18
1-2 ဒီးယွၤစံးဘၣ်စီၤမိၤၡ့, လၢအကစံးဘၣ်အံၣ်စရ့လးအပှၤဂီၢ်မုၢ်, “ယဲဒၣ်အံၤယမ့ၢ်ယွၤ, သုကစၢ်ယွၤန့ၣ်လီၤ.
3 မၤဒ်အဲၤကူပတူးဖိလၢသုအိၣ် သုဆိးတ့ၢ်လၢအသိးန့ၣ်တဂ့ၤ. ဒီးမၤဒ်ပှၤကနၤဧၣ်ဖိ လၢယဒုးလဲၤနုာ်သုဆူအကီၢ်အပူၤအသိးန့ၣ်တဂ့ၤ.
4 ဒိကနၣ်မၤထွဲယတၢ်သိၣ်တၢ်သီ, ဒီးမၤတၢ်လၢယမၤလိာ်သု န့ၣ်တက့ၢ်. ယဲဒၣ်အံၤယမ့ၢ်ယွၤသုကစၢ်န့ၣ်လီၤ.
5 တိၢ်န့ၢ်ယလုၢ်ယလၢ်တဖၣ်ဒီးယတၢ်သိၣ်တၢ်သီလၢယဟ့ၣ်သု န့ၣ်တက့ၢ်. သုမ့ၢ်မၤဒ်န့ၣ်ဒီးသုကအုၣ်က့ၤခီၣ်က့ၤသုသးသမူန့ၣ်လီၤ. ယဲဒၣ်အံၤယမ့ၢ်ယွၤန့ၣ်လီၤ.”
6 ဒီးယွၤဟ့ၣ်လီၤတၢ်သိၣ်တၢ်ဘျၢတဖၣ်ဒ်လၢလာ်အသိးန့ၣ်လီၤ. မံဃုာ်ဒီးပှၤတဂၤလၢ်လၢ်လၢအမ့ၢ်သုဘူးသုတံၢ်န့ၣ်တဂ့ၤ.
7 မၤမဲာ်ဆှးနပၢ်လၢတၢ်မံဃုာ်ဒီးနမိၢ်တဂ့ၤ. သုတမၤမဲာ်ဆှး နမိၢ်ဒၣ်နဲတဂ့ၤ.
8 မၤမဲာ်ဆှးနပၢ်လၢတၢ်မံဃုာ်ဒီးနပၢ်အမါအဂုၤအဂၤတဂၤလၢ်လၢ်န့ၣ်တဂ့ၤ.
9 နဒီပုၢ်ဝဲၢ်မုၣ်တံၢ်နီၢ်မ့တမ့ၢ်နပၢ်အဖိမုၣ်မ့ တမ့ၢ်နမိၢ်အဖိမုၣ်, နဒီပုၢ်ဝဲၢ်မုၣ်ယၢ်လၢအအိၣ်ဖျဲၣ်ထီၣ်ဒီး နၤတဟံၣ်ဃီမ့ၢ်ဂ့ၤ, လၢအအိၣ်ဖျဲၣ်လၢတၢ်လီၢ်အဂၤမ့ၢ်ဂ့ၤ န့ၣ်သုတမံဃုာ်ဒီးအီၤတဂ့ၤ.
10 သုတမံဃုာ်ဒီးနလံၤမုၣ်တဂ့ၤ. အဂ့ၢ်ဒ်အံၤအဝဲန့ၣ်မ့ၢ်တၢ်မဲာ်ဆှးလၢနဂီၢ်လီၤ.
11 သုတမံဃုာ်ဒီးနပၢ်အမါအဖိမုၣ်, ပှၤလၢနပၢ်ထီၣ်ဖိန့ၣ်တဂ့ၤ. အဝဲမ့ၢ်စ့ၢ်ကီးနဒီပုၢ်ဝဲၢ်မုၣ်န့ၣ်လီၤ.
12 သုတမံဃုာ်ဒီးနပၢ်အဒီပုၢ်ဝဲၢ်မုၣ်န့ၣ်တဂ့ၤ, အဂ့ၢ်ဒ်အံၤ, မ့ၢ်နပၢ်အဘူးအတံၢ်န့ၣ်လီၤ.
13 သုတမံဃုာ်ဒီးနမိၢ်အဒီပုၢ်ဝဲၢ်မုၣ်န့ၣ်တဂ့ၤ. အဂ့ၢ်ဒ်အံၤ, မ့ၢ်နမိၢ်အဘူးအတံၢ်န့ၣ်လီၤ.
14 သုတမံဃုာ်ဒီးနဖါတံၢ်အမါတဂ့ၤ. အဝဲန့ၣ်မ့ၢ်နမုၢ်ဂၢ်လီၤ.
15 သုတမံဃုာ်ဒီးနဒဲၣ်မုၣ်တဂ့ၤ. အဝဲန့ၣ်မ့ၢ်နဖိခွါအမါလီၤ.
16 သုတမံဃုာ်ဒီးနဒီပုၢ်ဝဲၢ်အမါတဂ့ၤ. အဝဲန့ၣ်မ့ၢ်နဒီပုၢ်ဝဲၢ်ခွါအမါလီၤ.
