20
(ၡါ.၃၈:၁-၈, ၂၁-၂၂, ၂ကွဲး.၃၂:၂၄-၂၆)
1 ဖဲတၢ်ဆၢကတီၢ်အပူၤအတ့ၤအံၤ, စီၤပၤဃံးစကံယၤဆါထီၣ်ဝဲ ဒီးဘူးတ့ၢ်မးလၢအကသံန့ၣ်လီၤ. စီၤအၤမိာ်အဖိခွါဝံယၡါယၤလဲၤဆူအအိၣ်ဒီးစံးဘၣ်အီၤ, “ယွၤတဲဘၣ်နၤလၢနကဘၣ်သုးကျဲၤပာ်တၢ်ခဲလၢာ်ဘၣ်လီၢ်ဘၣ်စး, မ့ၢ်လၢနတဘျါက့ၤလၢၤဘၣ်အဃိလီၤ. အိၣ်ကတဲာ်ကတီၤနသးလၢနကသံအဂီၢ်န့ၣ်တက့ၢ်.”
2 စီၤဃံးစကံယၤဃၣ်ဃီၤအမဲာ်ဆူတၢ်ဒူၣ်ဒီးဘါထုကဖၣ်ယွၤ, စံးဝဲဒၣ်,
3 “ယွၤဧၢ, သ့ၣ်နီၣ်ထီၣ်က့ၤလၢ, ယမၤတ့ၢ်နတၢ်မၤလၢတၢ်သးတီ ဒီးတၢ်ကလုၢ်တီအပူၤ, ဒီးလၢထီဘိယကျဲးစၢးမၤတၢ်လၢနအဲၣ်ဒိးယမၤန့ၣ်တက့ၢ်.” ဒီးအဝဲစးထီၣ်ဟီၣ်ဝဲနးနးကလဲာ်န့ၣ်လီၤ.
4 စီၤယၡါယၤဟးထီၣ်ကွံာ်လၢစီၤပၤအအိၣ်, ဘၣ်ဆၣ်တချုးဒံးလၢ အဝဲလဲၤခီဖျိကွံာ်နူၢ်ဧိၤစီၤဧိၤအဂၢၤအသးကံၢ်ပူၤဒံးဘၣ်န့ၣ်ယွၤ တဲဘၣ်အီၤလၢ,
5 ကက့ၤကဒါက့ၤဆူယွၤအပှၤဂီၢ်မုၢ်အပှၤပၢတၢ်စီၤဃံးစကံယၤ အအိၣ်ဒီးစံးဘၣ်အီၤ, “ယၤ, ကစၢ်, နပၢ်ဖးဒိၣ်လၢပျၢၤစီၤဒၤဝံးကစၢ်အယွၤ, နၢ်ဟူလံနတၢ်ထုကဖၣ်ဒီးထံၣ်လံ နမဲာ်ထံတဖၣ်လံ. ယကမၤဘျါက့ၤနၤဒီး, ဒီးလၢသၢသီ အတီၢ်ပူၤန့ၣ်နကလဲၤဆူယွၤအတၢ်လုၢ်ဟံၣ်န့ၣ်လီၤ.
6 ယကဒုးအိၣ်မူဒံးနၤဆူညါတဆံယဲၢ်နံၣ်န့ၣ်လီၤ. ယကမၤပူၤဖျဲးနၤဒီးဝ့ၢ်ယရူၤၡလ့ၣ်အံၤလၢကီၢ်အၤၡူၢ်အစီၤပၤ ဖးဒိၣ်အစုပူၤန့ၣ်လီၤ. ယကဒီဒၣ်အိၣ်ပှိၤဝ့ၢ်အံၤလၢယလၤကပီၤဒၣ်ယဲအဂီၢ်ဒီးလၢတၢ်အၢၣ် လီၤလၢယမၤတ့ၢ်အီၤဒီးယခ့ယပှၤစီၤဒၤဝံးအဃိန့ၣ်လီၤ.”
7 အန့ၣ်ဒီး, စီၤယၡါယၤတဲဘၣ်စီၤပၤအခ့အပှၤတဖၣ်လၢက ကျးလီၤန့ၢ်စီၤဃံးစကံယၤအတၢ်ဝ့အပူၤလီၢ်လၢကသံၣ်ကျးလၢတၢ် မၤအီၤလၢချၢၣ်ဒၢသၣ်တဖၣ်, ဒီးအဝဲကဘျါက့ၤန့ၣ်လီၤ.
