12
(၂ကွဲး.၂၄:၁-၁၆)
1 လၢကီၢ်အံၣ်စရ့လးအစီၤပၤစီၤယ့ၤဟူပၢတၢ်နွံနံၣ်တနံၣ်အပူၤ န့ၣ်, စီၤယိၤအၣ်ကဲထီၣ်ကီၢ်ယူဒၤအစီၤပၤ, ဒီးအဝဲပၢတၢ်လၢဝ့ၢ် ယရူၤၡလ့ၣ်အပူၤအနံၣ်လွံၢ်ဆံန့ၣ်လီၤ. အဝဲအမိၢ်မ့ၢ်ဝဲနီၢ်စံဘယၤ, လၢဝ့ၢ်ဘ့ၢ်ၡဘၤန့ၣ်လီၤ.
2 အဝဲမၤတၢ်ဘၣ်ယွၤအသးလၢအမုၢ်နံၤမုၢ်သီတဖၣ်ဖဲပှၤလုၢ်တၢ် အခိၣ်စီၤယဟိယဒါသိၣ်လိနဲၣ်ယူၤအီၤအပူၤန့ၣ်လီၤ.
3 ဘၣ်ဆၣ်ဒီး, ပှၤတစူၢ်တနာ်ယွၤအတၢ်ဘူၣ်ထီၣ်ဘါထီၣ်အလီၢ်တဖၣ်တဘၣ် တၢ်မၤဟးဂီၤကွံာ်အီၤဘၣ်. ဒီးပှၤဂီၢ်မုၢ်လုၢ်ထီၣ်ထွဲဒံးတၢ်လုၢ်တၢ်ပာ်တဖၣ်ဒီးဆိၣ်ကဲၤ ဒံးတၢ်နၢမူဖဲန့ၣ်လီၤ.
4 စီၤယိၤအၣ်ကိးဃီၤပှၤလုၢ်တၢ်အခိၣ်တဖၣ်ဒီးဟ့ၣ်လီၤအကလုၢ်ဆူ အဝဲသ့ၣ်လၢကပာ်ဖှိၣ်ပာ်တံၤစ့လၢအဘၣ်တၢ်ဟ့ၣ်အီၤဘၣ်ထွဲဒီး တၢ်လုၢ်တၢ်ပာ်တဖၣ်လၢယွၤအတၢ်လုၢ်ဟံၣ်အပူၤလၢအမ့ၢ်, တၢ်လၢပှၤဘၣ်ဟ့ၣ်အီၤလၢတၢ်လုၢ်တၢ်ပာ်ဘၣ်ဆၢဘၣ်ကတီၢ်တဖၣ်အဂီၢ် မ့ၢ်ဂ့ၤ, စ့လၢအဘၣ်တၢ်ဟ့ၣ်လီၤအီၤဒ်အမ့ၢ်တၢ်သူၣ်အိၣ်သးအိၣ် အတၢ်ဟ့ၣ်တဖၣ်အသိးမ့ၢ်ဂ့ၤန့ၣ်လီၤ.
5 ပှၤလုၢ်တၢ်အခိၣ်တဂၤဘၣ်တဂၤစုာ်စုာ်အိၣ်ဒီးမူဒါလၢစ့လၢအဘၣ် တၢ်ဟဲစိာ်အီၤလၢပှၤတဖၣ်လၢအဝဲမၤန့ၢ်အီၤတၢ်အဂီၢ်, ဒီးစ့န့ၣ်ကဘၣ်တၢ်သူအီၤလၢတၢ်မၤဂ့ၤထီၣ်က့ၤယွၤအတၢ်လုၢ် ဟံၣ်အဂီၢ်ဒ်အလီၢ်အိၣ်ဝဲအသိးန့ၣ်လီၤ.
6 ဘၣ်ဆၣ်တုၤလီၤလၢစီၤယိၤအၣ်ပၢတၢ်ခံဆံသၢနံၣ်ဒၣ်လဲာ်န့ၣ်ပှၤ လုၢ်တၢ်အခိၣ်တဖၣ်တမၤဂ့ၤထီၣ်က့ၤဘၣ်ဒံးယွၤအတၢ်လုၢ်ဟံၣ်နီ တစဲးဘၣ်န့ၣ်လီၤ.
7 လၢတၢ်န့ၣ်အဃိ, အဝဲကိးဃီၤစီၤယဟိယဒါဒီးပှၤလုၢ်တၢ်အခိၣ် အဂၤတဖၣ်ဒီးသံကွၢ်အဝဲသ့ၣ်, “ဘၣ်မနုၤအဃိလၢသုတမၤဂ့ၤထီၣ်က့ၤယွၤအတၢ်လုၢ်ဟံၣ်န့ၣ် လဲၣ်. စးထီၣ်ခဲကနံၣ်အံၤဒီးဆူညါသုတဘၣ်ပၢၤဃာ်လၢၤစ့ လၢသုဒိးန့ၢ်အီၤန့ၣ်လၢၤဘၣ်. သုကဘၣ်ဟ့ၣ်လီၤဒ်သိးတၢ်ဘှီက့ၤဘၣ်တၢ်မၤအီၤကသ့ အဂီၢ်န့ၣ်လီၤ.”
