13
1 ဒီးယွၤဟ့ၣ်လီၤစီၤမိၤၡ့ဒီးစီၤအၤဟရိၣ်လၢတၢ်သိၣ်တၢ်ဘျၢ တဖၣ်အံၤလီၤ.
2 ပှၤတဂၤလၢ်လၢ်လၢအအိၣ်ဒီးတၢ်ပူၤလီၢ်လၢအဖံးဘ့ၣ်ခိၣ်လိၤမ့ၢ်ဂ့ၤ, ဝ့ထီၣ်မ့ၢ်ဂ့ၤ, အဖံးညိးထီၣ်မ့ၢ်ဂ့ၤလၢအကဲထီၣ်တၢ်ဆါအၢသ့န့ၣ်ကဘၣ်တၢ်ဟဲ ဆှၢအီၤဆူပှၤလုၢ်တၢ်အခိၣ်စီၤအၤဟရိၣ်အအိၣ်မ့တမ့ၢ်အဖိခွါတဂၤဂၤလၢအမ့ၢ်ပှၤလုၢ်တၢ်အခိၣ်အအိၣ်န့ၣ်လီၤ.
3 ဒီးပှၤလုၢ်တၢ်အခိၣ်ကကွၢ်အပူၤလီၢ်လၢအဖံးဘ့ၣ်လိၤ, ဒီးအဆူၣ်လၢအအိၣ်လၢအပူၤလီၢ်ပူၤန့ၣ်မ့ၢ်လီၤဝါဒီးအပူၤလီၢ် မ့ၢ်ယိာ်န့ၢ်ဒံးအဖံးလၢအဃၢၤန့ၣ်ဒီးမ့ၢ်တၢ်ဆါအၢလီၤ. ဒီးပှၤလုၢ်တၢ်အခိၣ်ကဘိးဘၣ်သ့ၣ်ညါဝဲဒၣ်လၢအဝဲတကဆှီဘၣ်န့ၣ်လီၤ.
4 ဘၣ်ဆၣ်ဒီးအပူၤလီၢ်မ့ၢ်ဝါဝဲဒီးမ့ၢ်ဖျါလၢတယိာ်န့ၢ်ဒံးအဖံးလၢအဃၢၤ, ဒီးအဆူၣ်လၢအပူၤလီၢ်ပူၤန့ၣ်မ့ၢ်တလီၤဝါဘၣ်ဒီးပှၤလုၢ်တၢ် အခိၣ်ကပာ်လီၤဆီအီၤနွံသီန့ၣ်လီၤ.
5 ဒီးလၢနွံသီတသီန့ၣ်ပှၤလုၢ်တၢ်အခိၣ်ကကွၢ်ကဒီးအီၤတဘျီ, ဒီးမ့ၢ်ဆိကမိၣ်ဝဲလၢအပူၤလီၢ်န့ၣ်အိၣ်ဒၣ်ဒ်လီၢ်လီၢ်ဒီးတလဲၢ်ထီၣ်ဘၣ်န့ၣ်, အဝဲကပာ်လီၤဆီကဒီးအီၤဆူညါနွံသီန့ၣ်လီၤ.
6 ဒီးလၢနွံသီတသီန့ၣ်ပှၤလုၢ်တၢ်အခိၣ်ကကွၢ်ကဒီးအီၤတဘျီ, ဒီးအပူၤလီၢ်မ့ၢ်လီၤသံးကွံာ်ဒီးတလဲၢ်ထီၣ်ဘၣ်န့ၣ်, ကဘိးဘၣ်သ့ၣ်ညါလၢပှၤတဂၤန့ၣ်ကဆှီဝဲဒ်တၢ်ဘူၣ်တၢ်ဘါအလုၢ်အလၢ် အိၣ်ဝဲအသိးဒီးမ့ၢ်ဒၣ်တၢ်ပူၤလီၢ်တခါလီၤ. ဒီးပှၤတဂၤန့ၣ်ကဆှုၣ်အတၢ်ကူတၢ်သိးဒီးကမ့ၢ်ပှၤကဆှီ တဂၤဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးလီၤ.
