8
(ဘူၣ်ဘါ.၂၉:၁ - ၃၇)
1-2 ဒီးယွၤစံးဘၣ်စီၤမိၤၡ့, “ဟဲကိးစီၤအၤဟရိၣ်ဒီးအဖိခွါတဖၣ်ဆူတၢ်ဘူၣ်ထီၣ်ဘါထီၣ် ယွၤအဒဲကျဲစၢၤဖဲယအိၣ်အလီၢ်ဒီးဟဲစိာ်ပှၤလုၢ်တၢ်အခိၣ်အကူအသိး, သိဖှူတၢ်, ဂီၤဖံးဖါဖိလၢတၢ်လုၢ်တၢ်ပျၢ်တၢ်ဒဲးဘးအဂီၢ်, သိဖါခံဒုဒီးကိၣ်တအိၣ်ဘၣ်ဒီးကိၣ်မံၣ်တကုတက့ၢ်.
3 အန့ၣ်ဒီး, မၤလိာ်ပှၤဂီၢ်မုၢ်လၢအကဟဲပာ်ဖှိၣ်အသးဖဲန့ၣ်တက့ၢ်.”
4 ဒီးစီၤမိၤၡ့မၤဝဲဒ်ယွၤမၤလိာ်ဝဲအသိး, ဒီးဖဲပှၤဂီၢ်မုၢ်ဟဲပာ်ဖှိၣ်ထီၣ်အသးလံန့ၣ်,
5 စီၤမိၤၡ့စံးဘၣ်ပှၤဂီၢ်မုၢ်, “တၢ်လၢယကမၤအီၤခဲလၢာ်န့ၣ်မ့ၢ်တၢ်လၢယွၤမၤလိာ်ယၤန့ၣ်လီၤ.”
6 ဒီးစီၤမိၤၡ့ကိးထီၣ်စီၤအၤဟရိၣ်ဒီးအဖိခွါတဖၣ်ဆူတၢ်မဲာ် ညါဒီးမၢအမၤကဆှီအသးလၢထံဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးလီၤ.
7 ဒီးဒုးသိးထီၣ်စီၤအၤဟရိၣ်လၢဆ့ကၤဖိ, ဆ့ကၤဖးထီ, ဒီးယီၢ်တကိးဖးဒိၣ်ဝးတရံးအယီၢ်ဒ့, ဝံၤဒီးပာ်ထီၣ်အ့ဖိးလၢအလိၤဒီးစၢဃံးအီၤလၢယီၢ်တကိးဖိ န့ၣ်လီၤ.
8 ဒီးပာ်သဃိးအိၣ်ဒီးအူရံၣ်ဒီးတူမံၣ်လၢအသးနါပှၢ်အလိၤန့ၣ်လီၤ.
9 ဒီးကုာ်ထီၣ်ခိၣ်ဖျီၣ်လၢအခိၣ်, ဒီးလၢခိၣ်ဖျီၣ်အမဲာ်ညါန့ၣ်ကယၢကယဲဝဲလၢထူကဘျၣ်ဒ်အမ့ၢ်တၢ် ပာ်စီဆှံသးအတၢ်ပနီၣ်ဒ်ယွၤမၤလိာ်စီၤမိၤၡ့အသိးန့ၣ်လီၤ.
10 အန့ၣ်ဒီး, စီၤမိၤၡ့ဟံးန့ၢ်သိဖှူတၢ်ဒီးဖှံဝဲတၢ်ဘူၣ်ထီၣ် ဘါထီၣ်ယွၤအဒဲဒီးတၢ်အိၣ်လၢအပူၤခဲလၢာ်, ဒ်အမ့ၢ်တၢ်ပာ်စီဆှံထီၣ်တၢ်တဖၣ်အံၤဆူယွၤအအိၣ်န့ၣ်လီၤ.
11 ဒီးဟံးန့ၢ်ဝဲသိတနီၤဒီးဖှံတၢ်လုၢ်လီၢ်အဖီခိၣ်ဒီး တၢ်အပီးအလီခဲလၢာ်, ဒီးသရာ်အဖီခိၣ်ဒီးအခီၣ်ထံးနွံစု, ဒ်တၢ်ပာ်စီဆှံထီၣ်တၢ်တဖၣ်အံၤဆူယွၤအအိၣ်န့ၣ်လီၤ.
