13
1 လၢစီၤအဃၤစယၤအဖိခွါကီၢ်ယူဒၤအစီၤပၤစီၤယိၤအၣ်ပၢတၢ် အနံၣ်ပှဲၤထီၣ်ခံဆံသၢနံၣ်တနံၣ်အပူၤန့ၣ်, စီၤယ့ၤဟူအဖိခွါစီၤယဟိအါဃးကဲထီၣ်ကီၢ်အံၣ်စရ့လးအစီၤ ပၤ, ဒီးအဝဲပၢတ့ၢ်တၢ်လၢကီၢ်ၡၤမရံအပူၤတဆံနွံနံၣ်န့ၣ်လီၤ.
2 ဒ်စီၤပၤယၤရၤဘၣ်လၢအဝဲအမဲာ်ညါအသိးန့ၣ်အဝဲမၤတ့ၢ်တၢ်ဒဲး ဘးထီဒါယွၤဒီးဆှၢဃီၤကီၢ်အံၣ်စရ့လးဆူတၢ်ဒဲးဘးအပူၤ န့ၣ်လီၤ. အဝဲတညိကွံာ်ဘၣ်အကျဲအၢကျဲသီတဖၣ်နီတဘျီဘၣ်.
3 လၢတၢ်န့ၣ်အဃိ, ယွၤသးထီၣ်ဘၣ်ကီၢ်အံၣ်စရ့လး, ဒီးအဝဲပျဲကီၢ်စူၤရံအစီၤပၤဃစ့လးဒီးအဖိခွါစီၤဘ့ၣ် ဟဒးလၢကမၤနၢၤကီၢ်အံၣ်စရ့လးတဘျီဘၣ်တဘျီန့ၣ်လီၤ.
4 ဒီးစီၤယဟိအါဃးဘါထုကဖၣ်တၢ်ဆူယွၤအအိၣ်, ဒီးယွၤထံၣ်ဘၣ်ဝဲကီၢ်စူၤရံအစီၤပၤမၤအၢမၤနးပှၤအံၣ်စရ့ လးဖိနးထဲလဲၣ်ထဲလဲၣ်အဃိ, စံးဆၢဝဲအတၢ်ထုကဖၣ်န့ၣ်လီၤ.
5 ယွၤဟ့ၣ်လီၤကီၢ်အံၣ်စရ့လးလၢခိၣ်နၢ်တဂၤ, လၢကမၤပူၤဖျဲးအဝဲသ့ၣ်လၢပှၤစူၤရံဖိတဖၣ်အစုပူၤ, ဒီးလၢတၢ်န့ၣ်အဃိပှၤအံၣ်စရ့လးဖိတဖၣ်အိၣ်ဆိးဘၣ်ဝဲမုာ်မုာ် ခုၣ်ခုၣ်ဒ်လၢညါအသိးန့ၣ်လီၤ.
6 ဘၣ်ဆၣ်အဝဲသ့ၣ်တညိကွံာ်ဒံးဘၣ်တၢ်ဒဲးဘးတဖၣ်လၢစီၤပၤယၤရၤ ဘၣ်ဒုးမၤတ့ၢ်ကီၢ်အံၣ်စရ့လးန့ၣ်ဘၣ်. မ့မ့ၢ်အဝဲသ့ၣ်မၤဒံးဒၣ်တၢ်ဒဲးဘးတဖၣ်န့ၣ်ဒီးကစၢ်မုၣ်အၡ့ ရၤအဂီၤအိၣ်ဒံးဒၣ်လၢကီၢ်ၡၤမရံအပူၤန့ၣ်လီၤ.
7 မ့တမ့ၢ်ဘၣ်လၢကသ့ၣ်သုးဖိအဂၤယဲၢ်ဆံ, လ့ၣ်ကဟၣ်အဆိတဆံ ဒီးပှၤခီၣ်သုးဖိအဂၤတကလးဘၣ်န့ၣ်, စီၤယဟိအါဃးအသုးမုၢ် အဂၤတအိၣ်လၢၤဘၣ်. အဂ့ၢ်ဒ်အံၤ, ကီၢ်စူၤရံအစီၤပၤမၤဟးဂီၤကွံာ်ဝဲအဂၤတဖၣ်ခဲလၢာ်, ယီၢ်တံၢ်လီၤကလဲဝဲခဲလၢာ်ဒ်ဖၣ်ကမူၣ်ဖၣ်ဆါအသိးန့ၣ်လီၤ.
8 ကယဲၢ်တၢ်အဂၤလၢစီၤယဟိအါဃးမၤတ့ၢ်ဝဲန့ၣ်ဒီးကယဲၢ်အဝဲ အတၢ်မၤအဒူအဃိၤတဖၣ်ဘၣ်တၢ်ကွဲးနီၣ်အီၤလၢကီၢ်အံၣ်စရ့လး အစီၤပၤတဖၣ်အလံာ်တၢ်စံၣ်စိၤတဲစိၤအပူၤန့ၣ်လီၤ.
