13
1 အခဲအံၤစီၤယိၤၡူအသးပှၢ်ဒီးနုာ်လီၤလၢနံၣ်ဧိၤလါဧိၤ အပူၤလံ. ယွၤစံးဘၣ်အီၤ, “နသးပှၢ်လံဒီးထံကီၢ်လၢတၢ်ကဘၣ်မၤန့ၢ်အီၤန့ၣ်အိၣ်ဒံးဝဲ အါမးလီၤ.
2 အအံၤမ့ၢ်ထံကီၢ်လၢအအိၣ်လီၤတဲာ်တဖၣ်လီၤ. မ့ၢ်ပှၤဖလ့ၡသးဖိအကီၢ်ခဲလၢာ်ဒီးပှၤကၡူၢ်ဖိအကီၢ်ဒီဘ့ၣ်ညါ,
3 ဃုာ်ဒီးပှၤဧၤဝံဖိအကီၢ်လၢကလံၤထံးန့ၣ်လီၤ. (ကီၢ်လၢထံကျိဖိၡံဃိၢ်လၢကီၢ်အဲၤကူပတူးအမုၢ်ထီၣ်ဆူကလံၤစိး တုၤဆူဧ့ကြိၣ်အကီၢ်ဆၢလၢတၢ် ပာ်လၢပှၤကနၤဧၣ်ဖိအဂီၢ်န့ၣ်လီၤ. ပှၤဖလ့ၡသးဖိအစီၤပၤအိၣ်ဝဲယဲၢ်ဂၤ လၢအမ့ၢ်ဝဲဂါစၤအၤစဒိာ်, အၤၡကလိၣ်, ကၤသး, ဧ့ကြိၣ်အစီၤပၤန့ၣ်လီၤ).
4 အိၣ်ဒံးဝဲပှၤကနၤဧၣ်ဖိအကီၢ်ဒီဘ့ၣ်ဒီးဝ့ၢ်မၤရါ (လၢအဘၣ်ဃးဒီးပှၤစံဒိၣ်ဖိတဖၣ်)ဒီးတုၤလၢဝ့ၢ်အဖ့းလၢ ပှၤအမိၢ်ဖိအကီၢ်ဆၢ,
5 ဒီးပှၤကံးဘလးဖိအကီၢ်, ကီၢ်လဘၤနိၣ်ဒီဘ့ၣ်တုၤလၢမုၢ်ထီၣ်, စးထီၣ်လၢဝ့ၢ်ဘဧၤလးကးလၢအအိၣ်လၢကစၢၢ်ဃ့ရမိၣ်အက လံၤထံးတုၤလၢတၢ်လဲၤနုာ်ဆူဝ့ၢ်ဃမါသးလီၤ.
6 အဝဲအံၤပၣ်ဃုာ်ဒီးပှၤစံဒိၣ်ဖိအကီၢ်ခဲလၢာ်, ပှၤစံဒိၣ်ဖိလၢအအိၣ်လၢကစၢၢ်ကလိလၢလဘၤနိၣ်ဒီး မံးစြဖိးမၤယံၣ်အဘၢၣ်စၢၤန့ၣ်လီၤ. ယကဟီထီၣ်ကွံာ်ပှၤသ့ၣ်တဖၣ်အံၤခဲ လၢာ်ဖဲပှၤအံၣ်စရ့လးဖိတဖၣ်ဟဲထီၣ်ဝဲအခါန့ၣ်လီၤ. နကဘၣ်နီၤဖးထံဧိၤကီၢ်ဧိၤလၢပှၤအံၣ်စရ့လးဖိတဖၣ်အကျါဒ်ယမၤ လိာ်တ့ၢ်နၤအသိးန့ၣ်လီၤ.
7 ဒီးခဲကနံၣ်အံၤ, နီၤဖးထံဧိၤကီၢ်ဧိၤလၢဒူၣ်အဂၤခွံဒူၣ်အကျါဒီးပှၤမနၤၡ့ၤ အဒူၣ်တဝာ်ဒ်သိးအဝဲသ့ၣ်ကန့ၢ်ဘၣ်ဝဲဒ် အတၢ်န့ၢ်သါဒၣ်ဝဲအသိးန့ၣ်တက့ၢ်.”
