14
1-2 ဒီးယွၤဟ့ၣ်လီၤစီၤမိၤၡ့, လၢတၢ်သိၣ်တၢ်ဘျၢတဖၣ်ဘၣ်ဃးတၢ်မၤကဆှီထီၣ်က့ၤပှၤတဂၤလၢအဘျါ က့ၤလၢတၢ်ဆါအၢန့ၣ်လီၤ. မုၢ်တနံၤလၢအဘၣ်တၢ်ဒုးသ့ၣ်ညါလၢအဝဲကဆှီလံန့ၣ်, ကဘၣ်တၢ်ဟဲကိးအီၤဆူပှၤလုၢ်တၢ်အခိၣ်အအိၣ်န့ၣ်လီၤ.
3 ဒီးပှၤလုၢ်တၢ်အခိၣ်ကကိးအီၤဆူပှၤသူၣ်ဒဲအလီၢ်အချၢဒီးကကွၢ် လီၤတံၢ်အီၤန့ၣ်လီၤ. ဒီးတၢ်ဆါမ့ၢ်ဘျါလံန့ၣ်,
4 ပှၤလုၢ်တၢ်အခိၣ်ကဘၣ်မၤလိာ်လၢပှၤကဘၣ်ဟဲစိာ်ထိၣ်အက ဆှီခံဘ့ၣ်လၢအမူဝဲဃုာ်ဒီးသ့ၣ်ဆိှုအ့ရ့းတကူာ်, လုၣ်အဂီၤလုးတဘိ, ဒီးကဖျီၣ်အ့စိးအဒ့တဒ့လီၤ.
5 အန့ၣ်ဝံၤဒီးပှၤလုၢ်တၢ်အခိၣ်ကဘၣ်မၤလိာ်ဝဲလၢထိၣ်ခံဘ့ၣ်အကျါ တဘ့ၣ်န့ၣ်ကဘၣ်တၢ်မၤသံကွံာ်အီၤလၢသပၢၤဟီၣ်ခိၣ် အိၣ်ဒီးထံမူလၢအပူၤတဖျၢၣ်အဖီခိၣ်န့ၣ်လီၤ.
6 ဒီးပှၤလုၢ်တၢ်အခိၣ်ကဟံးန့ၢ်ထိၣ်လၢအမူဒံးတဘ့ၣ် ဒီးစုၣ်လီၤအီၤဃုာ်ဒီးသ့ၣ်ဆိှုအ့ရ့းတကူာ်, လုၣ်အဂီၤလုးတဘိ, ဒီးကဖျီၣ်အ့စိးအဒ့တဒ့ဆူထိၣ်တဘ့ၣ်လၢအဘၣ်တၢ်မၤသံကွံာ်အီၤအသွံၣ်ကျါန့ၣ်လီၤ.
7 ဒီးပှၤလၢအဘၣ်တၢ်မၤကဆှီထီၣ်က့ၤအီၤလၢတၢ်ဆါအၢန့ၣ်ကဘၣ်တၢ် ဖှံအီၤလၢတၢ်သွံၣ်နွံဘျီဒီးကဒုးသ့ၣ်ညါဝဲလၢအကဆှီထီၣ်လံန့ၣ်လီၤ. ဒီးကပျဲထိၣ်လၢအမူတဘ့ၣ်န့ၣ်ယူၤကွံာ်န့ၣ်လီၤ.
8 ဒီးပှၤလၢအကဆှီထီၣ်တဂၤန့ၣ်ကဘၣ်ဆှုၣ်အကူအသိး, လူၤကွံာ်အဆူၣ်ခဲလၢာ်လၢအိၣ်လၢအလိၤဒီးလုၢ်ထံဒ်သိးကကဆှီထီၣ်အဂီၢ်လီၤ. ဒ်သိးဟဲက့ၤနုာ်ဆူပှၤသူၣ်ဒဲအလီၢ်ပူၤကသ့အဂီၢ်န့ၣ်ကဘၣ်အိၣ် လၢအဒဲဒၣ်ဝဲအချၢနွံသီန့ၣ်လီၤ.
