6
1 ယွၤဟ့ၣ်လီၤစီၤမိၤၡ့လၢတၢ်သိၣ်တၢ်ဘျၢတဖၣ်ဒ်လၢလာ်အသိးန့ၣ်လီၤ.
2 ပှၤတဂၤဂၤမ့ၢ်မၤတၢ်ဒဲးဘးထီဒါယွၤခီဖျိတၢ်တဟ့ၣ်က့ၤတၢ် ဟ့ၣ်ကီၤပာ်မ့ၢ်ဂ့ၤ, တၢ်ဂုာ်ဆူၣ်ပျီဆူၣ်မ့ၢ်ဂ့ၤ, တၢ်လီအီၣ်ဝ့ၤ အီၣ်ပှၤလၢအဃၢၤမ့ၢ်ဂ့ၤ,
3 ကတိၤကဘျံးကဘျၣ်ဘၣ်ဃးတၢ်လၢအဟါမၢ်ဒီးဆိၣ်လီၤ အသးလၢအတထံၣ်ဝဲန့ၣ်ကဘၣ်လုၢ်ထီၣ်ပာ်ထီၣ်တၢ်န့ၣ်လီၤ.
4 ဒီးတုၤပှၤတဂၤဂၤမၤတၢ်ဒဲးဘးလၢအဘၣ်ထွဲဒီးတၢ်တမံၤမံၤအံၤန့ၣ်, အဝဲကဘၣ်ဟ့ၣ်က့ၤတၢ်လၢအမၤန့ၢ်ဝဲလၢတၢ်တတီတလိၤအပူၤတမံၤလၢ်လၢ်န့ၣ်လီၤ.
5 မုၢ်တနံၤလၢအဘၣ်တၢ်ထံၣ်န့ၢ်အီၤလၢအတၢ်ကမၣ်အိၣ်ဝဲန့ၣ်, အဝဲကဘၣ်ဟ့ၣ်က့ၤဝဲခဲလၢာ်ဃုာ်ဒီးတၢ်ဟ့ၣ်အါထီၣ်အတၢ်ယဲၢ်ပူ တပူန့ၣ်လီၤ.
6 ဒီးကဘၣ်ဟဲစိာ်ဝဲသိဖါတဒုမ့တမ့ၢ်မဲာ်တဲးလဲးဖါတဒုလၢ မဲၣ်သူမဲၣ်ဂီၤတအိၣ်ဘၣ်ဒ်တၢ်လုၢ်တၢ်ပာ်အလုၢ်အပှ့ၤအိၣ်ဝဲအသိး ဆူပှၤလုၢ်တၢ်အခိၣ်အအိၣ်လၢတၢ်ဟ့ၣ်ဆၢက့ၤအတၢ်လုၢ်တၢ်ပျၢ်တၢ် ကမၣ်အဂီၢ်လီၤ.
7 ဒီးပှၤလုၢ်တၢ်အခိၣ်ကလုၢ်ထီၣ်တၢ်လုၢ်တၢ်ပျၢ်တၢ်ကမၣ်လၢအဂီၢ်ဒီး အတၢ်ကမၣ်ကဘၣ်တၢ်ပျၢ်ကွံာ်အီၤလီၤ.
8-9 ယွၤမၤလိာ်စီၤမိၤၡ့, လၢအကဟ့ၣ်လီၤတၢ်သိၣ်တၢ်ဘျၢဘၣ်ဃးတၢ်လုၢ်မ့ၣ်အူဆူ စီၤအၤဟရိၣ်ဒီးအဖိခွါန့ၣ်လီၤ. တၢ်လုၢ်မ့ၣ်အူန့ၣ်ကဘၣ်တၢ် ဆူးကဲၤအီၤဒီတနံၤညါလၢတၢ်လုၢ်လီၢ်ဖီခိၣ်န့ၣ်လီၤ.
