23
1 ပှၤပၢတၢ်ပြးတၢ်တဖၣ်လၢအမၤဟးဂီၤဒီးမၤလီၤပြံလီၤပြါအပှၤ ဂီၢ်မုၢ်န့ၣ်, ယွၤအတၢ်စံၣ်ညီၣ်အီၤကလီၤပျံၤလီၤဖုးဆံးဒိၣ်လဲၣ်.
2 တၢ်အံၤမ့ၢ်ယွၤ, အံၣ်စရ့လးအကစၢ်ယွၤစံးတၢ်ဘၣ်ဃးပှၤ ပၢတၢ်တဖၣ်လၢကြၢးကဟုကယာ်အပှၤဂီၢ်မုၢ်အဂ့ၢ်န့ၣ်လီၤ. “သုတကဟုကယာ်ယပှၤဂီၢ်မုၢ်ဘၣ်. သုမၤလီၤပြံလီၤပြါကွံာ် အဝဲသ့ၣ်ဒီးနီၣ်ထီၣ်ဟီထီၣ်ကွံာ်အဝဲသ့ၣ်လီၤ. ခဲအံၤယကစံၣ်ညီၣ်သုလၢတၢ်အၢတၢ်သီလၢသုမၤတ့ၢ်ဝဲအဃိန့ၣ်လီၤ.
3 ယပှၤဂီၢ်မုၢ်လၢအအိၣ်တီၢ်ဒံးလၢထံကီၢ်တဖၣ်လၢယမၤလီၤပြံလီၤပြါတ့ၢ်အီၤအပူၤန့ၣ်, ယကပာ်ဖှိၣ်က့ၤအီၤဒီးယကဟဲက့ၤ စိာ်က့ၤအဝဲသ့ၣ်ဆူအထံအကီၢ်ဒၣ်ဝဲန့ၣ်လီၤ. အဝဲသ့ၣ်ကအိၣ်ဒီး အဖိအလံၤအါမးဒီးအနီၣ်ဂံၢ်ကအါထီၣ်ဂီၢ်ထီၣ်ဝဲန့ၣ်လီၤ.
4 ယကဃုထၢပာ်လီၤပှၤပၢတၢ်တဖၣ်လၢကကဟုကယာ်အဝဲသ့ၣ် အဂီၢ်န့ၣ်လီၤ. ယပှၤဂီၢ်မုၢ်အံၤတပျံၤတၢ်လၢၤဘၣ်ဒီးတဘၣ်ယိၣ် ဘၣ်ဘီတၢ်လၢၤဘၣ်, ဒီးယတစံၣ်ညီၣ်ကဒီးအဝဲသ့ၣ်လၢၤဘၣ်. ယၤ, ယွၤအံၤ, ကတိၤလံတၢ်လံ.”
5 ယွၤစံးဝဲဒၣ်, “တၢ်ဆၢကတီၢ်တုၤဃီၤဝဲလၢယကဃုထၢပှၤအတီ အလိၤတဂၤလၢအလီၤစၢၤလၢစီၤဒၤဝံး, ဒ်စီၤပၤတဂၤအသိးန့ၣ် လီၤ. စီၤပၤအံၤကပၢတၢ်လၢတၢ်ကူၣ်သ့အပူၤဒီးမၤတၢ်လၢ အဘၣ်ဒီးတၢ်စံၣ်ညီၣ်တီအပူၤ, သကုၤထံကီၢ်ဒီဘ့ၣ်န့ၣ်လီၤ.
6 ဖဲအဝဲမ့ၢ်စီၤပၤန့ၣ်, ကီၢ်ယူဒၤအပှၤဂီၢ်မုၢ်ကပူၤဖျဲးဒီးတၢ်ဘၣ်ယိၣ်, ဒီးကီၢ်အံၣ်စရ့လးအပှၤဂီၢ်မုၢ်ကအိၣ်မူဘၣ်လၢတၢ်မုာ်တၢ်ခုၣ်အပူၤလီၤ. အဝဲကဘၣ်တၢ်ကိးအီၤလၢ, ယွၤ, ပတၢ်အုၣ်က့ၤခီၣ်က့ၤ’ လီၤ.”
