18
1 ဒီးအကတီၢ်ဖဲန့ၣ်စီၤပၤတအိၣ်ဒံးလၢအံၣ်စရ့လးအပူၤဘၣ်. လၢမုၢ်နံၤတဖၣ်အပူၤန့ၣ်ဒၣ်အဒူၣ်ဃုန့ၢ်တၢ်လီၢ်လၢအတၢ်န့ၢ်သါအဂီၢ် ဒ်သိးကအိၣ်ကဆိးဝဲလၢအပူၤလီၤ. အဂ့ၢ်ဒ်အံၤ, အဝဲသ့ၣ်တဒိးန့ၢ်ဒံးဘၣ်တၢ်လီၢ်နီတတီၤလၢအဂီၢ်ဒၣ်ဝဲ လၢအံၣ်စရ့လးအဒူၣ်တဖၣ်အကျါန့ၣ်ဘၣ်.
2 မၤသးဒ်န့ၣ်ဒီး, ပှၤဒၣ်ဖိတဖၣ်ဃုထၢထီၣ်ပှၤအကြၢးအဘၣ်ယဲၢ်ဂၤ လၢဟံၣ်ဒူၣ်ဃီထၢတဖၣ်လၢဒၣ်အဒူၣ်အကျါဒီးဆှၢလီၤအီၤလၢ ဝ့ၢ်စိးရၤဒီးအ့ၤၡတိလး ဒီးမၤလိာ်အီၤလၢကဃုထံၣ်န့ၢ်တၢ်လီၢ်တတီၤန့ၣ်လီၤ. အဝဲသ့ၣ်တုၤဃီၤလၢအ့ဖရဲၣ်အကစၢၢ်ကလိဖဲစီၤမံၤကါအဟံၣ်လီၤ.
3 ဒီးဖဲအဝဲသ့ၣ်အိၣ်ဖဲန့ၣ်အခါန့ၣ်, အဝဲသ့ၣ်ပာ်သူၣ်ပာ်သးဝဲ ပှၤလ့ၤဝံဖိကတိၤတၢ်အကလုၢ်အသီၣ်အဃိလဲၤဆူအအိၣ်ဒီး သံကွၢ်အီၤ, “နမၤတၢ်မနုၤဖဲအံၤလဲၣ်. မတၤဆှၢနၤဆူအံၤလဲၣ်.”
4 ဒီးအဝဲစံးဆၢ, “ယအိၣ်ဒီးတၢ်သုးတၢ်ကျဲၤဒီးစီၤမံၤကါလၢ အဟ့ၣ်ယၤတၢ်ဘူးတၢ်လဲလၢယကမၤတၢ်ဒ်အပှၤလုၢ်တၢ်အခိၣ်အသိးလီၤ.”
5 ဒီးအဝဲသ့ၣ်စံးဘၣ်အီၤ, “သံကွၢ်ကစၢ်ယွၤလၢပတၢ်လဲၤအံၤမ့ၢ် အကကဲထီၣ်လိၣ်ထီၣ်ကစီဒီဧါ, န့ၣ်တက့ၢ်.”
6 ဒီးပှၤလုၢ်တၢ်အခိၣ်စံးဆၢဝဲ, “သုဘၣ်ယိၣ်ဘၣ်ဘှီတၢ်အလီၢ်တအိၣ်နီတမံၤဘၣ်. ယွၤအံးထွဲကွၢ်ထွဲသုလၢတၢ်လဲၤတဘျီအံၤအပူၤလီၤ.”
7 မၤသးဒ်န့ၣ်ဒီး, ပှၤယဲၢ်ဂၤန့ၣ်ဟးထီၣ်ဒီးလဲၤဆူဝ့ၢ်လ့ၡ့ၣ်လီၤ. အဝဲသ့ၣ်ထံၣ်ပှၤအိၣ်ဖဲန့ၣ်တဖၣ်အိၣ်မူပူၤဒုၣ်ပူၤဒါဒ်ပှၤစံဒိၣ်ဖိတဖၣ်အသိးန့ၣ်လီၤ. အဝဲသ့ၣ်မ့ၢ်ပှၤအိၣ်ခုၣ်ခုၣ်မုာ်မုာ်ဒီးမ့ၢ်ပှၤကစုဒုတဖၣ်လီၤ. တဂ့ၢ်လိာ်ဘှီလိာ်ဒီးပှၤနီတဂၤဘၣ်. အဝဲသ့ၣ်အိၣ်ဒီးတၢ်လၢအလိၣ်ဘၣ်ဝဲခဲလၢာ်လီၤ. အဝဲသ့ၣ်အိၣ်ယံၤဒီးပှၤစံဒိၣ်ဖိတဖၣ် ဒီးတမၤဃုာ်လိာ်အသးဒီးပှၤနီတဖုဘၣ်.
