18
(၂ကွဲး.၂၉:၁-၂, ၃၁:၁)
1 လၢစီၤအ့လၤအဖိခွါစီၤဟိၤၡ့ပၢတၢ်ဒ်ကီၢ်အံၣ်စရ့လးအစီၤ ပၤအသိးသၢနံၣ်တနံၣ်အပူၤန့ၣ်စီၤအၤဃးအဖိခွါစီၤဃံးစကံ ယၤကဲထီၣ်ကီၢ်ယူဒၤအစီၤပၤ,
2 ဖဲအသးအိၣ်ခံဆံယဲၢ်နံၣ်ဒီးအဝဲပၢတၢ်ဖဲဝ့ၢ်ယရူၤၡလ့ၣ်အပူၤ ခံဆံနွံနံၣ်န့ၣ်လီၤ. အဝဲအမိၢ်မ့ၢ်ဝဲနီၢ်အဘံယၤ, လၢအမ့ၢ်စီၤစကၤရယၤအဖိမုၣ်န့ၣ်လီၤ.
3 ဒ်အပၢ်ဖးဒိၣ်လၢပျၢၤစီၤဒၤဝံးအဒိအတဲာ်အသိးန့ၣ်, အဝဲမၤဝဲတၢ်လၢအဘၣ်ယွၤအသးန့ၣ်လီၤ.
4 အဝဲမၤဟးဂီၤကွံာ်ပှၤတစူၢ်တနာ်ယွၤအတၢ်ဘူၣ်ထီၣ်ဘါထီၣ်ယွၤ အလီၢ်တဖၣ်, မၤကၢ်လီၤကွံာ်လၢၢ်ထူၣ်တဖၣ်ဒီးကူာ်လီၤကွံာ်ကစၢ်မုၣ်အၡ့ရၤ အဂီၤန့ၣ်လီၤ. အဝဲမၤကၢ်လီၤကလဲကွံာ်စ့ၢ်ကီးဂုၢ်တိၢ်ဘီလၢစီၤမိၤၡ့မၤ န့ၢ်ဝဲလၢအဘၣ်တၢ်ကိးအီၤလၢနဃူၡတၣ်န့ၣ်လီၤ. လၢတၢ်မၤလၤကပီၤဂုၢ်တိၢ်ဘီန့ၣ်အဂီၢ်ကီၢ်အံၣ်စရ့လးအပှၤဂီၢ် မုၢ်ဆိၣ်ကဲၤထီၣ်တၢ်နၢမူတုၤလီၤလၢဆၢကတီၢ်အဝဲန့ၣ်လီၤ.
5 စီၤဃံးစကံယၤပာ်အတၢ်နာ်လၢယွၤ, အံၣ်စရ့လးအကစၢ်ယွၤအပူၤလီၤ. ကီၢ်ယူဒၤတအိၣ်ဘၣ်ဒီးစီၤပၤအဂၤတဂၤဒ်သိးဒီးအီၤနီတစုလၢ အဝဲအမဲာ်ညါမ့ၢ်ဂ့ၤ, အလီၢ်ခံမ့ၢ်ဂ့ၤဘၣ်န့ၣ်လီၤ.
6 အဝဲအသးတီဒီးယွၤဒီးစူၢ်အီၤထီဘိ, ဒီးတိၢ်န့ၢ်ဖံးဃာ် ကယဲၢ်တၢ်မၤလိာ်တဖၣ်ခဲလၢာ်လီၤတံၢ်လီၤဆဲး, လၢယွၤဟ့ၣ်လီၤတ့ၢ်စီၤမိၤၡ့န့ၣ်လီၤ.
7 လၢတၢ်န့ၣ်အဃိယွၤအိၣ်ဒီးအီၤ, ဒီးကယဲၢ်တၢ်လၢအဝဲ မၤတ့ၢ်ဝဲခဲလၢာ်န့ၣ်ကဲထီၣ်လိၣ်ထီၣ်ဝဲဒၣ်န့ၣ်လီၤ. အဝဲပူထီၣ်တၢ်ထီဒါကီၢ်အၤၡူၢ်အစီၤပၤဖးဒိၣ်ဒီးဂ့ၢ်လိာ်လၢ ကဟ့ၣ်လီၤအသးလၢအဝဲအစုပူၤန့ၣ်လီၤ.
