20
(ဟးထီၣ်.၁၇:၁-၇)
1 လၢလါအခီၣ်ထံးတလါအပူၤန့ၣ်ကီၢ်အံၣ်စရ့လးအပှၤဂီၢ်မုၢ်ဒီ ကရူၢ်ညါဟဲတုၤဝဲဆူပှၢ်မုၢ်ကနၢစံၣ်ဒီးသူၣ်လီၤအဒဲဖဲ ကၤဒ့ၣ်န့ၣ်လီၤ. ဖဲန့ၣ်နီၢ်မံးရယၣ်သံဝဲဒီးဘၣ်တၢ်ခူၣ်လီၤကွံာ်အီၤန့ၣ်လီၤ.
2 ဖဲအဝဲသ့ၣ်သူၣ်ဒဲအလီၢ်န့ၣ်ထံတအိၣ်နီတစဲးဘၣ်အဃိဒီး, ပှၤဂီၢ်မုၢ်ဟဲပာ်ဖှိၣ်ထီၣ်အသးဝးတရံးစီၤမိၤၡ့ဒီးစီၤအၤဟရိၣ်,
3 ဒီးအဝဲသ့ၣ်ကဒူးကဒ့ၣ်တၢ်စံးဝဲ, “ဂ့ၤတက့ၢ်လၢပသံတ့ၢ်ဃုာ်ဒီး ပဒီပုၢ်ဝဲၢ်ကဒဲကဒဲပှၤအံၣ်စရ့လးဖိတဖၣ်လၢယွၤအဒဲစီ ဆှံအမဲာ်ညါန့ၣ်လီၤ.
4 ဘၣ်မနုၤသုဟဲကိးပှၤဆူပှၢ်မုၢ်ကနၢအပူၤအံၤလဲၣ်. မ့ၢ်ဒၣ်ဒ်သိးပကသံဃုာ်ဒီးပဆၣ်ဖိကီၢ်ဖိတဖၣ်ဖဲအံၤဧိၤန့ၣ်ဧါ.
5 ဘၣ်မနုၤသုထုးထီၣ်ပှၤလၢကီၢ်အဲၤကူပတူးအပူၤဆူတၢ်လီၢ်အနး အဖှီၣ်အံၤဖဲတၢ်တမဲထီၣ်ဘၣ်နီတမံၤဘၣ်န့ၣ်လဲၣ်. ဘုတအိၣ်, ဟုတအိၣ်, ချၢၣ်ဒၢတအိၣ်, စပံးသၣ်တအိၣ်, သလဲသၣ်တအိၣ်ဘၣ်. ထံလၢပကအီအဂီၢ်ဒၣ်လဲာ်န့ၣ်တအိၣ်ဘၣ်.”
6 စီၤမိၤၡ့ဒီးစီၤအၤဟရိၣ်သုးကွံာ်အသးလၢပှၤဂီၢ်မုၢ်အအိၣ်ဒီးဆၢ ထၢၣ်လၢဒဲစီဆှံအကျဲစၢၤန့ၣ်လီၤ. အဝဲသ့ၣ်တီၤလီၤအိၣ်ဝဲဒီးအမဲာ်သၣ်ကျးလီၤအသးဆူဟီၣ်ခိၣ် ဒီးယွၤအိၣ်ဝဲဆိးဝဲအတၢ်ကပီၤကပြုၢ်ကပြီၤအိၣ်ဖျါထီၣ်လၢ အမဲာ်ညါလီၤ.
7 ယွၤစံးဘၣ်စီၤမိၤၡ့,
8 “ဟံးန့ၢ်နီၣ်ထိးဘိတဘိလၢအအိၣ်လၢတၢ်အၢၣ်လီၤအီလီၤ တလါအမဲာ်ညါဝံၤဒီးနဲဒၣ်ဒီးစီၤအၤဟရိၣ်ကိးဖှိၣ်ပှၤဂီၢ်မုၢ်ဒီ ဖုညါတက့ၢ်. ဖဲန့ၣ်လၢအဝဲသ့ၣ်ခဲလၢာ်အမဲာ်ညါန့ၣ်, ကတိၤတၢ်ဆူလ့လၢအအိၣ်ဖဲန့ၣ်အအိၣ်ဒီးထံကပုာ်ထီၣ်ယွၤလီၤလၢ အပူၤန့ၣ်လီၤ. လၢကျဲဒ်သိးအံၤန့ၣ်နကဒုးဖျိးထီၣ်ထံလၢလ့ အအိပူၤလၢပှၤဂီၢ်မုၢ်အဂီၢ်လၢအဝဲသ့ၣ်ဒီးအဆၣ်ဖိကီၢ်ဖိတဖၣ် ကအိဘၣ်ဝဲအဂီၢ်န့ၣ်လီၤ.”