12 ဒီးပာ်စုစီၤအၤဟရိၣ်ခီဖျိတၢ်လူလီၤသိဖှူတၢ်တနီၤလၢအခိၣ်လိၤန့ၣ်လီၤ.
13 အန့ၣ်ဝံၤဒီးစီၤမိၤၡ့ကိးထီၣ်စီၤအၤဟရိၣ်အဖိခွါတဖၣ်ဆူ တၢ်မဲာ်ညါဒီးဒုးသိးထီၣ်ဝဲလၢဆ့ကၤဖိဒီးယီၢ်တကိးဖးဒိၣ် ဝးတရံးအယီၢ်ဒ့, ဒီးပာ်ထီၣ်ခိၣ်ဖျီၣ်လၢအဝဲသ့ၣ်အခိၣ်လိၤဒ် ယွၤမၤလိာ်ဝဲအသိးန့ၣ်လီၤ.
14 ဒီးစီၤမိၤၡ့ဟံးန့ၢ်ဂီၤဖံးဖါဖိလၢတၢ်လုၢ်တၢ်ပျၢ်တၢ်ဒဲးဘးအဂီၢ်, ဒီးစီၤအၤဟရိၣ်ဒီးအဖိခွါတဖၣ်ပာ်ထီၣ်အစုလၢအခိၣ်လိၤလီၤ.
15 စီၤမိၤၡ့မၤသံဂီၤဖံးဖါဖိန့ၣ်ဒီးဟံးန့ၢ်ဝဲအသွံၣ်တနီၤ, ဒီးပာ်ထီၣ်ဝဲဒီးအစုမုၢ်လၢတၢ်လုၢ်ထီၣ်အနၢၤတဖၣ်အလိၤ လၢတၢ်ပာ်စီဆှံထီၣ်အဂီၢ်န့ၣ်လီၤ. ဒီးတၢ်သွံၣ်လၢအအိၣ်တ့ၢ်န့ၣ်လူလီၤဝဲလၢတၢ်လုၢ်လီၢ်အခီၣ်ထံး ဒ်အမ့ၢ်တၢ်ပာ်စီဆှံထီၣ်ဒီးမၤစီဆှံအီၤအသိးန့ၣ်လီၤ.
16 ဒီးဟံးန့ၢ်ဝဲတၢ်အသိခဲလၢာ်လၢတၢ်အပှံာ်တဖၣ်အလိၤ, အသူၣ်အဂ့ၤကတၢၢ်တခီဒီးအကလ့ၢ်တဖၣ်ဃုာ်ဒီးတၢ်အသိ တဖၣ်လၢအလိၤ, ဒီးဆူးကဲၤထီၣ်ဝဲခဲလၢာ်လၢတၢ်လုၢ်လီၢ်အဖီခိၣ်န့ၣ်လီၤ.
17 မ့မ့ၢ်တၢ်လၢအအိၣ်တ့ၢ်ဒီးဂီၤဖံးဖါဖိလၢအမ့ၢ်အဖံး, အညၣ်, ဒီးအပှံာ်အကဖုတဖၣ်န့ၣ်ဆူးကဲၤထီၣ်ဝဲလၢပှၤသူၣ်ဒဲလီၢ် အချၢဒ်ယွၤမၤလိာ်အီၤအသိးန့ၣ်လီၤ.
18 ဒီးစီၤမိၤၡ့ဟံးန့ၢ်သိဖါတဒုလၢတၢ်လုၢ်မ့ၣ်အူအဂီၢ်, ဒီးစီၤအၤဟရိၣ်အဖိခွါတဖၣ်ပာ်ထီၣ်အစုလၢအခိၣ်လိၤလီၤ.
19 စီၤမိၤၡ့မၤသံသိဖါန့ၣ်ဒီးလူလီၤတၢ်သွံၣ်ဝးတရံးတၢ်လုၢ်လီၢ်န့ၣ်လီၤ.
20 ဒီးအဝဲဒီၣ်တဲာ်သိဖါန့ၣ်တကူာ်တကူာ်ဝံၤဒီးဆူးကဲၤထီၣ်ဝဲအခိၣ်, အကူာ်တဖၣ်ဒီးအသိခဲလၢာ်န့ၣ်လီၤ.
