16
1 ယွၤကတိၤတ့ၢ်တၢ်ဒီးစီၤမိၤၡ့, ဖဲစီၤအၤဟရိၣ်အဖိခွါခံဂၤ လၢအလုၢ်ထီၣ်တၢ်လုၢ်မ့ၣ်အူလၢအတကဆှီဘၣ်သံဝံၤအလီၢ်ခံန့ၣ်လီၤ.
2 ဒီးယွၤစံးဘၣ်စီၤမိၤၡ့, “စံးဘၣ်နဒီပုၢ်ဝဲၢ်စီၤအၤဟရိၣ်လၢအသုတလဲၤနုာ်ဆူတၢ်လီၢ် စီဆှံကတၢၢ်လၢယၣ်ဘျးသဒၢသးအချၢကိးဆၢကိးကတီၢ်ဒဲးတဂ့ၤ. အဂ့ၢ်ဒ်အံၤ, တၢ်လီၢ်ဝဲန့ၣ်မ့ၢ်ယလီၣ်ဖျါထီၣ်ယသးခီဖျိတၢ်အၢၣ်, လၢတၢ်အၢၣ်လီၤအီလီၤအတလါစီဆှံအဖီခိၣ်န့ၣ်လီၤ. မ့ၢ်တဒိကနၣ်ဝဲဘၣ်ဒီးကဘၣ်တၢ်မၤသံအီၤန့ၣ်လီၤ.
3 လဲၤနုာ်ဝဲကသ့ဒၣ်ဖဲလၢအဟဲစိာ်ဂီၤဖံးဖိတဒုလၢတၢ်လုၢ်, တၢ်ပျၢ်တၢ်ဒဲးဘးအဂီၢ်ဒီးသိဖါတဒုလၢတၢ်လုၢ်မ့ၣ်အူအ ဂီၢ်ဝံၤအလီၢ်ခံန့ၣ်လီၤ.”
4 အန့ၣ်ဝံၤဒီးယွၤဟ့ၣ်လီၤတၢ်သိၣ်တၢ်ဘျၢဒ်အဖီလာ်အသိးန့ၣ်လီၤ. တချုးလၢစီၤအၤဟရိၣ်နုာ်ဆူတၢ်လီၢ်စီဆှံကတၢၢ်ဒံးဘၣ်န့ၣ်, ကဘၣ်လုၢ်ထံဒီးသိးထီၣ်ပှၤလုၢ်တၢ်အခိၣ်အကူအသိးတဖၣ်လၢအမ့ၢ်ဆ့ဖှီဝါစီဆှံ, ယီၢ်တကိးဖှီဝါဒီးခိၣ်သလုးဖှီဝါန့ၣ်လီၤ.
5 ဒီးအံၣ်စရ့လးအပှၤဂီၢ်မုၢ်ကဘၣ်ဟ့ၣ်စီၤအၤဟရိၣ်လၢမဲာ်တဲးလဲးဖါခံဒုလၢတၢ်လုၢ်တၢ် ဒဲးဘးအဂီၢ်ဒီးသိဖါတဒုလၢတၢ်လုၢ်မ့ၣ်အူအဂီၢ်န့ၣ်လီၤ.
6 ဒီးကလုၢ်ထီၣ်ဝဲဂီၤဖံးဖါတဒုလၢအနီၢ်ကစၢ်ဒၣ်ဝဲအတၢ် ဒဲးဘးကဘၣ်တၢ်ပျၢ်အီၤအဂီၢ်ဒီးလၢအဟံၣ်ဖိဃီဖိတဖၣ်အတၢ်ဒဲး ဘးကဘၣ်တၢ်ပျၢ်အီၤအဂီၢ်လီၤ.
7 အန့ၣ်ဝံၤဒီးကဘၣ်လဲၤစိာ်မဲာ်တဲးလဲးဖါခံဒုန့ၣ်ဆူတၢ်ဘူၣ်ထီၣ်ဘါထီၣ်ယွၤအဒဲအကျဲစၢၤန့ၣ်လီၤ.
8 ဒီးဖဲန့ၣ်ကဘၣ်ဖီၣ်ဝဲတၢ်ဖးလၢမဲာ်တဲးလဲးဖါခံဒုအဂီၢ်ခီဖျိလၢၢ်ခံဖျၢၣ်, တဖျၢၣ်န့ၣ်လၢယွၤအဂီၢ်, ဒီးအတဖျၢၣ်န့ၣ်လၢတၢ်နါဧ့စ့ၤစ့လးအဂီၢ်လီၤ.