9 စီၤမိၤၡ့လဲၤဒီးဟံးန့ၢ်နီၣ်ထိးဘိန့ၣ်ဒ်ယွၤမၤလိာ်ဝဲအသိးန့ၣ်လီၤ.
10 အဝဲဒၣ်ဒီးစီၤအၤဟရိၣ်ကိးဖှိၣ်ပှၤဂီၢ်မုၢ်ဒီဖုညါလၢလ့ အမဲာ်ညါဒီးစီၤမိၤၡ့စံးဝဲ, “ပှၤပူထီၣ်တၢ်ဖိသ့ၣ်ဧၢ, ကနၣ်တက့ၢ်. မ့ၢ်ပဘၣ်ဒုးဖျိးထီၣ်ထံလၢလ့အံၤအပူၤလၢသုဂီၢ်ဧါ.”
11 အန့ၣ်ဝံၤဒီးစီၤမိၤၡ့ယူာ်ဃီၤအစုဒီးတီၢ်လ့န့ၣ်လၢနီၣ် ထိးဘိခံဘျီဒီးထံကျိၤဖးဒိၣ်တကျိၤပုာ်ထီၣ်ယွၤလီၤဒီး ထံဒီးကယဲၢ်ပှၤဂီၢ်မုၢ်ဒီးဆၣ်ဖိကီၢ်ဖိတဖၣ်အီဝဲလီၤ.
12 ဘၣ်ဆၣ်ဒီးယွၤသိၣ်ဃီၣ်တ့ၢ်စီၤမိၤၡ့ဒီးစီၤအၤဟရိၣ်လီၤ. အဝဲစံးဝဲဒၣ်, “မ့ၢ်လၢသုတအိၣ်ဒီးတၢ်စူၢ်တၢ်နာ်လၢလၢပှဲၤပှဲၤလၢသုကသ့ၣ်ညါ နီၣ်ပာ်ကဲယစိယကမီၤစီဆှံလၢကီၢ်အံၣ်စရ့လးအပှၤဂီၢ်မုၢ်အမဲာ်ညါ အဃိဒီး, သုတဆှၢနုာ်ဘၣ်အဝဲသ့ၣ်ဆူကီၢ်တဘ့ၣ်အပူၤ, လၢယအၢၣ်လီၤတ့ၢ်ဒ်သိးယကဟ့ၣ်အီၤန့ၣ်ဘၣ်လီၤ.”
13 တၢ်အံၤမၤတ့ၢ်အသးဖဲမရံၤဘါ, တၢ်လီၢ်ဖဲကီၢ်အံၣ်စရ့လးအပှၤ ဂီၢ်မုၢ်ကဒူးကဒ့ၣ်တၢ်ထီဒါယွၤဒီးဖဲယွၤဒုးနဲၣ်တ့ၢ်အဝဲသ့ၣ်လၢ အဝဲမ့ၢ်တၢ်စီဆှံန့ၣ်လီၤ.
