15
(၂ကွဲး.၂၆:၁-၂၃)
1 လၢကီၢ်အံၣ်စရ့လးအစီၤပၤယၤရၤဘၣ်ခံဂၤတဂၤပၢတၢ်ခံဆံနွံ နံၣ်တနံၣ်အပူၤန့ၣ်စီၤအမၤစယါအဖိခွါစီၤဧူးစံယါကဲထီၣ်, ကီၢ်ယူဒၤအစီၤပၤ,
2 ဖဲအသးအိၣ်တဆံဃုနံၣ်အဝဲပၢတၢ်လၢဝ့ၢ်ယရူၤၡလ့ၣ်အပူၤယဲၢ်ဆံ ခံနံၣ်န့ၣ်လီၤ. အဝဲအမိၢ်မ့ၢ်နီၢ်ယကိးလယၤလၢဝ့ၢ်ယရူၤၡလ့ၣ်တခီန့ၣ်လီၤ.
3 ပိာ်ထွဲထီၣ်အဝဲအပၢ်အဒိအတဲာ်အခံန့ၣ်, အဝဲမၤတ့ၢ်တၢ်လၢအဘၣ် ယွၤအသးန့ၣ်လီၤ.
4 ဘၣ်ဆၣ်, ပှၤတစူၢ်တနာ်ယွၤအတၢ်ဘူၣ်ထီၣ်ဘါထီၣ်အလီၢ်တဖၣ်တဘၣ်တၢ်မၤ ဟးဂီၤအီၤဘၣ်. ဒီးပှၤဂီၢ်မုၢ်လုၢ်ထီၣ်ဒံးတၢ်လုၢ်တၢ်ပာ်တဖၣ်ဒီးဆိၣ်ကဲၤဒံး တၢ်နၢမူဖဲန့ၣ်လီၤ.
5 ယွၤတီၢ်စီၤဧူးစံယါလၢတၢ်ဆါအၢလီၤပျံၤလီၤဖုးတမံၤလၢ အဘၣ်အီၤလၢအမုၢ်နံၤလၢအအိၣ်လီၤတဲာ်အပူၤန့ၣ်လီၤ. အဝဲအိၣ်ဝဲဆိးဝဲလၢဟံၣ်လီၤဆီတဖျၢၣ်အပူၤ, ဘၣ်တၢ်ဆိကတီၢ်ကွံာ်အီၤလၢကယဲၢ်အမူအဒါတဖၣ်, ဖဲအဝဲအဖိခွါစီၤယိၤသၣ်ပၢက့ၤထံကီၢ်အခါန့ၣ်လီၤ.
6 ကယဲၢ်တၢ်အဂၤလၢစီၤဧူးစံယါမၤတ့ၢ်ဝဲန့ၣ်, ဘၣ်တၢ်ကွဲးနီၣ်အီၤလၢကီၢ်ယူဒၤအစီၤပၤတဖၣ်အလံာ်တၢ်စံၣ်စိၤ တဲစိၤအပူၤန့ၣ်လီၤ.
7 စီၤဧူးစံယါသံဝဲဒီးဘၣ်တၢ်ခူၣ်လီၤကွံာ်အီၤလၢစီၤပၤအတၢ် သွၣ်ခိၣ်လၢစီၤဒၤဝံးအဝ့ၢ်ပူၤ, ဒီးအဝဲအဖိခွါစီၤယိၤသၣ်ကဲထီၣ်စီၤပၤလၢအလီၢ်န့ၣ်လီၤ.
8 လၢကီၢ်ယူဒၤစီၤပၤဧူးစံယါပၢတၢ်သၢဆံဃိးနံၣ်တနံၣ်အပူၤ န့ၣ်, စီၤယၤရၤဘၣ်ခံဂၤတဂၤအဖိခွါစီၤစကၤရယၤကဲထီၣ်ကီၢ်အံၣ် စရ့လးအစီၤပၤ, ဒီးအဝဲပၢတၢ်လၢၡၤမရံအပူၤဃုလါန့ၣ်လီၤ.