9 ဒီးလၢနွံသီတသီန့ၣ်ကဘၣ်လူၤကဒီးဝဲအ ခိၣ်ဆူၣ်အခၣ်ဆူၣ်ဒီးအမဲာ်တူၢ်, ဒီးအဆူၣ်ခဲလၢာ်လၢအလိၤန့ၣ်လီၤ. ဒီးကဘၣ်ဆှုၣ် အကူအသိးဒီးလုၢ်ထံန့ၣ်လီၤ. အန့ၣ်ဝံၤဒီးက ကဆှီထီၣ်ဝဲဒၣ်ဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်လီၤ.
10 ဒီးလၢဃိးသီတသီန့ၣ်ကဘၣ်ဟဲစိာ်ဝဲသိဖါခံဒုဒီးသိ အမိၢ်ဖိတဒုလၢအသးအိၣ်တနံၣ်လၢမဲၣ်သူမဲၣ်ဂီၤတအိၣ်ဘၣ်လၢအလိၤ, ဒီးကိၣ်ကမူၣ်အဃၢလီၤတယၢၢ်သၢအ့စရိၣ်လၢအဃါဃုာ်ဒီးသ့ၣ်စၤ ယံးအသိဒီးသိတလိာ်န့ၣ်လီၤ.
11 ဒီးပှၤလုၢ်တၢ်အခိၣ်ကလဲၤကိးပှၤလၢအကဆှီထီၣ်တဂၤ န့ၣ်ဃုာ်ဒီးအတၢ်လုၢ်မၤဘူၣ်ဆူတၢ်ဘူၣ်ထီၣ်ဘါထီၣ်ယွၤအဒဲအကျဲစၢၤန့ၣ်လီၤ.
12 ဒီးပှၤလုၢ်တၢ်အခိၣ်ကဟံးန့ၢ်သိဖါဖိတဒုဃုာ်ဒီး သိတလိာ်လၢကဘၣ်လုၢ်ထီၣ်ဝဲဒ်တၢ်ဟ့ၣ်ဆၢက့ၤတၢ်လုၢ်တၢ်ပျၢ်တၢ် ကမၣ်အဂီၢ်န့ၣ်လီၤ. ဒီးကလုၢ်ထီၣ်ဝဲဆူယွၤအအိၣ်ဒ်တၢ်ဟ့ၣ်လီၤဆီ တမံၤလၢပှၤလုၢ်တၢ်အခိၣ်အဂီၢ်န့ၣ်လီၤ.
13 ဒီးကဘၣ်မၤသံသိဖါတဒုန့ၣ်လၢတၢ်လီၢ်စီဆှံဖဲတၢ်မၤသံဆၣ်ဖိ ကီၢ်ဖိလၢတၢ်ပျၢ်တၢ်ဒဲးဘးအဂီၢ်ဒီးတၢ်လုၢ်မ့ၣ်အူအဂီၢ် န့ၣ်လီၤ. ကဘၣ်မၤဝဲတၢ်အံၤန့ၣ်မ့ၢ်လၢတၢ်ဟ့ၣ်ဆၢက့ၤတၢ်လုၢ်တၢ်ပျၢ်တၢ် ကမၣ်န့ၣ်, ဘၣ်ဃးဒီးပှၤလုၢ်တၢ်အခိၣ်ဒီးမ့ၢ်တၢ်စီဆှံဒိၣ်မးဒ်တၢ်လုၢ် တၢ်ပျၢ်တၢ်ဒဲးဘးအသိးအဃိန့ၣ်လီၤ.
14 ပှၤလုၢ်တၢ်အခိၣ်ကဟံးန့ၢ်သိဖါဖိတဒုန့ၣ်အ သွံၣ်တနီၤဒီးပာ်ထီၣ်အီၤလၢပှၤကဘၣ်တၢ်မၤစီဆှံ အီၤတဂၤန့ၣ်အနၢ်ထွဲတခီအလီၤစဲၤထိးနါ, ဒီးအစုမုၢ်ကျၢၢ် လၢအစုထွဲတခီ, ဒီးအခီၣ်မုၢ်ကျၢၢ်လၢအခီၣ်ထွဲတခီအလိၤန့ၣ်လီၤ.
