14
(၂ကွဲး.၂၅:၁-၂၄)
1 လၢစီၤယဟိအါဃးအဖိခွါစီၤယိၤအၣ်ပၢတၢ်ဒ်ကီၢ်အံၣ်စရ့လး အစီၤပၤအသိးခံနံၣ်တနံၣ်အပူၤန့ၣ်စီၤယိၤအၣ်အဖိခွါစီၤအမၤ စယါကဲထီၣ်ကီၢ်ယူဒၤအစီၤပၤ,
2 ဖဲအသးအိၣ်ဝဲခံဆံယဲၢ်နံၣ်, ဒီးအဝဲပၢတၢ်လၢဝ့ၢ်ယရူၤၡလ့ၣ် အပူၤခံဆံခွံနံၣ်န့ၣ်လီၤ. အဝဲအမိၢ်မ့ၢ်ဝဲနီၢ်ယဟိဧဒံၣ်လၢဝ့ၢ်ယရူၤၡလ့ၣ်တခီန့ၣ်လီၤ.
3 အဝဲမၤတ့ၢ်တၢ်လၢအဘၣ်ယွၤအသး, ဘၣ်ဆၣ်ဒီးအဝဲ တလီၤဂာ်ဘၣ်ဒီးအပၢ်ဖးဒိၣ်လၢပျၢၤစီၤဒၤဝံးန့ၣ်ဘၣ်. အခိၣ်တလိာ်အဝဲမၤတၢ်လၢအပၢ်စီၤယိၤအၣ်မၤတ့ၢ်ဝဲန့ၣ်လီၤ.
4 အဝဲတမၤလီၤပှီၢ်ကွံာ်ဘၣ်ပှၤတစူၢ်တနာ်ယွၤတဖၣ်အတၢ်ဘူၣ်ထီၣ်ဘါ ထီၣ်အလီၢ်ဘၣ်. ဒီးပှၤဂီၢ်မုၢ်လုၢ်ထီၣ်ဒံးတၢ်လုၢ်တၢ်ပာ်တဖၣ်ဒီးဆိၣ်ကဲၤဒံး တၢ်နၢမူဖဲန့ၣ်လီၤ.
5 တုၤစီၤအမၤစယါအိၣ်ဒီးတၢ်စိတၢ်ကမီၤအဂၢၢ်အကျၢၤတဘျီ ဃီန့ၣ်, အဝဲမၤသံကွံာ်သုးခိၣ်သုးနၢ်တဖၣ်လၢအမၤသံကွံာ်တ့ၢ် လံအဝဲအပၢ်, စီၤပၤန့ၣ်လီၤ.
6 ဘၣ်ဆၣ်ဒီးအဝဲတမၤသံဘၣ်ပှၤတဖၣ်န့ၣ်အဖိတဖၣ်ဘၣ်. မ့မ့ၢ်ပိာ်ထွဲတၢ်လၢယွၤမၤလိာ်တ့ၢ်ဝဲလၢစီၤမိၤၡ့အတၢ်သိၣ် တၢ်သီအပူၤလၢအစံးဝဲ, “မိၢ်ပၢ်တဖၣ်တကြၢးဘၣ်တၢ်မၤသံအီၤလၢတၢ်ကမၣ်တဖၣ်လၢ အဖိတဖၣ်မၤဝဲအဃိ, ဒီးအဖိတဖၣ်တကြၢးဘၣ်တၢ်မၤသံအီၤလၢတၢ်ကမၣ်တဖၣ်လၢမိၢ်ပၢ် တဖၣ်မၤဝဲအဃိဘၣ်. ပှၤတဂၤကဘၣ်တၢ်မၤသံဒၣ်အီၤလၢတၢ်ကမၣ်လၢအဝဲမၤဒၣ်ဝဲအဃိ န့ၣ်လီၤ.”
7 စီၤအမၤစယါမၤသံကွံာ်ပှၤအဒိၣ်အသုးဖိအဂၤတကလးလၢအံသၣ်တၢ် တြီၤပူၤန့ၣ်လီၤ. အဝဲမၤန့ၢ်ကွံာ်ဝ့ၢ်စ့လၤလၢတၢ်ဒုးအပူၤ, ဒီးကိးအီၤလၢယိးကသ့ၣ်လး, ဒီးမံၤအံၤအိၣ်ဝဲတုၤမုၢ်မဆါတနံၤအံၤန့ၣ်လီၤ.
