22
1 ပှၤအံၣ်စရ့လးဖိတဖၣ်သုးကဒီးအသးဆူညါဒီးသူၣ်ထီၣ်အဒဲ လၢထံကျိယၢ်ဒ့ၣ်အမုၢ်ထီၣ်တခီလၢကီၢ်မိၤအးအမုၢ်ထီၣ်တၢ်ပျီ ပူၤဖဲဝ့ၢ်ယရံၤဃိအမဲာ်ညါန့ၣ်လီၤ.
2 ဖဲကီၢ်မိၤအးအစီၤပၤ, စီၤစံးပိၢ်အဖိခွါစီၤဘၤလးနၢ်ဟူ ဘၣ်ဝဲတၢ်လၢပှၤအံၣ်စရ့လးဖိတဖၣ်မၤတ့ၢ်ပှၤအမိၢ်ဖိတဖၣ် ဒီးပှၤအံၣ်စရ့လးဖိအိၣ်ဝဲဆံးအါဆံးအါအဂ့ၢ်န့ၣ်ဒီး,
3 အဝဲဒီးကယဲၢ်အပှၤဂီၢ်မုၢ်ပျံၤတၢ်ဒိၣ်ဒိၣ်ကလဲာ်လီၤ.
4 ပှၤမိၤအးဖိတဖၣ်စံးဘၣ်ပှၤမံးဒယၣ်ဖိအခိၣ်အနၢ်တဖၣ်, “ပှၤတဖုအံၤတယံာ်ဘၣ်ဒီးကမၤဟးဂီၤကွံာ်တၢ်ကိးမံၤဒဲးလၢ ပခိၣ်ပဃၢၤဝးဝးဒ်ကျီၢ်ဖါတံၢ်တဒုလၢအအီၣ်တပံၢ်တမါလၢအီၣ်ဆၣ် အလီၢ်တခါအပူၤအသိးန့ၣ်လီၤ.”
5 မၤသးဒ်န့ၣ်ဒီးစီၤပၤဘၤလးဆှၢလီၤပှၤစိာ်တၢ်ကစီၣ်ဖိတဖၣ်လၢ ကဟဲက့ၤကိးစီၤဘဧိၢ်အဖိခွါစီၤဘံးလၣ်, လၢအအိၣ်ဝဲဖဲ ဝ့ၢ်ပသူၣ်လၢထံကျိဖရၤသးအကပၤလၢကီၢ်အမိၢ်အပူၤန့ၣ်လီၤ. အဝဲသ့ၣ်လဲၤစိာ်န့ၢ်အီၤစီၤဘၤလးအတၢ်ကစီၣ်လၢအစံးဝဲ, “ယအဲၣ်ဒိး, နသ့ၣ်ညါလၢပှၤဒီတကလုာ်ဟဲဟးထီၣ်လၢကီၢ်အဲၤကူပတူးလီၤ. အပှၤဂီၢ်မုၢ်ရၤလီၤအသးသကုၤတၢ်လီၢ်ကိးပူၤဒဲးဒီးမၤပျံၤ မၤဖုးတၢ်လၢကဟံးန့ၢ်ပကီၢ်န့ၣ်လီၤ.
6 အဝဲသ့ၣ်အနီၣ်ဂံၢ်အါန့ၢ်ဒံးပှၤအဃိ, ဝံသးစူၤဟဲဒီးဆိၣ်အၢ အဝဲသ့ၣ်လၢယဂီၢ်တက့ၢ်. အန့ၣ်ဒီးဘၣ်သ့ၣ်သ့ၣ်ပမၤနၢၤကွံာ်အဝဲသ့ၣ်ကသ့ဒီးနီၣ်ဟးထီၣ် ကွံာ်အီၤလၢပထံပကီၢ်အပူၤကန့ၢ်န့ၣ်လီၤ. ယသ့ၣ်ညါလၢဖဲနယၢၤထီၣ်တၢ်ဆိၣ်ဂ့ၤတထံၣ်န့ၣ်ပှၤဂီၢ်မုၢ်ဘၣ်ဆိၣ် ဂ့ၤဝဲဒီးဖဲနယၢၤထီၣ်တၢ်ဆိၣ်အၢတထံၣ်န့ၣ်အဝဲသ့ၣ်တုၤလၢတၢ် ဆိၣ်အၢအပူၤန့ၣ်လီၤ
7 မၤသးဒ်န့ၣ်ဒီးပှၤမိၤအးဖိဒီးပှၤမံးဒယၣ်ဖိအခိၣ်အနၢ်တဖၣ် စိာ်ထီၣ်တၢ်အဘူးအလဲလၢတၢ်ဆိၣ်အၢအဂီၢ်ဒီးလဲၤဆူ စီၤဘံးလၣ်အအိၣ်ဒီးတဲဘၣ်အီၤလၢစီၤဘၤလးအတၢ်ကစီၣ်န့ၣ်လီၤ.
