36
1 လၢစီၤယိၤၡံယၤအဖိခွါ စီၤယဟိၤယါကံၣ်ကဲစီၤပၤလၢ ကီၢ်ယူဒၤ လွံၢ်နံၣ်တနံၣ်အပူၤန့ၣ်, ယွၤစံးဘၣ်တ့ၢ်ယၤ,
2 “ဟံးန့ၢ်လံာ်တထူဒီး ကွဲးလီၤကယဲၢ်တၢ်ခဲလၢာ်လၢ ယတဲဘၣ်တ့ၢ်နၤဘၣ်ဃး ကီၢ်အံၣ်စရ့လးဒီး
ကီၢ်ယူဒၤဒီး ပှၤကလုာ်ခဲလၢာ်အဂ့ၢ်, လၢအလိၤန့ၣ်
တက့ၢ်. ကွဲးလီၤတၢ်ခဲလၢာ်လၢ ယတဲဘၣ်နၤ, စးထီၣ်
အဆိကတၢၢ်လၢ ယကတိၤတ့ၢ်တၢ်ဒီး နၤဖဲစီၤယိၤၡံယၤ
ကဲစီၤပၤဒီး တုၤလီၤလၢ ဆၢကတီၢ်ခဲအံၤန့ၣ်တက့ၢ်.
3 ဘၣ်သ့ၣ်သ့ၣ် ဖဲကီၢ်ယူဒၤအပှၤဂီၢ်မုၢ်နၢ်ဟူ တၢ်ဂ့ၢ်ဘၣ်ဃးတၢ်ဟးဂီၤလၢ ယတိာ်ပာ်လၢ
ယကဒုးလီၤဘၣ်လၢအဝဲသ့ၣ်အလိၤန့ၣ်, အဝဲသ့ၣ်
ကဃၣ်ကွံာ်အသးလၢ ကျဲအအၢအသီတဖၣ်န့ၣ်လီၤ.
အန့ၣ်ဒီး, ယကပျၢ်ကွံာ်အဝဲသ့ၣ်အတၢ်အၢတၢ်သီဒီး
အတၢ်ဒဲးဘးတဖၣ်န့ၣ်လီၤ.”
4 လၢတၢ်န့ၣ်အဃိ, ယကိးန့ၢ် စီၤန့ၤရံယၤအဖိခွါ စီၤဘၤရူးဒီး ကိးထီၣ်န့ၢ်အီၤတၢ်ခဲလၢာ်လၢယွၤ
စံးဘၣ်တ့ၢ်ယၤလီၤ. ဒီးစီၤဘၤရူးကွဲးလီၤအီၤ
ခဲလၢာ်လၢလံာ်ထူတထူအလိၤန့ၣ်လီၤ.
5 အန့ၣ်ဝံၤဒီး, ယဟ့ၣ်လီၤစီၤဘၤရူးလၢ တၢ်သိၣ် လိနဲၣ်ယုၤတဖၣ် ဒ်လၢလာ်အံၤန့ၣ်လီၤ. “ယတဘၣ်
တၢ်ပျဲယၤလၢ ယကလဲၤနုာ်ဆူ ယွၤအတၢ်လုၢ်ဟံၣ်
အပူၤလၢၤဘၣ်.
6 ဘၣ်ဆၣ်ဒီး, ယအဲၣ်ဒိးလၢ နကလဲၤဖဲန့ၣ်ခဲကိာ် တဘျီဖဲ ပှၤဂီၢ်မုၢ်ဒုၣ်တၢ်အီၣ်အဆၢကတီၢ်န့ၣ်လီၤ.
နကဘၣ်ဖးထီၣ်တၢ်ဂ့ၢ်လၢ လံာ်ထူပူၤအံၤလၢ
နကလုၢ်ဖးဒိၣ်, ဒ်သိးအဝဲသ့ၣ်ကနၢ်ဟူတၢ်ခဲလၢာ်လၢ
ယွၤစံးဘၣ်တ့ၢ်ယၤဒီး တၢ်လၢယကိးထီၣ်န့ၢ်နၤန့ၣ်လီၤ.
