဲၤဆူအ့လံၣ်တၢ်လီၢ်ဖဲအဝဲသ့ၣ်သူၣ်ဒဲ အလီၢ်မ့ၢ်လၢဖဲန့ၣ်ထံထီၣ်ပၢၢ်အိၣ်ဝဲတဆံခံပူၤဒီးသ့ၣ်စူၣ် ပလိၣ်အိၣ်ဝဲအထံးနွံဆံအဃိလီၤ.
10 အဝဲသ့ၣ်ဟးထီၣ်လၢအ့လံၣ်ဒီးသူၣ်လီၤအဒဲဘူးဒီးစူးအဲးပီၣ် လဲၣ်က့ၣ်ကျီၤန့ၣ်လီၤ.
11 တၢ်လီၢ်လၢခံတတီၤဖဲအဝဲသ့ၣ်သူၣ်လီၤအဒဲအလီၢ်န့ၣ်မ့ၢ်ဖဲ ပှၢ်မုၢ်ကနၢစံၣ်အပူၤန့ၣ်လီၤ.
12-13 အန့ၣ်ဝံၤဒီးအဝဲသ့ၣ်သူၣ်အဒဲဖဲဒၤဖကၤ, ဒီးအန့ၣ်ဝံၤအလီၢ်ခံအဝဲသ့ၣ်သူၣ်အဒဲဖဲအၤလူၣ်န့ၣ်လီၤ.
14 လၢခံတတီၤမ့ၢ်ဝဲရဖံၤဒံၣ်, တၢ်လီၢ်ဖဲအဝဲသ့ၣ်ကအီတၢ်အဂီၢ်ထံ တအိၣ်ဘၣ်န့ၣ်လီၤ.
15-37 လၢရဖံၤဒံၣ်, ဆူကစၢၢ်ဃိၢ်န့ၣ်အဝဲသ့ၣ်သူၣ်လီၤအဒဲဖဲတၢ်လီၢ် တဖၣ်ဒ်လၢလာ်အံၤအသိးန့ၣ်လီၤ. ပှၢ်မုၢ်ကနၢစံၤနါ, ကံးဘြိၣ်ဃးကဝၤ (မ့တမ့ၢ်တၢ်သးကွံအတၢ်သွၣ်ခိၣ်တဖၣ်), ဃစ့ရိး, ရံးသမၤ, ရံးမိၣ်ပ့ၤရး, လံးဘနၤ, ရံးစၤ, ကဟ့လသၤ, ကစၢၢ်ၡၤဖၢ်, ဃရၤဒါ, မၤကဟ့လိး, တၤဃး, တၤရး, မံးသကၤ, ဃၤၡမိနၤ, မိၤစ့ရိး, ဘန့ယၤကၣ်, ဃိးရဟးကံဒ့း, ယးတဘၤသၤ, ဧတြိနၤ, ဧ့စယိၣ်က့းဘၢ်, ပှၢ်မုၢ်ကနၢစံၣ် (မ့ၢ်ဝဲကၤဒ့ၣ်) ဒီးကစၢၢ်ဃိၢ်အိၣ်ဖဲကီၢ်အဒိၣ်အထိးနါန့ၣ်လီၤ.
38 တုၤယွၤဟ့ၣ်လီၤအကလုၢ်ဒီးပှၤလုၢ်တၢ်အခိၣ်စီၤအၤဟရိၣ်လဲၤထီၣ် ဆူကစၢၢ်ဃိၢ်အလိၤန့ၣ်လီၤ.
39 ဖဲအသးအိၣ်တကယၤခံဆံသၢနံၣ်န့ၣ်အဝဲသံဝဲဖဲန့ၣ်ဖဲပှၤအံၣ် စရ့လးဖိတဖၣ်ဟးထီၣ်လၢကီၢ်အဲၤကူပတူးအပူၤအလီၢ်ခံအနံၣ် လွံၢ်ဆံ, ယဲၢ်လါတလါထီၣ်အဆိကတၢၢ်တသီအနံၤန့ၣ်လီၤ.
40 ကီၢ်ကနၤဧၣ်ကလံၤထံးအစီၤပၤစီၤဧရးနၢ်ဟူဘၣ်ဝဲလၢပှၤအံၣ် စရ့လးဖိတဖၣ်ဟဲဝဲန့ၣ်လီၤ.