8 မ့မ့ၢ်ဒူၣ်တဖၣ်လၢအမ့ၢ်ဝဲရူၤဘ့ၣ်ဒီးကးဒီးမနၤၡ့ၤအဒူၣ် တဝာ်ဒိးန့ၢ်တ့ၢ်လံဝဲအတၢ်န့ၢ်သါလၢယွၤအခ့အပှၤစီၤမိၤၡ့ ဟ့ၣ်လီၤအဝဲသ့ၣ်န့ၣ်လီၤ. ကီၢ်အံၤအိၣ်လၢထံကျိယၢ်ဒ့ၣ်အမုၢ်ထီၣ်တကပၤန့ၣ်လီၤ.
9 အဝဲသ့ၣ်အကီၢ်လဲၤတုၤလၢဝ့ၢ်ဧရိၤဧ့ၢ် (လၢအၢ်နိၣ်တၢ်ပၢၤခိၣ် အထိးနါ) ဒီးဝ့ၢ်လၢအအိၣ်လၢတၢ်ပၢၤခိၣ်န့ၣ်အခၢၣ်သးပၣ်ဃုာ်ဒီး မ့ဒဘၤအတၢ်ပၢၤခိၣ်ထီၣ်ထီတုၤလၢဒံဘိၣ်န့ၣ်လီၤ.
10 ဒီးလဲၤတုၤဝဲလၢပှၤဧၣ်မိၣ်ဖိအကီၢ်ဆၢ, ပၣ်ဃုာ်ဒီးဝ့ၢ်တဖၣ်လၢအဘၣ်တၢ်ပၢအီၤလၢပှၤအမိၢ်ဖိအစီၤပၤစံဃိၣ်လၢအပၢတၢ်ဖဲ ဝ့ၢ်ဃ့ၡဘိၣ်န့ၣ်လီၤ.
11 ပၣ်ဃုာ်ဒီးကီၢ်ကံးလဧး, ပှၤကၡူၢ်ဖိဒီးပှၤမၤကးဖိအကီၢ်, ကစၢၢ်ဃ့ရမိၣ်ဒီဖျၢၣ်, ဒီးဘၤၡၣ်ဒီကီၢ်တုၤလၢဝ့ၢ်စၤလကးန့ၣ်လီၤ.
12 ပၣ်ဃုာ်ဒီးစီၤပၤဧိာ်အဘီမုၢ်, ပှၤနီၢ်ဒိၣ်ဖိလၢအအိၣ်လီၤတဲာ်လၢအပၢတၢ်ဖဲဝ့ၢ်ဧၤၡတြိးဒီး အ့ဒြံၤန့ၣ်လီၤ. စီၤမိၤၡ့မၤနၢၤတ့ၢ်ပှၤတဖၣ်အံၤဒီးဟီထီၣ်ကွံာ်လံအဝဲသ့ၣ် န့ၣ်လီၤ.
13 နာ်က့, ပှၤအံၣ်စရ့လးဖိတဖၣ်တဟီထီၣ်ကွံာ်ပှၤကၡူၢ်ဖိဒီးပှၤ မၤကးဖိတဖၣ်ဘၣ်. အဝဲသ့ၣ်အိၣ်ဒံးဝဲလၢပှၤအံၣ်စရ့လးဖိ တဖၣ်အကျါန့ၣ်လီၤ.
14 စီၤမိၤၡ့တနီၤဖးလီၤကီၢ်လၢပှၤလ့ၤဝံဖိအဂီၢ်ဘၣ်. ဒ်ယွၤစံးဘၣ်တ့ၢ်စီၤမိၤၡ့အသိး, အဝဲသ့ၣ်ကဒိးန့ၢ်ဘၣ်အတၢ် န့ၢ်သါလၢအမ့ၢ်တၢ်လုၢ်တဖၣ်လၢတၢ်လုၢ်ထီၣ်ပာ်ထီၣ်အီၤလၢယွၤ အံၣ်စရ့လးအကစၢ်အတၢ်လုၢ်လီၢ်အဖီခိၣ်န့ၣ်လီၤ.
15 စီၤမိၤၡ့ဟ့ၣ်လီၤတ့ၢ်တၢ်လီၢ်တနီၤဆူရူၤဘ့ၣ်အဒူၣ်အဒူၣ်ဖိ ထၢဖိတဖၣ်လၢအတၢ်န့ၢ်သါအဂီၢ်လီၤ.
