6
1 ဝ့ၢ်ယရံၤဃိအတြဲၤတဖၣ်ဘၣ်တၢ်ကးတံာ်ဒီးပၢၤဃာ်အီၤဒ်သိးပှၤအံၣ်စရ့လးဖိအသုတဟဲနုာ်တဂ့ၤအဂီၢ်ဒီးပှၤဟဲနုာ်ဒီးဟးထီၣ် လၢဝ့ၢ်ပူၤတသ့နီတဂၤဘၣ်.
2 ယွၤစံးဘၣ်စီၤယိၤၡူ, “ယဟ့ၣ်လီၤဝ့ၢ်ယရံၤဃိ, ဃုာ်ဒီးအစီၤပၤဒီးအသုးမုၢ်သံၣ်ဘိလၢအဒူတဖၣ်ခဲလၢာ် လၢနစုပူၤလီၤ.
3 နၤဒီးနပှၤသုးဖိတဖၣ်ကဘၣ်လဲၤတရံးဝ့ၢ်အံၤတနံၤတဝီလၢဃု နံၤဃုသီအတီၢ်ပူၤန့ၣ်လီၤ.
4 ပှၤလုၢ်တၢ်အခိၣ်နွံဂၤ, တဂၤကစိာ်ကွဲၤတဖျၢၣ်စုာ်စုာ်, ကဘၣ်လဲၤတၢ်လၢတၢ်အၢၣ်လီၤအီလီၤ အတလါအမဲာ်ညါန့ၣ်လီၤ. ဒီးလၢနွံသီတသီန့ၣ်, နၤဒီးနသုးဖိတဖၣ်ကဘၣ်လဲၤတရံးဝ့ၢ်န့ၣ်နွံဝီဖဲပှၤလုၢ်တၢ် အခိၣ်တဖၣ်အူထီၣ်ကွဲၤအခါန့ၣ်လီၤ.
5 ဝံၤဒီးအဝဲသ့ၣ်ကအူထီၣ်ဖးထီကွဲၤန့ၣ်လီၤ. တဘျီဃီဖဲသုနၢ်ဟူတၢ်အံၤန့ၣ်, ပှၤပိာ်ခွါခဲလၢာ်ကကိးပသူ ထီၣ်လၢအကလုၢ်ဖးဒိၣ်, အန့ၣ်ဒီးဝ့ၢ်အခိၣ်ဒူတဖၣ်ကလီၤပှီၢ်ကွံာ်ဝဲန့ၣ်လီၤ. ဝံၤဒီး, သုးမုၢ်သံၣ်ဘိဒီဖုကလဲၤနုာ်လီၤဝဲလိၤလိၤဆူဝ့ၢ်ပူၤန့ၣ် လီၤ.”
6 စီၤယိၤၡူကိးဖှိၣ်ပှၤလုၢ်တၢ်အခိၣ်တဖၣ်ဒီးစံးဘၣ်အဝဲသ့ၣ်, “ဟံးထီၣ်တၢ်အၢၣ်လီၤအီလီၤအတလါဒီးပျဲပှၤလုၢ်တၢ်အ ခိၣ်နွံဂၤစိာ်ကွဲၤတဖၣ်ဒီးလဲၤတၢ်လၢတၢ်မဲာ်ညါန့ၣ်တက့ၢ်.”
7 အန့ၣ်ဝံၤဒီး, စီၤယိၤၡူစံးဘၣ်အပှၤဂီၢ်မုၢ်, “လဲၤဆူညါဒီးလဲၤတရံးဝ့ၢ်န့ၣ်ဒီးပျဲပှၤစိာ်စုကဝဲၤတဖု လဲၤတၢ်လၢညါ, လၢယွၤအတၢ်အၢၣ်လီၤအီလီၤအတလါ အမဲာ်ညါန့ၣ်တက့ၢ်.”
8 ဒီးဒ်စီၤယိၤၡူမၤလိာ်အပှၤဂီၢ်မုၢ်အသိး, ပှၤစိာ်စုကဝဲၤတဖု လဲၤတၢ်လၢပှၤလုၢ်တၢ်အခိၣ်လၢအအူကွဲၤတဖၣ်အမဲာ်ညါ, ဒီးလၢအဝဲသ့ၣ်အလီၢ်ခံတခီ, ပှၤလုၢ်တၢ်အခိၣ်တဖၣ်လၢအ စိာ်တၢ်အၢၣ်လီၤအီလီၤအတလါပိာ်ထီၣ်အခံန့ၣ်လီၤ.
