23
(မၢ်ကူး ၁၂:၃၈-၃၉; လူၤကၣ် ၁၁:၄၃, ၄၆; ၂၀:၄၅-၄၆)
1 တုၤနုၤတစုယ့ၣ်ၡူးကတိၤတၢ်ဒီးပှၤဂီၢ်မုၢ်တဖၣ်, ဒီးအပျဲၢ်အဘီၣ်တဖၣ်ဒီးစံးဝဲ,
2 “ပှၤသ့တၢ်ဘူၣ်တၢ်ဘါအတၢ်သိၣ်တၢ်သီဒီးပှၤဖၤရံၤၡဲတဖၣ်, မ့ၢ်ပှၤတဖၣ်လၢအဘၣ်တၢ်ဟ့ၣ်စိဟ့ၣ်ကမီၤအီၤလၢကတဲဖျါထီၣ်န့ၢ် သုလၢစီၤမိၤၡ့အတၢ်သိၣ်တၢ်သီအခီပညီလီၤ.
3 လၢတၢ်န့ၣ်အဃိ, သုဘၣ်စူၢ်ဒီးတိၢ်န့ၢ်တၢ်ကိးမံၤဒဲးလၢအဝဲသ့ၣ်တဲသုလၢ သုကဘၣ်မၤန့ၣ်လီၤ. ဘၣ်ဆၣ်ဒီး, တၢ်လၢအဝဲသ့ၣ်မၤဝဲတဖၣ်န့ၣ်တဘၣ်မၤဒိးတဂ့ၤ. အဂ့ၢ်ဒ်အံၤ, အဝဲသ့ၣ်တမၤထွဲတၢ်လၢအဝဲသ့ၣ်စံၣ်တဲၤတဲလီၤဝဲန့ၣ်ဘၣ်.
4 အဝဲသ့ၣ်စၢထီၣ်တၢ်ဝံဃၢတဖၣ်လၢပှၤဝံအီၤကီလၢပှၤအဖံဘၣ် ခိၣ်ဘၣ်ဆၣ်ဒီး, လၢကစိာ်စၢၤပှၤအတၢ်ဝံတၢ်ယိးတဖၣ်အဂီၢ်တခီ, အစုမုၢ်စုနၢဖိတဘိဒၣ်လဲာ်တသးအိၣ်ယူာ်ဃီၤဝဲဘၣ်.
5 အဝဲသ့ၣ်မၤတၢ်ခဲလၢာ်ဒ်သိးဒီးပှၤကညီကထံၣ်အီၤအဂီၢ်လီၤ. လံာ်စီဆှံအဆၢဖိတဖၣ်အဒၢလၢအစၢဃာ်ဝဲလၢအခိၣ်တိသၣ်ဒီး အစုတီၤလိၤတဖၣ်န့ၣ်, မၤဒိၣ်လီၤဆီဝဲ, ဒီးအဆ့ကၤအနွံတဖၣ်စ့ၢ်ကီးမၤထီလီၤဆီဝဲလီၤ.
6 လၢတၢ်အီၣ်တၢ်အီအမူးတဖၣ်အပူၤန့ၣ်, အဝဲသ့ၣ်အဲၣ်ဒိးဆ့ၣ်နီၤလၢတၢ်လီၢ်အဂ့ၤကတၢၢ်တဖၣ်, ဒီးလၢဘူၣ်ဘျီၣ်လၢအမ့ၢ်တၢ်ဘါလီၢ်အပူၤန့ၣ်အဲၣ်ဒိးဆ့ၣ်နီၤ ဒၣ်လၢတၢ်လီၢ်လၢအဘၣ်တၢ်ပာ်လီၤဆီအီၤတဖၣ်န့ၣ်လီၤ.
7 အဝဲသ့ၣ်အဲၣ်ဒိးပှၤပာ်ဖျါပှၤအတၢ်ယူးယီၣ်အီၤဖဲပှၤထံၣ် အီၤလၢတၢ်ဆါတၢ်ပှ့ၤအလီၢ်, ဒီးအဲၣ်ဒိးပှၤကိးအီၤလၢသရၣ်န့ၣ်လီၤ.