8 ပှၤလုၢ်တၢ်အခိၣ်တဖၣ်ဘၣ်သူၣ်ဘၣ်သးလၢတၢ်ဂ့ၢ်အံၤ, ဒီးဘၣ်သူၣ်ဘၣ်သးစ့ၢ်ကီးလၢအဝဲသ့ၣ်တဘှီဂ့ၤထီၣ်က့ၤဘၣ်ယွၤ အတၢ်လုၢ်ဟံၣ်လၢအနီၢ်ကစၢ်ဒၣ်ဝဲဘၣ်န့ၣ်လီၤ.
9 အန့ၣ်ဝံၤဒီး, စီၤယဟိယဒါဟံးန့ၢ်တလါတဖျၢၣ်ဒီးမၤန့ၢ်တၢ် ပူၤဟိတပူၤလၢအခိၣ်ကၢၢ်ဒီးပာ်လီၤတလါန့ၣ်ဖဲတၢ်လုၢ်လီၢ်အ ဃၢၤ, လၢစုထွဲတကပၤဖဲပှၤလဲၤနုာ်လီၤဆူယွၤအတၢ်လုၢ်ဟံၣ်ပူၤန့ၣ် လီၤ. ပှၤလုၢ်တၢ်အခိၣ်တဖၣ်အိၣ်မူအိၣ်ဒါဖဲကျဲစၢၤထံးန့ၣ်, ဒၢနုာ်လီၤစ့လၢအဘၣ်တၢ်ဟ့ၣ်လီၤအီၤလၢပှၤဟဲဘူၣ်တၢ်ဘါတၢ် တဖၣ်ခဲလၢာ်ဆူတလါပူၤန့ၣ်လီၤ.
10 တဘျီလၢ်လၢ်ဖဲစ့အါထီၣ်လၢတလါအပူၤန့ၣ်, စီၤပၤအပှၤကွဲးလံာ်ဒိၣ်, ဒီးပှၤလုၢ်တၢ်အခိၣ်အဒိၣ်ကတၢၢ်ကဟဲဝဲ, ဒီးဂံၢ်စ့န့ၣ်, ဒီးဒၢနုာ်ဝဲဆူထၢၣ်တဖၣ်တပူၤဒီးစၢဃာ်ဝဲအခိၣ်လီၤ.
11 ဖဲတၢ်မၤနီၣ်မၤဃါစ့အတၢ်ဂံၢ်လီၤတံၢ်လီၤဆဲးဝံၤအလီၢ်ခံ န့ၣ်, အဝဲသ့ၣ်ကဟ့ၣ်လီၤစ့န့ၣ်ဆူပှၤအိၣ်မူအိၣ်ဒါတဖၣ်လၢအမၤတၢ်လၢ ယွၤအတၢ်လုၢ်ဟံၣ်ပူၤအအိၣ်, ဒီးအဝဲသ့ၣ်ကဟ့ၣ်ဘူးဟ့ၣ်လဲပှၤမၤတၢ်လၢသ့ၣ်တဖၣ်, ပှၤဘှီထီၣ်တၢ်တဖၣ်, ပှၤမၤတၢ်လၢအီကတဲတဖၣ်, ပှၤကူးတဲာ်လၢၢ်တဖၣ်.
12 ပှ့ၤသ့ၣ်ဒီးလၢၢ်တဖၣ်လၢတၢ်ကသူအီၤလၢတၢ်ဘှီက့ၤအဂီၢ်, ဒီးဟ့ၣ်လီၤကယဲၢ်တၢ်လၢာ်အဂုၤအဂၤတဖၣ်အဂီၢ်န့ၣ်လီၤ.
13 ဘၣ်ဆၣ်ဒီးစ့တဘၣ်တၢ်သူအီၤနီတစဲးလၢတၢ်ကဟ့ၣ်တၢ်အပှ့ၤလၢတၢ် မၤလီခီစ့တဖၣ်မ့ၢ်ဂ့ၤ, သလၢတဖၣ်မ့ၢ်ဂ့ၤ, ကွဲၤတဖၣ်မ့ၢ်ဂ့ၤ, တၢ်ပီးတၢ်လီလၢတၢ်မၤကဆှီမ့ၣ်အူဒၢတဖၣ် အဂီၢ်လၢတၢ်အဃၢၤအဃိၣ်အဂၤလၢစ့ဒီးထူတဖၣ်အဂီၢ်မ့ၢ်ဂ့ၤန့ၣ်ဘၣ်.
14 စ့ခဲလၢာ်န့ၣ်ဘၣ်တၢ်သူဒၣ်အီၤလၢတၢ်ကဟ့ၣ်ဘူးဟ့ၣ်လဲ ပှၤမၤတၢ်ဖိတဖၣ်ဒီးတၢ်ကပှ့ၤတၢ်ပီးတၢ်လီတဖၣ်လၢတၢ်ကသူအီၤ လၢတၢ်ဘှီဂ့ၤထီၣ်က့ၤတၢ်အဂီၢ်န့ၣ်လီၤ.