မၤတၢ်အံၤ ဖဲတၢ်လီၢ်လၢ ပှၤကိးဂၤဒဲး, ဃုာ်ဒီး
ကီၢ်ယူဒၤအပှၤဂီၢ်မုၢ်လၢ အဟဲလၢအဝ့ၢ်ဒၣ်ဝဲ တဖၣ်
နၢ်ဟူနၤကသ့န့ၣ်တက့ၢ်.
7 ဘၣ်သ့ၣ်သ့ၣ်, အဝဲသ့ၣ်ကဃ့ထုကဖၣ်တၢ်ဆူယွၤ ဒီးဃၣ်ကွံာ်အသးလၢ အကျဲအအၢအသီတဖၣ်
အပူၤ, မ့ၢ်လၢယွၤမၤပျံၤမၤဖုးပှၤဂီၢ်မုၢ်အံၤလၢအတၢ်
သးဒိၣ်ဒီး အတၢ်သးကဲၤထီၣ်လၢ အလီၤပျံၤလီၤဖုးဒိၣ်
မးအဃိန့ၣ်လီၤ.”
8 လၢတၢ်န့ၣ်အဃိ, စီၤဘၤရူးဖးထီၣ်ယွၤအကလုၢ် ကထါလၢ ယွၤအတၢ်လုၢ်ဟံၣ်အပူၤ လီၤတံၢ်လီၤဆဲး
ဒ်ယစံးဘၣ်တ့ၢ်အီၤလၢ ကမၤဝဲအသိးန့ၣ်လီၤ.
9 ဖဲစီၤယိၤၡံယၤ အဖိခွါ ကီၢ်ယူဒၤအစီၤပၤ စီၤယဟိၤယါကံၣ်အနံၣ် ပှဲၤထီၣ်ယဲၢ်နံၣ်တနံၣ်,
လါခွံလါတလါအပူၤန့ၣ်, ပှၤဂီၢ်မုၢ် ဒုၣ်တၢ်အီၣ်
ဒ်သိးကန့ၢ်ဘၣ်ယွၤအတၢ်ကွၢ်မဲာ် အဂီၢ်န့ၣ်လီၤ.
တၢ်ဒုၣ်တၢ်အီၣ်အံၤ ဘၣ်တၢ်မၤအီၤလၢ ပှၤခဲလၢာ်
လၢအအိၣ် လၢဝ့ၢ်ယရူၤၡလ့ၣ်အပူၤ ဃုာ်ဒီး, ပှၤခဲ
လၢာ်လၢ အဟဲဖဲန့ၣ်လၢ ကီၢ်ယူဒၤအဝ့ၢ်တဖၣ်အပူၤ
န့ၣ်လီၤ.
10 အန့ၣ်ဒီး, ဖဲပှၤဂီၢ်မုၢ်ခဲလၢာ် ဒိကနၣ်တၢ်အခါန့ၣ်, စီၤဘၤရူးဖးထီၣ်တၢ်လၢ လံာ်ထူအပူၤတၢ်ခဲလၢာ်
လၢ ယစံးတ့ၢ်ယဲန့ၣ်လီၤ. အဝဲမၤတၢ်အံၤလၢ ယွၤ
အတၢ်လုၢ်ဟံၣ်ပူၤ, ဖဲစီၤၡၤဖၣ်အဖိခွါ ကွီၢ်ဘျီၣ်အပှၤ
ကွဲးလံာ် စီၤကမၤရယၤ အဒၢးပူၤန့ၣ်လီၤ. ဒၢးအဝဲအံၤ
အိၣ်ဝဲလၢ ကွီၢ်ဘျီၣ်, ထးခီတတီၤ, လၢအဘူးဒီးကျဲစၢၤ
လဲၤနုာ်ဆူ ယွၤအတၢ်လုၢ်ဟံၣ်အတြဲၤအသီန့ၣ်လီၤ.
11 စီၤၡၤဖၣ်အလံၤခွါ, စီၤကမၤရယၤအဖိခွါစီၤမံၤကါယၤနၢ်ဟူဘၣ် စီၤဘၤရူးဖးထီၣ်တၢ်လၢယွၤစံးတ့ၢ်ဝဲလၢ လံာ်ထူအပူၤန့ၣ်လီၤ.
