15
1 ဒီးယွၤဟ့ၣ်လီၤစီၤမိၤၡ့ဒီးစီၤအၤဟရိၣ်လၢတၢ်သိၣ်တၢ်ဘျၢ တဖၣ်ဒ်လၢလာ်အသိး,
2 လၢပှၤအံၣ်စရ့လးဖိတဖၣ်အဂီၢ်န့ၣ်လီၤ. တုၤပှၤတဂၤဂၤအိၣ်ဒီး တၢ်ယွၤလီၤလၢအဆံၣ်ကျိၤ,
3 ဒီးအတၢ်ယွၤလီၤန့ၣ်မ့ၢ်ဆိတ့ၢ်အသးဒၣ်ဝဲမ့ၢ်ဂ့ၤ, တဆိတ့ၢ်ဘၣ်မ့ၢ်ဂ့ၤန့ၣ်အဝဲမ့ၢ်ပှၤတကဆှီဘၣ်ဒ်တၢ်ဘူၣ်တၢ်ဘါ အလုၢ်အလၢ်အိၣ်ဝဲအသိးန့ၣ်လီၤ.
4 ဒီးကယဲၢ်လီၢ်မံလၢအဆ့ၣ်နီၤဝဲလၢအလိၤမ့ၢ်ဂ့ၤ, မံလီၤဝဲလၢအလိၤမ့ၢ်ဂ့ၤန့ၣ်မ့ၢ်တၢ်တကဆှီဘၣ်လီၤ.
5 ကယဲၢ်ပှၤလၢအထိးဘၣ်အလီၢ်မံမ့ၢ်ဂ့ၤ,
6 ဆ့ၣ်နီၤဘၣ်ဝဲလၢအဝဲဆ့ၣ်နီၤတ့ၢ်အလီၢ်မ့ၢ်ဂ့ၤန့ၣ်ကဘၣ်ဆှုၣ်အ တၢ်ကူတၢ်သိးဒီးလုၢ်ထံ, ဒီးကဲထီၣ်ပှၤတကဆှီဘၣ်တုၤမုၢ်ဟါ လီၤန့ၣ်လီၤ.
7 ကယဲၢ်ပှၤလၢအထိးဘၣ်ပှၤလၢအိၣ်ဒီးတၢ်ယွၤလီၤန့ၣ်ကဘၣ်ဆှုၣ်အကူ အသိးဒီးလုၢ်ထံ, ဒီးကဲထီၣ်ပှၤတကဆှီဘၣ်တုၤမုၢ်ဟါလီၤန့ၣ်လီၤ.
8 ဒီးပှၤလၢအအိၣ်ဒီးတၢ်ယွၤလီၤန့ၣ်မ့ၢ်ထူးပှဲာ်ဘၣ်ပှၤလၢအက ဆှီတဂၤန့ၣ်ဒီးပှၤအဝဲန့ၣ်ကဘၣ်ဆှုၣ်အကူအသိးဒီးလုၢ် ထံဒီးကဲထီၣ်ပှၤတကဆှီဘၣ်တုၤမုၢ်ဟါလီၤန့ၣ်လီၤ.
9 ကယဲၢ်ကသ့ၣ်အဂီၤကၢ်လၢပှၤအိၣ်ဒီးတၢ်ယွၤလီၤဆ့ၣ်နီၤဝဲန့ၣ် ကကဲထီၣ်တၢ်တကဆှီဘၣ်န့ၣ်လီၤ.
10 ကယဲၢ်ပှၤလၢအထိးဘၣ်တၢ်တမံၤမံၤလၢပှၤတဂၤန့ၣ်ဆ့ၣ်နီၤတ့ၢ်ဝဲ အလီၢ်န့ၣ်ဒီး,ကဲထီၣ်ပှၤတကဆှီဘၣ်တုၤမုၢ်ဟါလီၤန့ၣ်လီၤ. ဒီးကယဲၢ်ပှၤလၢအစိာ်တၢ်တမံၤမံၤလၢပှၤတဂၤ န့ၣ်ဆ့ၣ်နီၤတ့ၢ်ဝဲအလီၢ်န့ၣ်, ကဘၣ်ဆှုၣ်အကူအသိးဒီးလုၢ်ထံ, ဒီးကဲထီၣ်ပှၤတကဆှီဘၣ်တုၤမုၢ်ဟါလီၤန့ၣ်လီၤ.
