22
(လူၤကၣ် ၁၄:၁၅-၂၄)
1 ယ့ၣ်ၡူးကတိၤကဒီးတၢ်လၢပှၤဂီၢ်မုၢ်ခီဖျိ တၢ်ကတိၤဒိတဖၣ်ဒီးစံးဝဲ,
2 “မူခိၣ်အဘီအမုၢ်န့ၣ်မၤအသးဒ်အံၤလီၤ. တဘျီစီၤပၤတဂၤကတဲာ်ကတီၤတၢ်ဖျီအမူးလၢအဖိခွါအဂီၢ်လီၤ.
3 အဝဲမၢလီၤအခ့အပှၤတဖၣ်ဒ်သိးအကလဲၤဒီးကိးန့ၢ် ပှၤလၢအဘၣ်တၢ်ကွဲမုာ်အီၤတဖၣ်လီၤ. ဘၣ်ဆၣ်ဒီး အဝဲသ့ၣ်အသးတအိၣ်ဟဲဝဲဘၣ်.
4 မၤကဒီးတစု, အဝဲဆှၢလီၤအခ့အပှၤအဂၤတဖၣ်ဒီးစံးဝဲ, ‘လဲၤဒီးစံးဘၣ်တဲဘၣ်ပှၤလၢအဘၣ်တၢ်ကွဲမုာ်အီၤတဖၣ် လၢယကတဲာ်ကတီၤမူးအတၢ်အီၣ်တၢ်အီဝံၤလံ. ယဂီၤဖံးဖါဒီးဂီၤဖံးဖိလၢအဘီၣ်တဖၣ်ဘၣ်တၢ်မၤသံအီၤလံ. ဒီးတၢ်ခဲလၢာ်အိၣ်ကတဲာ်ကတီၤအသးလံ. ဟဲဆူတၢ်ဖျီအမူးတက့ၢ်.’
5 ဘၣ်ဆၣ်ဒီး, အဝဲသ့ၣ်တပာ်ဒိၣ်တၢ်ကွဲမုာ်အံၤဘၣ်ဒီး, လဲၤဝဲဆူတၢ်လီၢ်အဂုၤအဂၤတဖၣ်လီၤ. တဂၤလဲၤဆူအစံာ်ပျီပူၤ, ဒီးအဂၤတဂၤလဲၤဝဲဆူအပနံာ်တၢ်ကၤတၢ်အလီၢ်လီၤ.
6 မ့မ့ၢ်, ပှၤအိၣ်လီၤတဲာ်အဂၤတဖၣ်န့ၣ်, ဟံးဃာ်စီၤပၤအံၤအခ့အပှၤလၢအလဲၤကိးအီၤတဖၣ်, မၤမဲာ်ဆှးအဝဲသ့ၣ်ခီဖျိအဒိအီၤ တီၢ်အီၤဒီးမၤသံကွံာ်အဝဲသ့ၣ်န့ၣ်လီၤ.
7 စီၤပၤန့ၣ်အသးဒိၣ်ထီၣ်ဒိၣ်ဒိၣ်ကလဲာ်, ဒီးဆှၢလီၤအသုးဖိတဖၣ်လၢအကမၤသံကွံာ် ပှၤမၤသံတၢ်ဖိတဖၣ်, ဒီးဒွဲၣ်ကွံာ်အဝဲသ့ၣ်အဝ့ၢ်န့ၣ်လီၤ.
8 တုၤနုၤတစု, အဝဲစံးဘၣ်အခ့အပှၤတဖၣ်ဒီးစံး, ‘တၢ်ဖျီအမူးအိၣ်ကတဲာ်ကတီၤအသးလံ. ဘၣ်ဆၣ်ပှၤလၢအဘၣ်တၢ်ကွဲမုာ်အီၤတဖၣ်န့ၣ်, တကြၢးဝဲဘၣ်ဝဲဒီးတၢ်လၤကပီၤအံၤဘၣ်.
9 အခဲအံၤလဲၤဆူကျဲမုၢ်ခိၣ်, ဒီးကွဲမုာ်ပှၤလၢသုထံၣ်န့ၢ်အီၤတဖၣ်ကိးဂၤဒဲးလၢအကဟဲဆူ တၢ်ဖျီအမူးအံၤတက့ၢ်.’