21 ဒီးသ့စီကွံာ်ဝဲအပှံာ်အကဖုဒီးအခီၣ်တဖၣ်ဒီးဆူးကဲၤထီၣ်သိ ဖါဒီဒုလၢတၢ်လုၢ်လီၢ်အဖီခိၣ်ဒ်ယွၤမၤလိာ်ဝဲအသိးန့ၣ်လီၤ. မ့ၣ်အူအံၤအတၢ်နၢမူန့ၣ်မၤမုာ်ယွၤအသးန့ၣ်လီၤ.
22 အန့ၣ်ဝံၤဒီး, စီၤမိၤၡ့ဟံးန့ၢ်သိဖါခံဒုတဒုလၢတၢ်ဒိး ပာ်စုပှၤလုၢ်တၢ်အခိၣ်တဖၣ်အဂီၢ်, ဒီးစီၤအၤဟရိၣ်ဒီးအဖိခွါတဖၣ်ပာ်ထီၣ်အစုလၢအခိၣ်အလိၤလီၤ.
23 ဒီးစီၤမိၤၡ့မၤသံသိဖါန့ၣ်ဒီးဟံးန့ၢ်ဝဲ အသွံၣ်တနီၤဒီးပာ်ထီၣ်ဝဲလၢစီၤအၤဟရိၣ်အနၢ်အထွဲတခီအကုခိၣ်, အစုမုၢ်ကျၢၢ်အထွဲတခီဒီးအခီၣ်မုၢ်ကျၢၢ်အထွဲတခီအဖီခိၣ်န့ၣ်လီၤ.
24 အန့ၣ်ဝံၤဒီးကိးထီၣ်စီၤအၤဟရိၣ်အဖိခွါတဖၣ်ဆူတၢ်မဲာ်ညါ ဒီးပာ်ထီၣ်တၢ်သွံၣ်တနီၤလၢအဝဲသ့ၣ်အနၢ်အထွဲတခီအကုခိၣ်, အစုမုၢ်ကျၢၢ်အထွဲတခီ, ဒီးအခီၣ်မုၢ်ကျၢၢ်အထွဲတခီတဖၣ်အလိၤ န့ၣ်လီၤ. ဒီးစီၤမိၤၡ့လူလီၤတၢ်သွံၣ်လၢအအိၣ်တ့ၢ်ဝးတရံးတၢ်လုၢ်လီၢ်န့ၣ်လီၤ.
25 အဝဲဟံးန့ၢ်တၢ်အသိ, အမဲၢ်ဘီၣ်, ဒီးတၢ်အသိခဲလၢာ်လၢအပှံာ်အကဖုတဖၣ်အလိၤ, အသူၣ်အဂ့ၤကတၢၢ်တခီ, အကလ့ၢ်တဖၣ်ဃုာ်ဒီးအသိအိၣ်လၢအလိၤ, ဒီးအကံၣ်ဒုၣ်အထွဲတခီန့ၣ်လီၤ.
26 ဒီးဟံးန့ၢ်ဝဲကိၣ်တလိၣ်လၢတအိၣ်ဘၣ်ဒီးကိၣ်မံၣ်လၢကုပူၤ, လၢအဘၣ်တၢ်ပာ်စီဆှံအီၤဆူယွၤအအိၣ်, ကိၣ်တလိၣ်လၢအ ဘၣ်တၢ်မၤအီၤလၢသိ, ဒီးကိၣ်အဘ့ၣ်ဘၣ်တဘ့ၣ်, ဒီးပာ်ထီၣ်ဝဲလၢတၢ်အသိဒီးတၢ်အကံၣ်ဒုၣ်အထွဲတခီအဖီခိၣ်န့ၣ်လီၤ.
27 ဒီးပာ်တၢ်အီၣ်တၢ်အီခဲလၢာ်အံၤလၢစီၤအၤဟရိၣ်ဒီးအဖိခွါ တဖၣ်အစုပူၤ, ဒီးအဝဲသ့ၣ်လုၢ်ထီၣ်ဝဲဆူယွၤအအိၣ်ဒ်တၢ်ဟ့ၣ်လီၤဆီ တမံၤအသိးဆူယွၤန့ၣ်လီၤ.
