35
1 ဖဲစီၤပၤယိၤၡံယၤ အဖိခွါ စီၤယဟိၤယါကံၣ်ကဲစီၤပၤ လၢကီၢ်ယူဒၤန့ၣ်, ယွၤစံးဘၣ်ယၤ,
2 “လဲၤဆူပှၤရ့ကးဖိအဒူၣ်ထၢ အဟံၣ်ဖိဃီဖိတဖၣ်အအိၣ်ဒီး ကတိၤတၢ်ဒီး အဝဲသ့ၣ်တက့ၢ်. ဝံၤဒီးဟဲက့ၤ ကိးအဝဲ သ့ၣ်ဆူဒၢးအကျါတဒၢးလၢ ယွၤအတၢ်လုၢ်ဟံၣ်အပူၤဒီး ဟ့ၣ်အီအဝဲသ့ၣ် လၢစပံးထံတနီၤတက့ၢ်.”
3 လၢတၢ်န့ၣ်အဃိ, ယကိးထီၣ်ပှၤရ့ကးဖိဒီဒူၣ်လၢအမ့ၢ်ဝဲ စီၤယၤစါနယၤ (စီၤယံးရမံယၤအဂၤတဂၤလၢ အပၢ်အမံၤမ့ၢ်ဝဲ စီၤဃဘၤစံနယၤ, အဖိခွါ) ဒီးအဒီပုၢ်ဝဲၢ်ခဲလၢာ်ဒီးအဖိခွါတဖၣ်,
4 ဒီးဟဲက့ၤကိးအဝဲသ့ၣ်ဆူ ယွၤအတၢ်လုၢ်ဟံၣ်အပူၤန့ၣ်လီၤ. ယကိးဃီၤအဝဲသ့ၣ်ဆူစီၤယံးကဒးလယၤ အဖိခွါဝံဃၤနၣ် အပျဲၢ်အဘီၣ်တဖၣ်အဒၢးပူၤလီၤ. ဒၢးအဝဲအံၤအိၣ်လၢ စီၤၡၤလူၣ်အဖိခွါ, ပှၤပၢၤတြဲၤအခိၣ်စီၤမၤစ့ယၤအ ဒၢးအဖီခိၣ်ဒီး အိၣ်ဘူးဒီး ပဒိၣ်ဖးဒိၣ်အဂၤတဖၣ် အဒၢးန့ၣ်လီၤ.
5 အန့ၣ်ဝံၤဒီး, ယပာ်လီၤလီခီဒီး သလၢတဖၣ်ပှဲၤဒီး စပံးထံလၢ ပှၤရ့ကးဖိတဖၣ်အမဲာ်ညါ, ဒီးယစံးဘၣ် အဝဲသ့ၣ်, အီစပံးထံတက့ၢ်.”
6 ဘၣ်ဆၣ်ဒီး, အဝဲသ့ၣ်စံးဆၢဝဲ, ပတအီစပံးထံဘၣ်. အဂ့ၢ်ဒ်အံၤ, စီၤရ့ကးအဖိခွါ ပပၢ်ဖးဒိၣ်လၢပျၢၤ စီၤယိၤနဒာ်စံးဘၣ်တ့ၢ်ပှၤလၢ ပဝဲမ့ၢ်ဂ့ၤ, ပစၢၤပသွဲၣ်တဖၣ်မ့ၢ်ဂ့ၤပတဘၣ်အီစပံးထံတမံၤဂ့ၤတမံၤဂ့ၤ နီတဘျီဘၣ်.
7 အဝဲစံးဘၣ်တ့ၢ်စ့ၢ်ကီး ပှၤလၢပတဘၣ်သူၣ်ထီၣ်ဟံၣ်ဧိၤဃီဧိၤတဖၣ်မ့ၢ်ဂ့ၤ, ထူစံာ်ထူပှဲၤမ့ၢ်ဂ့ၤ, ဒီးသူၣ်လီၤစပံးလီၢ်တဖၣ်မ့ၢ်ဂ့ၤ, ပှ့ၤအီၤမ့ၢ်ဂ့ၤန့ၣ်ဘၣ်. အဝဲမၤလိာ်တ့ၢ် ပှၤထီဘိလၢပကအိၣ်ဆိး လၢဒဲတဖၣ်အပူၤ ဖဲပကအိၣ်ဒံးလၢထံကီၢ်အံၤ, လၢပအိၣ်ဆိးလၢ အပူၤဒ်ပှၤတခီဘီမုၢ်ဖိတဖၣ်အသိးန့ၣ်လီၤ.