10 လၢတၢ်န့ၣ်အဃိအခ့အပှၤတဖၣ်ဟးထီၣ်လဲၤဝဲဆူကျဲမုၢ် တဖၣ်အလိၤ, ဒီးပှၤလၢအထံၣ်ဝဲခဲလၢာ်, ဂ့ၤမ့ၢ်ဂ့ၤ, အၢမ့ၢ်ဂ့ၤန့ၣ်ကိးန့ၢ်ဝဲခဲလၢာ်သတးဒီး, တၢ်ဖျီအဒၢးဖးဒိၣ်န့ၣ်ပှဲၤဝဲဒီးပှၤတဖၣ်န့ၣ်လီၤ.
11 ဘၣ်ဆၣ်ဒီး, တုၤစီၤပၤဟဲနုာ်ကွၢ်ပှၤသမှံၤတဖၣ်အံၤဒီး, ထံၣ်ဝဲပှၤတဂၤလၢအတကူတသိးဘၣ်တၢ်ဖျီမူးအကူ အသိးဘၣ်လီၤ.
12 ဒီးစီၤပၤစံးဘၣ်အီၤ, ‘တံၤသကိးဧၢ, နတကူသိးမူးအကူအသိးဘၣ်ဒီး, နဟဲနုာ်သ့ဒ်လဲၣ်.’ ဒီးအဝဲတစံးဆၢတၢ်နီတမံၤဘၣ်.
13 တုၤနုၤတစုစီၤပၤစံးဘၣ်အခ့အပှၤတဖၣ်ဒီးစံး, ‘စၢအစုစၢအခီၣ်ဒီးတ့ၢ်လီၤကွံာ်အီၤဆူတၢ်ချၢ ဆူတၢ်ခံးကျါတက့ၢ်. ဖဲန့ၣ်ကဟီၣ်ကယၢၤတၢ်ဒီးကအ့ၣ်စဃံးအမဲလီၤ.’ ”
14 ဒီးယ့ၣ်ၡူးမၤကတၢၢ်က့ၤအတၢ်ကတိၤဒီးစံးဝဲ, “ပှၤအါဂၤဘၣ်တၢ်ကွဲမုာ်အီၤ, ဘၣ်ဆၣ်ပှၤစှၤဂၤဘၣ်တၢ်ဃုထၢထီၣ်အီၤလီၤ.”
(မၢ်ကူး ၁၂:၁၃-၁၇; လူၤကၣ် ၂၀:၂၀-၂၆)
15 ပှၤဖၤရံၤၡဲတဖၣ်ဟးထီၣ်, ဒီးလဲၤကူၣ်ထီၣ်ဖးလီၤသကိးဝဲလၢ အကဘၣ်ဖီၣ်ယ့ၣ်ၡူးလၢအတၢ်ကတိၤဒၣ်ဝဲလၢကျဲဒ်လဲၣ်အဂ့ၢ်လီၤ.
16 တၢ်န့ၣ်ဝံၤအလီၢ်ခံ, အဝဲသ့ၣ်ဆှၢလီၤအပျဲၢ်အဘီၣ်တနီၤ, ဃုာ်ဒီးပှၤအိၣ်လၢဟ့ၤရိာ်အကရၢပူၤတနီၤ, ဆူယ့ၣ်ၡူးအအိၣ်လီၤ. အဝဲသ့ၣ်စံးဘၣ်အီၤ, “သရၣ်ဧၢ, ပသ့ၣ်ညါလၢနမ့ၢ်ပှၤလၢအတဲတၢ်တီတီတဂၤဒီးသိၣ် လီၤသီလီၤတၢ်မ့ၢ်တၢ်တီဘၣ်ဃးကစၢ်ယွၤအတၢ်ဘၣ်အသး လၢပှၤကညီအဂီၢ်, ဒီးနတပျံၤဒီးကွၢ်မဲာ်ပှၤနီတဂၤဘၣ်. အဂ့ၢ်ဒ်အံၤ ပှၤကညီအလီၢ်အလၤန့ၣ်, နတပာ်ဒိၣ်လီၤဆီအီၤဘၣ်.
17 လၢတၢ်န့ၣ်အဃိ, ပဟ့ၣ်ရိမ့ၤအစီၤပၤဖးဒိၣ်လၢတၢ်ခိတၢ်သွဲ န့ၣ်, မ့ၢ်တၢ်လၢအထီဒါပတၢ်သိၣ်တၢ်သီဧါ. တထီဒါလဲၣ်န့ၣ်, စံးဘၣ်တဲဘၣ်ပှၤလၢနတၢ်ပာ်နသးတက့ၢ်.”
