2
1 ဘူးထီၣ်လၢစီၤဒၤဝံးကသံန့ၣ်အဝဲကိးအဖိခွါစီၤၡလိၤမိၤ ဒီးဟ့ၣ်လီၤအီၤအတၢ်မၤလိာ်ပိာ်လီၤလၢခံကတၢၢ်တဖၣ်န့ၣ်လီၤ.
2 ယတၢ်သံအဆၢကတီၢ်ဟဲတုၤလံ. အိၣ်ဒီးတၢ်နာ်န့ၢ်အီၤနသးဒီးတၢ် ပာ်လီၤသးသပှၢ်ပှၢ်,
3 ဒီးမၤတၢ်လၢယွၤ, နကစၢ်ယွၤမၤလိာ်နၤလၢနကဘၣ်မၤန့ၣ်တက့ၢ်. စူၢ်ကယဲၢ်အဝဲအတၢ်ဘူၣ်ထီၣ်ဘါထီၣ်အတၢ်သိၣ်တၢ်သီဒီးအတၢ်မၤလိာ် တဖၣ်လၢအအိၣ်ကွဲးအသးလၢစီၤမိၤၡ့အတၢ်သိၣ်တၢ်သီအလံာ်ပူၤဒ် သိးဖဲနလဲၤတၢ်တပူၤလၢ်လၢ်န့ၣ်, နကဘီၣ်ထီၣ်ညီထီၣ်လၢကယဲၢ်တၢ်လၢနမၤခဲလၢာ်အပူၤန့ၣ်တက့ၢ်.
4 နမ့ၢ်စူၢ်အီၤဒီး, ယွၤကဟံးဃာ်အတၢ်အၢၣ်လီၤလၢအမၤတ့ၢ်ဝဲ, ဖဲအဝဲစံးဘၣ်တ့ၢ်ယၤလၢ, ယစၢၤယသွဲၣ်တဖၣ်, ကပၢဘၣ်ကီၢ်အံၣ်စရ့လးအဆၢကတီၢ်ကယံာ်ပှဲၤသိးဒီးအဝဲသ့ၣ်အတၢ် စူၢ်ယတၢ်မၤလိာ်လၢတၢ်သးတီလီၤတံၢ်လီၤဆဲးလၢအသူၣ်ဒီဖျၢၣ် သးဒီဖျၢၣ်န့ၣ်လီၤ.
5 တၢ်အိၣ်ဒံးအဂၤတမံၤန့ၣ်လီၤ. နသ့ၣ်နီၣ်ထီၣ်တၢ်လၢစီၤယိၤအာ် မၤဘၣ်တ့ၢ်ယၤခီဖျိမၤသံသုးခိၣ်ဖးဒိၣ်ခံဂၤလၢအံၣ်စရ့လး အသုးမုၢ်အပူၤလၢအမ့ၢ်ဝဲ, စီၤန့ၢ်အဖိခွါစီၤအဘံန့ၢ်, ဒီးစီၤယ့သ့ၢ်အဖိခွါစီၤဧမါစၤလီၤ. နသ့ၣ်နီၣ်ထီၣ်လၢအဝဲမၤသံတ့ၢ်အဝဲသ့ၣ်လၢတၢ်မုာ်တၢ်ခုၣ်အကတီၢ် ဒ်လဲၣ်, ဒ်တၢ်ဟ့ၣ်ကၣ်အသိးလၢတၢ်သံတဖၣ်လၢအဝဲသ့ၣ်မၤဘၣ်တ့ၢ်ဝဲဖဲတၢ် ဒုးတၢ်ယၤအကတီၢ်အဃိန့ၣ်လီၤ. အဝဲမၤသံကွံာ်ပှၤလၢအတၢ်ကမၣ်တအိၣ်တဖၣ်, ဒီးယဟံးန့ၢ်မူဒါလၢတၢ်လၢအဝဲအမၤတ့ၢ်ဝဲအဂီၢ်အဃိ, ခဲကနံၣ်အံၤယတူၢ်ဘၣ်က့ၤယဲတၢ်မၤအသးတဖၣ်လၢအပိာ်ထွဲထီၣ်အခံ န့ၣ်လီၤ.
