19
(ၡါ.၃၇:၁၁-၇)
1 တုၤစီၤဃံးစကံယၤနၢ်ဟူအဝဲသ့ၣ်အတၢ်ပာ်ဖျါထီၣ်တဘျီဃီန့ၣ်, အဝဲဖှီယာ်အဆ့တဖၣ်လၢတၢ်သူၣ်အုးသးအုးအပူၤ, ကၤထီၣ်ဆ့ကၤထၢၣ်တၢ်ကံးညာ်, ဒီးလဲၤဆူယွၤအတၢ်လုၢ်ဟံၣ်န့ၣ်လီၤ.
2 အဝဲမၢလီၤပှၤကွၢ်ထွဲနူၢ်ဧိၤစီၤဧိၤအခိၣ်စီၤအ့ၤလယါကံၣ်, ကွီၢ်ဘျီၣ်အပှၤကွဲးလံာ်ဒိၣ်စီၤၡ့ၤဘနၤဒီးပှၤလုၢ်တၢ်အခိၣ် အဒိၣ်တဖၣ်ဒ်သိးကလဲၤဆူစီၤအၤမိးအဖိခွါဝံယၡါယၤအအိၣ်န့ၣ် လီၤ. အဝဲသ့ၣ်စ့ၢ်ကီးကူသိးဝဲထၢၣ်တၢ်ကံးညာ်န့ၣ်လီၤ.
3 အအံၤမ့ၢ်တၢ်ကစီၣ်လၢအဝဲသ့ၣ်ကဘၣ်တဲဘၣ်ဝံယၡါယၤန့ၣ်လီၤ. “တနံၤအံၤမ့ၢ်တၢ်နးတၢ်ဖှီၣ်အမုၢ်တနံၤန့ၣ်လီၤ. ပဘၣ်တၢ်စံၣ်ညီၣ်ပှၤဒီးပအိၣ်လၢတၢ်မဲာ်ဆှးအပူၤလီၤ. ပလီၤဂာ်ဒ်ပိာ်မုၣ်တဂၤလၢဆံးစၢ်ထီၣ်အဖိအကတီၢ်ဘၣ်လံ ဘၣ်ဆၣ်ဒီး, အဂံၢ်အဘါစၢ်ကဲာ်ဆိးလၢကဆံးစၢ်ဝဲအဂီၢ်အသိးန့ၣ် လီၤ.
4 ကီၢ်အၤၡူၢ်အစီၤပၤဖးဒိၣ်ဆှၢလီၤအပှၤသုးခိၣ်ဖးဒိၣ်အဒိၣ် ကတၢၢ်ဒ်သိးကဒုၣ်ဒွဲၣ်ကစၢ်ယွၤလၢအမူဝဲတဂၤန့ၣ်လီၤ. မ်ယွၤ, နကစၢ်ယွၤနၢ်ဟူတၢ်ဒုၣ်ဒွဲၣ်တဖၣ်ဒီးစံၣ်ညီၣ်ပှၤတဖၣ်လၢ အစံးတ့ၢ်တၢ်န့ၣ်တက့ၢ်. မၤသးဒ်န့ၣ်ဒီး, ဃ့ဘါထုကဖၣ်ဆူယွၤလၢပပှၤဂီၢ်မုၢ်လၢအအိၣ်လီၤတဲာ်ဒံးတဖၣ် အဂီၢ်န့ၣ်တက့ၢ်.
5 တုၤစီၤယၡါယၤဒိးန့ၢ်ဘၣ်စီၤပၤဃံးစကံယၤအတၢ်ကစီၣ်န့ၣ်,
6 အဝဲဆှၢကဒါက့ၤတၢ်စံးဆၢဒ်အံၤလီၤ. “ယွၤတဲဘၣ်နၤလၢနသုတပျဲပှၤအၤၡူၢ်ဖိတဖၣ်မၤပျံၤမၤဖုး နၤခီဖျိအဝဲသ့ၣ်အတၢ်တဲလၢ, ယွၤအုၣ်က့ၤခီၣ်က့ၤနၤတသ့ ဘၣ်န့ၣ်တဂ့ၤ.”
