16
(၂ကွဲး.၂၈:၁-၂၇)
1 လၢစီၤရမါလယၤအဖိခွါစီၤပ့ကးပၢတၢ်ဒ်ကီၢ်အံၣ်စရ့လးအစီၤ ပၤအသိးတဆံနွံနံၣ်တနံၣ်အပူၤန့ၣ်, စီၤယိၤသၣ်အဖိခွါစီၤအၤဃးကဲထီၣ်ကီၢ်ယူဒၤအစီၤပၤ,
2 ဖဲအသးအိၣ်အနံၣ်ခံဆံဒီးအဝဲပၢတၢ်လၢဝ့ၢ်ယရူၤၡလ့ၣ်အပူၤ တဆံဃုနံၣ်န့ၣ်လီၤ. အဝဲတပိာ်ထွဲဘၣ်အပၢ်ဖးဒိၣ်လၢပျၢၤစီၤဒၤဝံးအဒိဂ့ၤတဲာ်ဘၣ် အခံန့ၣ်ဘၣ်.
3 ဒီးပိာ်ထွဲကီၢ်အံၣ်စရ့လးအစီၤပၤတဖၣ်အဒိအတဲာ်အခံန့ၣ်လီၤ. အဝဲလုၢ်ထီၣ်ဒၣ်လဲာ်အဖိခွါဒၣ်ဝဲဒ်တၢ်လုၢ်မ့ၣ်အူတမံၤဆူ တၢ်ဂီၤတၢ်ဖီၣ်တဖၣ်, မၤဒိးလုၢ်လၢ်လီၤသးဘၣ်အၢလၢပှၤဂီၢ်မုၢ် မၤတ့ၢ်ဝဲ, ပှၤဂီၢ်မုၢ်လၢယွၤဟီထီၣ်ကွံာ်တ့ၢ်အီၤလၢထံဧိၤကီၢ်ဧိၤအပူၤ ဖဲပှၤအံၣ်စရ့လးဖိတဖၣ်ဟဲထီၣ်ဒုးတၢ်အခါန့ၣ်လီၤ.
4 ဖဲပှၤတစူၢ်တနာ်ယွၤအတၢ်ဘူၣ်ထီၣ်ဘါထီၣ်အလီၢ်တဖၣ်, လၢတၢ်လူၢ်တဖၣ်အဒီခိၣ်ဒီးလၢကယဲၢ်သ့ၣ်လၢအအိၣ်ဒီးအကဒုတဖၣ် အဖီလာ်န့ၣ်စီၤအၤဃးလုၢ်ထီၣ်တၢ်လုၢ်တၢ်ပာ်တဖၣ်ဒီးဆိၣ်ကဲၤတၢ် နၢမူန့ၣ်လီၤ.
5 ကီၢ်စူၤရံအစီၤပၤရစံၣ်ဒီးကီၢ်အံၣ်စရ့လးအစီၤပၤပ့ကးဒုး တၢ်ထီဒါဝ့ၢ်ယရူၤၡလ့ၣ်ဒီးကဝီၤဃာ်အီၤဘၣ်ဆၣ်, တမၤနၢၤဘၣ်စီၤအၤဃးဘၣ်.
6 (ဖဲတကတီၢ်ဃီန့ၣ်, ကီၢ်အဒိၣ်အစီၤပၤမၤန့ၢ်က့ၤတၢ်ပၢဘၣ်ဝ့ၢ် အ့လးဒီးဟီထီၣ်ကွံာ်ပှၤယူဒၤဖိတဖၣ်လၢအအိၣ်ဝဲ ဆိးဝဲဖဲန့ၣ်လီၤ. ပှၤအဒိၣ်ဖိတဖၣ်သူၣ်လီၤအလီၢ်အိၣ်လီၢ်ဆိး ဖဲဝ့ၢ်အ့လး, ဒီးအိၣ်ဆိးဒံးဝဲဖဲန့ၣ်လီၤ.)
7 စီၤအၤဃးမၢလီၤပှၤတဖၣ်ဆူကီၢ်အၤၡူၢ်အစီၤပၤဖးဒိၣ်တံးကလး ပလ့စ့ၢ်အအိၣ်, အိၣ်ဒီးတၢ်ကစီၣ်ဒ်လာ်အံၤန့ၣ်လီၤ. “ယမ့ၢ်နခ့နပှၤလၢအတီဒီးနၤလီၤ. ဟဲဒီးမၤပူၤဖျဲးယၤလၢကီၢ်စူၤရံအစီၤပၤဒီးကီၢ်အံၣ်စရ့ လးအစီၤပၤတဖၣ်လၢအဟဲထီၣ်ဒုးယၤန့ၣ်တက့ၢ်.”