6 နသ့ၣ်ညါတၢ်လၢနကဘၣ်မၤန့ၣ်လီၤ. တကြၢးနပျဲအဝဲသံဒ်န့ဆၢၣ် အလုၢ်အလၢ်တမံၤအသိးန့ၣ်ဘၣ်.
7 ဘၣ်ဆၣ်ဒီးဒုးနဲၣ်တၢ်သူၣ်ကညီၤသးကညီၤဆူစီၤဘၢ်စံးလဲ အဖိခွါတဖၣ်လၢအအိၣ်လၢဝ့ၢ်ကံးလဧးဒီးအံးထွဲကွၢ်ထွဲအဝဲ သ့ၣ်, မ့ၢ်လၢအဝဲသ့ၣ်မ့ၢ်ပှၤသူၣ်ကညီၤသးကညီၤယၤဖဲယဘၣ်ဃ့ၢ်ပူၤ ဖျဲးကွံာ်ယသးလၢနဒီပုၢ်ဝဲၢ်ခွါစီၤအးဘၡါလိၣ်အအိၣ်အကတီၢ် အဃိန့ၣ်တက့ၢ်.
8 လၢပှၤဘံၣ်ယၤမံၣ်အဒူၣ်အပူၤန့ၣ်ပှၤအိၣ်ဒံးဝဲတဂၤလၢအမ့ၢ်စီၤ က့ရၤအဖိခွါစီၤၡံမံၤလၢဝ့ၢ်ဘၤဃူရံၣ်န့ၣ်လီၤ. ဘၣ်တနံၤဖဲယလဲၤဆူဝ့ၢ်မၤဃန့ၤန့ၣ်အဝဲဆိၣ်အၢယၤဆါဆါကလဲာ် န့ၣ်လီၤ. ဘၣ်ဆၣ်ဖဲယထံၣ်လိာ်ယသးဒီးအီၤဖဲ ထံကျိယၢ်ဒ့ၣ်န့ၣ်ယဟ့ၣ်လီၤအီၤယတၢ်အၢၣ်လီၤသမှံၤသပှၢ်လၢယွၤ အမံၤအပူၤလၢယတပျဲတၢ်မၤသံကွံာ်အီၤဘၣ်.
9 ဘၣ်ဆၣ်ပျဲပူၤကွံာ်အီၤလၢတၢ်စံၣ်ညီၣ်တဂ့ၤ. နသ့ၣ်ညါတၢ်လၢနကဘၣ်မၤအီၤလီၤ. ဒီးနကဘၣ်ကူၣ်ကျဲၤဒ်သိးအဝဲကဘၣ်တၢ်မၤသံအီၤအဂီၢ်န့ၣ်လီၤ.
10 စီၤဒၤဝံးသံဝဲ, ဒီးဘၣ်တၢ်ခူၣ်လီၤကွံာ်အီၤလၢစီၤဒၤဝံး အဝ့ၢ်ပူၤန့ၣ်လီၤ.
11 အဝဲမ့ၢ်တ့ၢ်ကီၢ်အံၣ်စရ့လးအစီၤပၤအနံၣ်လွံၢ်ဆံ, ဒီးပၢတၢ်လၢဝ့ၢ်ဃ့ဘြိၣ်အပူၤနွံနံၣ်ဒီးလၢဝ့ၢ်ယရူၤၡလ့ၣ် အပူၤသၢဆံသၢနံၣ်န့ၣ်လီၤ.
12 စီၤၡလိၤမိၤကဲထီၣ်စီၤပၤလၢအပၢ်စီၤဒၤဝံးအလီၢ်, ဒီးအဝဲအတၢ်စိတၢ်ကမီၤဒ်စီၤပၤအသိး, သူၣ်လီၤအသးဂၢၢ်ဂၢၢ်ကျၢၤကျၢၤန့ၣ်လီၤ.
13 အန့ၣ်တစုနီၢ်ဃးကံၤအဖိခွါစီၤအဒိနံၤယၤလဲၤဆူစီၤၡလိၤ မိၤအမိၢ်နီၢ်ဘၤသၡ့ဘၤအအိၣ်န့ၣ်လီၤ. နီၢ်ဘၤသၡ့ဘၤသံကွၢ်အီၤ, “အအံၤမ့ၢ်တၢ်ဒီတံၤဒီသကိးအတၢ်ဟဲန့ၣ်ဧါ.” ဒီးစီၤအဒိနံၤယၤစံးဆၢဝဲ, “မ့ၢ်လီၤ.”