7 ယွၤစံးဝဲဒၣ်, “တၢ်ဆၢကတီၢ်တုၤဃီၤဝဲ, ဖဲပှၤဂီၢ်မုၢ်တဆိၣ် လၢၤတၢ်လၢယမံၤအပူၤဒ်ကစၢ်ယွၤလၢအမူဝဲတဂၤအသိး, ဒ်ကစၢ်တဂၤလၢအစိာ်ထုးထီၣ်ကီၢ်အံၣ်စရ့လးအပှၤ ဂီၢ်မုၢ်လၢကီၢ်အဲၤကူပတူးအပူၤအသိးန့ၣ်ဘၣ်.
8 အခိၣ်တလိာ်, အဝဲသ့ၣ်ကဆိၣ်တၢ်လၢယမံၤအပူၤ ဒ်ကစၢ်ယွၤအမူဝဲတဂၤအသိးဒ်ကစၢ်တဂၤလၢအစိာ်ထုးထီၣ်ကွံာ် ကီၢ်အံၣ်စရ့လးအပှၤဂီၢ်မုၢ်လၢထံကီၢ်လၢကလံၤစိးတခီဒီးလၢထံကီၢ် အဂၤတဖၣ်ခဲလၢာ်အပူၤဖဲယမၤလီၤပြံလီၤပြါတ့ၢ်အဝဲသ့ၣ်န့ၣ်လီၤ. အန့ၣ်ဝံၤဒီး, အဝဲသ့ၣ်ကအိၣ်ကဆိးလၢအထံအကီၢ်ဒၣ်ဝဲအပူၤန့ၣ်လီၤ.”
9 ယသးဘၣ်တၢ်မၤလီၤသဘှံးအီၤ
ဒီးယကနိးကစုာ်ယဲလီၤ.
အဂ့ၢ်ဒ်အံၤ, လၢယွၤအဃိ,
ဒီးလၢအကလုၢ်ကထါစီဆှံအဃိန့ၣ်,
ယလီၤဂာ်ဒ်ပှၤတဂၤလၢအအီမူၤသံးအသိး,
ဒ်ပှၤတဂၤလၢအအီစပံးထံအါကဲၣ်ဆိးအသိးန့ၣ်လီၤ.
10 အဂ့ၢ်ဒ်အံၤ, ကီၢ်အံၤပှဲၤဝဲဒီးပှၤဂီၢ်မုၢ်လၢအသးတတီဒီးယွၤန့ၣ်လီၤ.
အဝဲသ့ၣ်အိၣ်မူတၢ်အိၣ်မူအအၢအသီဒီးသူကမၣ်အစိကမီၤန့ၣ်လီၤ.
မ့ၢ်လၢယွၤအတၢ်ဆိၣ်အၢအဃိန့ၣ်, ထံကီၢ်သူၣ်အုးသးအုး
ဒီးတၢ်အီၣ်ဆၣ်အလီၢ်တဖၣ်ဃ့ထီကွံာ်ဝဲန့ၣ်လီၤ.
11 ယွၤစံးဝဲဒၣ်,
“ဝံတဖၣ်ဒီးပှၤလုၢ်တၢ်အခိၣ်တဖၣ်န့ၣ် တယူးယီၣ်ဘၣ်ယွၤဘၣ်.
ယထံၣ်ဘၣ်တ့ၢ်အဝဲသ့ၣ်မၤတၢ်အၢလၢ ယတၢ်လုၢ်ဟံၣ်အပူၤဒၣ်လဲာ်န့ၣ်လီၤ.
12 ကျဲတဖၣ်လၢအဝဲသ့ၣ်ပိာ်ဝဲန့ၣ်ကဒုးလီၤတလံာ်တၢ်ဒီးကခံးဝဲလီၤ.
ယကဒုးဘၣ်တိၢ်အဝဲသ့ၣ်အခီၣ်ဒီးကလီၤဃံၤဝဲလီၤ.
ယကဟဲစိာ်တၢ်တတၢးတနါလၢအဝဲသ့ၣ်အဖီခိၣ်ဒီးတၢ်စံၣ်ညီၣ် အဝဲသ့ၣ်အဆၢကတီၢ်ဟဲဝဲလံ.
ယၤ, ယွၤအံၤ, ကတိၤလံတၢ်လံ.
13 ယထံၣ်ဘၣ်တ့ၢ်ကီၢ်ၡၤမရံအဝံတဖၣ်အတၢ်ဒဲးဘးလံ.
