2
1 တုၤနုၤတစု, စီၤယိၤနါဃ့ဘါထုကဖၣ်တၢ်ဆူယွၤ, အကစၢ်ယွၤအအိၣ်လၢညၣ်အဟၢဖၢအပူၤ,
2 စံးဝဲဒၣ်, “လၢယဘၣ်တၢ်နးတၢ်ဖှီၣ်န့ၣ်ယကိးထီၣ်နၤ, ဒီးနစံးဆၢယၤလီၤ.
ယကိးထီၣ်လၢတၢ်သံအတၢ်ယိာ်ပူၤဒီးနနၢ်ဟူ ယကလုၢ်လီၤ.
3 နတ့ၢ်လီၤကွံာ်ယၤဆူထံယိာ်ပူၤ, ဆူပီၣ်လဲၣ်အသးကံၢ်ပူၤ,
ဒီးထံတဖၣ်အိၣ်ဝးတရံးယၤ,
ကယဲၢ်နလပီဒီးနလၢဖးဒိၣ်တဖၣ်လဲၤခီယၤန့ၣ်လီၤ.
4 အန့ၣ်တစုယစံး, ယဘၣ်တၢ်ဟီထီၣ်ကွံာ်ယၤလၢနမဲာ်ညါ,
ယကထံၣ်ဘၣ်ကဒီးနတၢ်လုၢ်ဟံၣ်စီဆှံဒ်လဲၣ်.
5 ထံလုၣ်ဘၢယၤဒီးတၢ်ယိာ်ပူၤအိၣ်ဝးတရံးယၤလီၤ.
ပီၣ်လဲၣ်လုၣ်ဘၢယၤလၢာ်လၢာ်ဆ့ဆ့လီၤ.
ဆှဲတဖၣ်စၢဘိၣ်ဃာ်အသးဝးတရံးယခိၣ်န့ၣ်လီၤ.
6 ယလဲၤလီၤဆူကစၢၢ်ဂံၢ်ထံး
ကီၢ်လၢတြဲၤကးတံာ်ဃာ်အသးအစိၤစိၤ အဃၣ်ဃၣ်န့ၣ်လီၤ.
ဘၣ်ဆၣ်နဲဒၣ်ယွၤယကစၢ်ဧၢ,
နထုးထီၣ်ကွံာ်ယၤလၢတၢ်ယိာ်ပူၤဒီးမၤမူထီၣ်ယၤလီၤ.
7 တုၤယသးလီၤဘှါဝဲလၢယပူၤဘူးလၢယကသံန့ၣ်ဒီးယသ့ၣ် နီၣ်ထီၣ်နၤလီၤ. ဒီးယတၢ်ထုကဖၣ်လဲၤထီၣ်ဆူနအိၣ်ဆူနတၢ်လုၢ်ဟံၣ်စီဆှံ အပူၤန့ၣ်လီၤ.
8 ပှၤလၢအဘူၣ်ထီၣ်ဘါထီၣ်တၢ်ဂီၤ တၢ်ဖီၣ်တဂိာ်တသီၣ်ဘၣ်တဖၣ်န့ၣ်ညိကွံာ်အတၢ်သးတီဒီးနၤလီၤ.
9 မ့မ့ၢ်ယဲဒၣ်အံၤယကလုၢ်ထီၣ်နၤလၢ တၢ်လုၢ်အိၣ်ဒီးတၢ်သးဝံၣ်စံးထီၣ်ပတြၢၤနၤ
ဒီးယကမၤတၢ်လၢယအၢၣ်လီၤအီလီၤန့ၣ်လီၤ.
တၢ်အုၣ်က့ၤခီၣ်က့ၤန့ၣ်ဟဲလၢယွၤလီၤ.”
10 တုၤနုၤတစု, ယွၤမၤလိာ်ညၣ်, ဒီးညၣ်န့ၣ်ဘှိးထီၣ်ကွံာ်စီၤယိၤနါဆူ ထံကၢၢ်ခိၣ်န့ၣ်လီၤ.