8 စီၤဘံးလၣ်စံးဘၣ်အဝဲသ့ၣ်, “မံဖဲအံၤတနၤတက့ၢ်. ဒီးမုၢ်ဆ့ၣ်ထီၣ်န့ၣ်ယကတဲဘၣ်သုတၢ်တမံၤလၢ်လၢ်လၢယွၤစံးဘၣ် ယၤန့ၣ်လီၤ.” မၤသးဒ်န့ၣ်ဒီး, ပှၤမိၤအးဖိအခိၣ်အနၢ်တဖၣ်အိၣ်သကိးဒီးစီၤ ဘံးလၣ်န့ၣ်လီၤ.
9 ကစၢ်ယွၤဟဲဆူစီၤဘံးလၣ်အအိၣ်ဒီးသံကွၢ်အီၤ, “ပှၤလၢအအိၣ်သကိးဒီးနၤတဖၣ်အံၤမ့ၢ်မတၤတဖၣ်လဲၣ်.”
10 အဝဲဒၣ်စံးဆၢဝဲ, “ကီၢ်မိၤအးအစီၤပၤစီၤဘၤလးဆှၢလီၤ အဝဲသ့ၣ်ဆူယအိၣ်,
11 ဒ်သိးအကတဲဘၣ်ယၤလၢပှၤဂီၢ်မုၢ်တဖုလၢအဟဲလၢကီၢ် အဲၤကူပတူးန့ၣ်ရၤလီၤအသးလၢကီၢ်ဒီဘ့ၣ်ညါလီၤ. အဝဲအဲၣ်ဒိးလၢယကဆိၣ်အၢအီၤလၢအဂီၢ်, ဒ်သိးအဝဲဒုးတၢ်ဒီးနီၣ်ထီၣ်ကွံာ်အဝဲသ့ၣ်ကန့ၢ်အဂီၢ်န့ၣ်လီၤ.
12 ကစၢ်ယွၤစံးဘၣ်စီၤဘံးလၣ်, “လဲၤဃုာ်တၢ်ဒီးပှၤတဖၣ်အံၤတ ဂ့ၤ. ဒီးပာ်တၢ်ဆိၣ်အၢတမံၤလၢကီၢ်အံၣ်စရ့လးအပှၤဂီၢ်မုၢ်အလိၤန့ၣ် တဂ့ၤ. အဂ့ၢ်ဒ်အံၤ, အဝဲသ့ၣ်အိၣ်ဒီးယတၢ်ဆိၣ်ဂ့ၤလီၤ.”
13 မုၢ်ဆ့ၣ်ထီၣ်တနံၤန့ၣ်, စီၤဘံးလၣ်လဲၤဆူစီၤဘၤလးအပှၤစိာ်တၢ် ကစီၣ်တဖၣ်အအိၣ်ဒီးစံးဝဲဒၣ်, “က့ၤက့ၤဆူသုဟံၣ်တက့ၢ်. ယွၤဂ့ၢ်လိာ်ဝဲလၢယကလဲၤပိာ်သုခံန့ၣ်လီၤ.”
14 မၤသးဒ်န့ၣ်ဒီး, အဝဲသ့ၣ်က့ၤကဒါက့ၤဆူစီၤဘၤလးအအိၣ်ဒီးစံး ဘၣ်အီၤလၢစီၤဘံးလၣ်ဂ့ၢ်လိာ်လၢကဟဲပိာ်အဝဲသ့ၣ်အခံန့ၣ်လီၤ.
15 အန့ၣ်တစု, စီၤဘၤလးဆှၢလီၤပှၤခိၣ်ပှၤနၢ်လၢအနီၣ်ဂံၢ်အါထီၣ် တဖု, လၢအမ့ၢ်ပှၤအကါဒိၣ်န့ၢ်ဒံးပှၤအခီၣ်ထံးတဖုတက့ၢ်န့ၣ်လီၤ.