8 မ့မ့ၢ်သုဝဲန့ၣ်, တဘၣ်ပျဲပှၤကိးသုလၢသရၣ်တဂ့ၤ. အဂ့ၢ်ဒ်အံၤ သုမ့ၢ်ဒၣ်ဒီပုၢ်ဝဲၢ်ခဲလၢာ်, ဒီးသုသရၣ်အိၣ်ဒၣ်ထဲတဂၤလီၤ.
9 သုတဘၣ်ကိးပှၤအိၣ်လၢဟီၣ်ခိၣ်ချၢလၢပၢ်နီတဂၤဘၣ်. အဂ့ၢ်ဒ်အံၤ, သုအိၣ်ဒီးပၢ်ထဲတဂၤဧိၤလၢမူခိၣ်လီၤ.
10 သုတဘၣ်ပျဲပှၤကိးသုလၢတၢ်ခိၣ်တၢ်နၢ်တဂ့ၤ. အဂ့ၢ်ဒ်အံၤ, သုခိၣ်သုနၢ်ထဲတဂၤဧိၤမ့ၢ်ခရံာ်လီၤ.
11 ပှၤအဒိၣ်ကတၢၢ်လၢသုကျါန့ၣ်, ကဘၣ်ကဲထီၣ်သုခ့သုပှၤလီၤ.
12 ပှၤတဂၤလၢ်လၢ်လၢအပာ်ဒိၣ်ပာ်ထီလီၤအသးန့ၣ်, ယွၤကဆီၣ်လီၤအီၤလီၤ. ဒီးပှၤတဂၤလၢ်လၢ်လၢအဆီၣ်လီၤအသးန့ၣ်, ယွၤကပာ်ဒိၣ်ပာ်ထီအီၤလီၤ.
(မၢ်ကူး ၁၂:၄၀; လူၤကၣ် ၁၁:၃၉-၄၂, ၄၄, ၅၂; ၂၀:၄၇)
13 ပှၤသ့တၢ်ဘူၣ်တၢ်ဘါအတၢ်သိၣ်တၢ်သီ, ဒီးပှၤဖၤရံၤၡဲသ့ၣ်ဧၢ, သုဘၣ်အဖှီၣ်လီၤ. ပှၤပာ်မၤအသးသ့ၣ်ဧၢ, သုကးတံာ်ဃာ်မူခိၣ်အဘီအမုၢ်အတြဲၤဒ်သိးပှၤဂၤ အသုတလဲၤနုာ်ဘၣ်တဂ့ၤအဂီၢ်လီၤ. သုနီၢ်ကစၢ်ဒၣ်သုဝဲသုတလဲၤနုာ်ဘၣ်ဒီး, သုတပျဲနုာ်စ့ၢ်ကီးပှၤလၢအကျဲးစၢးလဲၤနုာ်ဝဲတဖၣ်ဘၣ်.
14 (ပှၤသ့တၢ်ဘူၣ်တၢ်ဘါအတၢ်သိၣ်တၢ်သီ ဒီးပှၤဖၤရံၤၡဲသ့ၣ်ဧၢ, သုဘၣ်အဖှီၣ်လီၤ. ပှၤပာ်မၤအသးသ့ၣ်ဧၢ, သုဃုသုဘျုးလၢပှၤမုၣ်ကမဲတဖၣ်အဖီခိၣ်, တုၤလၢသုဂုာ်န့ၢ်ဆူၣ်အဝဲသ့ၣ်အဟံၣ်အဃီ, ဒီးသုပာ်မၤသုသးဒ်ပှၤဂ့ၤပှၤဝါအသိး, ခီဖျိတၢ်ဃ့ဘါထုကဖၣ်ဖးထီတၢ်န့ၣ်လီၤ. လၢတၢ်အံၤအဃိ, သုကဘၣ်တၢ်စံၣ်ညီၣ်ဃၣ်သုနးဒၣ်တၢ်တက့ၢ်လီၤ.)