အဝဲသ့ၣ်ကတိၤတ့ၢ်တၢ်လၢဘဧၤလးအမံၤအပူၤဒီးဆှၢဟးဖျိးကွံာ် ယပှၤဂီၢ်မုၢ်န့ၣ်လီၤ.
14 မ့မ့ၢ်ယထံၣ်ဘၣ်တ့ၢ်ဝ့ၢ်ယရူၤၡလ့ၣ်အဝံတဖၣ်မၤတၢ်အၢဒိၣ်န့ၢ် တၢ်အံၤဒၣ်လဲာ်န့ၣ်လီၤ.
အဝဲသ့ၣ်မၤကမၣ်မုၣ်ကမၣ်ခွါဒီးကတိၤတၢ်လီတၢ်ဝ့ၤတဖၣ်န့ၣ်လီၤ.
အဝဲသ့ၣ်မၤစၢၤပှၤဂီၢ်မုၢ်လၢကမၤကမၣ်တၢ်အဂီၢ်,
တုၤဒၣ်လဲာ်ပှၤတဆိကတီၢ်လၢတၢ်မၤတၢ်အၢတၢ်သီနီတဂၤ လၢၤဘၣ်န့ၣ်လီၤ.
လၢယဂီၢ်န့ၣ်, အဝဲသ့ၣ်ခဲလၢာ်အၢဝဲသီဝဲ
ဒ်သိးဝ့ၢ်စဒိၣ်ဒီးဝ့ၢ်ဂမိရၤအပှၤဂီၢ်မုၢ်န့ၣ်လီၤ.
15 သတးဒီးတၢ်အံၤမ့ၢ်ယၤ, ယွၤသ့တၢ်လၢာ်, စံးတၢ်ဘၣ်ဃး ဝ့ၢ်ယရူၤၡလ့ၣ်အဝံတဖၣ်အဂ့ၢ်န့ၣ်လီၤ.
ယကဟ့ၣ်အဝဲသ့ၣ်တၢ်မုၢ်တၢ်ဘိအခၣ်တဖၣ်လၢကအီၣ် ဝဲဒီးစုၣ်လၢကအီဝဲအဂီၢ်န့ၣ်လီၤ.
အဂ့ၢ်ဒ်အံၤ, အဝဲသ့ၣ်ရၤလီၤတၢ်တယူးယီၣ်ယွၤလၢထံ ကီၢ်ဒီဘ့ၣ်ညါအဃိန့ၣ်လီၤ.”
16 ယွၤသ့တၢ်လၢာ်စံးဘၣ်ဝ့ၢ်ယရူၤၡလ့ၣ်အပှၤဂီၢ်မုၢ်, “ဒိကနၣ်တၢ်လၢဝံတဖၣ်စံးကတိၤဝဲန့ၣ်တဂ့ၤ. အဝဲသ့ၣ်မၤပှဲၤသုဒီးတၢ်မုၢ်လၢ်လၢအတတီဘၣ်တဖၣ်န့ၣ်လီၤ. အဝဲသ့ၣ်တဲဘၣ်သုတၢ်လၢအဆိကမိၣ်ထီၣ်ဒၣ်ဝဲ, ဒီးတမ့ၢ်ဘၣ်တၢ်လၢယစံးတ့ၢ်တဖၣ်န့ၣ်ဘၣ်.
17 လၢပှၤဂီၢ်မုၢ်လၢတဒိကနၣ်တၢ်လၢယစံးတ့ၢ်အဂီၢ်န့ၣ်, ဝံတဖၣ်န့ၣ် စံးဝဲတထံၣ်ဃီလၢတၢ်ခဲလၢာ်ကလဲၤအသးဂ့ၤဂ့ၤဘၣ်ဘၣ်လၢ အဝဲသ့ၣ်အဂီၢ်န့ၣ်လီၤ. ဒီးပှၤတဂၤလၢ်လၢ်လၢအခိၣ်ကိၤန့ၣ်, အဝဲသ့ၣ်တဲဘၣ်ဝဲလၢတၢ်တတၢးတနါတမၤဘၣ်ဒိဘၣ်ထံး အီၤနီတစုဘၣ်န့ၣ်လီၤ.”