16 အဝဲသ့ၣ်လဲၤဆူစီၤဘံးလၣ်အအိၣ်ဒီးဟ့ၣ်လီၤအီၤတၢ်ကစီၣ်အံၤ လၢစီၤပၤဘၤလးအအိၣ်န့ၣ်လီၤ. “ဝံသးစူၤပျဲတၢ်တြီမၤတံာ်တာ်နၤနီတမံၤလၢနကဟဲဆူယအိၣ် အဂီၢ်န့ၣ်တဂ့ၤ.
17 ယကမၤဘျုးနၤထူးထူးတီၤတီၤဒီးမၤဒ်ကယဲၢ်နစံးနဲ အသိးန့ၣ်လီၤ. ဝံသးစူၤဟဲဒီးဆိၣ်အၢပှၤဂီၢ်မုၢ်အံၤလၢ ယဂီၢ်တက့ၢ်.”
18 ဘၣ်ဆၣ်ဒီးစီၤဘံးလၣ်စံးဆၢဝဲဒၣ်, “စီၤဘၤလးမ့ၢ်ဟ့ၣ်ယၤ လၢကယဲၢ်အစ့ဒီးထူအိၣ်လၢအနူၢ်ပူၤစီၤပူၤခဲလၢာ်ဒၣ်လဲာ် န့ၣ်, ယလဲၤသဒၣ်ယွၤ, ယကစၢ်ယွၤအတၢ်မၤလိာ်လၢတၢ်ဂ့ၢ်အဆံးကတၢၢ်ဖိ တမံၤအပူၤဒၣ်လဲာ်န့ၣ်တသ့ဘၣ်ဝဲဘၣ်.
19 ဘၣ်ဆၣ်ဒီး, ဝံသးစူၤမံသကိးတ့ၢ်ဖဲအံၤဒ်ပှၤအဂၤတဖၣ်မၤဝဲ အသိးန့ၣ်ဒ်သိးယကသ့ၣ်ညါဘၣ်လၢမ့ၢ်ယွၤအိၣ်ဒီးတၢ်အဂၤတမံၤ မံၤလၢကစံးဘၣ်တဲဘၣ်ယၤအဂီၢ်ဧါန့ၣ်တက့ၢ်.”
20 မုၢ်နၤအဝဲန့ၣ်ကစၢ်ယွၤဟဲဆူစီၤဘံးလၣ်အအိၣ်ဒီးစံးဝဲ, “ပှၤတဖုအံၤမ့ၢ်ဟဲဃ့ဝဲလၢနကလဲၤပိာ်အခံန့ၣ်ကတဲာ် ကတီၤထီၣ်နသးလၢနကလဲၤဃုာ်တၢ်ဒီးအဝဲသ့ၣ်တက့ၢ်. ဘၣ်ဆၣ်ဒီးမၤဒၣ်တၢ်ထဲလၢယစံးတ့ၢ်နၤဧိၤန့ၣ်တက့ၢ်.”
21 မၤသးဒ်န့ၣ်ဒီး, လၢမုၢ်ဆ့ၣ်ထီၣ်တနံၤန့ၣ်စီၤဘံးလၣ်ဂီၤကၢ်ထီၣ် အကသ့ၣ်ယီၤဒီးလဲၤဃုာ်တၢ်ဒီးပှၤမိၤအးဖိအခိၣ်အနၢ်တဖၣ်န့ၣ် လီၤ.
22 စီၤဘံးလၣ်လဲၤတၢ်အဃိဒီးကစၢ်ယွၤသးဒိၣ်ဝဲ, ဒီးဖဲစီၤဘံးလၣ်လဲၤဒိးအကသ့ၣ်ယီၤဒီကျဲညါန့ၣ်အကုၢ်ခံဂၤ လဲၤပိာ်အခံ, ဒီးယွၤအကလူးတဂၤဆၢထၢၣ်လၢကျဲမုၢ်အပူၤဒ်သိး ကတြီအကျဲန့ၣ်လီၤ.