9 ဒ်ပှၤလၢအမဲာ်ညါတဖၣ်အသိးန့ၣ်, အဝဲမၤတ့ၢ်တၢ်ဒဲးဘးထီ ဒါယွၤန့ၣ်လီၤ. အဝဲပိာ်ထွဲဒိအၢတဲာ်သီလၢစီၤနဘးအဖိခွါ စီၤပၤယၤရၤဘၣ်မၤတ့ၢ်ဝဲ, လၢအမ့ၢ်တၢ်ဆှၢဃီၤကီၢ်အံၣ်စရ့လးဆူတၢ်ဒဲးဘးအပူၤန့ၣ်လီၤ.
10 စီၤယၤဘ့ၣ်အဖိခွါစီၤၡၤလူၣ်, ကူၣ်တၢ်အၢထီဒါစီၤပၤစကၤရ ယၤ, မၤသံကွံာ်အီၤဖဲဝ့ၢ်ယံးဘျၣ်ဒီးကဲထီၣ်စီၤပၤလၢအလီၢ်န့ၣ် လီၤ.
11 ကယဲၢ်တၢ်အဂၤလၢစီၤစကၤရယၤမၤတ့ၢ်ဝဲန့ၣ်ဘၣ်တၢ်ကွဲးနီၣ်အီၤ လၢကီၢ်အံၣ်စရ့လးအစီၤပၤတဖၣ်အလံာ်တၢ်စံၣ်စိၤတဲစိၤအပူၤ န့ၣ်လီၤ.
12 လၢတၢ်န့ၣ်အဃိ, တၢ်အၢၣ်လီၤအီလီၤလၢယွၤမၤတ့ၢ်ဝဲဒီးစီၤ ပၤယ့ၤဟူန့ၣ်, လၢထီၣ်ပှဲၤထီၣ်ဝဲဒၣ်လီၤ. စံးဝဲဒၣ်, “နစၢၤနသွဲၣ်တဖၣ်တုၤလီၤလၢပှၤလွံၢ်စိၤတစိၤန့ၣ် ကကဲထီၣ်ကီၢ်အံၣ်စရ့လးအစီၤပၤတဖၣ်န့ၣ်လီၤ.”
13 လၢကီၢ်ယူဒၤအစီၤပၤဧူးစံယါပၢတၢ်သၢဆံခွံနံၣ်တနံၣ်အပူၤ န့ၣ်, စီၤယၤဘ့ၣ်အဖိခွါစီၤၡၤလူၣ်ကဲထီၣ်ကီၢ်အံၣ်စရ့လးအစီၤပၤ, ဒီးအဝဲပၢတၢ်လၢၡၤမရံအပူၤတလါန့ၣ်လီၤ.
14 စီၤကၤဒံအဖိခွါစီၤမနၤဃ့ၣ်ဟးထီၣ်လၢဝ့ၢ်တံးရစၢ်ဒီးလဲၤ ဆူၡၤမရံ, မၤသံကွံာ်စီၤၡၤလူၣ်ဒီးကဲထီၣ်စီၤပၤလၢအဝဲအလီၢ် န့ၣ်လီၤ.
15 ကယဲၢ်တၢ်အဂၤလၢစီၤၡၤလူၣ်မၤတ့ၢ်ဝဲဃုာ်ဒီးတၢ်ကွဲးနီၣ်ဘၣ် ထွဲဒီးအဝဲအတၢ်ကူၣ်ထီၣ်အအၢန့ၣ်ဘၣ်တၢ်ကွဲးနီၣ်အီၤလၢကီၢ် အံၣ်စရ့လးအစီၤပၤတဖၣ်အလံာ်တၢ်စံၣ်စိၤတဲစိၤအပူၤန့ၣ်လီၤ.
16 ဖဲစီၤမနၤဃ့ၣ်လဲၤတၢ်လၢကျဲလၢဝ့ၢ်တံးရစၢ်အခါန့ၣ်အဝဲမၤ ဟးဂီၤကွံာ်ဝ့ၢ်တံဖစၤဒီးပှၤအိၣ်ဆိးလၢဝ့ၢ်ပူၤခဲလၢာ်ဒီး လီၢ်ကဝီၤလၢအအိၣ်ဝးတရံးအီၤ, လၢာ်လၢာ်ဆ့ဆ့, မ့ၢ်လၢဝ့ၢ်န့ၣ်တဟ့ၣ်လီၤအသးလၢအစုပူၤဘၣ်အဃိန့ၣ်လီၤ. အဝဲဖှဲးသ့ၣ်ဖးဒၣ်လဲာ်ကယဲၢ်ပိာ်မုၣ်လၢအဒၢတဖၣ်အဟၢဖၢန့ၣ် လီၤ.