10 ဒီးပှၤလုၢ်တၢ်အခိၣ်ကဘၣ်သိးထီၣ်အဆ့ကၤဖှီဝါဖးထီဒီးဖျီၣ်ခံဖှီဝါ, ဒီးကဘၣ်စိာ်ကွံာ်ဖၣ်ဆါလၢအအိၣ်လၢတၢ်လုၢ်လီၢ်အဖီခိၣ်ဒီးပာ် အီၤဖဲတၢ်လုၢ်လီၢ်အကပၤန့ၣ်လီၤ.
11 အန့ၣ်ဝံၤဒီးကဘၣ်လဲလိာ်က့ၤအဆ့ကၤဒီးလဲၤစိာ်ဖၣ်ဆါတဖၣ်န့ၣ် ဆူတၢ်လီၢ်ကဆှီလၢဒဲအချၢန့ၣ်လီၤ.
12 ဒီးမ့ၣ်အူလၢတၢ်လုၢ်လီၢ်ဖီခိၣ်န့ၣ်ကဘၣ်ကဲၤဝဲဒီးတဘၣ်လီၤ ပံာ်နီတဘျီဘၣ်. ပှၤလုၢ်တၢ်အခိၣ်ကဘၣ်ဆိၣ်ကဲၤသ့ၣ်မုၣ်ကိးဂီၤဒဲးဒီး ကျဲၤလီၤတၢ်လုၢ်မ့ၣ်အူဒီးဆိၣ်ကဲၤထီၣ်တၢ်အသိ လၢတၢ်လုၢ်တၢ်မၤဃူမၤဖိးအဂီၢ်န့ၣ်လီၤ.
13 ဒီးမ့ၣ်အူလၢတၢ်လုၢ်လီၢ်ဖီခိၣ်န့ၣ်ကဘၣ်ကဲၤဝဲဒီးတဘၣ်လီၤပံာ်နီတဘျီဘၣ်.
14 တၢ်သိၣ်တၢ်ဘျၢလီၤဆီဘၣ်ဃးတၢ်လုၢ်ဘုဧိၤဟုဧိၤန့ၣ်, မ့ၢ်ဒ်လၢလာ်အသိးလီၤ. ပှၤလုၢ်တၢ်အခိၣ်လၢအလီၤစၢၤလၢစီၤအၤ ဟရိၣ်န့ၣ်, ကလုၢ်ထီၣ်တၢ်လုၢ်ဘုဧိၤဟုဧိၤဆူ ယွၤအအိၣ်လၢတၢ်လုၢ်လီၢ်အမဲာ်ညါန့ၣ်လီၤ.
15 ဒီးအဝဲကဘၣ်ဟံးန့ၢ်ကိၣ်ကမူၣ်တစှီၤဒီးသိ, ဒီးတၢ်နၢမူအိၣ်လၢအလိၤဒီးဆိၣ်ကဲၤထီၣ်အီၤလၢတၢ်လုၢ်လီၢ် အဖီခိၣ်ဒ်တၢ်ပနီၣ်လၢအဘၣ်တၢ်လုၢ်ထီၣ်တ့ၢ်လံအီၤခဲလၢာ်ဆူယွၤ အသိးန့ၣ်လီၤ. တၢ်လုၢ်အတၢ်နၢမူအံၤမၤမုာ်ယွၤအသးန့ၣ်လီၤ.
16 ဒီးတၢ်အိၣ်လီၤတဲာ်တဖၣ်န့ၣ်ပှၤလုၢ်တၢ်အခိၣ်တဖၣ်ကအီၣ်ဝဲလီၤ. ကဘၣ်ကုၢ်ဝဲကိၣ်လၢတအိၣ်ဘၣ်ဒီးကိၣ်မံၣ်ဒီးကဘၣ်အီၣ်ဝဲလၢတၢ် လီၢ်စီဆှံ, လၢအမ့ၢ်တၢ်ဘူၣ်ထီၣ်ဘါထီၣ်ယွၤအဒဲအဂၢၤပူၤလီၤ.