18 ဘၣ်ဆၣ်, ယ့ၣ်ၡူးသ့ၣ်ညါစိအဝဲသ့ၣ်အတၢ်ကူၣ်အၢကူၣ်သီဒီးစံးဘၣ် အဝဲသ့ၣ်, “ပှၤပာ်မၤအသးသ့ၣ်ဧၢ, ဘၣ်မနုၤလၢသုဘၣ်သံကွၢ်သံ ဒိးယၤဒ်သိးသုကဖီၣ်န့ၢ်ယၤလၢယတၢ်ကတိၤဒၣ်ယဲန့ၣ်လဲၣ်.
19 ဒုးနဲၣ်ယၤလၢစ့တဘ့ၣ်လၢတၢ်ကဟ့ၣ်တၢ်အခိအသွဲအဂီၢ်တက့ၢ်.”
ဒီးအဝဲသ့ၣ်ဟ့ၣ်အီၤလၢစ့တဘ့ၣ်လီၤ.
20 ဒီးအဝဲဒၣ်သံကွၢ်အဝဲသ့ၣ်, “တၢ်အံၤမ့ၢ်မတၤအခိၣ်အဂီၤဒီးအမံၤလဲၣ်.”
21 အဝဲသ့ၣ်စံးဆၢဝဲ, “မ့ၢ်ရိမ့ၤအစီၤပၤဖးဒိၣ်အခိၣ်အဂီၤဒီးအမံၤလီၤ.”
တုၤနုၤတစု, ယ့ၣ်ၡူးစံးဘၣ်အဝဲသ့ၣ်, “မ့မ့ၢ်ဒ်န့ၣ်ဒီး, တၢ်လၢအဘၣ်ဃးဒီးရိမ့ၤအစီၤပၤဖးဒိၣ်န့ၣ်, ဟ့ၣ်ရိမ့ၤအစီၤပၤဖးဒိၣ်, ဒီးတၢ်လၢအဘၣ်ဃးဒီးကစၢ်ယွၤန့ၣ်, ဟ့ၣ်ကစၢ်ယွၤတက့ၢ်.”
22 တုၤအဝဲသ့ၣ်နၢ်ဟူတၢ်အံၤဒီး, ကမၢကမၣ်ဝဲဒိၣ်မး, ဒီးဟးထီၣ်ကွံာ်လၢယ့ၣ်ၡူးအအိၣ်, ဒီးက့ၤက့ၤဝဲလီၤ.
(မၢ်ကူး ၁၂:၁၈-၂၇; လူၤကၣ် ၂၀:၂၇-၄၀)
23 တနံၤဃီအဝဲန့ၣ်, ပှၤစးဒူၤကဲလၢအစံးဝဲလၢတၢ်ဂဲၤဆၢထၢၣ် သမူထီၣ်က့ၤတအိၣ်ဘၣ်တနီၤ, ဟဲဆူယ့ၣ်ၡူးအအိၣ်ဒီးသံကွၢ်အီၤဒီးစံး,
24 “သရၣ်ဧၢ, စီၤမိၤၡ့စံးတ့ၢ်ဝဲလၢပှၤတဂၤလၢအသံဒီးတပာ်တ့ၢ်ဘၣ် အဖိနီတဂၤဘၣ်န့ၣ်, အပုၢ်ကဘၣ်ဟံးန့ၢ်က့ၤအမါမုၣ်ကမဲန့ၣ်, ဒ်သိးဒီးအကဒုးအိၣ်ထီၣ်ဖိတဖၣ်လၢအဝဲၢ်လၢအသံတ့ၢ်တဂၤအဂီၢ်လီၤ (သိၣ်သီ.၂၅:၅).
25 တၢ်စံးဝဲလၢတဘျီပှၤဒီပုၢ်ဝဲၢ်ခွါလၢအအိၣ်တ့ၢ်ဖဲတၢ်လီၢ် အံၤအိၣ်နွံဂၤလီၤ. အဒိၣ်ကတၢၢ်တဂၤထီၣ်ပှၢ်ဝံၤသံဝဲ, တပာ်လီၤတဲာ်အဖိနီတဂၤဘၣ်, ဒီးအပုၢ်လၢအဖီလာ်တဂၤဟံးန့ၢ်က့ၤအဝဲဒၣ်အမါန့ၣ်လီၤ.
