21
(မၢ်ကူး ၁၁:၁-၁၁; လူၤကၣ် ၁၉:၂၈-၄၀; ယိၤဟၣ် ၁၂:၁၂-၁၉)
1 ဖဲယ့ၣ်ၡူးဒီးအပျဲၢ်အဘီၣ်တဖၣ်လဲၤဘူးထီၣ်ဒီးဝ့ၢ်ယရူၤၡလ့ၣ်, တုၤဃီၤဝဲလၢသဝီဘ့ၤသဖၤက့လၢကစၢၢ်သ့ၣ်စၤယံးဒီး, ယ့ၣ်ၡူးမၢလီၤဆိအပျဲၢ်အဘီၣ်ခံဂၤ
2 ဒီးစံးဘၣ်အဝဲသ့ၣ်, “လဲၤနုာ်ဆူသဝီလၢအအိၣ်လၢသုမဲာ်ညါတက့ၢ်. ဒီးတဘျီဃီသုကထံၣ်ဘၣ်ကသ့ၣ်ယီၤမိၢ်တဒုအိၣ်စၢဃာ်အသးအိၣ် ဃုာ်ဒီးအဖိတဒုလၢအကပၤလီၤ. ဃ့ၣ်လီၤဒီးဟဲက့ၤမိၤအဝဲသ့ၣ်ဆူယအိၣ်တက့ၢ်.
3 ဒီးပှၤတဂၤဂၤမ့ၢ်စံးဘၣ်သုတၢ်တမံၤမံၤဒီး, သုဘၣ်စံးဘၣ်က့ၤအီၤလၢကစၢ်လိၣ်ဘၣ်အီၤလီၤ, ဒီးကဟ့ၣ်လီၤဝဲတဘျီဃီလီၤ.”
4 တၢ်အံၤမၤအသး, မ့ၢ်ဒ်သိးဒီးတၢ်လၢဝံစံးတ့ၢ်ဝဲကလၢ ထီၣ်ပှဲၤထီၣ်အဂီၢ်, ဖဲအစံးဝဲ,
5 “စံးဘၣ်တဲဘၣ်ဝ့ၢ်စံယိၣ်
ကွၢ်တက့ၢ်. နစီၤပၤဟဲဆူနအိၣ်,
အသူၣ်စူၤအသးစူၤဒီးဒိးဝဲကသ့ၣ်ယီၤ
ကသ့ၣ်ယီၤအသးစၢ်, ကသ့ၣ်ယီၤအဖိလီၤ”
(ကၤ.၉:၉).
6 လၢတၢ်န့ၣ်အဃိအပျဲၢ်အဘီၣ်တဖၣ်လဲၤဒီးမၤဝဲဒ်ယ့ၣ်ၡူးမၤလိာ် အဝဲသ့ၣ်အသိးန့ၣ်လီၤ.
7 အဝဲသ့ၣ်ဟဲက့ၤမိၤကသ့ၣ်ယီၤမိၢ်ဒီးအဖိ, ပာ်ထီၣ်အဝဲသ့ၣ်အကူအသိးလၢကသ့ၣ်ယီၤတဖၣ်အလိၤ, ဒီးယ့ၣ်ၡူးဆ့ၣ်နီၤဝဲလၢအဖီခိၣ်လီၤ.
8 ပှၤဂီၢ်မုၢ်အါဒံအါဂၤဒါလီၤအကူအသိးလၢကျဲအလိၤ, ဒီးအဂၤတဖၣ်ပဲာ်လီၤသ့ၣ်ဒ့တဖၣ်ဒီးပာ်လီၤဝဲလၢကျဲအလိၤလီၤ.
9 ဒီးပှၤဂီၢ်မုၢ်လၢအလဲၤလၢယ့ၣ်ၡူးအမဲာ်ညါဒီးပှၤလၢအပိာ်ထီၣ် အခံတဖၣ်ကိးပသူထီၣ်ဒီးစံး, “စီၤဒၤဝံးအဖိခွါဧၢ, အုၣ်က့ၤခီၣ်က့ၤပှၤတက့ၢ်. ပှၤလၢအဟဲလၢကစၢ်အမံၤတဂၤန့ၣ်မ်ယွၤဆိၣ်ဂ့ၤအီၤတက့ၢ်. မ်ကစၢ်ယွၤအမံၤဘၣ်တၢ်စံးထီၣ်ပတြၢၤအီၤတက့ၢ်” (စံး.၁၁၈:၂၅-၂၆).