8 အဝဲမၤနၢၤကွံာ်ပှၤဖလ့ၡသးဖိတဖၣ်ဒီးနုာ်လီၤဒုးန့ၢ်အဝဲ သ့ၣ်အတၢ်အိၣ်တၢ်ဆိးအလီၢ်တဖၣ်, စးထီၣ်လၢသဝီအဆံးကတၢၢ်တဖျၢၣ်ဒီးတုၤလၢဝ့ၢ်အဒိၣ်ကတၢၢ်တ ဖျၢၣ်, ဃုာ်ဒီးဝ့ၢ်ဂါစၤဒီးလီၢ်ကဝီၤလၢအအိၣ်ဝးတရံးအီၤန့ၣ်လီၤ.
9 လၢစီၤဃံးစကံယၤပၢတၢ်လွံၢ်နံၣ်တနံၣ်အပူၤ, လၢအမ့ၢ်ဝဲတၢ်ဆၢကတီၢ်ဖဲစီၤပၤဟိၤၡ့ပၢတၢ်လၢကီၢ်အံၣ်စရ့ လးနွံနံၣ်တနံၣ်အပူၤန့ၣ်, ကီၢ်အၤၡူၢ်အစီၤပၤဖးဒိၣ်ၡၤလမၤန့စ့ၢ်ဟဲနုာ်လီၤဒုးကီၢ် အံၣ်စရ့လးဒီးကဝီၤဃာ်ၡၤမရံန့ၣ်လီၤ.
10 လၢတၢ်ကဝီၤဃာ်သၢနံၣ်တနံၣ်အပူၤန့ၣ်, ၡၤမရံလီၤကွံာ်ဝဲလီၤ. တၢ်အံၤမ့ၢ်ဆၢကတီၢ်ဖဲစီၤဃံးစကံယၤပၢတၢ်ဃုနံၣ်တနံၣ်ဒီး စီၤဟိၤၡ့ပၢတၢ်ခွံနံၣ်တနံၣ်အခါန့ၣ်လီၤ.
11 ကီၢ်အၤၡူၢ်အစီၤပၤဖးဒိၣ်က့ၤကိးပှၤအံၣ်စရ့လးဖိတဖၣ်ဆူ ကီၢ်အၤၡူၢ်ဒ်ပှၤဘၣ်တၢ်စၢဃာ်တဖၣ်အသိး, ဒီးပာ်လီၤန့ၢ်ပှၤတနီၤအလီၢ်အိၣ်လီၢ်ဆိးလၢဝ့ၢ်ဃၤလၤအပူၤ, တနီၤဘူးဒီးထံကျိဃၤဘိၢ်လၢကိစၣ်အကီၢ်ဆၣ်အပူၤ, ဒီးပှၤတနီၤလၢကီၢ်မံးဒယၣ်အဝ့ၢ်တဖၣ်အပူၤန့ၣ်လီၤ.
12 ၡၤမရံလီၤကွံာ်ဝဲ, မ့ၢ်လၢပှၤအံၣ်စရ့လးဖိတဖၣ်တစူၢ်ယွၤ, အဝဲသ့ၣ်အကစၢ်ယွၤဘၣ်, မ့မ့ၢ်ဘိးဃၣ်ကွံာ်တၢ်အၢၣ်လီၤအီလီၤလၢ ယွၤမၤတ့ၢ်ဒီးအဝဲသ့ၣ်, ဒီးတစူၢ်ဘၣ်ကယဲၢ်တၢ်ဘူၣ်တၢ်ဘါအတၢ်သိၣ်တၢ်သီတဖၣ်လၢအဘၣ်တၢ် ဟ့ၣ်လီၤလၢယွၤအခ့အပှၤစီၤမိၤၡ့အဃိန့ၣ်လီၤ. အဝဲသ့ၣ်တဒိကနၣ်တၢ်ဒီးတစူၢ်တၢ်ဘၣ်.
(၂ကွဲး.၃၂:၁-၁၉, ၡါ.၃၆:၁-၂၂)
13 လၢစီၤပၤစီၤဃံးစကံယၤပၢတၢ်တဆံလွံၢ်နံၣ်တနံၣ်အပူၤန့ၣ်, ကီၢ်အၤၡူၢ်အစီၤပၤဖးဒိၣ်စၤနဃ့ရံာ်, ဟဲဒုးကီၢ်ယူဒၤအဝ့ၢ် တဖၣ်လၢအအိၣ်ဒီးတိာ်ဧိၤတာ်ဧိၤဒီးမၤနၢၤဝဲန့ၣ်လီၤ.