9 ဒီးမဲာ်တဲးလဲးတဒုလၢတၢ်ဖးလီၤဘၣ်လၢယွၤအဂီၢ်န့ၣ်စီၤအၤဟရိၣ်ဘၣ်လုၢ်ထီၣ်အီၤလၢတၢ်လုၢ်တၢ်ပျၢ်တၢ်ဒဲးဘးအဂီၢ်န့ၣ်လီၤ.
10 မ့မ့ၢ်မဲာ်တဲးလဲးတဒုလၢတၢ်ဖးလီၤဘၣ်လၢတၢ်နါ ဧ့စ့ၤစ့လးအဂီၢ်န့ၣ်ကဘၣ်တၢ်ပာ်အိၣ်မူဒံးအီၤလၢအမဲာ်ညါ ဒီးပျဲလီၤအီၤဆူပှၢ်မုၢ်ကနၢလၢပှၤဂီၢ်မုၢ်အတၢ်ဒဲးဘးကဘၣ် တၢ်ပျၢ်အီၤအဂီၢ်န့ၣ်လီၤ.
11 ဒီးစီၤအၤဟရိၣ်လုၢ်ထီၣ်ဂီၤဖံးဖါတဒုဒ်တၢ်လုၢ်တၢ် ပျၢ်တၢ်ဒဲးဘးအသိးလၢအဂီၢ်ဒၣ်ဝဲဒီးအပှၤဟံၣ်ဖိအဂီၢ်န့ၣ်လီၤ.
12 ဒီးကဘၣ်ဟံးန့ၢ်ဝဲသပၢၤမ့ၣ်အူလၢအ ပှဲၤဒီးမ့ၣ်အူကဖးလၢတၢ်လုၢ်လီၢ်ဒီးတၢ်နၢမူကမူၣ်ခံစှီၤ ဒီးဟဲစိာ်အီၤဆူတၢ်လီၢ်စီဆှံကတၢၢ်န့ၣ်လီၤ.
13 ဒီးဘၣ်ပာ်တၢ်နၢမူလၢမ့ၣ်အူဖီခိၣ်လၢယွၤအမဲာ်ညါ, ဒ်သိးတၢ်နၢမူအမ့ၣ်အူလုၣ်ကကျၢၢ်ဘၢတၢ်အၢၣ်လီၤအီလီၤတလါ အဖီခိၣ်ဒ်သိးအသုတထံၣ်အီၤဒီးသံတဂ့ၤန့ၣ်လီၤ.
14 ဒီးကဘၣ်ဟံးန့ၢ်ဂီၤဖံးဖါန့ၣ်အသွံၣ်တနီၤ, ဒီးဖှံအီၤလၢတၢ်အၢၣ်လီၤအီလီၤတလါအခိၣ်ကၢၢ်အမဲာ်ညါလၢအစုမုၢ် န့ၣ်လီၤ. အန့ၣ်ဝံၤဒီးဖှံအီၤတနီၤလၢတၢ်အၢၣ်လီၤအီလီၤတလါအမဲာ်ညါ နွံစုန့ၣ်တက့ၢ်.
15 အန့ၣ်ဝံၤဒီးကဘၣ်မၤသံဝဲမဲာ်တဲးလဲးတဒုလၢတၢ်လုၢ်တၢ်ပျၢ်တၢ်ဒဲးဘး လၢပှၤဂီၢ်မုၢ်အဂီၢ်န့ၣ်လီၤ. ဒီးကဘၣ်လဲၤစိာ်နုာ်တၢ်သွံၣ်တနီၤဆူတၢ်လီၢ်စီဆှံကတၢၢ်ဒီး ဖှံအီၤလၢတၢ်အၢၣ်လီၤအီလီၤတလါအခိၣ်ကၢၢ်အလိၤတနီၤဒီးလၢ တၢ်အၢၣ်လီၤအီလီၤတလါအမဲာ်ညါဒ်အမၤတ့ၢ်ဝဲလၢဂီၤဖံးဖါတဒု အသွံၣ်အသိးန့ၣ်လီၤ.