15 ပှၤသ့တၢ်ဘူၣ်တၢ်ဘါအတၢ်သိၣ်တၢ်သီဒီးပှၤဖၤရံၤၡဲသ့ၣ်ဧၢ, သုဘၣ်အဖှီၣ်လီၤ. ပှၤပာ်မၤအသးသ့ၣ်ဧၢ, ဒ်သိးသုကမၤန့ၢ်ဘၣ်ပှၤတဂၤလၢအတမ့ၢ်ဘၣ်ပှၤယူဒၤဖိ ဆူသုတၢ်ဘူၣ်တၢ်ဘါအပူၤအဂီၢ်န့ၣ်, သုဒိးထီၣ်ကဘီဒီးခီပီၣ်လဲၣ်ပီၣ်တြီၤဒီးထံကီၢ်တဖၣ်လီၤ. ဒီးတုၤသုမၤအီၤန့ၢ်လံဒီး, သုဒုးကဲထီၣ်အီၤလၢပှၤတဂၤလၢအကြၢးလီၤဘၣ်ဆူလရာ်အပူၤ ဒိၣ်န့ၢ်ဒံးသုကစၢ်ဒၣ်သုဝဲခံစးန့ၣ်လီၤ.
16 သုဘၣ်အဖှီၣ်လီၤ. ပှၤဆှၢတၢ်လၢအမဲာ်ဘျီၣ်သ့ၣ်ဧၢ, သုစံးလၢပှၤမ့ၢ်ဆိၣ်လီၤပှၤအသးလၢတၢ်လုၢ်ဟံၣ်အမံၤန့ၣ်, အသယၢၢ်တအိၣ်ဘၣ်. မ့မ့ၢ်သုစံးလၢပှၤလၢအဆိၣ်လီၤအသးလၢ တၢ်လုၢ်ဟံၣ်အထူအလွဲအမံၤန့ၣ်, အတၢ်ဆိၣ်လီၤအသးအံၤအိၣ်ဒီး အသယၢၢ်လၢအဟံးဃာ်အီၤလီၤ.
17 ပှၤဟးဂီၤဖိလၢအမဲာ်ဘျီၣ်သ့ၣ်ဧၢ, တၢ်အကါဒိၣ်တက့ၢ်န့ၣ်မ့ၢ်ထူဧါ. မ့တမ့ၢ်ဘၣ်ဒီး, မ့ၢ်တၢ်လုၢ်ဟံၣ်လၢအမၤစီဆှံထူန့ၣ်လဲၣ်.
18 သုစံးသုဝဲလၢ, ပှၤတဂၤမ့ၢ်ဆိၣ်လီၤအသးလၢတၢ်လုၢ်လီၢ်အမံၤန့ၣ်, အတၢ်ဆိၣ်လီၤအသးန့ၣ်အသယၢၢ်တအိၣ်ဘၣ်. ဘၣ်ဆၣ်မ့ၢ်ဆိၣ်လီၤအသးလၢတၢ်လုၢ်လၢအဘၣ်တၢ်ပာ်ထီၣ်အီၤလၢတၢ် လုၢ်လီၢ်အဖီခိၣ်အမံၤဒီး, အတၢ်ဆိၣ်အဝဲန့ၣ်အိၣ်ဒီးအသယၢၢ်လၢကဟံးဃာ်အီၤလီၤ.
19 ပှၤမဲာ်ဘျီၣ်သ့ၣ်ဧၢ, တၢ်အကါဒိၣ်တက့ၢ်န့ၣ်, မ့ၢ်တၢ်လုၢ်ဧါ. မ့တမ့ၢ်ဘၣ်ဒီး တၢ်လုၢ်လီၢ်လၢအမၤစီဆှံထီၣ်တၢ်လုၢ်န့ၣ်လဲၣ်.