7 ဘၣ်ဆၣ်ဒီးအပူၤလီၢ်မ့ၢ်လဲၢ်ထီၣ်ဝဲဖဲပှၤလုၢ်တၢ်အခိၣ်ဘိးဘၣ် သ့ၣ်ညါဝဲလၢအဝဲကဆှီဝံၤအလီၢ်ခံန့ၣ်, အဝဲကဘၣ်ဟဲဒုးနဲၣ်ကဒီးအသးဆူပှၤလုၢ်တၢ်အခိၣ်အအိၣ်န့ၣ်လီၤ.
8 ဒီးပှၤလုၢ်တၢ်အခိၣ်ကကွၢ်ကဒီးအီၤတဘျီဒီးအပူၤလီၢ်မ့ၢ်လဲၢ် ထီၣ်န့ၣ်ကဘိးဘၣ်သ့ၣ်ညါဝဲလၢအဝဲတကဆှီဘၣ်န့ၣ်လီၤ. ဒီးတၢ်ဆါအံၤမ့ၢ်တၢ်ဆါအၢန့ၣ်လီၤ.
9 ပှၤတဂၤလၢ်လၢ်မ့ၢ်အိၣ်ဒီးတၢ်ဆါအၢအတၢ်ဆါန့ၣ်ကဘၣ်တၢ်ဟဲဆှၢ အီၤဆူပှၤလုၢ်တၢ်အခိၣ်အအိၣ်လီၤ.
10 ဒီးပှၤလုၢ်တၢ်အခိၣ်ကကွၢ်ဒီးအပူၤလီၢ်လၢအဖံးဘ့ၣ်ခိၣ်မ့ၢ်ဝါ ဝဲ, ဒီးအဆူၣ်မ့ၢ်လီၤဝါဒီးအိၣ်ဒီးအဖံန့ၣ်,
11 မ့ၢ်အမ့ၢ်ဝဲတၢ်ဆါအၢယံာ်ယံာ်ထၢထၢတမံၤန့ၣ်လီၤ. ဒီးပှၤလုၢ်တၢ်အခိၣ်ကဘိးဘၣ်သ့ၣ်ညါအီၤလၢအတကဆှီ ဘၣ်န့ၣ်လီၤ. ဒီးတၢ်ပာ်လီၤဆီအီၤအလီိၢ်တအိၣ်မ့ၢ်လၢအမ့ၢ်ပှၤ တကဆှီဘၣ်လီၤတံၢ်လီၤဆဲးအဃိန့ၣ်လီၤ.
12 မ့မ့ၢ်တၢ်ဆါအၢအံၤမ့ၢ်လဲၢ် တုၤအပှဲၤအနီၢ်ဒီတဂၤညါစးထီၣ်လၢအခိၣ်တုၤလၢအခီၣ်န့ၣ်,
13 ပှၤလုၢ်တၢ်အခိၣ်ကကွၢ်ကဒီးအီၤတဘျီန့ၣ်လီၤ. ဒီးမ့ၢ်ထံၣ်ဝဲလၢတၢ်ဆါအၢအိၣ်ပှဲၤအီၤဒီတဂၤ ညါန့ၣ်အဝဲကဘိးဘၣ်သ့ၣ်ညါလၢပှၤတဂၤန့ၣ် ကဆှီဝဲဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်လီၤ. ဒီးအနီၢ်ဒီတဂၤညါအဖံးဘ့ၣ်ခိၣ်မ့ၢ်လီၤဝါဝဲဒီးမ့ၢ်ပှၤကဆှီ ဝဲဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်လီၤ.
14 ဘၣ်ဆၣ်ဒီးအပူၤလီၢ်န့ၣ်အညၣ်စၢ်မ့ၢ်အိၣ်ဖျါထီၣ်ဒီး, အဝဲမ့ၢ်ပှၤတကဆှီဘၣ်တဂၤန့ၣ်လီၤ.
15 ဒီးပှၤလုၢ်တၢ်အခိၣ်ကကွၢ်ကဒီးအီၤတဘျီ, ဒီးမ့ၢ်ထံၣ် ဝဲလၢအပူၤလီၢ်လၢအဘျါတသ့န့ၣ်ဒီးကဘၣ်ဘိးဘၣ်သ့ၣ်ညါအီၤလၢ အမ့ၢ်ပှၤတကဆှီတဂၤန့ၣ်လီၤ. ဒီးတၢ်ပူၤလီၢ်လၢအဘျါတသ့န့ၣ်မ့ၢ်ဝဲတၢ်ဆါအၢ, ဒီးပှၤတဂၤန့ၣ်မ့ၢ်ပှၤတကဆှီဘၣ်တဂၤန့ၣ်လီၤ.
