37
1 ကီၢ်ဘၤဘူၤလိၣ်အစီၤပၤ နဘူးကးန့စ့ၢ်ပာ်ထီၣ်စီၤစံးဒကံယၤ လၢအမ့ၢ်စီၤယိၤၡံယၤအဖိခွါဒ် ကီၢ်ယူဒၤအစီၤပၤ
အသိးလၢ စီၤယဟိၤယါခံၣ်အလီၢ်န့ၣ်လီၤ.
2 ဘၣ်ဆၣ်ဒီး, စီၤစံးဒကံယၤမ့ၢ်ဂ့ၤ, အပဒိၣ်ပပှၢ်တဖၣ်မ့ၢ်ဂ့ၤ, ပှၤဂီၢ်မုၢ်မ့ၢ်ဂ့ၤ တစူၢ်ဘၣ်တၢ်ကစီၣ်လၢ ယွၤဟ့ၣ်လီၤတ့ၢ်ယၤန့ၣ်ဘၣ်.
3 စီၤပၤစံးဒကံယၤမၢလီၤ စီၤၡလ့မယၤအဖိခွါစီၤယဟူၤကၤလး ဒီးပှၤလုၢ်တၢ်အခိၣ်စီၤစဖါနယၤလၢ အမ့ၢ်စီၤမၤစ့ယၤ
အဖိခွါဆူ ယအိၣ်လၢ ကမၢယၤဒ်သိးယကဃ့ထုကဖၣ်ဆူယွၤ,
ပကစၢ်ယွၤအအိၣ်လၢပပှၤကလုာ်အခၢၣ်စးန့ၣ်လီၤ.
4 ယတဘၣ်တၢ်တ့ၢ်နုာ်ယၤဆူ ဃိာ်ပူၤဒံးဘၣ်, ဒီးဟးထီၣ်က့ၤလီၤဒံးလၢ ပှၤဂီၢ်မုၢ်အကျါလၢတၢ်သဘျ့အပူၤန့ၣ်လီၤ.
5 ကီၢ်ဘၤဘူၤလိၣ်အသုးမုၢ်ကဝီၤ တ့ၢ်ဃာ်ဝ့ၢ်ယရူၤၡလ့ၣ်, ဘၣ်ဆၣ်ဒီး ဖဲအဝဲသ့ၣ် နၢ်ဟူဘၣ်ဝဲလၢ ကီၢ်အဲၤကူပတူးအသုးမုၢ် ဟဲခီဂာ်တ့ၢ်ကီၢ်အဲၤကူပတူးအကီၢ်ဆၢဒီး, အဝဲသ့ၣ်ဂုၤက့ၤ
အလီၢ်ခံန့ၣ်လီၤ.
6 အန့ၣ်ဒီးယွၤ, အံၣ်စရ့လးအကစၢ်ယွၤ စံးဘၣ်ယၤလၢ
7 ယကစံးဘၣ်စီၤစံးဒကံယၤဒ်အံၤ, “ကီၢ်အဲၤကူပတူး အသုးမုၢ်ဟဲထီၣ်လံလၢ ကမၤစၢၤနၤအဂီၢ်လံ, ဘၣ်ဆၣ်ဒီး
ကက့ၤကဒါက့ၤ ဆူအကီၢ်ဒၣ်ဝဲလီၤ.
8 အန့ၣ်ဒီး, ပှၤဘၤဘူၤလိၣ်ဖိတဖၣ် ကဟဲက့ၤကဒါက့ၤ, ကထီၣ်ဒုးဝ့ၢ်အံၤ, မၤနၢၤမၤန့ၢ်အီၤ, ဒီးဒွဲၣ်အူထီၣ်ကွံာ်အီၤလၢမ့ၣ်အူန့ၣ်လီၤ.
9 ယၤ, ယွၤအံၤ, ယဟ့ၣ်ပလီၢ်သုလၢ သုသုတလီလီၤ သုသးခီဖျိတၢ်ဆိကမိၣ်လၢ ပှၤဘၤဘူၤလိၣ်ဖိတဖၣ်
တဟဲကဒါက့ၤ လၢၤဘၣ်န့ၣ်တဂ့ၤ. အဂ့ၢ်ဒ်အံၤ, အဝဲသ့ၣ်
ကဟဲဝဲလီၤ.