26 တၢ်အံၤမၤအသးဒီးအဒီပုၢ်ဝဲၢ်ခွါခံဂၤတဂၤ, ဒီးသၢဂၤတဂၤ, ပၢၢ်တုၤလၢ နွံဂၤတဂၤန့ၣ်လီၤ.
27 လၢခံကတၢၢ်ပိာ်မုၣ်န့ၣ်သံဝဲလီၤ.
28 ပှၤဒီပုၢ်ဝဲၢ်ခွါနွံဂၤလၢာ်အံၤဟံးန့ၢ်ဘၣ်ပိာ်မုၣ်အံၤကိးဂၤဒဲးအဃိ, လၢတၢ်ဂဲၤဆၢထၢၣ်သမူထီၣ်က့ၤလၢတၢ်သံအမုၢ်တနံၤန့ၣ်, ပိာ်မုၣ်အံၤကမ့ၢ်ဒီပုၢ်ဝဲၢ်ခွါလၢလဲၣ်တဂၤအမါလဲၣ်.”
29 ယ့ၣ်ၡူးစံးဆၢအဝဲသ့ၣ်ဒီးစံး, “သုတၢ်စူၢ်တၢ်နာ်ကမၣ်မးလဲၣ်. တၢ်အံၤမ့ၢ်ဒၣ်လၢသုတနၢ်ပၢၢ်တၢ်ကွဲးအသးစီဆှံတဖၣ်, ဒီးတသ့ၣ်ညါကစၢ်ယွၤအစိအကမီၤအဃိလီၤ.
30 အဂ့ၢ်ဒ်အံၤ, လၢတၢ်ဂဲၤဆၢထၢၣ်သမူထီၣ်က့ၤလၢတၢ်သံအမုၢ် တနံၤန့ၣ်, ပှၤကညီတဖၣ်ကလီၤဂာ်ဒီးကလူးလၢမူခိၣ်တဖၣ်, ဒီးတန့ၢ်မါန့ၢ်ဝၤလၢၤဘၣ်.
31 ဘၣ်ဃးဒီးတၢ်ဂဲၤဆၢထၢၣ်က့ၤလၢတၢ်သံန့ၣ်, မ့ၢ်သုတဖးဘၣ်တၢ်လၢ ကစၢ်ယွၤစံးဘၣ်တဲဘၣ်တ့ၢ်သုနီတဘျီဘၣ်ဧါ.
32 ယွၤစံးဝဲ, ‘ယမ့ၢ်စီၤအၤဘြၤဟၣ်, စီၤအံၤစဲးဒီး စီၤယၤကိာ်အကစၢ်ယွၤလီၤ.’ ကစၢ်ယွၤတမ့ၢ်ဘၣ်ပှၤအသံတဖၣ် အကစၢ်ယွၤဘၣ်. မ့ၢ်ပှၤအမူတဖၣ်အကစၢ်ယွၤလီၤ” (ဟးထီၣ်.၃:၆).
33 တုၤပှၤဂီၢ်မုၢ်တဖၣ်နၢ်ဟူတၢ်အံၤဒီး, အဝဲသ့ၣ်ကမၢကမၣ်ဝဲဒိၣ်မးလၢယ့ၣ်ၡူးအတၢ်သိၣ်လီၤသီလီၤ အဃိလီၤ.
(မၢ်ကူး ၁၂:၂၈-၃၄; လူၤကၣ် ၁၀:၂၅-၂၈)
34 တုၤပှၤဖၤရံၤၡဲတဖၣ်နၢ်ဟူလၢယ့ၣ်ၡူးစံးဆၢတၢ်တုၤဒၣ်လဲာ် ပှၤစးဒူၤကဲတဖၣ်ကတိၤဆၢတၢ်တသ့လၢၤဘၣ်ဒီး, အဝဲသ့ၣ်ပာ်ဖှိၣ်ထီၣ်အသးဒီးလဲၤဝဲဆူယ့ၣ်ၡူးအအိၣ်လီၤ.