8 ဖဲပှၤယဲၢ်ဂၤက့ၤကဒါက့ၤဆူဝ့ၢ်စိရးဒီးအ့ၤၡတိလးန့ၣ်အပှၤ ကလုာ်ဒၣ်ဝဲသံကွၢ်အီၤမ့ၢ်အထံၣ်န့ၢ်တၢ်မနုၤတဖၣ်လဲၣ်န့ၣ်လီၤ.
9 ဒီးအဝဲသ့ၣ်စံးဆၢ, “မ်ပလဲၤဒုးသကိးဝ့ၢ်လ့ၡ့ၣ်တက့ၢ်. ပထံၣ်ကီၢ်န့ၣ်ဂ့ၤဝဲဒိၣ်မးလီၤ. သုတမၤတၢ်နီတမံၤဒီးအိၣ်ဖဲအံၤတဂ့ၤ. မၤချ့ချ့ဒီးလဲၤနုာ်မၤန့ၢ်အီၤတက့ၢ်.
10 ဖဲသုတုၤဖဲန့ၣ်ဒီး, သုကထံၣ်လၢပှၤအိၣ်ဖဲန့ၣ်တဖၣ် တပလီၢ်အသးလၢတၢ်နီတမံၤဘၣ်. မ့ၢ်ဝဲကီၢ်ဖးဒိၣ်တဘ့ၣ်လီၤ. အိၣ်ဝဲဒီးတၢ်ကိးမံၤလၢပှၤတဂၤမိၢ်န့ၢ်သးလီအီၤန့ၣ်လီၤ. ဒီးယွၤဟ့ၣ်လီၤအီၤလၢသုစုပူၤလံန့ၣ်လီၤ.”
11 မၤသးဒ်န့ၣ်ဒီး, ပှၤအဂၤဃုကယၤလၢဒၣ်အဒူၣ်ဟးထီၣ်လၢဝ့ၢ်စိးရၤ ဒီးအ့ၤၡတိလးဒီးအိၣ်ကတဲာ်ကတီၤအသးလၢတၢ်ဒုးတၢ်ယၤအဂီၢ်လီၤ.
12 အဝဲသ့ၣ်လဲၤထီၣ်ဒီးသူၣ်ဒဲလၢကံးရယးယဧၤရံၣ်အမုၢ်နုာ်လၢ ကီၢ်ယူဒၤအပူၤလီၤ. မၤသးဒ်န့ၣ်ဒီး, တၢ်လီၢ်အံၤဘၣ်တၢ်ကိးအီၤလၢဒၣ်သူၣ်ဒဲအလီၢ်လီၤ.
13 ဒီးအဝဲသ့ၣ်လဲၤကဒီးဆူညါတုၤလၢစီၤမံၤကါအဟံၣ်အိၣ်လၢအ့ ဖရဲၣ်အကစၢၢ်ကလိန့ၣ်လီၤ.
14 တုၤနုၤတစု, ပှၤယဲၢ်ဂၤလၢအလဲၤဃုထံၣ်န့ၢ်ကီၢ်အိၣ်ဝးတရံးဝ့ၢ်လ့ၡ့ၣ်န့ၣ် စံးဘၣ်အတံၤသကိးတဖၣ်, “မ့ၢ်သုသ့ၣ်ညါလၢဟံၣ်ဖဲအံၤတဖၣ်အကျါတဟံၣ်အိၣ်ဒီး တၢ်ဂီၤစိးပျၤအသးလၢသ့ၣ်ဒီးဘၣ်တၢ်ကးဘၢအီၤလၢစ့နီၢ်တခါန့ၣ်ဧါ. တၢ်ဂီၤအဂၤတဖၣ်ဒီးအ့ဖိးတဘ့ၣ်အိၣ်စ့ၢ်ကီးလီၤ. သုဆိကမိၣ်လၢပကြၢးမၤဒ်လဲၣ်.”
15 မၤသးဒ်န့ၣ်ဒီး, အဝဲသ့ၣ်လဲၤနုာ်ဆူစီၤမံၤကါအဟံၣ်ပူၤ ဖဲပှၤလ့ၤဝံသးစၢ်တဂၤအိၣ်ဝဲဒီးသံကွၢ်ဝဲမ့ၢ်အအိၣ်မူဒ်လဲၣ်အဂ့ၢ်န့ၣ်လီၤ.
