21
1 ဖဲကီၢ်ကနၤဧၣ်ကလံၤထံး, ကီၢ်ဧရးအစီၤပၤနၢ်ဟူဘၣ်ဝဲလၢပှၤ အံၣ်စရ့လးဖိတဖၣ်ဟဲဝဲလၢအသၤရံၣ်အကျဲန့ၣ်အဝဲလဲၤထီၣ်ဒုး ပှၤအံၣ်စရ့လးဖိဒီးဖီၣ်န့ၢ်အဝဲသ့ၣ်တနီၤန့ၣ်လီၤ.
2 တုၤနုၤတစု, ပှၤအံၣ်စရ့လးဖိမၤတၢ်ဆိၣ်တမံၤဒီးယွၤစံးဝဲ, “နမ့ၢ်ပျဲပမၤနၢၤကွံာ်ပှၤတဖၣ်အံၤဒီးပကလုၢ်ထီၣ်အဝဲသ့ၣ် ဒီးအဝ့ၢ်တဖၣ်ဆူနအိၣ်လၢတၢ်သူၣ်အိၣ်သးအိၣ်အပူၤဒီးမၤဟးဂီၤ ကွံာ်အဝဲသ့ၣ်န့ၣ်လီၤ.”
3 ယွၤနၢ်ဟူအဝဲသ့ၣ်ဒီးမၤစၢၤအီၤလၢကမၤနၢၤပှၤကနၤဧၣ်ဖိ တဖၣ်လီၤ. မၤသးဒ်န့ၣ်ဒီး, ပှၤအံၣ်စရ့လးဖိတဖၣ်မၤဟးဂီၤကွံာ် ပှၤကနၤဧၣ်ဖိဒီးအဝ့ၢ်တဖၣ်လၢာ်လၢာ်ဆ့ဆ့ဒီးယုၢ်တၢ်လီၢ်န့ၣ် အမံၤလၢကီၢ်ဃိၢ်မါလီၤ.
4 ပှၤအံၣ်စရ့လးဖိတဖၣ်ဟးထီၣ်ကွံာ်လၢကစၢၢ်ဃိၢ်လၢကျဲလၢ အလဲၤလီၤဆူပီၣ်လဲၣ်က့ၣ်ကျီၤအၤကဘၢ်ဒ်သိးကလဲၤတရံးကွံာ်ကီၢ် အဒိၣ်အကီၢ်ဆၢန့ၣ်လီၤ. ဘၣ်ဆၣ်ဒီးလၢကျဲန့ၣ်ပှၤဂီၢ်မုၢ်အတၢ်ဝံသးစူၤလီၤမၢ်ဝဲ,
5 ဒီးကတိၤတၢ်ထီဒါကစၢ်ယွၤဒီးစီၤမိၤၡ့န့ၣ်လီၤ. အဝဲသ့ၣ်ကဒူးကဒ့ၣ်တၢ်စံးဝဲ, “နထုးထီၣ်ပှၤလၢကီၢ်အဲၤကူပတူးဒ်သိးပကသံလၢပှၢ်မုၢ်ကနၢ အပူၤအံၤဖဲတၢ်အီၣ်တအိၣ်ထံတအိၣ်န့ၣ်ဘၣ်မနုၤလဲၣ်. တၢ်အီၣ်တဂိာ်တသီၣ်အံၤ, ပအီၣ်တကဲလၢၤဘၣ်.”
6 တုၤနုၤတစုယွၤဆှၢလီၤဂုၢ်သ့ၣ်အစုၣ်အၢတဖၣ်ဆူပှၤဂီၢ်မုၢ် အကျါဒီးပှၤအံၣ်စရ့လးဖိအါဂၤဂုၢ်အ့ၣ်အီၤဒီးသံဝဲဒၣ် လီၤ.