15 ဒီးပှၤလုၢ်တၢ်အခိၣ်ကဟံးန့ၢ်သ့ၣ်စၤယံးအသိ တနီၤဒီးလူလီၤအီၤလၢအစုလၣ်ဒၣ်ဝဲလၢအစုစ့ၣ်တခီအပူၤ,
16 ဒီးဘျၢလီၤအစုမုၢ်လၢအထွဲတခီဆူအစုလၣ်လၢအစ့ၣ် တခီအပူၤဒီးဖှံအီၤတနီၤနွံစုလၢယွၤအမဲာ်ညါန့ၣ်လီၤ.
17 ဒီးကဘၣ်ဟံးန့ၢ်သိတနီၤလၢအအိၣ်လၢအစုလၣ်အပူၤဒီးသိဖိ အသွံၣ်တနီၤဒီးထိးဘၣ်ပှၤလၢအဘၣ်တၢ်မၤကဆှီအီၤတ ဂၤန့ၣ်အနၢ်အထွဲတခီအလီၤစဲၤထိးနါ, ဒီးအစုမုၢ်ကျၢၢ်လၢအ စုထွဲတခီဒီးအခီၣ်မုၢ်ကျၢၢ်လၢအခီၣ်ထွဲတခီန့ၣ်လီၤ.
18 ဒီးကဘၣ်ပာ်ထီၣ်သိလၢအိၣ်တ့ၢ်လၢအစုလၣ်ပူၤန့ၣ်လၢပှၤတ ဂၤန့ၣ်အခိၣ်လိၤန့ၣ်လီၤ. အန့ၣ်ဒီးပှၤလုၢ်တၢ်အခိၣ်ကမၤ ဝဲတၢ်မၤကဆှီထီၣ်က့ၤအလုၢ်အလၢ်န့ၣ်လီၤ.
19 ဒီးပှၤလုၢ်တၢ်အခိၣ်ကလုၢ်ထီၣ်တၢ်လုၢ်တၢ်ပျၢ်တၢ်ဒဲးဘးဒီးကမၤ ဝဲတၢ်မၤကဆှီထီၣ်က့ၤန့ၣ်လီၤ. မ့ၢ်ဝံၤဒီးအဝဲကမၤသံ ဆၣ်ဖိကီၢ်ဖိလၢတၢ်လုၢ်မ့ၣ်အူအဂီၢ်န့ၣ်လီၤ.
20 ဒီးကလုၢ်ထီၣ်ဝဲဃုာ်ဒီးတၢ်လုၢ်ဘုဧိၤဟုဧိၤလၢတၢ်လုၢ်လီၢ် အဖီခိၣ်န့ၣ်လီၤ. မၤသးဒ်န့ၣ်ဒီး, ပှၤလုၢ်တၢ်အခိၣ်ကမၤတၢ်မၤက ဆှီထီၣ်က့ၤလၢပှၤတဂၤန့ၣ်အဂီၢ်ဒီးပှၤတဂၤန့ၣ်ကကဆှီထီၣ်ဝဲ ဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်လီၤ.
21 ဒီးပှၤတဂၤန့ၣ်မ့မ့ၢ်ပှၤအဖှီၣ်ဒီးမၤဝဲမ့ၢ်တန့ၢ် ဘၣ်န့ၣ်ကဘၣ်ဟဲစိာ်ဝဲလၢတၢ်မၤကဆှီထီၣ်က့ၤအီၤအဂီၢ်ထဲသိဖါ ဖိတဒုဧိၤဒ်တၢ်ဟ့ၣ်ဆၢက့ၤတၢ်လုၢ်တၢ်ပျၢ်တၢ်ကမၣ်အဂီၢ်, ဒီးတၢ်ဟ့ၣ်လီၤဆီတမံၤဆူယွၤအအိၣ်လၢပှၤလုၢ်တၢ်အခိၣ်အဂီၢ် န့ၣ်လီၤ.ဒီးကဘၣ်ဟဲစိာ်ဝဲကိၣ်ကမူၣ်အဃၢလီၤတယၢၢ်တအ့စရိၣ်လၢ အဃါဃုာ်အသးဒီးသ့ၣ်စၤယံးအသိလၢတၢ်လုၢ်မၤဘူၣ်ဘုဧိၤဟုဧိၤအဂီၢ် ဒီးသ့ၣ်စၤယံးအသိတလိာ်န့ၣ်လီၤ.