7 ယွၤကမၤဒ်သိးကီၢ်အၤၡူၢ်အစီၤပၤဖးဒိၣ်ကနၢ်ဟူဘၣ်တၢ်က စီၣ်ပစံၣ်ပစိတမံၤ, လၢအကဒုးက့ၤကဒါက့ၤအီၤဆူအထံ အကီၢ်ဒၣ်ဝဲ, ဒီးယွၤကမၤသံအီၤဖဲန့ၣ်, န့ၣ်လီၤ.
(ၡါ.၃၇:၈-၂၀)
8 ကီၢ်အၤၡူၢ်အသုးခိၣ်သ့ၣ်ညါဘၣ်ဝဲလၢစီၤပၤဖးဒိၣ်ဟးထီၣ် ကွံာ်လၢဝ့ၢ်လၤကံၣ်ဒီးဒုးတၢ်ထီဒါဝ့ၢ်အိၣ်ဘူးလၢအမ့ၢ်လံး ဘနၤန့ၣ်လီၤ. လၢတၢ်န့ၣ်အဃိ, အဝဲလဲၤဖဲန့ၣ်လၢကကူၣ်သကိးဖးသကိးအဂီၢ်န့ၣ်လီၤ.
9 တၢ်ကစီၣ်ဟဲတုၤဝဲဆူပှၤအၤၡူၢ်ဖိတဖၣ်အအိၣ်လၢပှၤအဲၤကူပတူး ဖိအသုးမုၢ်လၢအဘၣ်တၢ်ပၢဆှၢအီၤလၢကီၢ်ကူၤၡးအစီၤပၤတံ ရဟၤကၤ, ဟဲထီၣ်လၢကဒုးအဝဲသ့ၣ်န့ၣ်လီၤ. ဖဲစီၤပၤဖးဒိၣ်နၢ်ဟူတၢ်အံၤန့ၣ်, အဝဲဆှၢလီၤလံာ်ပရၢတဘ့ၣ် ဆူကီၢ်ယူဒၤအစီၤပၤဃံးစကံယၤအအိၣ်,
10 လၢအကစံးဘၣ်အီၤဒ်အံၤ, “နကစၢ်လၢနနာ်အီၤတဂၤစံးဘၣ်နၤလၢ နတလီၤကွံာ်ဘၣ်ဆူယစုပူၤဘၣ်. ဘၣ်ဆၣ်ဒီးပျဲတၢ်န့ၣ်လီန့ၢ်နၤတဂ့ၤ.
11 နနၢ်ဟူတ့ၢ်တၢ်လၢကီၢ်အၤၡူၢ်အစီၤပၤဖးဒိၣ်မၤဘၣ်ထံကီၢ်တဘ့ၣ် ဘ့ၣ်လၢအဝဲပာ်လီၤအသးလၢကမၤဟးဂီၤဝဲန့ၣ်ဒ်လဲၣ်န့ၣ်လီၤ. မ့ၢ်နဆိကမိၣ်လၢနပူၤဖျဲးကသ့န့ၣ်ဧါ.
12 အပၢ်ဖးဒိၣ်လၢပျၢၤတဖၣ်မၤဟးဂီၤတ့ၢ်ဝ့ၢ်တဖၣ်လၢအမ့ၢ်ဝဲ, ကိစၣ်, ဃရၣ်, ရ့စ့းဒီးမၤသံကွံာ်ဧ့ဒ့ၣ်အပှၤဂီၢ်မုၢ်တဖၣ်လၢ အအိၣ်ဆိးဝဲဖဲဝ့ၢ်တံၤသလးစၢ်အပူၤ, ဒီးအဝဲသ့ၣ်အယွၤကစၢ်တဖၣ်မၤပူၤဖျဲးအဝဲသ့ၣ်တသ့ဘၣ်နီတဂၤ ဘၣ်.
