လံာ်ဧိၤဘါဒယၤ
OBADIAH
လံာ်ဖုၣ်ကိာ်ဖိတဘ့ၣ်အံၤဘၣ်တၢ်ကွဲးအီၤ လၢဝ့ၢ်ယရူၤၡလ့ၣ်အတၢ်လီၤပှီၢ်ဖဲချ.ခ.န, ၅၈၆ ဝံၤအလီၢ်ခံခ့ခါဆၢကတီၢ်တကတီၢ်န့ၣ်လီၤ. ပှၤအဒိၣ်ဖိလၢအမ့ၢ်ပှၤယူဒၤဖိအဒုၣ်အဒါလီၢ်လံၤ, အိၣ်ဝဲဒၣ်လၢကီၢ်ယူဒၤအမုၢ်ထီၣ်ကလံၤထံးတဖၣ် သူၣ်ခုသးခုဝဲလၢဝ့ၢ်ယရူၤၡလ့ၣ်အတၢ်လီၤပှီၢ် အဃိတကးဒံးဘၣ်ဟံးန့ၢ်တၢ်ခွဲးတၢ်ယာ်လၢကဂုာ်ဆူၣ်ပျီဆူၣ် ဝ့ၢ်အံၤ, ဒီးမၤစၢၤစ့ၢ်ကီးဒုၣ်ဒါလၢအဟဲနုာ်ဒုးဝ့ၢ်အံၤန့ၣ်လီၤ. ဝံဧိၤဘါဒယၤကတိၤဆိတၢ်ဂ့ၢ်ဘၣ်ဃးကီၢ်အဒိၣ်ကဘၣ်တၢ်စံၣ်ညီၣ် ဒီးတၢ်မၤနၢၤမၤဃၣ်အီၤဃုာ်ဒီးပှၤကလုာ်အဂၤလၢအမ့ၢ်ပှၤအံၣ် စရ့လးဖိအဒုၣ်အဒါတဖၣ်န့ၣ်လီၤ.
1
1 အအံၤစီၤဧိၤဘါဒယၤအတၢ်ထံၣ်လၢညါခီဘၣ်ဃးဒီးပှၤကီၢ်အဒိၣ် ဖိဒ်ကစၢ်ယွၤစံးတ့ၢ်ဝဲအသိးန့ၣ်လီၤ.
ပနၢ်ဟူတၢ်ကစီၣ်လၢကစၢ်ယွၤအအိၣ်, ဒီး အဝဲဆှၢလီၤပှၤစိာ်တၢ်ကစီၣ်တဂၤဆူပှၤကလုာ်တဖၣ်အကျါ,
“ကတဲာ်ကတီၤသုသး, ဂဲၤဆၢထၢၣ်သကိးဒီးမ်ပဒုးတၢ် ထီဒါကီၢ်အဒိၣ်တက့ၢ်.
2 ဒီးယွၤစံးဘၣ်ကီၢ်အဒိၣ်,
“ကွၢ်ကွၢ်, ယကမၤစၢ်လီၤနဂံၢ်နဘါ
ဒီးပှၤကိးဂၤဒဲးကကွၢ်တလီၤနၤလီၤ.
3 နတၢ်သးထီၣ်ထီန့ၣ်လီန့ၢ်လံနၤလံ.
နဝ့ၢ်ခိၣ်မ့ၢ်တိာ်ခၢၣ်သနၢၣ်လၢတၢ်မၤကျၢၤအီၤဒီးလၢၢ် နအိၣ်နဆိးအလီၢ်လၢတၢ်လီၢ်ထီၣ်ထီ
ဒီးနစံးလၢအသးကံၢ်ပူၤ,
“မ့ၢ်မတၤထုးလီၤယၤကန့ၢ်တဂၤလဲၣ်.”
4 နမ့ၢ်ယူၤနဲထီမးဒ်လံာ်ကြီကြာ်အသိး
ဒီးနမ့ၢ်ပာ်နသွံလၢဆၣ်ဧိၤဖီဧိၤအကျါဘၣ်ဆၣ်,
ယကထုးလီၤနၤလၢတၢ်လီၢ်အဝဲန့ၣ်လီၤ.
5 ဖဲတၢ်ဟုၣ်တၢ်ဘျၣ်တဖၣ်ဟဲဆူနအိၣ်, လၢမုၢ်နၤန့ၣ်,
ကဟံးန့ၢ်ထဲတၢ်လၢအသးလီဝဲဧိၤန့ၣ်လီၤ.
ဖဲပှၤထၢဖှိၣ်စပံးသၣ်တဖၣ်ဟဲဝဲန့ၣ် ထီဘိပာ်လီၤတဲာ်ဒံးတၤသၣ်အိၣ်ပြါ
မ့မ့ၢ်နဒုၣ်နဒါတဖၣ်ကမၤဟးဂီၤနၤလၢာ်လၢာ်ဆ့ဆ့လီၤ.