12 ဝံၤဒီး အဝဲလဲၤဆူ စီၤပၤအနူၢ်ပူၤဒီး ဆူကွီၢ်ဘျီၣ် အပှၤကွဲးလံာ်အဒၢး, ဖဲပဒိၣ်ပပှၢ်ခဲလၢာ်အိၣ်ဖှိၣ်ဝဲန့ၣ်လီၤ.
ကွီၢ်ဘျီၣ်အပှၤကွဲးလံာ် စီၤအလံၡမၤ, စီၤၡမါယၤအဖိခွါ
စီၤဒလါယၤ, စီၤဧးကဘိၢ်အဖိခွါစီၤအ့လနၤသၣ်,
စီၤၡၤဖၣ်အဖိခွါ စီၤကမၤရယၤ, စီၤဃနၤနယၤအဖိခွါ
စီၤစံးဒကံယၤ, ဒီးပဒိၣ်ပပှၢ်အဂၤတဖၣ်ခဲလၢာ် အအိၣ်ဖဲန့ၣ်လီၤ.
13 စီၤမံၤကါယၤစံးဘၣ်တဲဘၣ် အဝဲသ့ၣ်တၢ်ကိးမံၤဒဲးလၢ အဝဲနၢ်ဟူတ့ၢ်ဝဲ စီၤဘၤရူးဖးထီၣ်န့ၢ် ပှၤဂီၢ်မုၢ်န့ၣ်လီၤ.
14 အန့ၣ်ဒီး, ပဒိၣ်ပပှၢ်တဖၣ် မၢလီၤစီၤယဟူဒံၤ (လၢ အမ့ၢ်စီၤနသၤနံယၤ အဖိခွါ, စီၤၡလ့မယၤအလံၤခွါ,
ဒီးစီၤကူၤၡံအလိၤ) ဒ်သိးအကတဲဘၣ် စီၤဘၤရူးလၢ
အကဟဲစိာ်လံာ်ထူလၢ အဝဲဖးထီၣ်န့ၢ် ပှၤဂီၢ်မုၢ်န့ၣ်လီၤ.
စီၤဘၤရူးဟဲစိာ်န့ၢ် အဝဲသ့ၣ်လၢ လံာ်ထူန့ၣ်လီၤ.
15 အဝဲသ့ၣ်စံးဝဲ, “ဆ့ၣ်နီၤတက့ၢ်. ဒီးဖးထီၣ်န့ၢ်ပှၤလံာ်ထူ အံၤတက့ၢ်.” လၢတၢ်န့ၣ်အဃိ, စီၤဘၤရူးမၤဝဲဒ်န့ၣ်လီၤ.
16 တုၤအဝဲဖးထီၣ်ဝဲဝံၤဒီး, အဝဲသ့ၣ်ကွၢ်လိာ်အမဲာ် တဂၤဒီးတဂၤ လၢတၢ်ပျံၤတၢ်ဖုအပူၤဒီး စံးဘၣ်စီၤ
ဘၤရူး, “ပကဘၣ်ပာ်ဖျါတၢ်ဂ့ၢ်အံၤ ဆူစီၤပၤအအိၣ်လီၤ.”
17 အန့ၣ်ဒီး အဝဲသ့ၣ်သံကွၢ်အီၤ, “တဲဘၣ်ပှၤခဲအံၤလၢ နကွဲးတ့ၢ်တၢ်အံၤခဲလၢာ်သ့ဒ်လဲၣ်တက့ၢ်. မ့ၢ်စီၤယံးရမံယၤကိးထီၣ်န့ၢ် နၤဒီးနကွဲးလီၤအီၤန့ၣ်ဧါ.”
18 စီၤဘၤရူးစံးဆၢဝဲ, “စီၤယံးရမံၤယၤကိးထီၣ်န့ၢ် ယၤတၢ်ကတိၤ ကိးဖျၢၣ်ဒဲးဒီး ယကွဲးလီၤအီၤလၢ
မဲၣ်ထံလၢလံာ်ထူအံၤအလိၤန့ၣ်လီၤ.”
19 အန့ၣ်ဒီး အဝဲသ့ၣ်စံးဘၣ်အီၤ, “နၤဒီးစီၤယံးရမံၤယၤ ကဘၣ်လဲၤဒီး အိၣ်ခူသူၣ်လီၤ. သုအိၣ်ဖဲလဲၣ်န့ၣ်,
တဘၣ်ဒုးသ့ၣ်ညါပှၤနီတဂၤတဂ့ၤ.”