8 စီၤပၤဃံးစကံယၤသံကွၢ်ဝဲဒၣ်, “တၢ်အပနီၣ်လၢကအုၣ်အသးလၢ ယွၤကမၤဘျါက့ၤယၤဒီးသၢသီဝံၤအလီၢ်ခံယလဲၤဆူယွၤအတၢ်လုၢ် ဟံၣ်ကသ့န့ၣ်, မ့ၢ်မနုၤလဲၣ်.”
9 စီၤယၡါယၤစံးဆၢဝဲဒၣ်, “ယွၤကစၢ်, ကဟ့ၣ်နၤတၢ်ပနီၣ်တမံၤ လၢကအုၣ်အသးလၢအဝဲကဟံးဃာ်အတၢ်အၢၣ်လီၤန့ၣ်လီၤ. ခဲအံၤ, မ့ၢ်နကအဲၣ်ဒိးလၢတၢ်ကဒုလၢမုၢ်အနၣ်ရံၣ်အလိၤကလဲၤဆူ ညါအတီၤတဆံဧါမ့တမ့ၢ်ကဘၣ်က့ၤကဒါက့ၤအတီၤတဆံဧါ.”
10 စီၤဃံးစကံယၤစံးဆၢဝဲဒၣ်, “တၢ်ဒုးလဲၤတၢ်ကဒုဆူညါအတီၤ တဆံန့ၣ်တကီဘၣ်. မ်အက့ၤကဒါက့ၤအတီၤတဆံတက့ၢ်.”
11 စီၤယၡါယၤဃ့ဘါထုကဖၣ်တၢ်ဆူယွၤ, ဒီးယွၤဒုးက့ၤကဒါက့ၤ တၢ်ကဒုအတီၤတဆံလၢမုၢ်အနၣ်ရံၣ်လၢစီၤပၤအၤဃးမၤထီၣ်တ့ၢ် အီၤအလိၤန့ၣ်လီၤ.
(ၡါ.၃၉:၁-၈)
12 ဖဲတၢ်ဆၢကတီၢ်တကတီၢ်ဃီအံၤန့ၣ်စီၤဘၤလဒၣ်အဖိခွါကီၢ်ဘၤဘူၤ လိၣ်အစီၤပၤစီၤမရိဒးဘၤလဒၣ်နၢ်ဟူဘၣ်လၢစီၤပၤဃံးစကံယၤ ဆါထီၣ်ဝဲအဃိ, အဝဲဆှၢလီၤန့ၢ်အီၤလံာ်ပရၢတဘ့ၣ်ဒီးတၢ်ဟ့ၣ်ကနၢၤတခါန့ၣ်လီၤ.
13 စီၤဃံးစကံယၤတူၢ်လိာ်မုာ်ပှၤစိာ်တၢ်ကစီၣ်တဖၣ်န့ၣ်ဒီးဒုး နဲၣ်အဝဲသ့ၣ်လၢအဝဲအတၢ်ထူးတၢ်တီၤလၢအမ့ၢ်, အဝဲအစ့ဒီးအထူ , အတၢ်နၢမူနၢဆှီတဖၣ်ဒီးထံနၢမူတဖၣ်ဒီး ကယဲၢ်အဝဲအသုးအစုကဝဲၤပီးလီတဖၣ်န့ၣ်လီၤ. လၢအဝဲအတၢ်ပာ်ဖှိၣ်အဒၢးတဖၣ်အပူၤမ့ၢ်ဂ့ၤ, လၢအဝဲအဘီအမုၢ်တပူၤလၢ်လၢ်မ့ၢ်ဂ့ၤန့ၣ်, တၢ်လၢအဝဲ တဒုးနဲၣ်အဝဲသ့ၣ်, တအိၣ်ဘၣ်နီတမံၤဘၣ်.
14 တုၤနုၤတစုဝံယၡါယၤလဲၤဆူစီၤပၤဃံးစကံယၤအအိၣ်ဒီးသံ ကွၢ်အီၤ, “ပှၤတဖၣ်အံၤဟဲလၢလဲၣ်ခီလဲၣ်ဒီးအဝဲသ့ၣ်စံးဘၣ်နၤတၢ်မနုၤ လဲၣ်.”