10 တုၤယ့ၣ်ၡူးလဲၤနုာ်ဆူဝ့ၢ်ယရူၤၡလ့ၣ်အပူၤဒီး, တၢ်တၢထီၣ်တၢလီၤဒီဝ့ၢ်ညါဒီးပှၤဝ့ၢ်ဖိတဖၣ်သံကွၢ်တၢ်ဒီး စံး, “ပှၤအံၤမ့ၢ်မတၤလဲၣ်.”
11 ဒီးပှၤဂီၢ်မုၢ်တဖၣ်စံးဆၢဝဲ, “အအံၤမ့ၢ်ဝံယ့ၣ်ၡူးလၢဝ့ၢ်နစၤရ့းဘၣ်ဃးဒီး ကီၢ်ကၤလံၤလါန့ၣ်လီၤ.”
(မၢ်ကူး ၁၁:၁၅-၁၉; လူၤကၣ် ၁၉:၄၅-၄၈; ယိၤဟၣ် ၂:၁၃-၂၂)
12 ယ့ၣ်ၡူးလဲၤနုာ်ဆူတၢ်လုၢ်ဟံၣ်အပူၤ, ဒီးဟီထီၣ်ကွံာ်ပှၤလၢအဆါတၢ်ပှ့ၤတၢ်လၢတၢ်လုၢ်ဟံၣ်အပူၤခဲလၢာ်, ဒီးမၤလီၤတကျၢၢ်ကွံာ်ပှၤခီလဲကျိၣ်စ့တဖၣ်အစီၢ်နီၤခိၣ် တဖၣ်, ဒီးပှၤဆါထိၣ်လွံၢ်တဖၣ်အလီၢ်ဆ့ၣ်နီၤတဖၣ်န့ၣ်လီၤ.
13 ဒီးစံးဘၣ်အဝဲသ့ၣ်, “တၢ်ကွဲးအသးစီဆှံစံးဝဲလၢကစၢ်ယွၤစံးဝဲဒၣ်, ‘ယဟံၣ်ကဘၣ်တၢ်ကိးအီၤလၢတၢ်ထုကဖၣ်အဟံၣ်လီၤ.’ ဘၣ်ဆၣ်ဒီး, သုဒုးကဲထီၣ်အီၤလၢတၢ်ဟုၣ်တၢ်ဘျၣ်တဖၣ်အတၢ်အိၣ်ခူ သူၣ်အလီၢ်တပူၤလီၤ”
(ၡါ.၅၆:၇; ယံး ၇:၁၁).
14 ပှၤမဲာ်ဘျီၣ်ဒီးပှၤစုကၢ်ခီၣ်ချံးတဖၣ်ဟဲဆူအအိၣ်လၢတၢ်လုၢ် ဟံၣ်အပူၤ, ဒီးအဝဲမၤဘျါက့ၤအဝဲသ့ၣ်လီၤ.
15 ပှၤလုၢ်တၢ်အခိၣ်အဒိၣ်တဖၣ်, ဒီးပှၤသ့တၢ်ဘူၣ်တၢ်ဘါအတၢ်သိၣ် တၢ်သီတဖၣ်, အသးဒိၣ်ထီၣ်ဝဲဖဲအထံၣ်တၢ်လီၤလးတဖၣ်လၢအဝဲဒၣ်မၤဝဲ, ဒီးနၢ်ဟူဖိဒံဖိသၣ်တဖၣ်ကိးပသူထီၣ်လၢတၢ်လုၢ်ဟံၣ်အပူၤဒီး စံး, “တၢ်စံးထီၣ်ပတြၢၤမ်အဘၣ်စီၤဒၤဝံးအဖိခွါတက့ၢ်” အခါန့ၣ်လီၤ.
16 ဒီးအဝဲသ့ၣ်စံးဘၣ်ယ့ၣ်ၡူး, “အဝဲသ့ၣ်တဲတၢ်န့ၣ်နနၢ်ဟူဧါ.”
ယ့ၣ်ၡူးစံးဆၢအဝဲသ့ၣ်, “ယနၢ်ဟူယဲသၢၣ်. မ့ၢ်သုတဖးဘၣ်တၢ်ကွဲးအသးစီဆှံလၢအစံး, ‘ယွၤကတဲာ်ကတီၤတၢ်စံးထီၣ်ပတြၢၤလၢဖိသၣ်တဖၣ်ဒီးဖိဆံးအီၣ် နုၢ်ထံဖိတဖၣ်အထးခိၣ်’ နီတဘျီဘၣ်ဧါ” (စံး.၈:၂).