13 ဝ့ၢ်တဖၣ်လၢအမ့ၢ်ဃမါသး, အၢ်ဖး, စဖၤရဝံၣ်, ဟ့နၤဒီးဧးဝါအစီၤပၤတဖၣ်မ့ၢ်အအိၣ်ဖဲလဲၣ်.
14 စီၤပၤဃံးစကံယၤဟံးန့ၢ်လံာ်ပရၢန့ၣ်လၢပှၤစိာ်တၢ်ကစီၣ်တဖၣ် အအိၣ်ဒီးဖးဝဲလီၤ. ဝံၤဒီးအဝဲလဲၤထီၣ်ဆူယွၤအဟံၣ်, ပာ်ထီၣ်လံာ်ပရၢဖဲန့ၣ်လၢယွၤအမဲာ်ညါ,
15 ဒီးဃ့ဘါထုကဖၣ်ဝဲဒ်အံၤ, “အိယွၤ, ကီၢ်အံၣ်စရ့လးအကစၢ်ယွၤ, လၢအဆ့ၣ်နီၤဝဲလၢလီၢ်ပစိာ်အိၣ်ဝဲလၢခ့ရူၢ်တဖၣ်အလိၤ တဂၤဧၢ, နမ့ၢ်နဲကစၢ်ယွၤထဲတဂၤဧိၤ, လၢကပၢကယဲၢ်ဘီမုၢ်ခဲလၢာ်လၢဟီၣ်ခိၣ်ချၢန့ၣ်လီၤ. နတ့လီၤပာ်လီၤဟီၣ်ခိၣ်ဒီးမူကပိာ်လိၤန့ၣ်လီၤ.
16 ခဲကနံၣ်အံၤယွၤဧၢ, ကွၢ်တၢ်လၢအမၤအသးဒီးပှၤအံၤတက့ၢ်. ဒိကနၣ်ကယဲၢ်တၢ်ခဲလၢာ်လၢစီၤစၤနဃ့ရံာ်ကတိၤဒုၣ်ဒွဲၣ်နၤ, ကစၢ်ယွၤလၢအမူဝဲန့ၣ်တက့ၢ်.
17 ယွၤဧၢ, ပဝဲခဲလၢာ်ပသ့ၣ်ညါလၢကီၢ်အၤရူၢ်အစီၤပၤဖးဒိၣ်တဖၣ် မၤဟးဂီၤကွံာ်တ့ၢ်ပှၤကလုာ်တဖၣ်ဒီးဒုးကဲထီၣ်အထံအကီၢ်တဖၣ် လၢတၢ်အိၣ်သယုၢ်အလီၢ်,
18 ဒီးဒွဲၣ်အူကွံာ်အဝဲသ့ၣ်အကစၢ်တဖၣ်, လၢအတမ့ၢ်ဘၣ်ကစၢ်လ့ၤတ က့ၤ, မ့ၢ်ဒၣ်ထဲတၢ်ဂီၤတၢ်ဖီၣ်တဖၣ်လၢပှၤကညီမၤအီၤလၢသ့ၣ်ဒီးလၢၢ် န့ၣ်လီၤ.
19 ခဲကနံၣ်အံၤ, ယွၤပကစၢ်ယွၤဧၢ, မၤပူၤမၤဖျဲးပှၤလၢပှၤအၤၡူၢ် ဖိတဖၣ်အစုပူၤဒ်သိးကယဲၢ်ပှၤကလုာ်ခဲလၢာ်လၢဟီၣ်ခိၣ်ချၢကသ့ၣ် ညါဝဲလၢထဲနၤတဂၤဧိၤနမ့ၢ်ကစၢ်ယွၤတက့ၢ်, အိယွၤဧၢ.”