14 အန့ၣ်ဒီး, စီၤအဒိနံၤယၤစံးအါထီၣ်ဝဲ, “ယအဲၣ်ဒိးကတိၤတၢ်ဒီးနၤတမံၤလီၤ.” နီၢ်ဘၤသၡ့ဘၤသံကွၢ်အီၤ, “မ့ၢ်တၢ်မနုၤန့ၣ်လဲၣ်.”
15 အဝဲစံးဆၢဝဲ, “နသ့ၣ်ညါလၢယကဘၣ်ကဲထီၣ်စီၤပၤဒီးပှၤကိး ဂၤဒဲးလၢကီၢ်အံၣ်စရ့လးအပူၤမုၢ်လၢ်တၢ်အံၤန့ၣ်လီၤ. ဘၣ်ဆၣ်, တၢ်တမံၤဒၣ်မၤအသး, တၢ်မၤအသးလီၤဆီကွံာ်ဒီးယဒီပုၢ် ဝဲၢ်ခွါကဲထီၣ်စီၤပၤ, မ့ၢ်လၢတၢ်န့ၣ်မ့ၢ်ယွၤအတၢ်ဘၣ်အသးအဃိန့ၣ်လီၤ.
16 ဒီးခဲကနံၣ်အံၤယအဲၣ်ဒိးဃ့သကွံာ်ကညးတၢ်တမံၤန့ၣ်လီၤ. ဝံသးစူၤဂ့ၢ်လိာ်ယၤတဂ့ၤ.” ဒီးနီၢ်ဘၤသၡ့ဘၤသံကွၢ်ဝဲ, “မ့ၢ်တၢ်မနုၤန့ၣ်လဲၣ်.”
17 အဝဲစံးဆၢဝဲ, “ယသ့ၣ်ညါလၢစီၤပၤၡလိၤမိၤတမ့ၢ်ကဂ့ၢ်လိာ် နၤဘၣ်. ဝံသးစူၤဃ့န့ၢ်ယၤစီၤပၤၡလိၤမိၤလၢကပျဲယမၤန့ၢ်နီၢ်အဘံ ၡး, ပိာ်မုၣ်သးစၢ်တဂၤလၢဝ့ၢ်ၡူန့ၣ်, ဒ်ယမါအသိးတက့ၢ်.”
18 နီၢ်ဘၤသၡ့ဘၤစံးဆၢဝဲ, “ဂ့ၤလံ. ယကကတိၤတၢ်ဒီးစီၤပၤလၢ နဂီၢ်န့ၣ်လီၤ.”
19 လၢတၢ်န့ၣ်အဃိ, နီၢ်ဘၤသၡ့ဘၤလဲၤဃီၤဆူစီၤပၤအအိၣ်ဒ်သိး ကကတိၤတၢ်ဒီးအီၤလၢစီၤအဒိနံၤယၤအဂီၢ်န့ၣ်လီၤ. စီၤပၤဂဲၤထၢၣ်လၢကသဂၢၢ်အမိၢ်ဒီးသကူးလီၤအသးဒီးဟ့ၣ်အီၤတၢ် ယူးယီၣ်န့ၣ်လီၤ. ဝံၤဒီးအဝဲဆ့ၣ်နီၤလၢအလီၢ်ပစိာ်အဖီခိၣ်ဒီးမၢပှၤဟဲစိာ် နုာ်လီၢ်ပစိာ်အဂၤတခါ, ဒီးအမိၢ်ဆ့ၣ်နီၤဝဲလၢလီၢ်ပစိာ်န့ၣ်အဖီခိၣ်လၢအဝဲအစုထွဲ တခီန့ၣ်လီၤ.
20 နီၢ်ဘၤသၡ့ဘၤစံးဘၣ်အီၤ, “ယအဲၣ်ဒိးဃ့နၤ, တၢ်သကွံာ်ကညးအဆံးဖိတမံၤလၢနကဟ့ၣ်ယၤလီၤ. တဘၣ်ဂ့ၢ်လိာ်ယၤတဂ့ၤ.” အဝဲဒၣ်စံးဝဲ, “ယမိၢ်ဧၢ, ဃ့တက့ၢ်. ယတဂ့ၢ်လိာ်နၤဘၣ်.”
