22
1 ယွၤတဲဘၣ်ယၤလၢယကလဲၤဆူစီၤဒၤဝံးအစၢၤအသွဲၣ်, ကီၢ်ယူဒၤအစီၤပၤ, အနူၢ်အစီၤန့ၣ်လီၤ.
2 ဒီးဖဲန့ၣ်မၢယတဲဘၣ်စီၤပၤ, အပဒိၣ်ပပှၢ်တဖၣ်, ဒီးဝ့ၢ်ယရူၤၡလ့ၣ် အပှၤဂီၢ်မုၢ်လၢကဒိကနၣ်တၢ်လၢယွၤစံးတ့ၢ်ဝဲန့ၣ်လီၤ.
3 “ယၤ, ယွၤအံၤ, ယမၤလိာ်သုဒ်သိးသုကမၤတၢ်စံၣ်ညီၣ်တီဒီးတၢ် အဘၣ်န့ၣ်လီၤ. အိၣ်ပှိၤမၤစၢၤပှၤတဂၤလၢအဘၣ်တၢ်လီ န့ၢ်အီၤ, လၢပှၤတဂၤလၢအလီန့ၢ်အီၤအစုပူၤတက့ၢ်. မၤအၢမၤသီမ့ၢ်ဂ့ၤမၤနးမၤဖှီၣ်ပှၤတခီဘီမုၢ်ဖိတဖၣ်, ပှၤဖိၣ်ဃဲတဖၣ်မ့တမ့ၢ်ပှၤမုၣ်ကမဲတဖၣ်တဂ့ၤ. ဒီးမၤသံပှၤလၢအတၢ်ကမၣ်တအိၣ်တဖၣ် လၢတၢ်လီၢ်စီဆှံအံၤအပူၤန့ၣ်တဂ့ၤ.
4 သုမ့ၢ်မၤဒ်ယမၤလိာ်တ့ၢ်သုနီၢ်နီၢ်ဒီး, စီၤဒၤဝံးအစၢၤ အသွဲၣ်တဖၣ်ကမ့ၢ်ဒံးဒၣ်စီၤပၤတဖၣ်ဆူညါပှီၢ်ပှီၢ်န့ၣ်လီၤ. ဒီးအဝဲသ့ၣ်, ဃုာ်ဒီးအပဒိၣ်ပပှၢ်တဖၣ်ဒီးအပှၤဂီၢ် မုၢ်တဖၣ်ကနုာ်က့ၤဟးထီၣ်ဒံးဒၣ်လၢနူၢ်ဧိၤစီၤဧိၤအံၤအတြဲၤ တဖၣ်လၢလ့ၣ်ကဟၣ်တဖၣ်အပူၤဒီးလၢကသ့ၣ်တဖၣ်အဖီခိၣ်န့ၣ်လီၤ.
5 ဘၣ်ဆၣ်ဒီးသုမ့ၢ်တစူၢ်ယတၢ်မၤလိာ်တဖၣ်ဘၣ်ဒီး, ယဆိၣ်တၢ်ဒီးသုလၢနူၢ်ဧိၤစီၤဧိၤအံၤကလီၤပှီၢ် ဟးဂီၤကွံာ်ဝဲန့ၣ်လီၤ. ယၤ, ယွၤအံၤ, ကတိၤလံတၢ်လံ.
6 လၢယဂီၢ်န့ၣ်, ကီၢ်ယူဒၤအစီၤပၤအနူၢ်ဧိၤစီၤဧိၤအံၤ ဃံဝဲလၤဝဲဒ်ကီၢ်ကံးလဧးဒီးဒ်လဘၤနိၣ်အကစၢၢ်ကလိတဖၣ် အသိးန့ၣ်လီၤ. ဘၣ်ဆၣ်ဒီးယကဒုးကဲထီၣ်အီၤလၢတၢ်လီၢ် အိၣ်သယုၢ်သညိတတီၤဖဲပှၤတအိၣ်တဆိးဝဲနီတဂၤဘၣ်န့ၣ်လီၤ.