16 ဖဲအခါန့ၣ်ဒၣ်အသုးဖိဃုကယၤဂၤလၢအိၣ်ကတဲာ်ကတီၤအသးလၢ ကဒုးတၢ်အဂီၢ်န့ၣ်ဆၢထၢၣ်လၢကျဲစၢၤန့ၣ်လီၤ.
17 ဒီးပှၤကွၢ်ဟုၣ်ကွၢ်စူးတၢ်ယဲၢ်ဂၤန့ၣ်လဲၤဃီၤလိၤလိၤဆူဟံၣ်ပူၤဒီးဟံးန့ၢ် တၢ်ဂီၤစိးပျၤအသးလၢသ့ၣ်ဒီးတၢ်ကးဘၢအီၤလၢစ့နီၢ်, တၢ်ဂီၤအဂၤတဖၣ်ဒီးအ့ဖိးတဘ့ၣ်ဖဲပှၤလုၢ်တၢ်အခိၣ်အိၣ်ဒီး ပှၤစိာ်တၢ်စုကဝဲၤအဂၤဃုကယၤလၢကျဲစၢၤအကတီၢ်န့ၣ်လီၤ.
18 ဖဲပှၤတဖၣ်လဲၤနုာ်ဆူစီၤမံၤကါအဟံၣ်ပူၤဒီးဟံးန့ၢ်တၢ်အပီး အလီစီဆှံတဖၣ်န့ၣ်ပှၤလုၢ်တၢ်အခိၣ်သံကွၢ်အဝဲသ့ၣ်, “သုမၤတၢ်မနုၤလဲၣ်.”
19 ဒီးအဝဲသ့ၣ်စံး, “အိၣ်ဘှီၣ်ကလာ်တက့ၢ်. ကတိၤတၢ်နီတဘီတဂ့ၤ. ဟဲသကိးဒီးပှၤဒီးကဲထီၣ်ပပှၤလုၢ်တၢ်အဒိၣ်ဒီးပှၤဟ့ၣ်ကူၣ်ဟ့ၣ်ဖးတၢ်တက့ၢ်. နတအဲၣ်ဒိးကဲထီၣ်ပှၤလုၢ်တၢ်အဒိၣ်လၢအံၣ်စရ့လး အဒူၣ်ဒီဒူၣ်အဂီၢ်အါန့ၢ်ဟံၣ်ဖိဃီဖိတဒူၣ်ဧိၤအဂီၢ်ဘၣ်ဧါ.”
20 တၢ်အံၤမၤသးခုပှၤလုၢ်တၢ်အခိၣ်အါမးအဃိအဝဲဟံးန့ၢ် တၢ်အပီးအလီစီဆှံတဖၣ်ဒီးလဲၤဃုာ်ဒီးအဝဲသ့ၣ်န့ၣ်လီၤ.
21 ဒီးအဝဲသ့ၣ်ဃၣ်ကဒါအသးဒီးစးထီၣ်အတၢ်လဲၤဃုာ်ဒီးအဖိတဖၣ်, အဆၣ်ဖိကီၢ်ဖိဒီးအတၢ်ဖိတၢ်လံၤလၢအလဲၤလၢအမဲာ်ညါန့ၣ်လီၤ.
22 ဖဲအဝဲသ့ၣ်လဲၤတၢ်စီၤစုၤယံၤထီၣ်ဒီးစီၤမံၤကါအဟံၣ်န့ၣ် စီၤမံၤကါကိးထီၣ်ပှၤအိၣ်လၢအဃၢၤတဖၣ်လၢကဒုးတၢ်အဂီၢ်လီၤ.
23 ဒီးတုၤအဝဲသ့ၣ်ချုးန့ၢ်ပှၤဒၣ်ဖိတဖၣ်ဒီးကိးပသူထီၣ်ဆူအဝဲသ့ၣ်အအိၣ်လီၤ. ပှၤဒၣ်ဖိတဖၣ်တရံးဃီၤအသးဒီးသံကွၢ်စီၤမံၤကါ, “မ့ၢ်အဘၣ်မနုၤလဲၣ်. ဘၣ်မနုၤပှၤဂီၢ်မုၢ်အံၤပာ်ဖှိၣ်အသးန့ၣ်လဲၣ်.”
24 စီၤမံၤကါစံးဆၢဝဲဒၣ်, “သုစံးမ့ၢ်အဘၣ်မနုၤလဲၣ်န့ၣ်အခီပညီဒ်လဲၣ်. သုစိာ်ကွံာ်ယပှၤလုၢ်တၢ်အခိၣ်ဒီးကစၢ်တဖၣ်လၢယမၤအီၤဝံၤဒီးသုဟးထီၣ်လီၤ. တၢ်မနုၤအိၣ်တ့ၢ်ဒီးယၤန့ၣ်လဲၣ်.”