21 နီၢ်ဘၤသၡ့ဘၤစံးဆၢအီၤ “ဟ့ၣ်လီၤနဒီပုၢ်ဝဲၢ်ခွါစီၤအဒိ နံၤယၤလၢနီၢ်အဘံၡးဒ်သိးကကဲထီၣ်အမါန့ၣ်တက့ၢ်.”
22 စီၤပၤစံးဘၣ်အီၤ, “ဘၣ်မနုၤနဃ့ယၤလၢယကဟ့ၣ်နီၢ်အဘံၡးဆူ အီၤန့ၣ်လဲၣ်. နဂ့ၤဃ့ဃုာ်စ့ၢ်ကီးလၢယကဟ့ၣ်အီၤစီၤပၤအလီၢ်ပစိာ်န့ၣ်လီၤ. အဂ့ၢ်ဒ်အံၤအဝဲမ့ၢ်ယဝဲၢ်, ဒီးပှၤလုၢ်တၢ်အခိၣ်စီၤအ့ဘယၤသၢ် ဒီးစီၤယိၤအာ်အိၣ်လၢအအိၣ်တကပၤန့ၣ်လီၤ.”
23 အန့ၣ်ဒီး, စီၤၡလိၤမိၤမၤတၢ်အၢၣ်လီၤသမှံၤသပှၢ်တမံၤလၢယွၤ အမံၤအပူၤစံးဝဲ, “ယမ့ၢ်တမၢဘၣ်စီၤအဒိနံၤယၤလၢအက ဟ့ၣ်အသးသမူဒ်တၢ်အပှ့ၤလၢအဃ့ဝဲတမံၤအဃိဘၣ်ဒီး, မ်ကစၢ်ယွၤမၤသံယၤတက့ၢ်.
24 ယွၤပာ်လီၤယၤဂၢၢ်ဂၢၢ်ကျၢၤကျၢၤလၢယပၢ်စီၤဒၤဝံးအလီၢ်ပစိာ် အဖီခိၣ်န့ၣ်လီၤ. အဝဲဟံးဃာ်အတၢ်အၢၣ်လီၤ, ဒီးဟ့ၣ်လီၤယၤဒီးယစၢၤယသွဲၣ်တဖၣ်လၢ ဘီမုၢ်န့ၣ်လီၤ. ယဆိၣ်တၢ်လၢယွၤလၢအမူဝဲတဂၤအမံၤအပူၤလၢစီၤအဒိနံၤယၤကသံ ဝဲတနံၤအံၤဒၣ်လဲာ်န့ၣ်လီၤ.”
25 လၢတၢ်န့ၣ်အဃိစီၤပၤၡလိၤမိၤဟ့ၣ်လီၤအကလုၢ်လၢစီၤဘနါယၤ ကလဲၤမၤသံကွံာ်စီၤအဒိနံၤယၤဒီးစီၤအဒိနံၤယၤသံကွံာ်ဝဲ ဒၣ်န့ၣ်လီၤ.
26 တုၤနုၤတစု, စီၤပၤၡလိၤမိၤစံးဘၣ်ပှၤလုၢ်တၢ်အခိၣ်စီၤအ့ဘယၤသၢ်, “က့ၤဆူနတၢ်အိၣ်တၢ်ဆိးဒၣ်နဲအလီၢ်လၢဧၤနသိးအပူၤန့ၣ်တ က့ၢ်. နကၢကီၣ်လၢနကဘၣ်သံဘၣ်ဆၣ်, ယတမၤသံနၤခဲအံၤဒံးဘၣ်. အဂ့ၢ်ဒ်အံၤ, နမ့ၢ်တ့ၢ်ပှၤအခိၣ်လၢအကွၢ်ထွဲယွၤအတၢ်အၢၣ်လီၤအီ လီၤအတလါစီဆှံ, ဖဲနအိၣ်တ့ၢ်ဒီးယပၢ်စီၤဒၤဝံးအခါ, ဒီးနတူၢ်သကိးဃုာ်တၢ် ဒီးအီၤလၢကယဲၢ်အတၢ်ကိၢ်တၢ်ဂီၤခဲလၢာ်အပူၤအဃိန့ၣ်လီၤ.”