7 ပှၤဂီၢ်မုၢ်ဟဲဆူစီၤမိၤၡ့အအိၣ်ဒီးစံးဝဲဒၣ်, “ပမၤဒဲးဘးလံတၢ်ဖဲပကတိၤတၢ်ထီဒါယွၤဒီးထီဒါနၤန့ၣ် လီၤ.ခဲအံၤဘါထုကဖၣ်ဆူယွၤအအိၣ် ဒ်သိးကဟံးထီၣ်ကွံာ်ဂုၢ်သ့ၣ်တဖၣ်အံၤတက့ၢ်.” မၤသးဒ်န့ၣ်ဒီး, စီၤမိၤၡ့ဘါထုကဖၣ်တၢ်လၢပှၤဂီၢ်မုၢ်အဂီၢ်လီၤ.
8 တုၤနုၤတစု, ယွၤစံးဘၣ်စီၤမိၤၡ့လၢကမၤကဲထီၣ်ဂုၢ်သ့ၣ်တဘိ လၢတိၢ်ဘီဒီးပာ်ထီၣ်အီၤလၢသ့ၣ်တဘိအဖီခိၣ်ဒ်သိးပှၤတဂၤလၢ် လၢ်လၢဘၣ်တၢ်အ့ၣ်ဘၣ်အီၤလၢဂုၢ်န့ၣ်ကွၢ်ထီၣ်ဝဲကသ့ဒီး ကဘျါက့ၤအဂီၢ်န့ၣ်လီၤ.
9 မၤသးဒ်န့ၣ်ဒီး, စီၤမိၤၡ့မၤထီၣ်ဂုၢ်တိၢ်ဘီတဘိဒီးပာ်ထီၣ် အီၤလၢသ့ၣ်တထူၣ်အလိၤလီၤ. ပှၤတဂၤဂ့ၤတဂၤဂ့ၤလၢအဘၣ်တၢ်အ့ၣ်အီၤလၢဂုၢ်သ့ၣ်န့ၣ်ကကွၢ်ထီၣ် ဝဲဂုၢ်တိၢ်ဘီန့ၣ်ဒီးကဘျါက့ၤန့ၣ်လီၤ.
10 ပှၤအံၣ်စရ့လးဖိတဖၣ်လဲၤဆူညါဒီးသူၣ်ထီၣ်အဒဲဖဲအိဘိး လီၤ.
11 ဖဲအဝဲသ့ၣ်ဟးထီၣ်ကွံာ်ဖဲတၢ်လီၢ်န့ၣ်ဝံၤအလီၢ်ခံအဝဲသ့ၣ်သူၣ် ထီၣ်အဒဲလၢကီၢ်မိၤအးအမုၢ်ထီၣ်ပှၢ်မုၢ်ကနၢလၢအၤဘၤရံအတၢ် ဟးဂူာ်ဟးဂီၤအလီၢ်န့ၣ်လီၤ.
12 အန့ၣ်ဝံၤဒီးအဝဲသ့ၣ်လဲၤသူၣ်ထီၣ်အဒဲဖဲကစၢၢ်ကဆူးစၤရ့းန့ၣ် လီၤ.
13 ဝံၤဒီးအဝဲသ့ၣ်သုးကဒီးအသးဒီးသူၣ်ထီၣ်အဒဲလၢထံကျိအၢ် နိၣ်အကလံၤစိးတခီလၢပှၢ်မုၢ်ကနၢအပူၤ, တၢ်လီၢ်လၢအလဲၢ်ဝဲတုၤဆူပှၤအမိၢ်ဖိတဖၣ်အကီၢ်ဆၢန့ၣ်လီၤ. (ထံကျိအၢ်နိၣ်န့ၣ်မ့ၢ်ပှၤမိၤအးဖိဒီးပှၤအမိၢ်ဖိတဖၣ်အကီၢ် အဆၢန့ၣ်လီၤ.)
14 လၢတၢ်န့ၣ်အဃိယွၤအတၢ်ဒုးတၢ်ယၤတဖၣ်အလံာ်စံးလၢတၢ်န့ၣ် အဂ့ၢ်စံးဝဲ, “ဝ့ၢ်ဝာ်ဟ့ာ်လၢကီၢ်စူာ်အလီၢ်ကဝီၤပူၤဒီးတၢ်တြီၤတဖၣ်, ထံကျိအၢ်နိၣ်,
15 ဒီးတၢ်တြီၤတဖၣ်အတၢ်လီၤဘံသးလၢအယံၤဝဲတုၤလၢဝ့ၢ်ဧၢ်ဒီး လိၤလိၤကီၢ်မိၤအးအဆၢန့ၣ်လီၤ.”