14 စီၤမိၤၡ့ဆှၢလီၤပှၤစိာ်တၢ်ကစီၣ်တဖၣ်လၢကၤဒ့ၣ်ဆူကီၢ်အဒိၣ် အစီၤပၤအအိၣ်လီၤ. အဝဲသ့ၣ်စံးဝဲ, “တၢ်ကစီၣ်အံၤဟဲလၢနဘူးနတံၢ်ပှၤအံၣ်စရ့လးဖိတဖၣ်အဒူၣ်တဖၣ် အအိၣ်န့ၣ်လီၤ. နသ့ၣ်ညါတၢ်ကီတၢ်ခဲတဖၣ်လၢပတူၢ်ဘၣ်တ့ၢ်အီၤ,
15 ပမိၢ်ပၢ်ဖံဖုလၢပျၢၤတဖၣ်လဲၤနုာ်ဆူကီၢ်အဲၤကူပတူးဒ်လဲၣ်, တၢ်လီၢ်ဖဲပအိၣ်ဆိးတ့ၢ်လၢအါနံၣ်အါလါအတီၢ်ပူၤန့ၣ်လီၤ. ပှၤအဲၤကူပတူးဖိတဖၣ်မၤအၢမၤနးတ့ၢ်ပမိၢ်ပၢ်ဖံဖုတဖၣ်, ဒီးပဝဲဒၣ်
16 ဒီးပကိးထီၣ်တ့ၢ်ဆူယွၤအအိၣ်လၢတၢ်မၤစၢၤအဂီၢ်လီၤ. အဝဲနၢ်ဟူဘၣ်ပတၢ်ကိးထီၣ်, ဒီးဆှၢလီၤတ့ၢ်ကလူးတဂၤပှၤလၢ အထုးထီၣ်ကွံာ်ပှၤလၢကီၢ်အဲၤကူပတူးအပူၤန့ၣ်လီၤ. ခဲအံၤပအိၣ်လၢကၤဒ့ၣ်, ဝ့ၢ်တဝ့ၢ်လၢအအိၣ်ဖဲနကီၢ်အဆၢန့ၣ် လီၤ.
17 ပျဲပလဲၤတၢ်ခီဖျိနကီၢ်တက့ၢ်. ပဝဲဒီးပဂီၤဘုၣ်ဂီၤဖံးတဟး ထီၣ်ဘၣ်လၢကျဲဘိအလိၤမ့ၢ်ဂ့ၤ, တလဲၤဘၣ်ဆူသုစံာ်ပျီတဖၣ်မ့တမ့ၢ်စပံးလီၢ်တဖၣ်အပူၤ, ဒီးပတအီဘၣ်တၢ်လၢသုထံပူၤတဖၣ်ဘၣ်. ပကအိၣ်ဒၣ်လၢကျဲမုၢ်ဖးဒိၣ်အလိၤတုၤပဟးထီၣ်လၢသုလီၢ်ကဝီၤ အပူၤတစုန့ၣ်လီၤ.”
18 ဘၣ်ဆၣ်ဒီး, ပှၤကီၢ်အဒိၣ်ဖိတဖၣ်စံးဆၢဝဲ, “ပဂ့ၢ်လိာ်ပျဲသုလၢသုကလဲၤတၢ်ခီဖျိပထံပကီၢ်န့ၣ်လီၤ. သုမ့ၢ်ကျဲးစၢးဒီးပကလဲၤထီၣ်ဒီးဒုးတၢ်ထီဒါသုန့ၣ်လီၤ.”
19 ကီၢ်အံၣ်စရ့လးအပှၤဂီၢ်မုၢ်စံးဝဲဒၣ်, “ပကအိၣ်ဒၣ်လၢကျဲမုၢ် ဖးဒိၣ်အလိၤ, ဒီးပဝဲမ့ၢ်ဂ့ၤ, ပဆၣ်ဖိကီၢ်ဖိတဖၣ်မ့ၢ်ဂ့ၤမ့ၢ်အီဘၣ်နထံတစဲးစဲးဒီးပကဟ့ၣ် က့ၤတၢ်အပှ့ၤလီၤ. တၢ်လၢပလိၣ်ဘၣ်အီၤန့ၣ်မ့ၢ်ဒၣ်ထဲတၢ်လဲၤခီဖျိတၢ်အဂီၢ်ဧိၤ န့ၣ်လီၤ.”
20 ပှၤကီၢ်အဒိၣ်ဖိတဖၣ်စံးကဒီးဝဲ, “ပဂ့ၢ်လိာ်ပဝဲလီၤ.” ဒီးအဝဲသ့ၣ်ဟဲထီၣ်ဃုာ်ဒီးသုးမုၢ်အဂံၢ်ဆူၣ်ဘါဆူၣ်တဖုလၢ အကဒုးထီဒါကီၢ်အံၣ်စရ့လးအပှၤဂီၢ်မုၢ်န့ၣ်လီၤ.