8 ပစူၢ်တ့ၢ်ကယဲၢ်တၢ်သိၣ်လိနဲၣ်ယုၤတဖၣ် လၢစီၤယိၤနဒာ် ဟ့ၣ်လီၤတ့ၢ်ပှၤန့ၣ်လီၤ. ပကစၢ်ဒၣ်ဝဲ ပတအီစပံးထံ နီတစုဘၣ်. ဒီးပမါတဖၣ်မ့ၢ်ဂ့ၤ, ပဖိခွါတဖၣ်မ့ၢ်ဂ့ၤ, ဒီးပဖိမုၣ် တဖၣ်မ့ၢ်ဂ့ၤ တအီစ့ၢ်ကီးဝဲ နီတစုဘၣ်.
9 ပတသူၣ်လီၤဟံၣ်ဧိၤဃီဧိၤတဖၣ် ဒ်ပအိၣ်ပဆိး အလီၢ်တဖၣ်အသိးဘၣ်. ပအိၣ်ဆိးဒၣ်လၢ ဒဲတဖၣ် အပူၤဒီးပတအိၣ်ဒီးစပံးလီၢ်, စံာ်ပျီဒီးဘုဧိၤဟုဧိၤနီတမံၤဘၣ်.
10 ပစူၢ်တၢ်ခဲလၢာ်ခဲဆ့လၢ ပပၢ်ဖးဒိၣ်လၢ ပျၢၤစီၤယိၤနဒာ်မၤလိာ် တ့ၢ်ပှၤလၢလၢပှဲၤပှဲၤန့ၣ်လီၤ.
11 ဘၣ်ဆၣ်ဒီး, ဖဲစီၤပၤနဘူၤကးန့စၢ်ဟဲထီၣ်ဒုးထံကီၢ်အံၤန့ၣ်, ပစံၣ်ညီၣ်တဲာ်လၢပကဟဲဆူ ဝ့ၢ်ယရူၤၡလ့ၣ် ဒ်သိး ပကယံၤထီၣ်ကွံာ်ဒီး ကီၢ်ဘၤဘူၤလိၣ်ဒီး ကီၢ်စူၤရံ အသုးမုၢ်တဖၣ်အဂီၢ်န့ၣ်လီၤ. လၢတၢ်န့ၣ်အဃိ ပအိၣ်ပဆိးလၢဝ့ၢ်ယရူၤၡလ့ၣ်အပူၤန့ၣ်လီၤ.”
12 အန့ၣ်ဝံၤဒီး ယွၤသ့တၢ်လၢာ်, အံၣ်စရ့လးအကစၢ်ယွၤ, တဲဘၣ်ယၤလၢ,
13 ယကလဲၤဒီး စံးဘၣ်ကီၢ်ယူဒၤဒီး ဝ့ၢ်ယရူၤၡလ့ၣ် အပှၤဂီၢ်မုၢ်ဒ်အံၤ, “ယၤ, ယွၤအံၤ, ယသံကွၢ်သုလၢ ဘၣ်မနုၤအဃိ သုတဒိကနၣ်ယၤဒီး တစူၢ်ဘၣ်ယ တၢ်သိၣ်လိနဲၣ်ယုၤတဖၣ်န့ၣ်လီၤ.
14 စီၤယိၤနဒာ်အစၢၤတဖၣ် စူၢ်တ့ၢ်အဝဲအတၢ်မၤလိာ် ဒ်သိးအသုတအီစပံးအထံတဂ့ၤဒီး တုၤလီၤလၢ မုၢ်တနံၤအံၤဒၣ်လဲာ်, အဝဲသ့ၣ်တအီဝဲနီတဂၤဘၣ်. ဘၣ်ဆၣ်ဒီး ယကတိၤဒံးတၢ်ဒီး သုဒီးသုတစူၢ် ဘၣ်ယကလုၢ်ဘၣ်.