23 ဖဲကသ့ၣ်ယီၤထံၣ်ကလူးန့ၣ်ဆၢထၢၣ်ဝဲစိာ်ဝဲဒီးနးတဘ့ၣ်န့ၣ်, အဝဲဃၣ်ကွံာ်အသးလၢကျဲပူၤဒီးလဲၤလီၤဆူပျီပူၤန့ၣ်လီၤ. စီၤဘံးလၣ်တီၢ်ကသ့ၣ်ယီၤဒီးမၢအက့ၤထီၣ်ဆူကျဲမုၢ်ခိၣ်န့ၣ် လီၤ.
24 အန့ၣ်ဒီးကလူးန့ၣ်ဆၢထၢၣ်ဖဲကျဲအံၣ်လီၤတတီၤဖဲစပံးလီၢ်ခံ ခါအကရၢၢ်ဒူၣ်အသးလၢလၢၢ်ခီပၤပၤအဘၢၣ်စၢၤန့ၣ်လီၤ.
25 ဖဲကသ့ၣ်ယီၤထံၣ်ကလူးဒီးအဝဲတွံၢ်အသးဆူဂီၤပၤဒီးကျံၤတံၢ် စီၤဘံးလၣ်အခီၣ်လၢဂီၤပၤန့ၣ်လီၤ. စီၤဘံးလၣ်တီၢ်ကဒီးကသ့ၣ်ယီၤန့ၣ်လီၤ.
26 မၤကဒီးတစု, ကလူးန့ၣ်သုးအသးဆူညါဒီးဆၢထၢၣ် ဝဲဖဲတၢ်လီၢ်အအံၣ်အတီၤလၢအကတံာ်ဝဲတုၤနပဒ့ၣ်နသး တသ့ဘၣ်န့ၣ်လီၤ.
27 တဘျီအံၤ, ဖဲကသ့ၣ်ယီၤထံၣ်ဘၣ်ကလူးန့ၣ်ဒီး, အဝဲတီၤလီၤဝဲလီၤ. စီၤဘံးလၣ်အသးထီၣ်တုၤပၢၤအသးတန့ၢ်လၢၤ ဘၣ်ဒီးစးထီၣ်တီၢ်ကသ့ၣ်ယီၤလၢနီၣ်တီၢ်န့ၣ်လီၤ.
28 အန့ၣ်တစု, ယွၤဟ့ၣ်လီၤတၢ်စိကမီၤလၢကသ့ၣ်ယီၤန့ၣ်ကတိၤတၢ် ကသ့အဂီၢ်ဒီးအဝဲစံးဘၣ်စီၤဘံးလၣ်, “ယမၤဘၣ်နၤလၢမနုၤတမံၤလဲၣ်. ဘၣ်မနုၤနတီၢ်ယၤသၢစုညါန့ၣ်လဲၣ်.”
29 စီၤဘံးလၣ်စံးဆၢဝဲ, “မ့ၢ်လၢနမၤပျုၢ်ယၤအဃိလီၤ. ယမ့ၢ်အိၣ်ဒီးနးတဘ့ၣ်ဒီးယကမၤသံကွံာ်နၤလီၤ.”
30 ကသ့ၣ်ယီၤစံးဆၢဝဲ, “ယတမ့ၢ်ကသ့ၣ်ယီၤတဒုဃီလၢနဒိးညီနုၢ် အီၤလၢနသးသမူဒီစိၤညါန့ၣ်ဘၣ်ဧါ. မ့ၢ်ယမၤနၤဒ်သိးအံၤလၢညါ တဘျီဘျီဧါ.”
စီၤဘံးလၣ်စံးဆၢဝဲ, “နတမၤဘၣ်.”
31 အန့ၣ်တစုယွၤပျဲစီၤဘံးလၣ်ထံၣ်ကလူးဆၢထၢၣ်ဖဲန့ၣ်ဃုာ်ဒီး အနးလၢအစုပူၤ, ဒီးစီၤဘံးလၣ်ထိၣ်လီၤပှီၤအသးကျးလီၤ အမဲာ်လၢဟီၣ်ခိၣ်လိၤန့ၣ်လီၤ.
32 ကလူးန့ၣ်သံကွၢ်ဆူၣ်အီၤ, “ဘၣ်မနုၤနတီၢ်နကသ့ၣ်ယီၤဒ်အံၤ အသိးသၢစုညါန့ၣ်လဲၣ်. ယဟဲဒ်သိးယကတြီတံာ်တာ်နကျဲ, မ့ၢ်လၢနတကြၢးလဲၤတၢ်လဲၤအံၤဘၣ်အဃိန့ၣ်လီၤ.