9 ဒီးပှၤစိာ်စုကဝဲၤလၢလီၢ်ခံတဖုပိာ်ထီၣ်တၢ်အၢၣ်လီၤအီလီၤအတလါအခံဒီးကွဲၤတဖၣ်ဘၣ်တၢ်အူသီၣ်ထီၣ်အီၤတထံၣ်ဃီန့ၣ်လီၤ.
10 ဘၣ်ဆၣ်ဒီး, စီၤယိၤၡူမၤလိာ်အပှၤဂီၢ်မုၢ်, “မ့တမ့ၢ်လၢယ ခါလီၤယကလုၢ်ဘၣ်ဒီး, သုတဘၣ်ကိးပသူထီၣ်ဒီးမၤသီၣ်မၤသဲတၢ်ဘၣ်, သုတဘၣ်ကတိၤတၢ်နီတဘီဘၣ်. တုၤယခါလီၤယကလုၢ်ဒီးသုကဘၣ်ကိးပသူထီၣ်လီၤ.”
11 အန့ၣ်ဒီး, ဒ်စီၤယိၤၡူဟ့ၣ်လီၤအကလုၢ်အသိးယွၤအတၢ်အၢၣ်လီၤအီလီၤအတလါလဲၤတရံးဝ့ၢ်တဝီန့ၣ်လီၤ. ဝံၤဒီးအဝဲသ့ၣ်ဟဲက့ၤတုၤက့ၤဖဲသူၣ်ဒဲအလီၢ်ဒီးမံဝဲဖဲန့ၣ်လီၤ.
12 လၢခံတဂီၤ, စီၤယိၤၡူဆၢထၢၣ်ဝဲဂီၤဂီၤ, ဒီးပှၤလုၢ်တၢ်အခိၣ်တဖၣ်ဒီးပှၤ သုးဖိတဖၣ်လဲၤတရံးဝ့ၢ်ခံဘျီတဘျီဒ်အမၤတ့ၢ်ဝဲလၢအပူၤကွံာ်တသီအသိး,
13 အဆိကတၢၢ်, ပှၤသုးဖိလၢညါတဖု, ဝံၤဒီးပှၤလုၢ်တၢ်အခိၣ်နွံ ဂၤအူကွဲၤနွံဖျၢၣ်, ဝံၤဒီးပှၤလုၢ်တၢ်အခိၣ်တဖၣ်လၢအစိာ်ယွၤအတၢ်အၢၣ်လီၤအီလီၤ အတလါ, ဒီးလၢခံကတၢၢ်ပှၤစိာ်စုကဝဲၤတဖၣ်န့ၣ်လီၤ. ဒီကတီၢ်ညါန့ၣ်, ကွဲၤတဖၣ်သီၣ်ဝဲန့ၣ်လီၤ.
14 ဒီးလၢခံသီတသီအံၤန့ၣ်, အဝဲသ့ၣ်လဲၤတရံးဝ့ၢ်တဝီကဒီး, ဒီးဟဲက့ၤကဒါက့ၤဆူသူၣ်ဒဲအလီၢ်န့ၣ်လီၤ. အဝဲသ့ၣ်မၤဒ်အံၤလၢဃုသီအတီၢ်ပူၤန့ၣ်လီၤ.
15 နွံသီတသီန့ၣ်အဝဲသ့ၣ်ဂဲၤဆၢထၢၣ် ဂီၤဂီၤဒီးလဲၤတရံးဝ့ၢ်နွံဝီန့ၣ်လီၤ. ထဲဒၣ်လၢနွံသီတသီအံၤန့ၣ်, အဝဲသ့ၣ်လဲၤတရံးဝ့ၢ်နွံဝီ န့ၣ်လီၤ.