17 ဒီးယ့ၣ်ၡူးဟးထီၣ်ကွံာ်လၢအဝဲသ့ၣ်အအိၣ်လၢဝ့ၢ်ပူၤ, ဒီးလဲၤဝဲဆူဝ့ၢ်ဘ့ၤသနံဒီးအိၣ်ဝဲဖဲန့ၣ်ဒီနၤညါလီၤ.
(မၢ်ကူး ၁၁:၁၂-၁၄, ၂၀-၂၄)
18 တုၤမုၢ်ဆ့ၣ်ထီၣ်ဂီၤဂီၤဖဲယ့ၣ်ၡူးက့ၤကဒါက့ၤဆူဝ့ၢ်အဖၢမုၢ်န့ၣ်, တၢ်သၣ်ဝံၤအသးလီၤ.
19 အဝဲထံၣ်ချၢၣ်ဒၢတထူၣ်လၢကျဲကပၤဒီးလဲၤဝဲဆူအခီၣ်ထံး, ဘၣ်ဆၣ်တထံၣ်န့ၢ်အသၣ်နီတဖျၢၣ်ဘၣ်, ထံၣ်ဝဲထဲအလၣ်ဧိၤလီၤ. ဒီးအဝဲစံးဘၣ်သ့ၣ်န့ၣ်, “မ်နသုတသၣ်ထီၣ်နီတဘျီလၢၤတဂ့ၤ.” တဘျီဃီချၢၣ်ဒၢတထူၣ်န့ၣ်ဃ့ထီကွံာ်ဝဲလီၤ.
20 အပျဲၢ်အဘီၣ်တဖၣ်ထံၣ်တၢ်မၤအသးအံၤဒီး, ကမၢကမၣ်ဝဲဒိၣ်မး, ဒီးစံး, “ချၢၣ်ဒၢတထူၣ်အံၤဃ့ထီကွံာ်ဝဲချ့သဒံးဒ်လဲၣ်.”
21 ယ့ၣ်ၡူးစံးဆၢအဝဲသ့ၣ်ဒီးစံး, “နာ်ယၤတက့ၢ်. ယစံးဘၣ်တဲဘၣ်သု, သုမ့ၢ်အိၣ်ဒီးတၢ်နာ်ဒီးသုသးမ့ၢ်တဒ့ဒီဘၣ်န့ၣ်, တၢ်လၢယမၤဘၣ်ချၢၣ်ဒၢအံၤသုမၤကသ့ဒီးအါန့ၢ်အန့ၣ်သုမ့ၢ်စံးဘၣ် ကစၢၢ်အံၤ, ‘သုးကွံာ်နသးဒီးတ့ၢ်လီၤကွံာ်နသးဆူပီၣ်လဲၣ်ပူၤတက့ၢ်’ န့ၣ်, ကမၤအသးလီၤ.
22 သုမ့ၢ်နာ်တၢ်ဒီးတၢ်လၢသုဃ့ယွၤလၢသုတၢ်ထုကဖၣ်အပူၤန့ၣ်, သုကဒိးန့ၢ်ဘၣ်အီၤလီၤ.”
(မၢ်ကူး ၁၁:၂၇-၃၃; လူၤကၣ် ၂၀:၁-၈)
23 ယ့ၣ်ၡူးက့ၤကဒါက့ၤဆူတၢ်လုၢ်ဟံၣ်အပူၤ, ဒီးဖဲအဝဲသိၣ်လီၤသီလီၤတၢ်အဖၢမုၢ်န့ၣ်, ပှၤလုၢ်တၢ်အခိၣ်အဒိၣ်တဖၣ်ဒီးပှၤယူဒၤဖိကရၢအခိၣ်အနၢ်တဖၣ် ဟဲဆူအအိၣ်ဒီးသံကွၢ်အီၤ, “လၢနကမၤတၢ်တဖၣ်အံၤအဂီၢ်န့ၣ်, နန့ၢ်ဘၣ်တၢ်စိတၢ်ကမီၤဖဲလဲၣ်. မတၤတဂၤဟ့ၣ်စိဟ့ၣ်ကမီၤနၤလဲၣ်.”
