လံာ်ယိၤနါ
JONAH
လံာ်ယိၤနါမ့ၢ်လံာ်တဘ့ၣ်လၢအတလီၤ ဂာ်ဘၣ်ဒီးလံာ်ဝံအတၢ်ကွဲးအဂၤတဖၣ်လၢလံာ်စီဆှံအပူၤန့ၣ်ဘၣ်. လၢလံာ်အံၤအပူၤအိၣ်ဒီးတၢ်စံၣ်ဃဲၤတၢ်လၢ အဘၣ်တၢ်ကွဲးဖျါထီၣ်တၢ်လဲၤခီဖျိဘၣ်ဃးဝံတဂၤလၢအတဒိ ကနၣ်ကစၢ်ယွၤအတၢ်မၤလိာ်အဂ့ၢ်န့ၣ်လီၤ. ကစၢ်ယွၤတဲအီၤလၢကလဲၤဆူဝ့ၢ်နံၤနဝ့လၢ အမ့ၢ်ပှၤအံၣ်စရ့လးဖိအဒုၣ်အဒါအလီၤပျံၤကတၢၢ်, ပှၤစူၤရံဖိအဘီအမုၢ်အဝ့ၢ်ခိၣ်န့ၣ်လီၤ. ဘၣ်ဆၣ်စီၤယိၤနါတအဲၣ်ဒိးလဲၤဝဲဖဲန့ၣ်ဃုာ်ဒီးကစၢ်ယွၤအတၢ်ကစီၣ်ဘၣ်. မ့ၢ်လၢအဝဲနာ်ဝဲလၢကစၢ်ယွၤတမ့ၢ်ကမၤလၢထီၣ်ပှဲၤထီၣ်အတၢ်မၤ ပျံၤမၤဖုးလၢအကမၤဟးဂီၤကွံာ်ဝ့ၢ်န့ၣ်ဘၣ်အဃိလီၤ. တၢ်မၤအသးလီၤဆီတဖၣ်မၤအသးတမံၤဘၣ်တမံၤဝံၤအလီၢ်ခံ, အဝဲဒိကနၣ်က့ၤဝဲလၢတၢ်သူၣ်တဆူၣ်သးတဆူၣ်ဘၣ်အပူၤ, ဒီးလၢခံကတၢၢ်အဝဲပာ်အသးတမဲးကဒဲးဖဲအတၢ်ကစီၣ် လၢတၢ်ဟးဂူာ်ဟးဂီၤအဂ့ၢ်တကဲထီၣ်လိၣ်ထီၣ်ဘၣ်ဝဲအဃိန့ၣ်လီၤ.
လံာ်အံၤပာ်ဖျါထီၣ်ဝဲကစၢ်ယွၤအတၢ်စိတၢ်ကမီၤလၢာ်လၢာ်ဆ့ဆ့ လၢအတၢ်ဘၣ်တ့အဖီခိၣ်န့ၣ်လီၤ. ဘၣ်ဆၣ်လၢတၢ်ခဲလၢာ်အဖီခိၣ်လံာ်အံၤပာ်ဖျါထီၣ်ဝဲကစၢ်ယွၤ ဒ်အမ့ၢ်ကစၢ်ယွၤလၢအအိၣ်ဒီးတၢ်အဲၣ်တၢ်သးကညီၤတဂၤအသိး, ဒီးမ့ၢ်ယွၤလၢအကပျၢ်အတၢ်ကမၣ်ဒီးအုၣ်က့ၤခီၣ်က့ၤတၢ်ဒိၣ် န့ၢ်စံၣ်ညီၣ်တၢ်ဒီးမၤဟးဂီၤကွံာ်အပှၤက လုာ်အဒုၣ်အဒါတဖၣ်ဒၣ်လဲာ်န့ၣ်လီၤ.
1
1 ဘၣ်တနံၤယွၤကတိၤတၢ်ဒီးစီၤအမံးတဲၤအဖိခွါစီၤယိၤနါဒီးစံးဝဲ,
2 “လဲၤဆူဝ့ၢ်နံၤနဝ့လၢအမ့ၢ်ဝ့ၢ်ဖးဒိၣ်တဖျၢၣ်န့ၣ်ခဲအံၤ, ဒီးကတိၤတၢ်ထီဒါအီၤတက့ၢ်. အတၢ်အၢတၢ်သီန့ၣ်ထီၣ်ဘးလံလၢယမဲာ်ညါလံန့ၣ်လီၤ.”
