11
1 ဒီးပှၤဂီၢ်မုၢ်စးထီၣ်ကဒူးကဒ့ၣ်တၢ်ဆူယွၤအအိၣ်ဘၣ်ဃးဒီးအဝဲ သ့ၣ်အတၢ်ကိၢ်တၢ်ဂီၤတဖၣ်အဂ့ၢ်လီၤ. ဖဲယွၤနၢ်ဟူအဝဲသ့ၣ်ဒီးအဝဲသးဒိၣ်ထီၣ်ဒီးဆှၢလီၤမ့ၣ်အူ လၢပှၤဂီၢ်မုၢ်အဖီခိၣ်န့ၣ်လီၤ. မ့ၣ်အူအီၣ်တၢ်လၢအဝဲသ့ၣ်အကျါဒီးမၤဟးဂီၤကွံာ်တၢ်သူၣ်ဒဲ အလီၢ်တကပၤလီၤ.
2 ပှၤဂီၢ်မုၢ်ကိးပသူထီၣ်ဆူစီၤမိၤၡ့အအိၣ်လၢတၢ်မၤစၢၤအဂီၢ် လီၤ.စီၤမိၤၡ့ဘါထုကဖၣ်တၢ်ဆူယွၤအအိၣ်ဒီးမ့ၣ်အူလီၤပံာ် ကွံာ်ဝဲန့ၣ်လီၤ.
3 မၤသးဒ်န့ၣ်ဒီးတၢ်လီၢ်န့ၣ်ဘၣ်တၢ်ကိးအီၤလၢတးဘဧ့ရၤလီၤ. အဂ့ၢ်ဒ်အံၤ, ယွၤအမ့ၣ်အူအီၣ်တၢ်လၢအဝဲသ့ၣ်အကျါဖဲန့ၣ်လီၤ.
4 ပှၤတခီဘီမုၢ်ဖိအိၣ်ဝဲတနီၤလၢအလဲၤဃုာ်တၢ်ဒီးပှၤအံၣ်စရ့ လးဖိတဖၣ်န့ၣ်လီၤ. အဝဲသ့ၣ်အသးအိၣ်အီၣ်ဘၣ်တၢ်ဖံးတၢ်ညၣ်ဒိၣ်ဒိၣ်ကလဲာ်ဒီးပှၤအံၣ် စရ့လးဖိတဖၣ်ဒၣ်လဲာ်စးထီၣ်ကဒူးကဒ့ၣ်ထီၣ်တၢ်ဒီးစံးဝဲဒၣ်, “မ့ၢ်မတၤကဒုးအီၣ်ပှၤလၢတၢ်ဖံးတၢ်ညၣ်လဲၣ်.
5 လၢကီၢ်အဲၤကူပတူးအပူၤန့ၣ်ပအီၣ်ဘၣ်ညီနုၢ်ကယဲၢ်ညၣ်လၢပသး အိၣ်အီၣ်အီၤ, ဒီးအပှ့ၤအကလံၤတအိၣ်ဘၣ်. သ့ၣ်နီၣ်ထီၣ်ဒံသၣ်တဖၣ်, တဲာ်တီသၣ်တဖၣ်, ပကျၢတဖၣ်, ပသၢသၣ်ဂီၤတဖၣ်, ဒီးပသၢသၣ်ဝါတဖၣ်လၢအအိၣ်ဒီးပှၤတက့ၢ်.
6 မ့မ့ၢ်ခဲကနံၣ်အံၤ, ပဂံၢ်ပဘါလၢာ်ကွံာ်လံ. တၢ်တအိၣ်ဒီးပှၤနီတမံၤလၢပကအီၣ်အဂီၢ်ဘၣ်. တၢ်တအိၣ်နီတမံၤဘၣ်. ထဲဒၣ်ကိၣ်မၤနၤတမံၤဧိၤအိၣ်ဒီးပှၤတနံၤဘၣ်တနံၤန့ၣ်လီၤ.
7 (ကိၣ်မၤနၤန့ၣ်လီၤဂာ်ဒ်တၢ်ချံဆံးဆံးဖိ, အိၣ်ဒီးအလွဲၢ်ဝါဘီန့ၣ်လီၤ.