24 ယ့ၣ်ၡူးစံးဆၢအဝဲသ့ၣ်ဒီးစံး, “ယကသံကွၢ်သုထဲတၢ်သံကွၢ်တဘီဧိၤလီၤ. သုစံးဆၢယၤမ့ၢ်ဘၣ်ဒီး, လၢယကမၤတၢ်တဖၣ်အံၤအဂီၢ်, ယန့ၢ်ဘၣ်တၢ်စိတၢ်ကမီၤဖဲလဲၣ်န့ၣ်ယကတဲဘၣ်သုလီၤ.
25 စီၤယိၤဟၣ်ဘျၢပှၤလၢထံန့ၣ်, ဒိးန့ၢ်တၢ်စိတၢ်ကမီၤလၢလဲၣ်. မ့ၢ်အဒိးန့ၢ်ဝဲလၢကစၢ်ယွၤအအိၣ်ဧါ. မ့တမ့ၢ်ဘၣ်ဒီး လၢပှၤဟီၣ်ခိၣ်ဖိအအိၣ်လဲၣ်.”
အဝဲသ့ၣ်ကတိၤဂ့ၢ်လိာ်ဘှီလိာ်အသးဒီးစံး, “ပမ့ၢ်စံး, ‘လၢကစၢ်ယွၤအအိၣ်’ ဒီးကတဲပှၤ, ‘မ့မ့ၢ်ဒ်န့ၣ်ဒီးဘၣ်မနုၤလၢသုတနာ်စီၤယိၤဟၣ်လဲၣ်.’
26 ပမ့ၢ်စံး, ‘လၢပှၤဟီၣ်ခိၣ်ဖိအအိၣ်’ ဒီးပဘၣ်ပျံၤဘၣ်ပှၤဂီၢ်မုၢ်လီၤ. အဂ့ၢ်ဒ်အံၤ, ပှၤဂီၢ်မုၢ်နာ်လၢစီၤယိၤဟၣ်မ့ၢ်ဝံတဂၤလီၤ.”
27 လၢတၢ်န့ၣ်အဃိ, အဝဲသ့ၣ်စံးဆၢယ့ၣ်ၡူးဒီးစံး, “ပတသ့ၣ်ညါဘၣ်.”
ဒီးယ့ၣ်ၡူးစံးဘၣ်အဝဲသ့ၣ်, “မ့မ့ၢ်ဒ်န့ၣ်ဒီး, ယဲစ့ၢ်ကီးယမၤတၢ်တဖၣ်အံၤလၢမတၤအစိကမီၤလဲၣ်န့ၣ်, ယတတဲသုဘၣ်.
28 သုကစံးဒ်လဲၣ်. တၢ်စံးဝဲလၢပှၤတဂၤအဖိခွါအိၣ်ခံဂၤလီၤ. လဲၤဝဲဆူအဖိခွါအဒိၣ်တဂၤအအိၣ်ဒီးစံး, ‘ဖိခွါဧၢ, တနံၤအံၤလဲၤဒီးမၤတၢ်လၢစပံးလီၢ်အပူၤတက့ၢ်.’
29 ဒီးအဖိခွါန့ၣ်စံးဆၢအီၤ, ‘ယတလဲၤဘၣ်.’ ဘၣ်ဆၣ်လၢခံက့ၤအသးလဲလိာ်အသးဒီးလဲၤဝဲလီၤ.
30 ပၢ်အံၤလဲၤကဒီးဆူအဖိခွါအဆံးတဂၤအအိၣ်ဒီးစံးတၢ်တမံၤဃီလီၤ. ဖိခွါအံၤစံးဆၢဝဲ, ‘မ့ၢ်ပၢ်ဧၢ, ယကလဲၤ’ ဘၣ်ဆၣ်ဒီးတလဲၤဝဲဘၣ်.
31 ဖိခွါခံဂၤအံၤ, မ့ၢ်ပှၤမၤတၢ်ဘၣ်အပၢ်အသးလၢလဲၣ်တဂၤလဲၣ်.”
ဒီးအဝဲသ့ၣ်စံးဆၢအီၤ, “မ့ၢ်ဖိခွါလၢအဒိၣ်တဂၤလီၤ.”
