31
1-2 ယွၤစံးဘၣ်စီၤမိၤၡ့, “စံၣ်ညီၣ်ပှၤမံးဒယၣ်ဖိတဖၣ်လၢကယဲၢ်တၢ်လၢအမၤတ့ၢ် ကီၢ်အံၣ်စရ့လးအပှၤဂီၢ်မုၢ်အဃိန့ၣ်တက့ၢ်. တုၤနမၤတၢ်န့ၣ်ဝံၤဒီးနကသံလီၤ.”
3 မၤသးဒ်န့ၣ်ဒီးစီၤမိၤၡ့စံးဘၣ်ပှၤဂီၢ်မုၢ်, “ကတဲာ်ကတီၤသုသးလၢတၢ်ဒုးတၢ်ယၤအဂီၢ်လၢသုဒုးတၢ်ထီဒါ ပှၤမံးဒယၣ်ဖိတဖၣ်ဒီးစံၣ်ညီၣ်အဝဲသ့ၣ်, လၢတၢ်လၢအမၤတၢ်ဘၣ်တ့ၢ်ယွၤအဃိ, ကသ့ဝဲအဂီၢ်န့ၣ်တက့ၢ်.
4 လၢအံၣ်စရ့လးဖိအဒူၣ်တဒူၣ်စုာ်စုာ်အကျါန့ၣ်ဆှၢလီၤပှၤတကထိ ဂၤလၢတၢ်ဒုးတၢ်ယၤအဂီၢ်တက့ၢ်.”
5 မၤသးဒ်န့ၣ်ဒီး, ပှၤအဂၤတကထိဘၣ်တၢ်ဃုထၢထီၣ်အီၤလၢဒူၣ်ဖိ တဒူၣ်စုာ်စုာ်အပူၤ, ပှၤခဲလၢာ်ပာ်ဖှိၣ်အိၣ်ဝဲအဂၤတကလးခံကထိ, ကတဲာ်ကတီၤအသးလၢတၢ်ဒုးတၢ်ယၤအဂီၢ်န့ၣ်လီၤ.
6 စီၤမိၤၡ့ဆှၢလီၤအဝဲသ့ၣ်ဆူတၢ်ဒုးတၢ်ယၤအပူၤလၢပှၤလုၢ်တၢ် အခိၣ်စီၤအလၤဧစၢ်အဖိခွါစီၤဖံၤနဃၣ်အတၢ်ပၢတၢ်ဆှၢအဖီလာ်, ပှၤတဂၤလၢအကွၢ်ထွဲတၢ်စီဆှံအပီးအလီတဖၣ်ဒီးကွဲၤတဖၣ်လၢ ကဟ့ၣ်ထီၣ်တၢ်ပနီၣ်တဖၣ်အဂီၢ်န့ၣ်လီၤ.
7 အဝဲသ့ၣ်လဲၤထီၣ်ဒုးကီၢ်မံးဒယၣ်, ဒ်ယွၤမၤလိာ်တ့ၢ်စီၤမိၤၡ့ အသိးဒီးမၤသံကွံာ်ပှၤပိာ်ခွါခဲလၢာ်,
8 ဃုာ်ဒီးကီၢ်မံးဒယၣ်အစီၤပၤယဲၢ်ဂၤလၢအမ့ၢ်, စီၤအဝံၤ, စီၤရ့က့ၣ်, စီၤစူၢ်, စီၤဃူၢ်ဒီးစီၤရ့ဘၤန့ၣ် လီၤ. အဝဲသ့ၣ်မၤသံစ့ၢ်ကီးစီၤဘဧိၢ်အဖိခွါစီၤဘံးလၣ်န့ၣ်လီၤ.
