14
1 အအံၤမ့ၢ်တၢ်ဂ့ၢ်ဘၣ်ထွဲဒီးတၢ်နီၤဖးလီၤကီၢ်ကနၤဧၣ်လၢထံ ကျိယၢ်ဒ့ၣ်အမုၢ်နုာ်လၢပှၤအံၣ်စရ့လးဖိတဖၣ်အကျါဒ်လဲၣ်န့ၣ် လီၤ. ပှၤလုၢ်တၢ်အခိၣ်စီၤအလၤဧစၢ်, စီၤနိၣ်အဖိခွါစီၤယိၤၡူ, ဒီးအံၣ်စရ့လးအဒူၣ်တဖၣ်အဒူၣ်ဖိထၢဖိအခိၣ်အနၢ်တဖၣ်နီၤလီၤ ကီၢ်အံၤလၢအဝဲသ့ၣ်အကျါန့ၣ်လီၤ.
2 ဒ်ယွၤမၤလိာ်စီၤမိၤၡ့အသိး, ပှၤခွံဒူၣ်ဒီးဒူၣ်တဝာ်လၢထံကျိယၢ်ဒ့ၣ်အမုၢ်နုာ်တဖၣ်ဘၣ်တၢ် နီၤဖးန့ၢ်အထံအကီၢ်ခီဖျိတၢ်ဖီၣ်တၢ်ဖးန့ၣ်လီၤ.
3 စီၤမိၤၡ့ဟ့ၣ်လီၤတ့ၢ်လံထံ ကျိယၢ်ဒ့ၣ်အမုၢ်ထီၣ်ဆူဒူၣ်အဂၤခံဒူၣ်ဒီးဒူၣ်တဝာ်န့ၣ်လီၤ. (စီၤယိၤသးအစၢၤတဖၣ်ဘၣ်တၢ်နီၤဖးလီၤအီၤခံဒူၣ်လၢအမ့ၢ်ဝဲ မနၤၡ့ၤဒီးအ့ဖရဲၣ်န့ၣ်လီၤ.)
4 မ့မ့ၢ်, စီၤမိၤၡ့တဟ့ၣ်ပှၤလ့ၤဝံဖိတၢ်န့ၢ်သါလၢအကျါဘၣ်. အခိၣ်တလိာ်, အဝဲသ့ၣ်ဒိးန့ၢ်ဘၣ်ဝ့ၢ်တဖၣ်လၢကအိၣ်ဆိးဝဲလၢ အပူၤဃုာ်ဒီးပျီတဖၣ်လၢအဂီၤဖံးဒီးအသိတဖၣ်ကအီၣ်အဆၣ်အဂီၢ်န့ၣ်လီၤ.
5 အံၣ်စရ့လးအပှၤတဖၣ်နီၤဖးလီၤထံ ဧိၤကီၢ်ဧိၤဒ်ယွၤမၤလိာ်တ့ၢ်စီၤမိၤၡ့အသိးန့ၣ်လီၤ.
6 ဘၣ်တနံၤပှၤယူဒၤအဒူၣ်ဖိတနီၤဟဲဆူစီၤယိၤၡူအအိၣ်ဖဲဝ့ၢ်ကံး လကၤလးန့ၣ်လီၤ. အကျါတဂၤလၢအမ့ၢ်ပှၤကနးဖိစီၤယဖူန့ၤအဖိခွါစီၤကၤလ့းန့ၣ်စံးဘၣ်အီၤ, “နသ့ၣ်ညါတၢ်လၢယွၤစံးဘၣ်စီၤမိၤၡ့လၢယဂ့ၢ်ဒီးနဂ့ၢ် ဖဲဝ့ၢ်ကၤဒ့ၣ်ဘၢ်န့အပူၤကစီဒီလီၤ.
7 ယသးအိၣ်အနံၣ်လွံၢ်ဆံဖဲယွၤအခ့အပှၤစီၤမိၤၡ့မၢလီၤယၤလၢဝ့ၢ်ကၤဒ့ၣ်တၢ်န့ ဒ်သိးယကကွၢ်ဟုၣ်ကွၢ်စူးထံကီၢ်ဝဲအံၤဒီးယဟဲက့ၤစိာ် တၢ်ပာ်ဖျါအမ့ၢ်အတီဆူအအိၣ်န့ၣ်လီၤ.
8 ဘၣ်ဆၣ်ပှၤလၢအလဲၤတၢ်ဒီးယၤတဖၣ်မၤပျံၤမၤဖုးပပှၤဂီၢ်မုၢ်န့ၣ်လီၤ. မ့မ့ၢ်ယဲယစူၢ်ယွၤယကစၢ်ယွၤလၢလၢပှဲၤပှဲၤန့ၣ်လီၤ.