15 ပှၤအခိၣ်တဖၣ်လၢအကွၢ်ထွဲတၢ်ဖံးတၢ်မၤန့ၣ်, မ့ၢ်ပှၤအတီအလိၤလၢာ်လၢာ်ဆ့ဆ့အဃိ, အလီၢ်တအိၣ်ဘၣ်လၢတၢ်ကဃ့အဝဲသ့ၣ်စ့ အတၢ်ကွဲးနီၣ်အတၢ်ပာ်ဖျါဘၣ်.
16 စ့လၢအဘၣ်တၢ်ဟ့ၣ်အီၤလၢတၢ်မၤကမၣ်တၢ်အဂီၢ်ဒီးလၢတၢ်မၤတၢ် ဒဲးဘးအဂီၢ်န့ၣ်တဘၣ်တၢ်ဒၢနုာ်လီၤအီၤဆူတလါအပူၤဘၣ်. တၢ်န့ၣ်မ့ၢ်ပှၤလုၢ်တၢ်အခိၣ်တဖၣ်အတၢ်န့ၣ်လီၤ.
17 ဖဲအဆၢကတီၢ်န့ၣ်ကီၢ်စူၤရံအစီၤပၤဃစ့လးလဲၤထီၣ်ဒုးဝ့ၢ်ကၤ သးဒီးမၤန့ၢ်အီၤန့ၣ်လီၤ. အန့ၣ်ဝံၤဒီးအဝဲပာ်လီၤအသးလၢကလဲၤထီၣ်ဒုးဝ့ၢ်ယရူၤၡလ့ၣ် န့ၣ်လီၤ.
18 ကီၢ်ယူဒၤအစီၤပၤယိၤအၣ်ဟံးန့ၢ်ကယဲၢ်တၢ်မၤဘူၣ်ခဲလၢာ်လၢပှၤ လၢအမဲာ်ညါတဖၣ်လၢအမ့ၢ်စီၤယဟိၡၤဖး, စီၤယဟိရၣ်ဒီးစီၤအဃၤစယၤလုၢ်ထီၣ်တ့ၢ်ဝဲဆူယွၤအအိၣ်, ပာ်ဖှိၣ်အါထီၣ်ဃုာ်ဝဲဒီးအဝဲအနီၢ်ကစၢ်အတၢ်မၤဘူၣ်တဖၣ်ဒီး ကယဲၢ်ထူခဲလၢာ်အအိၣ်လၢတၢ်ပာ်ဖှိၣ်အလီၢ်လၢယွၤအတၢ်လုၢ်ဟံၣ် အပူၤဒီးနူၢ်ဧိၤစီၤဧိၤအပူၤဒီးဆှၢလီၤဝဲခဲလၢာ်ဒ်တၢ်ဟ့ၣ် အသိးဆူစီၤပၤဃစ့လးအအိၣ်, ဒီးအန့ၣ်တစုဟးထီၣ်ကွံာ်ဒီးအသုးမုၢ်ယံၤဒီးဝ့ၢ်ယရူၤၡလ့ၣ်န့ၣ်လီၤ.
19 ကယဲၢ်တၢ်အဂၤတမံၤလၢ်လၢ်လၢစီၤပၤယိၤအၣ်မၤတ့ၢ်ဝဲန့ၣ်, ဘၣ်တၢ်ကွဲးနီၣ်အီၤလၢကီၢ်ယူဒၤအစီၤပၤတဖၣ်အလံာ်တၢ်စံၣ်စိၤ တဲစိၤအပူၤန့ၣ်လီၤ.
20 စီၤပၤယိၤအၣ်အသုးခိၣ်သုးနၢ်တဖၣ်ကူၣ်ထီၣ်ထီဒါအီၤ, ဒီးလၢအကျါခံဂၤလၢအမ့ၢ်နီၢ်ၡံမဧးအဖိခွါစီၤယိၤစၤကၢ် ဒီးနီၢ်ၡိမ့ၢ်အဖိခွါစီၤယဟိစဘးန့ၣ်, မၤသံကွံာ်အီၤဖဲဟံၣ်တဖျၢၣ်လၢအဘၣ်တၢ်ဘှီထီၣ်အီၤလၢဟီၣ်ခိၣ် လၢအဘၣ်တၢ်မၤပှဲၤအီၤအဖီခိၣ်လၢအအိၣ်ဖဲဝ့ၢ်ယရူၤၡလ့ၣ်အမုၢ် ထီၣ်, ကျဲလဲၤလီၤဆူဝ့ၢ်စံးလၤအဖီခိၣ်န့ၣ်လီၤ.
21 စီၤယိၤအၣ်ဘၣ်တၢ်ခူၣ်လီၤကွံာ်အီၤဖဲစီၤပၤအတၢ်သွၣ်ခိၣ်လၢ စီၤဒၤဝံးအဝ့ၢ်ပူၤဒီးအဖိခွါစီၤအမၤစယါကဲထီၣ်စီၤပၤလၢ အလီၢ်န့ၣ်လီၤ.