16 ဖဲလဲၤတရံးဝ့ၢ်နွံဝီန့ၣ်, ပှၤလုၢ်တၢ်အခိၣ်တဖၣ်အူထီၣ်အကွဲၤဒီး, စီၤယိၤၡူစံးဘၣ်ပှၤဂီၢ်မုၢ်, “ကိးပသူထီၣ်တက့ၢ်. ယွၤဟ့ၣ်လီၤသုဝ့ၢ်အံၤလံ.
17 ဝ့ၢ်ဒီးကယဲၢ်မ့ၢ်တၢ်လၢအအိၣ်လၢအပူၤခဲလၢာ်ကဘၣ်တၢ်မၤဟးဂီၤ ကွံာ်အီၤဒ်အမ့ၢ်တၢ်လုၢ်မၤဘူၣ်လၢယွၤအဂီၢ်န့ၣ်လီၤ. ထဲဒၣ်ပှၤဃဲသဲမုၣ်နီၢ်ရၤဃးဒီးပှၤလၢအအိၣ်ဒီးအီၤခဲ လၢာ်လၢအဟံၣ်ပူၤကမူဝဲ, မ့ၢ်လၢအဝဲပာ် ခူသူၣ်ပပှၤကွၢ်ဟုၣ်ကွၢ်စုးတၢ်တဖၣ်လၢပမၢလီၤအီၤအဃိန့ၣ် လီၤ.
18 ဘၣ်ဆၣ်ဒီးတၢ်လၢအကဘၣ်တၢ်မၤဟးဂီၤအီၤန့ၣ်, သုတဘၣ်ဟံးန့ၢ်နီတမံၤဘၣ်. သုမ့ၢ်မၤဒီး, သုကဟဲစိာ်တၢ်ကီတၢ်ခဲဒီးတၢ်ဟးဂီၤလၢအံၣ် စရ့လးသူၣ်ဒဲအလီၢ်န့ၣ်လီၤ.
19 တၢ်ကိးမံၤဒဲးလၢအဘၣ်တၢ်မၤအီၤလၢစ့, ထူ, တိၢ်ဘီ, ဒီးထးန့ၣ်ကဘၣ်တၢ်ပာ်လီၤဆီအီၤလၢယွၤအဂီၢ်လီၤ. ကဘၣ်တၢ်ဒၢနုာ်အီၤလၢယွၤအတၢ်ပာ်ဖှိၣ်အလီၢ်န့ၣ်လီၤ.”
20 သတးဒီးပှၤလုၢ်တၢ်အခိၣ်တဖၣ်အူထီၣ်အကွဲၤန့ၣ်လီၤ. တုၤပှၤဂီၢ်မုၢ်နၢ်ဟူကွဲၤအသီၣ်ဒီး, အဝဲသ့ၣ်ကိးပသူထီၣ်လၢအကလုၢ်ဖးဒိၣ်ဒီးဝ့ၢ်အခိၣ်ဒူတဖၣ် လီၤပှီၢ်ကွံာ်ဝဲန့ၣ်လီၤ. အန့ၣ်ဒီး, သုးမုၢ်သံၣ်ဘိဒီဖုလဲၤထီၣ်လိၤလိၤဆူဝ့ၢ်ပူၤဒီးမၤန့ၢ်အီၤန့ၣ်လီၤ.
21 အဝဲသ့ၣ်မၤသံပှၤကိးဂၤဒဲးလၢဝ့ၢ် အပူၤလၢနးတဖၣ်ပှၤပိာ်ခွါ, ပှၤပိာ်မုၣ်, ပှၤသးစၢ်ဒီးပှၤသးပှၢ်တဖၣ်န့ၣ်လီၤ. အဝဲသ့ၣ်မၤသံစ့ၢ်ကီးကျီၢ်တဖၣ်, သိတဖၣ်, ဒီးကသ့ၣ်ယီၤတဖၣ်န့ၣ်လီၤ.
22 အန့ၣ်ဒီးစီၤယိၤၡူစံးဘၣ်ပှၤခံဂၤလၢအမ့ၢ်ပှၤကွၢ်ဟုၣ်ကွၢ်စုးတၢ်, “လဲၤနုာ်ဆူပှၤဃဲသဲမုၣ်အဟံၣ်ဒီးဟဲစိာ်ထီၣ်အီၤဒီးအဒူၣ် ဖိထၢဖိတဖၣ်ဒ်သုဆိၣ်လီၤတ့ၢ်သုသးအသိးန့ၣ်တက့ၢ်.”