33 မ့မ့ၢ်နကသ့ၣ်ယီၤထံၣ်ယၤဒီးဃၣ်ကပၤအသးသၢစုညါလီၤ. အဝဲမ့ၢ်တမၤဒ်န့ၣ်ဒီး, ယကမၤသံတ့ၢ်လံနၤ, ဒီးပျဲပူၤကသ့ၣ် ယီၤန့ၣ်လီၤ.”
34 စီးဘံးလၣ်စံးဆၢဝဲ, “ယမၤတၢ်ဒဲးဘးလံ. ယတသ့ၣ်ညါယဲလၢနဆၢထၢၣ်လၢကျဲပူၤဒ်သိးနကတြီယၤအဂီၢ်န့ၣ် ဘၣ်. ဘၣ်ဆၣ်ဒီး, ခဲအံၤ, နမ့ၢ်ဆိကမိၣ်လၢယကလဲၤဆူညါအဂီၢ်န့ၣ်ကမၣ် လၢယဂီၢ်ဒီး, ယကက့ၤကဒါက့ၤဆူဟံၣ်လီၤ.”
35 ဘၣ်ဆၣ်ကလူးစံးဘၣ်အီၤ, “လဲၤဆူညါဃုာ်ဒီးပှၤတဖၣ်အံၤ, ဘၣ်ဆၣ်ဒီးတဲဘၣ်တၢ်ထဲလၢယမၢနတဲဧိၤန့ၣ်တက့ၢ်.” မၤသးဒ်န့ၣ်ဒီးစီၤဘံးလၣ်လဲၤဆူညါဃုာ်ဒီးအဝဲသ့ၣ်လီၤ.
36 ဖဲစီၤဘၤလးနၢ်ဟူဘၣ်လၢစီၤဘံးလၣ်ဟဲဝဲလံန့ၣ်, အဝဲဟးထီၣ်ဒ်သိးကလဲၤသဂၢၢ်အီၤလၢဝ့ၢ်ဧၢ်, ဝ့ၢ်တဖျၢၣ်လၢအအိၣ်ဝဲဖဲကီၢ်မိၤအးအကီၢ်ဆၢထံကျိအၢ်နိၣ် အကၢၢ်ခိၣ်န့ၣ်လီၤ.
37 စီၤဘၤလးသံကွၢ်အီၤ, “အခီၣ်ထံးတဘျီဖဲယမၢလီၤပှၤလဲၤကိး နၤန့ၣ်ဘၣ်မနုၤနတဟဲလဲၣ်. မ့ၢ်နဆိကမိၣ်လၢယမၤဘျုးနၤတန့ၢ်လၢလၢပှဲၤပှဲၤဘၣ်အဃိဧါ.”
38 စီၤဘံးလၣ်စံးဆၢအီၤ, “ယဟဲလံ, တမ့ၢ်ဘၣ်ဧါ. ဘၣ်ဆၣ်ဒီးခဲအံၤယအိၣ်ဒီးတၢ်စိကမီၤမနုၤန့ၣ်လဲၣ်. ယတဲကသ့ဒၣ်ထဲတၢ်လၢကစၢ်ယွၤမၢယစံးဧိၤလီၤ.”
39 မၤသးဒ်န့ၣ်ဒီးစီၤဘံးလၣ်လဲၤပိာ်စီၤဘၤလးအခံဆူ ဝ့ၢ်ကံးရယးဃူၤစိး,
40 တၢ်လီၢ်ဖဲစီၤဘၤလးမၤသံဂီၤဘုၣ်ဂီၤဖံးဒီးသိတဖၣ်ဒီးဟ့ၣ် လီၤစီၤဘံးလၣ်ဒီးခိၣ်နၢ်တဖၣ်လၢအအိၣ်ဒီးအီၤလၢတၢ်ညၣ် တနီၤန့ၣ်လီၤ.
41 မုၢ်ဆ့ၣ်ထီၣ်တနံၤန့ၣ်စီၤဘၤလးလဲၤကိးထီၣ်စီၤဘံးလၣ်ဆူ ဘဧၤလးဘၤမိး, တၢ်လီၢ်ဖဲစီၤဘံးလၣ်ထံၣ်ဘၣ်ကီၢ်အံၣ်စရ့လး အပှၤဂီၢ်မုၢ်တနီၤ, ကသ့ဝဲအဂီၢ်န့ၣ်လီၤ.