27 အန့ၣ်ဒီးစီၤၡလိၤမိၤဒုးဟးထီၣ်ကွံာ်စီၤအ့ဘယၤသၢ်လၢတၢ်မၤ တၢ်ဒ်ယွၤအပှၤလုၢ်တၢ်အခိၣ်တဂၤအသိး, သတးဒီးအဝဲ မၤလၢထီၣ်ပှဲၤထီၣ်တၢ်လၢယွၤစံးတ့ၢ်ဝဲဖဲဝ့ၢ်ၡံလိၤဘၣ်ထွဲ ဒီးပှၤလုၢ်တၢ်အခိၣ်စီၤဧ့လံၤဒီးအစၢၤအသွဲၣ်တဖၣ်အဂ့ၢ်န့ၣ်လီၤ.
28 စီၤယိၤအာ်နၢ်ဟူဘၣ်တၢ်လၢမၤတ့ၢ်အသးန့ၣ်လီၤ. (အဝဲဆီၣ်ထွဲမၤစၢၤတ့ၢ်စီၤအဒိနံၤယၤ, ဘၣ်ဆၣ်, တဆီၣ်ထွဲမၤစၢၤတ့ၢ်စီၤအးဘၡါလိၣ်ဘၣ်) လၢတၢ်န့ၣ်အဃိအဝဲဃ့ၢ်ပူၤဖျဲးအသးဆူယွၤအိၣ်ဝဲဆိးဝဲ အဒဲစီၤဆှံအပူၤဒီးဟံးဃာ်ကျၢၤတၢ်လုၢ်လီၢ်အသနၢၣ်တဖၣ်န့ၣ် လီၤ.
29 ဖဲတၢ်ကစီၣ်တုၤဃီၤဆူစီၤပၤၡလိၤမိၤအအိၣ်လၢစီၤယိၤအာ်ဃ့ၢ် ပူၤဖျဲးအသးဆူယွၤအဒဲစီဆှံအပူၤဒီးအိၣ်ဝဲလၢတၢ်လုၢ်လီၢ် အကပၤန့ၣ်, စီၤၡလိၤမိၤမၢလီၤပှၤစိာ်တၢ်ကစီၣ်တဂၤဆူ စီၤယိၤအာ်အအိၣ်ဒ်သိးကသံကွၢ်အီၤလၢဘၣ်မနုၤအဝဲဃ့ၢ်ပူၤ ဖျဲးကွံာ်အသးဆူတၢ်လုၢ်လီၢ်အပူၤလဲၣ်န့ၣ်လီၤ. စီၤယိၤအာ်စံးဆၢဝဲလၢအဝဲဃ့ၢ်ပူၤဖျဲးကွံာ်အသးဆူယွၤအ အိၣ်, မ့ၢ်လၢအဝဲပျံၤဘၣ်စီၤၡလိၤမိၤအဃိန့ၣ်လီၤ. အန့ၣ်ဒီးစီၤၡလိၤမိၤမၢစီၤဘနါယၤလၢကမၤသံကွံာ်အီၤန့ၣ် လီၤ.
30 စီၤဘနါယၤလဲၤဃီၤဆူဒဲစီဆှံဒီးစံးဘၣ်စီၤယိၤအာ်, “စီၤပၤဟ့ၣ်လီၤအကလုၢ်လၢနကဟဲက့ၤထီၣ်လီၤ.” စီၤယိၤအာ်စံးဆၢဝဲ, “ယတဟဲက့ၤထီၣ်ဘၣ်. ယကသံဖဲအံၤလီၤ.” စီၤဘနါယၤက့ၤကဒါက့ၤဆူ စီၤပၤအအိၣ်, ဒီးတဲဘၣ်အီၤလၢတၢ်လၢစီၤယိၤအာ်စံးတ့ၢ်ဝဲ န့ၣ်လီၤ.
31 စီၤၡလိၤမိၤစံးဆၢအီၤ, “မၤတၢ်လၢစီၤယိၤအာ်စံးဝဲန့ၣ်တ က့ၢ်. မၤသံအီၤဒီးခူၣ်လီၤကွံာ်အီၤန့ၣ်တက့ၢ်. အန့ၣ်သတးဒီးယၤမ့ၢ်ဂ့ၤ, စီၤဒၤဝံးအစၢၤအသွဲၣ်အဂၤတဖၣ်မ့ၢ် ဂ့ၤ, တအိၣ်ဘၣ်လၢၤဒီးမူဒါနီတစုလၢတၢ်လၢစီၤယိၤအာ်မၤတ့ၢ်ဝဲ ဖဲအဝဲမၤသံတ့ၢ်ပှၤလၢအတၢ်ကမၣ်တဖၣ်အဂီၢ်လၢၤဘၣ်န့ၣ်လီၤ.