16 အအံၤမ့ၢ်တၢ်မၤတၢ်ဘူၣ်တၢ်ဘါအလုၢ်အလၢ်ဘၣ်ဃးတၢ်မၤကဆှီ ထီၣ်တၢ်လီၢ်စီဆှံကတၢၢ်လၢအံၣ်စရ့လးအပှၤ ဂီၢ်မုၢ်အတၢ်တကဆှီဒီးအတၢ်ဒဲးဘးတဖၣ်အဂီၢ်န့ၣ်လီၤ. ဒီးကဘၣ်မၤဝဲလၢတၢ်ဘူၣ်ထီၣ်ဘါထီၣ်ယွၤအဒဲအဂီၢ်မ့ၢ်လၢအအိၣ် လၢပှၤဂီၢ်မုၢ်အတၢ်သူၣ်ဒဲအလီၢ်ခၢၣ်သးလၢအမ့ၢ်တၢ်တကဆှီ ဘၣ်ဒ်တၢ်ဘူၣ်တၢ်ဘါအလုၢ်အလၢ်အသိးအဃိန့ၣ်လီၤ.
17 စးထီၣ်လၢစီၤအၤဟရိၣ်နုာ်လီၤဆူတၢ်လီၢ်စီဆှံကတၢၢ်လၢက မၤတၢ်ဘူၣ်တၢ်ဘါအလုၢ်အလၢ်ဘၣ်ဃးတၢ်ကမၤကဆှီ တၢ်တုၤအဟဲက့ၤထီၣ်တစုန့ၣ်ပှၤတဘၣ်အိၣ်လၢတၢ်ဘူၣ်ထီၣ်ဘါထီၣ် အဒဲပူၤန့ၣ်နီတဂၤဘၣ်. ဒီးဖဲအမၤဝဲတၢ်ဘူၣ်တၢ်ဘါအလုၢ်အလၢ်လၢအဂီၢ်, အပှၤဟံၣ်ဖိအဂီၢ်ဒီးကမျၢၢ်ခဲလၢာ်အဂီၢ်ဝံၤဝဲန့ၣ်,
18 ကဘၣ်လဲၤထီၣ်ဝဲဆူတၢ်လုၢ်လီၢ်လၢကလုၢ်တၢ်လုၢ်မ့ၣ်အူဒီးမၤ ကဆှီထီၣ်အီၤအဂီၢ်န့ၣ်လီၤ. ဒီးကဘၣ်ဟဲစိာ်ဝဲဂီၤ ဖံးဖါအသွံၣ်တနီၤဒီးမဲာ်တဲးလဲးအသွံၣ်တနီၤ ဒီးပာ်ထီၣ်အီၤခဲလၢာ်လၢတၢ်လုၢ်လီၢ်အနၢၤတဖၣ်အဖီခိၣ်န့ၣ်လီၤ.
19 ဒီးကဘၣ်ဖှံတၢ်သွံၣ်နွံစုန့ၣ်လၢတၢ်လုၢ်လီၢ်အဖီခိၣ်န့ၣ်လီၤ. အအံၤမ့ၢ်အဝဲအတၢ်မၤကဆှီထီၣ်တၢ်လုၢ်လီၢ်လၢအံၣ်စရ့လးအပှၤ ဂီၢ်မုၢ်အတၢ်ဒဲးဘးတဖၣ်အဂီၢ်ဒီးမၤစီဆှံအီၤန့ၣ်လီၤ.
20 ဖဲစီၤအၤဟရိၣ်မၤဝံၤတၢ်ဘူၣ်တၢ်ဘါအလုၢ်အလၢ်ဘၣ်ဃးတၢ်မၤကဆှီ တၢ်လီၢ်စီဆှံကတၢၢ်, တၢ်ဘူၣ်ထီၣ်ဘါထီၣ်ယွၤအဒဲခဲလၢာ်, ဒီးတၢ်လုၢ်လီၢ်, တစုန့ၣ်, အဝဲကဘၣ်လုၢ်ထီၣ်မဲာ်တဲးလဲးမူဒံးတဒုဆူယွၤ အအိၣ်လၢအဘၣ်တၢ်ဃုထၢအီၤလၢတၢ်နါဧ့စ့ၤစ့လးအဂီၢ်န့ၣ်လီၤ.
21 ဒီးကဘၣ်ပာ်ထီၣ်အစုခံခီလိာ်လၢမဲာ်တဲးလဲးန့ၣ်အခိၣ် လိၤဒီးတဲလီၤကျဲၤလီၤအံၣ်စရ့လးအပှၤဂီၢ်မုၢ်အတၢ်အၢတၢ်သီတဖၣ်ခဲလၢာ်, အတၢ်ဒဲးဘးတဖၣ်, ဒီးကီၢ်အံၣ်စရ့လးအပှၤဂီၢ်မုၢ်အတၢ်ပူထီၣ် တဖၣ်ဒ်သိးအပာ်ထီၣ်အီၤလၢမဲာ်တဲးလဲးတဒုန့ၣ်အခိၣ်လိၤန့ၣ် လီၤ. အန့ၣ်ဝံၤဒီးမဲာ်တဲးလဲးတဒုန့ၣ်ကဘၣ်တၢ်ပျဲကွံာ်အီၤဆူပှၢ် မုၢ်ကနၢခီဖျိပှၤလၢဘၣ်တၢ်ဃုထၢအီၤလၢတၢ်မၤအံၤအဂီၢ်န့ၣ်လီၤ.