14 စီၤဃံးစကံယၤဆှၢလီၤတၢ်ကစီၣ်တမံၤဆူစီၤစၤနဃ့ရံာ်အအိၣ်, လၢအအိၣ်ဝဲဖဲဝ့ၢ်လၤကံၣ်, စံးဝဲ, “ယမၤကမၣ်ဘၣ်တၢ်လံ, ဝံသးစူၤဆိကတီၢ်ကွံာ်နတၢ်ဟဲ ထီၣ်ဒုးတၢ်ဒီးယကဟ့ၣ်နၤကယဲၢ်တၢ်တမံၤမံၤလၢနဃ့အီၤန့ၣ်လီၤ. “ကီၢ်အၤၡူၢ်အစီၤပၤဖးဒိၣ်အတၢ်စံးဆၢမ့ၢ်ဝဲစီၤဃံးစကံယၤ ကဘၣ်ဆှၢလီၤန့ၢ်အီၤစ့လီၤတယၢၢ်အကံကၢ်သၢကယၤ ဒီးထူလီၤတယၢၢ်အကံကၢ်သၢဆံန့ၣ်လီၤ.
15 စီၤဃံးစကံယၤဆှၢလီၤန့ၢ်အီၤကယဲၢ်စ့လၢအိၣ်လၢယွၤအတၢ်လုၢ် ဟံၣ်ပူၤဒီးလၢအအိၣ်လၢစီၤပၤအနူၢ်အစီၤအတၢ်ပာ်ဖှိၣ်အလီၢ်န့ၣ် လီၤ.
16 အဝဲအိးကွံာ်စ့ၢ်ကီးထူတဖၣ်လၢအိၣ်လၢတၢ်လုၢ်ဟံၣ်ပဲတြီဖး ဒိၣ်တဖၣ်အလိၤဒီးထူတဖၣ်လၢအဝဲအနီၢ်ကစၢ်ဒၣ်ဝဲကျးဘၢဝဲလၢ တြဲၤအထူၣ်တဖၣ်အလိၤဒီးအဝဲဆှၢလီၤတၢ်န့ၣ်ခဲလၢာ်ဆူစီၤစၤ နဃ့ရံာ်အအိၣ်န့ၣ်လီၤ.
17 ကီၢ်အၤၡူၢ်အစီၤပၤဖးဒိၣ်ဆှၢလီၤသုးမုၢ်ဖးဒိၣ်တဖုလၢဝ့ၢ် လၤကံၣ်လၢကလဲၤထီၣ်ဒုးစီၤဃံးစကံယၤဖဲဝ့ၢ်ယရူၤၡလ့ၣ်န့ၣ် လီၤ. သုးမုၢ်န့ၣ်ဘၣ်တၢ်ပၢဆှၢအီၤလၢအဝဲအသုးခိၣ်ဖးဒိၣ်အဒိၣ်က တၢၢ်သၢဂၤန့ၣ်လီၤ. ဖဲအဝဲသ့ၣ်လဲၤတုၤဆူဝ့ၢ်ယရူၤၡလ့ၣ်န့ၣ်, အဝဲသ့ၣ်မၤန့ၢ်ကွံာ်ကျဲဖဲပှၤစုၣ်တၢ်ကံးညာ်မၤတၢ်, တၢ်လီၢ်ဖဲတၢ်ကျိၤလၢအဟဲစိာ်လီၤထံလၢနိၣ်လၢထးခီ, အကပၤန့ၣ်လီၤ.
18 အန့ၣ်ဝံၤဒီးအဝဲသ့ၣ်မၤလိာ်စီၤပၤဃံးစကံယၤ, ဒီးစီၤပၤဃံးစကံယၤအပဖးဒိၣ်လၢလာ်သၢဂၤဟးထီၣ်လၢကသဂၢၢ် အဝဲသ့ၣ်အဂီၢ်လီၤ. အဝဲသ့ၣ်တဖၣ်မ့ၢ်ဝဲ, စီၤဃံးလကံယၤအဖိခွါစီၤအ့ၤလယါကံၣ်လၢ အမ့ၢ်ပှၤပၢၤစီၤပၤအနီ, စီၤၡ့ၤဘနၤလၢအမ့ၢ်ကွီၢ်ဘျီၣ်အပှၤကွဲးလံာ်ဒီးစီၤအၤစာ်အဖိ ခွါစီၤယိၤအၤလၢအမ့ၢ်ပှၤပၢၤတၢ်ကွဲးနီၣ်တဖၣ်အခိၣ်န့ၣ်လီၤ.