6 စီၤဧ့ၡီၤအစၢၤအသွဲၣ်, ပှၤအဒိၣ်ဖိသ့ၣ်ဧၢ, သုတၢ်ထူးတၢ်တီၤတဖၣ်ဘၣ်တၢ်ဂုာ်န့ၢ်ဆူၣ် အီၤလံ.
7 ပှၤလၢအဒီတံၤဒီသကိးတ့ၢ်ဒီးသုခဲလၢာ်လီန့ၢ်သုလံ
ဒီးနီၣ်ထီၣ်ကွံာ်လံသုလၢသုကီၢ်အပူၤ,
ပှၤလၢအအိၣ်ဃူအိၣ်ဖိးဒီးသုတဖၣ်မၤနၢၤသုလံ,
သုတံၤသုသကိးလၢသုနာ်န့ၢ်အီၤတဖၣ်ပာ်လီၤလံ ပျံၤသကွီၤလၢသုဂီၢ်
ဒီးစံး, “အတၢ်ကူၣ်သ့ကူၣ်ဘၣ်လၢအအိၣ်ဒီးအီၤခဲလၢာ်န့ၣ်အိၣ်ဖဲလဲၣ်” န့ၣ်လီၤ.
8 မုၢ်တနံၤလၢယစံၣ်ညီၣ်ကီၢ်အဒိၣ်န့ၣ်,
ယကမၤဟးဂီၤကွံာ်အပှၤကူၣ်သ့ကူၣ်ဘၣ်တဖၣ်
ဒီးတြူာ်ကွံာ်အတၢ်ကူၣ်သ့ခဲလၢာ်န့ၣ်လီၤ.
9 ပှၤဒုးသုးဖိတဖၣ်လၢဝ့ၢ်တ့ၤမၣ်အပူၤကပျံၤတၢ်
ဒီးကယဲၢ်ပှၤသုးဖိတဖၣ်လၢကီၢ်အဒိၣ်ပူၤန့ၣ်ကဘၣ်တၢ်မၤသံကွံာ် အီၤလီၤ.
10 မ့ၢ်လၢနဂုာ်ဆူၣ်ပျီဆူၣ်ဒီးမၤသံနဒီပုၢ်ဝဲၢ်စီၤယၤကိာ် အစၢၤအသွဲၣ်တဖၣ်အဃိ,
နကဘၣ်တၢ်မၤဟးဂီၤကွံာ်နၤ
ဒီးနကဘၣ်တၢ်မၤမဲာ်ဆှးနၤလီၤထူလီၤယိာ်လီၤ.
11 ဖဲဒုၣ်ဒါတဖၣ်စိာ်ကွံာ်ဝ့ၢ်ယရူၤၡလ့ၣ်အတၢ်ထူးတၢ်တီၤအမုၢ်နံၤ န့ၣ်နဆၢထၢၣ်စီၤစုၤလၢအယံၤ,
ဖဲဒုၣ်ဒါတဖၣ်နုာ်လီၤဆူဝ့ၢ်ယရူၤၡလ့ၣ်အပဲတြီပူၤဒီးမၤတၢ် ဖးလၢအတၢ်ထူးတၢ်တီၤအမုၢ်နံၤန့ၣ်နမၤနသးအၢထဲသိးသိးဒီး အဝဲသ့ၣ်န့ၣ်လီၤ.
12 လၢနဒီပုၢ်ဝဲၢ်တဖၣ်လၢကီၢ်ယူဒၤဘၣ်ကီဘၣ်ခဲအမုၢ်နံၤန့ၣ်, နတကြၢးကွၢ်ကီအီၤဒီးဆၢကျၢၤသးအီၤဘၣ်. လၢပှၤယူဒၤဖိဘၣ်တၢ်မၤဟးဂီၤအီၤအမုၢ်နံၤန့ၣ်နတကြၢးသး ခုလၢအဖီခိၣ်ဘၣ်, လၢအဝဲသ့ၣ်ဘၣ်တၢ်ကိၢ်တၢ်ဂီၤအမုၢ်နံၤန့ၣ်နတ ကြၢးကတိၤတၢ်အိၣ်ဒီးတၢ်ပာ်နသးကဖၢလၢဘၣ်.
13 နတကြၢးလဲၤနုာ်ဆူဝ့ၢ်အပူၤလၢယပှၤဂီၢ်မုၢ်အတၢ်ဘၣ်ကီဘၣ်ခဲ အမုၢ်နံၤန့ၣ်ဘၣ်.
နတကြၢးဂုာ်န့ၢ်အဝဲသ့ၣ်အတၢ်ထူးတၢ်တီၤလၢအတၢ်ဘၣ်ကီဘၣ်ခဲ အမုၢ်နံၤန့ၣ်ဘၣ်.
14 နတကြၢးဆၢထၢၣ်လၢကျဲဖးဒ့ဒ်သိး
နကဖီၣ်န့ၢ်ပှၤလၢအဃ့ၢ်ပူၤဖျဲးအသးတဖၣ်န့ၣ်ဘၣ်.
