7
1 တၢ်သိၣ်တၢ်ဘျၢဘၣ်ဃးဒီးတၢ်ဟ့ၣ်ဆၢက့ၤတၢ်လုၢ်တၢ်ပျၢ်တၢ်ကမၣ် လၢအစီဆှံဝဲဒိၣ်မးအဂီၢ်န့ၣ်, မ့ၢ်ဒ်လာ်အံၤအသိးလီၤ.
2 ဆၣ်ဖိကီၢ်ဖိလၢတၢ်လုၢ်အံၤအဂီၢ်န့ၣ်, ကဘၣ်တၢ်မၤသံအီၤလၢတၢ် လုၢ်လီၢ်အကလံၤစိးတကပၤ, ဖဲတၢ်မၤသံဆၣ်ဖိ ကီၢ်ဖိလၢတၢ်လုၢ်မ့ၣ်အူအဂီၢ်အလီၢ်န့ၣ်လီၤ. ဒီးတၢ်အသွံၣ်တဖၣ်န့ၣ်ကဘၣ်တၢ်လူလီၤဝးတရံးတၢ်လုၢ်လီၢ်န့ၣ်လီၤ.
3 ဒီးကဘၣ်လုၢ်ထီၣ်တၢ်အသိခဲလၢာ်လၢအအိၣ်လၢအမဲၢ်ဒီးအပှံာ်အကဖု အလိၤ,
4 အကလ့ၢ်ခံဖျၢၣ်ဒီးအသိအိၣ်လၢအလိၤ, ဒီးအသူၣ်အဂ့ၤက တၢၢ်တခီလီၤ.
5 ဒီးပှၤလုၢ်တၢ်အခိၣ်ကဆိၣ်ကဲၤထီၣ်တၢ်အသိခဲလၢာ်လၢတၢ်လုၢ်လီၢ် အဖီခိၣ်ဆူယွၤအအိၣ်လီၤ. တၢ်အံၤမ့ၢ်တၢ်ဟ့ၣ်ဆၢက့ၤအတၢ်လုၢ်တၢ်ပျၢ်တၢ်ကမၣ်န့ၣ်လီၤ.
6 ဒီးပှၤပိာ်ခွါတဂၤလၢ်လၢ်လၢပှၤလုၢ်တၢ်အခိၣ်အဒူၣ်ဖိထၢဖိ အပူၤန့ၣ်, ကအီၣ်ဘၣ်ဝဲတၢ်လုၢ်အံၤလၢတၢ်လီၢ်စီဆှံအပူၤလီၤ. မ့ၢ်လၢတၢ်လုၢ်အံၤစီဆှံဝဲဒိၣ်မးအဃိန့ၣ်လီၤ.
7 တၢ်သိၣ်တၢ်ဘျၢအိၣ်ဝဲတဘီလၢတၢ်လုၢ်တၢ်ပျၢ်တၢ်ဒဲးဘးဒီးတၢ် ဟ့ၣ်ဆၢက့ၤအတၢ်လုၢ်တၢ်ပျၢ်တၢ်ကမၣ်အဂီၢ်န့ၣ်, မ့ၢ်ဝဲတၢ်အညၣ်န့ၣ်ဘၣ်ဃးဒီးပှၤလုၢ်တၢ်အခိၣ်လၢအလုၢ်ထီၣ်ပာ် ထီၣ်တၢ်န့ၣ်လီၤ.
8 ဆၣ်ဖိကီၢ်ဖိလၢအဘၣ်တၢ်လုၢ်ထီၣ်အီၤဒ်တၢ်လုၢ်မ့ၣ်အူအသိးတဒု အဖံးန့ၣ်, ဘၣ်ဃးဒီးပှၤလုၢ်တၢ်အခိၣ်လၢအလုၢ်ထီၣ်ပာ်ထီၣ်တၢ်န့ၣ်လီၤ.
9 ဒီးတၢ်လုၢ်ဘုဧိၤဟုဧိၤခဲလၢာ်လၢအဘၣ်တၢ်ကုၢ်အီၤလၢဖၣ်ကပူၤ မ့ၢ်ဂ့ၤ, လၢထးကဘျၣ်အဖီခိၣ်မ့ၢ်ဂ့ၤ, လၢသပၢၤဘံၣ်သလၣ်အပူၤမ့ၢ်ဂ့ၤန့ၣ် ဘၣ်ဃးဒီးပှၤလုၢ်တၢ်အခိၣ်လၢအ လုၢ်ထီၣ်တၢ်လုၢ်အံၤဆူကစၢ်ယွၤအအိၣ်န့ၣ်လီၤ.