16 ဘၣ်ဆၣ်ဒီးတၢ်အပူၤလီၢ်မ့ၢ်ဘျါဝဲဒီးဝါထီၣ်က့ၤကဒီးဝဲန့ၣ်, ပှၤတဂၤန့ၣ်ကဘၣ်လဲၤဆူပှၤလုၢ်တၢ်အခိၣ်အအိၣ်,
17 လၢအကကွၢ်ကဒီးအီၤန့ၣ်လီၤ. ဒီးတၢ်အပူၤလီၢ်မ့ၢ်ဝါထီၣ်က့ၤဒီး, အဝဲဒၣ်ကဆှီဝဲဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်လီၤ. ဒီးပှၤလုၢ်တၢ်အခိၣ်ကဘိးဘၣ်သ့ၣ်ညါအီၤလၢအကဆှီဝဲန့ၣ်လီၤ.
18-19 ပှၤတဂၤဂၤမ့ၢ်အိၣ်ဒီးတၢ်ဝ့လၢအဘျါက့ၤဝဲ, ဒီးလၢခံတၢ်ဝ့လၢအဘျါက့ၤအလီၢ်န့ၣ်မ့ၢ်ကဲထီၣ်တၢ်ညိးထီၣ် လၢအဝါမ့ၢ်ဂ့ၤတၢ်ဂီၤလုးလၢအဝါမ့ၢ်ဂ့ၤန့ၣ်, အဝဲကဘၣ်လဲၤဆူပှၤလုၢ်တၢ်အခိၣ်အအိၣ်န့ၣ်လီၤ.
20 ဒီးပှၤလုၢ်တၢ်အခိၣ်ကကွၢ်အီၤ, ဒီးတၢ်အပူၤလီၢ်မ့ၢ်ယိာ်န့ၢ် အဖံးလၢအဃၢၤဒီးအဆူၣ်အိၣ်လၢအပူၤလီၢ်မ့ၢ်လီၤဝါန့ၣ်, ကဘၣ်ဘိးဘၣ်သ့ၣ်ညါအီၤလၢအတကဆှီဘၣ်န့ၣ်လီၤ. ဒီးတၢ်န့ၣ်မ့ၢ်တၢ်ဆါလၢအစးထီၣ်အသးလၢတၢ်ဝ့ထီၣ်န့ၣ်လီၤ.
21 ဘၣ်ဆၣ်ဒီးပှၤလုၢ်တၢ်အခိၣ်ကကွၢ်ဝဲဒီးမ့ၢ်ထံၣ်ဝဲလၢအဆူၣ်အိၣ် လၢတၢ်ပူၤလီၢ်န့ၣ်တလီၤဝါဒီးအပူၤလီၢ်မ့ၢ်တယိာ်န့ၢ်ဘၣ်အဖံး လၢအဃၢၤ, နာ်သက့အလွဲၢ်မ့ၢ်ဝါဃးတစဲးန့ၣ်, ပှၤလုၢ်တၢ်အခိၣ်ကပာ်လီၤဆီအီၤနွံသီန့ၣ်လီၤ.
22 ဒီးတၢ်အပူၤလီၢ်မ့ၢ်လဲၢ်ထီၣ်န့ၣ်, ပှၤလုၢ်တၢ်အခိၣ်ကဘိးဘၣ်သ့ၣ်ညါအီၤလၢအတကဆှီဘၣ်န့ၣ်လီၤ. ဒီးအဝဲအိၣ်ဒီးတၢ်ဆါအၢန့ၣ်လီၤ.
23 ဘၣ်ဆၣ်ဒီးတၢ်အပူၤလီၢ်မ့ၢ်တလဲၢ်ထီၣ်ဘၣ်န့ၣ်မ့ၢ်ဒၣ်တၢ်ဝ့ဘျါ က့ၤအလီၢ်န့ၣ်လီၤ. ဒီးပှၤလုၢ်တၢ်အခိၣ်ကဘိးဘၣ်သ့ၣ်ညါအီၤလၢအကဆှီဝဲဒ်တၢ်ဘူၣ်တၢ် ဘါအလုၢ်အလၢ်အိၣ်ဝဲအသိးန့ၣ်လီၤ.