22 မဲာ်တဲးလဲးတဒုန့ၣ်ကစိာ်ကွံာ်အဝဲသ့ၣ်အတၢ်ဒဲးဘးခဲလၢာ်ဆူပှၢ်မုၢ်ကနၢန့ၣ်လီၤ.
23 အန့ၣ်ဝံၤဒီးစီၤအၤဟရိၣ်ကလဲၤနုာ်လီၤဆူတၢ်ဘူၣ်ထီၣ်ဘါထီၣ်ယွၤအဒဲပူၤ, ဒီးဘ့ၣ်လီၤကွံာ်ပှၤလုၢ်တၢ်အခိၣ်အကူအသိးတဖၣ်လၢအသိးထီၣ်ဝဲ တချုးလၢအနုာ်လီၤဆူတၢ်လီၢ်စီဆှံကတၢၢ်အပူၤ, ဒီးပာ်တ့ၢ်အီၤဖဲန့ၣ်လီၤ.
24 ဒီးကဘၣ်လုၢ်ထံလၢတၢ်အလီၢ်စီဆှံအပူၤဒီးသိးထီၣ်က့ၤအကူ အသိးဒၣ်ဝဲတဖၣ်လီၤ. အန့ၣ်ဝံၤဒီးကဘၣ်ဟးထီၣ်ဝဲဒီးလုၢ်ထီၣ်တၢ်လုၢ်မ့ၣ်အူလၢက တြူာ်ကွံာ်အနီၢ်ကစၢ်ဒၣ်ဝဲအတၢ်ဒဲးဘးဒီးပှၤဂီၢ်မုၢ်အတၢ်ဒဲးဘးတဖၣ်အဂီၢ်န့ၣ်လီၤ.
25 ကဘၣ်ဆူးကဲၤထီၣ်ဆၣ်ဖိကီၢ်ဖိအသိလၢတၢ်လုၢ်လီၢ်အဖီခိၣ်လၢတၢ် လုၢ်တၢ်ပျၢ်တၢ်ဒဲးဘးအဂီၢ်န့ၣ်လီၤ.
26 ဒီးပှၤတဂၤလၢအပျဲကွံာ်မဲာ်တဲးလဲးဆူပှၢ်မုၢ်ကနၢလၢတၢ်နါဧ့စ့ၤစ့လး အဂီၢ်န့ၣ်, ကဘၣ်ဆှုၣ်အကူအသိးတဖၣ်ဒီးလုၢ်ထံတချုးလၢ အဟဲက့ၤနုာ်လီၤက့ၤဆူပှၤဂီၢ်မုၢ်သူၣ်ဒဲအလီၢ်န့ၣ်လီၤ.
27 ဂီၤဖံးဖါဒီးမဲာ်တဲးလဲးလၢအဘၣ်တၢ်သူအီၤလၢတၢ်လုၢ်တၢ်ပျၢ် တၢ်ဒဲးဘးအဂီၢ်အသွံၣ်လၢအဘၣ်တၢ်လဲၤစိာ်နုာ်အီၤဆူ တၢ်လီၢ်စီဆှံကတၢၢ်အပူၤလၢကစိာ်ကွံာ်တၢ်ဒဲးဘးအဂီၢ်န့ၣ်ကဘၣ် တၢ်စိာ်ကွံာ်အီၤဆူဒဲအချၢဒီးဆူးကဲၤထီၣ်ကွံာ်အီၤန့ၣ်လီၤ. အဖံး, အညၣ်ဒီးအအ့ၣ်ခဲလၢာ်ကဘၣ်တၢ်ဆူးကဲၤကွံာ်အီၤန့ၣ်လီၤ.
28 ဒီးပှၤတဂၤလၢအဆူးကဲၤတၢ်န့ၣ်ကဘၣ်ဆှုၣ်အကူအသိးဒီးလုၢ်ထံ, တချုးလၢအက့ၤနုာ်ကဒါက့ၤဆူပှၤဂီၢ်မုၢ်သူၣ်ဒဲအလီၢ်န့ၣ်လီၤ.