10 ဘၣ်ဆၣ်ဒီး, တၢ်လုၢ်ဘုဧိၤဟုဧိၤခဲလၢာ်လၢအဘၣ်တၢ်လုၢ်အီၤ, လၢအဘၣ်တၢ်ဃါဃုာ်အီၤလၢသိမ့ၢ်ဂ့ၤ, ထဲအဃ့ထီမ့ၢ်ဂ့ၤ, ဘၣ်ဃးဒီးပှၤလုၢ်တၢ်အခိၣ်လၢအလီၤစၢၤလၢစီၤအၤဟရိၣ်ကိးဂၤ ဒဲးဒီးအဝဲသ့ၣ်ကဘၣ်ဟ့ၣ်နီၤလိာ်အသးပှဲၤသိးသိးလီၤ.
11 တၢ်သိၣ်တၢ်ဘျၢဘၣ်ဃးဒီးတၢ်လုၢ်မၤဃူမၤဖိးတၢ်ဆူယွၤအအိၣ် အဂီၢ်န့ၣ်မ့ၢ်ဒ်လၢလာ်အသိးလီၤ.
12 ပှၤတဂၤမ့ၢ်လုၢ်ထီၣ်တၢ်လုၢ်အံၤဒ်တၢ်စံးဘျုးစံးဖှိၣ်ဆူကစၢ် ယွၤအအိၣ်န့ၣ်, ကဘၣ်လုၢ်ထီၣ်ဆၣ်ဖိကီၢ်ဖိဃုာ်ဒီးကိၣ်တအိၣ်ဘၣ်ဒီးကိၣ်လၢတအိၣ် ဒီးကိၣ်မံၣ်အတၢ်လုၢ်လၢအမ့ၢ်ကိၣ်အလိၣ်လၢတၢ်မၤအီၤလၢကိၣ် ကမူၣ်ဒီးသ့ၣ်စၤယံးအသိဃါဃုာ်အသးမ့ၢ်ဂ့ၤ,ကိၣ်ဘ့ၣ်ဘၣ်လၢတၢ် ဒွါအီၤဒိးသ့ၣ်စၤယံးအသိမ့ၢ်ဂ့ၤ, ကိၣ်ကမူၣ်ဒီးသ့ၣ်စၤယံးအသိးဃါဃုာ်သးအကိၣ်ဘ့ၣ်ဘၣ်ကုၢ်အသးမ့ၢ်ဂ့ၤန့ၣ်လီၤ.
13 အါန့ၢ်အအံၤအဝဲကဘၣ်လုၢ်ထီၣ်စ့ၢ်ကီးကိၣ်အလိာ်တဖၣ်လၢအဘၣ်တၢ် ကုၢ်အီၤတအိၣ်ဒီးကိၣ်မံၣ်န့ၣ်လီၤ.
14 ဒီးကဘၣ်လုၢ်ထီၣ်ဝဲကိၣ်တနီၤလၢကိၣ်ခဲလၢာ်အကျါစုာ်စုာ်ဆူယွၤ အအိၣ်ဒ်တၢ်လုၢ်လီၤဆီတမံၤအသိးလီၤ. ဒီးကိၣ်အံၤန့ၣ်, ဘၣ်ဃးဒီးပှၤလုၢ်တၢ်အခိၣ်လၢအဟံးထီၣ်ဆၣ်ဖိကီၢ်ဖိအသွံၣ်ဒီး လူလီၤဝးတရံးတၢ်လုၢ်လီၢ်န့ၣ်လီၤ.
15 တၢ်ညၣ်လၢအဘၣ်တၢ်လုၢ်ထီၣ်အီၤန့ၣ်ကဘၣ်တၢ်အီၣ်လၢာ်ကွံာ်အီၤလၢ တၢ်လုၢ်ထီၣ်အီၤအနံၤန့ၣ်လီၤ. ဒီးတဘၣ်ပာ်တီၢ်အီၤနီတစဲးတုၤမုၢ်ဆ့ၣ်ထီၣ်တနံၤန့ၣ်ဘၣ်.