22 ဒီးကဘၣ်ဟဲစိာ်စ့ၢ်ကီးဝဲထိၣ်လွံၢ်ဘုၣ်ခံဘ့ၣ်မ့တမ့ၢ်ထိၣ်ကးက့ၣ်ဖိခံဘ့ၣ် န့ၣ်လီၤ. တဘ့ၣ်န့ၣ်ကမ့ၢ်လၢတၢ်လုၢ်တၢ်ပျၢ်တၢ်ဒဲးဘးအဂီၢ်ဒီးအဂၤတဘ့ၣ် န့ၣ်ကမ့ၢ်လၢတၢ်လုၢ်မ့ၣ်အူအဂီၢ်န့ၣ်လီၤ.
23 လၢတၢ်မၤကဆှီက့ၤအီၤဃိးသီတသီန့ၣ်ကဘၣ်ဟဲစိာ်ဝဲဆူပှၤလုၢ် တၢ်အခိၣ်အအိၣ်ဖဲတၢ်ဘူၣ်ထီၣ်ဘါထီၣ်ယွၤအဒဲအကျဲစၢၤန့ၣ်လီၤ.
24 ဒီးပှၤလုၢ်တၢ်အခိၣ်ကဟံးန့ၢ်သိတဒုန့ၣ်ဒီးသ့ၣ်စၤယံးအသိ, ဒီးလုၢ်ထီၣ်အီၤဒ်တၢ်ဟ့ၣ်လီၤဆီဆူယွၤအအိၣ်န့ၣ်လီၤ.
25 ကမၤသံဝဲသိတဒုန့ၣ်ဒီးဟံးန့ၢ်အသွံၣ်တနီၤဒီးပာ် ထီၣ်အီၤလၢပှၤတဂၤန့ၣ်အနၢ်ထွဲတခီအလီၤစဲၤထိးနါ, လၢအစုမုၢ်ကျၢၢ်လၢအစုထွဲတခီအလိၤဒီးလၢ အခီၣ်မုၢ်ကျၢၢ်လၢအခီၣ်ထွဲတခီအလိၤန့ၣ်လီၤ.
26 ဒီးပှၤလုၢ်တၢ်အခိၣ်ကလူလီၤသိတနီၤဆူအစုလၣ်လၢအစ့ၣ်တခီအပူၤ,
27 ဒီးကဖှံတၢ်သွံၣ်တနီၤနွံစုလၢအစုမုၢ်လၢအထွဲတခီလၢယွၤအမဲာ်ညါန့ၣ်လီၤ.
28 ဒီးကဟံးန့ၢ်သိတနီၤဒီးပာ်ထီၣ်အီၤဒ်အမၤဝဲလၢတၢ် သွံၣ်အသိး, ဖဲပှၤတဂၤန့ၣ်အနၢ်ထွဲတခီအလီၤစဲၤထိးနါ, လၢအစုမုၢ်ကျၢၢ်လၢအစုထွဲတခီအလိၤ, ဒီးအခီၣ်မုၢ်ကျၢၢ်လၢအခီၣ်ထွဲအလိၤန့ၣ်လီၤ.
29 ဒီးသိလၢအအိၣ်တ့ၢ်လၢအစုလၣ်ပူၤတဖၣ်န့ၣ်ကဘၣ်ပာ်ထီၣ်ဝဲ လၢပှၤတဂၤန့ၣ်အခိၣ်လိၤန့ၣ်လီၤ. ဒီးအအံၤမ့ၢ်တၢ်မၤကဆှီ ထီၣ်က့ၤတၢ်ဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်လီၤ.