23 သတးဒီးအဝဲသ့ၣ်လဲၤဒီးဟဲက့ၤကိးထီၣ်နီၢ်ရၤဃး, အပၢ်ဒီးအမိၢ်, အဒီပုၢ်ဝဲၢ်ပိာ်ခွါတဖၣ်, ဒီးအဒူၣ်ဖိထၢဖိလၢအအိၣ်လီၤတဲာ် တဖၣ်ဃုာ်ဒီးအီၤန့ၣ်လီၤ. အဝဲသ့ၣ်ဟဲက့ၤစိာ်အီၤခဲလၢာ်, ဒူၣ်ဖိထၢဖိဒီးပှၤလၢအဘၣ်ထွဲဒီးအီၤခဲလၢာ်တဖၣ် ဆူတၢ်ဘံၣ်တၢ်ဘၢအလီၢ်ဘူးဒီးအံၣ်စရ့လးသူၣ်ဒဲအလီၢ်န့ၣ်လီၤ.
24 ဝံၤဒီးအဝဲသ့ၣ်ဒွဲၣ်အူထီၣ် ဝ့ၢ်ဒီးမ့ၣ်အူအီၣ်ကွံာ်ဝ့ၢ်ဒီးကယဲၢ်တၢ်အိၣ်လၢအပူၤခဲလၢာ် န့ၣ်လီၤ. အိၣ်တ့ၢ်ဒၣ်ထဲတၢ်လၢအဘၣ်တၢ်မၤအီၤလၢထူ, စ့, တိၢ်ဘီ, ဒီးထးလၢအဝဲသ့ၣ်ဟံးန့ၢ်ဒီးပာ်အီၤလၢယွၤအတၢ်ပာ်ဖှိၣ်အလီၢ်န့ၣ် လီၤ.
25 ဘၣ်ဆၣ်ဒီးစီၤယိၤၡူဒုးပူၤဖျဲးကွံာ်ပှၤဃဲသဲမုၣ်နီၢ်ရၤ ဃးဒီးအဒူၣ်ဖိထၢဖိခဲလၢာ်, မ့ၢ်လၢအဝဲပာ်ခူသူၣ်ပှၤကွၢ်ဟုၣ်ကွၢ်စုးတၢ်ခံဂၤလၢစီၤယိၤ ၡူပျဲလီၤဝဲဆူဝ့ၢ်ယရံၤဃိအဃိန့ၣ်လီၤ. (အဝဲအစၢၤတဖၣ်အိၣ် မူဝဲလၢအံၣ်စရ့လးတုၤလီၤလၢမုၢ်မဆါတနံၤအံၤလီၤ.)
26 ဖဲအကတီၢ်ဝဲအံၤ, စီၤယိၤၡူဆိၣ်အၢတၢ်လၢယွၤအမဲာ်ညါဒီးစံးဝဲ, “ပှၤတဂၤဂ့ၤတဂၤဂ့ၤလၢအကျဲးစၢးသူၣ်ထီၣ်က့ၤဝ့ၢ်ယရံၤဃိ န့ၣ်ကဘၣ်ယွၤအတၢ်ဆိၣ်အၢန့ၣ်လီၤ.
ပှၤတဂၤဂ့ၤတဂၤဂ့ၤလၢအပာ်လီၤတၢ်အခီၣ်ထံးန့ၣ်, အဖိခွါအဒိၣ်ကတၢၢ်ကလီၤမၢ်ကွံာ်န့ၢ်အီၤ, ဒီး
ပှၤတဂၤဂ့ၤတဂၤဂ့ၤလၢအသူၣ်ထီၣ်ဝ့ၢ်အတြဲၤတဖၣ်န့ၣ်, အဖိသဒါကလီၤမၢ်ကွံာ်န့ၢ်အီၤန့ၣ်လီၤ.”
27 ဒီးယွၤအိၣ်ဒီးစီၤယိၤၡူ, ဒီးအမံၤဟူထီၣ်သါလီၤလၢကီၢ်ဒီ ဘ့ၣ်ညါအပူၤန့ၣ်လီၤ.