19 ပှၤအၤၡူၢ်ဖိအသုးခိၣ်ဖးဒိၣ်အကျါတဂၤ, တဲဘၣ်အဝဲသ့ၣ်လၢစီၤ ပၤဖးဒိၣ်အဲၣ်ဒိးသ့ၣ်ညါဝဲလၢ, ဘၣ်မနုၤအဃိ, စီၤပၤဃံးစကံယၤနာ်န့ၢ်လီၤအသးထဲန့ၣ်ညါလဲၣ်.
20 ကီၢ်အၤၡူၢ်အစီၤပၤဖးဒိၣ်ဃ့ဆူၣ်သုလၢသုကစံးဆၢက့ၤအီၤ လၢ, မ့ၢ်သုဆိကမိၣ်လၢသုတၢ်ကတိၤတဖၣ်န့ၣ်ဟံးန့ၢ်ကွံာ်တၢ်ဒုးသုး ဒုးသံၣ်အတၢ်သ့တၢ်ဘၣ်ဒီးအတၢ်ဒိၣ်တၢ်မုၢ်အလီၢ်ကသ့ဝဲန့ၣ်ဧါ. မ့ၢ်သုဆိကမၣ်လၢမတၤကမၤစၢၤသုလၢသုကပူထီၣ်ထီဒါကီၢ်အၤ ၡူၢ်န့ၣ်လဲၣ်.
21 သုမုၢ်လၢ်ကီၢ်အဲၤကူပတူးလၢကမၤစၢၤသု, ဘၣ်ဆၣ်တၢ်န့ၣ်ကမၤ အသးဒ်တၢ်သူတပိၢ်တဘိလၢနီၣ်ထိးဘိတဘိအဂီၢ်အသိး, တၢ်န့ၣ်ကကၢ်ကွံာ်ဒီးဆဲးဘၣ်က့ၤသုစုန့ၣ်လီၤ. ကီၢ်အဲၤကူပတူးအစီၤပၤလီၤဂာ်ဒ်န့ၣ်ဖဲပှၤတဂၤလၢ်လၢ်သန့ၤ အသးလၢအီၤအခါန့ၣ်လီၤ.
22 ပှၤအၤၡူၢ်ဖိအသုးခိၣ်ဖးဒိၣ်စံးကဒီးဝဲဆူညါ, မ့တမ့ၢ်ဘၣ်ဒီးမ့ၢ်သုကတဲဘၣ်ယၤလၢ, သုသန့ၤသုသးလၢယွၤ, သုကစၢ်ယွၤန့ၣ်ဧါ. ဖဲစီၤဃံးစကံယၤတဲဘၣ်တ့ၢ်ကီၢ်ယူဒၤ ဒီးဝ့ၢ်ယရူၤၡလ့ၣ်အပှၤဂီၢ်မုၢ်လၢ, ကဘၣ်ဘူၣ်ထီၣ်ဘါထီၣ်ဒၣ်တၢ်ထဲလၢဖဲတၢ်လုၢ်လီၢ်လၢဝ့ၢ်ယရူၤ ၡလ့ၣ်အပူၤအခါန့ၣ်, အဝဲမၤဟးဂီၤကွံာ်ယွၤန့ၣ်အတၢ်ဘူၣ်ထီၣ်ဘါထီၣ်အလီၢ်တဖၣ်ဒီး အတၢ်လုၢ်လီၢ်တဖၣ်န့ၣ်တမ့ၢ်ဘၣ်ဧါ.
23 လၢစီၤပၤဖးဒိၣ်အမံၤအပူၤန့ၣ်, ယကတၤတၢ်ဒီးသုတမံၤန့ၣ်လီၤ. သုဃုထံၣ်ပှၤဒိးကသ့ၣ်သ့အါဝဲအဂၤခံကထိမ့ၢ်န့ၢ်န့ၣ်, ယကဟ့ၣ်သုကသ့ၣ်အဒုပှဲၤန့ၣ်လီၤ.
24 သုပြၢလိာ်သုသးဒီးပပှၤအၤၡူၢ်အသုးခိၣ်အဆံးကတၢၢ်တဂၤဒၣ် လဲာ်တသ့ဘၣ်. အန့ၣ်ဒၣ်လဲာ်သုမုၢ်လၢ်ပှၤအဲၤကူပတူးဖိတဖၣ်လၢကဆှၢန့ၢ်သု, လ့ၣ်ကဟၣ်တဖၣ်ဒီးပှၤဒိးကသ့ၣ်တဖၣ်န့ၣ်လီၤ.