35 အဝဲသ့ၣ်အကျါသရၣ်သိၣ်လိလံာ်တၢ်သိၣ်တၢ်သီတဂၤ, ဒ်သိးအကဖီၣ်ယ့ၣ်ၡူးလၢအတၢ်ကတိၤဒၣ်ဝဲအဂီၢ်န့ၣ်, သံကွၢ်အီၤလၢတၢ်သံကွၢ်တထံၣ်လီၤ.
36 အဝဲစံးဝဲ, “သရၣ်ဧၢ, တၢ်မၤလိာ်အဒိၣ်ကတၢၢ်လၢတၢ်သိၣ်တၢ်သီ အကျါမ့ၢ်ဖဲလဲၣ်တထံၣ်လဲၣ်.”
37 ယ့ၣ်ၡူးစံးဆၢအီၤ, “ ‘အဲၣ်ယွၤနကစၢ်ယွၤလၢနသူၣ်ကံၢ်သးလဲဒီးနသးဒီဖျၢၣ်ညါ, ဒီးနတၢ်ကူၣ်တၢ်ဆးတုၤအလၢာ်တက့ၢ်’ (သိၣ်သီ.၆:၅).
38 အအံၤမ့ၢ်တၢ်မၤလိာ်အဒိၣ်ကတၢၢ်ဒီးအခီၣ်ထံးကတၢၢ်တထံၣ်လီၤ.
39 ဒီးတၢ်မၤလိာ်လၢအဒိၣ်ကတၢၢ်ခံထံၣ်တထံၣ်န့ၣ်လီၤဂာ်ဒီးအီၤလီၤ. ‘အဲၣ်ပှၤလၢနဃၢၤ, ဒ်နအဲၣ်လီၤနသးဒၣ်နဲအသိးန့ၣ်တက့ၢ်’ (ဘူၣ်ဘါ.၁၉:၁၈).
40 စီၤမိၤၡ့အတၢ်သိၣ်တၢ်သီ, ဒီးဝံတဖၣ်အတၢ်သိၣ်လီၤသီလီၤခဲလၢာ်, သန့ၤထီၣ်အသးလၢတၢ်မၤလိာ်ခံထံၣ်အံၤအဖီခိၣ်လီၤ.”
(မၢ်ကူး ၁၂:၃၅-၃၇; လူၤကၣ် ၂၀:၄၁-၄၄)
41 ဖဲပှၤဖၤရံၤၡဲတဖၣ်အိၣ်တပူၤဃီအဆၢကတီၢ်န့ၣ်, ယ့ၣ်ၡူးသံကွၢ်အဝဲသ့ၣ်ဒီးစံး,
42 “ဘၣ်ဃးဒီးခရံာ်န့ၣ်သုဆိကမိၣ်ဒ်လဲၣ်. ဟဲလီၤစၢၤလၢမတၤတဂၤလဲၣ်.”
အဝဲသ့ၣ်စံးဆၢအီၤ, “မ့ၢ်စီၤဒၤဝံးအစၢၤအသွဲၣ်လီၤ.”
43 ယ့ၣ်ၡူးသံကွၢ်အဝဲသ့ၣ်ဒီးစံး, “မ့မ့ၢ်ဒ်န့ၣ်ဒီး, ဘၣ်မနုၤလၢယွၤအသးထိၣ်ဂဲၤစီၤဒၤဝံးလၢကကိးအီၤလၢ ကစၢ်န့ၣ်လဲၣ်. စီၤဒၤဝံးစံးတ့ၢ်ဝဲ,
44 ‘ယွၤကတိၤတၢ်ဒီးယကစၢ်ဒီးစံး,
ဆ့ၣ်နီၤဖဲအံၤလၢယစုထွဲတကပၤ
တုၤယပာ်နဒုၣ်နဒါတဖၣ်လၢနခီၣ်အဖီလာ်တက့ၢ်’ (စံး.၁၁၀:၁).
45 စီၤဒၤဝံးမ့ၢ်ကိးအီၤလၢကစၢ်သၢပျၢၤ, မ့ၢ်စီၤဒၤဝံးအစၢၤအသွဲၣ်ကသ့ဒ်လဲၣ်.”
46 ပှၤစံးဆၢက့ၤယ့ၣ်ၡူးတသ့နီတဘီနီတဂၤဘၣ်. ဒီးစးထီၣ်လၢမုၢ်တနံၤန့ၣ်, ပှၤသံကွၢ်အီၤတၢ်တဘူၣ်နီတမံၤနီတဂၤလၢၤဘၣ်.