30 အန့ၣ်ဝံၤဒီး, ကလုၢ်ထီၣ်ဝဲဒၣ်ထိၣ်လွံၢ်ဘုၣ်တဘ့ၣ်မ့တမ့ၢ်ကးက့ၣ်ဖိတဘ့ၣ်,
31 ဒ်တၢ်လုၢ်တၢ်ပျၢ်တၢ်ဒဲးဘးအသိး, ဒီးအဂၤတဘ့ၣ်ဒ်တၢ်လုၢ်မ့ၣ် အူအသိးဃုာ်ဒီးတၢ်လုၢ်ဘုဧိၤဟုဧိၤန့ၣ်လီၤ. ဒီးအအံၤမ့ၢ်ပှၤလုၢ်တၢ်အခိၣ်ကမၤတၢ်မၤကဆှီထီၣ်က့ၤတၢ်ဒ်တၢ် ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်လီၤ.
32 အအံၤမ့ၢ်တၢ်သိၣ်တၢ်သီလၢပှၤတဂၤလၢအအိၣ်ဒီးတၢ်ဆါအၢဘၣ်ဆၣ် ဒီးမၤဝဲတၢ်လုၢ်ဒ်ညီနုၢ်အသိးတန့ၢ်ဘၣ်လၢတၢ်မၤကဆှီက့ၤအီၤအဂီၢ်န့ၣ်လီၤ.
33-34 ဒီးယွၤဟ့ၣ်လီၤစီၤမိၤၡ့ဒီးစီၤအၤဟရိၣ်, တၢ်သိၣ်တၢ်ဘျၢတဖၣ်ဘၣ်ဃးဒီးဟံၣ်လၢယွၤပာ်ဃးတၢ်ဆါအၢအဃၢ်လၢ အပူၤ,ဖဲပှၤအံၣ်စရ့လးဖိတဖၣ်လဲၤနုာ်ဆူကီၢ်ကနၤဧၣ်, လၢယွၤကဟ့ၣ်လီၤအီၤဒ်အတၢ်န့ၢ်သါအသိးန့ၣ်လီၤ.
35 တုၤပှၤတဂၤဂၤထံၣ်လၢယွၤပာ်တၢ်ဆါအၢလၢအဟံၣ်ပူၤန့ၣ်, ကဘၣ်လဲၤဒီးစံးဘၣ်ပှၤလုၢ်တၢ်အခိၣ်လၢတၢ်ဂ့ၢ်အံၤန့ၣ်လီၤ.
36 ဒီးပှၤလုၢ်တၢ်အခိၣ်ကဘၣ်မၤလိာ်လၢတၢ်ခဲလၢာ်လၢအအိၣ်လၢအဟံၣ် ပူၤန့ၣ်ကဘၣ်တၢ်သုးကွံာ်အီၤတချုးလၢအဝဲလဲၤကွၢ်လီၤတံၢ်တၢ်န့ၣ်လီၤ. တၢ်မ့ၢ်တသုးကွံာ်တၢ်လၢအအိၣ်လၢဟံၣ်ပူၤခဲလၢာ်န့ၣ်ကဘၣ်တၢ်ဘိး ဘၣ်သ့ၣ်ညါအီၤလၢတၢ်တကဆှီဘၣ်န့ၣ်လီၤ. ဒီးပှၤလုၢ်တၢ်အခိၣ်ကဘၣ်လဲၤဆူဟံၣ်န့ၣ်,
37 ဒီးကွၢ်လီၤတံၢ်တၢ်န့ၣ်လီၤ. ဒီးတၢ်ထီၣ်လါဟ့မ့တမ့ၢ်တၢ်ထီၣ်ဂီၤဃဲးအလီၢ်မ့ၢ်ဖျါလၢတၢ်ဒူၣ်အလိၤန့ၣ်,
38 အဝဲကဘၣ်ဟးထီၣ်ကွံာ်လၢဟံၣ်ပူၤဒီးကးတံၢ်ဃာ်အီၤနွံသီန့ၣ်လီၤ.