25 မ့ၢ်သုဆိကမိၣ်လၢ, ယဟဲထီၣ်ဒုးသုထံသုကီၢ်ဒီးမၤဟးဂီၤ ကွံာ်အီၤန့ၣ်, တအိၣ်ဘၣ်ဒီးယွၤအတၢ်မၤစၢၤဘၣ်န့ၣ်ဧါ. ယွၤအကစၢ်ဒၣ်ဝဲတဲဘၣ်ယၤလၢယကလဲၤထီၣ်ဒုးအီၤဒီးမၤဟးဂီၤ ကွံာ်အီၤန့ၣ်လီၤ.
26 ဝံၤဒီးစီၤအ့ၤလယါကံၣ်, စီၤၡ့ၤဘနၤဒီးစီၤယိၤအၤတဲဘၣ် သုးခိၣ်န့ၣ်, “တၢ်ဒိၣ်ဧၢ, ကတိၤတၢ်ဒီးပှၤလၢပှၤအၤရၣ်ဖိ အကျိာ်တက့ၢ်. ပနၢ်ပၢၢ်အီၤ. ကစီဒီလီၤ. ကတိၤတၢ်လၢဧ့ၤဘြံၤအကျိာ်တဂ့ၤ. ပှၤဂီၢ်မုၢ်လၢဝ့ၢ်ခိၣ်ဒူအလိၤဒိကနၣ်တၢ်န့ၣ်လီၤ.”
27 သုးခိၣ်န့ၣ်စံးဆၢဝဲ, “မ့ၢ်သုဆိကမိၣ်လၢစီၤပၤဖးဒိၣ်မၢ လီၤယၤဒ်သိးယကစံးကယဲၢ်တၢ်အံၤခဲလၢာ်ထဲဒၣ်ဆူသုဝဲဒီးစီၤ ပၤအအိၣ်ဧိၤန့ၣ်ဧါ. တမ့ၢ်ဘၣ်, ယကတိၤစ့ၢ်ကီးတၢ်ဆူပှၤဂီၢ်မုၢ်လၢအဆ့ၣ်နီၤလၢဝ့ၢ် ခိၣ်ဒူအဖီခိၣ်လၢအကဘၣ်အီၣ်အအ့ၣ်ဒီးအီအဆံၣ်ဒ်သုကဘၣ်မၤအီၤ အသိး, အအိၣ်န့ၣ်လီၤ.”
28 ဝံၤဒီးသုးခိၣ်န့ၣ်ဂဲၤဆၢထၢၣ်ဒီးကိးသတြီထီၣ်လၢဧ့ၤဘြံၤအကျိာ်စံးဝဲ, “ဒိကနၣ်တၢ်လၢကီၢ်အၤၡူၢ်အစီၤပၤဖးဒိၣ်တဲဘၣ်သု န့ၣ်တက့ၢ်.”
29 အဝဲဟ့ၣ်ပလီၢ်သုလၢ, သုတဘၣ်ပျဲစီၤဃံးစကံယၤလီန့ၢ်သုဘၣ်. အဝဲမၤပူၤမၤဖျဲးသုတသ့ဘၣ်.
30 ဒီးပျဲအဝဲမၢန့ၢ်ဆီၣ်ခံသု, လၢသုကဒိးသန့ၤသုသးလၢယွၤ အလိၤန့ၣ်တဂ့ၤ. ဆိကမိၣ်လၢယွၤကအုၣ်က့ၤခီၣ်က့ၤသုဒီးအဝဲဆိကတီၢ်ပှၤအၤၡူၢ် အသုးမုၢ်လၢကဒုးမၤန့ၢ်ကွံာ်သုဝ့ၢ်အဂီၢ်န့ၣ်တဂ့ၤ.