16 ဘၣ်ဆၣ်ဒီးပှၤတဂၤမ့ၢ်ဟဲစိာ်အတၢ်လုၢ်မၤဃူမၤဖိးလၢအက မၤလၢပှဲၤအတၢ်အၢၣ်လီၤအီလီၤတမံၤမ့ၢ်ဂ့ၤ, လၢအသးအိၣ်မၤဒၣ်ဝဲအဃိမ့ၢ်ဂ့ၤန့ၣ်, တဘၣ်အီၣ်လၢာ်ဝဲလၢတၢ် လုၢ်ထီၣ်အီၤအနံၤန့ၣ်ဘၣ်. မ့မ့ၢ်တၢ်အိၣ်လီၤတဲာ်န့ၣ်, အီၣ်ကဒီးဝဲလၢမုၢ်ဆ့ၣ်ထီၣ်တနံၤသ့စ့ၢ်ကီးန့ၣ်လီၤ.
17 ဒီးတၢ်ညၣ်တမံၤလၢ်လၢ်လၢအအိၣ်လီၤတဲာ်လၢသၢသီတသီ န့ၣ်ကဘၣ်တၢ်ဆူးကဲၤကွံာ်အီၤန့ၣ်လီၤ.
18 ဒီးတၢ်မ့ၢ်အီၣ်အီၤလၢသၢသီတသီန့ၣ်, ယွၤတတူၢ်လိာ်ပှၤတဂၤန့ၣ်အတၢ်လုၢ်ဘၣ်. တၢ်လုၢ်န့ၣ်တဘၣ်တၢ်ပာ်အီၤဒ်တၢ်လၢအဘျုးအိၣ်အသိးန့ၣ်ဘၣ်. မ့မ့ၢ်ကဘၣ်တၢ်ပာ်အီၤဒ်တၢ်တကဆှီဘၣ်အသိးန့ၣ်လီၤ. ဒီးပှၤတဂၤလၢ်လၢ်လၢအအီၣ်ဘၣ်ဝဲန့ၣ်ကတူၢ်ဘၣ်အတၢ်ဒဲးဘးဒၣ်ဝဲန့ၣ်လီၤ.
19 ဒီးတၢ်ညၣ်လၢအထိးဘၣ်တၢ်တကဆှီဘၣ်တမံၤလၢ်လၢ်န့ၣ်, တဘၣ်တၢ်အီၣ်အီၤဘၣ်. မ့မ့ၢ်ကဘၣ်တၢ်ဆူးကဲၤကွံာ်အီၤန့ၣ်လီၤ.
ဒီးပှၤလၢအကဆှီတဂၤလၢ်လၢ်န့ၣ်, အီၣ်တၢ်ညၣ်န့ၣ်သ့ဝဲလီၤ.
20 ဘၣ်ဆၣ်ဒီးပှၤလၢအတကဆှီဘၣ်တဂၤလၢ်လၢ်မ့ၢ်အီၣ်တၢ်ညၣ်န့ၣ်ဒီး, ကဘၣ်တၢ်ပာ်အီၤဒ်ပှၤလၢအတမ့ၢ်ယွၤအပှၤဂီၢ်မုၢ်အကျါတဂၤန့ၣ်လီၤ.
21 ဒ်န့ၣ်အသိး, ပှၤတဂၤလၢ်လၢ်လၢအထိးဘၣ်တ့ၢ်လံတၢ်တ ကဆှီဘၣ်လၢပှၤကညီမ့ၢ်ဂ့ၤ, ဆၣ်ဖိကီၢ်ဖိမ့ၢ်ဂ့ၤ, တၢ်တကဆှီဘၣ်ထီရီၤတမံၤမံၤ ဒီးအီၣ်တၢ်လုၢ်မၤဃူမၤဖိးအတၢ်ညၣ်န့ၣ်, ကဘၣ်တၢ်ပာ်အီၤဒ်ပှၤ တမ့ၢ်လၢၤဘၣ်ယွၤအပှၤဂီၢ်မုၢ်အကျါတဂၤန့ၣ်လီၤ.