နတကြၢးဟ့ၣ်လီၤကွံာ်အဝဲသ့ၣ်ဆူဒုၣ်ဒါအစုပူၤ
လၢတၢ်ကိၢ်တၢ်ဂီၤအမုၢ်နံၤန့ၣ်ဘၣ်.
15 မုၢ်နံၤလၢယၤ, ယွၤကစံၣ်ညီၣ်ပှၤကလုာ်ခဲလၢာ်န့ၣ်အိၣ်ဘူးဝဲလီၤ.
ဒ်နမၤတ့ၢ်နဲအသိးတၢ်ကမၤက့ၤနၤလီၤ.
နတၢ်ဖံးတၢ်မၤတဖၣ်ကဟဲဘၣ်ကဒါက့ၤနၤလီၤ.
16 အဂ့ၢ်ဒ်အံၤ, ဒ်သုအီတ့ၢ်တၢ်စံၣ်ညီၣ်အလီခီလၢ
ယကစၢၢ်စီဆှံအလိၤအသိးန့ၣ်,
ပှၤကလုာ်အိၣ်ဝးတရံးခဲလၢာ်စ့ၢ်ကီးကအီဝဲလီၤ.
ကအီဝဲဒီးယူၢ်လီၤဝဲဆၢထၢၣ်တကျၢၤလၢၤဘၣ်ဒီးကဟါမၢ်ကွံာ် ဝဲဒ်ပှၤလၢအတအိၣ်တ့ၢ်ဘၣ်နီတစုအသိးန့ၣ်လီၤ.
17 မ့မ့ၢ်လၢကစၢၢ်စံယိၣ်အလိၤန့ၣ်ပှၤတနီၤကပူၤဖျဲးဝဲဒီးကမ့ၢ်ဝဲ တၢ်လီၢ်စီဆှံလီၤ.
ဒီးစီၤယၤကိာ်အပှၤဟံၣ်ဖိကန့ၢ်ဘၣ်က့ၤအထံ အကီၢ်လၢအမ့ၢ်အတၢ်န့ၢ်သါဒၣ်ဝဲန့ၣ်လီၤ.
18 စီၤယၤကိာ်အပှၤဟံၣ်ဖိကမၤအသးဒ်မ့ၣ်အူအသိး,
စီၤယိၤသးအပှၤဟံၣ်ဖိဒ်မ့ၣ်အူလၣ်အသိး, ဒီးစီၤဧ့ၡီၤအပှၤဟံၣ်ဖိဒ်လီၢ်ခိၣ်ဆၢၣ်အသိးဒီးမ့ၣ်အူကအီၣ် ကွံာ်အီၤတုၤပှၤအမူ
တအိၣ်တီၢ်လၢၤဘၣ်လၢစီၤဧ့ၡီၤအပှၤဟံၣ်ဖိအကျါနီတဂၤဘၣ်န့ၣ်လီၤ.
အဂ့ၢ်ဒ်အံၤယၤ, ယွၤစံးတ့ၢ်လံတၢ်လံ.
19 ပှၤလၢကီၢ်ယူဒၤကလံၤထံးတဖၣ်ကမၤန့ၢ်က့ၤ ပှၤအဒိၣ်ဖိအကီၢ်
ဒီးပှၤအိၣ်လၢမုၢ်နုာ်ကစၢၢ်အတၢ်ပၢၤထံးတဖၣ်ကမၤန့ၢ်က့ၤပှၤ ဖလ့ၡသးဖိအကီၢ်,
ပှၤအံၣ်စရ့လးဖိတဖၣ်ကမၤန့ၢ်က့ၤအ့ဖရဲၣ်အကီၢ်,
ၡၤမရံအကီၢ်ဒီးပှၤဘံၣ်ယၤမံၣ်ဖိကမၤန့ၢ်က့ၤကီၢ်ကံၤလဧး လီၤ.
20 ပှၤအံၣ်စရ့လးဖိလၢကလံၤစိးလၢအဘၣ်တၢ်စိာ်မၢကဲကုၢ်အီၤတဖၣ် အသုးမုၢ်ကဟဲက့ၤဒီးကမၤန့ၢ်က့ၤကီၢ်ဖံၤနံက့ၤတုၤလၢဝ့ၢ်စၤရဖးသးလီၤ.
ပှၤယရူၤၡလ့ၣ်ဖိလၢအဘၣ်တၢ်စိာ်မၢကဲကုၢ်အီၤဆူဝ့ၢ်စဖၤရးတဖၣ်
ကမၤန့ၢ်က့ၤဝ့ၢ်တဖၣ်လၢကီၢ်ယူဒၤကလံၤထံးတခီလီၤ.
21 ဝ့ၢ်ယရူၤၡလ့ၣ်အပှၤမၤနၢၤတၢ်တဖၣ်ကဟဲထီၣ်ဒုးကီၢ်အဒိၣ်ဒီးမၤနၢၤကွံာ်အီၤလီၤ.
ဒီးယွၤအနီၢ်ကစၢ်ဒၣ်ဝဲကမ့ၢ်စီၤပၤန့ၣ်လီၤ.