11 ဒီးကယဲၢ်ပှၤလၢအဘၣ်တၢ်ထိးအီၤလၢပှၤလၢအအိၣ်ဒီးတၢ်ယွၤလီၤ လၢအတသ့ဘၣ်ဒံးအစုန့ၣ်, ကဘၣ်ဆှုၣ်အကူအသိးဒီးလုၢ်ထံ, ဒီးကဲထီၣ်ပှၤတကဆှီတုၤမုၢ်ဟါလီၤန့ၣ်လီၤ.
12 ဒီးကယဲၢ်သပၢၤဟီၣ်ခိၣ်လၢပှၤလၢအအိၣ်ဒီးတၢ်ယွၤလီၤတဂၤထိး ဘၣ်ဝဲန့ၣ်ကဘၣ်တၢ်မၤသ့ၣ်ဖးကွံာ်အီၤန့ၣ်လီၤ. ဒီးကယဲၢ်လီခီသ့ၣ်လၢအဘၣ်တၢ်ထိးဘၣ်လၢအီၤန့ၣ် ကဘၣ်တၢ်သ့စီကွံာ်အီၤန့ၣ်လီၤ.
13 ဒီးတုၤပှၤတဂၤလၢအအိၣ်ဒီးတၢ်ယွၤလီၤဘျါက့ၤလံဝဲန့ၣ်, ကဘၣ်အိၣ်ခိးဝဲနွံသီ, ကဘၣ်ဆှုၣ် အကူအသိးဒီးလုၢ်ထံလၢထံမူအပူၤန့ၣ်လီၤ. ဒီးကကဆှီထီၣ်ဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်လီၤ.
14 ဒီးလၢဃိးသီတသီန့ၣ်ကဘၣ်ဟံးန့ၢ်ထိၣ်ကးက့ၣ်ဖိ ခံဘ့ၣ်မ့တမ့ၢ်ထိၣ်လွံၢ်ဘုၣ်ခံဘ့ၣ်ဒီးဟဲစိာ်ဝဲဆူတၢ်ဘူၣ် ထီၣ်ဘါထီၣ်ယွၤအဒဲအကျဲစၢၤဒီးဟ့ၣ်လီၤဝဲဆူပှၤလုၢ်တၢ်အခိၣ်အအိၣ်န့ၣ်လီၤ.
15 ပှၤလုၢ်တၢ်အခိၣ်ကဘၣ်လုၢ်ထီၣ်ထိၣ်တဘ့ၣ်ဒ်တၢ်လုၢ်တၢ်ပျၢ်တၢ်ဒဲး ဘးအသိးဒီးအဂၤတဘ့ၣ်ဒ်တၢ်လုၢ်မၤဘူၣ်လၢမ့ၣ်အူ အသိးအဂီၢ်န့ၣ်လီၤ. ဒီးအအံၤမ့ၢ်ပှၤလုၢ်တၢ်အခိၣ်ကမၤတၢ်မၤက ဆှီထီၣ်က့ၤတၢ်လၢပှၤတဂၤန့ၣ်အဂီၢ်ဒ်တၢ်ဘူၣ်တၢ်ဘါအလုၢ်အလၢ် အိၣ်ဝဲအသိးန့ၣ်လီၤ.
16 ဒီးပိာ်ခွါအချံဘၣ်ဃးဒီးအမံဃုာ်တၢ်န့ၣ်မ့ၢ်ဟးထီၣ်လၢအပူၤဒီး, ကဘၣ်လုၢ်ထံဒီဂၤညါလီၤ. ဒီးကဲထီၣ်ပှၤတကဆှီတုၤမုၢ်ဟါလီၤန့ၣ်လီၤ.
