5
1 ဖဲပှၤအမိၢ်ဖိအစီၤပၤခဲလၢာ်လၢ အအိၣ်လၢထံကျိယၢ်ဒ့ၣ်အမုၢ်နုာ်, ဒီးပှၤကနၤဧၣ်ဖိအစီၤပၤခဲလၢာ်လၢအအိၣ်လၢပီၣ်လဲၣ်ဖးဒိၣ် မဲးဒံးထၢၣ်ရ့နယၢၣ်အနံၤ, နၢ်ဟူဝဲလၢကစၢ်မၤလီၤသံးကွံာ်ယၢ်ဒ့ၣ်အထံတုၤလၢပှၤအံၣ်စရ့ လးဖိခဲလၢာ်ခီဂာ်တၢ်သ့သတးဒီး, အဝဲသ့ၣ်အသးလီၤစၢ်ဝဲဒီးတၢ်သူၣ်ဒူ သးဒူတအိၣ်လၢၤလၢအပူၤလၢပှၤအံၣ်စရ့လးဖိ တဖၣ်အဃိန့ၣ်လီၤ.
2 အကတီၢ်ဖဲန့ၣ်ယွၤစံးဘၣ်စီၤယိၤၡူ, “တ့ဒီလၢၢ်တဖၣ်ဒီးကူးတရံးပှၤအံၣ်စရ့လးဖိတဖၣ်ခံဘျီ တဘျီတက့ၢ်.”
3 အန့ၣ်ဒီး, စီၤယိၤၡူတ့ဒီလၢၢ်တဖၣ်ဒီးကူးတရံးပှၤအံၣ်စရ့လးဖိတဖၣ် ဖဲတၢ်လီၢ်လၢအဘၣ်တၢ်ကိးအီၤလၢတၢ်စိခိၣ်ဧၤရလိးအခီပညီမ့ၢ် တၢ်ကူးတရံးအတၢ်စိခိၣ်န့ၣ်လီၤ.
4 ဒီးတၢ်အဂ့ၢ်အခၢးလၢစီၤယိၤၡူကူးတရံးအဝဲ သ့ၣ်မ့ၢ်ဒ်အံၤလီၤ. ပိာ်ခွါခဲလၢာ်လၢအဟးထီၣ်လၢကီၢ်အဲၤကူပတူး, ပှၤလၢအဒုးသုးခဲလၢာ်, သံဝဲလၢကျဲလၢပှၢ်မုၢ်ကနၢအပူၤဖဲ အဟးထီၣ်ဝံၤအလီၢ်ခံန့ၣ်လီၤ.
5 ပှၤလၢအဟးထီၣ်ခဲလၢာ်ဘၣ်တၢ်ကူးတရံးအီၤသနာ်က့, ပှၤလၢအအိၣ်ဖျဲၣ်ထီၣ်လၢကျဲလၢပှၢ်မုၢ်ကနၢအပူၤလၢအဟးထီၣ်လၢ ကီၢ်အဲၤကူပတူးဝံၤအလီၢ်ခံတဖၣ်တဘၣ်တၢ်ကူးတရံးအီၤဒံးဘၣ်.
6 အဂ့ၢ်မ့ၢ်လၢ,အံၣ်စရ့လးဖိတဖၣ်လဲၤတၢ်အနံၣ်လွံၢ်ဆံ လၢပှၢ်မုၢ်ကနၢအပူၤ တုၤလၢပှၤသုးဖိလၢအဟးထီၣ်လၢကီၢ်အဲၤကူပတူးသံကွံာ်ဝဲခဲလၢာ်မ့ၢ်လၢအဝဲသ့ၣ်တစူၢ်ဘၣ်ကစၢ်အကလုၢ်အဃိန့ၣ်လီၤ. ယွၤဆိၣ်လီၤအသးလၢအတပျဲအဝဲသ့ၣ်ကထံၣ်ဘၣ်ကီၢ်တဘ့ၣ်လၢအယွၤဝဲ ဒီးတၢ်နုၢ်ထံဒီးကနဲစီလၢယွၤဆိၣ်လီၤတ့ၢ်အသး လၢအကဟ့ၣ်အဝဲသ့ၣ်အမိၢ်ပၢ်ဖံဖုလၢပျၢၤန့ၣ်ဘၣ်.
7 ပှၤသ့ၣ်တဖၣ်အံၤအဖိခွါတဖၣ်တဘၣ်တၢ်ကူးတရံးအီၤနီတဘျီ ဒံးဘၣ်, ဒီးပှၤလၢစီၤယိၤၡူကူးတရံးအီၤတဖၣ်မ့ၢ်ပှၤအသီ တစိၤအံၤတခီန့ၣ်လီၤ.