17 ယွၤဟ့ၣ်လီၤတၢ်အီၣ်အံၤဆူပှၤလုၢ်တၢ်အခိၣ်တဖၣ်အအိၣ်ဒ်တၢ်ဟ့ၣ် နီၤလီၤလၢအဂီၢ်အသိးန့ၣ်လီၤ. တၢ်အံၤစီဆှံဝဲဒ်တၢ်လုၢ်တၢ်ပျၢ်တၢ်ဒဲးဘးဒီးတၢ်ဟ့ၣ်ဆၢက့ၤ အတၢ်လုၢ်တၢ်ပျၢ်တၢ်ကမၣ်အသိးန့ၣ်လီၤ.
18 ကယဲၢ်ပိာ်ခွါလၢအလီၤစၢၤလၢစီၤအၤဟရိၣ်န့ၣ်ကအီၣ်ဘၣ်ဝဲ တၢ်အီၣ်လၢအဘၣ်တၢ်လုၢ်အီၤဆူယွၤအအိၣ်တဘိယူာ်ဃီ ဒ်တၢ်ဟ့ၣ်နီၤလီၤလၢအဂီၢ်အသိးန့ၣ်လီၤ. ဒီးပှၤတဂၤလၢ်လၢ်လၢအထိးဘၣ်တၢ်အီၣ်လၢတၢ်လုၢ်ထီၣ်အီၤန့ၣ်, ကဘၣ်တၢ်မၤဆါအီၤလၢတၢ်အီၣ်အံၤအတၢ်စီဆှံအစိကမီၤန့ၣ်လီၤ.
19 ဒီးယွၤဟ့ၣ်လီၤစီၤမိၤၡ့လၢတၢ်သိၣ်တၢ်ဘျၢလၢလာ်အံၤ,
20 ဘၣ်ဃးဒီးတၢ်ဖှူပှၤလုၢ်တၢ်အခိၣ်လၢအလီၤစၢၤလၢစီၤအၤဟရိၣ် န့ၣ်လီၤ. မုၢ်တနံၤလၢအဒိးဘၣ်တၢ်ဖှူအီၤန့ၣ်, ကဘၣ်ဟဲစိာ်ကိၣ်ကမူၣ်လၢအဂ့ၤတအ့ဖးဆံဆဲၣ်ပူတပူ (ပှဲၤသိးဒီးတနံၤအတၢ် လုၢ်ဘုဧိၤဟုဧိၤ) ဆူယွၤအအိၣ်, တဝာ်န့ၣ်ကဘၣ်လုၢ်ထီၣ်ဝဲလၢမုၢ်ဂီၤဒီးတဝာ်လၢ မုၢ်ဟါန့ၣ်လီၤ.
21 ဒီးကဘၣ်ဃါဃုာ်ကိၣ်ကမူၣ်န့ၣ်လၢသိဒီးကုၢ်အီၤလၢထးကဘျၣ်အဖီခိၣ်, ဝံၤဒီးမၤတဲာ်အီၤတကူာ်တကူာ်ဒီးလုၢ်ထီၣ်အီၤဒ်တၢ်လုၢ်ဘုဧိၤ ဟုဧိၤအတၢ်နၢမူလၢအမၤမုာ်ယွၤအသးအသိးန့ၣ်လီၤ.
22 ပှၤလုၢ်တၢ်အခိၣ်အဒိၣ်ကတၢၢ်တဂၤလၢ်လၢ်လၢအလီၤစၢၤလၢစီၤအၤဟရိၣ်န့ၣ်, ကဘၣ်လုၢ်ထီၣ်တၢ်လုၢ်လီၤ. တၢ်လုၢ်အံၤကဘၣ်တၢ်ဆိၣ်ကဲၤကွံာ်အီၤခဲလၢာ်ဒ်တၢ်လုၢ်တၢ်ပာ်ဆူ ယွၤအအိၣ်အသိးန့ၣ်လီၤ.
23 တၢ်လုၢ်ဘုဧိၤဟုဧိၤလၢပှၤလုၢ်တၢ်အခိၣ်လုၢ်ထီၣ်ဝဲန့ၣ်တၢ်တဘၣ် အီၣ်အီၤဘၣ်. ဒီးကဘၣ်တၢ်ဆူးကဲၤကွံာ်အီၤခဲလၢာ်လီၤ.