16 လၢတၢ်လီၢ်န့ၣ်အဝဲသ့ၣ်လဲၤဆူညါဆူတၢ်လီၢ်တတီၤကိးဝဲ အမံၤလၢဘ့ၤ, အခီပညီထံပူၤတဖၣ်, တၢ်လီၢ်ဖဲယွၤစံးဘၣ်စီၤ မိၤၡ့, “ကိးဖှိၣ်ပှၤဂီၢ်မုၢ်တပူၤဃီဒီးယကဟ့ၣ်အဝဲသ့ၣ်လၢထံန့ၣ် လီၤ.”
17 အကတီၢ်ဖဲန့ၣ်ကီၢ်အံၣ်စရ့လးအပှၤဂီၢ်မုၢ်သးဝံၣ်တၢ်သးဝံၣ်အံၤ လီၤ.
“ထံပူၤတဖၣ်ဧၢ, ဟ့ၣ်ထီၣ်သုထံဒီးပကသဂၢၢ်အီၤလၢတၢ်သးဝံၣ် တယုၢ်,
18 ထံပူၤလၢဘၣ်တၢ်ခူၣ်အီၤလၢပဒိၣ်တဖၣ်ဒီးပှၤဂီၢ်မုၢ်အခိၣ်အနၢ် တဖၣ်, တၢ်ခူၣ်အီၤလၢစီၤလိၣ်စီၤပၤအနီၣ်ထိးဒီးလၢအဝဲသ့ၣ်အနီၣ် ထိးဘိတဖၣ်လီၤ.”
19 အဝဲသ့ၣ်သုးအလီၢ်လၢပှၢ်မုၢ်ကနၢဆူမံးတၤနၤ, ဒီးလၢတၢ်လီၢ်ဖဲန့ၣ်အဝဲသ့ၣ်လဲၤဆူညါဆူနၤဃလံၤအ့လး, ဒီးလၢနၤဃလံၤအ့လးန့ၣ်ဆူဘၤမိး,
20 ဒီးလၢဘၤမိးန့ၣ်ဆူကစၢၢ်ကဆူးအိၣ်လၢပှၤမိၤအးဖိတဖၣ်အလီၢ် ကဝီၤပူၤဖဲကစၢၢ်ပံးစကၤအခိၣ်ထိးဖီလာ်, လၢအကွၢ်လီၤတၢ်ဆူပှၢ်မုၢ်ကနၢအဖီခိၣ်န့ၣ်လီၤ.
(သိၣ်သီ.၂:၂၆-၃:၁၁)
21 ဝံၤဒီးကီၢ်အံၣ်စရ့လးအပှၤဂီၢ်မုၢ်ဆှၢလီၤပှၤစိာ်တၢ်ကစီၣ် တဖၣ်ဆူပှၤအမိၢ်ဖိအစီၤပၤစံဃိၣ်အအိၣ်ဒ်သိးကစံးဘၣ်အီၤ,
22 “ပျဲပလဲၤခီဂာ်တၢ်လၢနကီၢ်ပူၤတက့ၢ်. ပဝဲဒီးပဂီၤဘုၣ်ဂီၤဖံးတဟးကွံာ်ဘၣ်လၢကျဲဘိအလိၤဒီးလဲၤ လီၤဆူသုပျီတဖၣ်အပူၤမ့ၢ်ဂ့ၤစပံးလီၢ်တဖၣ်မ့ၢ်ဂ့ၤဘၣ်. ဒီးပတအီဘၣ်စ့ၢ်ကီးထံလၢသုထံပူၤတဖၣ်န့ၣ်ဘၣ်. ပကအိၣ်ဒၣ်လၢကျဲမုၢ်ဒိၣ်အဖီခိၣ်တုၤပဟးထီၣ်လၢသုလီၢ်ကဝီၤ တစုန့ၣ်လီၤ.”