31 ဒိကနၣ်စီၤဃံးစက့ယၤအကလုၢ်တဂ့ၤ. ကီၢ်အၤၡူၢ်အစီၤပၤဖး ဒိၣ်ဟ့ၣ်လီၤအကလုၢ်ဆူသုအိၣ်လၢသုကဟဲထီၣ်လၢဝ့ၢ်ပူၤဒီးဟ့ၣ် လီၤသုသးန့ၣ်လီၤ. သုဝဲခဲလၢာ်တၢ်ကပျဲအီၣ်သုလၢသုစပံးမုၢ်ဒၣ်ဝဲအစပံးသၣ်တဖၣ်, သုသ့ၣ်ထူၣ်ဒၣ်ဝဲအချၢၣ်ဒၢသၣ်တဖၣ်ဒီးအီဘၣ်ထံလၢသုထံပူၤ ဒၣ်ဝဲ,
32 တုၤတၢ်ဆၢကတီၢ်လၢစီၤပၤဖးဒိၣ်သူၣ်လီၤကဒါက့ၤန့ၢ်သုအိၣ် သုဆိးအလီၢ်လၢထံကီၢ်တဘ့ၣ်လၢအလီၤဂာ်ဒီးသုကီၢ်ဒၣ်သု ဝဲအပူၤ, တၢ်လီၢ်ဖဲစပံးလီၢ်တဖၣ်ဟ့ၣ်ထီၣ်စပံးထံ, ဒီးဖဲန့ၣ်ဘုဧိၤဟုဧိၤအိၣ်ဝဲလၢတၢ်ကမၤကိၣ်အဂီၢ်န့ၣ်လီၤ. မ့ၢ်ကီၢ်တဘ့ၣ်လၢအပှဲၤဒီး, သ့ၣ်စၤယံး, သ့ၣ်စၤယံးအသိဒီးကနဲ စီန့ၣ်လီၤ. သုမ့ၢ်မၤတၢ်ဒ်အဝဲမၤလိာ်ဝဲန့ၣ်, သုတသံဘၣ်ဒီးသုကမူလီၤ. ပျဲစီၤဃံးစကံယၤမၤပျုၢ်သုဒီးဒုးဆိကမိၣ်သုလၢယွၤကမၤ ပူၤဖျဲးသုန့ၣ်တဂ့ၤ.
33 မ့ၢ်ထံကီၢ်တဘ့ၣ်ဘ့ၣ်အကစၢ်တဖၣ်မၤပူၤဖျဲးအဝဲသ့ၣ်အထံအကီၢ် တဖၣ်လၢကီၢ်အၤၡူၢ်အစီၤပၤဖးဒိၣ်အစုပူၤစ့ၢ်ကီးဧါ.
34 ဝ့ၢ်ဃမါသးဒီးဝ့ၢ်အၢ်ပးအကစၢ်တဖၣ်ခဲအံၤမ့ၢ်အအိၣ်ဖဲလဲၣ်. စဖၤရဝံၣ်, ဟ့နၤဒီးဧးဝါအကစၢ်တဖၣ်မ့ၢ်အအိၣ်ဖဲလဲၣ်. မ့ၢ်ပှၤတဂၤဂၤမၤပူၤဖျဲးၡၤမရံန့ၣ်ဧါ.
35 ထံကီၢ်တဖၣ်န့ၣ်အကစၢ်တဖၣ်တဂၤဂၤမၤပူၤဖျဲးတ့ၢ်အထံကီၢ်လၢ စီၤပၤဖးဒိၣ်အစုပူၤတစုစုအခါဖဲလဲၣ်. လၢတၢ်န့ၣ်အဃိမ့ၢ်တၢ်မနုၤဒုးဆိကမိၣ်သုလၢယွၤအုၣ်က့ၤခီၣ် က့ၤဝ့ၢ်ယရူၤၡလ့ၣ်သ့ဝဲန့ၣ်လဲၣ်.
36 ပှၤဂီၢ်မုၢ်အိၣ်ဘှီၣ်ကလာ်ဒ်စီၤဃံးစကံယၤတဲဘၣ်တ့ၢ်အဝဲသ့ၣ် လၢကဘၣ်မၤဝဲအသိးန့ၣ်လီၤ. အဝဲသ့ၣ်တကတိၤတၢ်နီတဘီဘၣ်.
37 ဝံၤဒီးစီၤအ့ၤလယါကံၣ်, စီၤၡ့ၤဘနၤဒီးစီၤယိၤအၤတဖၣ်ဖှီ ယာ်အဆ့ကူအသိးတဖၣ်လၢတၢ်သူၣ်အုးသးအုးအပူၤဒီးလဲၤဒီးတဲ ဘၣ်စီၤပၤတၢ်လၢကီၢ်အၤၡူၢ်အသုးခိၣ်စံးတ့ၢ်ဝဲန့ၣ်လီၤ.