(ၡါ.၃၇:၂၁-၃၈)
20 အန့ၣ်ဝံၤဒီးစီၤယၡါယၤဆှၢလီၤတၢ်ကစီၣ်တမံၤတဲဘၣ်စီၤပၤ ဃံးစကံယၤလၢ, လၢတၢ်စံးဆၢစီၤပၤအတၢ်ထုကဖၣ်အဂီၢ်န့ၣ်,
21 ယွၤစံးတ့ၢ်ဒ်အံၤ, “ဝ့ၢ်ယရူၤၡလ့ၣ်နံၤဘၣ်ဖၣ်လဲနၤ, စီၤစၤနဃ့ရံာ်ဧၢ, ဒီးဒုၣ်ဒွဲၣ်ပယွဲနၤလီၤ.
22 နဆိကမိၣ်လၢနဒုၣ်ဒွဲၣ်စံးဆၢဒီးနံၤဘၣ်ဖၣ်လဲမတၤန့ၣ်လဲၣ်. နတပာ်ကဲဘၣ်ယၤ, ကီၢ်အံၣ်စရ့လးအကစၢ်ယွၤစီဆှံတဂၤန့ၣ်ဘၣ်.
23 နဆှၢလီၤနပှၤစိာ်တၢ်ကစီၣ်တဖၣ်လၢကကတိၤဒိၣ်ကတိၤသွါလီၤအသး လၢယဖီခိၣ်ဒီးစံးလၢနမၤနၢၤကွံာ်ကီၢ်လဘၤနိၣ်ကစၢၢ်အထီကတၢၢ် တဖၣ်, လၢနလ့ၣ်ကဟၣ်ခဲလၢာ်န့ၣ်လီၤ. နကတိၤပာ်ကဖၢလၢလီၤနသးလၢ, ဖဲန့ၣ်နကူာ်လီၤကွံာ်သ့ၣ်ဆှိအ့ရ့းအထီကတၢၢ်တဖၣ်ဒီးသ့ၣ်ဆှိ အဂ့ၤကတၢၢ်တဖၣ်, ဒီးနလဲၤတုၤဆူသ့ၣ်ပှၢ်တဖၣ်အတီၣ်ကတၢၢ်အလီၢ်ကဝီၤတဖၣ်န့ၣ်လီၤ.
24 နကတိၤပာ်ကဖၢလၢလီၤနသးလၢနခူၣ်ထံပူၤတဖၣ်, ဒီးအီတ့ၢ်ထံလၢတခီထံတခီကီၢ်တဖၣ်အပူၤဒီးနသုးဖိသံၣ်ဖိ တဖၣ်အခီၣ်ကယီၢ်လီၤသံးကွံာ်ထံကျိနံၤလါန့ၣ်လီၤ.
25 မ့ၢ်နတနၢ်ဟူဘၣ်တ့ၢ်နီတစုလၢ, ယကူၣ်ကျဲၤတ့ၢ်တၢ်အံၤလၢပျၢၤ လံၤလံၤန့ၣ်ဘၣ်ဧါ. ဒီးခဲကနံၣ်အံၤယမၤလၢထီၣ်ပှဲၤထီၣ်အီၤလံ. ယဟ့ၣ်လီၤနၤတၢ်စိတၢ်ကမီၤလၢအကဘိးဃၣ်ကွံာ်ဝ့ၢ်တဖၣ်လၢအဘၣ်တၢ် မၤခၢၣ်သနၢၣ်အီၤဆူတၢ်ဟးဂီၤအပူၣ်တဖၣ်န့ၣ်လီၤ.