23 ဘၣ်ဆၣ်ဒီးစီၤပၤစံဃိၣ်တပျဲဘၣ်ကီၢ်အံၣ်စရ့လးအပှၤဂီၢ်မုၢ် လဲၤခီဂာ်အကီၢ်ဘၣ်. အဝဲပာ်ဖှိၣ်ထီၣ်အသုးမုၢ်ဒီးလဲၤဟးထီၣ် ဆူပှၢ်မုၢ်ကနၢယါစၤဒီးဒုးပှၤအံၣ်စရ့လးဖိတဖၣ်န့ၣ်လီၤ.
24 ဘၣ်ဆၣ်ဒီးပှၤအံၣ်စရ့လးဖိတဖၣ်မၤသံကွံာ်ဒုၣ်ဒါအါဂၤလၢတၢ် ဒုးပူၤဒီးမၤန့ၢ်အဝဲသ့ၣ်အကီၢ်စးထီၣ်လၢထံကျိအၢ်နိၣ်ကလံၤစိးတခီတုၤဆူယၢ်ဘိး, ဒ်ပစံးတၢ်အသိးတုၤဆူပှၤအမိၢ်ဖိတဖၣ်အအိၣ်, မ့ၢ်လၢပှၤအမိၢ်ဖိတဖၣ်အကီၢ်ဆၢန့ၣ်ဘၣ်တၢ်ဒီဒၣ်ဃးအီၤခၢၣ် တနၢၣ်အဃိန့ၣ်လီၤ.
25 မၤသးဒ်န့ၣ်ဒီး, ကီၢ်အံၣ်စရ့လးအပှၤဂီၢ်မုၢ်မၤန့ၢ်ကယဲၢ်ပှၤ အမိၢ်ဖိအဝ့ၢ်ခဲလၢာ်ဃုာ်ဒီးဝ့ၢ်ဃ့ၡဘိၣ်ဒီးကယဲၢ်ခူဧိၤဝ့ၢ်ဧိၤအိၣ် လၢအခိၣ်အဃၢၤဒီးသူၣ်လီၤဆီလီၤအသးလၢအပူၤန့ၣ်လီၤ.
26 ဝ့ၢ်ဃ့ၡဘိၣ်မ့ၢ်ဝဲပှၤအမိၢ်ဖိအစီၤပၤစံဃိၣ်အဝ့ၢ်ခိၣ်, စီၤပၤစံဃိၣ်လၢအဒုးတ့ၢ်တၢ်ထီဒါကီၢ်မိၤအးအစီၤပၤလၢညါ ဒီးမၤန့ၢ်ကယဲၢ်အကီၢ်ခဲလၢာ်ယံၤတုၤဒၣ်လဲာ်လၢထံကျိအၢ်နိၣ်, န့ၣ်လီၤ.
27 လၢတၢ်န့ၣ်အဃိဒီးပှၤကွဲးထါတဖၣ်သးဝံၣ်တၢ်စံးဝဲ,
“ဟဲဆူဝ့ၢ်ဃ့ၡဘိၣ်, ဆူစီၤပၤစံဃိၣ်အဝ့ၢ်တက့ၢ်. ပအဲၣ်ဒိးထံၣ်ဘၣ်တၢ်ဘှီထီၣ်ကဒါက့ၤအီၤဒီး တၢ်မၤအိၣ်ထီၣ်က့ၤအီၤန့ၣ်လီၤ.
28 တဘျီလၢဝ့ၢ်ဃ့ၡဘိၣ်အံၤအပူၤန့ၣ်, စီၤပၤစံဃိၣ်အသုးမုၢ်ဟး ထီၣ်ဝဲဒ်မ့ၣ်အူအသိးလီၤ. သုးမုၢ်န့ၣ်မၤဟးဂီၤတ့ၢ်ကီၢ်မိၤအးအဝ့ၢ်ဧၢ်, ဒီးမၤလီၤကလဲ ကွံာ်တၢ်လုၢ်လီၢ်တဖၣ်လၢဝ့ၢ်အၤနိၣ်အထးခီန့ၣ်လီၤ.
29 ကီၢ်မိၤအးအပှၤဂီၢ်မုၢ်ဧၢ, တၢ်လီၤပျံၤလၢနဂီၢ်ဒိၣ်မးလဲၣ်. သုဝဲ, ပှၤတဖၣ်လၢအဘါထီၣ်ကမိၣ်ဘၣ်တၢ်စိာ်ကွံာ်သုဆူတၢ်ဟးဂီၤ တဖၣ်အပူၤန့ၣ်လီၤ.