24 ပှၤတဂၤလၢမ့ၣ်အူအီၣ်ဘၣ်အီၤဒီးအညၣ်မ့ၢ်ကဲထီၣ်အဝါမ့တမ့ၢ်အဂီၤလုးဝါန့ၣ်,
25 ပှၤလုၢ်တၢ်အခိၣ်ကကွၢ်အီၤန့ၣ်လီၤ. ဒီးအဆူၣ်လၢတၢ်အပူၤလီၢ်ပူၤန့ၣ်မ့ၢ်လီၤဝါဝဲဒီးယိာ်န့ၢ် ဒံးအဖံးလၢအဃၢၤန့ၣ်, မ့ၢ်တၢ်ဆါအၢလၢအစးထီၣ်အသးလၢမ့ၣ်အူအီၣ်တ့ၢ်အလီၢ်န့ၣ်လီၤ. ဒီးပှၤလုၢ်တၢ်အခိၣ်ကဘိးဘၣ်သ့ၣ်ညါအီၤလၢအဝဲတကဆှီဘၣ်န့ၣ်လီၤ.
26 ဘၣ်ဆၣ်ဒီးအဆူၣ်လၢအပူၤလီၢ်ပူၤန့ၣ်မ့ၢ်တလီၤဝါဒီးမ့ၢ်တယိာ်န့ၢ်အဖံးလၢအဃၢၤနာ် သက့ဝါဃးထီၣ်ဝဲန့ၣ်, ပှၤလုၢ်တၢ်အဒိၣ်ကဘၣ်ပာ်လီၤဆီအီၤနွံသီန့ၣ်လီၤ.
27 ဒီးလၢနွံသီတသီန့ၣ်, ပှၤလုၢ်တၢ်အခိၣ်ကကွၢ်ကဒီးအီၤတဘျီ, ဒီးအပူၤလီၢ်မ့ၢ်လဲၢ်ထီၣ်ဝဲန့ၣ်မ့ၢ်တၢ်ဆါအၢ, ဒီးပှၤလုၢ်တၢ်အခိၣ်ကဘၣ်ဘိးဘၣ်သ့ၣ်ညါအီၤလၢအဝဲတကဆှီဘၣ်န့ၣ်လီၤ.
28 ဘၣ်ဆၣ်ဒီးတၢ်အပူၤလီၢ်မ့ၢ်တလဲလိာ်အသးဒီးတလဲၢ်ထီၣ်နာ် သက့မ့ၢ်ဝါဃးဝဲန့ၣ်, တမ့ၢ်ဘၣ်တၢ်ဆါအၢဘၣ်. ဒီးပှၤလုၢ်တၢ်အခိၣ်ကဘိးဘၣ်သ့ၣ်ညါအီၤလၢအကဆှီဝဲဒ်တၢ်ဘူၣ်တၢ် ဘါအလုၢ်အလၢ်အိၣ်ဝဲအသိးမ့ၢ်လၢအမ့ၢ်ဒၣ်တၢ်ပူၤလီၢ်လၢအဘျါက့ၤဝဲအလီၢ်အဃိန့ၣ်လီၤ.
29 တုၤပိာ်ခွါမ့ၢ်ဂ့ၤ,ပိာ်မုၣ်မ့ၢ်ဂ့ၤ, မ့ၢ်အိၣ်ဒီးတၢ်ပူၤလီၢ်လၢအအိၣ်လၢအခိၣ်မ့ၢ်ဂ့ၤ, အခၣ်လာ်မ့ၢ်ဂ့ၤန့ၣ်,
30 ပှၤလုၢ်တၢ်အခိၣ်ကကွၢ်အီၤန့ၣ်လီၤ. ဒီးမ့ၢ်ယိာ်န့ၢ်ဒံးအဖံးလၢအဃၢၤဒီးအဆူၣ်လၢအပူၤတဖၣ်န့ၣ် မ့ၢ်ထီၣ်ဘီဒီးအိၣ်ဘူသလါန့ၣ်, မ့ၢ်တၢ်ဆါအၢ, ဒီးကဘၣ်ဘိးဘၣ်သ့ၣ်ညါအီၤလၢအတကဆှီဘၣ်န့ၣ်လီၤ.