တုၤနုၤတစုယ့ၣ်ၡူးစံးဘၣ်အဝဲသ့ၣ်, “နာ်ယၤတက့ၢ်. ပှၤဃ့သွဲတဖၣ်ဒီးပိာ်မုၣ်ဟးဂီၤတဖၣ်ကလဲၤနုာ်ဆိဆူ ကစၢ်ယွၤအဘီအမုၢ်အပူၤလၢသုမဲာ်ညါလီၤ.
32 အဂ့ၢ်ဒ်အံၤ, ပှၤဘျၢတၢ်စီၤယိၤဟၣ်ဟဲဒုးနဲၣ်သုလၢတၢ်တီတၢ်လိၤ အကျဲလၢသုကပိာ်အီၤအဂီၢ်, ဒီးသုတနာ်အီၤဘၣ်. မ့မ့ၢ်ပှၤဃ့သွဲတဖၣ်ဒီးပိာ်မုၣ်ဟးဂီၤတဖၣ်နာ်အီၤလီၤ. သုထံၣ်တၢ်အံၤဝံၤအလီၢ်ခံဒၣ်လဲာ်, သုသးတလဲလိာ်အသးဒီးနာ်အီၤဘၣ်.”
(မၢ်ကူး ၁၂:၁-၁၂; လူၤကၣ် ၂၀:၉-၁၉)
33 ယ့ၣ်ၡူးစံးဝဲ, “ကနၣ်ကဒီးတၢ်ကတိၤဒိအဂၤတခါတက့ၢ်. တၢ်စံးဝဲတဘျီ, စပံးလီၢ်ကစၢ်အိၣ်တဂၤလၢအသူၣ်လီၤစပံးလီၢ်တလီၢ်, ဝံၤကရၢဃာ်အီၤဝးတရံး, ဒီးခူၣ်န့ၢ်တၢ်ပူၤတပူၤလၢကဆီလီၤနီၣ်စံၢ်စပံးသၣ်အကျိး အဂီၢ်, ဒီးဘှီထီၣ်ဒဲအခီၣ်ဖးထီတဖျၢၣ်လၢပှၤကခိးစပံးလီၢ်အဂီၢ်လီၤ. တုၤနုၤတစု, ဒိးလဲလီၤဝဲလၢပှၤဒိးလဲစပံးလီၢ်တဖၣ်အစုပူၤ, ဒီးဟးထီၣ်လၢအဟံၣ်ဒီးလဲၤတၢ်လီၤ.
34 တုၤတၢ်ဒ့စပံးသၣ်အဆၢကတီၢ်ဘူးထီၣ်ဒီး, အဝဲဆှၢလီၤအခ့အပှၤတဖၣ်ဆူ ပှၤလၢအဒိးလဲစပံးလီၢ်တဖၣ်အအိၣ်, ဒ်သိးအကန့ၢ်ဘၣ်က့ၤတၢ်လၢအဂ့ၤန့ၢ်ဘၣ်ဝဲအဂီၢ်န့ၣ်လီၤ.
35 ပှၤဒိးလဲစပံးလီၢ်တဖၣ် ဟံးဃာ်အဝဲအခ့အပှၤတဖၣ်, ဒီးတီၢ်ဝဲတဂၤ, မၤသံဝဲတဂၤ, ဒီးကွံာ်ဝဲလၢလၢၢ်တဂၤလီၤ.
36 မၤကဒီး, ဆှၢလီၤအခ့အပှၤအဂၤတဖၣ်အါန့ၢ်လၢအခီၣ်ထံးတဘျီတက့ၢ်, ဒီးအဝဲသ့ၣ်မၤအီၤဒ်လၢညါတဘျီအသိးလီၤ.
37 လၢခံကတၢၢ်အဝဲဆှၢလီၤအဖိခွါဆူအဝဲသ့ၣ်အအိၣ်ဒီးစံး, ‘မ့မ့ၢ်ယဖိခွါန့ၣ်, အဝဲသ့ၣ်ကယူးယီၣ်ပာ်ကဲဝဲသပှၢ်ကတၢၢ်လီၤ.’
38 ဘၣ်ဆၣ်ဒီး, တုၤပှၤဒိးလဲစပံးလီၢ်တဖၣ်ထံၣ်အဖိခွါန့ၣ်, အဝဲသ့ၣ် စံးလိာ်အသး, ‘အအံၤမ့ၢ်စပံးလီၢ်အကစၢ်အဖိခွါလၢအကန့ၢ်သါတၢ် တဂၤလီၤ. ဟဲ, မ်ပကမၤသံကွံာ်အီၤ, ဒီးပကန့ၢ်ဘၣ်အတၢ်န့ၢ်သါလီၤ.’