26 ပှၤဂီၢ်မုၢ်လၢအအိၣ်ဝဲဆိးဝဲဖဲန့ၣ်အစိအကမီၤတအိၣ်ဘၣ်. အဝဲသ့ၣ်ပျံၤတၢ်ဖုးတၢ်ဒီးအသးလီၤကတုၤဝဲလီၤ. အဝဲသ့ၣ်လီၤဂာ်ဒ်တပံၢ်တမါလၢပျီတဘ့ၣ်အပူၤအသိးမ့ၢ်ဂ့ၤ, နီၣ် တဖၣ်လၢအမဲထီၣ်လၢတၢ်ခိၣ်ဒူတခါအလိၤမ့ၢ်ဂ့ၤ, ဖဲမုၢ်ထီၣ်ကလံၤ ကိၢ်အူဘၣ်အီၤဆူၣ်ဆူၣ်န့ၣ်လီၤ.
27 ဘၣ်ဆၣ်ဒီးယသ့ၣ်ညါနဂ့ၢ်နကျိၤခဲလၢာ်, နမၤတၢ်မနုၤလဲၣ်ဒီး နလဲၤဖဲလဲၣ်န့ၣ်လီၤ. ယသ့ၣ်ညါနသးကဲၤထီၣ်ထီဒါယၤဒ်လဲၣ်န့ၣ်လီၤ.
28 ယဒိးန့ၢ်တ့ၢ်, တၢ်ပာ်ဖျါဘၣ်ထွဲဒီးနတၢ်သးကဲၤထီၣ်န့ၣ်ဒီး နတၢ်ပာ်ထီၣ်ထီနသးန့ၣ်, ဒီးခဲကနံၣ်အံၤယကတုၢ်နနါဒ့လၢနီၣ်ကွးတခါ, ဒီးပျံာ်နထးခိၣ်လၢနိးပျံာ်ထးတဘိဒီးက့ၤမိၤကဒါက့ၤနၤ လၢကျဲတဘိဃီလၢနဟဲတ့ၢ်နဲန့ၣ်လီၤ.”
29 ဝံၤဒီးစီၤယၡါယၤစံးဘၣ်စီၤပၤဃံးစကံယၤဒ်အံၤ, “အအံၤမ့ၢ်တၢ်ပနီၣ်တမံၤလၢကမၤအသးန့ၣ်လီၤ. တနံၣ်အံၤဒီးခဲကိာ်တနံၣ်သုကအီၣ်ဘၣ်ထဲဘုဧိၤဟုဧိၤလၢအမဲ ထီၣ်ဒၣ်တၢ်, မ့မ့ၢ်, နံၣ်လၢအကပိာ်ထွဲထီၣ်အခံတနံၣ်န့ၣ်သုသူၣ်လီၤသုဘု ဧိၤဟုဧိၤကသ့ဝဲဒီးကူးက့ၤအီၤ, ဒီးသူၣ်စပံးမုၢ်တဖၣ်ဒီးအီၣ်စပံးသၣ်တဖၣ်န့ၣ်လီၤ.
30 ပှၤတဖၣ်လၢကီၢ်ယူဒၤအပူၤလၢအအိၣ်လီၤတဲာ်တ့ၢ်န့ၣ်, ကဂုၤထီၣ်ပသီထီၣ်ဝဲဒ်တၢ်မုၢ်တၢ်ဘိတဖၣ်အသိးလၢအစဲၤလီၤအဂံၢ် တဖၣ်ယိာ်ယိာ်ဆူဟီၣ်ခိၣ်အပူၤဒီးဟ့ၣ်ထီၣ်အတၤသၣ်တဖၣ်န့ၣ်လီၤ.
31 ပှၤဂီၢ်မုၢ်ကအိၣ်ဒံးဝဲလၢဝ့ၢ်ယရူၤၡလ့ၣ်အပူၤဒီးလၢကစၢၢ်စံ ယိၣ်အဒီခိၣ်, ပှၤတဖၣ်လၢကအိၣ်လီၤတဲာ်တ့ၢ်ဒံး, မ့ၢ်လၢယွၤပာ်လီၤတ့ၢ်အသးလၢကဒုးကဲထီၣ်တၢ်အံၤအဃိန့ၣ်လီၤ.
