17
1-2 ဒီးယွၤမၤလိာ်စီၤမိၤၡ့, လၢအကဟ့ၣ်လီၤစီၤအၤဟရိၣ်ဒီးအဖိခွါတဖၣ်ဒီး အံၣ်စရ့လးအပှၤဂီၢ်မုၢ်ခဲလၢာ်လၢတၢ်သိၣ်တၢ်သီဒ်လၢလာ်တဖၣ်အံၤအသိးန့ၣ်လီၤ.
3 ပှၤအံၣ်စရ့လးဖိတဂၤလၢ်လၢ်လၢအမၤသံဂီၤဖံးတဒုမ့ၢ်ဂ့ၤ, သိတဒုမ့ၢ်ဂ့ၤ, မဲာ်တဲးလဲးတဒုမ့ၢ်ဂ့ၤဒ်တၢ်လုၢ်မၤ ဘူၣ်ယွၤအသိးဖဲတၢ်လီၢ်တပူၤလၢ်လၢ်လၢအတမ့ၢ်ဘၣ်တၢ်ဘူၣ်တၢ်ဘါ ထီၣ်ယွၤအဒဲအကျဲစၢၤဘၣ်န့ၣ်,
4 လုၢ်သ့ၣ်ခါပတာ်တၢ်သိၣ်တၢ်ဘျၢန့ၣ်လီၤ. အဝဲမ့ၢ်ပှၤတဂၤလၢအဂၢ်လီၤတၢ်သွံၣ်, ဒီးတမ့ၢ်လၢၤဘၣ်ပှၤတဂၤလၢယွၤအပှၤဂီၢ်မုၢ်အကျါလၢၤဘၣ်.
5 တၢ်မၤလိာ်အံၤအခီပညီမ့ၢ်ဝဲဒၣ်အံၣ်စရ့လးအပှၤဂီၢ်မုၢ်ကဘၣ် ဟဲစိာ်ဆၣ်ဖိကီၢ်ဖိတဖၣ်လၢအညီနုၢ်မၤသံဝဲလၢတၢ်ဘူၣ်ထီၣ်ဘါ ထီၣ်ယွၤအဒဲအချၢတပူၤလၢ်လၢ်န့ၣ်ဆူယွၤအအိၣ်လီၤ. ဒီးကဘၣ်ဟဲစိာ်ဝဲဆူပှၤလုၢ်တၢ်အခိၣ်အအိၣ်, လၢတၢ်ဘူၣ်ထီၣ်ဘါထီၣ်ယွၤအဒဲအကျဲစၢၤဒီးမၤသံအီၤဖဲန့ၣ်, ဒီးလုၢ်ထီၣ်အီၤဒ်တၢ်လုၢ်မၤဃူမၤဖိးဆူယွၤအအိၣ်န့ၣ်လီၤ.
6 ပှၤလုၢ်တၢ်အခိၣ်ကဘၣ်ဖှံတၢ်လုၢ်လီၢ်လၢအအိၣ်လၢတၢ်ဘူၣ်ထီၣ်ဘါ ထီၣ်ယွၤအဒဲအကျဲစၢၤန့ၣ်လၢ တၢ်သွံၣ်ဖဲအမဲာ်ညါဒီးဆိၣ်ကဲၤထီၣ်တၢ်နၢမူလၢကမၤမုာ်ယွၤအသးအဂီၢ်န့ၣ်လီၤ.
7 အံၣ်စရ့လးအပှၤဂီၢ်မုၢ်တဘၣ်မ့ၢ်လၢၤပှၤလၢအတတီ ဒီးယွၤခီဖျိတၢ်မၤသံအဆၣ်ဖိကီၢ်ဖိတဖၣ်လၢတၢ်ပျီပူၤဒီး လုၢ်ထီၣ်အီၤဆူတၢ်နါတဖၣ်လၢအလီၤဂာ်ဒီးမဲာ်တဲးလဲးန့ၣ်လၢၤဘၣ်. အံၣ်စရ့လးအပှၤဂီၢ်မုၢ်ကဘၣ်ဒိကနၣ်မၤထွဲတၢ် သိၣ်တၢ်ဘျၢအံၤအစိၤစိၤအဃၣ်ဃၣ်လီၤ.
8 ပှၤအံၣ်စရ့လးဖိတဂၤလၢ်လၢ်မ့ၢ်ဂ့ၤ, ပှၤတခီဘီမုၢ်ဖိအိၣ်လၢအကျါတဂၤလၢ်လၢ်မ့ၢ်ဂ့ၤ, မ့ၢ်လုၢ်တၢ်လုၢ်မ့ၣ်အူမ့ၢ်ဂ့ၤ, တၢ်လုၢ်အဂုၤအဂၤတမံၤမံၤမ့ၢ်ဂ့ၤ,
9 ဒ်တၢ်လုၢ်မၤဘူၣ်ဆူယွၤအအိၣ်, လၢတၢ်လီၢ်အဂၤတပူၤပူၤလၢ အတမ့ၢ်ဘၣ်တၢ်ဘူၣ်ထီၣ်ဘါထီၣ်ယွၤအဒဲအကျဲစၢၤဘၣ်န့ၣ်အဝဲတဘၣ် တၢ်ပာ်လၢၤအီၤဒ်ပှၤတဂၤလၢကစၢ်ယွၤအပှၤဂီၢ်မုၢ်အကျါလၢၤဘၣ်.