9 အဝဲဒၣ်သံဝဲ, ဒီးဘၣ်တၢ်ခူၣ်လီၤကွံာ်အီၤလၢၡၤမရံအပူၤ, ဒီးအဝဲအဖိခွါစီၤယိၤအၣ်ကဲထီၣ်စီၤပၤလၢအလီၢ်န့ၣ်လီၤ.
10 လၢကီၢ်ယူၤဒၤအစီၤပၤစီၤယိၤအၣ်ပၢတၢ်သၢဆံနွံနံၣ်တနံၣ် အပူၤန့ၣ်, စီၤယဟိအါဃးအဖိခွါစီၤယိၤအၣ်ကဲထီၣ်ကီၢ်အံၣ်စရ့လးအစီၤ ပၤဒီးအဝဲပၢတ့ၢ်တၢ်လၢၡၤမရံတဆံဃုနံၣ်န့ၣ်လီၤ.
11 အဝဲစ့ၢ်ကီးမၤတ့ၢ်တၢ်ဒဲးဘးထီဒါယွၤ, ဒီးပိာ်ထွဲဒိအၢ တဲာ်သီတဖၣ်လၢစီၤပၤယၤရၤဘၣ်မၤတ့ၢ်ဝဲလၢအဆှၢဃီၤကီၢ်အံၣ်စရ့လး ဆူတၢ်ဒဲးဘးအပူၤန့ၣ်လီၤ.
12 ကယဲၢ်တၢ်အဂၤလၢစီၤယိၤအၣ်မၤတ့ၢ်ဝဲ, ဃုာ်ဒီးအတၢ်သူၣ်ဒူသး ဒူလၢတၢ်ဒုးအပူၤထီဒါကီၢ်ယူဒၤအစီၤပၤအမၤစယါန့ၣ်ဘၣ်တၢ် ကွဲးနီၣ်အီၤလၢကီၢ်အံၣ်စရ့လးအစီၤပၤတဖၣ်အလံာ်တၢ်စံၣ်စိၤ တဲစိၤအပူၤန့ၣ်လီၤ.
13 စီၤယိၤအၣ်သံဝဲ, ဒီးဘၣ်တၢ်ခူၣ်လီၤကွံာ်အီၤလၢစီၤပၤအသွၣ် ခိၣ်လၢၡၤမရံဒီးအဖိခွါစီၤယၤရၤဘၣ်ခံဂၤတဂၤကဲထီၣ်စီၤ ပၤလၢအလီၢ်န့ၣ်လီၤ.
14 ဝံအလံၤၡါဆါဝဲလၢတၢ်ဆါလၢအသံန့ၢ်ပှၢ်န့ၢ်ပှၤဒီးဖဲ အဝဲမံလီၤဘူးလၢအကသံအခါန့ၣ်ကီၢ်အံၣ်စရ့လးအစီၤပၤစီၤ ယိၤအၣ်လဲၤအိၣ်သကိးအီၤန့ၣ်လီၤ. လၢတၢ်ဟီၣ်တၢ်ယၢၤအပူၤန့ၣ်အဝဲတဲထီၣ်ဖျဲးဝဲဒၣ်, “ယပၢ်ဧၢ, ယပၢ်ဧၢ, နမ့ၢ်တ့ၢ်နဲပှၤဂံၢ်ဆူၣ်ဘါဆူၣ်လၢအအိၣ်ပှိၤ ဒီဒၣ်ကီၢ်အံၣ်စရ့လးန့ၣ်လီၤ.”
15 စီၤအလံၤၡါမၤလိာ်အီၤစံးဝဲ, “ဟံးန့ၢ်ချံၣ်တဘိဒီးပျၢ်တ နီၤတက့ၢ်.” စီၤယိၤအၣ်မၤန့ၢ်တၢ်တဖၣ်န့ၣ်,
16 ဒီးစီၤအလံၤၡါတဲဘၣ်အီၤလၢကအိၣ်ကတဲာ်ကတီၤအသးဒ်သိးကခးတၢ် အဂီၢ်န့ၣ်လီၤ. စီၤပၤမၤဝဲဒ်န့ၣ်, ဒီးစီၤအလံၤၡါပာ်ထီၣ်အစုလၢစီၤပၤအစု လိၤန့ၣ်လီၤ.
17 ဝံၤဒီးဒ်ဝံသိၣ်လိနဲၣ်ယုၤအီၤအသိးန့ၣ်, စီၤပၤအိးထီၣ်ပဲတြီ လၢအကွၢ်ဆၢညါတၢ်ဆူကီၢ်စူၤရံန့ၣ်လီၤ. စီၤအလံၤၡါဟ့ၣ်လီၤအကလုၢ်, “ခးပျၢ်န့ၣ်တက့ၢ်.” ဖဲစီၤပၤခးပျၢ်တဘျီဃီန့ၣ်, ဝံစံးဝဲဒၣ်, “နမ့ၢ်ယွၤအပျၢ်လၢအဝဲကမၤနၢၤကွံာ်ကီၢ်စူၤရံခီဖျိနၤန့ၣ်လီၤ. နကဒုးတၢ်ဒီးပှၤစူၤရံဖိတဖၣ်ဖဲဝ့ၢ်အဖ့း, တုၤနမၤနၢၤကွံာ်အဝဲသ့ၣ်န့ၣ်လီၤ.”