20 ပဒိၣ်ပပှၢ်တဖၣ် ပာ်လံာ်ထူအံၤလၢ ကွီၢ်ဘျီၣ်အပူၤကွဲးလံာ် စီၤအလံၡမၤအဒၢးပူၤ, ဒီးလဲၤဝဲဆူစီၤပၤအနူၢ်ပူၤဒီး
ဖဲန့ၣ်တဲဖျါတၢ်ကိးမံၤဒဲးဆူစီၤပၤန့ၣ်လီၤ.
21 အန့ၣ်ဒီး စီၤပၤမၢလီၤ စီၤယဟူဒံၤလၢ ကလဲၤဟံးန့ၢ်လံာ်ထူန့ၣ်လီၤ. အဝဲဟံးန့ၢ်လံာ်ထူအံၤလၢစီၤအလံၡမၤအဒၢးပူၤဒီး ဖးထီၣ်န့ၢ် စီၤပၤဒီးပဒိၣ်ပပှၢ်ခဲလၢာ်လၢအဆၢထၢၣ်ဝးတရံးအီၤန့ၣ်လီၤ.
22 မ့ၢ်တၢ်ဂိၢ်ခါအကတီၢ်ဒီး စီၤပၤဆ့ၣ်နီၤဝဲလၢတၢ်ဂိၢ်ခါအနူၢ်ပူၤ လၢမ့ၣ်အူပူၣ်အမဲာ်ညါန့ၣ်လီၤ.
23 စီၤယဟူၤဒံၤဖးထီၣ်လံာ်ထူအတၢ်ဂ့ၢ်သၢတီၤ, လွံၢ်တီၤဝံၤတဘျီဃီန့ၣ်, စီၤပၤကူးတဲာ်ကွံာ်အီၤလၢဒီအဆံးဖိတဘ့ၣ်ဒီး ကွံာ်လီၤအီၤဆူ မ့ၣ်အူပူၤလီၤ. အဝဲမၤတၢ်ဒ်အံၤတပယူာ်ဃီတုၤလံာ်ထူဒီထူ ဘၣ်တၢ်ဒွဲၣ်အူထီၣ်ကွံာ်အီၤန့ၣ်လီၤ.
24 ဘၣ်ဆၣ်ဒီး, စီၤပၤမ့ၢ်ဂ့ၤ, အပဒိၣ်ပပှၢ်ခဲလၢာ်မ့ၢ်ဂ့ၤလၢ အနၢ်ဟူ တ့ၢ်တၢ်အံၤန့ၣ်, တပျံၤတၢ်မ့ၢ်ဂ့ၤ, တဒုးနဲၣ်ဘၣ်တၢ်သူၣ်အုး သးအုးအပနီၣ်မ့ၢ်ဂ့ၤနီတဂၤဘၣ်.
25 စီၤအ့လနၤသၣ်, စီၤဒလါယၤ, စီၤကမၤရယၤမ့ၢ်ဃ့ကညးစီၤပၤဒ်သိး အသုတဒွဲၣ်အူကွံာ်လံာ်ထူန့ၣ်သနာ်က့, စီၤပၤတကနၣ်ဃုာ်အဝဲသ့ၣ် ဘၣ်.
26 အန့ၣ်ဝံၤဒီး, စီၤပၤခါလီၤအကလုၢ်ဆူ စီၤပၤဖိခွါစီၤယရၤဃမအ့လး, ဃုာ်ဒီးစီၤဧၤစရံၤအ့လးအဖိခွါစီၤစရါယၤ ဒီၤစီၤဧၤဘံးဒ့လးအဖိခွါ စီၤၡလ့မယၤဒ်သိး ယကဖီၣ်ယၤဒီး အပှၤကွဲးလံာ်စီၤဘၤရူးန့ၣ်လီၤ. ဘၣ်ဆၣ်ယွၤပာ်ခူသူၣ်ပှၤန့ၣ်လီၤ.