8 စီၤအၤဃာ်ဟံးထီၣ်စ့ဒီးထူလၢယွၤအတၢ်လုၢ်ဟံၣ်ဒီးနူၢ်ဧိၤ စီၤဧိၤအတၢ်ပာ်ဖှိၣ်လီၢ်အပူၤဒီးဆှၢလီၤအီၤဆူစီၤပၤဖး ဒိၣ်အအိၣ်ဒ်တၢ်ဟ့ၣ်ကနၢၤအသိးန့ၣ်လီၤ.
9 လၢတၢ်စံးဆၢက့ၤစီၤအၤဃးအတၢ်ဃ့ကညးအဂီၢ်န့ၣ်စီၤတံးကလး ပလ့စ့ၢ်ဟးထီၣ်လၢတၢ်ဒုးအဂီၢ်ဃုာ်ဒီးအသုးမုၢ်လၢကထီဒါဝ့ၢ် ဒၤမ့ၤစ့းအဂီၢ်ဒီးမၤန့ၢ်အီၤ, မၤသံကွံာ်စီၤပၤရစံၣ်ဒီးက့ၤကိးပှၤဂီၢ်မုၢ်ဆူဝ့ၢ်ကံၢ်ဒ် ပှၤဘၣ်တၢ်စၢဃာ်တဖၣ်အသိးန့ၣ်လီၤ.
10 ဖဲစီၤပၤအၤဃးဟးထီၣ်လဲၤဆူဝ့ၢ်ဒၤမ့ၤစ့းလၢကလဲၤသဂၢၢ် စီၤပၤဖးဒိၣ်တံးကလးပလ့စ့ၢ်အဂီၢ်န့ၣ်အဝဲထံၣ်ဘၣ်တၢ်လုၢ်လီၢ် ဖဲန့ၣ်, ဒီးဆှၢလီၤကဒါက့ၤန့ၢ်ပှၤလုၢ်တၢ်အခိၣ်စီၤအူၤရံယၤလၢတၢ် လုၢ်လီၢ်န့ၣ်အက့ၢ်အဂီၤအဒိတမံၤဃီတခါတုၤလၢက့ၢ်ဂီၤအဆံး ကတၢၢ်အဒိ, လၢာ်အခၢးဒၣ်လဲာ်န့ၣ်လီၤ.
11 လၢတၢ်န့ၣ်အဃိစီၤအူၤရံယၤဘှီထီၣ်တၢ်လုၢ်လီၢ်တခါလၢအလီၤ ဂာ်တမံၤဃီဒ်သိးန့ၣ်, ဒီးမၤဝံၤအီၤတချုးလၢစီၤအၤဃးဟဲက့ၤကဒါက့ၤဒံးဘၣ်န့ၣ်လီၤ.
12 တုၤစီၤအၤဃးဟဲက့ၤဝဲလၢဝ့ၢ်ဒၤမ့ၤစ့းန့ၣ်, အဝဲထံၣ်ဘၣ်ဝဲ တၢ်လုၢ်လီၢ်န့ၣ်ဝံၤဝဲလံန့ၣ်လီၤ.
13 လၢတၢ်န့ၣ်အဃိစီၤအၤဃးဆိၣ်ကဲၤထီၣ်တၢ်လုၢ်ဆၣ်ဖိကီၢ်ဖိ အတၢ်လုၢ်တၢ်ပာ်တဖၣ်ဒီးဘုဧိၤဟုဧိၤအတၢ်လုၢ်တၢ်ပာ်တဖၣ်လၢတၢ် လုၢ်လီၢ်န့ၣ်အဖီခိၣ်, ဒီးလူလီၤတၢ်လုၢ်စပံးထံဒီးတၢ်လုၢ်မၤဃူမၤဖိးအသွံၣ်လၢ အဖီခိၣ်န့ၣ်လီၤ.
14 တၢ်လုၢ်လီၢ်တိၢ်ဘီလၢအဘၣ်တၢ်ပာ်စီဆှံထီၣ်တ့ၢ်အီၤဆူယွၤ န့ၣ်, အိၣ်ဝဲဒၣ်ဖဲတၢ်လုၢ်လီၢ်အသီဒီးယွၤအတၢ်လုၢ်ဟံၣ်အဘၢၣ်စၢၤ, အဃိ, စီၤအၤဃးသုးကွံာ်တၢ်လုၢ်လီၢ်တိၢ်ဘီန့ၣ်ဆူအဝဲ အတၢ်လုၢ်လီၢ်သီအကပၤအကလံၤစိးတခီန့ၣ်လီၤ.
