19
1-2 ဒီးယွၤစံးဘၣ်စီၤမိၤၡ့, လၢကစံးဘၣ်ပှၤအံၣ်စရ့လးအပှၤဂီၢ်မုၢ်, “ကဲထီၣ်ပှၤစီဆှံတက့ၢ်. အဂ့ၢ်ဒ်အံၤယၤ, ယွၤသုကစၢ်ယွၤ, န့ၣ်စီဆှံဝဲလီၤ.
3 ပှၤကိးဂၤဒဲးကဘၣ်ယူးယီၣ်အမိၢ်ဒီးအပၢ်လီၤ. ဒီးကဘၣ်ပာ်စီဆှံမုၢ်အိၣ်ဘှံးအနံၤဒ်ယမၤလိာ်တ့ၢ်အသိးန့ၣ်လီၤ. ယမ့ၢ်ယွၤ, သုကစၢ်ယွၤန့ၣ်လီၤ.
4 ဃၣ်ကွံာ်သုသးလၢယၤဒီးဘါထီၣ်တၢ်ဂီၤတၢ်ဖီၣ်တဂ့ၤ. တ့တၢ်ဂီၤလၢတိၢ်ဘီဃါဃုာ်ဒီးထူ, စ့ဒီးဘါထီၣ်အီၤတဂ့ၤ. ယမ့ၢ်ယွၤ, သုကစၢ်ယွၤန့ၣ်လီၤ.
5 ဒီးဖဲသုမၤသံဆၣ်ဖိကီၢ်ဖိတဒုလၢတၢ်လုၢ်မၤဃူမၤဖိး အဂီၢ်န့ၣ်တိၢ်န့ၢ်တၢ်သိၣ်တၢ်သီလၢယဟ့ၣ်လီၤသု, ဒီးယကတူၢ်လိာ်သုတၢ်လုၢ်မၤဘူၣ်န့ၣ်လီၤ.
6 ဆၣ်ဖိကီၢ်ဖိလၢအဘၣ်တၢ်လုၢ်ထီၣ်အီၤ, အဖံးအညၣ်န့ၣ်ကဘၣ်တၢ်အီၣ်အီၤတနံၤဃီလၢအဘၣ် တၢ်မၤသံအီၤအနံၤမ့ၢ်ဂ့ၤလၢမုၢ်ဆ့ၣ်ထီၣ်တနံၤမ့ၢ်ဂ့ၤန့ၣ်လီၤ. တၢ်ဖံးတၢ်ညၣ်လၢအအိၣ်လီၤတဲာ်လၢသၢသီတသီန့ၣ်ကဘၣ်တၢ်ဆူးကဲၤ ထီၣ်ကွံာ်အီၤန့ၣ်လီၤ.
7 အဂ့ၢ်ဒ်အံၤ, မ့ၢ်တၢ်တကဆှီဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိး, ဒီးပှၤတဂၤလၢ်လၢ်မ့ၢ်အီၣ်ဘၣ်အီၤန့ၣ်, ယတတူၢ်လိာ်အတၢ်လုၢ်မၤဘူၣ်န့ၣ်ဘၣ်.
8 ပှၤတဂၤလၢ်လၢ်လၢအအီၣ်တၢ်ဖံးတၢ်ညၣ်လၢအအိၣ်လီၤတဲာ်န့ၣ်မ့ၢ် အမၤဘၣ်အၢတၢ်လုၢ်စီဆှံလၢအဘၣ်တၢ်လုၢ်ထီၣ်အီၤဆူယွၤအအိၣ်, ဒီးအဝဲဒၣ်တဘၣ်တၢ်ပာ်လၢၤအီၤဒ် ပှၤတဂၤလၢယပှၤဂီၢ်မုၢ်အကျါလၢၤဘၣ်န့ၣ်လီၤ.
9 ဖဲသုကူးက့ၤသုဘုလၢစံာ် ပျီပူၤန့ၣ်သုတဘၣ်ကူးတုၤလၢအသနၢၣ်န့ၣ်ဘၣ်. ဒီးသုတဘၣ်က့ၤကဒါက့ၤဆူသုလီၢ်ခံဒီးကူးက့ၤဘုစဲၤလၢ အအိၣ်လီၤတဲာ်တဖၣ်န့ၣ်ဘၣ်.