10 သုမ့ၢ်မၤနၢၤကွံာ်ပှၤဘၤဘူၤလိၣ်အသုးမုၢ်ဒီဖုညါတုၤလၢ အဝဲသ့ၣ်အဒဲတဖၣ်အပူၤအိၣ်မံလီၤတ့ၢ်ဒၣ်ထဲ ပှၤလၢအဘၣ်ဒိ ဘၣ်ထံးတဖၣ်ဧိၤဒၣ်လဲာ်န့ၣ်, ပှၤတဖၣ်န့ၣ်ကဂဲၤဆၢထၢၣ်ဒံးဝဲ
ဒီးဒွဲၣ်အူထီၣ်ဝ့ၢ်အံၤလၢ မ့ၣ်အူလၢာ်လၢာ်ဆ့ဆ့န့ၣ်လီၤ.”
11 ပှၤဘၤဘူၤလိၣ်ဖိ အသုးမုၢ်ဂုၤက့ၤအလီၢ်ခံလၢဝ့ၢ်ယရူၤၡလ့ၣ် မ့ၢ်လၢကီၢ်အဲၤကူပတူးအသုးမုၢ်ဟဲဘူးထီၣ်လံအဃိန့ၣ်လီၤ.
12 လၢတၢ်န့ၣ်အဃိ, ယဟးထီၣ်လၢ ဝ့ၢ်ယရူၤၡလ့ၣ် ဒီၤလဲၤဆူပှၤဘံၣ်ယၤမံၣ် အဒူၣ်အလီၢ်ကဝီၤအပူၤဒ်
သိးယကဟံးန့ၢ်တၢ်နီၤဖး လၢယဂီၢ်လၢ ဒူၣ်ဖိထၢဖိ
အစုလီၢ်ခီၣ်ခိၣ်အကျါန့ၣ်လီၤ.
13 ဘၣ်ဆၣ်ဒီး, ဖဲယလဲၤတုၤဆူ ဘံၣ်ယၤမံၣ်အတြဲၤန့ၣ်, သုးခိၣ်လၢအပၢသုးဖိတဖၣ်လၢ အခိးတၢ်ဖဲန့ၣ်, လၢ
အမံၤမ့ၢ်စီၤယရံယၤ, လၢအမ့ၢ်စီၤၡလ့မယၤအဖိခွါဒီး
စီၤဃနၤနယၤအလံၤခွါန့ၣ်, ဒုးအိၣ်ကတီၢ်ယၤဒီၤစံးဝဲဒၣ်,
“နမ့ၢ်ပှၤလၢအဟးသဒၣ်ဒီး ပာ်တ့ၢ်ကွံာ်ပှၤဒီးနခီဃီၤဆူ
ပှၤဘၤဘူၤလိၣ်ဖိတဖၣ်အအိၣ်လီၤ.”
14 ယစံးဆၢအီၤ, “တမ့ၢ်ဒ်န့ၣ်ဘၣ်. ယတဟးသဒၣ်ဒီး ပာ်တ့ၢ်ကွံာ်သုဘၣ်.” ဘၣ်ဆၣ်ဒီး စီၤယရံယၤတဒိ
ကနၣ်ယၤဘၣ်. အခိၣ်တလိာ်, အဝဲတီၢ်ယၤဒီၤ
ဆှၢယၤဆူပဒိၣ်ပပှၢ်တဖၣ်အအိၣ်န့ၣ်လီၤ.
15 အဝဲသ့ၣ်အသးဒိၣ်ထီၣ်ယၤ နးနးကလဲာ်ဒီး မၢပှၤတီၢ်ယၤ ဒီး ဒုးဃာ်ယၤလၢ ကွီၢ်ဘျီၣ်အပှၤကွဲးလံာ်စီၤယိၤနၤသၣ်အ
ဟံၣ်, ဟံၣ်လၢအဘၣ်တၢ်ဒုးကဲထီၣ်အီၤလၢ ဃိာ်တဖျၢၣ်န့ၣ်လီၤ.