17 လၢကီၢ်ယူဒၤအစီၤပၤဧူးစံယါပၢတၢ်သၢဆံခွံနံၣ်တနံၣ်အပူၤ န့ၣ်, စီၤကၤဒံအဖိခွါစီၤမနၤဃ့ၣ်ကဲထီၣ်ကီၢ်အံၣ်စရ့လးအစီၤပၤ, ဒီးအဝဲပၢတၢ်လၢၡၤမရံအပူၤအနံၣ်တဆံန့ၣ်လီၤ.
18 တုၤလၢမုၢ်နံၤလၢအဝဲသံဒၣ်လဲာ်န့ၣ်စီၤမနၤဃ့ၣ်မၤတ့ၢ်တၢ် ဒဲးဘးထီဒါယွၤ, ခီဖျိပိာ်ထွဲစီၤနဘးအဖိခွါစီၤပၤယၤရၤဘၣ်အဒိအၢတဲာ်သီ လၢအမ့ၢ်တၢ်ဆှၢဃီၤကီၢ်အံၣ်စရ့လးဆူတၢ်ဒဲးဘးအပူၤန့ၣ်လီၤ.
19 ကီၢ်အၤၡူၢ်အစီၤပၤတံးကလးပလ့စ့ၢ်နုာ်လီၤဒုးကီၢ်အံၣ်စရ့ လးဒီးစီၤမနၤဃ့ၣ်ဟ့ၣ်လီၤစ့လီၤတယၢၢ်အပီၢ်ခံကလးခံကထိ ဃိးကယၤဒ်သိးကမၤန့ၢ်အဝဲအတၢ်ဆီၣ်ထွဲမၤစၢၤအီၤလၢတၢ်ဒုး ဆူၣ်ထီၣ်စီၤမနၤဃ့ၣ်အစိကမီၤလၢထံကီၢ်အဖီခိၣ်အဂီၢ်န့ၣ်လီၤ.
20 စီၤမနၤဃ့ၣ်မၤန့ၢ်စ့န့ၣ်လၢကီၢ်အံၣ်စရ့လးအပှၤထူးပှၤတီၤ တဖၣ်အအိၣ်ခီဖျိတၢ်ဃ့ဆူၣ်ပှၤတဂၤစုာ်စုာ်လၢကမၤဘူၣ်လီၤစ့, တဂၤအဘ့ၣ်ယဲၢ်ဆံန့ၣ်လီၤ. လၢတၢ်န့ၣ်အဃိစီၤတံးကလးပလ့စ့ၢ် က့ၤကဒါက့ၤဆူအထံအကီၢ်ဒၣ်ဝဲန့ၣ်လီၤ.
21 ကယဲၢ်တၢ်အဂၤလၢစီၤမနၤဃ့ၣ်မၤတ့ၢ်ဝဲန့ၣ်, ဘၣ်တၢ်ကွဲးနီၣ်အီၤလၢကီၢ်အံၣ်စရ့လးအစီၤပၤတဖၣ်အလံာ်တၢ်စံၣ် စိၤတဲစိၤအပူၤန့ၣ်လီၤ.
22 အဝဲသံဝဲဒီးဘၣ်တၢ်ခူၣ်လီၤကွံာ်အီၤ, ဒီးအဖိခွါစီၤပကၤ ဃယၤကဲထီၣ်စီၤပၤလၢအလီၢ်န့ၣ်လီၤ.
23 လၢကီၢ်ယူဒၤအစီၤပၤဧူးစံယါပၢတၢ်အနံၣ်ယဲၢ်ဆံအပူၤန့ၣ်, စီၤမနၤဃ့ၣ်အဖိခွါစီၤပကၤဃယၤကဲထီၣ်ကီၢ်အံၣ်စရ့လးအစီၤ ပၤဒီးအဝဲပၢတၢ်လၢၡၤမရံအပူၤခံနံၣ်န့ၣ်လီၤ.