10 ဒဲးစပံးသၣ်လၢသုစပံးလီၢ်တုၤအလၢာ်တဂ့ၤ. ထၢထီၣ်စပံးသၣ်လၢအလီၤဆှုတဖၣ်လၢသုစပံးလီၢ်ပူၤတုၤ အလၢာ်တဂ့ၤ. သုကဘၣ်ပာ်တီၢ်အီၤလၢပှၤဖှီၣ်ဖိယာ်ဖိဒီးပှၤတ ခီဘီမုၢ်ဖိတဖၣ်အဂီၢ်န့ၣ်လီၤ. ယမ့ၢ်ယွၤ, သုကစၢ်ယွၤန့ၣ်လီၤ.
11 သုတဟုၣ်တၢ်တဂ့ၤ, ဒီးသုတလီတၢ်တဂ့ၤ, ဒီးသုတကတိၤကဘျံးကဘျၣ်လိာ်သုသးတဂ့ၤ.
12 တၢ်အၢၣ်လီၤအီလီၤလၢသုမၤလၢပှဲၤအီၤတန့ၢ်န့ၣ်အၢၣ်လီၤအီ လီၤလၢယမံၤအပူၤတဂ့ၤ. တၢ်န့ၣ်မ့ၢ်တၢ်မၤမဲာ်ဆှးယမံၤန့ၣ်လီၤ. ယဲဒၣ်အံၤယမ့ၢ်ယွၤ, သုကစၢ်ယွၤန့ၣ်လီၤ.
13 သုတအီၣ်ကဘျံးကဘျၣ်ပှၤလၢသုဃၢၤအတၢ်တဂ့ၤ, ဂုာ်န့ၢ်အတၢ်တဂ့ၤ. ပှၤလၢအဒိးလဲအသးတဂၤအဘူးအလဲ န့ၣ်ဒုးအိၣ်ဒီးနၤသီတနၤကျၢၤတုၤမုၢ်ဆ့ၣ်ထီၣ်တဂ့ၤ.
14 ဆိၣ်ျအၢပှၤနၢ်တအၢတဂ့ၤ, ပာ်လီၤတၢ်လီၤဃံၤအလီၢ်လၢပှၤမဲာ်ဘျီၣ်အမဲာ်ညါတဂ့ၤ. ဒီးသုကဘၣ်ပျံၤသုကစၢ်ယွၤလီၤ. ယဲဒၣ်အံၤယမ့ၢ်ယွၤ, သုကစၢ်ယွၤန့ၣ်လီၤ.
15 လၢတၢ်စံၣ်ညီၣ်အပူၤန့ၣ်မၤတၢ်တတီတလိၤတဂ့ၤ. ကွၢ်မဲာ်ပှၤဖှီၣ်ဖိဒီးပျံၤပှၤထူးပှၤတီၤတဂ့ၤ. သုဘၣ်စံၣ်ညီၣ်ပှၤလၢသုဃၢၤတီတီလိၤလိၤလီၤ.
16 သုတရၤလီၤတၢ်ကတိၤကဘျံးကဘျၣ်ဘၣ်ဃးပှၤတဂၤလၢ်လၢ်အဂ့ၢ်တဂ့ၤ. ဖဲပှၤတဂၤဂၤဘၣ်ကွၢ်ဆၢၣ်မဲာ်ဒီးကွီၢ်လၢအ သးသမူကပူၤဖျဲးအဂီၢ်န့ၣ်သုတၢ်အုၣ်သးကဘၣ်မ့ၢ်တၢ်မၤစၢၤလၢအဂီၢ်န့ၣ်လီၤ. ယဲဒၣ်အံၤယမ့ၢ်ယွၤလီၤ.
17 သးဟ့သုဒီပုၢ်ဝဲၢ်လၢသုသးကံၢ်ပူၤတဂ့ၤ. မ့မ့ၢ်မၤလိၤမၤဘၣ်က့ၤသုသးဒီးအီၤဒ်သိးသုသု တမၤဘၣ်တၢ်ဒဲးဘးလၢအဃိတဂ့ၤန့ၣ်တက့ၢ်.
18 မၤဆၢတၢ်အၢလၢပှၤနီတဂၤတဂ့ၤ. ဒီးသးဟ့စ့ၢ်ကီးအီၤတဂ့ၤ. မ့မ့ၢ်အဲၣ်ပှၤလၢသုဃၢၤဒ်သု အဲၣ်လီၤသုသးဒၣ်ဝဲအသိးန့ၣ်တက့ၢ်. ယဲဒၣ်အံၤယမ့ၢ်ယွၤလီၤ.