9 ကီၢ်အံၣ်စရ့လးအပှၤဂီၢ်မုၢ်ဖီၣ်န့ၢ်ပှၤမံးဒယၣ်ဖိပိာ်မုၣ်တဖၣ် ဒီးအဖိသၣ်တဖၣ်, ဟံးန့ၢ်ကွံာ်အဝဲသ့ၣ်အဂီၤဘုၣ်ဂီၤဖံး, ဒီးအဝဲ သ့ၣ်အသိအဖုတဖၣ်, ဂုာ်န့ၢ်ကယဲၢ်အဝဲသ့ၣ်အတၢ်စုလီၢ်ခီၣ်ခိၣ်ခဲ လၢာ်,
10 ဒီးအဝဲသ့ၣ်ဒွဲၣ်အူကွံာ်ကယဲၢ်ပှၤမံးဒယၣ်ဖိအဝ့ၢ်တဖၣ်ဒီး အသူၣ်ဒဲလီၢ်တဖၣ်န့ၣ်လီၤ.
11 အဝဲသ့ၣ်စိာ်ကွံာ်ကယဲၢ်တၢ်လၢအဂုာ်န့ၢ်ဝဲတဖၣ်ခဲလၢာ်, ဃုာ်ဒီးပှၤဃိာ်ဖိတဖၣ်ဒီးဆၣ်ဖိကီၢ်ဖိတဖၣ်,
12 ဒီးလဲၤစိာ်ဝဲဆူစီၤမိၤၡ့ဒီးစီၤအလၤဧစၢ်အအိၣ်ဒီးဆူကီၢ် အံၣ်စရ့လးအပှၤဂီၢ်မုၢ်အတၢ်အိၣ်မူကရူၢ်အမဲာ်ညါ, လၢအအိၣ်ဝဲဖဲသူၣ်ဒဲ လီၢ်လၢကီၢ်မိၤအးအပျီတဖၣ်အပူၤ, လၢအအိၣ်သဃီၤဒီးဝ့ၢ်ယရံၤဃိ လၢထံကျိယၢ်ဒ့ၣ်အဘးခီန့ၣ်လီၤ.
13 စီၤမိၤၡ့, စီၤအလၤဧစၢ်ဒီးကယဲၢ်တၢ်အိၣ်မူကရူၢ်အခိၣ်အနၢ်အဂၤ တဖၣ်ဟးထီၣ်ဆူသူၣ်ဒဲလီၢ်အချၢလၢကလဲၤသဂၢၢ်သုးမုၢ်အဂီၢ်န့ၣ် လီၤ.
14 စီၤမိၤၡ့သးဒိၣ်ထီၣ်ပှၤခိၣ်ပှၤနၢ်တဖၣ်, သုးခိၣ်သုးနၢ်တဖၣ် လၢအပၢဆှၢသုးမုၢ်အကထိတဖၣ်ဒီးအကရူၢ်တဖၣ်, လၢအဟဲက့ၤကဒါက့ၤလၢတၢ်ဒုးပျီပူၤန့ၣ်လီၤ.
15 အဝဲသံကွၢ်ဝဲ, “ဘၣ်မနုၤလၢသုပာ်မူတ့ၢ်ကယဲၢ်ပိာ်မုၣ်တဖၣ် ခဲလၢာ်န့ၣ်လဲၣ်.
16 သ့ၣ်နီၣ်ထီၣ်လၢပှၤလၢအပိာ်ထွဲစီၤဘံးလၣ်အတၢ်သိၣ်လိနဲၣ်ယုၤ တဖၣ်လၢဝ့ၢ်ပဧိၢ်န့ၣ်ဒီးဆှၢဃီၤပှၤဂီၢ်မုၢ်ဆူတၢ်သးတတီဒီး ယွၤန့ၣ်မ့ၢ်ပှၤပိာ်မုၣ်တဖၣ်တက့ၢ်. တၢ်န့ၣ်မ့ၢ်တၢ်လၢအဟဲစိာ်တၢ်သံသတြိာ်လၢယွၤအပှၤဂီၢ်မုၢ် အဖီခိၣ်န့ၣ်လီၤ.