31 ဒီးဖဲပှၤလုၢ်တၢ်အခိၣ်ကွၢ်အီၤဒီးတၢ်ပူၤလီၢ်န့ၣ် မ့ၢ်တယိာ်န့ၢ်အဖံးလၢအဃၢၤသနာ်က့ဒီးအဆူၣ်မ့ၢ်တသူဘၣ်န့ၣ်, ကဘၣ်ပာ်လီၤဆီအီၤနွံသီန့ၣ်လီၤ.
32 ဒီးလၢနွံသီတသီန့ၣ်ပှၤလုၢ်တၢ်အခိၣ်ကကွၢ်ကဒီးအီၤတဘျီ ဒီးမ့ၢ်တလဲၢ်ထီၣ်ဒီးအဆူၣ်မ့ၢ်တထီၣ်ဘီအသး လၢအပူၤဒီးတယိာ်န့ၣ်အဖံးလၢအခိၣ်အဃၢၤဘၣ်န့ၣ်,
33 ပှၤတဂၤန့ၣ်ကဘၣ်လူၤအခိၣ်သူဝးတရံးအပူၤလီၢ်န့ၣ်လီၤ. ဒီးပှၤလုၢ်တၢ်အခိၣ်ကပာ်လီၤဆီအီၤဆူညါနွံသီန့ၣ်လီၤ.
34 ဒီးလၢနွံသီတသီန့ၣ်ပှၤလုၢ်တၢ်အခိၣ်ကကွၢ်ကဒီးတၢ်အပူၤလီၢ်, ဒီးမ့ၢ်တလဲၢ်ထီၣ်ဒီးတယိာ်န့ၢ်အဖံးလၢအခိၣ်အဃၢၤဘၣ်ဒီးအဝဲ ကဘိးဘၣ်သ့ၣ်ညါအီၤလၢအကဆှီဝဲဒ်တၢ်ဘူၣ်တၢ်ဘါအလုၢ် အလၢ်အိၣ်ဝဲအသိးန့ၣ်လီၤ. ဒီးပှၤတဂၤန့ၣ်ကဆှုၣ်အတၢ်ကူတၢ်သိးဒီးကကဆှီထီၣ်ဝဲဒၣ်လီၤ.
35 ဘၣ်ဆၣ်ဒီးတၢ်အပူၤလီၢ်မ့ၢ်လဲၢ်ထီၣ်ဝဲဖဲအဘၣ်တၢ်ဘိးဘၣ်သ့ၣ်ညါ အီၤလၢအကဆှီဝဲဝံၤအလီၢ်ခံန့ၣ်,
36 ပှၤလုၢ်တၢ်အခိၣ်ကကွၢ်ကဒီးအီၤတဘျီန့ၣ်လီၤ. ဒီးတၢ်အပူၤလီၢ်မ့ၢ်လဲၢ်ထီၣ်န့ၣ်တလိၣ်လၢအကဃုထံၣ်အဆူၣ်အဘီလၢၤဘၣ်. ဒီးပှၤတဂၤန့ၣ်မ့ၢ်ပှၤတကဆှီဘၣ်တဂၤန့ၣ်လီၤ.
37 ဘၣ်ဆၣ်ဒီးပှၤလုၢ်တၢ်အခိၣ်မ့ၢ်ဆိကမိၣ်ဝဲလၢတၢ်အပူၤလီၢ်န့ၣ် တလဲၢ်ထီၣ်ဒီးတၢ်အဆူၣ်တဖၣ်သူဝဲလၢအပူၤန့ၣ်တၢ်အပူၤလီၢ်န့ၣ်ဘျါဝဲ, ဒီးပှၤလုၢ်တၢ်အခိၣ်ကဘိးဘၣ်သ့ၣ်ညါအီၤလၢအကဆှီ ဝဲဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်လီၤ.
38 တုၤပိာ်ခွါမ့ၢ်ဂ့ၤ, ပိာ်မုၣ်မ့ၢ်ဂ့ၤ, မ့ၢ်အိၣ်ဒီးတၢ်ဝါလီအကဝီၤတဖၣ်လၢအဖံးဖီခိၣ်န့ၣ်,
39 ပှၤလုၢ်တၢ်အခိၣ်ကကွၢ်ပှၤတဂၤန့ၣ်လီၤ. ဒီးတၢ်ဝါလီအက ဝီၤတဖၣ်န့ၣ်မ့ၢ်ဖျါဒုန့ၣ်မ့ၢ်ဒၣ်အဖံးပျိာ်ဝါအသး ဒီးပှၤတဂၤန့ၣ်ကဆှီဝဲဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်လီၤ.