22 ယွၤဟ့ၣ်လီၤတၢ်သိၣ်တၢ်ဘျၢတဖၣ်ဆူစီၤမိၤၡ့ဒ်လၢလာ်အသိး,
23 လၢပှၤအံၣ်စရ့လးဖိတဖၣ်အဂီၢ်န့ၣ်လီၤ. တၢ်အသိလၢဂီၤဖံးမ့ၢ်ဂ့ၤ, သိမ့ၢ်ဂ့ၤ, မဲာ်တဲးလဲးမ့ၢ်ဂ့ၤန့ၣ်, ပှၤတဘၣ်အီၣ်အီၤဘၣ်.
24 တၢ်အသိလၢဆၣ်ဖိကီၢ်ဖိလၢအသံဒၣ်ဝဲမ့ၢ်ဂ့ၤ, လၢအဘၣ်တၢ်အ့ၣ်ဖှီအီၤလၢဆၣ်ဖိကီၢ်ဖိအမံၤမ့ၢ်ဂ့ၤန့ၣ်, တၢ်တဘၣ်အီၣ်အီၤဘၣ်. မ့မ့ၢ်ကဘၣ်တၢ်သူအီၤလၢတၢ်ဂ့ၢ်အဂၤတမံၤမံၤအဂီၢ်လီၤ.
25 ပှၤတဂၤလၢ်လၢ်လၢအအီၣ်ဝဲဆၣ်ဖိကီၢ်ဖိအသိလၢအကဘၣ်တၢ်လုၢ်ထီၣ် အီၤဆူယွၤအအိၣ်န့ၣ်, ကဘၣ်တၢ်ပာ်အီၤဒ်ပှၤလၢအတမ့ၢ်လၢၤယွၤအပှၤဂီၢ်မုၢ်အကျါတဂၤန့ၣ်လီၤ.
26 ဖဲပှၤအံၣ်စရ့လးဖိတဖၣ်အိၣ်ဝဲတပူၤလၢ်လၢ်န့ၣ်အဝဲသ့ၣ်တဘၣ်အီ ထိၣ်ဖိလံာ်ဖိအသွံၣ်မ့ၢ်ဂ့ၤ, ဆၣ်ဖိကီၢ်ဖိအသွံၣ်မ့ၢ်ဂ့ၤဒ်တၢ်အီၣ်အသိးနီတဘျီဘၣ်.
27 ပှၤတဂၤလၢ်လၢ်လၢအလဲၤခီပတာ်တၢ်သိၣ်တၢ်ဘျၢအံၤန့ၣ်, ကဘၣ်တၢ်ပာ်အီၤဒ်ပှၤလၢအတမ့ၢ်လၢၤဘၣ်ယွၤအပှၤဂီၢ်မုၢ်အကျါတဂၤန့ၣ်လီၤ.
28 ဒီးယွၤဟ့ၣ်လီၤတၢ်သိၣ်တၢ်ဘျၢတဖၣ်ဆူစီၤမိၤၡ့ဒ်လၢလာ်အသိး,
29 လၢပှၤအံၣ်စရ့လးဖိတဖၣ်အဂီၢ်န့ၣ်လီၤ. ပှၤတဂၤလၢ်လၢ်မ့ၢ်လုၢ် တၢ်လုၢ်မၤဃူမၤဖိးန့ၣ်, ကဘၣ်ဟဲစိာ်အတၢ်လုၢ်အကျါတနီၤဒ်တၢ်ဟ့ၣ်လီၤဆီဆူယွၤအအိၣ်န့ၣ်လီၤ.
30 ကဘၣ်ဟဲစိာ်ဝဲလၢအစုဒၣ်ဝဲဒ်တၢ်လုၢ်မ့ၣ်အူအသိးဆူယွၤအအိၣ်လီၤ. ကဘၣ်ဟဲစိာ်ဝဲဆၣ်ဖိကီၢ်ဖိအသိဃုာ်ဒီးအသးနါပှၢ်, ဒီးလုၢ်ထီၣ်အီၤဒ်တၢ်ဟ့ၣ်လီၤဆီဆူယွၤအအိၣ်န့ၣ်လီၤ.
31 ဒီးပှၤလုၢ်တၢ်အခိၣ်ကဆူးကဲၤထီၣ်တၢ်အသိလၢတၢ်လုၢ်လီၢ်အဖီခိၣ်လီၤ. မ့မ့ၢ်အသးနါပှၢ်န့ၣ်ကဘၣ်မ့ၢ်ပှၤလုၢ်တၢ်အခိၣ်တဖၣ်အဂီၢ်လီၤ.