7 ယဆှၢလီၤပှၤကညီတဖၣ်လၢကမၤဟးဂီၤကွံာ်အီၤန့ၣ်လီၤ. အဝဲသ့ၣ်ခဲလၢာ်ကဟဲစိာ်အကွါတဖၣ်, ကကူာ်လီၤကွံာ်အသ့ၣ်ဆှိ အ့ရ့းအထူၣ်အဃံအလၤတဖၣ်, ဒီးကွံာ်လီၤကွံာ်အီၤဆူမ့ၣ်အူ အပူၤန့ၣ်လီၤ.
8 တၢ်န့ၣ်အလီၢ်ခံ, ပှၤတခီဘီမုၢ်ဖိအါဂၤကလဲၤခီဂာ်တၢ်ဒီး သံကွၢ်လိာ်သးတဂၤဒီးတဂၤ, ဘၣ်မနုၤအဃိလၢယၤ, ယွၤအံၤ, ယမၤဘၣ်တ့ၢ်ဝ့ၢ်ဖးဒိၣ်အံၤလၢတၢ်ဒ်သိးအံၤတမံၤလဲၣ်န့ၣ်လီၤ.
9 အန့ၣ်ဒီး, အဝဲသ့ၣ်ကစံးဆၢဝဲဒၣ်လၢ, တၢ်အံၤမ့ၢ်လၢနၤလဲၤ သဒၣ်ကွံာ်နတၢ်အၢၣ်လီၤအီလီၤဒီးယၤ, နကစၢ်ယွၤဒီးဘူၣ်ထီၣ်ဘါထီၣ်ဒီးမၤကစၢ်အဂၤတဖၣ်အတၢ် အဃိန့ၣ်လီၤ.”
10 ကီၢ်ယူဒၤအပှၤဂီၢ်မုၢ်သ့ၣ်ဧၢ, ဟီၣ်တၢ်ယၢၤတၢ်လၢစီၤပၤ စီၤယိၤၡံယၤအဂီၢ်တဂ့ၤ.
သူၣ်အုးသးအုးလၢအဝဲအတၢ်သံအဃိန့ၣ်တဂ့ၤ.
မ့မ့ၢ်တခီ, ဟီၣ်နးနးကလဲာ်လၢအဝဲအဖိခွါ စီၤယဟိအါဃးအဃိန့ၣ်တက့ၢ်. အဝဲသ့ၣ်က့ၤစိာ်ကွံာ်အီၤလံ.
တဟဲက့ၤနီတဘျီလၢၤဘၣ်ဒီးတထံၣ်ဘၣ်လၢၤထံကီၢ်လၢအဝဲ အိၣ်ဖျဲၣ်ထီၣ်ဝဲန့ၣ်နီတစုလၢၤဘၣ်.
11 ယွၤစံးတၢ်ဘၣ်ဃးဒီးစီၤယိၤၡံယၤအဖိခွါစီၤယဟိအါဃးလၢ အထီၣ်က့ၤအပၢ်အလီၢ်ဒ်ကီၢ်ယူဒၤအစီၤပၤအသိးအဂ့ၢ်ဒ်အံၤ, “အဝဲဟးထီၣ်လၢတၢ်လီၢ်ဖဲအံၤဒီးတဟဲက့ၤကဒါက့ၤနီတစုလၢၤဘၣ်.
12 အဝဲဒၣ်ကသံလၢထံကီၢ်လၢပှၤလဲၤစိာ်ကွံာ်အီၤအပူၤ, ဒီးအဝဲဒၣ်တထံၣ်ဘၣ်ကဒီးထံကီၢ်အံၤနီတစုလၢၤဘၣ်.”