40 ပှၤတဂၤအခိၣ်သူမ့ၢ်လီၤဆှုဒီးအခိၣ်လ့ၤဘၣ်ဆၣ်အဝဲကဆှီ ဝဲန့ၣ်လီၤ.
41 ဒီးပှၤတဂၤအခိၣ်တိသၣ်ဒီးအနၢ်သက့ၤထံးမ့ၢ်လီၤဆှုဒီးအခိၣ် တိသၣ်လ့ၤဘၣ်ဆၣ်ကဆှီဝဲဒၣ်န့ၣ်လီၤ.
42 ဘၣ်ဆၣ်ဒီးတၢ်ဂီၤလုးဝါအပူၤလီၢ်မ့ၢ်အိၣ်ထီၣ်လၢအခိၣ်လၢအလ့ၤ အဖီခိၣ်န့ၣ်မ့ၢ်တၢ်ဆါအၢန့ၣ်လီၤ.
43 ပှၤလုၢ်တၢ်အခိၣ်ကကွၢ်အီၤဒီးမ့ၢ်ထံၣ်ဝဲတၢ်ဂီၤလုးဝါအပူၤလီၢ်န့ၣ်,
44 ကဘိးဘၣ်သ့ၣ်ညါအီၤလၢအတကဆှီဝဲမ့ၢ်လၢတၢ်ဆါအၢအိၣ်လၢအခိၣ် လိၤအဃိန့ၣ်လီၤ.
45 ပှၤလၢအအိၣ်ဒီးတၢ်ဆါအၢအတၢ်ဆါတဂၤန့ၣ်ကဘၣ်ကူ သိးဝဲတၢ်ကူတၢ်ကၤလၢအယာ်ဖျ့, တဘၣ်ခွံအခိၣ်ဘၣ်. ကဘၣ်မၤဘၢအမဲာ်သၣ်လၢအဖီလာ်တဝာ်, ဒီးကဘၣ်ကိးထီၣ်ဝဲ, “တကဆှီဘၣ်, တကဆှီဘၣ်” န့ၣ်လီၤ.
46 ဖဲတၢ်ဆါအၢအိၣ်ဒီးအီၤအဖၢမုၢ်န့ၣ်အဝဲမ့ၢ်ပှၤတကဆှီ ဘၣ်တဂၤလီၤ. ဒီးအဝဲကဘၣ်အိၣ်လၢတၢ်သူၣ်ဒဲလီၢ်အချၢလၢ အစီၤစုၤဒီးပှၤဂုၤပှၤဂၤန့ၣ်လီၤ.
47 တၢ်ကူတၢ်သိးလၢအအိၣ်ဒီးတၢ်ဆါအၢလၢအမ့ၢ်တၢ်ကူတၢ်သိးလၢ အဘၣ်တၢ်မၤအီၤလၢသိအဆူၣ်မ့ၢ်ဂ့ၤ, တၢ်ကံးညာ်မ့ၢ်ဂ့ၤ,
48 တၢ်ကံးညာ်လၢဘၣ်တၢ်မၤအီၤလၢလုၣ်မ့ၢ်ဂ့ၤသိဆူၣ်မ့ၢ်ဂ့ၤလၢ တၢ်ဖံးမ့ၢ်ဂ့ၤ, တၢ်တမံၤဂ့ၤတမံၤဂ့ၤလၢအဘၣ်တၢ်မၤအီၤလၢတၢ်ဖံးမ့ၢ်ဂ့ၤ,
49 မ့ၢ်လါထီၣ်ဝဲမ့ၢ်ဂ့ၤ, ဂီၤထီၣ်ဝဲမ့ၢ်ဂ့ၤန့ၣ်မ့ၢ်တၢ်ဆါအၢအတၢ်လဲၢ်ထီၣ်ဒီး, ကဘၣ်ဒုးနဲၣ်အီၤလၢပှၤလုၢ်တၢ်အခိၣ်န့ၣ်လီၤ.
50 ဒီးပှၤလုၢ်တၢ်အခိၣ်ကကွၢ်ဝဲဒီးကပာ်စီၤစုၤဝဲနွံသီန့ၣ်လီၤ.