3 ဘၣ်ဆၣ်ဒီးစီၤယိၤနါလဲၤဆူဝ့ၢ် တၢ်ၡံၣ်ဒ်သိးကဃ့ၢ်ပူၤဖျဲးအသးလၢယွၤအမဲာ်ညါအဂီၢ်န့ၣ်လီၤ. အဝဲလဲၤလီၤဆူဝ့ၢ်ယၤဖိၤဒီးထံၣ်န့ၢ်ကဘီလၢကလဲၤဆူ ဝ့ၢ်တၢ်ၡံၣ်, ဒီးဟ့ၣ်အဘူးအလဲ, ဒီးလဲၤနုာ်ဆူကဘီပူၤလၢ ကလဲၤသကိးတၢ်ဒီးပှၤကဘီဖိတဖၣ်ဆူဝ့ၢ်တၢ်ၡံၣ်ဒ်သိး ကယံၤဒီးယွၤအဂီၢ်န့ၣ်လီၤ.
4 ဘၣ်ဆၣ်ဒီးယွၤဒုးလီၤကလံၤမုၢ်ဖးဒိၣ်လၢပီၣ်လဲၣ်ပူၤ, ဒီးကလံၤမုၢ်အံၤဆူၣ်ဒိၣ်မးတုၤဒၣ်လဲာ်ကဘီဘူးကဟးဂီၤန့ၣ်လီၤ.
5 တုၤနုၤတစုပှၤကဘီဖိတဖၣ်ပျံၤတၢ်ဒီးကိးပသူထီၣ်ဝဲတဂၤဆူ အကစၢ်ဒၣ်ဝဲ, တဂၤဆူအကစၢ်ဒၣ်ဝဲအအိၣ်န့ၣ်လီၤ. အဝဲသ့ၣ်တ့ၢ်လီၤကွံာ်တၢ်ဖိတၢ်လံၤလၢအအိၣ်လၢက ဘီပူၤဆူပီၣ်လဲၣ်ပူၤဒ်သိးကမၤဖှံထီၣ်ကဘီအဂီၢ်န့ၣ်လီၤ. အကတီၢ်ဖဲန့ၣ်, စီၤယိၤနါလဲၤနုာ်မံနီၤတ့ၢ်လံလၢကဘီ အဒၢးပူၤဒီးမံဘၣ်အသးလံန့ၣ်လီၤ.
6 ပှၤကဘီဖိအခိၣ်ဟဲဆူအအိၣ်ဒီးစံးဘၣ်အီၤ, “ဘၣ်မနုၤလၢနမံန့ၣ်လဲၣ်. ဂဲၤဆၢထၢၣ်ဒီးကိးထီၣ်နကစၢ်န့ၣ်တက့ၢ်. ဘၣ်တဘၣ်အဝဲကသ့ၣ်နီၣ်ပှၤဒ်သိးပသုတဟးဂီၤတဂ့ၤအဂီၢ်န့ၣ်လီၤ.”
7 ပှၤကဘီဖိတဖၣ်စံးကတိၤသကိးလိာ်အသး, “ဟဲ, မ်ပကထုးတၢ်ဖးဒ်သိးပကသ့ၣ်ညါတၢ်မၤအသးဒီးပှၤဒ် အံၤမ့ၢ်လၢမတၤအဃိလဲၣ်န့ၣ်တက့ၢ်.” လၢတၢ်န့ၣ် အဃိအဝဲသ့ၣ်ထုးတၢ်ဖး, ဒီးတၢ်ဖးလီၤဘၣ်လၢစီၤယိၤနါအလိၤန့ၣ်လီၤ.
8 ဒီးအဝဲသ့ၣ်စံးဘၣ်အီၤ, “တဲပှၤ, တၢ်အၢအံၤလီၤဘၣ်ပှၤလၢမတၤအဃိန့ၣ်လဲၣ်. နမ့ၢ်ပှၤမၤတၢ်မနုၤလဲၣ်. နဟဲလၢထံကီၢ်ဖဲလဲၣ်. ဒီးနမ့ၢ်ပှၤကလုာ်မနုၤန့ၣ်လဲၣ်.”
9 စီၤယိၤနါစံးဆၢဝဲ, “ယမ့ၢ်ပှၤဧ့ၤဘြံၤဖိလီၤ. ယဘူၣ်ထီၣ်ဘါထီၣ်ယွၤ, မူခိၣ်အကစၢ်ယွၤလၢအတ့လီၤပီၣ်လဲၣ်ဒီးခိန့ၣ်လီၤ.”