8 ကိၣ်အံၤလီၤတဲာ်ဝဲဃုာ်ဒီးပစီၤထံလၢသူၣ်ဒဲလီၢ်ဖီခိၣ်ဖဲ မုၢ်နၤအကတီၢ်န့ၣ်လီၤ.
9 မုၢ်ဆ့ၣ်ထီၣ်တနံၤန့ၣ်ပှၤဂီၢ်မုၢ်ကဟးထီၣ်ထၢဖှိၣ်အီၤ, ဂံာ်ကမူၣ်အီၤမ့တမ့ၢ်တိၢ်ကမူၣ်အီၤဒ်ကိၣ်ကမူၣ်အသိး, ဒီးချီအီၤဒီးဒုးကဲထီၣ်အီၤလၢကိၣ်ဘ့ၣ်ဘၣ်တဖၣ်န့ၣ်လီၤ. နအီၣ်အီၤဒီးမၤသးဒ်ကိၣ်ဘ့ၣ်ဘၣ်လၢတၢ်ဘၢမံအီၤဒီးသ့ၣ်စၤ ယံးအသိအသိးလီၤ.)
10 စီၤမိၤၡ့နၢ်ဟူဘၣ်ကယဲၢ်ပှၤဂီၢ်မုၢ်အတၢ်ကဒူးအဒ့ၣ်ဖဲအဝဲသ့ၣ် ဆၢထၢၣ်ဝဲလၢကရူၢ်တဖၣ်အပူၤဖဲအဝဲသ့ၣ်အဒဲတဖၣ်အကျဲစၢၤန့ၣ် လီၤ. မ့ၢ်လၢယွၤသးဒိၣ်ဘၣ်အဝဲသ့ၣ်အဃိစီၤမိၤၡ့အသးအုးဝဲဒၣ်,
11 ဒီးအဝဲဒၣ်စံးဘၣ်ယွၤ, “ဘၣ်မနုၤလၢနမၤဘၣ်ယၤအၢထဲအံၤ န့ၣ်လဲၣ်. ဘၣ်မနုၤလၢနတဘၣ်နသးလၢယၤန့ၣ်လဲၣ်. ဘၣ်မနုၤလၢနဟ့ၣ်ယၤမူဒါလၢပှၤဂီၢ်မုၢ်အံၤအဂီၢ်န့ၣ်လဲၣ်.
12 ယတတ့လီၤအဝဲသ့ၣ်မ့ၢ်ဂ့ၤ, ဒုးအိၣ်ဖျဲၣ်ထီၣ်အဝဲသ့ၣ်မ့ၢ်ဂ့ၤ ဘၣ်. ဘၣ်မနုၤလၢနမၢယမၤတၢ်ဒ်ပှၤဒုးအီၣ်နုၢ်ဖိဆံးဒီးစိာ်အဝဲ သ့ၣ်လၢယစုတီၤတဖၣ်အလိၤဒ်ဖိသၣ်ဆံးတဖၣ်အသိးလၢကျဲဒီဘိဆူ ကီၢ်တဘ့ၣ်လၢနအၢၣ်လီၤတ့ၢ်အမိၢ်ပၢ်ဖံဖုလၢပျၢၤတဖၣ်န့ၣ်လဲၣ်.
13 ယကမၤန့ၢ်တၢ်ဖံးတၢ်ညၣ်လၢဝဲလၢပှၤခဲလၢာ်အံၤအဂီၢ်ဖဲလဲၣ်ပူၤ လဲၣ်. အဝဲသ့ၣ်ကအုကစွါဒီးဃ့အီၣ်တၢ်ဖံးတၢ်ညၣ်တဆိတ့ၢ်ဒံးဘၣ်လီၤ.
14 ယဟံးန့ၢ်မူဒါလၢပှၤဂီၢ်မုၢ်ခဲလၢာ်အံၤအဂီၢ်ထဲယၤတဂၤဧိၤတသ့ဘၣ်. မ့ၢ်တၢ်ဃၢကဲာ်ဆိးလၢယဂီၢ်လီၤ.