27 ဖဲစီၤပၤယဟိၤယါ ကံၣ်ဒွဲၣ်အူထီၣ်ကွံာ် လံာ်ထူလၢယကိးထီၣ်ဒီး စီၤဘၤရူးကွဲးလီၤဝဲအံၤဝံၤဒီး, ယွၤတဲဘၣ်ယၤလၢ,
28 ယကဟံးန့ၢ်လံာ်ထူအဂၤတထူဒီးကွဲးလီၤတၢ်ခဲလၢာ်လၢ အအိၣ်ကွဲးတ့ၢ်အသးလၢလံာ်ထူအခီၣ်ထံးတထူအပူၤန့ၣ်လီၤ.
29 ယွၤတဲဘၣ်ယၤလၢ ယကစံးဘၣ်စီၤပၤ, နဒွဲၣ်အူတ့ၢ်လံာ်ထူဒီး နသံကွၢ်စီၤယံးရမံယၤလၢ ဘၣ်မနုၤအဃိလၢ အဝဲကွဲး
တ့ၢ်တၢ်ဒီး စံးဝဲလၢကီၢ်ဘၤဘူၤလိၣ် အစီၤပၤကဟဲဒီးမၤဟးဂီၤထံကီၢ်အံၤ ဒီးမၤသံအပှၤဂီၢ်မုၢ်ဒီးအဆၣ်ဖိကီၢ်ဖိတဖၣ်န့ၣ်လဲၣ်.
30 လၢတၢ်န့ၣ်အဃိအခဲအံၤ, ယၤ, ယွၤအံၤ, စံးဘၣ်နၤ, စီၤပၤယဟိၤယါကံၣ်, လၢနစၢၤနသွဲၣ်တအိၣ်လၢၤဘၣ်နီတဂၤ
လၢကပၢဘၣ်စီၤဒၤဝံးအဘီအမုၢ်န့ၣ် နီတစုဘၣ်. နစိၣ်ကဘၣ်တၢ်ကွံာ်လီၤကွံာ်အီၤလၢ တၢ်လီၢ်ဖဲလၢ
တၢ်ကိၢ်ကဘၣ်အီၤလၢ မုၢ်ဆါခီဒီး ပစီၤပၤထံလီၤသကၤကဘၣ်အီၤလၢ မုၢ်နၤခီန့ၣ်လီၤ.
31 ယကစံၣ်ညီၣ်နၤ, နစၢၤနသွဲၣ်တဖၣ်, ဒီးနပဒိၣ်ပပှၢ်တဖၣ်မ့ၢ်လၢ တၢ်ဒဲးဘးတဖၣ်လၢ သုဝဲခဲလၢာ်မၤတ့ၢ်အီၤအဃိန့ၣ်လီၤ. နၤမ့ၢ်ဂ့ၤ, ဝ့ၢ်ယရူၤၡလ့ၣ်အပှၤဂီၢ်မုၢ်ဒီးကီၢ်ယူဒၤအပှၤဂီၢ်မုၢ်မ့ၢ်ဂ့ၤ, တကနၣ်ဃုာ်ယတၢ်ဟ့ၣ်ပလီၢ်တဖၣ်နီတမံၤဘၣ်. ဒီးယကဒုးလီၤဘၣ်တၢ်တတၢးတနါလၢ ကမၤပျံၤမၤဖုးတၢ်န့ၣ်လၢ သုလိၤလီၤ.
32 အန့ၣ်ဝံၤဒီး, ယဟံးန့ၢ်လံာ်ထူအဂၤတထူဒီးဟ့ၣ်လီၤအီၤဆူ ယပှၤကွဲးလံာ် စီၤဘၤရူးအစုပူၤ, ဒီးအဝဲကွဲးလီၤဝဲ တၢ်ခဲလၢာ်
လၢယကိးထီၣ်န့ၢ်အီၤလီၤ. အဝဲကွဲးတၢ်ခဲလၢာ်လၢ အအိၣ်တ့ၢ်
လံဝဲလၢ လံာ်ထူအခီၣ်ထံးအထူအပူၤ, ဒီးပာ်ဖှိၣ်အါထီၣ်တၢ်ကစီၣ် ဒ်န့ၣ်အသိးတဖၣ်လၢ ယကိးထီၣ်န့ၢ် အီၤလၢ ကကွဲးလီၤဝဲအဂီၢ်န့ၣ်လီၤ.