20 လၢတၢ်န့ၣ်အဃိ, ပှၤလၢအဆိၣ်လီၤအသးလၢတၢ်လုၢ်လီၢ်အမံၤန့ၣ်, ဆိၣ်လီၤအသးလၢ တၢ်လုၢ်လီၢ်ဒီးတၢ်ခဲလၢာ်လၢအအိၣ်လၢအဖီခိၣ်န့ၣ်လီၤ.
21 ဒီးဖဲအဝဲဆိၣ်လီၤအသးလၢတၢ်လုၢ်ဟံၣ်အမံၤန့ၣ်, အဝဲမၤဝဲလၢတၢ်လုၢ်ဟံၣ်ဒီးလၢကစၢ်ယွၤလၢအအိၣ်ဖဲန့ၣ်အမံၤ လီၤ.
22 ဖဲပှၤတဂၤဆိၣ်လီၤအသးလၢမူခိၣ်အမံၤန့ၣ်, အဝဲဆိၣ်လီၤအသးလၢကစၢ်ယွၤအလီၢ်ပစိာ်, ဒီးလၢယွၤလၢအဆ့ၣ်နီၤလၢအဖီခိၣ်အမံၤန့ၣ်လီၤ.
23 ပှၤသ့တၢ်ဘူၣ်တၢ်ဘါအတၢ်သိၣ်တၢ်သီဒီးပှၤဖၤရံၤၡဲသ့ၣ်ဧၢ, သုဘၣ်အဖှီၣ်လီၤ. ပှၤပာ်မၤအသးသ့ၣ်ဧၢ, သုဟ့ၣ်ယွၤပၢၢ်တုၤလၢ တၢ်နၢမူနၢဆှီဒ်ဟီၣ်ဝီၤသွ့, စးမူဒီးစံယၤသ့ၣ်တဖၣ်အတၢ်ဆံဆဲၣ်ပူတပူဘၣ်ဆၣ်ဒီး, တၢ်လၢအကါဒိၣ်နီၢ်နီၢ်ဘၣ်ဃးဒီးတၢ်သိၣ်တၢ်သီဒ်တၢ်စံၣ်ညီၣ်တီ, တၢ်သူၣ်ကညီၤသးကညီၤဒီးတၢ်သူၣ်တီသးတီတဖၣ်န့ၣ်, သုတကနၣ်ဃုာ်အီၤဘၣ်. တၢ်တဖၣ်အံၤ သုဂ့ၤမၤထွဲ, တအိၣ်ဘၣ်ဒီး တၢ်ကွၢ်ကပာ်ကွံာ်တၢ်အဂၤတဖၣ်ဘၣ်န့ၣ်လီၤ.
24 ပှၤဆှၢတၢ်လၢအမဲာ်ဘျီၣ်သ့ၣ်ဧၢ, သုပှံၢ်ကွံာ်တၢ်ဖိဃၢ်လၢသုထံအီ အပူၤ, ဘၣ်ဆၣ်ဒီးသုယူၢ်လီၤကွံာ်ကီၤလၤအူးဒီဒုညါလီၤ.
25 ပှၤသ့တၢ်ဘူၣ်တၢ်ဘါအတၢ်သိၣ်တၢ်သီဒီးပှၤဖၤရံၤၡဲတဖၣ်ဧၢ, သုဘၣ်အဖှီၣ်လီၤ. ပှၤပာ်မၤအသးသ့ၣ်ဧၢ, သုသ့စီသုလီခီ တဖၣ်အချၢ, ဘၣ်ဆၣ်လီခီတဖၣ်အပူၤတခီအိၣ်ပှဲၤဒီး တၢ်လၢသုမၤန့ၢ်အီၤလၢတၢ်စုဆူၣ်ခီၣ်တကး, ဒီးတၢ်အဲၣ်လီၤသုသးအပူၤန့ၣ်လီၤ.