51 ဒီးလၢနွံသီတသီန့ၣ်ကကွၢ်ကဒီးဝဲတဘျီ, ဒီးတၢ်ဆါအၢန့ၣ်မ့ၢ်လဲၢ်ထီၣ်န့ၣ်တၢ်န့ၣ်မ့ၢ်တၢ်တကဆှီဘၣ်န့ၣ်လီၤ.
52 ဒီးပှၤလုၢ်တၢ်အခိၣ်ကဆိၣ်ကဲၤထီၣ်ကွံာ်အီၤလၢမ့ၣ်အူမ့ၢ်လၢတၢ် ဆါအၢလဲၢ်ထီၣ်ဝဲ, အဃိဒီးကဘၣ်တၢ်မၤဟးဂီၤကွံာ်အီၤလၢမ့ၣ်အူန့ၣ်လီၤ.
53 ဘၣ်ဆၣ်ဒီး, တုၤပှၤလုၢ်တၢ်အခိၣ်ကွၢ်ဝဲဒီးထံၣ်ဝဲလၢတၢ်ဆါအၢ တလဲၢ်ထီၣ်ဘၣ်, လၢတၢ်န့ၣ်အလိၤန့ၣ်,
54 အဝဲကမၤလိာ်ဝဲလၢတၢ်ကံးယာ်န့ၣ်ကဘၣ်တၢ်ဆှုၣ်ကွံာ်အီၤဒီးပာ် စီၤစုၤအီၤဆူညါနွံသီန့ၣ်လီၤ.
55 အန့ၣ်ဝံၤဒီးအဝဲကကွၢ်ဝဲ, ဒီးတၢ်ဆါအၢမ့ၢ်တလဲလိာ်အလွဲၢ်ဒီးတလဲၢ်ထီၣ်ဒၣ်လဲာ်န့ၣ်, မ့ၢ်ဒံးတၢ်တကဆှီဘၣ်န့ၣ်လီၤ. ဒီးနဘၣ်ဆိၣ်ကဲၤထီၣ်ကွံာ်အီၤလၢမ့ၣ်အူဖဲတၢ်ဆါအၢအကဝီၤ အိၣ်လၢအညါပူၤမ့ၢ်ဂ့ၤအချၢမ့ၢ်ဂ့ၤန့ၣ်လီၤ.
56 ဘၣ်ဆၣ်ဒီးဖဲပှၤလုၢ်တၢ်အခိၣ်ကွၢ်ကဒီးဝဲတဘျီ, ဒီးတၢ်ဆါအၢမ့ၢ်တအိၣ်လၢၤဘၣ်န့ၣ်အဝဲကဖှီယာ်ကွံာ်တၢ်ကံးညာ် မ့ၢ်ဂ့ၤတၢ်ဖံးမ့ၢ်ဂ့ၤန့ၣ်လီၤ.
57 အန့ၣ်ဝံၤဒီး, တၢ်ဆါအၢန့ၣ်မ့ၢ်ဖျါထီၣ်က့ၤကဒီးတစုန့ၣ်, တၢ်ဆါအၢအံၤလဲၢ်ထီၣ်ကဒီးဝဲ, ဒီးနကဘၣ်ဆိၣ်ကဲၤထီၣ်ကွံာ်အီၤလၢမ့ၣ်အူန့ၣ်လီၤ.
58 ဒီးဖဲအဆှုၣ်ကွံာ်တၢ်တမံၤန့ၣ်ဒီး, တၢ်ဆါအၢအကဝီၤဟးမၢ်ကွံာ်န့ၣ်, အဝဲကဘၣ်ဆှုၣ်ကဒီးဝဲတဘျီဒီးကကဆှီဝဲဒၣ်ဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်လီၤ.
59 ဒီးတၢ်အံၤမ့ၢ်တၢ်သိၣ်တၢ်သီဘၣ်ဃးတၢ်ဆါအၢလၢအအိၣ်လၢတၢ်ကူ တၢ်သိးလၢအဘၣ်တၢ်မၤအီၤလၢသိအဆူၣ်မ့ၢ်ဂ့ၤ, လုၣ်မ့ၢ်ဂ့ၤ, တၢ်ကံးညာ်မ့ၢ်ဂ့ၤ, တၢ်ဖံးမ့ၢ်ဂ့ၤ, အလိၤဒ်သိးတၢ်ကနီၤဖးအီၤ လၢအကဆှီဒီးတကဆှီဘၣ်ဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်လီၤ.