18 ယစံးယဲ, “ဝံတဖၣ်အံၤတသ့ၣ်ညါယွၤအတၢ် ဆိကမိၣ်ခူသူၣ်တဖၣ်နီတဂၤနီတစုဘၣ်. အဝဲသ့ၣ်တနၢ်ဟူတ့ၢ်ဒီးနၢ်ပၢၢ်တ့ၢ်ယွၤအတၢ် ကစီၣ်မ့ၢ်ဂ့ၤ, ဒိကနၣ်ဝဲမ့ၢ်ဂ့ၤ, ပာ်သူၣ်ပာ်သးဝဲမ့ၢ်ဂ့ၤလၢ တၢ်လၢအဝဲကတိၤတ့ၢ်ဝဲနီတဂၤနီတစုဘၣ်.
19 အဝဲအတၢ်သးဒိၣ်မ့ၢ်ကလံၤမုၢ်, ကလံၤသဝံးလၢအအူတၢ်ဆူၣ်ဆူၣ် လၢပှၤအၢပှၤသီတဖၣ်အခိၣ်အဖီခိၣ်,
20 ဒီးတဆိကတီၢ်ဘၣ်အသးတုၤလီၤလၢတၢ်လၢအဝဲတိာ်လၢကမၤဝဲ တဖၣ်မၤဝံၤဘၣ်က့ၤဝဲခဲလၢာ်တစုန့ၣ်ဘၣ်. လၢမုၢ်နံၤလၢအကဟဲ တဖၣ်အပူၤန့ၣ်, အပှၤဂီၢ်မုၢ်ကနၢ်ပၢၢ်တၢ်အံၤဆှံဆှံန့ၣ်လီၤ.”
21 ယွၤစံးဝဲဒၣ်, “ယတမၢလီၤဝံသ့ၣ်တဖၣ်အံၤန့ၣ်ဘၣ်. ဘၣ်ဆၣ်ဒီး, အဝဲသ့ၣ်လဲၤဝဲလီၤ. ယတဟ့ၣ်လီၤအဝဲသ့ၣ်တၢ်ကစီၣ်နီတမံၤဘၣ်. ဘၣ်ဆၣ်ဒီးအဝဲသ့ၣ်ကတိၤဒံးတၢ်လၢယမံၤအပူၤန့ၣ်လီၤ.
22 အဝဲသ့ၣ်မ့ၢ်သ့ၣ်ညါတ့ၢ်ယတၢ်ဆိကမိၣ်ခူသူၣ်တဖၣ်ဒီး, အဝဲသ့ၣ်ကသ့စံးဘၣ်တဲဘၣ်ယတၢ်ကစီၣ်ဆူယပှၤဂီၢ်မုၢ်ဒီး ကသ့မၢအဝဲသ့ၣ်ညိကွံာ်တၢ်အိၣ်မူအအၢအသီလၢအဝဲသ့ၣ် အိၣ်မူဝဲဒီးတၢ်အၢတၢ်သီတဖၣ်လၢအဝဲသ့ၣ်မၤဝဲန့ၣ်လီၤ.
23 ယမ့ၢ်ကစၢ်ယွၤတဂၤလၢအအိၣ်လၢတၢ်လီၢ်ကိးပူၤဒဲးဒီးတအိၣ်ထဲ လၢတၢ်လီၢ်တတီၤဧိၤအပူၤန့ၣ်ဘၣ်.
24 ပှၤအိၣ်ခူသူၣ်လၢတၢ်လီၢ်ဖဲယထံၣ်အီၤတသ့, တအိၣ်နီတဂၤဘၣ်. မ့ၢ်သုတသ့ၣ်ညါဘၣ်လၢယအိၣ် လၢတၢ်လီၢ်ကိးပူၤဒဲးလၢမူခိၣ်ဒီးလၢဟီၣ်ခိၣ်န့ၣ်ဘၣ်ဧါ.
25 တၢ်လၢဝံတဖၣ်လၢအကတိၤလီတၢ်လၢယမံၤအပူၤစံးတ့ၢ်ဝဲန့ၣ်, ယသ့ၣ်ညါယဲလီၤ. အဝဲသ့ၣ်စံးဝဲလၢယဟ့ၣ်အီၤယတၢ်ကစီၣ် တဖၣ်လၢအတၢ်မံမီၢ်အပူၤန့ၣ်လီၤ.