24-25 ဒီးယွၤမၤလိာ်စီၤမိၤၡ့, လၢအကဟ့ၣ်လီၤတၢ်သိၣ်တၢ်ဘျၢလၢအဘၣ်ဃးဒီးတၢ်လုၢ်တၢ်ပျၢ် တၢ်ဒဲးဘးဆူစီၤအၤဟရိၣ်ဒီးအဖိခွါတဖၣ်အအိၣ်န့ၣ်လီၤ. ဆၣ်ဖိကီၢ်ဖိလၢတၢ်လုၢ်တၢ်ပျၢ်တၢ်ဒဲးဘးအဂီၢ်န့ၣ်, ကဘၣ်တၢ်မၤသံအီၤဖဲတၢ်လုၢ်လီၢ်အကလံၤစိး, ဖဲဆၣ်ဖိကီၢ်ဖိတဖၣ်ဘၣ်တၢ်မၤသံအီၤအလီၢ်လၢတၢ်လုၢ်မ့ၣ်အူအဂီၢ်န့ၣ်လီၤ. တၢ်အံၤမ့ၢ်တၢ်လုၢ်လၢအစီဆှံဒိၣ်မးန့ၣ်လီၤ.
26 ပှၤလုၢ်တၢ်အခိၣ်လၢအလုၢ်ထီၣ်ဆၣ်ဖိကီၢ်ဖိန့ၣ်, ကဘၣ်အီၣ်ဝဲတၢ်လုၢ်န့ၣ်လၢတၢ်လီၢ်စီဆှံလၢအမ့ၢ်တၢ်ဘူၣ်ထီၣ်ဘါ ထီၣ်ယွၤအဒဲအဂၢၤပူၤန့ၣ်လီၤ.
27 ပှၤတဂၤဂၤမ့တမ့ၢ်တၢ်တမံၤမံၤလၢအထိးဘၣ်ဆၣ်ဖိကီၢ်ဖိအညၣ် န့ၣ်, ကဘၣ်တၢ်မၤဆါအီၤလၢတၢ်လုၢ်အံၤအတၢ်စီ တၢ်ဆှံအစိကမီၤန့ၣ်လီၤ. ဒီးတၢ်ကူတၢ်သိးမ့ၢ်ဘၣ်တၢ်ဖှံ အီၤလၢဆၣ်ဖိကီၢ်ဖိအသွံၣ်န့ၣ်ဒီး, ကဘၣ်တၢ်ဆှုၣ်ကွံာ်အီၤလၢ တၢ်လီၢ်စီဆှံန့ၣ်လီၤ.
28 ဒီးသပၢၤဟီၣ်ခိၣ်လၢတၢ်ချီတၢ်ညၣ်န့ၣ်ကဘၣ်တၢ်မၤသ့ၣ်ဖးကွံာ် အီၤလီၤ. မ့မ့ၢ်သပၢၤတိၢ်န့ၣ်, ကဘၣ်တၢ်ထူးစီဒီးသ့ ကွံာ်အီၤလၢထံန့ၣ်လီၤ.
29 ဒီးပိာ်ခွါတဂၤလၢ်လၢ်လၢပှၤလုၢ်တၢ်အခိၣ်အဒူၣ်ဖိထၢဖိအပူၤ န့ၣ်, ကအီၣ်ဘၣ်ဝဲတၢ်လုၢ်အံၤလီၤ. တၢ်အံၤမ့ၢ်တၢ်စီဆှံဒိၣ်မးန့ၣ်လီၤ.
30 ဘၣ်ဆၣ်ဒီးတၢ်သွံၣ်တနီၤနီၤမ့ၢ်ဘၣ်တၢ်စိာ်နုာ်အီၤဆူတၢ်ဘူၣ် ထီၣ်ဘါထီၣ်ယွၤအဒဲအပူၤဒီးသူအီၤလၢ တၢ်လုၢ်တၢ်ပျၢ်တၢ်ဒဲးဘးအဂီၢ်န့ၣ်, ဆၣ်ဖိကီၢ်ဖိအံၤတၢ်တဘၣ်အီၣ်အီၤဘၣ်ဒီး ကဘၣ်တၢ်ဆူးကဲၤကွံာ်အီၤလီၤ.