16 အဝဲသ့ၣ်အထံအကီၢ်လဲၤတုၤလၢဧရိၤဧ့ၢ် (လၢအၢ်နိၣ်အတၢ်ပၢၤခိၣ် အထိးနါ) ဒီးဝ့ၢ်လၢအအိၣ်လၢတၢ်ပၢၤခိၣ်အဝဲန့ၣ်အခၢၣ်သးဒီး ပၣ်ဃုာ်ဒီးတၢ်ပၢၤခိၣ်ထီၣ်ထီဝးတရံးမ့ဒဘၤလီၤ.
17 ပၣ်ဃုာ်ဒီးဝ့ၢ်ဃ့ၡဘိၣ်ဒီးတၢ်ပၢၤခိၣ်ထီၣ်ထီလၢအမ့ၢ်ဝဲဒံၤဘိၣ်, ဘၤမိးဘဧၤလး, ဘ့ၤသဘဧၤလးမဧိၣ်,
18-19 ယးဟစၤ, ကဒမိး, မ့ဖၤ, ကံးရယးသံၣ်, စံးဘမၤ, စ့ၤရ့းၡဃၢ်လၢတၢ်ပၢၤခိၣ်အကစၢၢ်လိၤ,
20 ဘ့ၤသပဧိၢ်, ကစၢၢ်ပံးစကၤအတၢ်ပၤလီၤတဖၣ်, ဒီးဘ့ၤသၤယၡံမိးန့ၣ်လီၤ.
21 အဝဲန့ၣ်မ့ၢ်ဝဲဝ့ၢ်ခဲလၢာ်လၢတၢ်ပၢၤခိၣ်ထီၣ်ထီဒီး ပှၤအမိၢ်ဖိအစီၤပၤစံဃိၣ်, လၢအပၢတၢ်ဖဲဝ့ၢ်ဃ့ၡဘိၣ်, အဘီမုၢ်န့ၣ်လီၤ. စီၤမိၤၡ့မၤနၢၤတ့ၢ်အီၤဃုာ်ဒီးကီၢ်မံးဒယၣ်အပှၤပၢၤ တၢ်တဖၣ်, လၢအမ့ၢ်စီၤအဝံၤ, စီၤရ့က့ၣ်, စီၤစူၢ်, စီၤဃူၢ်, ဒီးစီၤရ့ဘၤန့ၣ်လီၤ. အဝဲသ့ၣ်ခဲလၢာ်ပၢတၢ်လၢထံဧိၤ ကီၢ်ဧိၤလၢစီၤပၤစံဃိၣ်အဂီၢ်န့ၣ်လီၤ.
22 ပှၤလၢပှၤအံၣ်စရ့လးဖိတဖၣ်မၤသံအကျါ ပၣ်ဃုာ်ဒီးစီၤဘဧိၢ်အဖိခွါပှၤဖးတၢ်ဟဲဝံဟဲစိာ် စီၤဘံးလၣ်န့ၣ်လီၤ.
23 ထံကျိယၢ်ဒ့ၣ်မ့ၢ်ပှၤရူၤဘ့ၣ်ဖိအဒူၣ်အမုၢ်နုာ်ကီၢ်ဆၢန့ၣ်လီၤ. တၢ်အံၤမ့ၢ်ဝဲဝ့ၢ်ဒီးဝ့ၢ်ဖိတဖၣ်လၢအဘၣ်တၢ်ဟ့ၣ်လီၤအီၤဆူ ရူၤဘ့ၣ်အဒူၣ်အဒူၣ်ဖိထၢဖိတဖၣ်လၢအတၢ်န့ၢ်သါအဂီၢ်န့ၣ်လီၤ.
24 စီၤမိၤၡ့ဟ့ၣ်လီၤတ့ၢ်စ့ၢ်ကီးတၢ်လီၢ်တနီၤလၢကးအဒူၣ်အဒူၣ် ဖိထၢဖိတဖၣ်လၢအတၢ်န့ၢ်သါအဂီၢ်န့ၣ်လီၤ.
25 အတၢ်လီၢ်ပၣ်ဃုာ်ဒီးဝ့ၢ်ယၤစ့ၢ်ဒီးကီၢ်ကံးလဧးအဝ့ၢ်ခဲလၢာ်, ဧၣ်မိၣ်အကီၢ်တဝာ်ပၢၢ်တုၤလၢဝ့ၢ်ဧရိၤဧ့ၢ်လၢအအိၣ်လၢ ဝ့ၢ်ရးဘးအမုၢ်ထီၣ်လီၤ.