19 တိၢ်န့ၢ်ယတၢ်မၤလိာ်တဖၣ်တက့ၢ်. ဒုးဒၢထီၣ်သုဆၣ်ဖိကီၢ်ဖိလၢအကလုာ်လီၤဆီလိာ်အသးန့ၣ်တဂ့ၤ. ဖှံလီၤတၢ်ချံခံမံၤလၢအလီၤဆီလိာ်အသးလၢသုစံာ်ပူၤတဂ့ၤ. ဒီးကူထီၣ်သိးထီၣ်တၢ်ကူတၢ်သိးလၢအဘၣ်တၢ်မၤအီၤလၢလုၣ်လီၤ ဆီလိာ်အသးခံမံၤန့ၣ်တဂ့ၤ.
20 ဒီးပှၤမ့ၢ်မံဃုာ်ဒီးကုၢ်ပိာ်မုၣ်တဂၤလၢအဘၣ်တၢ်အဲၣ်တီပာ်အီၤ ဒီးပှၤအဂၤတဂၤ, ဒီးတဘၣ်တၢ်ပှ့ၤက့ၤဒံးဘၣ်အီၤမ့ၢ်ဂ့ၤ, တၢ်တဟ့ၣ်ဒံးဘၣ်အတၢ်ထူၣ်ဖျဲးမ့ၢ်ဂ့ၤဒီး, အဝဲသ့ၣ်ကဘၣ်တၢ်စံၣ်ညီၣ်အီၤလီၤ. တဘၣ်တၢ်မၤသံအီၤဘၣ်. အဂ့ၢ်ဒ်အံၤ, မ့ၢ်ဒံးဒၣ်ကုၢ်ပိာ်မုၣ်တဂၤအဃိလီၤ.
21 ဒီးပိာ်ခွါန့ၣ်ကဘၣ်ဟဲစိာ်သိဖါတဒုဆူတၢ် ဘူၣ်ထီၣ်ဘါထီၣ်ယွၤအဒဲအကျဲစၢၤလၢတၢ်လုၢ်တၢ်ကမၣ်အဂီၢ်န့ၣ်လီၤ.
22 ဒီးပှၤလုၢ်တၢ်အခိၣ်ကဘၣ်မၤတၢ်ဘူၣ်တၢ်ဘါအလုၢ် အလၢ်ဘၣ်ဃးတၢ်မၤကဆှီထီၣ်လၢကသုးကွံာ်ပိာ်ခွါန့ၣ်အတၢ်ဒဲးဘး, ဒီးကစၢ်ယွၤကပျၢ်အတၢ်ကမၣ်န့ၣ်လီၤ.
23 ဒီးတုၤသုလဲၤနုာ်လီၤဆူကီၢ်ကနၤဧၣ်အပူၤ, ဒီးသူၣ်လီၤတၢ်သူတၢ်သၣ်အမုၢ်တဖၣ်န့ၣ်သုဘၣ်ပာ်သ့ၣ်သၣ်တဖၣ် အံၤလၢအခီၣ်ထံးသၢနံၣ်န့ၣ်ဒ်တၢ်တကဆှီဘၣ်ဝဲန့ၣ်လီၤ. ဒီးအကတီၢ်ဝဲန့ၣ်န့ၣ်သုတဘၣ်အီၣ်အီၤဘၣ်.
24 ဒီးလၢလွံၢ်နံၣ်တနံၣ်န့ၣ်ကယဲၢ်တၢ်သၣ်ခဲလၢာ်ကကဲထီၣ်တၢ်စီ ဆှံလၢတၢ်စံးထီၣ်ပတြၢၤယွၤအဂီၢ်လီၤ.
25 ဒီးယဲၢ်နံၣ်တနံၣ်န့ၣ်သုကအီၣ်အသၣ်ဒ်သိးအကမၤအါထီၣ်တၢ်လၢသု ဂီၢ်လီၤ. ယဲဒၣ်အံၤယမ့ၢ်ယွၤ, သုကစၢ်ယွၤန့ၣ်လီၤ.
26 အီၣ်တၢ်ဖံးတၢ်ညၣ်လၢအအိၣ်ဒီးအသွံၣ်အဖၢမုၢ်န့ၣ်တဂ့ၤ. ဒီးမၤမုၣ်ကီၤလံၢ်အတၢ်မၤတဂ့ၤ.