စီၤဃံးစကံယၤစံးဆၢဝဲဒၣ်, “အဝဲသ့ၣ်ဟဲဝဲလၢထံကီၢ်လၢ အယံၤမးတဘ့ၣ်လၢအမ့ၢ်ကီၢ်ဘၤဘူၤလိၣ်န့ၣ်လီၤ.”
15 “အဝဲသ့ၣ်ထံၣ်ဘၣ်တၢ်မနုၤလၢနူၢ်ဧိၤစီၤဧိၤအပူၤလဲၣ်.” “အဝဲသ့ၣ်ထံၣ်ဘၣ်တၢ်ခဲလၢာ်လီၤ. တၢ်လၢယတဒုးနဲၣ်ဘၣ်အဝဲသ့ၣ် လၢတၢ်ပာ်ဖှိၣ်အဒၢးတဖၣ်အပူၤန့ၣ်တအိၣ်နီတမံၤဘၣ်.”
16 ဒီးဝံယၡါယၤစံးဘၣ်စီၤပၤ, “ယွၤသ့တၢ်လၢာ်ကစၢ်စံးဝဲ ဒၣ်လၢ,
17 တၢ်ဆၢကတီၢ်ဟဲလံဝဲလၢတၢ်ကိးမံၤလၢနနူၢ်ပူၤစီၤပူၤ, တၢ်ကိးမံၤဒဲးလၢနပၢ်ဖးဒိၣ်လၢပျၢၤတဖၣ်ပာ်ဖှိၣ်အီၤတုၤမုၢ် မဆါတနံၤအံၤ, ကဘၣ်တၢ်စိာ်ကွံာ်အီၤဆူကီၢ်ဘၤဘူၤလိၣ်န့ၣ်လီၤ. တၢ်တအိၣ်လီၤတဲာ်ဘၣ်နီတမံၤဘၣ်.”
18 နနီၢ်ကစၢ်ဒၣ်နဲ, နစၢၤနသွဲၣ်လိၤလိၤတနီၤကဘၣ်တၢ်စိာ်ကွံာ်အီၤ, ဒီးဒုးကဲထီၣ်အီၤလၢပှၤဒ့ဒံၣ်ဖိတဖၣ်လၢကမၤတၢ်လၢကီၢ်ဘၤ ဘူၤလိၣ်အစီၤပၤအနူၢ်ပူၤစီၤပူၤန့ၣ်လီၤ.
19 စီၤပၤဃံးစကံယၤနၢ်ပၢၢ်ဝဲလၢတၢ်အံၤအခီပညီကမ့ၢ်, တၢ်ဃူတၢ်ဖိးဒီးတၢ်ဘံၣ်တၢ်ဘၢကအိၣ်ဝဲဖဲအဝဲအိၣ်မူဒံးအ ခါ, အဃိစံးဆၢဝဲဒၣ်, “ယွၤအတၢ်ကစီၣ်လၢနဟ့ၣ်ယၤအံၤ, ဂ့ၤဝဲလီၤ.”
(၂ကွဲး.၃၂:၃၂-၃၃)
20 ကယဲၢ်တၢ်အဂၤလၢစီၤပၤဃံးစကံယၤမၤတ့ၢ်ဝဲ, အဝဲအတၢ်မၤအဒူအဃိၤတဖၣ်, ဒီးတၢ်ကွဲးနီၣ်ဘၣ်ဃးဒီးအဝဲဘှီ ထီၣ်ကမါပဒၢးထံတဖျၢၣ်ဒီးအတၢ်ခူၣ်ထံကျိၤတကျိၤလၢကဟဲစိာ် နုာ်ထံဆူဝ့ၢ်ပူၤအဂ့ၢ်အကျိၤခဲလၢာ်န့ၣ်ဘၣ်တၢ်ကွဲးအီၤလၢ ကီၢ်ယူဒၤအစီၤပၤတဖၣ်အလံာ်တၢ်စံၣ်စိၤတဲစိၤအပူၤန့ၣ်လီၤ.
21 စီၤဃံးစကံယၤသံဝဲဒီးအဖိခွါစီၤမနၤၡ့ၤကဲထီၣ်စီၤပၤ လၢအလီၢ်န့ၣ်လီၤ.