32 အအံၤမ့ၢ်တၢ်လၢယွၤစံးတ့ၢ်ဝဲဘၣ်ဃးဒီးကီၢ်အၤၡူၢ်အစီၤပၤ ဖးဒိၣ်အဂ့ၢ်န့ၣ်လီၤ. အဝဲတဟဲနုာ်ဘၣ်ဆူဝ့ၢ်အံၤအပူၤမ့ၢ်ဂ့ၤ, ခးဘၣ်ပျၢ်ထဲတဘိဒၣ်လဲာ်ထီဒါအီၤမ့ၢ်ဂ့ၤန့ၣ်ဘၣ်. ပှၤသုးဖိတဖၣ်လၢအအိၣ်ဒီးကတီၤတဖၣ်တဟဲဘူးဘၣ်ဒီးဝ့ၢ်အံၤနီ တဂၤဘၣ်ဒီးတၢ်ကဝီၤဃာ်အဟီၣ်ခိၣ်ထီၣ်ထီတဘၣ်တၢ်မၤထီၣ်ဝးတရံး အီၤနီတတီၤဘၣ်.
33 အဝဲကက့ၤကဒါက့ၤလၢကျဲတဘိဃီလၢအဟဲဝဲန့ၣ်, တအိၣ်ဒီးတၢ်လဲၤနုာ်ဆူဝ့ၢ်အံၤအပူၤဘၣ်, ယၤ, ယွၤအံၤကတိၤလံတၢ်လံ.
34 ယကကဟုကယာ်ဝ့ၢ်အံၤဒီးဒီဒၣ်အိၣ်ပှိၤအီၤလၢယလၤကပီၤဒၣ်ယဲ အဂီၢ်ဒီးမ့ၢ်လၢတၢ်အၢၣ်လီၤအီလီၤလၢယမၤတ့ၢ်ဒီးယခ့ယပှၤစီၤ ဒၤဝံးအဃိန့ၣ်လီၤ.”
35 လၢမုၢ်တနၤန့ၣ်, ယွၤအကလူးတဂၤလဲၤဆူပှၤအၤၡူၢ်ဖိအသူၣ်ဒဲ အလီၢ်ဒီးမၤသံကွံာ်ပှၤသုးဖိအဂၤတကလီၢ်ဃိးကလးဒီးယဲၢ်ကထိန့ၣ်လီၤ. လၢမုၢ်ဆ့ၣ်ထီၣ်တနံၤဂီၤဂီၤန့ၣ်, ဖဲန့ၣ်အိၣ်ထဲပှၤသံစိၣ်တဖၣ်လီၤ.
36 အန့ၣ်တစုကီၢ်အၤၡူၢ်အစီၤပၤဖးဒိၣ်စီၤစၤနဃ့ရံာ်ဂုၤက့ၤဆူ အလီၢ်ခံဒီးက့ၤကဒါက့ၤဆူဝ့ၢ်နံၤနဝ့န့ၣ်လီၤ.
37 ဘၣ်မုၢ်တနံၤဖဲအဝဲဘူၣ်တၢ်ဘါတၢ်လၢအကစၢ်နံစရိးအတၢ်လုၢ်ဟံၣ် အပူၤအခါန့ၣ်အဖိခွါခံဂၤလၢအမ့ၢ်စီၤအဒြၤမ့လ့းဒီးစီၤ ၡၢ်အ့စ့ၢ်တဖၣ်မၤသံကွံာ်အီၤလၢအဝဲသ့ၣ်အနးတဖၣ်, ဝံၤဃ့ၢ်ပူၤဖျဲးကွံာ်အသးဆူကီၢ်အရၤရးန့ၣ်လီၤ. အဝဲအဖိခွါတဖၣ်အဂၤတဂၤလၢအမ့ၢ်စီၤအ့ၤစၢ်ဃးဒိၣ်ကဲထီၣ်စီၤ ပၤဖးဒိၣ်လၢအဝဲအလီၢ်န့ၣ်လီၤ.