24 အဝဲမၤတ့ၢ်တၢ်ဒဲးဘးထီဒါယွၤ, ပိာ်ထွဲဒိအၢတဲာ်သီလၢစီၤ နဘးအဖိခွါစီၤပၤယၤရၤဘၣ်မၤတ့ၢ်ဝဲလၢအမ့ၢ်တၢ်ဆှၢဃီၤကီၢ် အံၣ်စရ့လးဆူတၢ်ဒဲးဘးအပူၤန့ၣ်လီၤ.
25 စီၤပကၤဃယၤအသုး အဖုတဖၣ်အသုးခိၣ်တဂၤလၢအမ့ၢ်စီၤရမါလယၤ အဖိခွါစီၤပ့ကး, ကူၣ်ထီၣ်တၢ်အၢဃုာ်ဒီးပှၤကံးလဧးဖိအဂၤယဲၢ်ဆံဒီးမၤသံ ကွံာ်စီၤပကၤဃယၤဖဲနူၢ်ဧိၤစီၤဧိၤအတိာ်အသးကံၢ်ပူၤလၢၡၤမ ရံ, ဒီးကဲထီၣ်စီၤပၤလၢအဝဲအလီၢ်န့ၣ်လီၤ.
26 ကယဲၢ်တၢ်အဂၤလၢစီၤပကၤဃယၤမၤတ့ၢ်ဝဲန့ၣ်ဘၣ်တၢ်ကွဲးအီၤလၢ ကီၢ်အံၣ်စရ့လးအစီၤပၤတဖၣ်အလံာ်တၢ်စံၣ်စိၤတဲစိၤအပူၤန့ၣ် လီၤ.
27 လၢကီၢ်ယူဒၤအစီၤပၤဧူးစံယါပၢတၢ်ယဲၢ်ဆံခံနံၣ်တနံၣ်အပူၤ န့ၣ်, စီၤရမါလယၤအဖိခွါစီၤပ့ကးကဲထီၣ်ကီၢ်အံၣ်စရ့လးအစီၤပၤ, ဒီးအဝဲပၢတၢ်လၢၡၤမရံအပူၤအနံၣ်ခံဆံန့ၣ်လီၤ.
28 အဝဲမၤတ့ၢ်တၢ်ဒဲးဘးထီဒါယွၤ, ပိာ်ထွဲဒိအၢတဲာ်သီလၢစီၤ နဘးအဖိခွါစီၤပၤယၤရၤဘၣ်မၤတ့ၢ်ဝဲ, လၢအမ့ၢ်တၢ်ဆှၢဃီၤကီၢ်အံၣ်စရ့လးဆူတၢ်ဒဲးဘးအပူၤန့ၣ်လီၤ.
29 ဖဲစီၤပ့ကးကဲစီၤပၤအကတီၢ်န့ၣ်ကီၢ်အၤၡူၢ်အစီၤပၤဖးဒိၣ် တံးကလးပလ့စ့ၢ်မၤန့ၢ်ဝ့ၢ်တဖၣ်လၢအမ့ၢ်ဝဲဧံၤယိၣ်, အၤဘ့ၤလးဘ့ၤသမၤကၤ, ယၤနိဃၤ, က့ဒ့ၣ်ဒီးဃါစိၢ်, ဒီးလီၢ်ကဝီၤတဖၣ်လၢကီၢ်ကံးလဧးလၢအမ့ၢ်ကၤလံၤလါဒီးနးသၤ လံဒီးက့ၤကိးပှၤဂီၢ်မုၢ်ဆူကီၢ်အၤၡူၢ်ဒ်ပှၤဘၣ်တၢ်စၢဃာ်တဖၣ် အသိးန့ၣ်လီၤ.