16 ယဘၣ်တၢ်ဒၢနုာ်ယၤလၢ ဒၢးဆံးဆံးဖိတဒၢးလၢတၢ်ခူၣ်န့ၣ်အီၤ လၢဟီၣ်ခိၣ်လာ်, အပူၤ, ဒီးယဘၣ်တၢ်ပၢၤယၤဖဲန့ၣ်ဖးယံာ်
ဖးထၢန့ၣ်လီၤ.
17 လၢခံဒီး, စီၤပၤစံးဒကံယၤမၢပှၤလဲၤကိးယၤ, ဒီးဖဲန့ၣ်လၢနူၢ်အပူၤန့ၣ်, အဝဲသံကွၢ်ခူသူၣ်ယၤ, “မ့ၢ်တၢ်ကစီၣ်အိၣ်တမံၤမံၤလၢ ယွၤအအိၣ်ဧါ.”
ယစံးဆၢအီၤ, “အိၣ်လီၤ.” ဒီးယစံးအါထီၣ်အီၤ,
“နကဘၣ်တၢ်ဟ့ၣ်လီၤကွံာ်နၤဆူ ကီၢ်ဘၤဘူၤလိၣ်အစီၤပၤအစုပူၤန့ၣ်လီၤ.”
18 အန့ၣ်ဒီး ယသံကွၢ်အီၤ, “တၢ်ကမၣ်လၢ ယမၤဘၣ်တ့ၢ်ထီဒါနၤမ့ၢ်ဂ့ၤ, နပဒိၣ်ပပှၢ်တဖၣ်မ့ၢ်ဂ့ၤ, ပှၤဂီၢ်မုၢ်အံၤမ့ၢ်ဂ့ၤလၢ နကဒၢနုာ် ယၤ ဆူဃိာ်ပူၤမ့ၢ်တၢ်ကမၣ်မနုၤတမံၤလဲၣ်.
19 နဝံတဖၣ်လၢ အတဲဘၣ်တ့ၢ်နၤလၢ ကီၢ်ဘၤဘူၤလိၣ်အစီၤပၤ တဟဲထီၣ်ဒုးနၤမ့ၢ်ဂ့ၤ, နထံနကီၢ်မ့ၢ်ဂ့ၤန့ၣ်, တၢ်မၤတ့ၢ်အသးဒီး အဝဲသ့ၣ်ဒ်လဲၣ်.
20 ဒီးအခဲအံၤ, နဲဒၣ်တၢ်ဒိၣ်စီၤပၤဧၢ, ယဃ့ကညးနၤလၢ နကဒိကနၣ်ယၤဒီး မၤတၢ်လၢ ယဃ့နၤန့ၣ်လီၤ.
ဝံသးစူၤတဘၣ်ဆှၢကဒါက့ၤ ယၤဆူဃိာ်လၢ
စီၤယိၤနၤသၣ်အဟံၣ်န့ၣ်တဂ့ၤ. နမ့ၢ်မၤဒ်န့ၣ်ဒီး,
ယကသံဖဲန့ၣ်သပှၢ်ကတၢၢ်လီၤ.”
21 လၢတၢ်န့ၣ်အဃိ, စီၤပၤစံးဒကံယၤဟ့ၣ်လီၤအကလုၢ်လၢ ယကဘၣ်တၢ်ဒုးဃာ်ယၤဖဲနူၢ်အဂၢၢ်ပူၤန့ၣ်လီၤ.
ယအိၣ်ယဲဖဲန့ၣ်, ဒီးတၢ်ဟ့ၣ်အီၣ်ယၤလၢကိၣ်, တနံၤတလိၣ်လၢ
အဟဲဝဲ လၢပှၤကုၢ်ကိၣ်အလီၢ်ကိးနံၤဒဲးတုၤကိၣ်ခဲလၢာ်လၢ
ဝ့ၢ်ပူၤလၢာ်ကွံာ်တစုန့ၣ်လီၤ.