32 ယွၤကစံၣ်ညီၣ်စီၤယိၤအာ်လၢတၢ်မၤသံတဖၣ်လၢအဝဲမၤတ့ၢ်ဝဲ, တအိၣ်ဘၣ်ဒီးယပၢ်စီၤဒၤဝံးအတၢ်သ့ၣ်ညါထွဲဘၣ်အဃိန့ၣ်လီၤ. စီၤယိၤအာ်မၤသံကွံာ်ပှၤခံဂၤလၢအတၢ်ကမၣ်တအိၣ်ဘၣ်ဒီးမ့ၢ် တ့ၢ်ပှၤလၢအဂ့ၤန့ၢ်အီၤ, အံၣ်စရ့းလးအသုးမုၢ်သုးခိၣ်ကျၢၢ်စီၤအဘံန့ၢ်ဒီးယူဒၤအသုး မုၢ်အသုးခိၣ်ကျၢၢ်စီၤဧမါစၤတဖၣ်န့ၣ်လီၤ.
33 တၢ်စံၣ်ညီၣ်လၢအဝဲသ့ၣ်ဘၣ်တၢ်မၤသံအီၤအဂီၢ်န့ၣ်, ကလီၤဘၣ်ဝဲလၢစီၤယိၤအာ်အလိၤဒီးအစၢၤအသွဲၣ်တဖၣ်အလိၤလီၤ စိၤလီၤထီန့ၣ်လီၤ. မ့မ့ၢ်, ယွၤကဟ့ၣ်တၢ်မၤနၢၤထီဘိဆူစီၤဒၤဝံးအစၢၤအသွဲၣ် တဖၣ်လၢအဆ့ၣ်နီၤလၢအဝဲအလီၢ်ပစိာ်အလိၤန့ၣ်လီၤ.”
34 လၢတၢ်န့ၣ်အဃိစီၤဘနါယၤလဲၤဃီၤဆူယွၤအဒဲစီဆှံဒီးမၤသံ ကွံာ်စီၤယိၤအာ်ဒီးအဝဲဘၣ်တၢ်ခူၣ်လီၤကွံာ်အီၤဖဲတၢ်လီၢ်ပျီ ပူၤ, လၢအဟီၣ်ခိၣ်ကဝီၤဒၣ်ဝဲန့ၣ်လီၤ.
35 စီၤပၤဒုးကဲထီၣ်စီၤဘနါယၤလၢပှၤသုးမုၢ်အသုးခိၣ်ကျၢၢ်လၢ စီၤယိၤအာ်အလီၢ်, ဒီးပာ်စီၤစၤဒိးလၢပှၤလုၢ်တၢ်အခိၣ်, လၢစီၤအ့ဘယၤသၢ်အလီၢ်န့ၣ်လီၤ.
36 အန့ၣ်ဝံၤဒီး, စီၤပၤမၤလိာ်စီၤၡံမံၤဒီးစံးဘၣ်အီၤ, “သူၣ်ထီၣ်ဟံၣ်တဖျၢၣ်လၢနဂီၢ်ဒၣ်နဲလၢဝ့ၢ်ယရူၤၡလ့ၣ်အပူၤန့ၣ် တက့ၢ်. အိၣ်ဆိးလၢဟံၣ်န့ၣ်အပူၤဒီးဟးထီၣ်လၢဝ့ၢ်န့ၣ်တဂ့ၤ.
37 နမ့ၢ်ဟးထီၣ်ဒီးလဲၤဖျိကွံာ်ယံၤန့ၢ်ဒံးထံကျိဖိကံဒြိၣ် တစုစုဒီးနကသံသပှၢ်ကတၢၢ်လီၤ. တၢ်န့ၣ်ကမ့ၢ်နတၢ်ကမၣ်ဒၣ်နဲလီၤ.”