30 ဖဲစီၤဧူးစံယါအဖိခွါစီၤယိၤသၣ်ပၢတၢ်ဒ်ကီၢ်ယူဒၤအစီၤ ပၤအသိးခံဆံနံၣ်တနံၣ်အပူၤန့ၣ်စီၤအ့လၤအဖိခွါစီၤဟိၤ ၡ့, ကူၣ်တၢ်ထီဒါစီၤပၤပ့ကး, မၤသံကွံာ်အီၤ, ဝံၤဒီးကဲထီၣ်စီၤပၤလၢအဝဲအလီၢ်န့ၣ်လီၤ.
31 တၢ်အဂၤလၢစီၤပ့ကးမၤတ့ၢ်ဝဲန့ၣ်, ဘၣ်တၢ်ကွဲးနီၣ်အီၤလၢကီၢ် အံၣ်စရ့လးအစီၤပၤတဖၣ်အလံာ်တၢ်စံၣ်စိၤတဲစိၤအပူၤန့ၣ်လီၤ.
(၂ကွဲး.၂၇:၁-၉)
32 လၢစီၤရမါလယၤအဖိခွါစီၤပ့ကးပၢတၢ်ဒ်စီၤပၤလၢကီၢ်အံၣ် စရ့လးအပူၤခံနံၣ်တနံၣ်န့ၣ်စီၤဧူးစံယါအဖိခွါစီၤယိၤသၣ် ကဲထီၣ်ကီၢ်ယူဒၤအစီၤပၤ,
33 ဖဲအသးအိၣ်ခံဆံယဲၢ်နံၣ်, ဒီးအဝဲပၢတၢ်ဖဲဝ့ၢ်ယရူၤၡလ့ၣ် အပူၤတဆံဃုနံၣ်န့ၣ်လီၤ. အဝဲအမိၢ်မ့ၢ်ဝဲစီၤစၤဒိးအဖိမုၣ်နီၢ်ယရူၤၡၤန့ၣ်လီၤ.
34 ပိာ်ထွဲထီၣ်အဝဲအပၢ်စီၤဧူးစံယါအဒိအတဲာ်အခံန့ၣ်, စီၤယိၤသၣ်မၤတၢ်လၢအဘၣ်ယွၤအသးန့ၣ်လီၤ.
35 ဘၣ်ဆၣ်ပှၤတစူၢ်တနာ်ယွၤအတၢ်ဘူၣ်ထီၣ်ဘါထီၣ်အလီၢ်တဖၣ်တဘၣ်တၢ်မၤ ဟးဂီၤကွံာ်အီၤဘၣ်. ဒီးပှၤဂီၢ်မုၢ်လုၢ်ထီၣ်ဒံးတၢ်လုၢ်တၢ်ပာ်တဖၣ်ဒီးဆိၣ်ကဲၤဒံးတၢ်နၢမူဖဲန့ၣ်လီၤ. ပှၤလၢအဘှီထီၣ်ယွၤအတၢ်လုၢ်ဟံၣ်အကလံၤစိးတြဲၤန့ၣ်မ့ၢ်ဝဲစီၤ ယိၤသၣ်န့ၣ်လီၤ.
36 ကယဲၢ်တၢ်အဂၤလၢစီၤယိၤသၣ်မၤတ့ၢ်ဝဲန့ၣ်ဘၣ်တၢ်ကွဲးနီၣ်အီၤ လၢကီၢ်ယူဒၤအစီၤပၤတဖၣ်အလံာ်တၢ်စံၣ်စိၤတဲစိၤအပူၤန့ၣ် လီၤ.
37 ဖဲအဝဲကဲစီၤပၤအကတီၢ်န့ၣ်အဆိကတၢၢ်ယွၤမၢလီၤစူၤရံ အစီၤပၤရစံၣ်ဒီးကီၢ်အံၣ်စရ့လးအစီၤပၤပ့ကးလၢကဟဲ ဒုးကီၢ်ယူဒၤန့ၣ်လီၤ.
38 စီၤယိၤသၣ်သံဝဲဒီးဘၣ်တၢ်ခူၣ်လီၤကွံာ်အီၤလၢစီၤပၤအတၢ် သွၣ်ခိၣ်လၢစီၤဒၤဝံးအဝ့ၢ်ပူၤ, ဒီးအဝဲအဖိခွါစီၤအၤဃးကဲထီၣ်စီၤပၤလၢအဝဲအလီၢ်န့ၣ်လီၤ.