17 မၤသးဒ်န့ၣ်ဒီး, ခဲအံၤမၤသံကွံာ်ပှၤပိာ်ခွါဖိကိးဂၤဒီး ပိာ်မုၣ်ကိးဂၤဒဲးလၢအမံဃုာ်ဂဲၤဃုာ်တ့ၢ်လၢတၢ်မုာ်ဖံးမုာ် ညၣ်အပူၤ,
18 ဘၣ်ဆၣ်ဒီးပျဲမူကယဲၢ်ပိာ်မုၣ်ဖိဒီးပှၤမုၣ်ကနီၤဖိတဖၣ်လၢ သုဂီၢ်န့ၣ်တက့ၢ်.
19 ခဲကနံၣ်အံၤ, ကယဲၢ်သုဝဲကိးဂၤဒဲးလၢအမၤသံတ့ၢ်ပှၤတဂၤဂၤ မ့ၢ်ဂ့ၤထိးဘၣ်ပှၤသံစိၣ်တခါမ့ၢ်ဂ့ၤန့ၣ် ကဘၣ်အိၣ်လၢသူၣ်ဒဲလီၢ်အချၢနွံသီန့ၣ်လီၤ. လၢသၢသီတသီအနံၤဒီးနွံသီတသီအနံၤန့ၣ်မၤကဆှီထီၣ်သုသး ဃုာ်ဒီးပိာ်မုၣ်တဖၣ်လၢသုဖီၣ်န့ၢ်တ့ၢ်အီၤတက့ၢ်.
20 သုကဘၣ်မၤကဆှီထီၣ်စ့ၢ်ကီးတၢ်ကူတၢ်သိးကိးဘ့ၣ်ဒဲးဒီးကယဲၢ် တၢ်တမံၤလၢ်လၢ်လၢဘၣ်တၢ်မၤအီၤလၢတၢ်ဖံးမ့ၢ်ဂ့ၤ, မဲာ်တဲးလဲးအဆူၣ်မ့ၢ်ဂ့ၤ, သ့ၣ်မ့ၢ်ဂ့ၤန့ၣ်လီၤ.”
21 ပှၤလုၢ်တၢ်အခိၣ်စီၤအလၤဧစၢ်စံးဘၣ်ပှၤပိာ်ခွါတဖၣ်လၢအဟဲက့ၤ လၢတၢ်ဒုးတၢ်ယၤပူၤန့ၣ်, “တၢ်တဖၣ်အံၤမ့ၢ်တၢ်သိၣ်တၢ်သီ တဖၣ်လၢယွၤဟ့ၣ်တ့ၢ်စီၤမိၤၡ့န့ၣ်လီၤ.
22 တၢ်ကိးမံၤဒဲးလၢအတူၢ်မ့ၣ်အူန့ၢ်ဒ်ထူ, စ့, တိၢ်ဘီ, ထး, ပှာ်ဝါ, ဒီးစၢၢ်တဖၣ်န့ၣ်,
23 ကဘၣ်တၢ်မၤကဆှီအီၤခီဖျိတၢ်ဒုးလဲၤခီအီၤလၢမ့ၣ်အူအပူၤ န့ၣ်လီၤ. ကယဲၢ်တၢ်အဂၤလၢအအိၣ်လီၤတဲာ်တဖၣ်န့ၣ်ကဘၣ်တၢ်မၤ ကဆှီအီၤလၢထံလၢကကဆှီထီၣ်အဂီၢ်န့ၣ်လီၤ.
24 လၢနွံသီတသီအနံၤန့ၣ်သုကဘၣ်ဆှုၣ်သုတၢ်ကူတၢ်သိးတဖၣ် လီၤ. အန့ၣ်ဝံၤဒီးသုကကဆှီထီၣ်က့ၤဒ်တၢ်ဘူၣ်တၢ်ဘါအလုၢ် အလၢ်အသိးဒီးသုကဒိးန့ၢ်တၢ်ပျဲလၢ သုကလဲၤနုာ်ဆူသူၣ်ဒဲလီၢ်န့ၣ်လီၤ.