13 ပှၤတဂၤလၢအသူၣ်ထီၣ်အဟံၣ်လၢတၢ်စံၣ်ညီၣ်တတီဘၣ်အပူၤ,
ဒီးမၤလဲၢ်ထီၣ်အီၤလၢတၢ်တတီတလိၤအပူၤ,
ပှၤတဂၤလၢအမၢအထံဖိကီၢ်ဖိမၤတၢ်
ဒီးတဟ့ၣ်ဘူးဟ့ၣ်လဲဝဲဘၣ်န့ၣ်, ကဘၣ်တၢ်စံၣ်ညီၣ်ဃါမနၤလီၤ.
14 ပှၤတဂၤလၢအစံးဝဲ,
“ယကသူၣ်ထီၣ်ဟံၣ်ဒိၣ်ကျိၤသွါတဖျၢၣ်လၢယဂီၢ်ဒၣ်ယဲ
အိၣ်ဒီးဒၢးဖးလဲၢ်တဖၣ်လၢအဖီခိၣ်တကထၢန့ၣ်လီၤ.
ဝံၤဒီးအဝဲဒၣ်မၤထီၣ်ပဲတြီဖိတဖၣ်လၢအဟံၣ်အပူၤ,
မၤထီၣ်ဂီၤပၤတဖၣ်လၢသ့ၣ်ဆှိအ့ရ့း
ဒီးဖှူအီၤလၢကသံၣ်အဂီၤန့ၣ်လီၤ. ပှၤတဂၤအံၤဘၣ်တၢ်စံၣ်ညီၣ်ဃါမနၤန့ၣ်လီၤ.
15 နမ့ၢ်သူၣ်ထီၣ်ဟံၣ်တဖၣ်လၢသ့ၣ်ဆှိအ့ရ့းလၢအဂ့ၤန့ၢ်ဒံးပှၤအဂၤ အဟံၣ်တဖၣ်ဒီး, တၢ်န့ၣ်ကဒုးကဲထီၣ်နၤလၢစီၤပၤအဂ့ၤအါဒိၣ်တဂၤဧါ.
နပၢ်မုာ်လၤသးခုလၢတၢ်အိၣ်မူအလၢအပှဲၤလီၤ. ထီဘိတထံၣ်ဃီန့ၣ်,
အဝဲစံၣ်ညီၣ်တီတၢ်ဒီးတကွၢ်မဲာ်တၢ်ဘၣ်.
ဒီးအဝဲဘီၣ်ထီၣ်ညီထီၣ်တ့ၢ်လၢတၢ်ကိးမံၤဒဲးလၢအဝဲမၤတ့ၢ်ဝဲအပူၤန့ၣ်လီၤ.
16 အဝဲစံၣ်ညီၣ်န့ၢ်ပှၤဖှီၣ်ဖိယာ်ဖိတဖၣ်အကွီၢ်တီတီလိၤလိၤ
ဒီးတၢ်ခဲလၢာ်လဲၤအသးဂ့ၤဂ့ၤဘၣ်ဘၣ်လၢအဂီၢ်လီၤ.
တၢ်န့ၣ်အခီပညီမ့ၢ်တၢ်သ့ၣ်ညါယွၤန့ၣ်လီၤ.
17 မ့မ့ၢ်နဲနထံၣ်သ့ဒၣ်ထဲနတၢ်သး စဲတဖၣ်လၢနတၢ်အဲၣ်လီၤနသးအပူၤန့ၣ်လီၤ.
နမၤသံပှၤလၢအတၢ်ကမၣ်တအိၣ်တဖၣ်
ဒီးမၤနးမၤဖှီၣ်ဆူၣ်နပှၤဂီၢ်မုၢ်န့ၣ်လီၤ.
ယွၤကတိၤလံတၢ်လံ.”