15 ဝံၤဒီးအဝဲဟ့ၣ်လီၤအကလုၢ်ဆူစီၤအူၤရံယၤစံးဝဲ, “သူယတၢ်လုၢ်လီၢ်ဖးဒိၣ်အံၤလၢဂီၤတၢ်လုၢ်မ့ၣ်အူတဖၣ်ဒီးဟါ တၢ်လုၢ်ဘုဧိၤဟုဧိၤတဖၣ်အဂီၢ်, လၢစီၤပၤဒီးပှၤဂီၢ်မုၢ်အတၢ်လုၢ်ဘုဧိၤဟုဧိၤတဖၣ်အဂီၢ်, ဒီးလၢပှၤဂီၢ်မုၢ်အတၢ်လုၢ်စပံးထံအဂီၢ်န့ၣ်တက့ၢ်. လူလီၤကယဲၢ်ဆၣ်ဖိကီၢ်ဖိခဲလၢာ်လၢအဘၣ်တၢ်လုၢ်ထီၣ်အီၤအံၤ အသွံၣ်လၢအဖီခိၣ်တက့ၢ်. ဘၣ်ဆၣ်ပာ်ဃာ်တၢ်လုၢ်လီၢ်တိၢ်ဘီဒ်သိးန့ၣ်လၢယဂီၢ်ဒ်သိးယကသူ အီၤလၢတၢ်သံကွၢ်တၢ်အဂီၢ်န့ၣ်တက့ၢ်.”
16 စီၤအူၤရံယၤမၤတၢ်ဒ်စီၤပၤမၤလိာ်အီၤအသိးန့ၣ်လီၤ.
17 စီၤပၤအၤဃးသုးကပၤကွံာ်လ့ၣ်တိၢ်ဘီတဖၣ်လၢအဘၣ်တၢ်သူ အီၤလၢယွၤအတၢ်လုၢ်ဟံၣ်အပူၤဒီးသုးကွံာ်သရာ်တဖၣ်လၢအအိၣ်လၢ အဖီခိၣ်န့ၣ်လီၤ. အဝဲဟံးထီၣ်ကွံာ်စ့ၢ်ကီးထံဒၢတိၢ်ဘီလၢဂီၤဖံးတိၢ်ဘီတဆံ ခံဒုအပျိၢ်လိၤဒီးပာ်လီၤဝဲလၢလၢၢ်တဖျၢၣ်အဖီခိၣ်န့ၣ်လီၤ.
18 ဒီးလၢတၢ်မၤဘၣ်ကီၢ်အၤၡူၢ်အစီၤပၤဖးဒိၣ်အသးအဂီၢ်န့ၣ်, စီၤအၤဃးသုးကွံာ်စ့ၢ်ကီးစိၤမိၤလၢစီၤပၤအလီၢ်ပစိာ်အိၣ် ဝဲလၢအဖီခိၣ်န့ၣ်လၢယွၤအတၢ်လုၢ်ဟံၣ်အပူၤဒီးကးတံၢ်ဃးကျဲစၢၤ လၢတၢ်ပာ်လီၤဆီအီၤလၢစီၤပၤကဟဲနုာ်ဆူယွၤအတၢ်လုၢ်ဟံၣ် ပူၤ, အဂီၢ်န့ၣ်လီၤ.
19 ကယဲၢ်တၢ်အဂၤလၢစီၤပၤအၤဃးမၤတ့ၢ်ဝဲန့ၣ်, ဘၣ်တၢ်ကွဲးနီၣ်အီၤလၢကီၢ်ယူဒၤအစီၤပၤတဖၣ်အလံာ်တၢ်စံၣ်စိၤ တဲစိၤအပူၤန့ၣ်လီၤ.
20 စီၤအၤဃးသံဝဲဒီးဘၣ်တၢ်ခူၣ်လီၤကွံာ်အီၤလၢစီၤပၤအတၢ်သွၣ် ခိၣ်လၢစီၤဒၤဝံးအဝ့ၢ်ပူၤဒီးအဝဲအဖိခွါစီၤဃံးစကံယၤကဲ ထီၣ်စီၤပၤလၢအလီၢ်န့ၣ်လီၤ.