12
1-2 ယွၤဟ့ၣ်လီၤစီၤမိၤၡ့လၢတၢ်သိၣ်တၢ်ဘျၢဒ်လၢလာ်အသိး, လၢပှၤအံၣ်စရ့လးဖိတဖၣ်အဂီၢ်န့ၣ်လီၤ. ပိာ်မုၣ်တဂၤမ့ၢ်ဆံးစၢ်န့ၣ်အဖိခွါဝံၤအလီၢ်ခံနွံသီအတီၢ် ပူၤန့ၣ်အဝဲကဲထီၣ်တၢ်တကဆှီဒ်အအိၣ်လၢပိာ်မုၣ်အလုၢ်အလၢ်အသိးန့ၣ်လီၤ.
3 ဒီးလၢဃိးသီတသီန့ၣ်ဖိသၣ်ကဘၣ်တၢ်ကူးတရံးအီၤန့ၣ်လီၤ.
4 အန့ၣ်ဝံၤပိာ်မုၣ်အံၤကဘၣ်အိၣ်ဒံးဆူညါသၢဆံသၢသီတုၤလၢ အဘၣ်တၢ်မၤကဆှီအီၤလၢအသွံၣ်အဃိန့ၣ်လီၤ. ဒီးတဘၣ်ထိးကယဲၢ်တၢ်လၢအစီဆှံဝဲမ့ၢ်ဂ့ၤ, တဘၣ်လဲၤနုာ်ဆူတၢ်ဘူၣ်တၢ်ဘါထီၣ်ယွၤအဒဲစီဆှံအပူၤမ့ၢ်ဂ့ၤ, တုၤလၢအဘၣ်တၢ်မၤကဆှီအီၤအမုၢ်နံၤတစုန့ၣ်ဘၣ်.
5 ဘၣ်ဆၣ်ဒီးပိာ်မုၣ်အံၤမ့ၢ်ဆံးစၢ်အဖိမုၣ်ဝံၤအလီၢ်ခံတဆံလွံၢ်သီအတီၢ်ပူၤန့ၣ်အဝဲ ကဲထီၣ်တၢ်တကဆှီဒ်အအိၣ်လၢပိာ်မုၣ်အလုၢ်အလၢ်အသိးန့ၣ်လီၤ. အန့ၣ်ဝံၤ, ပိာ်မုၣ်အံၤကဘၣ်အိၣ်ဒံးဆူ ညါဃုဆံဃုသီတုၤလၢအဘၣ်တၢ်မၤကဆှီအီၤလၢအသွံၣ်အဃိန့ၣ်လီၤ.
6 ဒီးဖဲအဘၣ်တၢ်မၤကဆှီအီၤဝံၤန့ၣ်လၢအဖိပိာ်ခွါအဂီၢ်မ့ၢ်ဂ့ၤ, အဖိမုၣ်အဂီၢ်မ့ၢ်ဂ့ၤအဝဲကဘၣ်ဟဲစိာ်သိဖိတနံၣ်ဖိတဒုလၢတၢ် လုၢ်မ့ၣ်အူအဂီၢ်, ဒီးထိၣ်ကးက့ၣ်တဘ့ၣ်မ့တမ့ၢ်ထိၣ်လွံၢ်ဘုၣ်တဘ့ၣ်လၢတၢ်လုၢ်တၢ် ပျၢ်တၢ်ဒဲးဘးအဂီၢ်, ဆူပှၤလုၢ်တၢ်အခိၣ်အအိၣ်ဖဲတၢ်ဘူၣ်ထီၣ်ဘါထီၣ်ယွၤအဒဲအကျဲစၢၤ န့ၣ်လီၤ.
7 ဒီးပှၤလုၢ်တၢ်အခိၣ်ကလုၢ်ထီၣ်အတၢ်လုၢ်မၤဘူၣ်ဆူယွၤအအိၣ်လၢတၢ် မၤကဆှီထီၣ်က့ၤအီၤအဂီၢ်, ဒီးကကဆှီထီၣ်ဝဲဒၣ်လီၤ. တၢ်အံၤမ့ၢ်တၢ်လၢပိာ်မုၣ်က ဘၣ်မၤဝဲဖဲအဆံးစၢ်ဝံၤအလီၢ်ခံန့ၣ်လီၤ.
8 ပိာ်မုၣ်လၢအလုၢ်ထီၣ်သိဖိတန့ၢ်န့ၣ်ကဘၣ်ဟဲစိာ်ထိၣ်လွံၢ်ဘုၣ်ခံဘ့ၣ် မ့တမ့ၢ်ထိၣ်ကးက့ၣ်ခံဘ့ၣ်န့ၣ်လီၤ. တဘ့ၣ်န့ၣ်လၢတၢ်လုၢ်မ့ၣ်အူ အဂီၢ်ဒီးအဂၤတဘ့ၣ်န့ၣ်လၢတၢ်လုၢ်တၢ်ပျၢ်တၢ်ဒဲးဘးအဂီၢ်န့ၣ်လီၤ. ဒီးပှၤလုၢ်တၢ်အခိၣ်ကလုၢ်ထီၣ်အတၢ်လုၢ်မၤဘူၣ်ဆူ ယွၤအအိၣ်လၢတၢ်မၤကဆှီထီၣ်က့ၤအီၤအဂီၢ်ဒီးကကဆှီထီၣ်ဝဲဒၣ်လီၤ.