18 လၢတၢ်န့ၣ်အဃိ, ယွၤကတိၤတၢ်ဘၣ်ဃးစီၤယိၤၡံယၤအဖိခွါ, ကီၢ်ယူဒၤအစီၤပၤစီၤယဟိၤယါကံၣ်အဂ့ၢ်ဒီးစံးဝဲ,
“ပှၤတသူၣ်အုးသးအုးလၢအဝဲ အတၢ်သံအဃိဒီးစံး, တၢ်နးဒိၣ်မးလဲၣ်
ယတံၤသကိးဧၢ, တၢ်နးဒိၣ်မးလဲၣ်, နီတဂၤဘၣ်. ပှၤတဟီၣ်တယၢၤလၢအဃိဒီးကိးထီၣ်,
ယကစၢ်ဧၢ, ယစီၤပၤဧၢ, နီတဂၤဘၣ်.
19 အဝဲကအိၣ်ဒီးတၢ်ခူၣ်လီၤအီၤအလၤကပီၤထဲသိးဒၣ်ကသ့ၣ်ယီၤ တဒုန့ၣ်လီၤ.
အဝဲကဘၣ်တၢ်တွံၢ်ထုးထီၣ်အီၤ
ဒီးကွံာ်ကွံာ်အီၤလၢဝ့ၢ်ယရူၤၡလ့ၣ်အတြဲၤတဖၣ်အချၢန့ၣ်လီၤ.”
20 ဝ့ၢ်ယရူၤၡလ့ၣ်အပှၤဂီၢ်မုၢ်သ့ၣ်ဧၢ, လဲၤဆူကီၢ်လဘၤနိၣ်ဒီး ကိးသတြီထီၣ်,
လဲၤဆူကီၢ်ဘၤၡၣ်ဒီးကိးထီၣ်တက့ၢ်.
ကိးပသူထီၣ်လၢကီၢ်မိၤအးအကစၢၢ်တဖၣ်တက့ၢ်.
အဂ့ၢ်ဒ်အံၤ, နသိၣ်နမှံၤခဲလၢာ်ဘၣ်တၢ်မၤနၢၤမၤဃၣ်ကွံာ်အီၤလံ.
21 ယွၤကတိၤတၢ်ဒီးနၤဖဲနဘီၣ်ထီၣ်ညီထီၣ်အခါ,
ဘၣ်ဆၣ်နတဒိကနၣ်ဘၣ်.
တၢ်န့ၣ်မ့ၢ်တၢ်လၢနမၤတ့ၢ်အီၤလၢနသးသမူဒီကတီၢ်ညါလီၤ. နတစူၢ်ဘၣ်ယွၤနီတစုဘၣ်.
22 နပှၤခိၣ်ပှၤနၢ်တဖၣ်ကဘၣ်တၢ်အူဒံဖျိးကွံာ်အီၤ လၢကလံၤ,
နသိၣ်နမှံၤတဖၣ်ကဘၣ်တၢ်မၤန့ၢ်အီၤဒီးစိာ်ကွံာ်အီၤ ဒ်တၢ်ဒုးတၢ်ယၤအကုၢ်အပှၤတဖၣ်,
နဝ့ၢ်ကဘၣ်တၢ်မၤမဲာ်ဆှးအီၤဒီးကဲထီၣ် တၢ်မဲာ်ဆှးအလီၢ်,
မ့ၢ်လၢကယဲၢ်တၢ်အၢတၢ်သီခဲလၢာ် လၢနမၤတ့ၢ်တဖၣ်အဃိန့ၣ်လီၤ.
23 နအိၣ်ဂၢၢ်ဆိးကျၢၤလၢသ့ၣ်ဆှိအ့ရ့းတဖၣ်လၢအဘၣ်တၢ်ဟဲက့ၤ စိာ်လၢကီၢ်လဘၤနိၣ်အကျါန့ၣ်လီၤ.
ဘၣ်ဆၣ်ဒီး, တၢ်မၤဆူးမၤဆါလၢ
အလီၤဂာ်ဒ်ပိာ်မုၣ်တဂၤအဟုးဆါထီၣ်အသိး, မ့ၢ်ဟဲ မၤဘၣ်ဒိဘၣ်ထံးနၤဒီး, နကလီၤသးကညီၤဆံးအါလဲၣ်.