8 အန့ၣ်ဝံၤဒီးစီၤအမၤစယါဆှၢလီၤပှၤစိာ်တၢ်ကစီၣ်တဖၣ်ဆူ ကီၢ်အံၣ်စရ့လးစီၤပၤယိၤအၣ်အအိၣ်ဒီးတၤအီၤလၢကဟဲထီၣ်ဒုး တၢ်အဂီၢ်န့ၣ်လီၤ.
9 ဘၣ်ဆၣ်ဒီးစီၤပၤယိၤအၣ်ဆှၢလီၤကဒါက့ၤအတၢ်စံးဆၢဒ်လာ်အံၤ လီၤ. “တဘျီန့ၣ်တၤဆှူၣ်တပှီာ်တလိၣ်လၢလဘၤနိၣ်အကစၢၢ် အလိၤဆှၢလီၤတၢ်ကစီၣ်ဆူသ့ၣ်ဆှိအ့ရ့းအအိၣ်ဒီးတဲအီၤလၢ အကဟ့ၣ်လီၤအဖိမုၣ်လၢကဒိးတ့ဒိးဖျီအသးဒီးအဝဲအဖိခွါ အဂီၢ်န့ၣ်လီၤ. ဆၣ်ဖိကီၢ်ဖိအမံၤတဒုလဲၤခီဂာ်တၢ်ဒီးယီၢ်လီၤ ကလဲကွံာ်တၤဆှူၣ်တပှိာ်န့ၣ်လီၤ.
10 ခဲကနံၣ်အံၤစီၤအမၤစယါဧၢ, နမၤနၢၤကွံာ်လံပှၤအဒိၣ်ဖိတဖၣ် ဒီးနပှဲၤဒီးတၢ်ပာ်ကဖၢလၢသးန့ၣ်လီၤ. သးမံလၢနတၢ်မံၤဟူ သၣ်ဖျါအဃိ, ဒီးအိၣ်လၢနဟံၣ်တက့ၢ်. ဘၣ်မနုၤလၢနဘၣ်ထီၣ်ဂဲၤထီၣ်တၢ်ကီတၢ်ခဲ, လၢကဟဲစိာ်န့ၢ်ဒၣ်နၤ ဒီးနပှၤဂီၢ်မုၢ်လၢတၢ်ဟးဂူာ်ဟးဂီၤန့ၣ်လဲၣ်.”
11 ဘၣ်ဆၣ်စီၤအမၤစယါတဒိကနၣ်ဝဲဒၣ်ဘၣ်. လၢတၢ်န့ၣ်အဃိကီၢ်အံၣ်စရ့လးအစီၤပၤယိၤအၣ်လဲၤထီၣ်ဒီးအပှၤ တဖၣ်ဒီးဒုးတၢ်ထီဒါအီၤဖဲဝ့ၢ်ဘ့ၤသၡ့မ့ၣ်အိၣ်လၢကီၢ်ယူဒၤ အပူၤန့ၣ်လီၤ.
12 စီၤပၤအမၤစယါအသုးမုၢ်ဘၣ်တၢ်မၤနၢၤကွံာ်အီၤဒီးအပှၤသုးဖိ ခဲလၢာ်ထွးထီၣ်ဃ့ၢ်ပူၤဖျဲးအသးဆူအဟံၣ်ဒၣ်ဝဲန့ၣ်လီၤ.
13 စီၤယိၤအၣ်ဖီၣ်န့ၢ်စီၤအမၤစယါ, ဒီးလဲၤထီၣ်ဆူဝ့ၢ်ယရူၤ ၡလ့ၣ်ဒီးမၤလီၤပှီၢ်ကွံာ်ဝ့ၢ်အခိၣ်ဒူစးထီၣ်လၢတြဲၤအ့ဖရဲၣ် တုၤလၢတၢ်အသနၢၣ်အတြဲၤလၢအဒ့ၣ်စၢၤယံၤဝဲအပျၢ်လွံၢ်ကယၤန့ၣ် လီၤ.
14 အဝဲဟံးန့ၢ်ကွံာ်ကယဲၢ်စ့ဒီးထူလၢအထံၣ်န့ၢ်ဝဲသ့ခဲလၢာ်, ကယဲၢ်တၢ်လုၢ်ဟံၣ်အဃၢၤအဃိာ်, ဒီးနူၢ်ဧိၤစီၤဧိၤအတၢ်ထူးတၢ် တီၤခဲလၢာ်, ဒီးက့ၤစိာ်ဝဲဆူၡၤမရံန့ၣ်လီၤ. အဝဲက့ၤကိးဃုာ်စ့ၢ်ကီးပှၤလၢအဘၣ်တၢ်ဟ့ၣ်အုၣ်ကီၤတဖၣ်ဒီးအီၤ န့ၣ်လီၤ.