10 ဒီးပှၤတဖၣ်န့ၣ်ပျံၤတၢ်ဒိၣ်ထီၣ်ဝဲဒီးစံးဘၣ်အီၤ, “နမၤတၢ်အံၤမ့ၢ်မနုၤတမံၤန့ၣ်လဲၣ်.” အဂ့ၢ်ဒ်အံၤပှၤတဖၣ်န့ၣ်သ့ၣ်ညါဝဲလၢ အဝဲဃ့ၢ်ပူၤဖျဲးအသးလၢယွၤအမဲာ်ညါအဂ့ၢ်မ့ၢ်လၢအစံးဘၣ်တ့ၢ်လံ အဝဲသ့ၣ်အဃိန့ၣ်လီၤ.
11 ဒီးအဝဲသ့ၣ်စံးဘၣ်အီၤ, “ဒ်သိးပီၣ်လဲၣ်ကအိၣ်က့ၤဂၢၢ်တပၢၢ် လၢပဂီၢ်န့ၣ်မ့ၢ်ပကဘၣ်မၤနၤဒ်လဲၣ်.” အဂ့ၢ်ဒ်အံၤ, ပီၣ်လဲၣ်လပီစံၣ်စုးဝဲဒိၣ်ထီၣ်, ဒိၣ်ထီၣ်အဃိန့ၣ်လီၤ.
12 ဒီးအဝဲစံးဘၣ်ပှၤတဖၣ်န့ၣ်, “ဟံးထီၣ်ယၤဒီးတ့ၢ်လီၤကွံာ်ယၤဆူပီၣ်လဲၣ်ပူၤတက့ၢ်. ဒီးပီၣ်လဲၣ်ကအိၣ်ဂၢၢ်တပၢၢ်လၢသုဂီၢ်လီၤ. အဂ့ၢ်ဒ်အံၤ, ယသ့ၣ်ညါလၢကလံၤမုၢ်ဖးဒိၣ်အံၤဘၣ်သုလၢယတၢ်ကမၣ်အဃိန့ၣ် လီၤ.”
13 ဘၣ်ဆၣ်ဒီးပှၤကဘီဖိတဖၣ်န့ၣ်ကၢၢ်တၢ်ဆူၣ်ဆူၣ် ကလဲာ်ဒ်သိးကတုၤဆူထံကၢၢ်နံၤန့ၣ်, သနာ်က့, မ့ၢ်လၢပီၣ်လဲၣ်လပီစံၣ်စုးဒီးကလံၤမုၢ်တွၤအိၣ်ထီဒါ အဝဲသ့ၣ်အဃိမၤဝဲတန့ၢ်ဘၣ်.
14 တုၤနုၤတစု, အဝဲသ့ၣ်ကိးထီၣ်ယွၤ, “ယွၤဧၢ, ပဃ့ကညးနၤ, မ်ပသုတတုၤလၢတၢ်ဟးဂီၤလၢပှၤတဂၤအံၤအသးသမူအဃိန့ၣ် တဂ့ၤ. ဒီးပာ်တၢ်သွံၣ်လၢတၢ်ဒဲးဘးတအိၣ်ဘၣ်န့ၣ်လၢပလိၤတဂ့ၤ. အဂ့ၢ်ဒ်အံၤ, နဲဒၣ်ယွၤဧၢ, နမၤတၢ်လၢအဘၣ်နသးလီၤ.”
15 အန့ၣ်ဒီးအဝဲသ့ၣ်ဟံးထီၣ်စီၤယိၤနါ, ဒီးတ့ၢ်လီၤကွံာ်အီၤဆူ ပီၣ်လဲၣ်ပူၤဒီးပီၣ်လဲၣ်အိၣ်ဂၢၢ်က့ၤတကီၢ်ခါန့ၣ်လီၤ.
16 တၢ်အံၤမၤပျံၤပှၤကဘီဖိတဖၣ်လၢယွၤဒိၣ်ဒိၣ်ကလဲာ်တုၤအဝဲ သ့ၣ်မၤတၢ်လုၢ်ဒီးအၢၣ်လီၤအသးလၢကမၤယွၤအတၢ်န့ၣ်လီၤ.
17 ဒီးယွၤမၤလိာ်ညၣ်ဖးဒိၣ်တဘ့ၣ်လၢကယူၢ်လီၤကွံာ်စီၤ ယိၤနါလီၤ. ဒီးစီၤယိၤနါအိၣ်ဝဲလၢညၣ်ဖးဒိၣ်အဟၢဖၢပူၤ န့ၣ်သၢနံၤဒီးသၢနၤလီၤ.