21 မ့ၢ်လၢပှၤကီၢ်အဒိၣ်ဖိတဖၣ်တပျဲပှၤအံၣ်စရ့လးဖိတဖၣ်လဲၤတၢ် ခီဖျိအဝဲသ့ၣ်အလီၢ်ကဝီၤဘၣ်အဃိဒီး, ပှၤအံၣ်စရ့လးဖိတဖၣ်ဃၣ်ကွံာ်အသးဒီးလဲၤတၢ်လၢကျဲအဂၤ တဘိန့ၣ်လီၤ.
22 ပှၤအံၣ်စရ့လးဖိဒီဒူၣ်ဒီထၢဟးထီၣ်ကွံာ်လၢဝ့ၢ်ကၤဒ့ၣ်ဒီး ဟဲတုၤဃီၤဆူကစၢၢ်ဃိၢ်,
23 လၢအအိၣ်ဖဲကီၢ်အဒိၣ်အကီၢ်ဆၢန့ၣ်လီၤ. ဖဲန့ၣ်ယွၤကတိၤတၢ်ဒီးစီၤမိၤၡ့ဒီးစီၤအၤဟရိၣ်စံးဝဲ,
24 “စီၤအၤဟရိၣ်န့ၣ်တဘၣ်လဲၤနုာ်ဆူကီၢ်တဘ့ၣ်လၢယအၢၣ်လီၤတ့ၢ် လၢယကဟ့ၣ်ပှၤအံၣ်စရ့လးဖိတဖၣ်န့ၣ်ဘၣ်လီၤ. အဝဲကသံလီၤ. အဂ့ၢ်ဒ်အံၤ, သုဝဲခံဂၤလိာ်သုပူထီၣ်ထီဒါယတၢ်မၤလိာ်ဖဲမရံၤဘါန့ၣ်လီၤ.
25 လဲၤကိးထီၣ်စီၤအၤဟရိၣ်ဒီးအဖိခွါစီၤအလၤဧစၢ်ဆူကစၢၢ်ဃိၢ် အဒီခိၣ်,
26 ဒီးဖဲန့ၣ်ဘ့ၣ်လီၤကွံာ်စီၤအၤဟရိၣ်အပှၤလုၢ်တၢ်အခိၣ်အကူ အသိးတဖၣ်ဒီးပာ်ထီၣ်အီၤလၢစီၤအလၤဧစၢ်အလိၤတက့ၢ်. စီၤအၤဟရိၣ်န့ၣ်ကသံဝဲဖဲန့ၣ်လီၤ.”
27 စီၤမိၤၡ့မၤကယဲၢ်တၢ်လၢယွၤမၤလိာ်တ့ၢ်ဝဲတဖၣ်န့ၣ်လီၤ. အဝဲသ့ၣ်လဲၤထီၣ်ဆူကစၢၢ်ဃိၢ်အလိၤလၢပှၤဂီၢ်မုၢ်ဒီဒူၣ်ဒီထၢ အမဲာ်ညါ
28 ဒီးစီၤမိၤၡ့ဘ့ၣ်လီၤကွံာ်ပှၤလုၢ်တၢ်အခိၣ်, အကူအသိးတဖၣ်လၢစီၤအၤဟရိၣ်အလိၤဒီးပာ်ထီၣ်အီၤလၢ စီၤအလၤဧစၢ်အလိၤန့ၣ်လီၤ. ဖဲန့ၣ်လၢကစၢၢ်ဃိၢ်အဒီခိၣ်န့ၣ်စီၤအၤဟရိၣ်သံဝဲဒီးစီၤမိၤၡ့ဒီး စီၤအလၤဧစၢ်ဟဲက့ၤလီၤဝဲလီၤ.
29 ပှၤဂီၢ်မုၢ်ဒီဒူၣ်ဒီထၢသ့ၣ်ညါဝဲလၢစီၤအၤဟရိၣ်သံလံဒီး အဝဲသ့ၣ်ခဲလၢာ်ဟီၣ်ဝဲယၢၤဝဲလၢအဃိအသီသၢဆံန့ၣ်လီၤ.