17 ဒီးပိာ်ခွါအချံဘၣ်ဃးဒီးအမံဃုာ်တၢ်န့ၣ်မ့ၢ်လီၤဘၣ်လၢ ကယဲၢ်တၢ်လၢအဘၣ်တၢ်မၤအီၤလၢတၢ်ကံးညၣ်မ့ၢ်ဂ့ၤ, တၢ်ဖံးမ့ၢ်ဂ့ၤအလိၤန့ၣ်, ကဘၣ်တၢ်သ့စီကွံာ်အီၤ, ဒီးကဲထီၣ်တၢ်တကဆှီတုၤမုၢ်ဟါလီၤန့ၣ်လီၤ.
18 ပိာ်ခွါဒီးပိာ်မုၣ်မံဃုာ်လိာ်အသးမ့ၢ်ဝံၤန့ၣ်အဝဲသ့ၣ်ခံဂၤလိာ်ကဘၣ်လုၢ်ထံ, ဒီးကဲထီၣ်တၢ်တကဆှီတုၤမုၢ်ဟါလီၤန့ၣ်လီၤ.
19 တုၤပိာ်မုၣ်တဂၤလၢ်လၢ်အသွံၣ်မ့ၢ်ဟဲန့ၣ်ကကဲထီၣ်တၢ်တကဆှီ နွံသီလီၤ. ဒီးပှၤတဂၤလၢ်လၢ်လၢအထိးဘၣ်အီၤန့ၣ်ကကဲ ထီၣ်တၢ်တကဆှီတုၤမုၢ်ဟါလီၤန့ၣ်လီၤ.
20 ကယဲၢ်တၢ်လီၢ်လၢအဝဲဆ့ၣ်နီၤဝဲမ့ၢ်ဂ့ၤမံလီၤဝဲမ့ၢ်ဂ့ၤန့ၣ်ကကဲ ထီၣ်တၢ်တကဆှီလီၤ.
21 ဒီးကယဲၢ်ပှၤလၢအထိးဘၣ်အလီၢ်မံန့ၣ်ကဘၣ်ဆှုၣ်, အကူအသိး, ဒီးလုၢ်ထံ, ဒီးကဲထီၣ်တၢ်တကဆှီတုၤမုၢ်ဟါလီၤန့ၣ်လီၤ.
22 ဒီးကယဲၢ်ပှၤလၢအထိးဘၣ်တၢ်တမံၤလၢ်လၢ်လၢအဆ့ၣ်နီၤဝဲ လၢအဖီခိၣ်န့ၣ်ကဘၣ်ဆှုၣ်အကူအသိးဒီး လုၢ်ထံဒီးကဲထီၣ်တၢ်တကဆှီတုၤမုၢ်ဟါလီၤန့ၣ်လီၤ.
23 ဒီးကယဲၢ်ပှၤလၢအထိးဘၣ်တၢ်လၢအမံလီၤဝဲလၢအလိၤမ့ၢ်ဂ့ၤ, ဆ့ၣ်နီၤဝဲလၢအလိၤမ့ၢ်ဂ့ၤန့ၣ်ကဲထီၣ်တၢ်တကဆှီတုၤမုၢ်ဟါလီၤန့ၣ်လီၤ.
24 ဒီးပိာ်ခွါတဂၤလၢအမံဃုာ်ဒီးအီၤဖဲအသွံၣ်ဟဲအကတီၢ်န့ၣ်ကကဲထီၣ်တၢ်တကဆှီနွံသီ, ဒီးလီၢ်မံလၢအမံလီၤဝဲန့ၣ်ကကဲထီၣ်တၢ်တကဆှီန့ၣ်လီၤ.
25 ဒီးပိာ်မုၣ်တဂၤအသွံၣ်မ့ၢ်ဃီၣ်တဘျုးသီအါန့ၢ်အသွံၣ်ဟဲ အဆၢကတီၢ်မ့ၢ်ဂ့ၤ, အသွံၣ်ဃီၣ်ထွဲဒံးလၢအသွံၣ်ဟဲအဆၢကတီၢ် အလီၢ်ခံမ့ၢ်ဂ့ၤန့ၣ်အဝဲကဲထီၣ်တၢ်တကဆှီလၢအသွံၣ်ဃီၣ်, ဒီကတီၢ်ညါဒ်လၢအသွံၣ်ဟဲအဆၢကတီၢ်အသိးန့ၣ်လီၤ.