26 အတၢ်လီၢ်စးထီၣ်အသးဖဲဝ့ၢ်ဃ့ၡဘိၣ်ဒီးတုၤလၢဝ့ၢ်ရၤမါ, မံးစပၤဒီးဝ့ၢ်ဘတိနံၣ်, လၢဝ့ၢ်မၤဃန့ၤပၢၢ်တုၤလၢ လိၤဒဘံၢ်အကီၢ်ဆၢလီၤ.
27 လၢထံကျိယၢ်ဒ့ၣ်အတၢ်ပၢၤခိၣ်အံၤအိၣ်ဒီးဝ့ၢ်ဘ့ၤသဟၤရၣ်, ဝ့ၢ်ဘ့ၤသနံးမရၤ, ဝ့ၢ်စူးကိၤသး, ဝ့ၢ်စၤဖိၣ်ဒီးဃ့ၡဘိၣ်အစီၤပၤစံဃိၣ် အဘီမုၢ်လၢအအိၣ်လီၤတဲာ်တဖၣ်န့ၣ်လီၤ. အမုၢ်နုာ်ကီၢ်ဆၢမ့ၢ်ဝဲထံကျိယၢ်ဒ့ၣ်ဒီးတုၤလၢ ပီၣ်လဲၣ်ကၤလံၤလါလၢကလံၤစိးန့ၣ်လီၤ.
28 တၢ်အံၤမ့ၢ်ဝဲဝ့ၢ်ဒီးဝ့ၢ်ဖိတဖၣ်လၢအဘၣ်တၢ်ဟ့ၣ်လီၤကးအဒူၣ်, အဒူၣ်ဖိထၢဖိတဖၣ်လၢအတၢ်န့ၢ်သါအဂီၢ်န့ၣ်လီၤ.
29 စီၤမိၤၡ့ဟ့ၣ်လီၤတ့ၢ်တၢ်လီၢ်တနီၤဆူပှၤမနၤၡ့ၤအဒူၣ်တဝာ်, အဒူၣ်ဖိထၢဖိတဖၣ်လၢအတၢ်န့ၢ်သါအဂီၢ်န့ၣ်လီၤ.
30 အတၢ်လီၢ်လဲၤတုၤဝဲလၢဝ့ၢ်မၤဃန့ၤ, ပၣ်ဃုာ်ဒီးဘၤၡၣ်ဒီကီၢ်, ဘၤၡၣ်အစီၤပၤစီၤဧိာ်အဘီမုၢ်ဒီဘ့ၣ်ညါဃုာ်ဒီးစီၤယၤအံၢ် အဝ့ၢ်အဖျၢၣ်ဃုဆံလၢကီၢ်ဘၤၡၣ်အပူၤန့ၣ်လီၤ.
31 ပၣ်ဃုာ်ဒီးကီၢ်ကံးလဧးတဝာ်, ဃုာ်ဒီးဧၤၡတြိးဒီးအ့ဒြံၤ, လၢအမ့ၢ်ဝ့ၢ်ခိၣ်တဖၣ်လၢစီၤပၤစီၤဧိာ်အဘီအမုၢ်လၢ ကီၢ်ဘၤၡၣ်အပူၤန့ၣ်လီၤ. တၢ်ခဲလၢာ်အံၤဘၣ်တၢ်ဟ့ၣ်လီၤအီၤဆူစီၤမနၤၡ့ၤအဖိခွါစီၤ မၤက့ၢ်အဖိအလံၤအဒူၣ်ဖိထၢဖိတဝာ်န့ၣ်လီၤ.
32 အအံၤမ့ၢ်စီၤမိၤၡ့အတၢ်နီၤလီၤထံဧိၤကီၢ်ဧိၤလၢဝ့ၢ် ယရံၤဃိဒီးထံကျိယၢ်ဒ့ၣ်အမုၢ်ထီၣ်, ဖဲအဝဲအိၣ်ဝဲလၢကီၢ်မိၤအးအပျီတဖၣ်အပူၤအခါန့ၣ်လီၤ.
33 ဘၣ်ဆၣ်ဒီးစီၤမိၤၡ့တဟ့ၣ်လီၤတၢ်လီၢ်ဆူ ပှၤလ့ၤဝံဖိအဒူၣ်ဘၣ်. အဝဲစံးဘၣ်အဝဲသ့ၣ် လၢအတၢ်န့ၢ်သါကမ့ၢ်ဒၣ်ယွၤအံၣ်စရ့လးအကစၢ်ယွၤအတၢ်မၤဘူၣ် တနီၤလီၤ.