17 သုတမံဃုာ်ဒီးပိာ်မုၣ်လၢနမံဃုာ်ဒီးအီၤတဂၤအဖိမုၣ်မ့ၢ်ဂ့ၤ, အလံၤမုၣ်မ့ၢ်ဂ့ၤန့ၣ်တဂ့ၤ. အဝဲသ့ၣ်တဖၣ်န့ၣ်မ့ၢ်နဘူးနတံၢ်လီၤ. နမ့ၢ်မံဃုာ်ဒီးနမၤတၢ်အၢတၢ်သီန့ၣ်လီၤ.
18 သုတဟံးန့ၢ်နမါအဒီပုၢ်ဝဲၢ်မုၣ်ဒ်နမါအသိးဖဲနမါမူဒံးအဖၢမုၢ်န့ၣ်တဂ့ၤ.
19 သုတမံဃုာ်ဒီးပိာ်မုၣ်တဂၤလၢအသွံၣ်ဟဲန့ၣ်တဂ့ၤ. အဂ့ၢ်ဒ်အံၤ, ဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်အဝဲ တကဆှီဝဲဒၣ်ဘၣ်.
20 သုတမံဃုာ်ဒီးပှၤလၢနဃၢၤအမါန့ၣ်တဂ့ၤ. တၢ်န့ၣ်ကမၤတ ကဆှီနၤဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်လီၤ.
21 ဟ့ၣ်နဖိနီတဂၤလၢတၢ်ကဆူးကဲၤထီၣ်အီၤလၢတၢ်ဘါထီၣ်မိလး အဂီၢ်တဂ့ၤ. အဂ့ၢ်ဒ်အံၤ, ကကဲထီၣ်တၢ်မဲာ်ဆှးလၢကစၢ်ယွၤ အမံၤအဂီၢ်န့ၣ်လီၤ.
22 ပိာ်ခွါတဘၣ်မံဃုာ်ဒီးပိာ်ခွါဒ်အမံဃုာ်ဒီး ပိာ်မုၣ်တဂၤအသိးန့ၣ်ဘၣ်. မ့ၢ်တၢ်သးဘၣ်အၢလၢယွၤလီၤ.
23 ပိာ်ခွါမ့ၢ်ဂ့ၤပိာ်မုၣ်မ့ၢ်ဂ့ၤတဘၣ်မံဃုာ်ဒီးဆၣ်ဖိကီၢ်ဖိဘၣ်. အဝဲန့ၣ်မ့ၢ်တၢ်အၢတၢ်သီလီၤ.
24 မၤဘၣ်အၢသုသးလၢတၢ်တဖၣ်အံၤနီတမံၤတဂ့ၤ. အဂ့ၢ်ဒ်အံၤ, ပှၤကလုာ်တဖၣ်လၢယဟီထီၣ်ကွံာ်လၢသုမဲာ်ညါန့ၣ်မၤဘၣ်အၢအသးလၢ တၢ်တဖၣ်အံၤန့ၣ်လီၤ.
25 အဝဲသ့ၣ်အတၢ်မၤတဖၣ်အံၤမၤဘၣ်အၢထံကီၢ်လီၤ. လၢတၢ်န့ၣ်အဃိယွၤစံၣ်ညီၣ်ထံကီၢ်, ဒီးညိကွံာ်ပှၤအိၣ်လၢအပူၤ န့ၣ်လီၤ.
26 အဝဲသ့ၣ်မၤတၢ်သးဘၣ်အၢတဖၣ်အံၤဒီးမၤဘၣ်အၢထံကီၢ်, မ့မ့ၢ်မၤသုဝဲတဂ့ၤ.
27 သုဝဲသ့ၣ်ခဲလၢာ်ပှၤအံၣ်စရ့လးဖိမ့ၢ်ဂ့ၤပှၤတခီဘီမုၢ်ဖိအိၣ်လၢ သုကျါမ့ၢ်ဂ့ၤကဘၣ်စူၢ်ယွၤအတၢ်သိၣ်တၢ်သီဒီးအတၢ်မၤလိာ် တဖၣ်န့ၣ်လီၤ.
28 အန့ၣ်တစု, ကီၢ်န့ၣ်တဟီထီၣ်ကွံာ်ဘၣ်သုဒ်အညိကွံာ်ပှၤကလုာ်တဖၣ်လၢ အအိၣ်ဆိပာ်စၢၤလၢသုမဲာ်ညါန့ၣ်ဘၣ်.
29 အဂ့ၢ်ဒ်အံၤကယဲၢ်ပှၤတဂၤလၢ်လၢ်လၢအမၤတၢ်သးဘၣ်အၢအံၤ, တဘၣ်တၢ်ပာ်လၢၤအီၤဒ်ပှၤတဂၤလၢယွၤအပှၤဂီၢ်မုၢ်အကျါလၢၤဘၣ်.
30 ဒီးယွၤစံးဝဲဒၣ်, “စူၢ်တၢ်မၤလိာ်လၢယဟ့ၣ်လီၤသုဒီးမၤထွဲပှၤ ကလုာ်လၢအအိၣ်တ့ၢ်ဆိဝဲလၢသုမဲာ်ညါတဖၣ်အလုၢ်အလၢ်တဂ့ၤ. မၤဘၣ်အၢလီၤသုသးလၢတၢ်မၤတဖၣ်အံၤန့ၣ်တဂ့ၤ. ယမ့ၢ်ယွၤ, သုကစၢ်န့ၣ်လီၤ.”