29 တၢ်သိၣ်တၢ်ဘျၢလၢလာ်တဖၣ်အံၤန့ၣ်ကဘၣ်တၢ်ဒိကနၣ်မၤထွဲအီၤ အစိၤစိၤအဃၣ်ဃၣ်န့ၣ်လီၤ. လၢနွံလါတလါထီၣ်အသီ တဆံအနံၤန့ၣ်ပှၤအံၣ်စရ့လးဖိဒီးပှၤတခီဘီမုၢ် ဖိလၢအအိၣ်ဝဲဆိးဝဲလၢပှၤအံၣ်စရ့လးဖိအကျါခဲလၢာ်ကဘၣ်ဒုၣ်တၢ်အီၣ်ဒီး တဘၣ်ဖံးတၢ်မၤတၢ်နီတမံၤဘၣ်.
30 ဒီးလၢမုၢ်နံၤအဝဲန့ၣ်န့ၣ်, တၢ်ဘူၣ်တၢ်ဘါအလုၢ်အလၢ်ဘၣ်ဃးဘူၣ်တၢ်ပျၢ်တၢ်ဒဲးဘး ကဘၣ်တၢ်မၤအီၤလၢတၢ်မၤကဆှီထီၣ်က့ၤအဝဲသ့ၣ်လၢအတၢ်ဒဲးဘးခဲလၢာ်အဂီၢ်ဒ်သိးအဝဲသ့ၣ်ကကဆှီထီၣ်က့ၤဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်လီၤ.
31 ဒီးမုၢ်နံၤအဝဲန့ၣ်န့ၣ်ကဘၣ်မ့ၢ်မုၢ်နံၤစီဆှံလၢအဝဲသ့ၣ်ကဘၣ်ဒုၣ်တၢ်အီၣ်တၢ်အီ, ဒီးတဘၣ်ဖံးတၢ်မၤတၢ်နီတမံၤဘၣ်န့ၣ်လီၤ. ဒီးတၢ်သိၣ်တၢ်ဘျၢတဖၣ်အံၤကဘၣ်တၢ်ဒိကနၣ်မၤထွဲအီၤအစိၤစိၤအဃၣ်ဃၣ်န့ၣ်လီၤ.
32 ပှၤလုၢ်တၢ်အခိၣ်လၢအဘၣ်တၢ်ဖှူအီၤဒီးပာ်စီဆှံအီၤလၢကဟံးထီၣ်မူဒါလၢအပၢ်အလီၢ်န့ၣ်, ကဘၣ်မၤတၢ်ဘူၣ်တၢ်ဘါအလုၢ်အလၢ်ဘၣ်ဃးတၢ်မၤကဆှီထီၣ်တၢ်န့ၣ်လီၤ. ကဘၣ်ကူထီၣ်သိးထီၣ်ဝဲပှၤလုၢ်တၢ်အခိၣ်အကူအသိးတဖၣ်,
33 ဒီးမၤတၢ်ဘူၣ်တၢ်ဘါအလုၢ်အလၢ်ဘၣ်ဃးတၢ်မၤကဆှီ ထီၣ်တၢ်လီၢ်စီဆှံကတၢၢ်, တၢ်ဘူၣ်ထီၣ်ဘါထီၣ်ယွၤအဒဲ ကျဲစၢၤခဲလၢာ်, တၢ်လုၢ်လီၢ်, ပှၤလုၢ်တၢ်အခိၣ်တဖၣ်, ဒီးပှၤဂီၢ်မုၢ်ခဲလၢာ်န့ၣ်လီၤ.
34 ဒီးတၢ်သိၣ်တၢ်ဘျၢတဖၣ်အံၤကဘၣ်တၢ်ဒိကနၣ်မၤထွဲအီၤအစိၤစိၤအဃၣ်ဃၣ်န့ၣ်လီၤ. တၢ်ဘူၣ်တၢ်ဘါအလုၢ်အလၢ်အံၤကဘၣ်တၢ်မၤအီၤတနံၣ်တဘျီ, လၢတၢ်ကမၤကဆှီထီၣ်က့ၤအံၣ်စရ့လးအပှၤဂီၢ်မုၢ်လၢအတၢ်ဒဲးဘး ခဲလၢာ်အဂီၢ်န့ၣ်လီၤ. ဒီးမၤဝဲဒ်ယွၤမၤလိာ်တ့ၢ်အီၤအသိးန့ၣ်လီၤ.