26 ဒီးကယဲၢ်တၢ်လီၢ်လၢအမံလီၤဝဲမ့ၢ်ဂ့ၤ, အဆ့ၣ်နီၤဝဲမ့ၢ်ဂ့ၤလၢအကတီၢ်အံၤန့ၣ်ကကဲထီၣ်တၢ်တကဆှီန့ၣ်လီၤ.
27 ဒီးကယဲၢ်ပှၤလၢအထိးဘၣ်တၢ်လီၢ်တဖၣ်န့ၣ်ကကဲထီၣ်တၢ်တကဆှီဘၣ်, ဒီးကဘၣ်ဆှုၣ်အကူအသိး, ဒီးလုၢ်ထံ, ဒီးကဲထီၣ်တၢ်တကဆှီတုၤမုၢ်ဟါလီၤန့ၣ်လီၤ.
28 ဒီးပိာ်မုၣ်အံၤအသွံၣ်မ့ၢ်တုာ်န့ၣ်ကဘၣ်ခိးနွံသီ, ဒီးကကဲထီၣ်က့ၤတၢ်ကဆှီဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်လီၤ.
29 ဒီးလၢဃိးနံၤတနံၤန့ၣ်ကဘၣ်ဟဲစိာ်ဝဲထိၣ်လွံၢ်ဘုၣ်ခံဘ့ၣ်မ့တမ့ၢ်, ထိၣ်ကးက့ၣ်ဖိခံဘ့ၣ်ဆူပှၤလုၢ်တၢ်အခိၣ်အအိၣ်, ဖဲတၢ်ဘူၣ်ထီၣ်ဘါထီၣ်ယွၤအဒဲအကျဲစၢၤန့ၣ်လီၤ.
30 ဒီးပှၤလုၢ်တၢ်အခိၣ်ကလုၢ်ထီၣ်ဝဲတဘ့ၣ်လၢတၢ်လုၢ်တၢ်ပျၢ်တၢ်ဒဲးဘးအဂီၢ်, ဒီးအဂၤတဘ့ၣ်လၢတၢ်လုၢ်မ့ၣ်အူအဂီၢ်န့ၣ်လီၤ. အအံၤမ့ၢ်အဝဲအတၢ်မၤကဆှီထီၣ်က့ၤတၢ်လၢပိာ်မုၣ်တဂၤန့ၣ်အဂီၢ်လီၤ.
31 ဒီးယွၤစံးဘၣ်စီၤမိၤၡ့လၢကဒုးပလီၢ်အံၣ်စရ့လး အပှၤဂီၢ်မုၢ်ဘၣ်ဃးဒီးအတၢ်တကဆှီဘၣ်အဂ့ၢ်ဒ်သိး,အသုတမၤဘၣ်အၢ ဘၣ်တၢ်ဘူၣ်ထီၣ်ဘါထီၣ်ယွၤအဒဲလၢအအိၣ်လၢအဝဲသ့ၣ်အသူၣ်ဒဲအလီၢ် အခၢၣ်သးတဂ့ၤန့ၣ်လီၤ. မ့ၢ်မၤဘၣ်ဝဲဒီး ကဘၣ်တၢ်မၤသံအီၤန့ၣ်လီၤ.
32 တၢ်အံၤမ့ၢ်တၢ်သိၣ်တၢ်ဘျၢဘၣ်ဃးဒီးပိာ်ခွါလၢအိၣ်ဒီးတၢ်ယွၤ လီၤလၢအဆံၣ်ကျိၤဒီးအချံအသၣ်ဘၣ်ဃးဒီးအမံဃုာ်တၢ်အယွၤလီၤဝဲမ့ၢ်ဂ့ၤ,
33 ဒီးပိာ်မုၣ်လၢအသွံၣ်ဟဲမ့ၢ်ဂ့ၤ, ပိာ်ခွါတဂၤလၢအမံဃုာ်ဒီးပိာ်မုၣ်လၢအတ ကဆှီဘၣ်ဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးမ့ၢ်ဂ့ၤအဂီၢ်န့ၣ်လီၤ.