25-26 ယွၤစံးဘၣ်စီၤမိၤၡ့, “နၤဒီးစီၤအလၤဧစၢ်, ဃုာ်ဒီးတၢ်အိၣ်မူကရူၢ်အခိၣ်အနၢ်အဂၤတဖၣ် ကဘၣ်ဂံၢ်တၢ်ကိးမံၤဒဲးလၢတၢ်ဖီၣ်န့ၢ်အီၤ, ဃုာ်ဒီးပှၤဃိာ်ဖိတဖၣ်ဒီးဆၣ်ဖိကီၢ်ဖိတဖၣ်န့ၣ်လီၤ.
27 နီၤဖးတၢ်လၢဘၣ်တၢ်ဟဲစိာ်အီၤတဖၣ်န့ၣ်ခံပူပှဲၤသိးသိး, တပူန့ၣ်လၢပှၤသုးဖိတဖၣ်အဂီၢ်ဒီးအဂၤတပူန့ၣ်လၢပှၤအိၣ်လီၤ တဲာ်ကမျၢၢ်ခဲလၢာ်အဂီၢ်တက့ၢ်.
28 လၢတၢ်ဘၣ်ဃးဒီးပှၤသုးဖိတဖၣ်အတၢ်နီၤဖးအပူၤန့ၣ်, ပှၤဃိာ်ဖိယဲၢ်ကယၤဂၤအကျါဟံးဃာ်အီၤတဂၤဒ်တၢ်ခိ တၢ်သွဲတမံၤလၢယွၤအဂီၢ်ဒီးဒ်န့ၣ်အသိးလၢဂီၤဘုၣ်ဂီၤဖံး, ကသ့ၣ်ယီၤတဖၣ်, သိတဖၣ်, ဒီးမဲာ်တဲးလဲးတဖၣ်အကျါန့ၣ်နီၤဖး ဟံးန့ၢ်စ့ၢ်ကီးတမံၤဃီဒ်န့ၣ်တက့ၢ်.
29 ဟ့ၣ်လီၤတၢ်န့ၣ်ခဲလၢာ်ဆူပှၤလုၢ်တၢ်အခိၣ်စီၤအလၤဧစၢ် အအိၣ်ဒ်တၢ်မၤဘူၣ်လီၤဆီတမံၤဆူယွၤအအိၣ်အသိးန့ၣ်တက့ၢ်.
30 လၢတၢ်နီၤဖးဆူပှၤဂီၢ်မုၢ်လၢအိၣ်လီၤတဲာ်တဖၣ်အဂီၢ်အကျါန့ၣ် ဟံးန့ၢ်ပှၤဃိၢ်ဖိယဲၢ်ဆံအကျါတဂၤစုာ်စုာ်ဒီးတၢ်တမံၤဃီဒ်န့ၣ် အသိးန့ၣ်, နီၤဖးဟံးန့ၢ်အီၤလၢဂီၤဘုၣ်ဂီၤဖံး, ကသ့ၣ်ယီၤတဖၣ်, သိ, ဒီးမဲာ်တဲးလဲးတဖၣ်အကျါစ့ၢ်ကီးတက့ၢ်. ဒီးဟ့ၣ်လီၤတၢ်တဖၣ်န့ၣ်ဆူပှၤလ့ၤဝံဖိတဖၣ်အအိၣ်လၢအဘၣ်မူဘၣ် ဒါလၢတၢ်ကွၢ်ထွဲယွၤအဒဲစီဆှံန့ၣ်တက့ၢ်.”
31 စီၤမိၤၡ့ဒီးစီၤအလၤဧစၢ်မၤဝဲဒ်တၢ်လၢယွၤမၤလိာ်ဝဲတဖၣ်အသိး န့ၣ်လီၤ.