39 ဒီးလၢနွံသီတသီန့ၣ်ကဘၣ်ဟဲက့ၤဒီးကွၢ်လီၤတံၢ်ကဒီးတၢ်န့ၣ်လီၤ. တၢ်ဆါအၢမ့ၢ်အါထီၣ်န့ၣ်,
40 အဝဲကဘၣ်မၤလိာ်လၢလၢၢ်တဖၣ်လၢတၢ်ထံၣ်န့ၢ်တၢ်ဆါအၢအဃၢ်အိၣ်ဝဲ လၢအလိၤန့ၣ်ကဘၣ်တၢ်ထုးထီၣ်ကွံာ်အီၤဒီးကွံာ်လီၤအီၤဆူတၢ်လီၢ်တကဆှီလၢအအိၣ်လၢဝ့ၢ်အချၢန့ၣ်လီၤ.
41 အန့ၣ်ဝံၤဒီးအဝဲကဘၣ်မၤလိာ်ဝဲလၢပှၤကဘၣ်ကွးကွံာ်တၢ်အ ဒူၣ်လၢဟံၣ်အိပူၤခဲလၢာ်ဒီးလဲၤဂၢ်ကွံာ်အီၤဆူတၢ်လီၢ်တကဆှီ လၢအအိၣ်လၢဝ့ၢ်အချၢန့ၣ်လီၤ.
42 ဒီးလၢၢ်လၢအဘၣ်တၢ်သုးကွံာ်အီၤတဖၣ်အလီၢ်န့ၣ်ကဘၣ်တၢ်မၤပှဲၤ က့ၤအီၤလၢလၢၢ်အဂၤတဖၣ်ဒီးတၢ်အဒူၣ်တဖၣ်န့ၣ်ကဘၣ်တၢ်လံာ်က့ၤ အီၤလၢကပံာ်အသိန့ၣ်လီၤ.
43 ဖဲလၢၢ်တဖၣ်ဘၣ်တၢ်သုးကွံာ်အီၤ, ဒီးတၢ်အဒူၣ်တဖၣ်ဘၣ်တၢ်ကွးကွံာ်အီၤဒီးမၤက့ၤအီၤအ သီဝံၤဘၣ်ဆၣ်တၢ်ဆါအၢအဃၢ်မ့ၢ်ဟဲအိၣ်ထီၣ်ကဒီးလၢဟံၣ်ပူၤန့ၣ်
44 ပှၤလုၢ်တၢ်အခိၣ်ကဘၣ်လဲၤကွၢ်ဝဲဒၣ်န့ၣ်လီၤ. ဒီးမ့ၢ်အါထီၣ်န့ၣ်ဟံၣ်အံၤတကဆှီဘၣ်.
45 ဒီးဟံၣ်န့ၣ်ကဘၣ်တၢ်မၤလီၤပှီၢ်ကွံာ်အီၤဒီးအလၢၢ်တဖၣ်, အသ့ၣ်တဖၣ်ဒီးကပံာ်ခဲလၢာ်ကဘၣ်တၢ်စိာ်ကွံာ်အီၤဆူတၢ်လီၢ် တကဆှီလၢအအိၣ်လၢဝ့ၢ်အချၢန့ၣ်လီၤ.
46 ပှၤတဂၤလၢ်လၢ်လၢအလဲၤနုာ်ဆူဟံၣ်တဖျၢၣ်လၢအဘၣ် တၢ်ကးတံၢ်အီၤန့ၣ်, ကမ့ၢ်တၢ်တကဆှီဘၣ်တုၤမုၢ်ဟါလီၤန့ၣ်လီၤ.
47 ဒီးပှၤတဂၤလၢ်လၢ်လၢအမံလီၤမ့ၢ်ဂ့ၤ, အီၣ်တၢ်မ့ၢ်ဂ့ၤ, လၢဟံၣ်ပူၤန့ၣ်ကဘၣ်ဆှုၣ်အတၢ်ကူတၢ်သိးတဖၣ်န့ၣ်လီၤ.