10 ဒီးပှၤအံၣ်စရ့လးဖိတဂၤလၢ်လၢ်မ့ၢ်ဂ့ၤ, ပှၤတခီဘီမုၢ်ဖိအိၣ်လၢအကျါတဂၤလၢ်လၢ်မ့ၢ်ဂ့ၤမ့ၢ်အီၣ်ဘၣ်တၢ် ညၣ်လၢအအိၣ်ဒီးတၢ်သွံၣ်န့ၣ်, ယွၤကညိကွံာ်အီၤ, ဒီးတမ့ၢ်လၢၤဘၣ်ပှၤတဂၤလၢယွၤအပှၤဂီၢ်မုၢ် အကျါလၢၤဘၣ်.
11 တၢ်ကိးမံၤဒဲးလၢအမူဝဲန့ၣ်အသးသမူအိၣ်လၢတၢ်သွံၣ်အ ပူၤလီၤ. မၤသးဒ်န့ၣ်ဒီး, ယွၤမၤလိာ်ဝဲလၢတၢ်သွံၣ်ခဲလၢာ်ကဘၣ်တၢ်လူ လီၤအီၤလၢတၢ်လုၢ်လီၢ်အဖီခိၣ်လၢတၢ်တြူာ်ကွံာ်ပှၤဂီၢ်မုၢ်အတၢ် ဒဲဘးတဖၣ်အဂီၢ်န့ၣ်လီၤ.
12 မၤသးဒ်န့ၣ်ဒီး, ယွၤစံးဘၣ်အံၣ်စရ့လးအပှၤဂီၢ်မုၢ် လၢအဝဲသ့ၣ်မ့ၢ်ဂ့ၤ, ပှၤတခီဘီမုၢ်ဖိလၢအကျါမ့ၢ်ဂ့ၤအသု တအီၣ်တၢ်ညၣ်လၢအအိၣ်ဒီးတၢ်သွံၣ်တဂ့ၤန့ၣ်လီၤ.
13 ပှၤအံၣ်စရ့လးဖိတဂၤလၢ်လၢ်မ့ၢ်ဂ့ၤ, ပှၤတခီဘီ မုၢ်ဖိလၢအကျါတဂၤလၢ်လၢ်မ့ၢ်ဂ့ၤ, မ့ၢ်ဖီၣ်န့ၢ်ဆၣ်ဖိကီၢ်ဖိ တဒု, မ့တမ့ၢ်ထိၣ်တဘ့ၣ်လၢအကဆှီဝဲဒ်တၢ်ဘူၣ်တၢ်ဘါ အလုၢ်အလၢ်အိၣ်ဝဲအသိးန့ၣ်ကဘၣ်ဂၢ်လီၤကွံာ်ဝဲအသွံၣ်လၢ ဟီၣ်ခိၣ်လိၤဒီးမၤဘၢအီၤလၢဟီၣ်ခိၣ်အကမူၣ်န့ၣ်လီၤ.
14 တၢ်ကိးမံၤဒဲးလၢအမူဝဲန့ၣ်အသးသမူအိၣ်လၢတၢ်သွံၣ်အပူၤလီၤ. မၤသးဒ်န့ၣ်ဒီးယွၤမၤလိာ်အံၣ်စရ့လးအပှၤဂီၢ်မုၢ်လၢအသုတအီၣ် တၢ်ညၣ်လၢအအိၣ်ဒီးတၢ်သွံၣ်တဂ့ၤန့ၣ်လီၤ. ပှၤတဂၤလၢ်လၢ်လၢအအီၣ်ဝဲန့ၣ်တမ့ၢ်လၢၤဘၣ်ပှၤတဂၤလၢယွၤအပှၤဂီၢ်မုၢ်အကျါလၢၤဘၣ်.
15 ပှၤတဂၤလၢ်လၢ်လၢအမ့ၢ်ပှၤအံၣ်စရ့လးဖိမ့ၢ်ဂ့ၤ, ပှၤတခီဘီမုၢ်ဖိမ့ၢ်ဂ့ၤ, မ့ၢ်အီၣ်ဆၣ်ဖိကီၢ်ဖိလၢအသံဒၣ်ဝဲ, မ့တမ့ၢ်လၢအဘၣ်တၢ်အ့ၣ်သံအီၤလၢတၢ်မံၤလာ်အ ညၣ်န့ၣ်ကဘၣ်ဆှုၣ်အကူအသိးတဖၣ်, ဒီးလုၢ်ထံလီၤ. ဒီးကကဲထီၣ်ဝဲတၢ်တကဆှီတုၤမုၢ်ဟါလီၤန့ၣ်လီၤ.
16 မ့တမ့ၢ်ဒ်န့ၣ်ဘၣ်ဒီးကဘၣ်တူၢ်တၢ်ဒ်အတၢ်ဒဲးဘးအိၣ်ဝဲအသိးန့ၣ်လီၤ.