15 ကယဲၢ်တၢ်အဂၤခဲလၢာ်လၢစီၤယိၤအၣ်မၤတ့ၢ်ဝဲဃုာ်ဒီးအဝဲအတၢ် ဒူတၢ်ဃိၤလၢတၢ်ဒုးအပူၤထီဒါကီၢ်ယူဒၤအစီၤပၤအမၤစယါအဂ့ၢ်န့ၣ်, ဘၣ်တၢ်ကွဲးနီၣ်အီၤလၢကီၢ်အံၣ်စရ့လးအစီၤပၤတဖၣ်အလံာ်တၢ်စံၣ် စိၤတဲစိၤအပူၤန့ၣ်လီၤ.
16 စီၤယိၤအၣ်သံဝဲဒီးဘၣ်တၢ်ခူၣ်လီၤကွံာ်အီၤလၢစီၤပၤအတၢ် သွၣ်ခိၣ်လၢအအိၣ်လၢၡၤမရံအပူၤဒီးအဖိခွါစီၤယၤရၤဘၣ်ခံ ဂၤတဂၤကဲထီၣ်စီၤပၤလၢအလီၢ်န့ၣ်လီၤ.
(၂ကွဲး.၂၅:၂၅-၂၈)
17 ကီၢ်ယူဒၤအစီၤပၤအမၤစယါအိၣ်မူဒံးဝဲတဆံယဲၢ်နံၣ်ဖဲကီၢ် အံၣ်စရ့လးအစီၤပၤယိၤအၣ်သံဝံၤအလီၢ်ခံန့ၣ်လီၤ.
18 ကယဲၢ်တၢ်အဂၤခဲလၢာ်လၢစီၤအမၤစယါမၤတ့ၢ်ဝဲန့ၣ်, ဘၣ်တၢ်ကွဲးနီၣ်အီၤလၢကီၢ်ယူဒၤအစီၤပၤတဖၣ်အလံာ်တၢ်စံၣ်စိၤ တဲစိၤအပူၤန့ၣ်လီၤ.
19 တၢ်ကူၣ်အၢတမံၤအိၣ်ထီၣ်ဝဲလၢဝ့ၢ်ယရူၤၡလ့ၣ်အပူၤလၢတၢ်ကမၤသံ စီၤအမၤစယါအဃိအဝဲဃ့ၢ်ပူၤဖျဲးအသးဆူဝ့ၢ်လၤကံၣ်, ဘၣ်ဆၣ်အဒုၣ်အဒါတဖၣ်လူၤထွဲအီၤဖဲန့ၣ်ဒီးမၤသံကွံာ်အီၤန့ၣ် လီၤ.
20 အဝဲအစိၣ်ဘၣ်တၢ်ဟဲက့ၤစိာ်ကဒါက့ၤအီၤဆူဝ့ၢ်ယရူၤၡလ့ၣ်လၢ ကသ့ၣ်တဒုအလိၤဒီးဘၣ်တၢ်ခူၣ်လီၤကွံာ်အီၤလၢစီၤပၤအတၢ်သွၣ် ခိၣ်လၢစီၤဒၤဝံးအဝ့ၢ်ပူၤန့ၣ်လီၤ.
21 ကီၢ်ယူဒၤအပှၤဂီၢ်မုၢ်ပာ်ထီၣ်အဝဲအဖိခွါစီၤဧူးစံယါလၢ အသးအိၣ်တဆံဃုနံၣ်တဂၤလၢစီၤပၤအလီၢ်န့ၣ်လီၤ.
22 စီၤဧူးစံယါဒုးန့ၢ်ကဒါက့ၤဒီးဘှီထီၣ်ကဒါက့ၤဝ့ၢ်အ့လး ဖဲအပၢ်သံဝံၤအလီၢ်ခံန့ၣ်လီၤ.