28 အန့ၣ်ဝံၤဒီး, စီၤမိၤၡ့ဟံးက့ၤတၢ်အီၣ်တဖၣ်လၢအဝဲသ့ၣ်အစု ပူၤဒီးဆိၣ်ကဲၤထီၣ်ဝဲလၢတၢ်လုၢ်လီၢ်အဖီခိၣ်ဃုာ်ဒီးတၢ်လုၢ် မ့ၣ်အူဒ်အမ့ၢ်တၢ်ဒိးပာ်စုအတၢ်လုၢ်တၢ်ပာ်တမံၤအသိးန့ၣ်လီၤ. တၢ်လုၢ်အတၢ်နၢမူအံၤမၤမုာ်ယွၤအသးန့ၣ်လီၤ.
29 ဒီးစီၤမိၤၡ့ဟံးန့ၢ်အသးနါပှၢ်ဒီးလုၢ်ထီၣ်အီၤဆူယွၤအအိၣ်ဒ်တၢ်ဟ့ၣ်လီၤဆီတမံၤအသိးန့ၣ်လီၤ. တၢ်အံၤမ့ၢ်လၢတၢ်ဒိးပာ်စုအသိဖါအတၢ်နီၤဖးလၢစီၤမိၤၡ့ဒီးန့ၢ်ဝဲလၢအဂီၢ်န့ၣ်လီၤ. စီၤမိၤၡ့မၤတၢ်ခဲလၢာ်ဒ်ယွၤမၤလိာ်ဝဲအသိးန့ၣ်လီၤ.
30 စီၤမိၤၡ့ဟံးန့ၢ်သိဖှူတၢ်တနီၤဒီးတၢ်သွံၣ်တနီၤလၢအအိၣ် လၢတၢ်လုၢ်လီၢ်ဖီခိၣ်ဒီးဖှံဝဲလၢစီၤအၤဟရိၣ်ဒီးအဖိခွါတဖၣ်အလိၤဒီးအဆ့ကၤအလိၤစ့ၢ်ကီးလီၤ. တၢ်အံၤမ့ၢ်စီၤမိၤၡ့ပာ်စီဆှံ အဝဲသ့ၣ်ဒီးအဆ့ကၤတဖၣ်ဆူယွၤအအိၣ်လီၤ.
31 ဒီးစီၤမိၤၡ့စံးဘၣ်စီၤအၤဟရိၣ်ဒီးအဖိခွါတဖၣ်, “လဲၤစိာ်တၢ်ညၣ်ဆူတၢ်ဘူၣ်ထီၣ်ဘါထီၣ်ယွၤအကျဲစၢၤ, ချီအီၤဒီးအီၣ်ကွံာ်ဖဲန့ၣ်ဒီးကိၣ်လၢအအိၣ်လၢတၢ်ဒိးပာ်စု အတၢ်လုၢ်အကုပူၤ, ဒ်ယွၤမၤလိာ်ဝဲအသိးန့ၣ်တက့ၢ်.
32 တၢ်ညၣ်ဒီးကိၣ်လၢအအိၣ်လီၤတဲာ်န့ၣ်ဆူးကဲၤကွံာ်အီၤတက့ၢ်.
33 ဒီးသုဘၣ်အိၣ်လၢတၢ်ဘူၣ်ထီၣ်ဘါထီၣ်ယွၤအဒဲအကျဲစၢၤန့ၣ်နွံ သီတုၤလၢတၢ်ပာ်စုအလုၢ်အလၢ်ဝံၤဝဲတစုန့ၣ်လီၤ.
34 ယွၤမၤလိာ်ပှၤတၢ်လၢပကဘၣ်မၤဝံၤအီၤတနံၤအံၤဒ်သိးသုတၢ်ဒဲးဘး ကဘၣ်တၢ်စိာ်ကွံာ်အီၤန့ၣ်လီၤ.
35 သုကဘၣ်အိၣ်လၢတၢ်ဘူၣ်ထီၣ်ဘါထီၣ်ယွၤအကျဲစၢၤနွံနံၤနွံနၤ, ဒီးမၤတၢ်လၢယွၤမၤလိာ်ဝဲန့ၣ်လီၤ. သုမ့ၢ်တမၤဘၣ်တၢ်န့ၣ်ဒီးသုကသံလီၤ. တၢ်အံၤမ့ၢ်တၢ်လၢယွၤမၤလိာ်ယၤန့ၣ်လီၤ.”
36 သတးဒီးစီၤအၤဟရိၣ်ဒီးအဖိခွါတဖၣ်မၤတၢ်ခဲလၢာ်ဒ်ယွၤမၤ လိာ်တၢ်ခီဖျိစီၤမိၤၡ့အသိးန့ၣ်လီၤ.