41-49 လၢကစၢၢ်ဃိၢ်တုၤဆူကီၢ်မိၤအးအပျီတဖၣ်အပူၤန့ၣ်ပှၤအံၣ်စရ့ လးဖိတဖၣ်သူၣ်လီၤအဒဲဖဲတၢ်လီၢ်လၢလာ်တဖၣ်အံၤန့ၣ်လီၤ. စးလမိနၤ, ပူၤနိၣ်, အိဘိး, ဧဘၤရံၣ်အတၢ်ဟးရူာ်ဟးဂီၤအလီၢ် တဖၣ်လၢအအိၣ်လၢကီၢ်မိၤအးအလီၢ်ကဝီၤအပူၤ, ဒံဘိၣ်ကး, ဧၤလမိၣ်ဒံးဘလၤသံၣ်, ကစၢၢ်ဧဘၤရံၣ်ဘူးဒီးကစၢ်နဘိ, ဒီးလၢကီၢ်မိၤအးအတၢ်ပျီပူၤတဖၣ်လၢအအိၣ်သဃီၤဒီးဝ့ၢ်ယရံၤ ဃိလၢထံကျိယၢ်ဒ့ၣ်အဘးခီ, ဖဲဘ့းဘၤယၡံမိးဒီးသ့ၣ်ဖှ့ၡံးတၤ အတၢ်တြီၤအဘၢၣ်စၢၤန့ၣ်လီၤ.
50 ဖဲန့ၣ်လၢကီၢ်မိၤအးအတၢ်ပျီပူၤတဖၣ်လၢအအိၣ်သဃီၤဒီးဝ့ၢ် ယရံၤဃိလၢထံကျိယၢ်ဒ့ၣ်အဘးခီအံၤန့ၣ်, ယွၤဟ့ၣ်လီၤစီၤမိၤၡ့,
51 တၢ်သိၣ်လိနဲၣ်ယုၤတဖၣ်ဒ်လၢလာ်အသိးလၢပှၤအံၣ်စရ့လးဖိအဂီၢ် န့ၣ်လီၤ. “ဖဲသုခီထံကျိယၢ်ဒ့ၣ်ဆူကီၢ်ကနၤဧၣ်အပူၤန့ၣ်,
52 သုကဘၣ်ဟီထီၣ်ကွံာ်ကယဲၢ်ပှၤအိၣ်ဆိးလၢကီၢ်န့ၣ်အပူၤခဲလၢာ် လီၤ. မၤဟးဂီၤကွံာ်ကယဲၢ်အဝဲသ့ၣ်အလၢၢ်တဖၣ်, တၢ်ဂီၤတၢ်ဖီၣ်လၢတိၢ်, စ့, ထးတဖၣ်ဒီးကယဲၢ်အတၢ်ဘူၣ်တၢ်ဘါအလီၢ်တဖၣ်န့ၣ်တက့ၢ်.
53 ဟံးန့ၢ်ကီၢ်န့ၣ်ဒီးသူၣ်လီၤဆီလီၤသုသးဖဲအပူၤန့ၣ်တက့ၢ်. အဂ့ၢ်ဒ်အံၤ, ယဟ့ၣ်လီၤတၢ်န့ၣ်လၢသုလီၤ.
54 နီၤဖးလီၤကီၢ်န့ၣ်လၢပှၤအဒူၣ်အကလုာ်ကလုာ်တဖၣ်ဒီးဒူၣ်ထၢတဖၣ် အကျါခီဖျိတၢ်ဖီၣ်တၢ်ဖးတဖၣ်, ဒီးဟ့ၣ်လီၤကီၢ်အလီၢ်လဲၢ်တတီၤဆူဒူၣ်ထၢအဒိၣ်တဒူၣ်လၢအတၢ်န့ၢ် သါအဂီၢ်, ဒီးကီၢ်အလီၢ်အံၣ်ဆူဒူၣ်ထၢအဆံးဖိတဒူၣ်အအိၣ်တက့ၢ်.
55 ဘၣ်ဆၣ်ဒီးသုမ့ၢ်တနီၣ်ထီၣ်ကွံာ်ဘၣ်ပှၤအိၣ်ဆိးလၢကီၢ်န့ၣ်အပူၤ ဘၣ်ဒီးပှၤအိၣ်လီၤတဲာ်ဖဲန့ၣ်တဖၣ်ကမၤကိၢ်မၤဂီၤသုဒ်တၢ်ကမှံၤ တဖၣ်လၢသုမဲာ်ချံတဖၣ်အပူၤဒီးတၤဆှုၣ်တဖၣ်လၢသုကပၤတဖၣ်အသိး ဒီးအဝဲသ့ၣ်ကဒုးတၢ်ထီဒါသုန့ၣ်လီၤ.
56 သုမ့ၢ်တနီၣ်ထီၣ်ကွံာ်ဘၣ်အဝဲသ့ၣ်ဒီး, ယကမၤဟးဂီၤကွံာ်သု, ဒ်ယတိာ်ပာ်လၢယကမၤဟးဂီၤကွံာ်အဝဲသ့ၣ်အသိးန့ၣ်လီၤ.”