15 နမ့ၢ်အဲၣ်ဒိးမၤယၤဒ်အံၤန့ၣ်ဒီးသးကညီၤယၤဒီးမၤသံကွံာ် ယၤဒ်သိးယသုတတူၢ်ဘၣ်နတၢ်မၤဆါလၢတအိၣ်ဒီးတၢ်သးကညီၤအံၤ လၢၤတဂ့ၤန့ၣ်တက့ၢ်.”
16 ယွၤစံးဘၣ်စီၤမိၤၡ့, “ကိးဖှိၣ်ပှၤအဂၤနွံဆံလၢအဘၣ်တၢ် ယူးယီၣ်ပာ်ကဲအီၤဒီးဘၣ်တၢ်သ့ၣ်ညါအီၤဒ်ပှၤဂီၢ်မုၢ်အခိၣ်အနၢ် တဖၣ်, ဟဲကိးအီၤဆူယွၤအိၣ်ဝဲဆိးဝဲအဒဲစီဆှံဒီးတဲဘၣ်အဝဲသ့ၣ် လၢကဆၢထၢၣ်ဖဲန့ၣ်လၢနကပၤတက့ၢ်.
17 ယကဟဲလီၤဒီးကတိၤတၢ်ဒီးနၤဖဲန့ၣ်ဒီးယကဟံးန့ၢ်သးလၢယဟ့ၣ် လီၤတ့ၢ်နၤတနီၤဒီးဟ့ၣ်လီၤအီၤဆူအဝဲသ့ၣ်အအိၣ်န့ၣ်လီၤ. အန့ၣ်ဒီးအဝဲသ့ၣ်ကမၤစၢၤနၤလၢတၢ်စိာ်ထီၣ်မူဒါလၢပှၤဂီၢ် မုၢ်တဖၣ်အံၤအဂီၢ်, ဒီးနတဝံဘၣ်ယိးဘၣ်ထဲတဂၤဧိၤလၢၤဘၣ်.
18 ခဲကနံၣ်အံၤတဲဘၣ်ပှၤဂီၢ်မုၢ်, “မၤကဆှီသုသးလၢခဲဂီၤကိာ် အဂီၢ်တက့ၢ်. သုကအိၣ်ဒီးတၢ်ဖံးတၢ်ညၣ်လၢသုကအီၣ်အဂီၢ်လီၤ. ယွၤနၢ်ဟူဘၣ်သုတၢ်ကအုကစွါဒီးလၢသုစံးသုအဲၣ်ဒိးတၢ်ဖံးတၢ်ညၣ်, ဒီးသုအိၣ်ဘၣ်မုာ်ဒိၣ်တက့ၢ်လၢကီၢ်အဲၤကူပတူးအပူၤန့ၣ်လီၤ. ခဲအံၤယွၤကဟ့ၣ်သုတၢ်ဖံးတၢ်ညၣ်ဒီးသုကအီၣ်ဘၣ်အီၤလီၤ.
19 သုကအီၣ်ဘၣ်တၢ်န့ၣ်တမ့ၢ်ထဲတသီမ့ၢ်ဂ့ၤ, ခံသီမ့ၢ်ဂ့ၤ, ယဲၢ်သီမ့ၢ်ဂ့ၤ, အသီတဆံမ့ၢ်ဂ့ၤဒီးအသီခံဆံမ့ၢ်ဂ့ၤဒၣ်လဲာ်န့ၣ်ဘၣ်.
20 မ့မ့ၢ်ကမ့ၢ်လၢဒီလါညါအဂီၢ်တုၤအဟဲဖျိးထီၣ်လၢသုနၢ်ပူၤ, တုၤသုသးကလဲၤအီၤတစုန့ၣ်လီၤ. တၢ်အံၤကမၤအသးမ့ၢ်လၢသုညိကွံာ်ယွၤလၢအအိၣ်ဖဲအံၤလၢသု ကျါဒီးကဒူးကဒ့ၣ်တၢ်ဆူအအိၣ်လၢတကြၢးသုဟးထီၣ်ကွံာ်ဘၣ်နီ တစုလၢကီၢ်အဲၤကူပတူးအဂ့ၢ်အဃိန့ၣ်လီၤ.”