9 မ့ၢ်လၢယမၤဒ်န့ၣ်အဃိ, စီၤမိၤၡ့အၢၣ်လီၤယၤလၢယၤဒီးယဖိယလံၤတဖၣ် ပကဒိးန့ၢ်ဘၣ်သါထံကီၢ်လၢယခီၣ်ယီၢ်လီၤတ့ၢ်အီၤန့ၣ်လီၤ.
10 ဘၣ်ဆၣ်ဒီးခဲအံၤကွၢ်တက့ၢ်. တၢ်လၢယွၤစံးဘၣ်တ့ၢ်စီၤမိၤၡ့ အံၤအိၣ်လံလွံၢ်ဆံယဲၢ်နံၣ်လံ. အကတီၢ်မ့ၢ်ဝဲဖဲပှၤအံၣ်စရ့လးဖိ လဲၤခီဖျိပှၢ်မုၢ်ကနၢန့ၣ်လီၤ. ဒီးယွၤ, ဒ်အတၢ်အၢၣ်လီၤအိၣ်ဝဲအသိး, ဒုးမူဒံးယၤစးထီၣ်လၢန့ၣ်လံၤလံၤလီၤ. ကွၢ်ယၤတက့ၢ်. ယအိၣ်ဃိးဆံယဲၢ်နံၣ်လံ,
11 ဒီးတနံၤအံၤယဂံၢ်ယဘါဆူၣ်ဒံးဒၣ်ဒ်ယမ့ၢ်တ့ၢ်ဝဲဖဲစီၤမိၤၡ့မၢလီၤယၤအကတီၢ်န့ၣ်လီၤ. ယဂံၢ်ယဘါဆူၣ်ဒံးလၢတၢ်ဒုးတၢ်ယၤအဂီၢ်မ့ၢ်ဂ့ၤ, တၢ်ဂ့ၢ်အဂၤတမံၤမံၤအဂီၢ်မ့ၢ်ဂ့ၤန့ၣ်လီၤ.
12 လၢတၢ်န့ၣ်အဃိ, အခဲအံၤဟ့ၣ်လီၤယၤလၢကစၢၢ်န့ၣ်လၢယွၤအၢၣ်လီၤတ့ၢ်ယၤတနံၤဃီ ဖဲယၤဒီးယပှၤတဖၣ်ပပာ်ဖျါက့ၤတၢ်ဂ့ၢ်န့ၣ်တက့ၢ်. ပစံးဘၣ်တ့ၢ်သုလၢပှၤ အနီၢ်ဒိၣ်လၢအဘၣ်တၢ်ကိးအီၤလၢပှၤဧနးဖိတဖၣ်အိၣ် ဖဲန့ၣ်လၢဝ့ၢ်တဖၣ်လၢအအိၣ်ဒီးအခိၣ်ဒူဖးဒိၣ်အပူၤန့ၣ်လီၤ. ယွၤမ့ၢ်အိၣ်ဒီးယၤဒီးယကဟီထီၣ်ကွံာ်အဝဲသ့ၣ်ဒ်ယွၤစံးဘၣ်တ့ၢ်အသိးန့ၣ်လီၤ.”
13 စီၤယိၤၡူဆိၣ်ဂ့ၤဒီးဟ့ၣ်လီၤစီၤယဖူန့ၤအဖိခွါစီၤကၤလ့းလၢဝ့ၢ်ဃ့ဘြိၣ်ဒ် အတၢ်န့ၢ်သါအသိးန့ၣ်လီၤ.
14 ဝ့ၢ်ဃ့ဘြိၣ်ဘၣ်ဃးဒံးဒၣ်ဒီးပှၤကနးဖိစီၤယဖူန့ၤအဖိခွါစီၤကၤလ့းအစၢၤ တဖၣ်မ့ၢ်လၢအဝဲစူၢ်ယွၤ, အံၣ်စရ့လးအကစၢ်လၢတၢ်သးတီအပူၤ အဃိန့ၣ်လီၤ.
15 တချုးတၢ်အံၤန့ၣ်, ဝ့ၢ်ဃ့ဘြိၣ်ဘၣ်တၢ်ကိးအီၤလၢဝ့ၢ်အၢ်ဘၤလီၤ. (အၢ်ဘၤမ့ၢ်တ့ၢ်ပှၤအဒိၣ်ကတၢၢ်လၢပှၤဧနးက့ၣ်ဖိအကျါန့ၣ်လီၤ.)
ဒီးထံကီၢ်ဆိကတီၢ်ဝဲလၢတၢ်ဒုးတၢ်ယၤလီၤ.