38 စီၤၡံမံၤစံးဆၢဝဲ, “ဂ့ၤလံ. တၢ်ဒိၣ်ကစၢ်စီၤပၤဧၢ, ယကမၤတၢ်လၢနစံးဘၣ်ယၤန့ၣ်လီၤ.” လၢတၢ်န့ၣ်အဃိအဝဲအိၣ်ဝဲဆိးဝဲလၢဝ့ၢ်ယရူၤၡလ့ၣ်အပူၤအါနံၤ အါသီန့ၣ်လီၤ.
39 ဘၣ်ဆၣ်ဒီးသၢနံၣ်ဝံၤအလီၢ်ခံန့ၣ်, စီၤၡံမံၤအကုၢ်တဖၣ်အကျါ ခံဂၤဃ့ၢ်ကွံာ်ဝဲဆူဝ့ၢ်ကၤသးအစီၤပၤ, စီၤမၤကၤအဖိခွါစီၤအၤကံၣ်အအိၣ်န့ၣ်လီၤ. တုၤစီၤၡံမံၤနၢ်ဟူဘၣ်ဝဲလၢအဝဲသ့ၣ်အိၣ်လၢဝ့ၢ်ကၤသးန့ၣ်,
40 အဝဲဂီၤကၢ်ထီၣ်အကသ့ၣ်ယီၤဒီးလဲၤဝဲဆူစီၤပၤအၤကံၣ်အအိၣ်လၢ ဝ့ၢ်ကၤသးလၢကဃုထံၣ်အကုၢ်တဖၣ်အဂီၢ်န့ၣ်လီၤ. ဒီးထံၣ်န့ၢ်က့ၤဝဲဒီးဟဲက့ၤကိးကဒါက့ၤဝဲဆူအဟံၣ်န့ၣ်လီၤ.
41 တုၤစီၤၡလိၤမိၤနၢ်ဟူတ့ၢ်တၢ်လၢစီၤၡံမံၤမၤတ့ၢ်ဝဲန့ၣ်,
42 အဝဲမၤလိာ်အီၤဒီးစံးဘၣ်အီၤ, “ယမၢနအၢၣ်လီၤယၤလၢယွၤ အမံၤအပူၤလၢနသုတဟးထီၣ်လၢဝ့ၢ်ယရူၤၡလ့ၣ်အပူၤတဂ့ၤန့ၣ်လီၤ. ဒီးယဟ့ၣ်ပလီၢ်တ့ၢ်နၤလၢနမ့ၢ်ဟးထီၣ်ဒီးနကသံသပှၢ်ကတၢၢ်န့ၣ် လီၤ. မ့ၢ်နတအၢၣ်လီၤတၢ်န့ၣ်ဒီးစံးတ့ၢ်လၢနကစူၢ်ယၤဘၣ်န့ၣ်ဧါ.
43 မ့မ့ၢ်ဒ်န့ၣ်ဒီးဘၣ်မနုၤလၢနမၤဟးဂီၤကွံာ်နတၢ်အၢၣ်လီၤဒီး တစူၢ်ဘၣ်ယတၢ်မၤလိာ်ဘၣ်န့ၣ်လဲၣ်.
44 ကယဲၢ်တၢ်လၢနမၤကမၣ်ဘၣ်တ့ၢ်ယပၢ်စီၤဒၤဝံးန့ၣ်နသ့ၣ်ညါဂ့ၤဂ့ၤ လီၤ. ယွၤကစံၣ်ညီၣ်နၤလၢတၢ်န့ၣ်အဂီၢ်လီၤ.
45 ဘၣ်ဆၣ်, အဝဲကဆိၣ်ဂ့ၤယၤ, ဒီးမၤဂၢၢ်မၤကျၢၤစီၤဒၤဝံးအဘီ အမုၢ်လီၤစိၤလီၤထီန့ၣ်လီၤ.”
46 အန့ၣ်ဝံၤဒီး, စီၤပၤဟ့ၣ်လီၤအကလုၢ်ဆူစီၤဘနါယၤ, ဒီးအဝဲဟးထီၣ်လဲၤမၤသံကွံာ်စီၤၡံမံၤန့ၣ်လီၤ. ဒီးဘီမုၢ်အိၣ်ဂၢၢ်ဆိးကျၢၤဝဲခဲကနံၣ်အံၤ, လၢစီၤၡလိၤမိၤအစုပူၤန့ၣ်လီၤ.