သုကစၢ်ဒုးကဲထီၣ်ပှၤအါဂၤလၢပှၤဃ့ၢ်ပူၤဖျဲးအသးဆူတၢ်လီၢ် အဂၤတဖၣ်, ဒီးပိာ်မုၣ်တဖၣ်ကဲထီၣ်ပှၤဘၣ်တၢ်စိာ်မၢကဲကုၢ်အီၤတဖၣ်လၢပှၤ အမိၢ်ဖိအစီၤပၤလံ.
30 မ့မ့ၢ်ခဲအံၤအဝဲသ့ၣ်အစၢၤအသွဲၣ်တဖၣ်ဘၣ် တၢ်မၤဟးဂီၤကွံာ်အီၤ,
လၢကျဲဒီဘိစးထီၣ်လၢဃ့ၡဘိၣ်တုၤဆူဒံၤဘိၣ်, စးထီၣ်လၢနၤၡၢ်တုၤလၢနိဖးဘူးဒီးမ့ဒဘၤလံ.”
31 မၤသးဒ်န့ၣ်ဒီး, ကီၢ်အံၣ်စရ့လးအပှၤဂီၢ်မုၢ်သူၣ်လီၤဆီလီၤ အသးဖဲပှၤအမိၢ်အဖိအလီၢ်ကဝီၤပူၤ,
32 ဒီးစီၤမိၤၡ့ဆှၢလီၤပှၤတဖၣ်လၢကဃုထံၣ်န့ၢ်ကျဲအဂ့ၤကတၢၢ် လၢတၢ်ကလဲၤဒုးဝ့ၢ်ယၤဧစ့ၢ်အဂီၢ်န့ၣ်လီၤ. ပှၤအံၣ်စရ့လးဖိတဖၣ်မၤန့ၢ်အီၤဒီးအဝ့ၢ်အိၣ်ခိၣ်အိၣ်ဃၢၤတဖၣ် ဒီးနီၣ်ထီၣ်ကွံာ်ပှၤအမိၢ်ဖိတဖၣ်လၢအအိၣ်ဖဲန့ၣ်လီၤ.
33 အန့ၣ်ဝံၤဒီး, ပှၤအံၣ်စရ့လးဖိတဖၣ်ဃၣ်အသးဒီးပိာ်အကျဲ တဘိဆူကီၢ်ဘၤၡၣ်, ဒီးကီၢ်ဘၤၡၣ်အစီၤပၤဧိာ်ဟဲထီၣ်ဒီးအသုးမုၢ်လၢကဒုးအဝဲ သ့ၣ်ဖဲအ့ဒရ့ဧံၤန့ၣ်လီၤ.
34 ယွၤစံးဘၣ်စီၤမိၤၡ့, “ပျံၤအီၤတဂ့ၤ. ယကဟ့ၣ်နၤတၢ်မၤနၢၤလၢအဝဲ, ကယဲၢ်အပှၤဂီၢ်မုၢ်, ဒီးအထံအကီၢ်အဖီခိၣ်န့ၣ်လီၤ. မၤအီၤဒ်နမၤပှၤအမိၢ်ဖိအစီၤပၤလၢအပၢတၢ်ဖဲဝ့ၢ်ဃ့ၡဘိၣ်, စီၤစံဃိၣ်အသိးန့ၣ်တက့ၢ်.”
35 မၤသးဒ်န့ၣ်ဒီးပှၤအံၣ်စရ့လးဖိတဖၣ်မၤသံကွံာ်စီၤဧိာ်ဒီး အဖိခွါတဖၣ်ဒီးကယဲၢ်အပှၤဂီၢ်မုၢ်ခဲလၢာ်ဒီးတပာ်လီၤတဲာ်ပှၤ အမူနီတဂၤဘၣ်. အန့ၣ်ဝံၤဒီးအဝဲသ့ၣ်ဟံးန့ၢ်ကွံာ်အကီၢ်န့ၣ်လီၤ.