18 အန့ၣ်ဝံၤဒီး, စီၤအလံၤၡါတဲဘၣ်စီၤပၤလၢကဟံးန့ၢ်ပျၢ်အဂၤ တဖၣ်ဒီးတီၢ်ဟီၣ်ခိၣ်လၢပျၢ်တဖၣ်န့ၣ်လီၤ. စီၤပၤတီၢ်ဟီၣ်ခိၣ်သၢဘျီဝံၤဒီးဆိကတီၢ်ဝဲဒၣ်န့ၣ်လီၤ.
19 တၢ်အံၤမၤသးဒိၣ်ထီၣ်စီၤအလံၤၡါ, ဒီးအဝဲစံးဘၣ်စီၤပၤ, “နကြၢးတီၢ်တၢ်ယဲၢ်ဘျီမ့တမ့ၢ်ဃုဘျီဒီးနကအိၣ်ဒီးတၢ်မၤ နၢၤတၢ်လၢာ်လၢာ်ဆ့ဆ့လၢပှၤစူၤရံတဖၣ်အဖီခိၣ်န့ၣ်လီၤ. မ့မ့ၢ်ခဲကနံၣ်အံၤနကမၤနၢၤအဝဲသ့ၣ်ထဲသၢဘျီဧိၤန့ၣ်လီၤ.”
20 စီၤအလံၤၡါသံဝဲ, ဒီးဘၣ်တၢ်ခူၣ်လီၤကွံာ်အီၤန့ၣ်လီၤ. လၢတၢ်မဲထီၣ်သီအကတီၢ်ကိးနံၣ်ဒဲးန့ၣ်, မိၤအးအပှၤဒုးတၢ်ဖိ အဖုအဂီၢ်တဖၣ်ညီနုၢ်ဟဲနုာ်လီၤဒုးကီၢ်အံၣ်စရ့လးန့ၣ်လီၤ.
21 တဘျီဖဲပှၤလဲၤခူၣ်လီၤပှၤသံအခါန့ၣ်, တၢ်ထံၣ်ဘၣ်ပှၤတဖၣ်န့ၣ် အကျါပှၤတဖု, ဒီးပှၤဂီၢ်မုၢ်တ့ၢ်လီၤကွံာ်ပှၤအစိၣ်န့ၣ်, ဆူအလံၤၡါအတၢ်သွၣ်ခိၣ်အပူၤဒီးထွးထီၣ်ဃ့ၢ်ကွံာ်ဝဲန့ၣ်လီၤ. တစုဃီဖဲပှၤအစိၣ်ဘၣ်ဒိဒီးစီၤအလံၤၡါအဃံန့ၣ်ပှၤတဂၤန့ၣ် မူထီၣ်က့ၤဝဲဒီးဆၢထၢၣ်ဝဲဒၣ်န့ၣ်လီၤ.
22 ကီၢ်စူၤရံအစီၤပၤဃစ့လးမၤနၢၤမၤဃၣ်ပှၤအံၣ်စရ့လးဖိတဖၣ် ဖဲစီၤယဟိအါဃးပၢတၢ်ဒီကတီၢ်,
23 ဘၣ်ဆၣ်ယွၤအသူၣ်အိၣ်သးအိၣ်ဒီးသူၣ်ကညီၤသးကညီၤအဝဲ သ့ၣ်န့ၣ်လီၤ. ယွၤတပျဲဘၣ်အဝဲသ့ၣ်ဘၣ်တၢ်မၤဟးဂီၤကွံာ်အီၤ န့ၣ်ဘၣ်. မ့မ့ၢ်မၤစၢၤအဝဲသ့ၣ်မ့ၢ်လၢအဝဲအတၢ်အၢၣ်လီၤအီလီၤဒီးစီၤ အၤဘြၤဟၣ်, စီၤအံၤစဲးဒီးစီၤယၤကိာ်အဃိန့ၣ်လီၤ. ယွၤတသးပ့ၤနီၣ်ဘၣ် အပှၤဂီၢ်မုၢ်နီတစုဘၣ်.
24 ဖဲကီၢ်စူၤရံအစီၤပၤဃစ့လးသံဝဲန့ၣ်, အဖိခွါစီၤဘ့ၣ်ဟဒး ကဲထီၣ်စီၤပၤလၢအလီၢ်န့ၣ်လီၤ.
25 အန့ၣ်ဝံၤဒီးကီၢ်အံၣ်စရ့လးအစီၤပၤယိၤအၣ်မၤနၢၤကွံာ်စီၤ ဘ့ၣ်ဟဒးသၢဘျီ, ဒီးမၤန့ၢ်က့ၤဝ့ၢ်တဖၣ်လၢစီၤဘ့ၣ်ဟဒးဟံးန့ၢ်ကွံာ်ဝဲ, ဖဲစီၤယဟိအါဃးလၢအမ့ၢ်စီၤယိၤအၣ်အပၢ်ပၢတၢ်အခါန့ၣ်လီၤ.