23 လၢစီၤယိၤအၣ်အဖိခွါစီၤအမၤစယါပၢတၢ်ဒ်ကီၢ်ယူဒၤအစီၤပၤ အသိးတဆံယဲၢ်နံၣ်တနံၣ်အပူၤန့ၣ်, စီၤယိၤအၣ်အဖိခွါစီၤယၤရၤဘၣ်ခံဂၤတဂၤကဲထီၣ်ကီၢ်အံၣ်စရ့ လးအစီၤပၤ, ဒီးအဝဲပၢတ့ၢ်တၢ်လၢၡၤမရံအပူၤလွံၢ်ဆံတနံၣ်န့ၣ်လီၤ.
24 အဝဲမၤတ့ၢ်တၢ်ဒဲးဘးထီဒါယွၤ, ပိာ်ထွဲပှၤလၢအဝဲအမဲာ်ညါလၢ အမ့ၢ်စီၤနဘးအဖိခွါစီၤပၤယၤရၤဘၣ်အဒိအၢတဲာ်သီတဖၣ်လၢအ မ့ၢ်, တၢ်ဆှၢဃီၤကီၢ်အံၣ်စရ့လးဆူတၢ်ဒဲးဘးအပူၤန့ၣ်လီၤ.
25 အဝဲဒုးန့ၢ်ကဒါက့ၤကယဲၢ်လီၢ်ကဝီၤလၢအဘၣ်ဃးဒီးကီၢ်အံၣ်စရ့ လးခဲလၢာ်, စးထီၣ်လၢတၢ်လဲၤနုာ်ဆူဝ့ၢ်ဃမါသးလၢကလံၤစိးတခီတုၤလၢ ပီၣ်လဲၣ်သံလၢကလံၤထံးတခီန့ၣ်လီၤ. အအံၤမ့ၢ်တၢ်လၢယွၤ, အံၣ်စရ့လးအကစၢ်ယွၤအၢၣ်လီၤတ့ၢ်ဝဲခီဖျိအဝဲအခ့အပှၤဝံယိၤနါ, လၢအမ့ၢ်စီၤအမံးတဲၤအဖိခွါလၢဝ့ၢ်ကၤသးဃ့ဖ့ၢ်တခီန့ၣ်လီၤ.
26 ယွၤထံၣ်ဘၣ်တၢ်နးတၢ်ဖှီၣ်လီၤပျံၤလီၤဖုးလၢပှၤအံၣ်စရ့လး ဖိတူၢ်ဘၣ်ဝဲန့ၣ်လီၤ. ပှၤလၢကမၤစၢၤအဝဲသ့ၣ်တအိၣ်နီတဂၤဘၣ်.
27 ဘၣ်ဆၣ်ဒီးတမ့ၢ်ဘၣ်ယွၤအတၢ်တိာ်လၢကမၤဟးဂီၤကွံာ်ပှၤအံၣ်စရ့ လးဖိလၢာ်လၢာ်ဆ့ဆ့ဒီးလီၤစိၤလီၤထီန့ၣ်ဘၣ်. လၢတၢ်န့ၣ်အဃိအဝဲမၤပူၤမၤဖျဲးက့ၤအဝဲသ့ၣ်ခီဖျိစီၤယၤ ရၤဘၣ်ခံဂၤတဂၤန့ၣ်လီၤ.
28 ကယဲၢ်တၢ်အဂၤလၢစီၤယၤရၤဘၣ်ခံဂၤတဂၤမၤတ့ၢ်ဝဲ, အဝဲအတၢ်ဒုးတၢ်ယၤတဖၣ်လၢအအိၣ်ဒီးတၢ်ဒူတၢ်ဃိၤ, ဒီးအဝဲမၤန့ၢ်ကဒါက့ၤဝ့ၢ်ဒၤမ့ၤစ့းဒီးဝ့ၢ်ဃမါသးတဖၣ်လၢ ကီၢ်အံၣ်စရ့လးအဂီၢ်, တၢ်ခဲလၢာ်န့ၣ်ဘၣ်တၢ်ကွဲးနီၣ်အီၤလၢကီၢ်အံၣ်စရ့လးအစီၤပၤ တဖၣ်အလံာ်တၢ်စံၣ်စိၤတဲစိၤအပူၤန့ၣ်လီၤ.
29 စီၤယၤရၤဘၣ်ခံဂၤတဂၤသံဝဲဒီးဘၣ်တၢ်ခူၣ်လီၤကွံာ်အီၤလၢ စီၤပၤတဖၣ်အတၢ်သွၣ်ခိၣ်ဒီးအဝဲအဖိခွါစီၤစကၤရယၤကဲထီၣ် စီၤပၤလၢအလီၢ်န့ၣ်လီၤ.