15 ယဆှၢလီၤန့ၢ်သုလၢယခ့ယပှၤဝံတဖၣ် တပယူာ်ဃီ, ဒီးအဝဲသ့ၣ်တဲဘၣ်တ့ၢ်သုလၢ သုကညိကွံာ်သုကျဲ အအၢအသီတဖၣ်, ဒီးကမၤတၢ်လၢ အဘၣ်န့ၣ်လီၤ. အဝဲသ့ၣ်ဟ့ၣ်ပလီၢ်တ့ၢ်သုလၢ သုတဘၣ်ဘူၣ်ထီၣ် ဘါထီၣ်ဒီး မၤကစၢ်အဂၤတဖၣ် အတၢ်မၤဘၣ်, ဒ်သိးသုကအိၣ်ဆိးဘၣ်ဒံးလၢကီၢ်ပူၤ, ကီၢ်လၢယဟ့ၣ်လီၤတ့ၢ် သုဒီးသုမိၢ်ပၢ်ဖံဖုလၢပျၢၤတဖၣ်န့ၣ်လီၤ. ဘၣ်ဆၣ်ဒီး သုတဒိကနၣ် ယၤဘၣ်ဒီးတကနၣ်ဃုာ်တၢ်လၢ ယစံးန့ၣ်ဘၣ်.
16 စီၤယိၤနဒာ်အစၢၤအသွဲၣ်တဖၣ် စူၢ်တ့ၢ်တၢ်မၤလိာ် လၢအမိၢ်ပၢ်ဖံဖုလၢပျၢၤတဖၣ် ဟ့ၣ်လီၤတ့ၢ် အဝဲသ့ၣ်, ဘၣ် ဆၣ်ဒီး သုဝဲပှၤဂီၢ်မုၢ်သုတစူၢ်ယၤဘၣ်.
17 လၢတၢ်န့ၣ်အဃိဒီး အခဲအံၤ, ယၤ, ယွၤသ့တၢ်လၢာ်, အံၣ်စရ့လးအကစၢ်ယွၤ, ယကဒုးလီၤဘၣ်သုဝဲ ပှၤဂီၢ်မုၢ်လၢ ကီၢ်ယူဒၤဒီး ဝ့ၢ်ယရူၤၡလ့ၣ်ဆူ တၢ်ဟးဂီၤခဲလၢာ်လၢ ယအၢၣ်လီၤတ့ၢ်အီၤအပူၤန့ၣ်လီၤ. ယကမၤတၢ်အံၤမ့ၢ် လၢဖဲယကတိၤတၢ်ဒီး သုန့ၣ်သုတဒိကနၣ်ဘၣ်အဃိလီၤ. ဒီးဖဲယကိးထီၣ်သုန့ၣ်, သုတစံးဆၢယၤဘၣ်အဃိလီၤ.”
18 အန့ၣ်ဒီး, ယတဲဘၣ်ပှၤရ့ကးအဒူၣ်ထၢလၢ ယွၤသ့တၢ်လၢာ်, အံၣ်စရ့လးအကစၢ်ယွၤစံးတ့ၢ်ဝဲဒၣ်, “သုစူၢ်တ့ၢ်သုပၢ်ဖးဒိၣ် လၢပျၢၤစီၤယိၤနဒာ်အတၢ်မၤလိာ်လၢ အဟ့ၣ်လီၤတ့ၢ်သု, ဒီၤသုပိာ်ထွဲအဝဲအတၢ်သိၣ်လိနဲၣ်ယုၤခဲလၢာ်, ဒီးသုမၤ တ့ၢ်တၢ်ခဲလၢာ်လၢ အဝဲဒၣ်မၤလိာ်တ့ၢ်သုန့ၣ်လံ.
19 အဃိဒီး, ယွၤ, ယွၤသ့တၢ်လၢာ်, အံၣ်စရ့လးအကစၢ်ယွၤ အၢၣ်လီၤအီလီၤလၢ စီၤရ့ကးအဖိခွါစီၤယိၤနဒာ်ကအိၣ်ဒီး အစၢၤအသွဲၣ်ပိာ်ခွါတဂၤထီဘိလၢကမၤယတၢ်မၤအဂီၢ်န့ၣ်လီၤ.”