21 စီၤမိၤၡ့စံးဘၣ်ယွၤ, “ခဲအံၤယပၢဆှၢပှၤဂီၢ်မုၢ်ဃုကလီၢ်ဂၤဒီး နစံးလၢနကဟ့ၣ်အဝဲသ့ၣ်တၢ်ဖံးတၢ်ညၣ်လၢဝဲလၢတလါအဂီၢ် လီၤ.
22 ဂီၤဘုၣ်ဂီၤဖံးဒီးသိမ့ၢ်ဘၣ်တၢ်မၤသံအီၤလၢကမၤသးမံအဝဲ သ့ၣ်အဂီၢ်န့ၣ်, လၢဝဲကသ့ဒ်လဲၣ်. ကယဲၢ်ညၣ်လၢပီၣ်လဲၣ်အပူၤကလၢလၢအဝဲသ့ၣ်အဂီၢ်ဧါ.”
23 ယွၤစံးဆၢဝဲဒၣ်, “မ့ၢ်တၢ်တြီဃာ်ယစိယကမီၤအဆၢသ့ဧါ. တယံာ်ဘၣ်ဒီးနကထံၣ်ဘၣ်တၢ်လၢယစံးတ့ၢ်ဝဲန့ၣ်ကကဲထီၣ်ဧါ တကဲထီၣ်ဘၣ်ဧါန့ၣ်လီၤ.”
24 မၤသးဒ်န့ၣ်ဒီး, စီၤမိၤၡ့ဟးထီၣ်ဝဲဆူတၢ်ချၢဒီးတဲဘၣ်ပှၤဂီၢ်မုၢ်လၢ, တၢ်လၢယွၤစံးဝဲန့ၣ်လီၤ. အဝဲကိးဖှိၣ်ပှၤခိၣ်ပှၤနၢ်အဂၤနွံဆံဒီးပာ်အီၤဝးတရံးဒဲစီဆှံန့ၣ်လီၤ.
25 တုၤနုၤတစုယွၤဟဲလီၤဝဲလၢတၢ်အၢၣ်အပူၤဒီးကတိၤဃီၤတၢ်ဆူ အအိၣ်လီၤ. ယွၤဟံးန့ၢ်သးလၢအဟ့ၣ်လီၤတ့ၢ်စီၤမိၤၡ့ဒီးဟ့ၣ် လီၤအီၤဆူပှၤခိၣ်ပှၤနၢ်အဂၤနွံဆံအအိၣ်န့ၣ်လီၤ. ဖဲသးန့ၣ်လီၤဘၣ်လၢအဝဲသ့ၣ်အလိၤဒီးအဝဲသ့ၣ်စးထီၣ်ကိးပသူ ထီၣ်ဒ်ဝံတဖၣ်အသိး, ဘၣ်ဆၣ်ဒီးတယံာ်ဘၣ်ဝဲဘၣ်.
26 ခိၣ်နၢ်အဂၤနွံဆံအကျါခံဂၤလၢအမ့ၢ်, စီၤအ့လဒးဒီးစီၤမ့ ဒးအိၣ်တ့ၢ်လၢသူၣ်ဒဲလီၢ်အပူၤဒီးတဟးထီၣ်လဲၤဘၣ်ဆူဒဲစီ ဆှံဘၣ်. ဖဲန့ၣ်, လၢသူၣ်ဒဲလီၢ်အပူၤ, သးန့ၣ်ဟဲလီၤလၢအဝဲသ့ၣ်အလိၤ ဒီးအဝဲသ့ၣ်စ့ၢ်ကီးစးထီၣ်ကိးထီၣ်ဝဲဒ်ဝံတဖၣ်အသိးန့ၣ်လီၤ.
27 ပှၤသးစၢ်တဂၤဃ့ၢ်ထီၣ်ဝဲဒီးတဲဘၣ်စီၤမိၤၡ့လၢစီၤအ့လဒး ဒီးစီၤမ့ဒးမၤမနုၤမနုၤအဂ့ၢ်န့ၣ်လီၤ.
28 အန့ၣ်ဒီးစီၤနိၣ်အဖိခွါစီၤယိၤၡူလၢအမၤစၢၤတ့ၢ်စီၤမိၤၡ့ စးထီၣ်လၢအသးစၢ်လံၤလံၤတဂၤန့ၣ်စံးဘၣ်စီၤမိၤၡ့, “တၢ်ဒိၣ်ဧၢ, တြီအီၤတက့ၢ်.”