26 ပှၤဖၤရံၤၡဲဘျီၣ်မဲာ်သ့ၣ်ဧၢ, မၤကဆှီတၢ်အိၣ်လၢလီခီတဖၣ်အပူၤ လၢညါ, ဒ်သိးလီခီတဖၣ်အချၢစ့ၢ်ကီးကကဆှီထီၣ်ဝဲအဂီၢ်န့ၣ်တက့ၢ်.
27 ပှၤသ့တၢ်ဘူၣ်တၢ်ဘါအတၢ်သိၣ်တၢ်သီဒီးပှၤဖၤရံၤၡဲသ့ၣ်ဧၢ, သုဘၣ်အဖှီၣ်လီၤ. ပှၤပာ်မၤအသးသ့ၣ်ဧၢ, သုမၤသုသးလီၤဂာ်ဒီးတၢ်သွၣ်ခိၣ်ပူၤလၢအဘၣ်တၢ်ဖှူဝါထီၣ် အီၤလီၤ. လၢအချၢတခီဖျါဃံလၤ, ဘၣ်ဆၣ်အအိပူၤတခီပှဲၤဒီးပှၤသံအဃံအကွဲဒီးတၢ်အစိၣ် အတၢ်အုၣ်တၢ်ကျၣ်တဖၣ်လီၤ.
28 ဒ်န့ၣ်အသိးလၢအချၢန့ၣ်သုအိၣ်ဖျါဂ့ၤမးလၢပှၤကိးဂၤဒဲး အမဲာ်ညါလီၤ. ဘၣ်ဆၣ်ဒီး, သုသးပူၤတခီပှဲၤဝဲဒီးတၢ်ပာ်မၤအသးဒီး တၢ်ဒဲးဘးတဖၣ်လီၤ.
(လူၤကၣ် ၁၁:၄၇-၅၁)
29 ပှၤသ့တၢ်ဘူၣ်တၢ်ဘါအတၢ်သိၣ်တၢ်သီ ဒီးပှၤဖၤရံၤၡဲသ့ၣ်ဧၢ, သုဘၣ်အဖှီၣ်လီၤ. ပှၤပာ်မၤအသးသ့ၣ်ဧၢ, သုဘှီန့ၢ်တၢ်သွၣ်ခိၣ်ပူၤအဂ့ၤလၢဝံတဖၣ်အဂီၢ်, ဒီးသုကယၢကယဲတၢ်ပနီၣ်လၢတၢ်သူၣ်ထီၣ်အီၤလၢ တၢ်သ့ၣ်နီၣ်ပှၤတီပှၤလိၤတဖၣ်အဂီၢ်,
30 ဒီးသုစံးသုဝဲလၢသုမ့ၢ်အိၣ်မူတ့ၢ်လၢသုဖံသုဖုတဖၣ်အစိၤန့ၣ်, သုတမၤတၢ်လၢအဝဲသ့ၣ်မၤတ့ၢ်ဝဲ, ဒီးမၤသံဘၣ်ဝံတဖၣ်န့ၣ်ဘၣ်လီၤ.
31 မၤသးဒ်န့ၣ်ဒီး, သုအၢၣ်လီၤအီလီၤနီၢ်နီၢ်လၢသုဟဲလီၤစၢၤလၢပှၤလၢအမၤသံဝံ တဖၣ်န့ၣ်လီၤ.
32 မ့မ့ၢ်ဒ်န့ၣ်ဒီး, မၤဝံၤက့ၤတၢ်မၤလၢသုဖံသုဖုတဖၣ်စးထီၣ်မၤတ့ၢ်လံဝဲန့ၣ် တက့ၢ်.
33 ဂုၢ်အၢဒီးဂုၢ်ဘီၣ်အီးအဖိသ့ၣ်ဧၢ, သုမုၢ်လၢ်လၢသုကပူၤဖျဲးထီၣ်လၢ လရာ်အတၢ်စံၣ်ညီၣ်ဃၣ်အပူၤန့ၣ်လၢကျဲဒ်လဲၣ်.