32-35 တၢ်ကွဲးနီၣ်လၢလာ်အံၤမ့ၢ်တၢ်တဖၣ်လၢပှၤသုးဖိတဖၣ်မၤန့ၢ် အီၤ, လၢတၢ်လၢအဟံးဃာ်ဝဲလၢအဂီၢ်ဒၣ်ဝဲ, အမဲာ်ညါန့ၣ်လီၤ. သိဒီးမဲာ်တဲးလဲးအဒုဃုကလီၢ်နွံကလးယဲၢ်ကထိ, ဂီၤဘုၣ်ဂီၤဖံးအဒုနွံကလးခံကထိ, ကသ့ၣ်ယီၤအဒုဃုကလး တကထိ, ဒီးပိာ်မုၣ်မုၣ်ကနီၤအဂၤသၢကလးခံကထိန့ၣ်လီၤ.
36-40 တၢ်နီၤဖးတဝာ်လၢပှၤသုးဖိတဖၣ်အဂီၢ်န့ၣ်မ့ၢ်ဝဲ, သိဒီးမဲာ်တဲးလဲးအဒုသၢကလီၢ်သၢကလးနွံကထိယဲၢ်ကယၤ, ဒီးလၢအကျါန့ၣ်အဒုဃုကယၤနွံဆံယဲၢ်ဒုမ့ၢ်တၢ်ခိတၢ်သွဲလၢ ယွၤအဂီၢ်လီၤ. ဂီၤဘုၣ်ဂီၤဖံးအိၣ်အဒုသၢကလးဃုကထိ လၢပှၤသုးဖိတဖၣ်အဂီၢ်ဒီးလၢအကျါန့ၣ်နွံဆံခံ ဒုမ့ၢ်တၢ်ခိတၢ်သွဲလၢယွၤအဂီၢ်န့ၣ်လီၤ. ကသ့ၣ်ယီၤအိၣ်အဒု သၢကလးယဲၢ်ကယၤ လၢသုးဖိတဖၣ်အဂီၢ်ဒီးလၢ အကျါန့ၣ်ဃုဆံတၢဒုမ့ၢ်တၢ်ခိတၢ်သွဲလၢယွၤအဂီၢ်န့ၣ်လီၤ. ဒီးပိာ်မုၣ်သးစၢ်မုၣ်ကနီၤအိၣ်ဝဲအဂၤတကလးဃုကထိလၢပှၤသုး ဖိတဖၣ်အဂီၢ်ဒီးလၢအကျါန့ၣ်သၢဆံခံဂၤမ့ၢ်တၢ်ခိတၢ်သွဲလၢ ယွၤအဂီၢ်လီၤ.
41 မၤသးဒ်န့ၣ်ဒီး, စီၤမိၤၡ့ဟ့ၣ်လီၤစီၤအလၤဧစၢ်လၢတၢ်အခိ အသွဲတဖၣ်န့ၣ်ဒ်တၢ်မၤဘူၣ်လီၤဆီတခါဆူယွၤအအိၣ်ဒ် ယွၤမၤလိာ်ဝဲအသိးန့ၣ်လီၤ.
42-46 တၢ်နီၤဖးလၢကမျၢၢ်တၢ်အိၣ်မူကရူၢ်အဂီၢ်န့ၣ်မ့ၢ်တၢ်ဒ်သိးသိး ဒီးပှၤသုးဖိတဖၣ်န့ၣ်လီၤ. သိဒီးမဲာ်တဲးလဲးအိၣ်အဒုသၢကလီၢ်သၢကလးနွံကထိယဲၢ်ကယၤ, ဂီၤဘုၣ်ဂီၤဖံးအဒု သၢကလးဃုကထိ, ကသ့ၣ်ယီၤအဒုသၢကလးယဲၢ်ကယၤ, ဒီးပိာ်မုၣ်သးစၢ်မုၣ်ကနီၤအဂၤတကလးဃုကထိန့ၣ်လီၤ.