25 ပှၤဒၣ်ဖိတဖၣ်စံးဘၣ်အီၤ, “နမ့ၢ်တအဲၣ်ဒိးလၢပှၤသ့ၣ်တဖၣ်အံၤ သးဒိၣ်ထီၣ်ဒီးကဒုးနၤဘၣ်န့ၣ်တဲတၢ်နီတမံၤတဂ့ၤ. မ့တမ့ၢ်ဘၣ်ဒီးနၤဒီးနပှၤဟံၣ်ဖိခဲလၢာ်ကသံလီၤ.”
26 တုၤနုၤတစု, ပှၤဒၣ်ဖိတဖၣ်လဲၤဆူညါလီၤ. စီၤမံၤကါထံၣ်ဝဲလၢပှၤတဖၣ်အံၤ အဂံၢ်အဘါဆူၣ်ကဲာ်ဆိးလၢအဂီၢ်သတးဒီး အဝဲဃၣ်အသးဒီးက့ၤဆူဟံၣ်လီၤ.
27 တုၤပှၤဒၣ်ဖိတဖၣ်စိာ်ကွံာ်ပှၤလုၢ်တၢ်အခိၣ်ဒီးတၢ်လၢစီၤမံၤကါမၤတ့ၢ်ဝဲတဖၣ်န့ၣ်, အဝဲသ့ၣ်လဲၤဒုးဝ့ၢ်လ့ၡ့ၣ်, လၢအပှၤဂီၢ်မုၢ်အိၣ်ခုၣ်ခုၣ်မုာ်မုာ်ဒီးအိၣ်ကစုဒု, လၢအအိၣ်လၢတၢ်ပျီပူၤတခါဃီဒီးဝ့ၢ်ဘ့ၤသရဃိာ်န့ၣ်လီၤ. အဝဲသ့ၣ်မၤသံကွံာ်ပှၤအိၣ်ဖဲန့ၣ်တဖၣ်ဒီးဒွဲၣ်ကွံာ်ဝ့ၢ်န့ၣ်လၢမ့ၣ်အူလီၤ.
28 ဒီးပှၤလၢကအုၣ်က့ၤခီၣ်က့ၤအဝဲသ့ၣ်တအိၣ်ဘၣ်နီတဂၤဘၣ်. အဂ့ၢ်ဒ်အံၤဝ့ၢ်လ့ၡ့ၣ်အိၣ်စီၤစုၤဒီးဝ့ၢ်စံဒိၣ်ဖးယံၤဒီး တမၤဃုာ်လိာ်သးဒီးပှၤနီတဖုဘၣ်. ပှၤဒၣ်ဖိတဖၣ်သူၣ်ထီၣ်ကဒါက့ၤဝ့ၢ်န့ၣ်ဒီးအိၣ်ဆိးဝဲဖဲန့ၣ်လီၤ.
29 ဒီးအဝဲသ့ၣ်လဲလိာ်က့ၤဝ့ၢ်န့ၣ်အမံၤလၢလ့ၡ့ၣ်ဆူဒၣ်, ပိာ်ထွဲထီၣ်အပၢ်ဖးဒိၣ်, စီၤယၤကိာ်အဖိခွါလၢအဝဲသ့ၣ်လီၤစၢၤဝဲအမံၤအခံန့ၣ်လီၤ.
30 ဒီးပှၤဒၣ်ဖိတဖၣ်ဆီလီၤတၢ်ဂီၤစိးပျၤအသးလၢတၢ်ကဘူၣ်ထီၣ် ဘါထီၣ်အီၤအဂီၢ်ဒီးစီၤမိၤၡ့အလံၤ, စီၤက့ရၡိၣ်အဖိခွါ, စီၤယိနၤသၣ်မၤပှၤလုၢ်တၢ်အဒိၣ်အတၢ်ဖံးတၢ်မၤလၢပှၤဒၣ်ဖိတဖၣ်အဂီၢ်လီၤ. ဒီးအစၢၤအသွဲၣ်တဖၣ်မၤပှၤလုၢ်တၢ်အဒိၣ်အတၢ်မၤတုၤလၢပှၤဂီၢ်မုၢ် ဘၣ်တၢ်စိာ်ကွံာ်အီၤဆူတၢ်စိာ်မၢကဲကုၢ်အလီၢ်တစုန့ၣ်လီၤ.
31 ဒီးစီၤမံၤကါအတၢ်ဂီၤစိးပျၤအသးအိၣ်ဝဲဖဲန့ၣ်ယံာ်ထဲသိးဒီးဒဲစီဆှံ အိၣ်ဖဲဝ့ၢ်ၡံလိၣ်အပူၤန့ၣ်လီၤ.