8 တၢ်ကူးတရံးဘၣ်တၢ်မၤဝံၤအီၤဒီး, ပှၤဂီၢ်မုၢ်အိၣ်ဝဲလၢအသူၣ်ဒဲအလီၢ်တုၤအပူၤလီၢ်တဖၣ်ဘျါက့ၤ တစုန့ၣ်လီၤ.
9 ယွၤစံးဘၣ်စီၤယိၤၡူ, “မုၢ်မဆါတနံၤအံၤယသုးကွံာ်သု တၢ်မဲာ်တြီၢ်မဲာ်ဆှးဘၣ်ဃးဒီးသုတၢ်ကဲကုၢ်လၢကီၢ်အဲၤကူ ပတူးန့ၣ်လံ.” လၢတၢ်န့ၣ်အဃိတၢ်လီၢ်ဝဲန့ၣ်တၢ်ကိးအမံၤလၢကံးလကၤလး, မံၤလၢအအိၣ်တုၤမုၢ်မဆါတနံၤအံၤလီၤ.
10 ဖဲပှၤအံၣ်စရ့လးဖိတဖၣ်သူၣ်ဒံးဒဲဖဲကံးလကၤလး, လၢပျီလၢအဘူးဒီးဝ့ၢ်ယရံၤဃိအခါန့ၣ်, အဝဲသ့ၣ်မၤဘူၣ်လဲၤကပာ်လၢလါထီၣ်တဆံလွံၢ်သီဖဲမုၢ်ဟါလီၤ အကတီၢ်န့ၣ်လီၤ.
11 ဒီးမုၢ်ဆ့ၣ်ထီၣ်အနံၤတနံၤဃီန့ၣ်, အဝဲသ့ၣ်အီၣ်တၢ်အီၣ်လၢအဟး ထီၣ်လၢကီၢ်ကနၤဧၣ်အဆိကတၢၢ်တဘျီလၢအမ့ၢ်ဝဲကိၣ်တအိၣ်ဘၣ်ဒီး ကိၣ်မံၤဒီးဘုဝဲာ်အသးတဖၣ်န့ၣ်လီၤ.
12 တနံၤဃီန့ၣ်, ကိၣ်မၤနၤတလီၤလၢၤဘၣ်, ဒီးလၢပှၤအံၣ်စရ့လးဖိအဂီၢ်ကိၣ်မၤ နၤတအိၣ်ဘၣ်လၢၤဘၣ်န့ၣ်လီၤ. နံၣ်အဝဲန့ၣ်ဒီးဆူညါအဝဲသ့ၣ်အီၣ်တၢ်အီၣ်လၢအဟးထီၣ်လၢကီၢ်ကနၤဧၣ်န့ၣ်လီၤ.
13 ဖဲစီၤယိၤၡူလဲၤဘူးဒီးဝ့ၢ်ယရံၤဃိန့ၣ်, သတူၢ်ကလာ်အဝဲထံၣ်ပှၤတဂၤဆၢထၢၣ်လၢအမဲာ်ညါ, ဟံးဃာ်ဒီးနးတဘ့ၣ်န့ၣ်လီၤ. စီၤယိၤၡူလဲၤဆူအအိၣ်ဒီးသံကွၢ်အီၤ, “နမ့ၢ်ပပှၤဧါ, မ့တမ့ၢ်ဘၣ်ဒီးပဒုၣ်ပဒါအပှၤဧါ.”
14 အဝဲစံးဆၢဝဲ, “တမ့ၢ်ဘၣ်. ယဟဲယဲဒ်ယွၤအသုးမုၢ်အခိၣ်တဂၤအသိးန့ၣ်လီၤ.”
စီၤယိၤၡူထိၣ်လီၤပှီၤအသးလၢဟီၣ်ခိၣ်လိၤဒီးဘူၣ်ထီၣ်ဘါထီၣ် အီၤဒီးစံး, “ယမ့ၢ်နကုၢ်နပှၤလီၤကစၢ်ဧၢ, နသးအိၣ်လၢယကမၤတၢ်မနုၤလဲၣ်.”
15 ဒီးယွၤအသုးမုၢ်အခိၣ်စံးဘၣ်အီၤ, “ဘ့ၣ်လီၤကွံာ်နခီၣ်ဖံးတက့ၢ်. နဆၢထၢၣ်လၢတၢ်လီၢ်စီဆှံလီၤ.” ဒီးစီၤယိၤၡူမၤဝဲဒ်တၢ်စံးဘၣ်အီၤအသိးလီၤ.