32 အကံၣ်ဒုၣ်အထွဲတခီန့ၣ်, ကဘၣ်တၢ်ဟ့ၣ်အီၤဒ်တၢ်ဟ့ၣ်လီၤဆီတမံၤအသိး,
33 ဆူပှၤလုၢ်တၢ်အခိၣ်လၢအလုၢ်ထီၣ်တၢ်သွံၣ်ဒီးတၢ်အသိလၢတၢ်လုၢ် မၤဃူမၤဖိးအဂီၢ်န့ၣ်လီၤ.
34 ဆၣ်ဖိကီၢ်ဖိအသးနါပှၢ်ဒီးအကံၣ်ဒုၣ်အထွဲတခီန့ၣ်, မ့ၢ်တၢ်ဟ့ၣ်လီၤဆီလၢယွၤဟံးန့ၢ်အီၤလၢပှၤအံၣ်စရ့လးဖိတဖၣ် အအိၣ်ဒီးဟ့ၣ်လီၤဝဲဆူပှၤလုၢ်တၢ်အခိၣ်တဖၣ်အအိၣ်န့ၣ်လီၤ. တၢ်အံၤမ့ၢ်တၢ်လၢပှၤအံၣ်စရ့လးဖိတဖၣ်ကဘၣ်ဟ့ၣ်ပှၤလုၢ်တၢ်အခိၣ် တဖၣ်တဘိယူာ်ဃီန့ၣ်လီၤ.
35 တၢ်အံၤမ့ၢ်တၢ်လၢတၢ်လုၢ်မ့ၣ်အူဆူယွၤအအိၣ်အကျါတနီၤ, လၢစီၤအၤဟရိၣ်ဒီးအဖိခွါတဖၣ်အဂီၢ်, စးထီၣ်မုၢ်တနံၤလၢအဝဲ သ့ၣ်ဘၣ်တၢ်ဖှူအီၤဒ်ပှၤလုၢ်တၢ်အခိၣ်တဖၣ်အသိးန့ၣ်လီၤ.
36 မုၢ်တနံၤလၢအဝဲသ့ၣ်တဖၣ်ဘၣ်တၢ်ဖှူအီၤန့ၣ်ယွၤမၤလိာ်ပှၤအံၣ် စရ့လးဖိတဖၣ်လၢကဘၣ်ဟ့ၣ်အဝဲသ့ၣ်တၢ်လၢတၢ်လုၢ်မ့ၣ်အူ အကျါတနီၤအံၤန့ၣ်လီၤ. တၢ်အံၤမ့ၢ်တၢ်သိၣ်တၢ်ဘျၢလၢပှၤအံၣ် စရ့လးဖိတဖၣ်ကဘၣ်စူၢ်အီၤတဘိယူၢ်ဃီန့ၣ်လီၤ.
37 တၢ်တဖၣ်အံၤမ့ၢ်တၢ်သိၣ်တၢ်ဘျၢတဖၣ်လၢတၢ်လုၢ်မ့ၣ်အူတဖၣ်, တၢ်လုၢ်ဘုဧိၤဟုဧိၤတဖၣ်, တၢ်လုၢ်တၢ်ပျၢ်တၢ်ဒဲးဘးတဖၣ်, တၢ်ဟ့ၣ်ဆၢက့ၤတၢ်လုၢ်တၢ်ပျၢ်တၢ်ကမၣ်တဖၣ်, တၢ်လုၢ်တၢ်ဖှူ လၢသိဒီးတၢ်လုၢ်မၤဃူမၤဖိးတဖၣ်အဂီၢ်န့ၣ်လီၤ.
38 ဒီးယွၤဟ့ၣ်လီၤတၢ်မၤလိာ်တဖၣ်အံၤဆူစီၤမိၤၡ့လၢမုၢ်တနံၤ ဖဲအဝဲကတိၤတၢ်ဒီးပှၤအံၣ်စရ့လးဖိတဖၣ်လၢကစၢၢ်စံၤနါအလိၤလၢပှၢ် မုၢ်ကနၢအပူၤ, ဘၣ်ဃးဒီးတၢ်မၤတၢ်လုၢ်မၤဘူၣ်တဖၣ်ဆူ ယွၤအအိၣ်အဂ့ၢ်န့ၣ်လီၤ.