47 လၢတၢ်နီၤဖးအံၤအပူၤ, စီၤမိၤၡ့ဟံးန့ၢ်ဝဲပှၤဃိာ်ဖိအဂၤယဲၢ်ဆံ အကျါန့ၣ်တဂၤဒီးဆၣ်ဖိကီၢ်ဖိစ့ၢ်ကီးဒ်န့ၣ်အသိး, ဒီးဒ်ယွၤမၤလိာ်ဝဲအသိးန့ၣ်ဟ့ၣ်လီၤဝဲဆူပှၤလ့ၤဝံဖိတဖၣ် အအိၣ်လၢအဘၣ်မူဘၣ်ဒါလၢယွၤအဒဲစီဆှံအဂီၢ်န့ၣ်လီၤ.
48 အန့ၣ်ဝံၤဒီးပဒိၣ်ပပှၢ်တဖၣ်လၢအပၢဆှၢသုးမုၢ်န့ၣ်လဲၤဆူ စီၤမိၤၡ့အအိၣ်, ဒီးပာ်ဖျါထီၣ်က့ၤဝဲ,
49 “တၢ်ဒိၣ်ဧၢ, ပဂံၢ်ကွၢ်က့ၤသုးဖိသံၣ်ဖိတဖၣ်လၢပတၢ်ပၢတၢ် ဆှၢအပူၤန့ၣ်ဝံၤလံ, ဒီးတလီၤမၢ်တ့ၢ်ဝဲနီတဂၤဘၣ်.
50 လၢတၢ်န့ၣ်အဃိတၢ်ကယၢကယဲထူတဖၣ်, စုကွီၤတဖၣ်, ထံဖှံၣ်တဖၣ်, ပသံးတဖၣ်, နၢ်ဒံးတဖၣ်, ဒီးဖဲတဖၣ်လၢပဝဲ တဂၤဘၣ်တဂၤစုာ်စုာ်ပဟဲက့ၤစိာ်န့ၣ်ပလုၢ်ထီၣ်အီၤဆူယွၤအအိၣ် ဒ်ပသးသမူအပှ့ၤတဖၣ်အသိးဒ်သိးအဝဲကဒီဒၣ်အိၣ်ပှိၤပှၤအဂီၢ်န့ၣ် လီၤ.”
51 စီၤမိၤၡ့ဒီးစီၤအလၤဧစၢ်တူၢ်လိာ်ထူန့ၣ်, လၢအအိၣ်ဒ်တၢ်ကယၢကယဲအက့ၢ်အဂီၤတဖၣ်အသိးန့ၣ်လီၤ.
52 တၢ်လၢသုးခိၣ်သုးနၢ်တဖၣ်မၤဘူၣ်ဝဲန့ၣ်အဃၢလီၤတယၢၢ်အိၣ်ၡက့ လးတကလးဃုကထိနွံကယၤယဲၢ်ဆံန့ၣ်လီၤ.
53 ပှၤလၢတမ့ၢ်ဘၣ်သုးခိၣ်သုးနၢ်တဖၣ်ဟံးဃာ်တၢ်ဂုာ်န့ၢ်တဖၣ်လၢ အဝဲသ့ၣ်ဟဲက့ၤစိာ်ဝဲန့ၣ်လီၤ.
54 မၤသးဒ်န့ၣ်ဒီး, စီၤမိၤၡ့ဒီးစီၤအလၤဧစၢ်လဲၤစိာ်ထူတဖၣ်န့ၣ် ဆူဒဲစီဆှံဒ်သိးယွၤကဒီဒၣ်အိၣ်ပှိၤကီၢ်အံၣ်စရ့လးအပှၤဂီၢ်မုၢ်အဂီၢ်န့ၣ်လီၤ.