26 ခီဖျိတၢ်လီတၢ်ဝ့ၤတဖၣ်လၢအဝဲသ့ၣ်ကူၣ်ကျဲၤတ့ၢ်ဝဲန့ၣ်, မ့ၢ်ဝံတဖၣ် အံၤကဆှၢကမၣ်ဒံးယပှၤဂီၢ်မုၢ်ဆံးယံာ်လဲၣ်.
27 အဝဲသ့ၣ်ဆိကမိၣ်ဝဲလၢတၢ်မံမီၢ်တဖၣ်လၢအဝဲသ့ၣ်တဲဝဲန့ၣ်, ကဒုးသးပ့ၤနီၣ်ကွံာ်ယပှၤဂီၢ်မုၢ်လၢယၤ, ဒ်အဝဲသ့ၣ်အပၢ်တဖၣ်သးပ့ၤ နီၣ်ကွံာ်ယၤဒီးဃၣ်ဃီၤအသးဆူ, ဘဧၤလးအအိၣ်အသိးန့ၣ်လီၤ.
28 ဝံတဂၤလၢအအိၣ်ဒီးတၢ်မံမီၢ်တမံၤန့ၣ်, ကြၢးစံးဝဲလၢတၢ်အံၤ မ့ၢ်ဒၣ်တၢ်မံမီၢ်ဧိၤန့ၣ်လီၤ. ဘၣ်ဆၣ်ဒီးဝံတဂၤလၢအနၢ်ဟူတ့ၢ် ယတၢ်ကစီၣ်န့ၣ်, ကြၢးစံးဘၣ်တဲဘၣ်တၢ်ကစီၣ်အဝဲန့ၣ်လၢတၢ်သးတီအပူၤန့ၣ်လီၤ. တၢ်ထိၣ်သတြီၤဘုလီၢ်ဒီးဘုကၠူၣ်န့ၣ်ကမၤဂ့ၤတၢ်မနုၤလဲၣ်.
29 ယတၢ်ကစီၣ်အံၤလီၤဂာ်ဒီးမ့ၣ်အူဒီးလီၤဂာ်ဒီးခံၣ်ခူၣ်လၢ အမၤသ့ၣ်ဖးမၤလီၤကလဲလၢၢ်ဧိၤလ့ဧိၤန့ၣ်လီၤ.
30 ယထီဒါဝံတဖၣ်န့ၣ်လၢအဟံးန့ၢ်တဂၤဒီးတဂၤအတၢ် ကတိၤဒီးဘိးဘၣ်သ့ၣ်ညါဝဲဒ်အမ့ၢ်ယတၢ်ကစီၣ်အသိးန့ၣ်လီၤ.
31 ယထီဒါစ့ၢ်ကီးဝံတဖၣ်န့ၣ်လၢအကတိၤအတၢ်ကတိၤဒၣ်ဝဲတဖၣ်ဒီး စံးဝဲလၢအဟဲလၢယအိၣ်န့ၣ်လီၤ.
32 ဒိကနၣ်တၢ်လၢယၤ, ယွၤအံၤ, စံးဝဲတက့ၢ်. ယထီဒါဝံတဖၣ်လၢအတဲအတၢ်မံမီၢ်တဖၣ်လၢ အပှဲၤဒီးတၢ်လီတၢ်ဝ့ၤတဖၣ်န့ၣ်လီၤ. အဝဲသ့ၣ်တဲတၢ်မံမီၢ်တဖၣ်အံၤဒီးဆှၢဟးဖျိးကွံာ်ယပှၤဂီၢ်မုၢ်ခီဖျိ အတၢ်လီတၢ်ဝ့ၤတဖၣ်ဒီးအတၢ်ပာ်ကဖၢလၢအသးန့ၣ်လီၤ. ယတမၢလီၤအဝဲသ့ၣ်မ့ၢ်ဂ့ၤ, ဒီးဟ့ၣ်လီၤယကလုၢ်လၢအဝဲသ့ၣ် ကလဲၤတၢ်အဂီၢ်မ့ၢ်ဂ့ၤန့ၣ်ဘၣ်. ဒီးအဝဲသ့ၣ်တကဲထီၣ်တၢ်မၤစၢၤ လၢယပှၤဂီၢ်မုၢ်အဂီၢ်နီတမံၤဘၣ်. ယၤ, ယွၤအံၤ, ကတိၤလံတၢ်လံ.”
