17
1 တဘျီပှၤအိၣ်ဝဲတဂၤအမံၤလၢစီၤမံၤကါ, ဒီးအိၣ်ဝဲဒၣ်လၢအ့ဖရဲၣ်အကစၢၢ်ကလိန့ၣ်လီၤ.
2 ဒီးအဝဲစံးဘၣ်အမိၢ်, “ဖဲပှၤတဂၤဟုၣ်စ့နီၢ်တကထိတကယၤဘး လၢနအိၣ်န့ၣ်နပာ်တၢ်ဆိၣ်အၢလၢပှၤဟုၣ်တၢ်တဂၤန့ၣ်အဖီခိၣ်လီၤ. ယနၢ်ဟူတ့ၢ်နမၤတၢ်န့ၣ်လီၤ. ကွၢ်ကွၢ်, တိၢ်န့ၣ်အိၣ်လၢယအိၣ်လီၤ. ယမ့ၢ်ပှၤတဂၤလၢအဟံးန့ၢ်အီၤလီၤ.”
ဒီးအမိၢ်စံးဘၣ်အီၤ, “ယဖိခွါဧၢ, မ်ယွၤဆိၣ်ဂ့ၤနၤတက့ၢ်.”
3 ဒီးအဝဲဟ့ၣ်က့ၤတိၢ်န့ၣ်ဆူအမိၢ်အိၣ်, ဒီးအမိၢ်စံး, “ဒ်သိးတၢ်ဆိၣ်အၢသုတလီၤဘၣ်လၢယဖိခွါအဖီခိၣ်တဂ့ၤန့ၣ်, ယနီၢ်ကစၢ်ဒၣ်ယဲယလုၢ်ထီၣ်စ့နီၢ်အံၤဆူယွၤအအိၣ်လၢတၢ်သညူးသပှၢ်အပူၤန့ၣ်လီၤ. တၢ်အံၤကဘၣ်တၢ်သူအီၤလၢတၢ်ကမၤတၢ်ဂီၤစိးပျၤအသးလၢသ့ၣ်ဒီး ကးဘၢအီၤလၢစ့လီၤ. မၤသးဒ်န့ၣ်ဒီး, ခဲအံၤယကဟ့ၣ်ကဒါက့ၤစ့နီၢ်အံၤဆူနအိၣ်လီၤ.”
4 တုၤနုၤတစု, အဝဲဟ့ၣ်ကဒါက့ၤစ့နီၢ်ဆူအမိၢ်အအိၣ်လီၤ. ဒီးအမိၢ်ဟံးန့ၢ်စ့နီၢ်အဘ့ၣ်ခံကယၤဒီးဟ့ၣ်လီၤအီၤဆူပှၤ ပိာ်စ့တဂၤအအိၣ်မၢအမၤတၢ်ဂီၤတခါလၢအစိးပျၤ အသးလၢသ့ၣ်ဒီးကးဘၢအီၤလၢစ့န့ၣ်လီၤ. တၢ်ဂီၤန့ၣ်တၢ်ပာ်အီၤလၢစီၤမံၤကါအဟံၣ်န့ၣ်လီၤ.
5 ဒီးစီၤမံၤကါအိၣ်ဒီးအတၢ်ဘူၣ်ထီၣ်ဘါထီၣ်အလီၢ်ဒၣ်ဝဲလီၤ. အဝဲမၤတၢ်ဂီၤတနီၤဒီးအ့ဖိးတဘ့ၣ် ဒီးပာ်ထီၣ်အဖိခွါအကျါတဂၤဒ်အပှၤလုၢ်တၢ်အဒိၣ်လီၤ.
6 ဖဲန့ၣ်အကတီၢ်န့ၣ်စီၤပၤတအိၣ်ဝဲလၢကီၢ်အံၣ်စရ့လးအပူၤနီတဂၤဘၣ်. ဒီးပှၤကိးဂၤမၤဖဲဒၣ်အသးအိၣ်မၤဝဲဒၣ်န့ၣ်လီၤ.
7 ဒီးလၢတကတီၢ်ဃီန့ၣ်ပှၤလ့ၤဝံသးစၢ်အိၣ်ဝဲတဂၤ လၢဝ့ၢ်ဘ့ၤသလ့ဃ့ၣ်ကီၢ်ယူဒၤအပူၤန့ၣ်လီၤ.
8 ဒီးအဝဲဟးထီၣ်လၢဝ့ၢ်ဘ့ၤသလ့ဃ့ၣ်ဒ်သိးအကဃုန့ၢ်တၢ်လီၢ် တတီၤလၢကအိၣ်ဝဲဆိးဝဲအဂီၢ်လီၤ. ဖဲအဝဲလဲၤတၢ်အဖၢမုၢ်န့ၣ်အဝဲဟဲတုၤလၢစီၤမံၤကါအဟံၣ်လၢ အအိၣ်လၢအ့ဖရဲၣ်အကစၢၢ်ကလိန့ၣ်လီၤ.
9 ဒီးစီၤမံၤကါသံကွၢ်အီၤ, “နဟဲလၢလဲၣ်ခီလဲၣ်.”
ဒီးစံးဆၢဝဲ, “ယမ့ၢ်ပှၤလ့ၤဝံဖိတဂၤလၢဝ့ၢ်ဘ့ၤသလ့ဃ့ၣ်ကီၢ်ယူဒၤ အပူၤန့ၣ်လီၤ. ယဃုတၢ်လီၢ်တတီၤလၢယကအိၣ်ကဆိးယဲအဂီၢ်လီၤ.”
10 ဒီးစီၤမံၤကါစံး, “အိၣ်ဒီးယၤတက့ၢ်. ကဲနဲပှၤဟ့ၣ်ကူၣ်ဟ့ၣ်ဖးတၢ် ဒီးပှၤလုၢ်တၢ်အခိၣ်လၢယဂီၢ်ဒီးယကဟ့ၣ်နၤစ့နီၢ် တနံၣ်အဘ့ၣ်တဆံ, တၢ်ကူတၢ်သိးတနီၤဒီးတၢ်အီၣ်တၢ်အီလီၤ.”
11 ဒီးပှၤလ့ၤဝံသးစၢ်န့ၣ်အၢၣ်လီၤလၢကအိၣ်ဒီးစီၤမံၤကါဒီး ကဲထီၣ်ဒ်အဖိခွါတဂၤလၢအဂီၢ်လီၤ.
12 စီၤမံၤကါပာ်ထီၣ်အီၤဒ်အပှၤလုၢ်တၢ်အခိၣ်ဒီးအိၣ်ဝဲလၢစီၤ မံၤကါအဟံၣ်ပူၤလီၤ.
13 ဒီးစီၤမံၤကါစံး, “ခဲအံၤမ့ၢ်လၢယအိၣ်ဒီးပှၤလ့ၤဝံတဂၤ ဒ်ယပှၤလုၢ်တၢ်အခိၣ်အသိးအဃိဒီးယသ့ၣ်ညါလၢ ယွၤကမၤတၢ်ခဲလၢာ်ဂ့ၤဂ့ၤဘၣ်ဘၣ်လၢယဂီၢ်လီၤ.”