39 လၢတၢ်န့ၣ်အဃိ, အဝဲသ့ၣ်ဟံးဃာ်အီၤ, ထုးထီၣ်အီၤဆူစပံးလီၢ် အချၢ, ဝံၤမၤသံကွံာ်အီၤလီၤ.”
40 ယ့ၣ်ၡူးသံကွၢ်အဝဲသ့ၣ်, “တုၤစပံးလီၢ်ကစၢ်ဟဲက့ၤဒီး, ကမၤပှၤဒိးလဲစပံးလီၢ်တဖၣ်အံၤဒ်လဲၣ်.”
41 အဝဲသ့ၣ်စံးဆၢအီၤ, “ကမၤသံပှၤအၢပှၤသီတဖၣ်န့ၣ်သပှၢ်ကတၢၢ်လီၤ. ဒီးကဒိးလဲလီၤဝဲစပံးလီၢ်ဆူပှၤဒိးလဲစပံးလီၢ်အဂၤ, လၢအကဟ့ၣ်အီၤတၢ်လၢအဂ့ၤဒိးန့ၢ်ဝဲဘၣ်ဆၢဘၣ်ကတီၢ် တဖၣ်န့ၣ်လီၤ.”
42 ယ့ၣ်ၡူးစံးဘၣ်အဝဲသ့ၣ်,
“တၢ်ကွဲးအသးစီဆှံလၢအစံး,
‘လၢၢ်တဖျၢၣ်လၢပှၤသူၣ်ထီၣ်ဟံၣ်တဖၣ်ညိကွံာ်အီၤဒ် တၢ်လၢအလုၢ်အပှ့ၤတအိၣ်ဘၣ်အသိးန့ၣ်,
ကဲထီၣ်က့ၤလၢၢ်ခိၣ်စိလၢ
အကါဒိၣ်ကတၢၢ်တဖျၢၣ်လီၤ.
အအံၤမ့ၢ်ကစၢ်အတၢ်မၤ,
ဒီးမ့ၢ်တၢ်လီၤလးဒိၣ်မးလၢပမဲာ်ညါလီၤ’
န့ၣ်, မ့ၢ်သုတဖးဘၣ်ဘၣ်ဧါ” (စံး.၁၁၈:၂၂-၂၃).
43 ယ့ၣ်ၡူးစံးကဒီးဝဲ, “လၢတၢ်န့ၣ်အဃိ, ယစံးဘၣ်သု, ကစၢ်ယွၤအဘီအမုၢ်ကဘၣ်တၢ်ဟံးထီၣ်ကွံာ်အီၤလၢသုအိၣ်, ဒီးဟ့ၣ်လီၤအီၤဆူပှၤတကလုာ်လၢအဟ့ၣ်ထီၣ်တၤသၣ် လၢအကြၢးဝဲဘၣ်ဝဲန့ၣ်လီၤ.”
44 (ပှၤတဂၤလၢ်လၢ်လၢအလီၤဃံၤလၢလၢၢ်အံၤအဖီခိၣ်န့ၣ်, ကကၢ်ဝဲဒီး လၢၢ်အံၤမ့ၢ်လီၤတဲာ်ဒီးဘၣ်ပှၤတဂၤဂၤဒီး, ကမၤလီၤသဘှံးကွံာ်အီၤလီၤ.)
45 တုၤပှၤလုၢ်တၢ်အခိၣ်အဒိၣ်တဖၣ်, ဒီးပှၤဖၤရံၤၡဲတဖၣ်နၢ်ဟူယ့ၣ်ၡူးအတၢ်ကတိၤဒိတဖၣ်အံၤဒီး, သ့ၣ်ညါဝဲလၢအစံးတၢ်ဘၣ်ဃးဒီးအဝဲသ့ၣ်အဂ့ၢ်န့ၣ်လီၤ.
46 လၢတၢ်န့ၣ်အဃိ, အဝဲသ့ၣ်ဂုာ်ကျဲးစၢးဒ်သိးကဖီၣ်ဒီးဟံးဃာ်အီၤန့ၣ်လီၤ. ဘၣ်ဆၣ်, ပျံၤဝဲပှၤဂီၢ်မုၢ်တဖၣ်လၢအပာ်ယ့ၣ်ၡူးဒ်ဝံတဂၤအသိးန့ၣ်လီၤ.