34 လၢတၢ်န့ၣ်အဃိ, ယစံးဘၣ်သုလၢယကဆှၢလီၤန့ၢ်သုလၢဝံ တဖၣ်, ပှၤကူၣ်ဘၣ်ကူၣ်သ့တဖၣ်, ဒီးသရၣ်သိၣ်လိတၢ်တဖၣ်လီၤ. တနီၤန့ၣ်သုကမၤသံအီၤ, ဒီးတနီၤန့ၣ်သုကပျၤထီအီၤလၢထူၣ်စုညါ အလိၤ, ဒီးအဂၤတနီၤန့ၣ်သုကတီၢ်အီၤလၢဘူၣ်ဘျီၣ်လၢ အမ့ၢ်တၢ်ဘါလီၢ်အပူၤဒီးလူၤမၤနးမၤဖှီၣ်အီၤလၢတဝ့ၢ်ဘၣ်တဝ့ၢ် အပူၤလီၤ.
35 လၢတၢ်န့ၣ်အဃိ, တၢ်စံၣ်ညီၣ်ဃၣ်ဘၣ်ဃးဒီးတၢ်မၤသံပှၤလၢအတၢ်ကမၣ်တအိၣ်ဘၣ်, စးထီၣ်လၢတၢ်မၤသံကွံာ်စီၤဟ့းဘ့းလးလၢအတၢ်ကမၣ်တအိၣ်ဘၣ်, တုၤလီၤလၢတၢ်မၤသံကွံာ်စီၤဘရ့ကယၤအဖိခွါစီၤစကၤရယၤလၢ သုမၤသံကွံာ်အီၤလၢတၢ်လီၢ်စီဆှံဒီးတၢ်လုၢ်လီၢ်အဘၢၣ်စၢၤန့ၣ်, ကလီၤတီလၢသုလိၤလီၤ.
36 ယစံးဘၣ်တဲဘၣ်သုတၢ်မ့ၢ်တၢ်တီ, တၢ်စံၣ်ညီၣ်ဃၣ်လၢတၢ်မၤသံပှၤတဖၣ်အံၤခဲလၢာ် အဂီၢ်ကလီၤတီလၢပှၤတစိၤအံၤအလိၤလီၤ.
(လူၤကၣ် ၁၃:၃၄-၃၅)
37 ယရူၤၡလ့ၣ်ဧၢ, ယရူၤၡလ့ၣ်ဧၢ, နမၤသံဝံတဖၣ်ဒီးနကွံာ်သံပှၤစိာ်တၢ်သးခုကစီၣ် လၢကစၢ်ယွၤဆှၢလီၤဆူနအိၣ်တဖၣ်လၢလၢၢ်လီၤ. ဒ်ဆီမိၢ်ပှၢ်တဘ့ၣ်ဟုဃာ်အဖိလၢအဒံးဆ့အဖီလာ်အသိးန့ၣ်, ယအဲၣ်ဒိးဖိးဟုဃာ်နပှၤဝ့ၢ်ဖိခဲလၢာ်တဖှိၣ်ဃီအဘျီတဖၣ် အဘျီ, ဘၣ်ဆၣ်ဒီး နတပျဲယၤဘၣ်.
38 လၢတၢ်န့ၣ်အဃိ, နတၢ်လုၢ်ဟံၣ်န့ၣ်ကဘၣ်တၢ်လဲၤသဒၣ်အီၤဒီး ကအိၣ်သယုၢ်သညိလီၤ.
39 ယစံးဘၣ်တဲဘၣ်သု, စးထီၣ်အခဲအံၤဒီးတုၤလၢအကတီၢ်ဖဲသုကစံး, ‘ပှၤလၢအဟဲလၢ ကစၢ်ယွၤအမံၤတဂၤမ်အဘၣ်တၢ်ဆိၣ်ဂ့ၤတက့ၢ်.’ န့ၣ်သုတထံၣ်လၢၤယၤဘၣ်.”