48 ဒီးဖဲပှၤလုၢ်တၢ်အခိၣ်မ့ၢ်ဟဲလၢကကွၢ်ဝဲ, ဒီးတၢ်ဆါအၢအဃၢ် မ့ၢ်တအိၣ်ဖျါထီၣ်က့ၤလၢၤဘၣ်ဖဲတၢ်မၤက့ၤကပံာ်အသီဝံၤအလီၢ်ခံန့ၣ်, ကဘၣ်ဘိးဘၣ်သ့ၣ်ညါဝဲလၢဟံၣ်န့ၣ်ကဆှီဝဲဒၣ်လီၤ. အဂ့ၢ်ဒ်အံၤ, တၢ်ဆါအၢအဃၢ်ဘၣ်တၢ်သုးကွံာ်အီၤလၢာ်လၢာ်ဆ့ဆ့လံအဃိန့ၣ်လီၤ.
49 လၢတၢ်မၤကဆှီထီၣ်က့ၤဟံၣ်အဂီၢ်န့ၣ်ပှၤလုၢ်တၢ်အခိၣ်ကဘၣ်ဟံးန့ၢ်ဝဲထိၣ်ခံဘ့ၣ်, သ့ၣ်ဆိှုအ့ရ့းတကူာ်, လုၣ်ပျံၤအဂီၤလုးတဘိ, ဒီးကဖျီၣ်အ့စိးအဒ့တဒ့လီၤ.
50 ဒီးပှၤလုၢ်တၢ်အခိၣ်ကဘၣ်မၤသံထိၣ်တဘ့ၣ်လၢသပၢၤဟီၣ်ခိၣ်လၢထံမူအိၣ်လၢအပူၤတဖျၢၣ်န့ၣ်အဖီခိၣ်လီၤ.
51 အန့ၣ်ဝံၤဒီးကဘၣ်ဟံးန့ၢ်သ့ၣ်ဆိှုအ့ရ့း, ကဖျီၣ်အ့စိး, လုၣ်ပျံၤဂီၤလုးဒီးထိၣ်လၢအမူတဘ့ၣ်, ဒီးစုၣ်လီၤအီၤခဲ လၢာ်လၢထိၣ်လၢအဘၣ်တၢ်မၤသံအီၤအသွံၣ်ပူၤဒီးလၢထံမူအပူၤန့ၣ်လီၤ. ဒီးကဘၣ်ဖှံဝဲဟံၣ်န့ၣ်နွံစုလီၤ.
52 အအံၤမ့ၢ်တၢ်မၤကဆှီဟံၣ်န့ၣ်လၢထိၣ်အသွံၣ်, ထံမူ, ထိၣ်အမူ, သ့ၣ်ဆိှုအ့ရ့း, ကဖျီၣ်အ့စိးဒီးလုၣ်အဂီၤလုးတဘိန့ၣ်လီၤ.
53 ဒီးကပျဲထိၣ်အမူတဘ့ၣ်န့ၣ်ယူၤထီၣ်ကွံာ်ဆူဝ့ၢ်အချၢန့ၣ်လီၤ. အအံၤမ့ၢ်တၢ်မၤကဆှီထီၣ်က့ၤဟံၣ်ဒ်တၢ်ဘူၣ်တၢ်ဘါအလုၢ် အလၢ်အိၣ်ဝဲအသိးန့ၣ်လီၤ. ဒီးဟံၣ်န့ၣ်ကကဆှီထီၣ်က့ၤဝဲဒၣ်န့ၣ်လီၤ.
54 အအံၤမ့ၢ်တၢ်သိၣ်တၢ်သီတဖၣ်လၢအဘၣ်ဃးဒီးတၢ်ဆါအၢ
55-56 တၢ်ပူၤလီၢ်, တၢ်လီၤတလိၤ, တၢ်ညိးထီၣ်, ဒီးတၢ်ဆါအၢအဃၣ်လၢ တၢ်ကူတၢ်သိးဒီးဟံၣ်အဂီၢ်န့ၣ်လီၤ.
57 ဒီးတၢ်သိၣ်တၢ်သီတဖၣ်အံၤမ့ၢ်တၢ်နီၤဖးပဲာ်ဖးတၢ်တကဆှီဒီးတၢ်ကဆှီန့ၣ်လီၤ.