33 ယွၤစံးဘၣ်ယၤ, “စီၤယံးရမံယၤဧၢ, ဖဲယပှၤဂီၢ်မုၢ်အကျါတဂၤမ့ၢ်ဂ့ၤ, ဝံတဂၤမ့ၢ်ဂ့ၤ, ပှၤလုၢ်တၢ်အခိၣ်တဂၤမ့ၢ်ဂ့ၤမ့ၢ်သံကွၢ်နၤ, ‘ယွၤအတၢ်ဝံတၢ်ယိးမ့ၢ်မနုၤလဲၣ်’ န့ၣ်, နဘၣ်တဲဘၣ်အီၤ, ‘နမ့ၢ်တၢ်ဝံတၢ်ယိးလၢယွၤ အဂီၢ်ဒီးအဝဲဒၣ်ကမၤဟးဂီၤကွံာ်နၤ’ န့ၣ်လီၤ.
34 ယပှၤဂီၢ်မုၢ်အကျါတဂၤမ့ၢ်ဂ့ၤ, ဝံတဂၤမ့ၢ်ဂ့ၤ, ပှၤလုၢ်တၢ်အခိၣ်တဂၤမ့ၢ်ဂ့ၤ, ‘မ့ၢ်သူဘၣ်တၢ်ကတိၤယွၤအတၢ်ဝံတၢ်ယိး’ န့ၣ်, ယကစံၣ်ညီၣ်အီၤဒီးအဒူၣ်ဖိထၢဖိန့ၣ်လီၤ.
35 လၢတၢ်န့ၣ်အလီၢ်, ပှၤတဂၤဒီးတဂၤကြၢးသံကွၢ်ဒၣ် အတံၤသကိးတဖၣ်ဒီးအဘူးအတံၢ်တဖၣ်လၢ, ‘ယွၤဟ့ၣ်တၢ်စံးဆၢမနုၤလဲၣ်. ယွၤစံးတ့ၢ်တၢ်မနုၤလဲၣ်’ န့ၣ်လီၤ.
36 လၢတၢ်န့ၣ်အဃိ, အဝဲသ့ၣ်တဘၣ်သူလၢၤဘၣ်တၢ်ကတိၤ, ယွၤအတၢ်ဝံတၢ်ယိးဘၣ်. အဂ့ၢ်မ့ၢ်လၢ, ပှၤမ့ၢ်သူအီၤတဂၤဂၤဒီး, ယကဒုးကဲထီၣ်ယတၢ်ကစီၣ်လၢတၢ်ဝံတၢ်ယိးနီၢ်နီၢ်လၢအဝဲ အဂီၢ်န့ၣ်လီၤ. ပှၤဂီၢ်မုၢ်ဘိးကဒါကွံာ်အကစၢ်ယွၤ, ကစၢ်ယွၤလၢအမူဝဲ, ယွၤသ့တၢ်လၢာ်အတၢ်ကတိၤန့ၣ်လံ.
37 စီၤယံးရမံယၤဧၢ, သံကွၢ်ဝံတဖၣ်, ယွၤဟ့ၣ်တ့ၢ်သုတၢ်စံးဆၢမနုၤလဲၣ်. ယွၤစံးတ့ၢ်တၢ်မနုၤလဲၣ်.
38 ဒီးအဝဲသ့ၣ်မ့ၢ်တစူၢ်ယတၢ်မၤလိာ်ဒီးသူတၢ်ကတိၤ, ယွၤအတၢ်ဝံတၢ်ယိးန့ၣ်, တဲဘၣ်အဝဲသ့ၣ်လၢ,
39 ယကဟံးထီၣ်ကွံာ်အဝဲသ့ၣ်သပှၢ်ကတၢၢ်ဒီးကွံာ်ယံၤကွံာ်အဝဲသ့ၣ် ဒီးယၤ, အဝဲသ့ၣ်ဒီးဝ့ၢ်လၢယဟ့ၣ်လီၤတ့ၢ်အဝဲသ့ၣ် ဒီးအမိၢ်ပၢ်ဖံဖုလၢပျၢၤတဖၣ်န့ၣ်လီၤ.
40 ယကဒုးလီၤဘၣ်တၢ်မဲာ်ဆှးလၢအဝဲသ့ၣ်အလိၤလီၤစိၤလီၤထီ, ဒီးတၢ်မဲာ်ဆှးလၢတၢ်တသးပ့ၤနီၣ်အီၤနီတစုဘၣ်န့ၣ်လီၤ.”