24 ယွၤစံးဘၣ်ကီၢ်ယူဒၤအစီၤပၤစီၤယဟိယါကံၣ်အဖိခွါ စီၤယဟိယါခံၣ်, “ဒ်ယမ့ၢ်နီၢ်နီၢ်ကစၢ်ယွၤလၢအမူဝဲတဂၤအသိး, နမ့မ့ၢ်ဒၣ်လဲာ်တၢ်စဲပနီၣ်အပသံးတဘိလၢယစုထွဲအလိၤန့ၣ်, ယကဘ့ၣ်လီၤကွံာ်နၤ,
25 ဒီးဟ့ၣ်လီၤနၤဆူပှၤဂီၢ်မုၢ်လၢနပျံၤအီၤ, ပှၤဂီၢ်မုၢ်လၢအသးအိၣ် မၤသံနၤအစုပူၤန့ၣ်လီၤ. ယကဟ့ၣ်လီၤနၤဆူကီၢ်ဘၤဘူၤလိၣ် အစီၤပၤနဘူၤကးန့စၢ်ဒီးအသုးမုၢ်သံၣ်ဘိတဖၣ်အစုပူၤန့ၣ်လီၤ.
26 ယကဟီထီၣ်ဆူၣ်ကွံာ်နၤဒီးနမိၢ်ဆူတၢ်စိာ်မၢကဲကုၢ်အပူၤလီၤ. နကလဲၤဆူထံကီၢ်တဘ့ၣ်လၢနၤမ့ၢ်ဂ့ၤ, နမိၢ်မ့ၢ်ဂ့ၤတအိၣ်ဖျဲၣ်ထီၣ်ဘၣ်လၢအပူၤ, ဒီးသုဝဲခံဂၤလိာ်သုကသံဖဲန့ၣ်လီၤ.
27 သုကဆၢထံၣ်ဘၣ်က့ၤကဒီးထံကီၢ်အံၤတဘျီ, ဘၣ်ဆၣ်ဒီးသု တဟဲက့ၤဘၣ်နီတစုလၢၤဘၣ်.”
28 ယစံးယဲ, “မ့ၢ်စီၤပၤယဟိၤယါခံၣ်ကဲထီၣ်ဒ်သပၢၤသ့ၣ်ဖး တဖျၢၣ်အသိးလၢအဘၣ်တၢ်စူးကွံာ်အီၤဒီးပှၤတသးလီအီၤ နီတဂၤဘၣ်န့ၣ်ဧါ. လၢတၢ်န့ၣ်အဃိ, မ့ၢ်အဝဲဒီးအဖိတဖၣ်ဘၣ်တၢ်စိာ်ကွံာ်အီၤဆူတၢ်မၢကဲကုၢ်အလီၢ်, တၢ်လီၢ်လၢအဝဲသ့ၣ်တသ့ၣ်ညါဝဲလၢအဂ့ၢ်နီတမံၤန့ၣ်ဧါ.”
29 အိဟီၣ်ခိၣ်ဧၢ, ဟီၣ်ခိၣ်ဧၢ,
ဒိကနၣ်တၢ်လၢယွၤစံးတ့ၢ်ဝဲန့ၣ်တက့ၢ်.
30 “ပှၤတဂၤအံၤဘၣ်တၢ်စံၣ်ညီၣ်ဃၣ်အီၤလၢကမ့ၢ်ပှၤတူာ်ဖိ,
ဒီးတကဲထီၣ်ပှၤတဂၤလၢကမၤန့ၢ်မၤနၢၤတၢ် နီတစုဘၣ်လီၤ.
အဝဲအစၢၤအသွဲၣ်တဖၣ်လၢကပၢဘၣ်တၢ်လၢ ကီၢ်ယူဒၤအပူၤ
ဒ်ပှၤထီၣ်က့ၤစီၤဒၤဝံးအလီၢ်ပစိာ်တအိၣ်နီတဂၤဘၣ်.
ယွၤအံၤ, ကတိၤလံတၢ်လံ.”