29 စီၤမိၤၡ့စံးဆၢအီၤ, “မ့ၢ်နသးကါဘၣ်ဃးယတၢ်သူၣ်အိၣ်သး အိၣ်အဂ့ၢ်န့ၣ်ဧါ. ယဆၢမုၢ်လၢ်လၢယွၤကဟ့ၣ်အသးဆူအပှၤဂီၢ်မုၢ်ခဲလၢာ်ဒီးဒုးကိး ပသူထီၣ်အဝဲသ့ၣ်ဒ်ဝံဧိၤမီၣ်ဧိၤတဖၣ်အသိးန့ၣ်လီၤ.”
30 အန့ၣ်ဝံၤဒီး, စီၤမိၤၡ့ဒီးကီၢ်အံၣ်စရ့လးအပှၤခိၣ်ပှၤနၢ်နွံဆံ က့ၤကဒါက့ၤဆူအဟံၣ်န့ၣ်လီၤ.
31 သတူၢ်ကလာ်ယွၤမၢလီၤကလံၤလၢအဟဲစိာ်ထိၣ်ဘှၢၣ် တဖၣ်လၢပီၣ်လဲၣ်ပူၤ, လၢအယူၤဝဲပူၤဟီၣ်ခိၣ်ထဲခံပျၢ်ဧိၤန့ၣ်လီၤ. အဝဲသ့ၣ်ဟဲလီၤအိၣ်လၢသူၣ်ဒဲလီၢ်အဖီခိၣ်ဒီးဝးတရံးအီၤလၢ အမံၤလာ်တဖၣ်အမံၤလာ်လၢတၢ်လီၢ်ကိးကပၤဒဲးလီၤ.
32 မၤသးဒ်န့ၣ်ဒီးလၢဒီနံၤဒီနၤအတီၢ်ပူၤဒီးလၢမုၢ်ဆ့ၣ်ထီၣ် တနံၤဒၣ်လဲာ်ပှၤဂီၢ်မုၢ်အတၢ်မၤမ့ၢ်တၢ်ဖီၣ်န့ၢ်ထိၣ်ဘှၢၣ်တဖၣ် န့ၣ်လီၤ. ပှၤဖီၣ်ထိၣ်ဘှၢၣ်န့ၢ်စှၤန့ၢ်, လီၤတယၢၢ်ဆံဆဲၣ်ဃိမ့ၢ်တအိၣ်နီ တဂၤဘၣ်. အဝဲသ့ၣ်လိဃ့လီၤဝဲဝးတရံးပှၤသူၣ်ဒဲအလီၢ်ကိးပူၤဒဲးန့ၣ် လီၤ.
33 ဖဲအဝဲသ့ၣ်အိၣ်ဒံးဒီးတၢ်ဖံးတၢ်ညၣ်လၢကအီၣ်ဝဲအါအါဂီၢ်ဂီၢ် အဖၢမုၢ်ဒၣ်လဲာ်န့ၣ်ယွၤအသးဒိၣ်ထီၣ်ပှၤဂီၢ်မုၢ်ဒီးဒုးလီၤဘၣ်တၢ် သံသတြိာ်လၢအဝဲသ့ၣ်အကျါန့ၣ်လီၤ.
34 တၢ်လီၢ်န့ၣ်ဘၣ်တၢ်ကိးအီၤလၢကံးဘြိၤဟးတဝၤလီၤ. အခီပညီမ့ၢ်ပှၤသးကွံတၢ်တဖၣ်အသွၣ်ခိၣ်, မ့ၢ်လၢဖဲတၢ်လီၢ်န့ၣ်, တၢ်ခူၣ်လီၤကွံာ်ပှၤတဖၣ်လၢအသးကွံတၢ်ဖံးတၢ်ညၣ်အဃိန့ၣ်လီၤ.
35 ပှၤဂီၢ်မုၢ်သုးအသးလၢတၢ်လီၢ်န့ၣ်ဆူဃစ့ရိၤ, တၢ်လီၢ်ဖဲအဝဲသ့ၣ်သူၣ်ထီၣ်ဒဲန့ၣ်လီၤ.