27 သုတတံာ်ကဝီၤသုခိၣ်သူအထိးနါတဂ့ၤမ့တမ့ၢ်သု တတံာ်တဲာ်သုခၣ်ဆူၣ်အထိးနါတဂ့ၤ.
28 သုတဂဲာ်သုညၣ်လၢပှၤသံအဃိတဂ့ၤ. ဒီးသုတဆဲးတၢ်ပနီၣ်လၢသုလိၤတဂ့ၤ. ယဲဒၣ်အံၤယမ့ၢ်ယွၤလီၤ.
29 သုတမၤဟးဂီၤသုဖိမုၣ်တဖၣ်လၢကကဲထီၣ်ဃဲသဲမုၣ်လၢတၢ်လုၢ်ဟံၣ်အပူၤတဂ့ၤ. သုမ့ၢ်မၤဒ်န့ၣ်ဒီးသုကကဲထီၣ်ပှၤဃၣ်အသးဆူကစၢ်အဂၤတဖၣ်အအိၣ် ဒီးကီၢ်အံၤကပှဲၤဒီးတၢ်အၢတၢ်သီန့ၣ်လီၤ.
30 သုဘၣ်တိၢ်န့ၢ်မုၢ်အိၣ်ဘှံးအနံၤ, ဒီးယူးယီၣ်တၢ်ဘူၣ်ထီၣ်ဘါထီၣ်ယွၤအလီၢ်န့ၣ်လီၤ. ယဲဒၣ်အံၤယမ့ၢ်ယွၤလီၤ.
31 လဲၤဆူပှၤမၤန့ၢ်ပှၤသံအကလၤအအိၣ်ဒီးဟံးန့ၢ်အတၢ်ကူၣ်လိာ်တဂ့ၤ. နမ့ၢ်မၤဒ်န့ၣ်ဒီးနကကဲထီၣ်တၢ်တကဆှီဘၣ်န့ၣ်လီၤ. ယဲဒၣ်အံၤယမ့ၢ်ယွၤ, သုကစၢ်ယွၤန့ၣ်လီၤ.
32 ယူးယီၣ်ပှၤသူၣ်က့သးပှၢ်တဖၣ်ဒီးမၤလၤကပီၤအီၤတက့ၢ်. ပျံၤယၤတက့ၢ်. ယဲဒၣ်အံၤယမ့ၢ်ယွၤလီၤ.
33 မၤနးမၤဖှီၣ်ပှၤတခီဘီမုၢ်ဖိတဖၣ်လၢအအိၣ်လၢသုကီၢ်ပူၤန့ၣ်တဂ့ၤ.
34 မၤအီၤဒ်သုမၤဘၣ်ပှၤအံၣ်စရ့လးဖိကဒဲကဒဲအသိးန့ၣ်တက့ၢ်. ဒီးအဲၣ်အီၤဒ်သုအဲၣ်လီၤသုသးအသိးန့ၣ်တက့ၢ်. သ့ၣ်နီၣ်ထီၣ်က့ၤလၢတဘျီသုမ့ၢ်ပှၤတခီဘီမုၢ် ဖိလၢကီၢ်အဲၤကူပတူးအပူၤန့ၣ်တက့ၢ်. ယဲဒၣ်အံၤယမ့ၢ်ယွၤ, သုကစၢ်ယွၤန့ၣ်လီၤ.
35 သုတမၤတၢ်တတီတလိၤလၢပှၤနီတဂၤလၢနီၣ်ထိၣ်မ့ၢ်ဂ့ၤ, စီၤပီၢ်မ့ၢ်ဂ့ၤ, ဒီးနီၣ်ဃီၣ်တၢ်မ့ၢ်ဂ့ၤန့ၣ်တဂ့ၤ.
36 သုဘၣ်အိၣ်ဒီးနီၣ်ထိၣ်အတီအလိၤ, စီၤပီၢ်အတီအလိၤဒီးနီၣ်ဃီၣ်အတီအလိၤလီၤ. ယဲဒၣ်အံၤယမ့ၢ်ယွၤ, သုကစၢ်ယွၤလၢအထုးထီၣ်သုလၢကီၢ်အဲၤကူပတူးအပူၤန့ၣ်လီၤ.
37 ဒီးသုဘၣ်တိၢ်န့ၢ်ယတၢ်မၤလိာ်ဒီးယတၢ်သိၣ်တၢ်သီတဖၣ်န့ၣ်လီၤ. ယဲဒၣ်အံၤယမ့ၢ်ယွၤန့ၣ်လီၤ.”